అన్వేషించండి

Josh Inglis Smashes Fastest Fifty: చెపాక్ మైదానంలో జోష్ ఇంగ్లిస్ విధ్వంసం.. చెన్నై బౌలర్లకు చుక్కలు చూపించిన లక్నో హిట్టర్! సరికొత్త ఐపీఎల్ రికార్డు

లక్నో సూపర్ జెయింట్స్ బ్యాటర్ జోష్ ఇంగ్లిస్ చెన్నై సూపర్ కింగ్స్‌పై కేవలం 17 బంతుల్లోనే హాఫ్ సెంచరీ బాది చరిత్ర సృష్టించాడు. చెపాక్ స్టేడియంలో ఇదే అత్యంత వేగవంతమైన ఐపీఎల్ అర్థశతకం కావడం విశేషం.

By : Ayesha | Updated at : 10 May 2026 05:36 PM (IST)

జోష్ ఇంగ్లిస్

Source : LSG/X

Josh Inglis Smashes Fastest Fifty at Chepauk Stadium: చెన్నైలోని చెపాక్ స్టేడియం సాధారణంగా స్పిన్నర్లకు అనుకూలిస్తుందని పేరు. కానీ ఆదివారం జరిగిన మ్యాచ్ లో మాత్రం సీన్ రివర్స్ అయింది. లక్నో సూపర్ జెయింట్స్ ఓపెనర్ జోష్ ఇంగ్లిస్ తన పవర్ ఫుల్ హిట్టింగ్ తో స్టేడియం నలుమూలల సిక్సర్లు, ఫోర్ల వర్షం కురిపించాడు. లక్నో జట్టు ఈ మ్యాచ్ లో కీలక మార్పు చేస్తూ ఇంగ్లిస్ ను తుది జట్టులోకి తీసుకుంది. ఈ నిర్ణయం సరైనదే అని ఇంగ్లిస్ తన బ్యాటింగ్ తో నిరూపించాడు. కేవలం 17 బంతుల్లోనే 50 పరుగుల మార్కును చేరుకుని ఐపీఎల్ చరిత్రలో చెపాక్ స్టేడియం వేదికగా అత్యంత వేగవంతమైన హాఫ్ సెంచరీ బాదిన ఘనతను తన సొంతం చేసుకున్నాడు.

North, South, East, or West 📍

Josh Inglis was at his best 👏

Updates ▶️ https://t.co/MoXhlWHk4O #TATAIPL | #KhelBindaas | #CSKvLSG | @LucknowIPL pic.twitter.com/rAgC15cqmw
— IndianPremierLeague (@IPL) May 10, 2026

చరిత్ర తిరగరాసిన ఇంగ్లిస్..
గతంలో చెన్నై సూపర్ కింగ్స్ తరపున ఆడిన సామ్ బిల్లింగ్స్ 2018లో కోల్‌కతా నైట్ రైడర్స్‌పై 21 బంతుల్లో హాఫ్ సెంచరీ చేశాడు. ఇన్నేళ్లుగా ఆ రికార్డు చెక్కుచెదరకుండా ఉంది. అయితే జోష్ ఇంగ్లిస్ మాత్రం ఆదివారం లక్నో ఇన్నింగ్స్ లో విధ్వంసం సృష్టించి ఆ రికార్డును తుడిచిపెట్టేశాడు. కేవలం 17 బంతుల్లోనే మైలురాయిని చేరుకోవడమే కాకుండా, తన ఇన్నింగ్స్ ఆద్యంతం చెన్నై బౌలర్లపై ఆధిపత్యం ప్రదర్శించాడు. 85 పరుగులు చేసిన తర్వాత జేమీ ఓవర్టన్ బౌలింగ్ లో వెనుదిరిగినా, అప్పటికే లక్నోకు కావాల్సిన పటిష్టమైన పునాదిని అందించాడు.

