TVK Govt Asks State Election Commissioner to Step Down: తమిళనాడులో జగన్ మార్క్ పాలిటిక్స్ - ఎస్ఈసీ వర్సెస్ సీఎం విజయ్.. ఆనాటి నిమ్మగడ్డ ఎపిసోడ్ రిపీట్ అవుతోందా?
Tamil Nadu SEC Jothi Nirmalasamy Resignation: స్థానిక ఎన్నికలకు వెళ్లాలనుకుంటున్న విజయ్.. డీఎంకేహయాంలో నియమితులైన ఎస్ఈసీని రాజీనామా చేయాలని ఒత్తిడి చేస్తున్నారు. కానీ ఆమె అంగీకరించడం లేదు.
Tamil Nadu Local Body Elections 2026: ఆంధ్రప్రదేశ్లో గత వైఎస్ జగన్ మోహన్ రెడ్డి ప్రభుత్వ హయాంలో రాష్ట్ర ఎన్నికల కమిషనర్ నిమ్మగడ్డ రమేష్ కుమార్కు, ప్రభుత్వానికి మధ్య నడిచిన సుదీర్ఘ హైడ్రామా దేశవ్యాప్తంగా సంచలనం సృష్టించింది. స్థానిక సంస్థల ఎన్నికల నిర్వహణ విషయంలో తలెత్తిన విభేదాల కారణంగా.. ఆర్డినెన్స్ తెచ్చి మరీ ఎస్ఈసీని తొలగించాలని జగన్ సర్కార్ చూసినా, చివరకు కోర్టుల్లో గట్టి ఎదురుదెబ్బ తగిలింది. ఇప్పుడు దాదాపు అలాంటి చారిత్రాత్మక రాజ్యాంగ సంక్షోభమే పొరుగు రాష్ట్రమైన తమిళనాడులోనూ పునరావృతమవుతోంది. కొత్తగా ముఖ్యమంత్రి పీఠాన్ని అధిరోహించిన తమిళగ వెట్రి కజగం అధినేత సి. జోసెఫ్ విజయ్ ప్రభుత్వం.. ప్రస్తుత తమిళనాడు స్టేట్ ఎలక్షన్ కమిషనర్ జ్యోతి నిర్మలాసామిని తప్పించాలని ఒత్తిడి తీసుకురావడం చెన్నై రాజకీయాల్లో హాట్ టాపిక్గా మారింది.
రాజీనామాకు ఒత్తిడి.. ససేమిరా అంటున్న ఎస్ఈసీ!
గత డీఎంకే ప్రభుత్వ హయాంలో మార్చి 2024లో ఐదేళ్ల కాలపరిమితితో రిటైర్డ్ ఐఏఎస్ అధికారిణి బి. జ్యోతి నిర్మలాసామి రాష్ట్ర ఎన్నికల కమిషనర్గా బాధ్యతలు చేపట్టారు. ఆమె పదవీ కాలం మే 2029 వరకు అంటే ఇంకా దాదాపు మూడేళ్ల పాటు ఉంది. అయితే, విజయ్ నేతృత్వంలోని టీవీకే ప్రభుత్వం అధికారంలోకి రాగానే.. డీఎంకే హయాంలో కీలక పోస్టుల్లో నియమితులైన ప్లానింగ్ కమిషన్ వైస్ చైర్మన్ జె. జయరంజన్, మాజీ సీఎస్ శివ దాస్ మీనా వంటి పలువురు అధికారులు తమ పదవులకు రాజీనామా చేశారు. ఇదే రీతిలో ఎస్ఈసీ జ్యోతి నిర్మలాసామిని కూడా తప్పుకోవాలని ప్రభుత్వం కోరినట్లు విశ్వసనీయ వర్గాల సమాచారం. కానీ, ఆమె మాత్రం తాను రాజీనామా చేసే ప్రసక్తే లేదని, చట్టబద్ధంగా తన విధులను కొనసాగిస్తానని భీష్మించుకుని కూర్చున్నారు.
స్థానిక సంస్థల ఎన్నికల వేళ.. డీఎంకే మార్క్ వద్దు!
తమిళనాడులో త్వరలోనే అత్యంత ప్రతిష్టాత్మకమైన గ్రామీణ, పట్టణ స్థానిక సంస్థల ఎన్నికలు జరగాల్సి ఉంది. ఈ కారణంగానే గత డీఎంకే ప్రభుత్వం నియమించిన అధికారిణి నేతృత్వంలో ఎన్నికలకు వెళ్తే.. అధికార టీవీకే పార్టీకి క్షేత్రస్థాయిలో ప్రతికూల పరిణామాలు ఎదురవుతాయనేది సీఎం విజయ్ వ్యూహాత్మక ఆలోచనగా కనిపిస్తోంది. ముఖ్యంగా వార్డుల పునర్విభజన ప్రక్రియకు కూడా జ్యోతి నిర్మలాసామి చైర్పర్సన్గా వ్యవహరిస్తున్నారు. వార్డుల విభజన, ఈవీఎంల కేటాయింపు వంటి కీలక నిర్ణయాలు ప్రత్యర్థి పార్టీ అయిన డీఎంకేకు అనుకూలంగా మారకుండా ఉండాలంటే.. ఎస్ఈసీ స్థానంలో తమకు అనుకూలమైన లేదా సరికొత్త అధికారిని కూర్చోబెట్టాలని విజయ్ సర్కార్ భావిస్తోంది.
