Jasprit Bumrah bowled Sunil Narine: ఈ సీజన్ లో బ్యాటింగ్ తో విధ్వంసం బౌలింగ్ తో రచ్చ రచ్చ.. చేస్తోన్న సునీల్ నరైన్ ఎవ్వరికీ అందట్లేదు అసలు. బ్యాటింగ్ లో 12 మ్యాచుల్లో 461పరుగులు చేశాడు సునీల్ నరైన్. మూడు హాఫ్ సెంచరీలు.. ఓ సెంచరీతో విధ్వంసం సృష్టించాడు. ఏ టీమ్ ను, ఏ బౌలర్ ను వదిలిపెట్టలేదు. అటు బౌలింగ్ లోనూ అంతే 15వికెట్లు తీశాడు. అటు ఆరెంజ్ క్యాప్ రేస్ లోనూ ఇటు పర్పుల్ క్యాప్ రేస్ లోనూ రెండింటిలోనూ ఆరోస్థానంలో ఉన్నాడంటే అర్థం చేసుకోవచ్చు నరైన్ ఆల్ రౌండ్ షో ఎలా ఉందో ఈ సారి. అలాంటి నరైన్ ని నిన్న బుమ్రా క్లీన్ బౌల్డ్ చేసిన విధానం ఉంది చూడండి. మెంటల్ మాస్ అంతే.
తను వేస్తున్న మొదటి ఓవర్ మొదటి బంతినే యార్కర్ లెంగ్త్ లో విసిరాడు. చూడటానికి అది అవుట్ స్వింగర్ లా కనిపించింది. నరైన్ కే కాదు అందరికీ ఇలాగే కనిపిస్తుంది. దీన్ని కెలికి రిస్క్ తీసుకోవడం ఎందుకు లే అనుకున్నాడేమో.. ఏదో టెస్టు మ్యాచులో బ్యాటర్ వదిలేసినట్లు వదిలేశాడు నరైన్. అయితే బుమ్రా విసిరిన ఆ బాల్ లేట్ ఇన్ స్వింగర్. పడిన తర్వాత ఇన్ స్వింగ్ అయ్యి నరైన్.. స్పందించే లోపే వికెట్లను బలంగా ఢీకొట్టింది. అంతే ఫ్రాక్షన్ ఆఫ్ సెకన్స్ లో ఏం జరిగిందో తెలుసుకునే లోపే నరైన్ అవుటైపోయాడు. ఎలాంటి ఎక్స్ ప్రెషన్ ఇవ్వడు కాబట్టి ఏం అనుకున్నాడో తెలియలేదు కానీ.. లోపల మాత్రం ‘ఎవ్వుర్రా వీడు.. ఇంత టాలెంటెడ్ గా ఉన్నాడు’ అని కచ్చితంగా అనుకునే ఉంటాడు. మరి విసిరినోడు ఏమన్నా తుంబ్రీ బౌలరా పవర్ ప్లేలో గుడ్డి ఊపుడు ఊపి సిక్సులు కొట్టడానికి బూమ్ బూమ్ బుమ్రా అని ఫ్యాన్స్ ఫన్నీ కామెంట్స్ పెడుతున్నారు.
బుమ్రా కథే వేరు..
అందరిలా కాకుండా విశిష్టమైన బౌలింగ్ యాక్షన్, స్థిరంగా యార్కర్లు వేయగల సామర్థ్యంతో బుమ్రా ప్రస్తుతం ప్రపంచంలోనే బెస్ట్ బౌలర్లలో ఒకడిగా మారాడు. ఈ మధ్యే ఐసీసీ టెస్టు బౌలర్ల ర్యాంకింగుల్లో నంబర్ వన్ గా నిలిచి చరిత్ర సృష్టించాడు. విశాఖలో ఇంగ్లండ్‌తో జరిగిన రెండో టెస్టు మ్యాచ్లో రెండు ఇన్నింగ్స్‌ల్లోనూ కలిపి తొమ్మిది వికెట్లు పడగొట్టి.. ఫస్ట్ ప్లేస్‌కి ఎగబాకాడు. బుమ్రా సాధించిన ఈ ఫీట్ ఇండియన్ క్రికెట్‌కే ఒక మైల్ స్టోన్‌గా భావిస్తున్నారు. డొమెస్టిక్ క్రికెట్‌లో గుజరాత్ తరుఫుర ఆడే బుమ్రా.. ఐపీఎల్‌లో ముంబైకి ఒక ప్రధాన ఆయుధంగా కొనసాగుతున్నాడు. అయితే బుమ్రా ఇచ్చిన సపోర్ట్‌తో విన్నింగ్ ఇన్నింగ్స్‌లను సక్రమంగా ప్లాన్ చేయడంలో ఈ సీజన్‌లో ముంబయి మొదటి నుంచి విఫలమవుతోంది.
ఇప్పటి వరకూ ఈ ఐపీఎల్ సీజన్‌లో 20 వికెట్లు తీసిన బుమ్రా.. ప్రస్తుతం హర్షల్ పటేల్‌తో కలిసి పర్పుల్ క్యాప్‌ను పంచుకుంటున్నాడు. ఆర్సీబీ మీద ఒకే మ్యాచ్లో 5 వికెట్లు తీశాడు. రెండు సార్లు ఒకే మ్యాచ్లో మూడు వికెట్లు తీశాడు. ఆరు కంటే తక్కువ ఎకానమీతో ఏడు మ్యాచుల్లో బౌలింగ్ చేశాడు. మొత్తం పదమూడు మ్యాచ్‌ల్లో కలిపి కేవలం 10 సిక్సర్ల లోపే కొట్టించుకున్నాడు. ఇదీ బుమ్రా.. కథ మరీ.