Rajinikanth Annamalai New Party TN: అన్నామలైతో పాటు రజనీకాంత్ కూడా - ఇద్దరూ కలిసే కొత్త పార్టీ - తమిళనాడులో అంతా మారిపోతోందా?

Tamil Nadu Alternative Politics: తమిళనాడు రాజకీయాల్లో సంచలనం. బీజేపీకి గుడ్ బై చెప్పిన అన్నామలై, సూపర్‌స్టార్ రజనీకాంత్‌తో కలిసి సరికొత్త ప్రాంతీయ పార్టీ పెట్టబోతున్నారనే ప్రచారం ఊపందుకుంది.

అన్నామలైతో పాటు రజనీకాంత్ కూడా - ఇద్దరూ కలిసే కొత్త పార్టీ - తమిళనాడులో అంతా మారిపోతోందా?

Source : x

Annamalai New Political Party:  తమిళనాడు రాజకీయాలు ఎప్పుడూ ఊహకందని సంచలనాలకు, వ్యూహాత్మక మలుపులకు కేరాఫ్ అడ్రస్‌గా నిలుస్తాయి. దశాబ్దాలుగా సాగుతున్న సాంప్రదాయ ద్రావిడ రాజకీయాల చుట్టూ తిరిగే కోలీవుడ్ గడ్డపై, ఇప్పుడు ఒక సరికొత్త పొలిటికల్ కాంబినేషన్ గురించిన ప్రచారం ఊహించని రీతిలో ప్రకంపనలు రేపుతోంది. తమిళ సూపర్‌స్టార్ రజనీకాంత్,  బీజేపీ మాజీ రాష్ట్ర అధ్యక్షుడు కె. అన్నామలై ల చుట్టూ తిరుగుతున్న ఒక ఆసక్తికర వార్త ఇప్పుడు సౌత్ ఇండియన్ పొలిటికల్ సర్కిల్స్‌ను షేక్ చేస్తోంది. నిన్నటివరకు బీజేపీలో ఫైర్ బ్రాండ్ లీడర్‌గా ఉన్న అన్నామలై, ఆ పార్టీకి గుడ్ బై చెప్పిన తర్వాత ఒక కొత్త రాజకీయ ప్రత్యామ్నాయాన్ని నిర్మించే పనిలో పడటమే దీనికి ప్రధాన కారణం.

తమిళనాడు బీజేపీ పగ్గాలు చేపట్టినప్పటి నుండి ద్రవిడ మున్నేట్ర కజగం ప్రభుత్వ విధానాలపై రాజీలేని పోరాటం చేసిన అన్నామలై, ఇటీవల కమలం పార్టీకి రాజీనామా చేసి అందరినీ ఆశ్చర్యపరిచారు. ఆ వెంటనే ఆయన ఒక కొత్త సామాజిక-రాజకీయ వేదికను ప్రకటించగా, దానికి క్షేత్రస్థాయిలో, ముఖ్యంగా యువత నుండి పెద్ద ఎత్తున స్పందన లభిస్తోంది. లక్షల మంది సభ్యులుగా చేరారు. ప్రస్తుతం ఆయన ఒక కొత్త ప్రాంతీయ పార్టీని స్థాపించడానికి చురుగ్గా సన్నాహాలు చేసుకుంటున్నారు. ఈ తరుణంలోనే, తెరవెనుక ఒక సంచలన సమీకరణం ఊపందుకుంది. సూపర్‌స్టార్ రజనీకాంత్‌తో కలిసి అన్నామలై తమిళనాడులో ఒక సరికొత్త ప్రాంతీయ పార్టీని స్థాపించబోతున్నారనే పుకార్లు జోరందుకున్నాయి.

 ఈ ఇద్దరు నేతల మధ్య ఉన్న పాత అనుబంధమే ఈ కొత్త చర్చకు బలమైన పునాదిగా మారింది. అన్నామలై మొదటి నుంచి రజనీకాంత్‌ను తన వ్యక్తిగత గురువుగా, ఆధ్యాత్మిక మార్గదర్శిగా భావిస్తూ వస్తున్నారు. ఐపీఎస్ ఉద్యోగానికి రాజీనామా చేసిన తర్వాత, 2020లోనే రజనీకాంత్ స్వయంగా అన్నామలైని తన చెన్నై నివాసానికి ఆహ్వానించి సుదీర్ఘంగా మాట్లాడారు. అప్పటి నుంచి వీరి మధ్య అత్యంత సన్నిహిత సత్సంబంధాలు కొనసాగుతున్నాయి. రాజకీయాల్లో ఉన్నా, లేకపోయినా అన్నామలై రెగ్యులర్‌గా రజనీని కలుస్తూ, ఆయన నుండి సలహాలు, స్ఫూర్తిని పొందుతున్నట్లు పలు సందర్భాల్లో బహిరంగంగానే చెప్పారు.

