Sunil Chhetri to be felicitated by the AIFF on the occasion of his 150th appearance for India: ప్రపంచవ్యాప్తంగా ఫుట్‌బాల్‌(Foot Ball)కు ఉన్న క్రేజే వేరు. రొనాల్డో, మెస్సీ, ఎంబాపే వంటి దిగ్గజ ఆటగాళ్ల అద్భుత ప్రదర్శనకు లోకమంతా ఊగిపోతుంది. ఆర్జనలో, అభిమానంలో ఆటగాళ్ల స్థాయి ఆకాశమంత ఎత్తున ఉంటుంది. భారత్‌లో మాత్రం ఫుట్‌బాల్‌కు అంత ఆదరణ లేదు. అయినా మనకూ ఒక మెస్సీ  ఉన్నాడు. తన ఆటతీరుతో భారత్‌లో ఫుట్‌బాల్‌ ఉనికిని కాపాడుతూ వస్తున్నాడు. తన ఆటతో భారత ఫుట్‌బాల్‌కు చిరునామాగా మారాడు. భారత్‌ ఫుట్‌బాల్‌ చరిత్రలో తన ఆట గురించి అందరూ మాట్లాడుకునేలా చేయగలిగాడు. తన అసాధారణ ప్రదర్శనతో తనకంటూ ప్రత్యేక గుర్తింపు తెచ్చుకున్నాడు. అతడే సునీల్‌ ఛెత్రీ(Sunil Chhetri).


దాదాపు రెండు దశాబ్దాల కింద అరంగేట్రం చేసిన భారత ఫుట్‌బాల్‌ స్టార్‌ సునీల్‌ ఛెత్రి.. మరో మైలురాయిని అందుకోనున్నాడు. ఈ మంగళవారు అఫ్గానిస్థాన్‌తో జరిగే ప్రపంచకప్‌ క్వాలిఫయర్‌ ఛెత్రి కెరీర్‌లో 150వ అంతర్జాతీయ మ్యాచ్‌ ఆడనున్నాడు. అంతర్జాతీయ ఫుట్‌బాల్‌లో 150 లేదా అంతకన్నా ఎక్కువ మ్యాచ్‌లు ఆడిన 40వ ఫుట్‌బాలర్‌గా అతడు నిలవనున్నాడు. ఈ జాబితాలో పోర్చుగల్‌ సూపర్‌స్టార్‌ రొనాల్డో 205 మొదటి స్థానంలో ఉన్నాడు. అఫ్గాన్‌తో మ్యాచ్‌ సందర్భంగా ఛెత్రిని సన్మానిస్తామని అఖిల భారత ఫుట్‌బాల్‌ (AISF) సమాఖ్య ప్రకటించింది. 39 ఏళ్ల ఛెత్రి 2005లో పాకిస్థాన్‌తో మ్యాచ్‌తో అరంగేట్రం చేశాడు. 


ఆ రికార్డులు, ఘనతలు 

18 ఏళ్ల అంతర్జాతీయ కెరీర్‌లో ఏ భారత ఆటగాడికీ సాధ్యం కాని ఘనతలు, రికార్డులతో చరిత్ర లిఖించిన ఆ ఆటగాడే సునీల్‌ ఛెత్రీ. మైదానంలో ఫార్వర్డ్‌గా, భారత జట్టు కెప్టెన్‌ హోదాలో ఛెత్రీ ఎన్నో మైలురాళ్లు దాటాడు. 40 ఏళ్ల వయసులోనూ అమితోత్సాహంతో భారత జట్టును నడిపిస్తున్నాడు. భారత ఫుట్‌బాల్‌ అభిమానులారా.. మీరంతా పెద్ద సంఖ్యలో స్టేడియానికి వచ్చి మాకు మద్దతు పలకండి. మైదానంలో ఫ్యాన్స్‌ అండగా ఉంటే విజయానికి కావలసిన ప్రేరణ లభిస్తుంది. మీరు ఆటకు మద్దతు పలికితేనే భారత్‌లో ఫుట్‌బాల్‌ స్థాయి పెరుగుతుంది అని పిలుపునిచ్చి భారత్‌లో ఫుట్‌బాల్‌ ఆదరణ కోసం గళమెత్తాడు ఛెత్రి.

 

క్లబ్‌ల తరఫున సత్తా చాటి..

18 ఏళ్ల వయసులో ఛెత్రీ తొలిసారి ప్రొఫెషనల్‌ ఫుట్‌బాల్‌ లీగ్‌లోకి అడుగు పెట్టాడు. వందేళ్లకు పైగా చరిత్ర ఉన్న కోల్‌కతాకు చెందిన మోహన్‌ బగాన్‌ క్లబ్‌ ఛెత్రీకి తొలి అవకాశం కల్పించింది. సీజన్‌లో ఆరు గోల్స్‌తో అతను సత్తా చాటాడు. మోహన్‌బగాన్‌ తర్వాత జేసీటీ, ఈస్ట్‌ బెంగాల్, డెంపో, చిరాగ్‌ యునైటెడ్, చర్చిల్‌ బ్రదర్స్, ముంబై సిటీ, బెంగళూరు.. ఇలా భారత ఫుట్‌బాల్‌లో ప్రత్యేక విలువ ఉన్న, ప్రతిష్ఠాత్మక క్లబ్‌లు అన్నింటికీ ఛెత్రీ ప్రాతినిధ్యం వహించాడు. అమెరికాకు చెందిన కాన్సస్‌ సిటీ విజార్డ్స్‌ క్లబ్, పోర్చుగీస్‌కు చెందిన స్పోర్టింగ్‌ సీపీ క్లబ్‌ తరఫునా అతను ఆడాడు. ఎన్‌ఎఫ్‌ఎల్‌తో మొదలు పెట్టి ఐ లీగ్, మేజర్‌ లీగ్‌ సాకర్, లిగా ప్రొ, ఇండియన్‌ సూపర్‌ లీగ్‌లలో ఆడిన ఛెత్రీ  ఆయా జట్ల విజయాల్లో కీలక పాత్ర పోషించాడు. జాతీయ స్థాయి టోర్నీ సంతోష్‌ ట్రోఫీలో ఛెత్రీ ఢిల్లీ జట్టు తరఫున బరిలోకి దిగాడు.