iPhone 14: ఐఫోన్ 14 సిరీస్ లాంచ్ తేదీ లీక్ - నెల కూడా లేదుగా!

ఐఫోన్ 14 సిరీస్‌లో లాంచ్ తేదీ ఆన్‌లైన్‌లో లీకైంది.

ఐఫోన్ 14 లైనప్ లాంచ్ సెప్టెంబర్ 7వ తేదీన లాంచ్ కానుందని తెలుస్తోంది. యాపిల్ ఉత్పత్తుల గురించి ఎక్కువగా లీక్ చేసే వారు ఈ విషయాన్ని తెలిపారు. దీనికి సంబంధించిన సేల్ కూడా త్వరలో ప్రారంభం కానుంది. కొత్త మ్యాక్‌లు, లో ఎండ్, హైఎండ్ ఐప్యాడ్లు, మూడు కొత్త యాపిల్ వాచ్ మోడల్స్ కూడా వీటితో పాటు లాంచ్ కానున్నాయి.

ఐఫోన్ 14 సిరీస్‌కు సంబంధించిన లీకులు ఇప్పటికే చాలా వినిపించాయి. ఈ సిరీస్‌లో ఐఫోన్ 14, ఐఫోన్ 14 ప్రో, ఐఫోన్ 14 మ్యాక్స్, ఐఫోన్ 14 ప్రో మ్యాక్స్ మోడల్స్ ఉండే అవకాశం ఉంది. ఐఫోన్ 14 ప్రో  మోడల్స్‌లో 128 జీబీ నుంచి స్టోరేజ్ వేరియంట్లు ప్రారంభం కానున్నాయని తెలస్తోంది.

ఐఫోన్ 14 ప్రో మోడల్స్‌లో 128 జీబీ, 256 జీబీ, 512 జీబీ, 1 టీబీ... ఇలా మొత్తంగా నాలుగు స్టోరేజ్ వేరియంట్లు ఉండనున్నాయి. ఐఫోన్ 13 ప్రో మోడల్స్‌లో కూడా ఈ తరహాలోనే స్టోరేజ్ వేరియంట్లు ఉండనున్నాయి. ఈ వారం ప్రారంభంలో ప్రముఖ యాపిల్ అనలిస్ట్ మింగ్ చి కువో ఈ స్మార్ట్ ఫోన్ల ధరను లీక్ చేశారు. ఐఫోన్ 13 మోడల్స్ కంటే 15 శాతం అధికంగా వీటి ధర ఉండనుందని తెలుస్తోంది. మింగ్ చి కువో తెలిపిన వివరాల ప్రకారం ఐఫోన్ 14 సిరీస్‌లో ప్రారంభ వేరియంట్ ధర 1,000 నుంచి 1,050 డాలర్ల మధ్యలో (మనదేశ కరెన్సీలో సుమారు రూ.79,000 నుంచి రూ.83,000 మధ్య) ఉండనుంది.

ఐఫోన్ 14 ప్రో సిరీస్‌లో లేటెస్ట్ ఏ16 బయోనిక్ చిప్ ఉండనుందని తెలుస్తోంది. అయితే ఐఫోన్ 14, ఐఫోన్ 14 మ్యాక్స్‌ల్లో ఏ15 బయోనిక్ చిప్, ఐఫోన్ 14 ప్రో, ఐఫోన్ 14 ప్రో మ్యాక్స్‌ల్లో ఏ16 బయోనిక్ చిప్ ఉండే అవకాశం ఉంది. ఐఫోన్ 13 మోడల్స్‌లో కూడా ఏ15 బయోనిక్ చిప్ ప్రాసెసర్‌ను అందించారు.

ఐఫోన్ 14 మ్యాక్స్ స్పెసిఫికేషన్లు (అంచనా)
దీని ఫీచర్లు కూడా గతంలో ఆన్‌లైన్‌లో లీకయ్యాయి. ఈ లీకుల ప్రకారం ఐఫోన్ 14 మ్యాక్స్‌లో 6.68 అంగుళాల ఫ్లెక్సిబుల్ ఓఎల్ఈడీ డిస్‌ప్లే అందించనున్నారు. దీని స్క్రీన్ రిఫ్రెష్ రేట్ 90 హెర్ట్జ్ కాగా, పిక్సెల్ డెన్సిటీ 458 పిక్సెల్స్ పర్ ఇంచ్‌గా ఉండనుంది. 6 జీబీ వరకు ఎల్పీడీడీఆర్4ఎక్స్ ర్యామ్ వీటిలో అందించనున్నారు.

యాపిల్ లేటెస్ట్ ప్రాసెసర్ ఏ15 బయోనిక్ చిప్‌ను ఈ ఫోన్‌లో అందించే అవకాశం ఉంది. ఐఫోన్ 13 సిరీస్, ఐఫోన్ ఎస్ఈ (2022) స్మార్ట్ ఫోన్లలో కూడా ఇదే ప్రాసెసర్‌ను యాపిల్ అందించింది. యాపిల్ ప్రస్తుతం కొత్త ఏ16 బయోనిక్ ప్రాసెసర్‌ను రూపొందించనుందని, అవి ఐఫోన్ 14 ప్రో, ఐఫోన్ 14 ప్రో మ్యాక్స్‌ల్లో ఉండనున్నాయని గతంలో వార్తలు వచ్చాయి. ప్రో మోడల్స్‌లో ఏ ప్రాసెసర్, సాధారణ మోడల్స్‌లో ఏ ప్రాసెసర్ ఉండనుందో తెలియాలంటే మాత్రం సెప్టెంబర్ వరకు ఆగాల్సిందే.

ఈ స్మార్ట్ ఫోన్‌లో వెనకవైపు రెండు కెమెరాలు ఉండనున్నట్లు సమాచారం. వీటి సామర్థ్యం 12 మెగాపిక్సెల్‌గా ఉండవచ్చు. 512 జీబీ, 1 టీబీ స్టోరేజ్ వేరియంట్లు ఈ స్మార్ట్ ఫోన్‌లో ఉండే అవకాశం ఉంది. ఇందులో నాచ్, ఫేస్ ఐడీ రికగ్నిషన్ వంటి ఫీచర్లు కూడా అందించనున్నారు.