Minister KTR: ఉచితంగా స్కూటీల పంపిణీ.. ఇదే నాకు ఆత్మసంతృప్తి: కేటీఆర్

ఈ ఏడాది తన పుట్టిన రోజు సందర్భంగా మంత్రి కేటీఆర్ ప్రకటించిన ‘గిఫ్ట్ ఎ స్మైల్’ కార్యక్రమం కింద వికలాంగులకు వాహనాలను పంపిణీ చేశారు. ఈ ఏడాది తన పుట్టిన రోజుకు ఫ్లె్క్సీలు, బ్యానర్ల కోసం డబ్బు వృథా చేయొద్దని కోరిన కేటీఆర్‌.. గత ఏడాది నుంచి గిఫ్ట్‌ ఏ స్మైల్ కార్యక్రమాన్ని నిర్వహిస్తున్నారు.

గతేడాది ఆయన పుట్టిన రోజుకు తన సొంత నియోజకవర్గం సిరిసిల్లలో 6 అంబులెన్స్‌ను దానం చేశారు. ఈ ఏడాది 130 స్కూటర్లను దివ్యాంగులకు అందించారు. హైదరాబాద్‌ నెక్లెస్ రోడ్‌లోని జల విహార్‌లో దీనికి సంబంధించిన కార్యక్రమాన్ని నిర్వహించారు.

మంత్రి కేటీఆర్‌ పిలుపు మేరకు ఎర్రబెల్లి దయాకర్‌ రావు 150 స్కూటర్లు, ఎమ్మెల్యేలు మాధవరం కృష్ణారావు 100 స్కూటర్లు, వివేకానంద్‌ 50, ఎమ్మెల్సీలు శంబీపూర్‌ రాజు 63, నవీన్‌ 100 చొప్పున స్కూటర్లు అందించారని కేటీఆర్ వేదికపై వెల్లడించారు.

రాజకీయాల కోసం ప్రత్యేక రోజుల్లో ఫ్లెక్సీలు, బ్యానర్లకు పెట్టే ఖర్చును ఇలాంటి మంచి కార్యక్రమాలకు వాడాలని కేటీఆర్ పిలుపునిచ్చారు. ఆత్మ సంతృప్తినిచ్చే కార్యక్రమాల్లో భాగంగానే గిఫ్ట్‌ ఎ స్మైల్‌ కార్యక్రమాన్ని నిర్వహిస్తున్నట్లు కేటీఆర్ తెలిపారు.

రాజకీయాల్లో ఉన్నప్పుడు డబ్బులు ఎక్కువ ఖర్చు పెడుతుంటారని, వాటిలో భాగంగా ఒక్కోసారి అనవసర ఖర్చులైన బ్యానర్లు, హోర్డింగుల ఏర్పాటుకు కూడా ఖర్చులు పెడుతుంటారని అన్నారు. అలాంటి ఖర్చులను తగ్గించుకోవాలన్నదే తన ఆలోచన అని అన్నారు.

కరోనా విపత్కర పరిస్థితుల్లో డబ్బులు వృథాగా ఖర్చు పెట్టొద్దని పిలుపునిచ్చారు. ఈ ఏడాది తన పుట్టిన రోజు సందర్భంగా వెయ్యి మోటార్‌ సైకిళ్లను దివ్యాంగులకు అందజేసినట్లు తెలిపారు.

టీఆర్‌ఎస్‌ నేతలు సైతం సొంతగా ముందుకు వచ్చి కష్టాల్లో ఉన్నవారికి సాయం అందిస్తున్నారని చెప్పారు. దివ్యాంగుల కోసం మూడు చక్రాల వాహనాలు బాగా ఉపయోగపడతాయని కేటీఆర్ వెల్లడించారు.

ఈ కార్యక్రమంలో రాష్ట్ర పంచాయతీరాజ్, గ్రామీణాభివృద్ధి శాఖ మంత్రి ఎర్రబెల్లి దయాకర్ రావు, పశు సంవర్థకశాఖ మంత్రి తలసాని శ్రీనివాస్ యాదవ్ పలువురు ఎమ్మెల్యేలు, ప్రజా ప్రతినిధుల పాల్గొన్నారు.