ప్రో కబడ్డీ లీగ్‌లో తెలుగు టైటాన్స్ పరాజయాల పరంపర ఆగేదే.. లే అన్నట్లు సాగిపోతుంది. యు ముంబాతో శనివారం జరిగిన మ్యాచ్‌లో 38-48 తేడాతో తెలుగు టైటాన్స్ ఓటమి చవి చూసింది. తెలుగు టైటాన్స్ ఈ సీజన్‌లో ఇప్పటివరకు ఏడు మ్యాచ్‌లు ఆడగా.. ఐదు పరాజయాలు ఎదురయ్యాయి. రెండు మ్యాచ్‌లు ‘టై’ అయ్యాయి. ఈ సీజన్‌లో ఇంతవరకు విజయం సాధించని జట్టు కేవలం తెలుగు టైటాన్స్ మాత్రమే. ప్రస్తుతం పాయింట్ల పట్టికలో చివరి స్థానంలో కొనసాగుతోంది.
ఈ మ్యాచ్‌లో రైడింగ్ విభాగం పూర్తిగా చేతులెత్తేసింది. ఎన్నో అంచనాలున్న టాప్ డిఫెండర్ సురీందర్ పదే పదే తప్పిదాలు చేయడంతో యు ముంబాకి ఎన్నో పాయింట్లు దక్కాయి. యు ముంబా ఆటగాడు అభిషేక్ సింగ్‌కు అత్యధికంగా 13 పాయింట్లు దక్కాయి.
తెలుగు టైటాన్స్ నుంచి ఒక్క ఆటగాడు కూడా స్థాయికి తగ్గ ప్రదర్శనని కనబర్చలేకపోయారు. మొత్తంగా మొదటి సగం ముగిసే సమయానికి రెండు సార్లు ఆలౌటైన టైటాన్స్ 13-28తో వెనకబడిపోయింది. ఇక రెండో సగంలోనూ ఒకసారి ఆలౌట్ అయింది.
మొత్తం 12 జట్లు ఈ సీజన్‌లో తలపడుతున్నాయి. తెలుగు టైటాన్స్ 10 పాయింట్లతో పట్టికలో చిట్టచివరి స్థానంలో ఉండగా.. యు ముంబా 25 పాయింట్లతో మూడో స్థానానికి చేరింది.