world

Bulgaria Road Accident: బల్గేరియాలో ఘోర రోడ్డు ప్రమాదం.. ఒకేసారి 86 వాహనాలు ఢీ- 12 మంది మృతి, పలువురికి గాయాలు

Shankar Dukanam — Wed, 11 Nov 2026 12:45:11 +0530

సోఫియా: ఒక్కసారిగా దట్టమైన పొగమంచు కమ్ముకోవడంతో చలికాలంలో ఎదురుగా వస్తున్న వాహనాలు అంతగా కనిపించవు. ఏం జరుగుతుందో తెలుసుకునేలోపే ఒకదాని వెనుక మరొకటి చాలా వాహనాలు ఢీకొనడంతో భారీ రోడ్డు ప్రమాదం జరిగింది. ఒకట్రెండు కాదు ఏకంగా 86 వాహనాలు ఒకేసారి ప్రమాదానికి గురయ్యాయి. ఈ ప్రమాదంలో 12 మంది మృతిచెందగా, మరో 46 మంది తీవ్రంగా గాయపడ్డారు. బల్గేరియాలో రాజధాని సోఫియా సమీపంలో జరిగిన ఈ ఘోర రోడ్డు ప్రమాదం ప్రపంచవ్యాప్తంగా హాట్ టాపిక్‌గా మారింది.

బల్గేరియా రాజధాని సోఫియా నుంచి బ్లాక్ సి తీరంలోని బుర్గాస్ నగరానికి వెళ్లే ప్రధాన రహదారిపై ఈ భారీ రోడ్డు ప్రమాదం జరిగింది. మంగళవారం యాంబోల్ ప్రాంతంలో ఒక్కసారిగా దట్టమైన పొగమంచు కమ్ముకుంది. దీంతో రోడ్డుపై ఎదురుగా ఉన్న వాహనాలు కూడా కనిపించలేదు. ఈ క్రమంలో రెండు వైపుల నుంచి వస్తున్న వాహనాలు ఒకదానికొకటి బలంగా ఢీకొన్నాయి. మొదట రెండు వాహనాలు ఢీకొన్నాయి. అంతలోనే వాటి వెనకాల వస్తున్న కార్లు, ట్రక్కులు, ఇతర వాహనాలు ఢీకొని కిలోమీటర్ల మేర నిలిచిపోయాయి. ఈ ప్రమాదంలో మొత్తం 86 వాహనాలు ఢీకొన్నాయని, కనీసం 12 మంది ప్రాణాలు కోల్పోగా, కొన్ని వాహనాలు భారీగా దెబ్బతిన్నాయని అధికారులు వెల్లడించారు. ఇందులో భారీ ట్రక్కులు ఉండటంతో ప్రమాద నష్టం అధికంగా ఉందని తెలుస్తోంది.

యూరప్, ఉత్తర అమెరికా లాంటి దేశాల్లో శీతాకాలంలో, అది కూడా మంచు అధికంగా కురిసే ఉదయం వేళలో వాహనాలు నడపటం అంత ఈజీ కాదు. భారత్ లోనూ ఢిల్లీ ఎన్సీఆర్ ఏరియాల్లో శీతాకాలంలో ఉదయం వేశ ముందు వచ్చే వాహనాలు చివరి నిమిషంలో కనిపించడంతో బ్రేకులు వేసేలోపే ఢీకొని రోడ్డు ప్రమాదాలు జరుగుతుంటాయని తెలిసిందే. కొన్ని సందర్భాలలో రోడ్డు మార్గం సరిగ్గా కనిపించక సైతం అవి పక్కకు దూసుకెళ్లడంతో ప్రమాదాలు జరుగుతుంటాయి. ఒక్క క్షణం రోడ్డు కనిపించకపోవడంతో రోడ్డు ప్రమాదాలు జరిగి అటు మనుషులు ప్రాణాలు కోల్పోవడం ఎన్నో కుటుంటాల్లో విషాదం నింపుతోంది. మరోవైపు వాహనాలు డ్యామేజీ కావడంతో కొందరికి వాటిని రిపేర్ చేపించే అవకాశం కూడా లేని విధంగా దెబ్బతింటున్నారు. కొందరు కాళ్లు, చేతులు కోల్పోయి బెడ్ కు పరిమితం అయిన ఘటనలు జరుగుతుంటాయి. పొగమంచులో డ్రైవింగ్ చేసేటప్పుడు చాలా అప్రమత్తంగా ఉండాలని ఈ ఘటన మరోసారి గుర్తుచేస్తోంది.

