Shri Kedarnath Dham: కేదార్‌నాథ్‌లో వృషభం ఆకారంలో శివలింగం ఎందుకు? పురాణ రహస్యం & అద్భుతాలు!

Kedarnath Yatra: కేదార్‌నాథ్ ధామ్ వద్ద కొండచరియలు విరిగిపడటంతో భక్తుల ఇబ్బందులు పెరిగాయి. రహదారిని మూసివేసినా భక్తుల ఉత్సాహం ఏమాత్రం తగ్గలేదు. ఈ పుణ్యక్షేత్రం ప్రాముఖ్యతను తెలుసుకోండి.

కేదార్‌నాథ్ యాత్ర - శివలింగం రహస్యం

Source : PTI

Show Quick Read

Key points generated by AI, verified by newsroom

• కేదార్‌నాథ్ యాత్ర మార్గంలో కొండచరియలు విరిగిపడి, యాత్రికులు సురక్షిత ప్రాంతాలకు తరలింపు.
• అక్షయ తృతీయ నాడు తెరుచుకున్న కేదార్‌నాథ్ ధామ్, ఐదున్నర లక్షల మంది భక్తుల సందర్శన.
• పాండవుల వంశానికి చెందిన జనమేజయుడు నిర్మించాడని నమ్మే స్వయంభు శివలింగం ప్రాముఖ్యత.
• నర-నారాయణుల తపస్సుకు మెచ్చి శివుడు ఇక్కడ జ్యోతిర్లింగ రూపంలో కొలువుదీరాడు.

Kedarnath Jyotirlinga History:  ఉత్తరాఖండ్‌లోని చార్ ధామ్ పుణ్యక్షేత్రాలలో ఒకటైన కేదార్‌నాథ్‌లో కొండచరియలు విరిగిపడ్డాయి. రహదారులను మూసివేయడంతో చాలా మంది యాత్రికులు చిక్కుకుపోయారు. 10,000 మందికి పైగా ప్రజలను సురక్షిత ప్రాంతాలకు తరలించారు. కేదార్‌నాథ్ యాత్ర మార్గంలో కీలకమైన ముంకటియా ప్రాంతంలో ఈ సంఘటన జరిగింది.అయినప్పటికీ భక్తులు ఉత్సాహంగా యాత్ర చేస్తున్నారు. 

అక్షయ తృతీయ అయిన ఏప్రిల్ 22న కేదార్‌నాథ్ ధామ్ ద్వారాలు తెరుచుకున్నాయి.. ఇప్పటివరకు దాదాపు ఐదున్నర లక్షల మంది యాత్రికులు ఈ పుణ్యక్షేత్రాన్ని సందర్శించారు. ఈ సంవత్సరం, కేదార్‌నాథ్ అత్యధిక  రద్దీని చూస్తోంది. కేదార్‌నాథ్ ధామ్ ప్రాముఖ్యత ఏంటో , మహాభారత కాలంతో దానికి ఉన్న సంబంధం ఏమిటో తెలుసుకుందాం. 

కేదార్‌నాథ్‌లోని స్వయంభు శివలింగం ఎందుకు ప్రత్యేకమైనది?

కేదార్‌నాథ్‌లోని శివలింగం స్వయంభువు.12 జ్యోతిర్లింగాలలో 11వది, ప్రధానమైనది. ఈ కారణంగానే ఈ పుణ్యక్షేత్రం ఇతర శివాలయాల కంటే ప్రత్యేకమైనదిగా పరిగణిస్తారు భక్తులు. ఈ ఆలయాన్ని పాండవుల వంశానికి చెందిన జనమేజయుడు నిర్మించాడని నమ్ముతారు. ఆది శంకరాచార్యులు దీనిని పునరుద్ధరించారు. సముద్ర మట్టానికి వేల అడుగుల ఎత్తులో ఉన్న ఈ పుణ్యక్షేత్రం నేటికీ లక్షలాది భక్తులకు విశ్వాస కేంద్రంగా నిలుస్తోంది.

కేదార్‌నాథ్ అనే పేరుకు అర్థం ఏంటి?

'కేదార్' అంటే పర్వతం లేదా ఎత్తైన ప్రదేశం అని, 'నాథ్' అంటే ప్రభువు అని అర్థం. అందువల్ల, కేదార్‌నాథ్ అంటే "పర్వతాలకు అధిపతి" అని అర్థం. హిమాలయాల ఒడిలో కొలువై ఉన్న ఈ శివాలయం, ప్రకృతి , ఆధ్యాత్మికతల అద్భుతమైన సంగమంగా వెలుగుతోంది.

