Pakistan Semifinals Chance: శ్రీలంకపై నెగ్గితే పాకిస్తాన్ సెమీఫైనల్స్ చేరుతుందా? అద్భుతం జరిగితేనే ఛాన్స్

T20 World Cup Pakistan Semi Final Equation: సూపర్ 8లో భాగంగా పాకిస్తాన్, శ్రీలంక మధ్య జరగాల్సిన మ్యాచ్ రద్దయితే ఎవరికి లాభం చేకూరుతుంది, ఏ జట్టు సెమీఫైనల్ చేరుకుంటుందని ఉత్కంఠ నెలకొంది.

పాకిస్తాన్ క్రికెటర్లు

Source : x.com

Pakistan vs Sri Lanka Rain Chances: పాకిస్థాన్ సెమీఫైనల్‌కు చేరుతుందా లేదా అనేది ఈరోజే తేలిపోతుంది. ఆసియా జట్లు అయిన పాకిస్థాన్, శ్రీలంక జట్ల మధ్య సూపర్ 8 మ్యాచ్ పల్లెకెలె వేదికగా జరగనుంది. నేటి రాత్రి 7 గంటలకు మ్యాచ్ ప్రారంభమవుతుంది సాయంత్రం 6.30 గంటలకు టాస్ వేస్తారు. శుక్రవారం నాడు న్యూజిలాండ్‌పై మాజీ ఛాంపియన్ ఇంగ్లాండ్ 4 వికెట్ల తేడాతో అద్భుత విజయం సాధించిన తర్వాత, పాకిస్థాన్ సెమీఫైనల్ చేరే సమీకరణాలు మారిపోయాయి. ఇప్పుడు సెమీఫైనల్‌కు వెళ్లడం అనేది కేవలం పాక్ జట్టు ప్రదర్శనపైనే ఆధారపడి ఉంది. అయితే, ఒకవేళ ఈ మ్యాచ్‌కు వర్షం అంతరాయం కలిగించి, ఆట రద్దు చేస్తే ఎవరికి లాభం చేకూరుతుందో వివరాలు ఇక్కడ అందిస్తున్నాం. 

ఈ గ్రూప్ పాయింట్ల పట్టికను గమనిస్తే, ఇంగ్లాండ్ అగ్రస్థానంలో ఉంది. ఈ జట్టు ఇప్పటికే సెమీఫైనల్‌కు చేరుకుంది. శ్రీలంక ఇప్పటికే టోర్నీ నుండి నిష్క్రమించినప్పటికీ, ఈరోజు పాకిస్థాన్ సెమీఫైనల్స్ అవకాశాలను లంకేయులు దెబ్బతీసే అవకాశం ఉంది. న్యూజిలాండ్ ప్రస్తుతం 3 పాయింట్లతో +1.390 నెట్ రన్-రేట్‌ను కలిగి ఉంది. మరోవైపు, పాకిస్థాన్‌కు కేవలం ఒక పాయింట్ తో ఉంది. పాక్ నెట్ రన్-రేట్ -0.461గా ఉంది.

వర్షం వస్తే ఎవరికి లాభం?
శనివారం (ఫిబ్రవరి 28న) పల్లెకెలెలో వర్షం పడితే, పాకిస్థాన్, శ్రీలంక జట్ల మధ్య జరగాల్సిన మ్యాచ్ పై సస్పెన్స్ నెలకొంటుంది. ఒకవేళ వర్షం కారణంగా మ్యాచ్ రద్దు చేస్తే కనుక ఇరు జట్లు చెరో పాయింట్‌ను పంచుకుంటాయి. అప్పుడు పాక్ జట్టుకు మొత్తం 2 పాయింట్లు అవుతాయి. దాంతో శ్రీలంక ఒక పాయింట్‌తో టోర్నీ నుంచి ఇంటిదారి పడుతుంది. మరోవైపు మాజీ ఛాంపియన్ పాకిస్థాన్ సైతం టీ20 వరల్డ్ కప్ నుండి నిష్క్రమిస్తుంది. న్యూజిలాండ్ జట్టు సెమీఫైనల్‌కు చేరుకుంటుంది. కనుక పాకిస్థాన్ సెమీఫైనల్‌కు వెళ్లాలంటే నేటి మ్యాచులో ఖచ్చితంగా శ్రీలంకను ఓడించాల్సిందే. భారీ తేడాతో నెగ్గకపోయినా లంకపై గెలిచినా పాక్ కూడా ఇంటి దారి పట్టక తప్పదు.

పాకిస్థాన్ సెమీఫైనల్స్ ఆశలు.. 
పాకిస్థాన్ పొట్టి ప్రపంచ కప్ సెమీఫైనల్‌లో తన స్థానాన్ని ఖాయం చేసుకోవాలంటే, ఆ జట్టు కనీసం 65 పరుగుల తేడాతో లంకపై మ్యాచ్ గెలవాలి లేదా లంక ఇచ్చిన టార్గెట్ కేవలం 13.1 ఓవర్లలోనే పూర్తి చేయాలి. ఈ రెండు విషయాలు కష్టమే. ఒకవేళ పాకిస్థాన్ అలా చేయలేకపోతే, మెరుగైన నెట్ రన్-రేట్ కారణంగా న్యూజిలాండ్ సెమీఫైనల్స్‌కు దూసుకెళ్తుంది. 

వాతావరణం విషయానికి వస్తే, శనివారం పల్లెకెలెలో ఆకాశం సాధారణంగా ఉంది. మేఘాలు కనిపించడం లేదు. ఇక్కడ నేటి గరిష్ట ఉష్ణోగ్రత 27 డిగ్రీల సెల్సియస్, కాగా కనిష్ట ఉష్ణోగ్రత 17 డిగ్రీలుగా ఉండవచ్చు. వర్షం పడే అవకాశం లేదని తెలుస్తోంది. కానీ పాక్ జట్టు సెమీఫైనల్స్ చేరుకోవడం అంత ఈజీ కాదు. అద్భుతం చేస్తే తప్పా పాక్ సెమీఫైనల్స్ చేరడం దాదాపు అసాధ్యమే.