రజనీ కాన్సెప్ట్ ఆధ్యాత్మిక రాజకీయం 

గతంలో రజనీకాంత్ 'ఆధ్యాత్మిక రాజకీయం'  అనే నినాదంతో సొంత పార్టీ పెట్టాలని భావించినప్పటికీ, అనారోగ్య కారణాల వల్ల ఆ నిర్ణయాన్ని విరమించుకున్నారు. అయితే, తమిళనాడులో డీఎంకే, ఏఐఏడీఎంకే వంటి ద్రావిడ పార్టీలకు ప్రత్యామ్నాయంగా ఒక క్లీన్ అండ్ పవర్‌ఫుల్ రాజకీయం రావాలనేది రజనీకాంత్ ఆలోచన. ఇప్పుడు అదే లైన్‌లో ఉన్న యువ, డైనమిక్ లీడర్ అన్నామలై వైపు రజనీ మొగ్గు చూపుతున్నారనేది తమిళ రాజకీయ విశ్లేషకుల అంచనా. రజనీకాంత్ నేరుగా ఎన్నికల బరిలోకి దిగకపోయినా, అన్నామలై పెట్టబోయే కొత్త పార్టీకి వెనుక ఉండి నడిపించే 'మార్గదర్శి' పాత్రను పోషిస్తారనే ప్రచారం బలంగా సాగుతోంది.

కొత్త కాంబినేషన్ అద్భుతమే 

ఒకవేళ ఈ కాంబినేషన్ గనుక నిజమైతే, తమిళనాడు రాజకీయాల్లో ఒక సరికొత్త శకం ప్రారంభం కావడం ఖాయం. అన్నామలైకి ఉన్న అడ్మినిస్ట్రేటివ్ అనుభవం, క్లీన్ ఇమేజ్, యువతలో ఉన్న క్రేజ్.. వీటికి రజనీకాంత్ కున్న తిరుగులేని ప్రజాదరణ, ఆధ్యాత్మిక ఇమేజ్ తోడైతే అది ద్రావిడ శక్తులకు గట్టి సవాల్‌గా మారుతుంది. ముఖ్యంగా, సాంప్రదాయ ఓటు బ్యాంక్ రాజకీయాలకు విసిగిపోయిన తటస్థ ఓటర్లు, యువత ఈ కొత్త కూటమి వైపు ఆకర్షితులయ్యే అవకాశాలు పుష్కలంగా ఉన్నాయి. బీజేపీ నుండి బయటకు వచ్చిన అన్నామలై, ఇటు కేంద్రంలోని పెద్దలతోనూ సత్సంబంధాలు కొనసాగిస్తూనే.. అటు స్థానిక సెంటిమెంట్‌ను క్యాష్ చేసుకునేలా రజనీ ఇమేజ్‌ను వాడుకోవాలని చూస్తున్నారు.

ప్రస్తుతానికి ఇరు వర్గాల నుండి పార్టీ స్థాపనపై ఎలాంటి అధికారిక ప్రకటన రానప్పటికీ, తెరవెనుక మాత్రం పక్కా రోడ్ మ్యాప్ సిద్ధమవుతున్నట్లు తెలుస్తోంది. అన్నామలై త్వరలోనే తన కొత్త రాజకీయ పార్టీ పేరు, జెండాను ప్రకటించే అవకాశం ఉంది. ఆ వేదికపై రజనీకాంత్ ఉనికి ఏ రూపంలో ఉండబోతుందనే దానిపైనే ఇప్పుడు అందరి దృష్టి నిలిచింది. ఈ సంచలన సమీకరణం నిజంగానే రూపుదాల్చితే, రాబోయే తమిళనాడు అసెంబ్లీ ఎన్నికల నాటికి ద్రావిడ కోటకు బీటలు వారడం ఖాయమని రాజకీయ మేధావులు స్పష్టం చేస్తున్నారు.