Harbhajan Singh On Ravindra Jadeja: భారత్-ఆస్ట్రేలియా మధ్య నాలుగు టెస్టుల బోర్డర్-గవాస్కర్ సిరీస్‌లో భాగంగా మార్చి 1వ తేదీ నుంచి ఇండోర్‌లో మూడో మ్యాచ్ జరగనుంది. ప్రస్తుతం సిరీస్‌లో టీమిండియా 2-0తో ముందంజలో ఉంది.
ఈ సమయంలో ఇండోర్ టెస్టుకు ముందు భారత మాజీ ఆఫ్ స్పిన్నర్ హర్భజన్ సింగ్ పెద్ద ప్రకటన చేశాడు. నిజానికి రవీంద్ర జడేజాను భారత టెస్టు జట్టుకు వైస్ కెప్టెన్‌గా చేయాలని హర్భజన్ సింగ్ అన్నాడు. రవీంద్ర జడేజా బ్యాట్‌తో పాటు బంతితోనూ అద్భుతంగా రాణిస్తున్నాడని, ఈ అద్భుత ప్రదర్శనకు అతడికి ప్రతిఫలం దక్కాల్సిందేనని అన్నాడు. భారత టెస్టు జట్టు వైస్ కెప్టెన్‌గా రవీంద్ర జడేజా ఉత్తమ ఎంపిక అని అభిప్రాయపడ్డాడు.
'రవీంద్ర జడేజాను టెస్టు జట్టుకు వైస్ కెప్టెన్‌గా చేయాలి'
ఇండోర్ టెస్టులో కేఎల్ రాహుల్‌కు దూరంగా ఉండాల్సి రావచ్చని భారత మాజీ ఆఫ్ స్పిన్నర్ చెప్పాడు. ఇదే జరిగితే భారత జట్టుకు వైస్ కెప్టెన్ ఎవరు? ఆస్ట్రేలియా సిరీస్ తర్వాత విదేశాల్లో చాలా టెస్టు మ్యాచ్‌లు ఆడుతుందని, రవీంద్ర జడేజాను జట్టుకు వైస్ కెప్టెన్‌గా చేయాలని నమ్ముతున్నానని తెలిపాడు.
రవీంద్ర జడేజా ఎలాంటి ఆటగాడో అందరికీ తెలుసని, అతడిని టెస్టు జట్టుకు వైస్ కెప్టెన్‌గా చేస్తే బాగుంటుందని అభిప్రాయపడ్డాడు. రవీంద్ర జడేజాను వైస్ కెప్టెన్‌గా చేస్తే మరింత బాధ్యతతో ఆడతాడని పేర్కొన్నాడు. అతని ఆట మెరుగవుతుందన్నాడు.
'బెన్ స్టోక్స్ మంచి ఆల్ రౌండర్, కానీ...'
ప్రస్తుతం ప్రపంచ క్రికెట్‌లో రవీంద్ర జడేజా కంటే మెరుగైన ఆల్రౌండర్ లేడని హర్భజన్ సింగ్ అన్నాడు. ‘బెన్ స్టోక్స్ మంచి ఆల్ రౌండర్. అతను పెద్ద మ్యాచ్‌లు బాగా ఆటతాడు. అయితే ఈ లీగ్‌లో రవీంద్ర జడేజా అత్యుత్తమమని నేను నమ్ముతున్నాను. రవీంద్ర జడేజాను చూస్తుంటే ప్రతి మ్యాచ్‌లోనూ పరుగులు చేస్తాడేమో అనిపిస్తుంది. భారత టెస్టు జట్టుకు వైస్ కెప్టెన్‌గా ఉండేందుకు రవీంద్ర జడేజా మంచి ఎంపిక. అతడిని టెస్టు జట్టుకు వైస్ కెప్టెన్‌గా నియమించాలి. టెస్టు ఫార్మాట్‌తో పాటు వన్డేల్లో కూడా అతను మంచి వైస్ కెప్టెన్‌గా రాణించగలడు.’ అని హర్భజన్ సింగ్ అభిప్రాయపడ్డాడు.
పునరాగమనంలో ఆసీస్ పై అదరగొట్టిన భారత ఆల్ రౌండర్ రవీంద్ర జడేజా టెస్ట్ బౌలర్ల జాబితాలో టాప్- 10 లో నిలిచాడు. 7 స్థానాలు ఎగబాకి 9వ స్థానానికి చేరుకున్నాడు.
మోకాలి గాయంతో దాదాపు 5 నెలలు ఆటకు దూరమైన రవీంద్ర జడేజా ఆస్ట్రేలియాతో టెస్ట్ సిరీస్ కు తిరిగి జట్టులోకి వచ్చాడు. పునరాగమనంలో ఆసీస్ పై అదరగొట్టే ప్రదర్శన చేస్తున్నాడు. బ్యాట్ తో, బంతితో రాణిస్తున్నాడు. ఢిల్లీ వేదికగా జరిగిన రెండో టెస్టులో 10 వికెట్లు తీసి ఔరా అనిపించాడు. బ్యాటింగ్ లోనూ కీలక ఇన్నింగ్స్ లు ఆడుతున్నాడు. జడేజా రాకతో జట్టులో సమతుల్యం వచ్చింది. మిగిలిన మ్యాచుల్లోనూ జడ్డు ఇలాగే రాణించాలని జట్టు కోరుకుంటోంది.
ఢిల్లీలో రెండో టెస్ట్ ముగిసిన అనంతరం జడేజా తన బౌలింగ్ గురించి మాట్లాడాడు. ఆస్ట్రేలియన్ బ్యాట్స్‌మెన్ పరుగులు చేయడానికి ప్రయత్నిస్తారని తనకు తెలుసు అని జడేజా అన్నాడు. ఈ కారణంగా బ్యాట్స్‌మెన్ తప్పులు చేస్తే అవకాశాలు వస్తాయని తనకు తెలుసు కాబట్టి వికెట్ టు వికెట్‌లో స్ట్రెయిట్ లైన్‌లో బౌలింగ్ చేయాలని నిర్ణయించుకున్నానని పేర్కొన్నాడు.