Adilabad Latest News: ఆదిలాబాద్ జిల్లాలో రంగంలోకి రోమా- గంజాయి, మాదకద్రవ్యాల నియంత్రణకు ప్రత్యేక టాస్క్!

Adilabad Latest News: తెలంగాణ మహారాష్ట్ర సరిహద్దుల్లో పోలీసులు ముమ్మర తనిఖీలు చేపట్టారు. మాదకద్రవ్యాల నియంత్రణ కోసం రోమా అనే జాగిలాన్ని రంగంలోకి దించారు.

ఆదిలాబాద్ జిల్లాలోని తెలంగాణ మహారాష్ట్ర సరిహద్దుల్లో పోలీసులు ముమ్మర తనిఖీలు చేపట్టారు.

ఆదిలాబాద్ జిల్లాను గంజాయి, మాదకద్రవ్యాలరహిత జిల్లాగా మార్చేందుకు ఆదిలాబాద్ జిల్లా పోలీస్ శాఖ ప్రత్యేక కార్యాచరణను అమలు చేస్తోంది. మహారాష్ట్ర సరిహద్దులోని పిప్పర్‌వాడ చెక్‌పోస్ట్ వద్ద జిల్లా ఎస్పీ అఖిల్ మహాజన్ ఆధ్వర్యంలో ప్రత్యేక తనిఖీలు నిర్వహించారు.

మహారాష్ట్ర రాష్ట్రం నుంచి తెలంగాణలోకి ప్రవేశించే ప్రైవేట్ వాహనాలు, బస్సులు, కార్లు, ఇతర అనుమానాస్పద వాహనాలను క్షుణ్ణంగా తనిఖీ చేశారు. ఈ తనిఖీల్లో నార్కోటిక్ జాగిలం రోమా తన ప్రత్యేక టాలెంట్‌తో వాహనాలను పరిశీలిస్తూ కీలక పాత్ర పోషించింది.

ఈ సందర్భంగా జిల్లా ఎస్పీ మాట్లాడుతూ, గంజాయి, ఇతర మాదకద్రవ్యాల రవాణా, విక్రయం, నిల్వ, వినియోగం చట్టరీత్యా నేరమని చెప్పారు. ఇటువంటి కార్యకలాపాలకు పాల్పడే వారిపై కఠిన చర్యలు తీసుకుంటామని ఎస్పీ హెచ్చరించారు.

జిల్లా వ్యాప్తంగా గంజాయి నిర్మూలనకు ప్రత్యేక బృందాలు, ఈగల్ టీం, నార్కోటిక్ జాగిలాల సహాయంతో నిరంతర తనిఖీలు కొనసాగుతాయని తెలిపారు.

ఈ కార్యక్రమంలో ఆదిలాబాద్ డిఎస్పీ ఎల్ జీవన్ రెడ్డి, జైనథ్ సిఐ జి శ్రావణ్, సిబ్బంది తదితరులు పాల్గొన్నారు.