Nvidia Jensen Huang Affair: చైనా గూఢచారితో రిలేషన్ నిజమే.. సారీ చెప్పిన ఎన్వీడీయా సీఈఓ జెన్సన్ హువాంగ్- స్పందించిన ట్రంప్

Satyaprasad Bandaru — Mon, 9 Nov 2026 12:12:08 +0530

Nvidia Jensen Huang Affair: టెక్ ఇండస్ట్రీలో పెనుకలకలం రేగింది. ఆర్టిఫిషియల్ ఇంటెలిజెన్స్ చిప్‌ల రూపశిల్పి, ఎన్వీడీయా సీఈఓ జెన్సన్ హువాంగ్ చైనా గూఢచార సంస్థతో సంబంధాలు ఉన్నాయనే ఆరోపణలు ఎదుర్కొంటున్న ఓ మహిళతో వివాహేతర సంబంధం కలిగి ఉన్నట్లు అంగీకరించారు. ఈ విషయాన్ని ఆయన ఎన్వీడీయా ఉద్యోగులకు పంపిన ఒక అంతర్గత ఈ-మెయిల్‌ ద్వారా పేర్కొన్నారు.

న్యూయార్క్ టైమ్స్ రిపోర్ట్

న్యూయార్క్ టైమ్స్, ఫైనాన్షియల్ టైమ్స్ నివేదికల ప్రకారం.. సింగపూర్ బేస్డ్ టెక్నాలజీ సంస్థ మెగాస్పీడ్ ఇంటర్నేషనల్ మాజీ సీనియర్ ఎగ్జిక్యూటివ్ అలైస్ హువాంగ్‌తో జెన్సన్ హువాంగ్‌కు సన్నిహిత సంబంధం ఏర్పడింది. అమెరికా నిఘా వర్గాలు సమాచారం ప్రకారం.. అలైస్ హువాంగ్ చైనా కోసం పనిచేస్తున్న ఒక గూఢచారి అని, ఆమె జెన్సన్ హువాంగ్ ద్వారా అమెరికన్ AI టెక్నాలజీ, ఎన్వీడీయా కంపెనీ వ్యాపార వ్యూహాలు, ఎగుమతి విధానాలపై సమగ్ర సమాచారం రాబట్టడానికి రిక్రూట్ అయ్యారని అమెరికా ఇంటెలిజెన్స్ అనుమానిస్తుంది.

కుటుంబానికి, కంపెనీకి జెన్సన్ హువాంగ్ క్షమాపణలు

వివాహేతర సంబంధం బయటపడటంతో జెన్సన్ హువాంగ్ తన కుటుంబానికి, కంపెనీ బోర్డుకి, ఉద్యోగులకు ఈ-మెయిల్ ద్వారా క్షమాపణలు చెప్పారు.

"నేను నా భార్యకు ద్రోహం చేశాను. నా చర్యలు ఆమెను, మా పిల్లలను తీవ్రంగా బాధించాయి. నేను చేసిన దానికి ఎలాంటి సాకు లేదు, నేను చాలా చింతిస్తున్నాను. నా జీవితాంతం నా కుటుంబం నాకు మద్దతుగా నిలిచింది, కానీ నేను వారి నమ్మకాన్ని దెబ్బతీశాను. ఎన్వీడీయాకు నాయకత్వం వహించడం నా జీవితంలో లభించిన గొప్ప బాధ్యత. నేను ఆ స్థానానికి, మీ నమ్మకానికి అర్హుడిగా ఉండటంలో విఫలమయ్యాను. మళ్లీ అందరి విశ్వాసాన్ని పొందేందుకు కృషి చేస్తాను" అని హువాంగ్ పేర్కొన్నారు.

స్పందించిన డొనాల్డ్ ట్రంప్

ఈ ఘటనపై స్పందించిన అమెరికా అధ్యక్షుడు డొనాల్డ్ ట్రంప్ జెన్సన్ హువాంగ్‌ ను "మంచి వ్యక్తి" అన్నారు. హువాంగ్ దేశం కోసం, టెక్ రంగానికి అద్భుతమైన కృషి చేశారని కొనియాడారు. అయితే, ఈ అంశంపై తాను హువాంగ్‌తో వ్యక్తిగతంగా మాట్లాడలేదని ట్రంప్ స్పష్టం చేశారు.

