Danam Nagender Safe: బీఆర్ఎస్ నుంచి దానం సస్పెన్షన్ - అనర్హతా వేటు లేనట్లే - ఇంత సీక్రెట్గా ఎలా ఉంచారు?
Danam Nagender BRS: దానం నాగేందర్ ను పార్టీ నుంచి సస్పెండ్ చేశామని బీఆర్ఎస్ సుప్రీంకోర్టులో అఫిడవిట్ వేసినట్లుగా ప్రచారం జరుగుతోంది. అదే నిజమైతే దానం నాగేందర్ పై అనర్హతా వేటు పడనట్లే.
Danam Nagender suspended from the party : దానం నాగేందర్ పార్టీ మార్పిడి, అనర్హత వేటు అంశం ఇప్పుడు తెలంగాణ రాజకీయాల్లో సంచలనంగా మారింది. దానంపై అనర్హతా వేటు కోసం బీఆర్ఎస్ ప్రయత్నిస్తోంది. అదే సమయంలో ఆయన లోక్ సభకు పోటీ చేయడంతో బీజేపీ కూడా అనర్హతా పిటిషన్ వేసింది. దానిపై విచారణ బుధవారం జరిగింది. అయితే దానంపై సస్పెన్షన్ వేటు వేసినట్లుగా బీఆర్ఎస్ పార్టీ సుప్రీంకోర్టులో అఫిడవిట్ వేసిందని బిజెపి నేత ఏలేటి మహేశ్వర్ రెడ్డి చెబుతున్నారు. అయితే ఈ విషయంపై బీఆర్ఎస్ ఇంకా ఎలాంటి అధికారిక ప్రకటన చేయలేదు.
సస్పెన్షన్ వేటు - వ్యూహాత్మక రక్షణ?
సాధారణంగా ఒక పార్టీకి చెందిన ఎమ్మెల్యే మరో పార్టీలోకి వెళ్తే ఫిరాయింపుల నిరోధక చట్టం కింద అనర్హత వేటు పడే అవకాశం ఉంటుంది. అయితే, ఒకవేళ పార్టీయే సదరు నేతను ముందే సస్పెండ్ చేసినట్లు కోర్టుకు తెలిపితే, అప్పుడు ఆ నేత స్వతంత్ర హోదాను పొందుతాడు లేదా సాంకేతికంగా అనర్హత నుంచి తప్పించుకునే వెసులుబాటు ఉంటుంది. బిఆర్ఎస్ పార్టీ దానం నాగేందర్ను సస్పెండ్ చేసినట్లు అఫిడవిట్ ఇచ్చి ఉంటే, అది ఆయనను అనర్హత నుంచి కాపాడుతుంది. ఒకవైపు తమ పార్టీ ఎమ్మెల్యేలను కాంగ్రెస్ చేర్చుకుంటోందని బిఆర్ఎస్ హైకోర్టు, సుప్రీంకోర్టుల్లో పోరాటం చేస్తోంది. మరోవైపు, అదే పార్టీకి చెందిన కీలక నేతపై అనర్హత వేటు పడకుండా సస్పెన్షన్ అనే అస్త్రాన్ని ప్రయోగిస్తే, అది ఆ పార్టీ చిత్తశుద్ధిని ప్రశ్నార్థకం చేస్తుంది.
ఫిరాయింపుల చట్టం - సాంకేతిక లొసుగులు
రాజ్యాంగంలోని 10వ షెడ్యూల్ ప్రకారం.. పార్టీ ప్రాథమిక సభ్యత్వానికి రాజీనామా చేసినా లేదా విప్ ధిక్కరించినా అనర్హత వేటు పడుతుంది. కానీ, పార్టీయే సదరు సభ్యుడిని బహిష్కరిస్తే అతను సభలో స్వతంత్రుడిగా కొనసాగవచ్చు. ఒకవేళ బిఆర్ఎస్ అఫిడవిట్లో సస్పెన్షన్ ప్రస్తావన ఉంటే, పిటిషనర్ల వాదన కోర్టులో వీగిపోయే ప్రమాదం ఉంది. దీన్నే ఏలేటి మహేశ్వర్ రెడ్డి రాజకీయ కుట్రగా అభివర్ణిస్తున్నారు. ఒకవేళ బిఆర్ఎస్ కావాలనే దానంను కాపాడుతోందని ప్రజల్లోకి సంకేతాలు వెళ్తే, ఆ పార్టీ నైతిక విజయాన్ని కోల్పోతుంది. ముఖ్యంగా ఇతర ఎమ్మెల్యేల అనర్హత విషయంలో బిఆర్ఎస్ చేస్తున్న పోరాటానికి విలువ లేకుండా పోతుంది. తమ పార్టీ నేతలను కాంగ్రెస్కు అప్పగించి, బయటకు మాత్రం పోరాడుతున్నట్లు నటిస్తున్నారు అనే విమర్శలను కేడర్ నుంచి ఎదుర్కోవాల్సి ఉంటుంది. ఇది పార్టీ విశ్వసనీయతను దెబ్బతీస్తుంది.
అధికారికంగా ఇంకా స్పందించని బీఆర్ఎస్
ప్రస్తుతం నెలకొన్న గందరగోళంపై బిఆర్ఎస్ నాయకత్వం తక్షణమే స్పందించాల్సి ఉంది. సుప్రీంకోర్టుకు సమర్పించిన అఫిడవిట్లో ఏముందో బహిరంగ పరచకపోతే, రాజకీయంగా బిఆర్ఎస్ ఆత్మరక్షణలో పడక తప్పదు. బిజెపి చేస్తున్న ఆరోపణలను తిప్పికొట్టాలంటే చట్టపరమైన ఆధారాలతో క్లారిటీ ఇవ్వడం ఆ పార్టీకి అత్యవసరం. దానం నాగేందర్ విషయంలో జరుగుతున్న ఈ పరిణామాలు కేవలం ఒక ఎమ్మెల్యే అనర్హతకు సంబంధించినవి మాత్రమే కాదు..కీలక రాజకీయ మార్పులకు కారణం అయ్యే అంశం అవుతుందని భావిస్తున్నారు.
టాప్ హెడ్ లైన్స్
ట్రెండింగ్ వార్తలు
