Potatoes and Acidity : బంగాళదుంపలు తింటే గ్యాస్, ఎసిడిటీ వస్తుందా? అసలు నిజం, కారణాలు ఏంటి?

Potatoes and Digestion : దాదాపు ప్రతి ఇంట్లోనూ బంగాళదుంపను ఏదొక రూపంలో తింటారు. అయితే వీటిని తింటే గుండెల్లో మంట, గ్యాస్, కడుపు బరువుగా అనిపించడం లేదా ఎసిడిటీ వంటివి వస్తాయట.. వీటిలో నిజం ఎంత?

బంగాళదుంపలు తింటే కడుపు ఉబ్బరంగా ఉందా

యూబీహెల్త్ ప్రకారం.. బంగాళాదుంపలలో రెసిస్టెంట్ స్టార్చ్ ఉంటుంది. ఇది ఒక రకమైన పిండిపదార్థం. ఇది పూర్తిగా జీర్ణం కాకుండా పెద్దపేగుకు చేరుకుంటుంది. అక్కడ ఉండే బ్యాక్టీరియా దీనిని పులియబెట్టి.. వాయువును ఉత్పత్తి చేస్తుంది.

కొంతమందిలో ఈ వాయువు కడుపు ఉబ్బరం, బరువుగా అనిపించడం, ఎసిడిటీ వంటి లక్షణాలను కలిగిస్తుంది. సున్నితమైన జీర్ణవ్యవస్థ ఉన్నవారు ఈ సమస్యను మరింత తరచుగా ఎదుర్కొనే అవకాశం ఉంది.

ఇరిటబుల్ బవెల్ సిండ్రోమ్ లేదా తరచుగా జీర్ణ సమస్యలతో బాధపడుతుంటే.. ఎక్కువగా బంగాళాదుంపలు తినడం వల్ల అసౌకర్యం మరింత తీవ్రమవుతుంది. బంగాళాదుంపలు సాధారణంగా జీర్ణక్రియకు మంచివే అయినా.. ఎక్కువగా తీసుకోవడం వల్ల కొంతమందిలో గ్యాస్, కడుపు నొప్పికి కారణం కావచ్చు.

బంగాళాదుంపలను సరైన పద్ధతిలో తీసుకుంటే ఆరోగ్యానికి మంచిది. వాటిని ఉడకబెట్టి లేదా కాల్చి తీసుకుంటే సులభంగా జీర్ణమవుతాయి. ఫ్రెంచ్ ఫ్రైస్, చిప్స్ లేదా అధిక నూనె, మసాలాలతో చేస్తే.. కడుపుపై ​​అదనపు ఒత్తిడిని కలిగిస్తాయి.

నూనె పదార్థాలు జీర్ణక్రియ ప్రక్రియను నెమ్మదింపజేస్తాయి. దీనివల్ల ఎసిడిటీ, గ్యాస్ పెరగవచ్చు. అందువల్ల బంగాళాదుంపలు తిన్న తర్వాత మీకు గుండెల్లో మంటగా అనిపించవచ్చు.

అలాగే పచ్చి లేదా మొలకెత్తిన బంగాళాదుంపలను తినకూడదని నిపుణులు సలహా ఇస్తున్నారు. అటువంటి బంగాళాదుంపలలో సోలనిన్ అనే సహజ విషపూరిత పదార్థం అధిక స్థాయిలో ఉండవచ్చు. ఇది కడుపు నొప్పి, వికారం, జీర్ణ సమస్యలకు కారణమవుతుంది.

గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.