నర-నారాయణుడి తపస్సు కారణంగా కేదార్ అవతరణ

హిమాలయాల మంచు లోయలలో నెలకొని ఉన్న కేదార్‌నాథ్ కేవలం ఒక దేవాలయం మాత్రమే కాదు, అది తపస్సు, త్యాగం , దైవత్వానికి ప్రతీక. పౌరాణిక విశ్వాసాల ప్రకారం, ప్రాచీన కాలంలో విష్ణుమూర్తి అవతారాలైన నర, నారాయణులు బద్రీనాథ్‌లో కఠోర తపస్సు చేశారు. వారు ప్రతిరోజూ మట్టి శివలింగాలను తయారుచేసి శివుడిని పూజించేవారు. వారి అచంచలమైన భక్తి, తపస్సుకు సంతోషించిన శివుడు సాక్షాత్తు అక్కడే ప్రత్యక్షమయ్యాడు.నర-నారాయణులు శివుడు ఈ ప్రదేశంలో శాశ్వతంగా నివసించాలని, తద్వారా రాబోయే తరతరాల భక్తులు ఆయనను దర్శించుకునే భాగ్యం పొందాలని కోరారు. తమ భక్తుల ఈ నిస్వార్థ స్ఫూర్తికి సంతోషించిన శివుడు, ఇక్కడ జ్యోతిర్లింగ రూపంలో కొలువుదీరే వరాన్ని వారికి ప్రసాదించాడు. అప్పటి నుంచి ఈ పవిత్ర స్థలం "కేదార్ క్షేత్రం"గా ప్రసిద్ధి చెందింది.

పాండవుల,  శివుని వృషభ రూపం కోసం అన్వేషణ

మహాభారత యుద్ధం ముగిసిన తరువాత, తమ వంశం నాశనమవ్వడంతో పాండవులు దుఃఖించారు. ఈ పాపానికి ప్రాయశ్చిత్తం చేసుకోవడానికి వారు శివుని ఆశీర్వాదం కోరారు. వారు మొదట కాశీకి వెళ్లారు, కానీ శివుడు వారిపై అసంతృప్తి చెంది, వారికి దర్శనం ఇవ్వడానికి నిరాకరించాడు. శివుడు అక్కడ నుండి అదృశ్యమై హిమాలయాల్లోని కేదార్‌నాథ్ ప్రాంతానికి వచ్చాడని చెబుతారు. పాండవులు కూడా ఆయనను వెతుకుతూ కష్టతరమైన పర్వత మార్గాలను దాటి కేదార్‌నాథ్‌కు చేరుకున్నారు. శివుడు వృషభ రూపం ధరించి జంతువుల మధ్య దాక్కున్నాడు. సాధారణ వృషభాలలో ఏదో దైవశక్తి ఉందని పాండవులు అనుమానించారు. భీముడు ఒక భారీ రూపం ధరించి రెండు పర్వతాల మధ్య తన కాళ్ళను చాచాడు. జంతువులన్నీ పారిపోయాయి, కానీ ఒక వృషభం మిగిలిపోయింది. భీముడు ఆ వృషభాన్ని పట్టుకోవడానికి ప్రయత్నించగా, అది భూమిలోకి కుంగిపోవడం ప్రారంభించింది. భీముడు దాని వీపును పట్టుకున్నాడు. సరిగ్గా అదే క్షణంలో, పరమశివుడు తన నిజరూపంలో ప్రత్యక్షమై, పాండవుల భక్తికి సంతోషించి, వారిని పాపాల నుంచి విముక్తి చేశాడు. అప్పటి నుంచి కేదార్‌నాథ్‌లో శివుడిని వృషభ వీపు రూపంలో పూజిస్తున్నారని నమ్ముతారు.

గమనిక: ఇక్కడ అందించిన సమాచారం కేవలం నమ్మకాలపై ఆధారపడి ఉంటుంది. పండితులు చెప్పిన వివరాలు, ఆధ్యాత్మిక గ్రంధాల నుంచి సేకరించి అందించిన వివరాలు ఇవి. వీటిని ఎంతవరకూ పరిగణలోకి తీసుకోవాలన్నది పూర్తిగా మీ వ్యక్తిగతం. ఏదైనా సమాచారం లేదా నమ్మకాన్ని అమలు చేయడానికి ముందు సంబంధిత నిపుణుడిని సంప్రదించండి.

నిత్యం తినే ఆహారంలో 5 రకాలైన దోషాలుంటాయి..మీరు ఎలాంటి దోషం ఉన్న ఆహారం తీసుకుంటున్నారో తెలుసుకునేందుకు ఈ లింక్ క్లిక్ చేయండి

మరిన్ని చదవండి

'గంగా దసరా ' మే 25 or 26? స్నానం , దానధర్మాల కోసం సరైన తేదీ శుభ సమయం తెలుసుకోండి!

పద్మిని ఏకాదశి మే 26 లేదా 27న ఎప్పుడు? తేదీ, శుభ సమయం, పూజా విధానం తెలుసుకోండి!