రోజుకు తగినంత నీరు తాగితే ఆరోగ్యానికి మంచిదని అందరికీ తెలిసిందే. అయితే కొంతమంది పనిలో పడితే రోజుకు ఎక్కువ నీరు తాగరు. అలాంటి వారి కోసం యాపిల్ ఒక పరిష్కారాన్ని ఆలోచించింది. కానీ ఆ పరిష్కారం ఖరీదు రూ.ఐదు వేల వరకు ఉంటుంది.
స్మార్ట్ ఫోన్, స్మార్ట్ బ్యాండ్, స్మార్ట్ వాచ్‌లను మనం చూసే ఉంటాం. కానీ మీకు స్మార్ట్ వాటర్ బాటిల్ తెలుసా? వింటే ఆశ్చర్యం వేస్తుంది కదూ... యాపిల్ కొత్త స్మార్ట్ వాటర్ బాటిళ్లను లాంచ్ చేసింది. మీ ఫిజికల్ యాక్టివిటీ, ఇతర పనులకు తగినట్లు మీరు రోజుకు ఎన్ని నీరు తాగాలో ఇది తెలుపుతుంది.
ఈ వాటర్ బాటిల్‌ను యాపిల్ హెల్త్ యాప్‌కు సింక్ చేసుకోవచ్చు. ఇందులో హైడ్రేట్ స్పార్క్ ప్రో, హైడ్రేట్ స్పార్క్ ప్రో స్టీల్ వేరియంట్లు అందుబాటులో ఉన్నాయి. వీటిలో హైడ్రేట్ స్పార్క్ ప్రో ధర 59.95 డాలర్లు (సుమారు రూ.4,600) కాగా, హైడ్రేట్ స్పార్క్ ప్రో స్టీల్ ధర 79.95 డాలర్లుగా (సుమారు రూ.6,100) నిర్ణయించారు.
ఇవి ప్రస్తుతానికి మనదేశంలో అందుబాటులో లేవు. కానీ త్వరలో మనదేశంలో లాంచ్ కానున్నాయని వార్తలు వస్తున్నాయి. గతేడాది యాపిల్ పాలిషింగ్ క్లాత్‌ను లాంచ్ చేసింది. దాని ధర రూ.1,900గా నిర్ణయించింది. ఈ క్లాత్‌పై గతంలో ఎన్నో విమర్శలు వచ్చాయి. ఈ వాటర్ బాటిల్ కూడా దాని తరహాలోనే విమర్శలు ఎదుర్కొంటుందా? లేదా అనేది తెలియాల్సి ఉంది.