Lungs Health : గాలి కాలుష్యంతో ఇబ్బంది పడుతున్నారా? ఊపిరితిత్తులను కాపాడుకోవడానికి ఈ జాగ్రత్తలు తీసుకోండి
విషపూరిత గాలి ప్రభావం ఊపిరితిత్తులపై ఎక్కువగా కనిపిస్తుంది. పొగమంచు.. కలుషితమైన గాలిలో ఉండటం వల్ల దగ్గు, గొంతు నొప్పి, ఛాతీ బిగుసుకుపోవడం, శ్వాస తీసుకోవడంలో ఇబ్బందులు ఉంటాయి.
ఆస్తమా లేదా బ్రోన్కైటిస్ ఉన్నవారికి.. కలుషితమైన గాలి విషం కంటే ఎక్కువ ప్రమాదకరమైనది. చిన్న పిల్లలు, వృద్ధులు దీని నుంచి దూరంగా ఉండటం చాలా అవసరం.
కేవలం ఊపిరితిత్తులే కాదు.. కాలుష్యం గుండె మీద కూడా నేరుగా ప్రభావం చూపుతుంది. కలుషితమైన గాలిని ఎక్కువ పీల్చడం వల్ల గుండెపోటు, అధిక రక్తపోటు, రక్తం గడ్డకట్టడం, తీవ్రమైన వ్యాధుల ప్రమాదాన్ని పెంచుతుంది.
WHO రిపోర్ట్ ప్రకారం.. గాలిలో ఉండే చిన్న చిన్న విషపూరిత కణాలు శరీరంలోకి ప్రవేశించి నెమ్మదిగా క్యాన్సర్ వంటి ప్రమాదకరమైన వ్యాధులకు కూడా కారణం అవుతున్నాయని తెలిపింది. ఊపిరితిత్తుల క్యాన్సర్ కాలుష్యానికి సంబంధించిన అత్యంత సాధారణ సమస్యగా పరిగణిస్తున్నారు.
అత్యవసరమైతే తప్పా ఇంటి నుంచి బయటకు వెళ్లకుండా ఉండటానికి ప్రయత్నించండి. ఒకవేళ బయటకు వెళ్లాల్సి వస్తే N95 లేదా N99 మాస్క్ ధరించాలి. ఇది మిమ్మల్ని మీరు రక్షించుకోవడానికి మంచి మార్గం.
ఇంట్లో ఎయిర్ ప్యూరిఫైయర్ వాడితే మంచిది. ఇంట్లో తులసి, మనీ ప్లాంట్, స్నేక్ ప్లాంట్ వంటి ఇండోర్ మొక్కలు పెంచుకోండి. ఇవి గాలిని శుద్ధి చేయడంలో హెల్ప్ చేస్తాయి.
పుష్కలంగా నీరు తాగాలి. తద్వారా శరీరంలో ఉన్న టాక్సిన్స్ బయటకు వెళ్లి రోగనిరోధక శక్తి పెరుగుతుంది. దగ్గు, శ్వాస తీసుకోవడంలో ఇబ్బంది, ఛాతీ నొప్పి, కళ్లల్లో మంట ఉంటే.. నిర్లక్ష్యం చేయకుండా వైద్యుడిని సంప్రదించండి.