రుతురాజ్ వ్యూహం ఫలించలేదా?
టాస్ గెలిచిన చెన్నై సూపర్ కింగ్స్ కెప్టెన్ రుతురాజ్ గైక్వాడ్ మొదట బౌలింగ్ ఎంచుకున్నాడు. పిచ్ పై కవర్లు ఉండటం, వర్షం సూచనలు ఉండటంతో ఈ నిర్ణయం తీసుకున్నట్లు తెలిపాడు. అయితే డే మ్యాచుల్లో పిచ్ ప్రవర్తన భిన్నంగా ఉంటుందని, త్వరగా పరిస్థితులకు అలవాటు పడటం ముఖ్యమని రుతురాజ్ పేర్కొన్నాడు. డ్రెస్సింగ్ రూమ్ లో వాతావరణం చాలా పాజిటివ్ గా ఉందని, మొదటి మూడు మ్యాచ్ లు ఓడిపోయిన తర్వాత వరుసగా పుంజుకోవడం జట్టులోని అందరిలో కాన్ఫిడెన్స్ నింపిందని చెప్పాడు. పాయింట్ల పట్టికలో ఆరో స్థానంలో ఉన్న సీఎస్‌కే, తమ విన్నింగ్ కాంబినేషన్ ను మార్చకుండా అదే టీమ్ తో బరిలోకి దిగింది.

లక్నో ఆశలు సజీవం..
పాయింట్ల పట్టికలో అట్టడుగున ఉన్న లక్నో సూపర్ జెయింట్స్ కు ఈ మ్యాచ్ లో గెలుపు చాలా కీలకం. ప్లేఆఫ్స్ రేసు నుంచి దాదాపు అవుట్ అయినప్పటికీ, పరువు కోసమైనా గెలవాలని పట్టుదలతో ఉంది. జోష్ ఇంగ్లిస్ లాంటి విధ్వంసకర బ్యాటర్ ను తుది జట్టులోకి తీసుకోవడం ఆ టీమ్ కు బాగా కలిసి వచ్చింది. 33 బంతుల్లోనే 85 పరుగులు రాబట్టి ఇంగ్లిస్ తన సెలక్షన్ ను జస్టిఫై చేసుకున్నాడు. ఒకవైపు చెన్నై బౌలర్లు కట్టడి చేయాలని చూసినా, ఇంగ్లిస్ మాత్రం ఏ మాత్రం తగ్గకుండా తన నేచురల్ గేమ్ ఆడాడు.

ల‌క్నో భారీ స్కోరు..

మ‌రోవైపు టాస్ ఓడి ఫ‌స్ట్ బ్యాటింగ్ చేసిన ల‌క్నో.. నిర్ణీత 20 ఓవ‌ర్ల‌లో 8 వికెట్ల‌కు 203 ప‌రుగులు చేసింది. జోష్ ఇంగ్లీస్ (33 బంతుల్లో 85, 10 ఫోర్లు, 6 సిక్సర్లు) తో టాప్ స్కోర‌ర్ గా నిలిచాడు. అతడు మిన‌హా మిగ‌తా బ్యాట‌ర్లు విఫ‌లం కావ‌డంతో అనుకున్న దానికంటే త‌క్కువ స్కోరుకే ప‌రిమిత‌మైంది. ఓ ద‌శ‌లో 147-6తో నిలిచిన ల‌క్నోను షాబాజ్ అహ్మ‌ద్ (25 బంతుల్లో 43 నాటౌట్, 3 ఫోర్లు, 2 సిక్సర్లు), హిమ్మ‌త్ సింగ్ (17) ఆదుకున్నారు. ఏడో వికెట్ కు సరిగ్గా 50 ప‌రుగులు జోడించి, ల‌క్నోకు భారీ స్కోరు అందించారు. మ‌రోవైపు బౌల‌ర్ల‌లో జేమీ ఓవ‌ర్ట‌న్ మూడు వికెట్ల‌తో రాణించాడు.