Shami Fierce Bowling Spells: భారత అత్యుత్తమ స్వింగ్ బౌలర్ మొహమ్మద్ షమీ టెస్ట్ క్రికెట్‌కు వీడ్కోలు పలికిన వేళ, అతడి 13 ఏళ్ల సుదీర్ఘ ప్రయాణంలో నమోదైన ఐదు అద్భుత స్పెల్స్ క్రికెట్ అభిమానుల మదిలో ఎప్పటికీ నిలిచిపోతాయి. 2018లో ఆస్ట్రేలియాలోని పెర్త్ ఆప్టస్ స్టేడియంలో నిప్పులు చెరిగే బౌన్స్ పిచ్‌పై షమీ వేసిన స్పెల్ అతడి కెరీర్‌కే హైలైట్‌గా నిలిచింది. మొదటి ఇన్నింగ్స్‌లో 80 పరుగులిచ్చి ఒక్క వికెట్ కూడా తీయలేకపోయిన షమీ, రెండో ఇన్నింగ్స్‌లో ఏకంగా 24 ఓవర్లలో 56 పరుగులకే 6 వికెట్లు పడగొట్టి ఆసీస్ టాప్, మిడిలార్డర్‌ను తుడిచిపెట్టాడు. ఆస్ట్రేలియాను 243 పరుగులకు ఆలౌట్ చేసిన ఈ అద్భుత ప్రదర్శన, ఆ సిరీస్‌ను భారత్ చారిత్రకంగా కైవసం చేసుకోవడంలో కీలక పాత్ర పోషించింది. అలాగే 2013లో కోల్‌కతా ఈడెన్ గార్డెన్స్‌లో వెస్టిండీస్‌తో జరిగిన అరంగేట్రం టెస్టులోనే తొలి ఇన్నింగ్స్‌లో 4/71, రెండో ఇన్నింగ్స్‌లో 5/47తో మొత్తం 9/118 గణాంకాలు నమోదు చేసి భారత పేస్ డెబ్యూటెంట్లలో ఆల్ టైమ్ బెస్ట్ రికార్డు సృష్టించాడు.
చిరస్మరణీయ విజ‌యాలు..దక్షిణాఫ్రికా గడ్డపై కూడా షమీ చిరస్మరణీయ విజయాలను అందించాడు. 2018 జోహన్నెస్‌బర్గ్ టెస్టులో 240 పరుగుల టార్గెట్‌ను కాపాడుకునే క్రమంలో ఓపెనర్ ఐడెన్ మార్క్రామ్‌ను ఔట్ చేయడంతో పాటు టెయిలెండర్లను కకావికలం చేస్తూ 28 పరుగులకే 5 వికెట్లు కూల్చి భారత్‌కు అద్భుత విజయాన్ని అందించాడు. ఆ తర్వాత 2021 సెంచూరియన్ టెస్టులో తొలి ఇన్నింగ్స్‌లో 44 పరుగులిచ్చి 5 వికెట్లు పడగొట్టి ప్రొటీస్ జట్టును 197 పరుగులకే పరిమితం చేశాడు. రెండో ఇన్నింగ్స్‌లో మరో మూడు వికెట్లు తీసి టీమిండియా 113 పరుగుల భారీ తేడాతో గెలవడంలో కీలక పాత్ర పోషించాడు. దేశవాళీ మైదానాల్లోనూ రివర్స్ స్వింగ్‌తో మాయ చేసిన షమీ, 2019 విశాఖపట్నం టెస్టులో 395 పరుగుల ఛేజింగ్‌లో బరిలోకి దిగిన సౌతాఫ్రికాను 35 పరుగులకే 5 వికెట్లు తీసి 191 పరుగులకే కుప్పకూల్చాడు.
విదేశాల్లో పేస్ పెనుతుఫానుఆస్ట్రేలియా, సౌతాఫ్రికా లాంటి వేగవంతమైన పిచ్‌లపై భారత్ సాధించిన టెస్ట్ విజయాల్లో షమీ బౌలింగ్ అత్యంత కీలకంగా మారింది. సీమ్ పొజిషన్‌ను నిలబెడుతూ గంటకు 140 కిలోమీటర్ల వేగంతో అతడు సంధించిన బంతులు ప్రపంచ మేటి బ్యాటర్లను వణికించాయి. అరంగేట్రం చేసిన తొలి మ్యాచ్‌లోనే తొమ్మిది వికెట్లతో సంచలనం సృష్టించిన షమీ, ఆ తర్వాత వైజాగ్ టెస్టులోనూ పాత బంతితో రివర్స్ స్వింగ్ రాబట్టి ఒంటిచేత్తో మ్యాచ్‌లను గెలిపించాడు. టెస్ట్ ఫార్మాట్‌లో అతడు సాధించిన 229 వికెట్లలో ఈ ఐదు ప్రదర్శనలు ప్రత్యేక స్థానాన్ని ఆక్రమిస్తాయి.