Kesineni Nani Just Asking Social Media Campaign: సాధారణంగా ప్రతిపక్షాలు లేదా ప్రజాప్రతినిధులు తమ నగరానికి మెట్రో రైలు ప్రాజెక్టులు కావాలని, వేల కోట్ల నిధులు కేటాయించాలని కేంద్ర, రాష్ట్ర ప్రభుత్వాలను డిమాండ్ చేస్తారు. కానీ విజయవాడ మాజీ ఎంపీ కేశినేని నాని మాత్రం ఇందుకు పూర్తి భిన్నమైన దారిలో నడుస్తున్నారు. విజయవాడకు అసలు మెట్రో రైలు ప్రాజెక్టు అవసరమా? ఇది బెజవాడ ప్రజలకు వరమా? లేక శాపమా? అంటూ ఆయన ఇటీవల సోషల్ మీడియా వేదికగా లేవనెత్తిన ప్రశ్నలు ఆంధ్రప్రదేశ్ రాజకీయాల్లోనూ, బెజవాడ వ్యాపార, రవాణా వర్గాల్లోనూ తీవ్ర చర్చనీయాంశంగా మారాయి.
విజయవాడకు మెట్రో అక్కర్లేదంటున్న కేశినేని నాని
కేశినేని నాని వాదన ప్రకారం.. విజయవాడ నగరానికి బందర్ రోడ్డు, ఏలూరు రోడ్డు అనే రెండే రెండు ప్రధాన రవాణా కారిడార్లు ఉన్నాయి. రూ.12,000 కోట్లతో ప్రారంభమయ్యే మెట్రో ప్రాజెక్టు నిర్మాణానికి 10 నుంచి 15 ఏళ్లు పడుతుందని, అప్పటికి దాని ఖర్చు రూ.24,000 కోట్లకు చేరుతుందని ఆయన అంచనా వేస్తున్నారు. ఈ మెట్రో ప్రాజెక్టుకు అయ్యే మొత్తం ఖర్చులో కేవలం 25 శాతం నిధులు వెచ్చిస్తే.. నగరాన్ని డ్రైనేజీ సమస్య రహితంగా, పచ్చదనం, తాగునీరు, అగ్నిమాపక సదుపాయాలు మరియు ట్రాఫిక్ నిర్వహణ కలిగిన మోడల్ నివాస యోగ్య నగరంగా మార్చవచ్చని ఆయన సలహా ఇస్తున్నారు.విజయవాడ ప్రాథమిక మౌలిక వసతుల సాధనను సాకుగా చూపి మెట్రోను వద్దనడం.. క్షేత్రస్థాయిలో ప్రజల సెంటిమెంట్‌ను పట్టుకుని తన రాజకీయ రీ-ఎంట్రీకి స్థిరమైన పునాది వేసుకోవడానికేనని రాజకీయ విశ్లేషకులు భావిస్తున్నారు.
ప్రస్తుతం ఏ పార్టీలో లేని కేశినేని నాని
అయితే నాని వినిపిస్తున్న ఈ వాదన వెనుక పొలిటికల్ గ్రౌండ్ రియాలిటీ వేరే ఉందనే విమర్శలు గట్టిగా వినిపిస్తున్నాయి. గత సాధారణ ఎన్నికల ముందు టీడీపీని వీడి వైసీపీలో చేరి ఓటమి చవిచూసిన కేశినేని నాని, ఆ తర్వాత వైసీపీకి దూరమయ్యారు. ప్రస్తుతం ఏ పార్టీలోనూ క్రియాశీలకంగా లేని ఆయన.. బెజవాడ ప్రజా సమస్యలపై జస్ట్ ఆస్కింగ్ పేరుతో వినూత్న ఉద్యమాన్ని ప్రారంభించి, తిరిగి విజయవాడ రాజకీయాల్లో ప్రాబల్యం సంపాదించడానికి ప్రయత్నిస్తున్నారని విశ్లేషకులు చెబుతున్నారు. ఈ విమర్శల్లో సాంకేతిక లోపం కూడా ఉందనేది నిపుణుల మాట. మెట్రో రైలు వంటి మాస్ ట్రాన్సిట్ సిస్టమ్స్ కు విదేశీ సంస్థల నుంచి సాఫ్ట్ లోన్లు, కేంద్ర ప్రభుత్వ ప్రత్యేక సబ్సిడీలు అందుతాయి. ఈ ప్రత్యేక నిధులను స్థానిక రోడ్లు, డ్రైనేజీ లేదా మౌలిక వసతుల కోసం మళ్లించడం కుదరదు. పైగా అమరావతి రాజధాని నిర్మాణం ఊపందుకుంటున్న తరుణంలో.. గుంటూరు, అమరావతి, విజయవాడలను అనుసంధానించే మెట్రో వ్యవస్థ భవిష్యత్తుకు అత్యంత అవసరమని పారిశ్రామిక వేత్తలు భావిస్తున్నారు.
ముందు ముందు మరింతగా స్పందిస్తారా?
ఇంకోవైపు, కేశినేని కుటుంబానికి రవాణా రంగం తో సుదీర్ఘ అనుబంధం ఉండటంతో, పట్టణ రవాణాలో మెట్రో వ్యవస్థ వస్తే అది సొంత వ్యాపార ప్రయోజనాలకు భంగం కలిగిస్తుందనే నెపంతోనే ఆయన వ్యతిరేకిస్తున్నారంటూ నెటిజన్ల నుంచి విమర్శలు ఎదురవుతున్నాయి. ఏది ఏమైనా.. మెట్రో నిధులను మౌలిక వసతులతో పోల్చుతూ కేశినేని నాని లేవనెత్తిన ఈ విచిత్ర విమర్శలు, విజయవాడ వేదికగా ఆయన రాజకీయ పునరాగమనానికి ఎంచుకున్న ఒక వ్యూహాత్మక అడుగుగానే కనిపిస్తున్నాయి.