South African Legend Decodes Former India Captain MS Dhoni: చెన్నై సూపర్ కింగ్స్ మాజీ సారథి మహేంద్ర సింగ్ ధోని వ్యూహాలు క్రికెట్ ప్రపంచంలో ఎంతటి సంచలనాలు సృష్టించాయో ప్రత్యేకంగా చెప్పనక్కర్లేదు. ఐపీఎల్‌లో 154 మ్యాచ్‌లు ఆడి 4,773 పరుగులు సాధించిన దక్షిణాఫ్రికా మాజీ కెప్టెన్ ఫాఫ్ డుప్లెసిస్, సీఎస్కే తరఫున తొమ్మిది సీజన్ల పాటు ధోని నాయకత్వంలో ఆడాడు. ఆ సమయంలో చెన్నై మూడు ఐపీఎల్ ట్రోఫీలు గెలవడంలో కీలక పాత్ర పోషించాడు. 2022లో రాయల్ ఛాలెంజర్స్ బెంగళూరు జట్టుకు మారినప్పటికీ ధోనితో ఉన్న అనుబంధం ఎప్పటికీ ప్రత్యేకమైనదని ఫాఫ్ గుర్తుచేసుకున్నాడు. తాజాగా ఓ పాడ్‌కాస్ట్‌లో మాట్లాడిన డుప్లెసిస్, ధోని నాయకత్వ శైలి మిగతా కెప్టెన్లతో పోలిస్తే ఎందుకు అంత ప్రత్యేకంగా ఉంటుందో విడమరిచి చెప్పాడు. ధోని ముందస్తు వ్యూహాలపై ఏమాత్రం ఆధారపడడని, మ్యాచ్ జరుగుతున్నప్పుడు తన అంతర్ దృష్టి ఆధారంగానే తక్షణ నిర్ణయాలు తీసుకుంటాడని డుప్లెసిస్ పేర్కొన్నాడు.
అంతర్ దృష్టినే అసలైన బలం: గ్రౌండ్‌లో ఎంఎస్ మైండ్ గేమ్స్ధోని మైదానంలో వ్యవహరించే తీరును విశ్లేషిస్తూ డుప్లెసిస్ కీలక విషయాలు పంచుకున్నాడు. "గ్రౌండ్‌లో మ్యాచ్‌ను అర్థం చేసుకోవడంలో అతడికి తిరుగులేదు. మ్యాచ్‌కు ముందే గంటల తరబడి ప్లాన్లు వేయడం అతడికి అస్సలు నచ్చదు. మైదానంలో ఆ క్షణంలో ఏం జరుగుతుందో చూసి, తన సహజ సిద్ధమైన అంతర్ దృష్టిని నమ్ముకోవడమే అతడి సూపర్ పవర్. మైదానంలో తీవ్రమైన ఒత్తిడి ఉన్నప్పటికీ అత్యంత ప్రశాంతంగా ఉంటూ ఆటను, ఆటగాళ్ల మైండ్‌సెట్‌ను చదవగలడు. ప్రతి ఒక్కరికీ తెలిసినట్లు అతడు అత్యంత కూల్ పర్సన్. అతడి వద్ద నుంచి నేను కూడా ఇదే నేర్చుకుని నా కెప్టెన్సీలో అమలు చేయాలనుకుంటున్నాను" అని తెలిపాడు.
కేప్‌టౌన్ వివాదం జ్ఞాపకాలు: స్టీవ్ స్మిత్‌కు నైతిక మద్దతుగతంలో క్రిక్‌ఇన్‌ఫోతో మాట్లాడిన సందర్భాన్ని గుర్తుచేసుకుంటూ, 2018 నాటి కేప్‌టౌన్ బాల్ ట్యాంపరింగ్ వివాదం సమయంలో స్టీవ్ స్మిత్‌కు తాను అందించిన మద్దతు గురించి డుప్లెసిస్ మాట్లాడాడు. రెండేళ్ల క్రితం తాను కూడా అలాంటి పరిస్థితినే ఎదుర్కొన్నానని, అందుకే స్మిత్ వేదనను తాను అర్థం చేసుకోగలిగానని చెప్పాడు. దక్షిణాఫ్రికాతో టెస్ట్ సిరీస్ సందర్భంగా జరిగిన ఆ ఘటనకు స్మిత్ తనదే బాధ్యత అని ప్రకటించినప్పుడు, తామంతా ఆశ్చర్యపోయామని తెలిపాడు. "నువ్వేం తప్పు చేయనప్పుడు బాధ్యత ఎందుకు తీసుకుంటున్నావ్ అనిపించింది" అని గుర్తుచేసుకున్నాడు.
ఇరుక్కున్న ఆసీస్ ఆటగాళ్లు: ఆంక్షల పర్వంఆ వివాదం తర్వాత ఐసీసీ స్మిత్‌పై ఒక టెస్ట్ నిషేధం విధించగా, క్రికెట్ ఆస్ట్రేలియా స్టీవ్ స్మిత్, డేవిడ్ వార్నర్‌లపై ఏడాది పాటు, కామెరాన్ బాన్‌క్రాఫ్ట్‌పై తొమ్మిది నెలల పాటు సస్పెన్షన్ విధించింది. కేప్‌టౌన్ టెస్టులో సాండ్‌పేపర్‌తో బంతి రూపురేఖలను మార్చే ప్రయత్నం చేస్తూ బాన్‌క్రాఫ్ట్ కెమెరాలకు చిక్కడంతో తీవ్ర దుమారం రేగింది. మైదానంలో ఎదురయ్యే కష్టనష్టాలను అధిగమించడంలో ధోని లాంటి అనుభవజ్ఞులైన నాయకుల ప్రశాంతతే అసలైన మార్గదర్శకమని ఫాఫ్ అభిప్రాయపడ్డాడు.