Adilabad Teacher News: ఆదిలాబాద్ జిల్లా జైనధ్ మండలం ఆనంద్ పూర్ గ్రామంలోని ప్రాథమికోన్నత పాఠశాలలో దెయ్యం ఉందని భయపడుతున్నారు విద్యార్థులు. ఈ నెల రెండవ తేదీన పాఠశాలకు బదిలీపై నూతల రవీందర్ అనే ఉపాధ్యాయుడు రాగా.. ఆ రోజు మధ్యాహ్నం పాఠం చెబుతున్న సమయంలో బయట చప్పుడు కావడంతో విద్యార్థులు ఉలిక్కిపడి భయపడ్డారు. దీంతో ఆ ఉపాధ్యాయుడు గమనించి ఏమైందని విద్యార్థులను ప్రశ్నించగా.. వారు ఈ పాఠశాలలో దెయ్యం ఉంది సార్ అందుకే మేము భయపడుతున్నామని చెప్పారు. దీంతో విద్యార్థుల భయాన్ని పోగొట్టడం కోసం ఆ ఉపాధ్యాయుడు రాత్రి అమావాస్య రోజు పాఠశాలలోని ఐదో తరగతి గదిలో దెయ్యం ఉందని విద్యార్థులు చెప్పడంతో ఆ గదిలోనే ఒంటరిగా పడుకుని విద్యార్థులకు ఉన్న అనుమానాన్ని నివృత్తి చేస్తూ వారిలోని భయాన్ని తొలగించారు.
గతేడాది కేమ శ్రావణ్ అనే నాలుగో తరగతి విద్యార్థి దెయ్యం భయంతో పాఠశాల వదిలి వేరే ప్రైవేట్ పాఠశాలలో చేరడం జరిగిందని స్థానికులు తెలుపగా.. ఇలా మళ్లీ ఇతర విద్యార్థులు వెళ్లిపోకుండా విద్యార్థుల భయం పోగొట్టేందుకు జన విజ్ఞాన వేదిక జిల్లా ప్రధాన కార్యదర్శిగా ఉన్న ఆ ఉపాధ్యాయుడు నూతల రవీందర్ అమావాస్య రోజున రాత్రి పాఠశాలలో ఒంటరిగా పడుకొని విద్యార్థులకు ఉన్న దెయ్యం భయాన్ని పోగొట్టారు. దీంతో విద్యార్థుల్లోనూ భయం అనేది పోయింది. ఈ విషయం తెలుసుకున్న పాఠశాల ప్రధానోపాధ్యాయులు జ్ఞానేశ్వర్ రెడ్డి, మిగతా ఉపాధ్యాయులు నూతల రవీందర్ ని అభినందించారు.
ఈ సందర్భంగా పాఠశాల ఉపాధ్యాయుడు నూతల రవీందర్ మాట్లాడుతూ.. జనవిజ్ఞాన వేదిక విద్యార్థులలో ఉన్న భయాలను పోగొట్టడమే ఏకైక లక్ష్యంగా ముందుకు సాగుతుందని ఈ సందర్భంగా జిల్లాలో ఉన్న ఏ పాఠశాలలోనైనా విద్యార్థులు పాఠశాలలో దెయ్యం ఉందని భావనతో భయపడుతున్నట్లయితే వారిని సంప్రదించినట్లయితే జన విజ్ఞాన వేదిక జిల్లా కమిటిగా వెళ్లి ఆయా పాఠశాలల్లో విద్యార్థుల భయాన్ని నివృత్తి చేయడానికి సంసిద్ధంగా ఉన్నట్లు తెలిపారు.