తీసేయడం అసాధ్యం.. అందుకే రాజీనామా అస్త్రం!
భారత రాజ్యాంగంలోని ఆర్టికల్ 243K ప్రకారం.. రాష్ట్ర ఎన్నికల కమిషనర్ అనేది ఒక స్వతంత్ర, అత్యున్నత రాజ్యాంగబద్ధమైన పదవి. హైకోర్టు న్యాయమూర్తిని ఏ విధంగా అయితే పార్లమెంట్ ద్వారా ఇంపీచ్మెంట్ ప్రక్రియతో తొలగిస్తారో.. ఎస్ఈసీని కూడా అదే పద్ధతిలో తప్పించాలి తప్ప, రాష్ట్ర ప్రభుత్వానికి నేరుగా తొలగించే అధికారం లేదు. ఈ న్యాయపరమైన రక్షణల వల్లే జ్యోతి నిర్మలాసామి సీటు ఖాళీ చేయడం లేదు. ప్రభుత్వం నేరుగా ఆర్డర్ ఇవ్వలేదు కాబట్టే.. గతంలో 2011లో ఏఐఏడీఎంకే అధికారంలోకి వచ్చినప్పుడు నాటి ఎస్ఈసీ సయ్యద్ మునీర్ హోదా స్వచ్ఛందంగా తప్పుకున్నట్లుగానే, ఈమె చేత కూడా ఒత్తిడి తెచ్చి రాజీనామా చేయించాలని విజయ్ సర్కార్ చూస్తోంది.
నిమ్మగడ్డ ఎపిసోడ్ ద్వారా విజయ్ నేర్చుకోవాల్సిన పాఠం ఏమిటి?
ఆనాడు ఏపీలో జగన్ ప్రభుత్వం నిమ్మగడ్డ రమేష్ కుమార్ను ఆర్డినెన్స్ ద్వారా తొలగించినప్పుడు సుప్రీంకోర్టు వరకు వివాదం వెళ్ళింది. రాజ్యాంగ సంస్థల స్వయంప్రతిపత్తిని దెబ్బతీసేలా ప్రవర్తిస్తే కోర్టులు సహించబోవని న్యాయస్థానాలు స్పష్టం చేస్తూ నిమ్మగడ్డను తిరిగి అదే సీట్లో కూర్చోబెట్టాయి. ఒకవేళ తమిళనాడులో సీఎం విజయ్ గనుక జ్యోతి నిర్మలాసామిని బలవంతంగా తొలగించేందుకు ఏవైనా అడ్డదారులు తొక్కితే.. డీఎంకే ఈ అంశాన్ని లీగల్గా వాడుకుని విజయ్ ప్రభుత్వానికి పెద్ద లీగల్ షాక్ ఇచ్చే అవకాశం ఉంది. పైగా, జ్యోతి నిర్మలాసామి గతంలో ఇసుక మాఫియాపై పోరాడి కల్పనా చావ్లా అవార్డు అందుకున్న ధైర్యశాలి అయిన ఆఫీసర్గా పేరుండటం ఆమెకు మరింత సానుకూలాంశం.
యువ ముఖ్యమంత్రికి మొదటి అగ్నిపరీక్ష!
సినిమాల్లో అవినీతిపై, వ్యవస్థలపై తిరగబడే పాత్రలు చేసిన విజయ్.. నిజజీవితంలో సీఎం కాగానే ఇలా ఒక రాజ్యాంగబద్ధమైన అధికారిణిని టార్గెట్ చేయడంపై ప్రతిపక్షాలు అప్పుడే విమర్శలు గుప్పిస్తున్నాయి. డీఎంకే , ఏఐఏడీఎంకేలకు ప్రత్యామ్నాయంగా సరికొత్త, పారదర్శక రాజకీయాలు చేస్తానని వచ్చిన విజయ్.. అధికారంలోకి రాగానే పాత తరం రాజకీయాల తరహాలోనే సంస్థల ప్రక్షాళన కు దిగడం ఆయన ఇమేజ్కు ఎంతవరకు ప్లస్ అవుతుందనేది పెద్ద ప్రశ్న. ఈ ఎస్ఈసీ వివాదాన్ని విజయ్ ఎలా డీల్ చేస్తారనే దానిపైనే తమిళనాడులో రాబోయే స్థానిక ఎన్నికల భవిష్యత్తు మరియు ఆయన ప్రభుత్వ పారదర్శకత ఆధారపడి ఉన్నాయని భావిస్తున్నారు.
టాప్ హెడ్ లైన్స్
ట్రెండింగ్ వార్తలు