Also Read: దీపావళి ఎఫెక్ట్.. ఢిల్లీ ప్రజలు విషగాలులు పీల్చుతున్నారా ? గ్యాస్ చాంబర్‌గా మారిన సిటీ

ఎన్వీడీయా బోర్డు విచారణ

ఈ కథనాలు అంతర్జాతీయంగా కలకలం రేపడంతో, ఎన్వీడీయా బోర్డ్ ఆఫ్ డైరెక్టర్లు దీనిపై స్వతంత్ర దర్యాప్తునకు ఒక ప్రత్యేక కమిటీని ఏర్పాటు చేశారు. జాతీయ భద్రతకు గానీ, ఎన్వీడీయా గోప్యత, కంపెనీ డేటాకు గానీ ఎలాంటి నష్టం జరగలేదని, మీడియా రిపోర్టునలు నమ్మడానికి సరైన కారణాలు లేవని బోర్డు పేర్కొంది. బోర్డు స్వతంత్ర విచారణకు జెన్సన్ హువాంగ్ పూర్తిగా సహకరిస్తున్నారని, అందుబాటులో ఉన్న అన్ని రికార్డులను, నివేదికలను కమిటీ సమగ్రంగా సమీక్షిస్తుందని ప్రకటించింది. ఈ క్రమంలో అమెరికా-చైనా టెక్నాలజీ పోటీపై ప్రాధాన్యత సంతరించుకుంది.

Also Read: కాంగ్రెస్‌పై విపక్షాల పట్టు - ట్రంప్‌కు ఇంపీచ్‌మెంట్ గండం నిజమేనా.. అమెరికా రాజ్యాంగం ఏం చెబుతోంది?

Donald Trump Impeachment Possibility: కాంగ్రెస్‌పై విపక్షాల పట్టు - ట్రంప్‌కు ఇంపీచ్‌మెంట్ గండం నిజమేనా.. అమెరికా రాజ్యాంగం ఏం చెబుతోంది?

Raja Sekhar Allu — Mon, 9 Nov 2026 09:46:08 +0530

US Midterm Election Results Impact Trump: అమెరికా మధ్యంతర ఎన్నికల తీర్పుతో వాషింగ్టన్ రాజకీయాలు ఒక్కసారిగా వేడెక్కాయి. కాంగ్రెస్‌లోని ప్రతినిధుల సభ తో పాటు సెనేట్‌లోనూ విపక్ష డెమొక్రాట్లు బలం పుంజుకుని ఆధిపత్యం సాధించడంతో, అధ్యక్షుడు డోనాల్డ్ ట్రంప్ పరిపాలనాధికారంపై కాంగ్రెస్ బలమైన పట్టును బిగించింది. ఈ మారిన రాజకీయ సమీకరణాలతో వివాదాస్పద నిర్ణయాలు తీసుకుంటున్న ట్రంప్‌ను ఇంపీచ్‌మెంట్ ద్వారా అధ్యక్ష పీఠం నుంచి తప్పించవచ్చా అన్న చర్చ అంతర్జాతీయంగా తీవ్ర ఊపందుకుంది.

ఇంపీచ్ చేయవచ్చు..కానీ పదవి నుంచి తొలగించలేరు!

అమెరికా రాజ్యాంగంలోని ఆర్టికల్ 2, సెక్షన్ 4 ప్రకారం.. దేశద్రోహం, లంచగొండితనం, ఇతర తీవ్రమైన నేరాలు , అధికార దుర్వినియోగం రుజువైన సందర్భాల్లో మాత్రమే ఒక అధ్యక్షుడిని పదవి నుంచి తొలగించే అవకాశం కల్పించారు. అయితే, ఇది కేవలం న్యాయపరమైన అంశం మాత్రమే కాదని, పూర్తిగా రాజకీయ సంఖ్యాబలం , చట్టసభల సమీకరణాలతో ముడిపడి ఉన్న అత్యంత సంక్లిష్టమైన ప్రజాస్వామ్య ప్రక్రియ. దీని తొలి అంకం ప్రతినిధుల సభ పరిధిలోనే ప్రారంభమవుతుంది. ట్రంప్ తీసుకునే వివాదాస్పద ఎగ్జిక్యూటివ్ ఆర్డర్లు, వాణిజ్య సుంకాలు లేదా భౌగోళిక ఘర్షణలపై విపక్ష డెమొక్రాట్లు ప్రతినిధుల సభలో అభియోగ పత్రాన్ని ప్రవేశపెట్టడం సాంకేతికంగా చాలా తేలిక.

ప్రతినిధుల సభలోని 435 మంది సభ్యులలో సాధారణ మెజారిటీ 218 ఓట్లు వస్తే సదరు ఇంపీచ్‌మెంట్ తీర్మానం ఆమోదం పొందుతుంది. గతంలో ట్రంప్ తన మొదటి విడత పదవీకాలంలో 2019 , 2021లలో రెండుసార్లు ప్రతినిధుల సభ ద్వారా ఇంపీచ్‌మెంట్‌కు గురయ్యారు. ప్రస్తుత కాంగ్రెస్‌లో విపక్షాల బలం పెరిగిన దృష్ట్యా, ట్రంప్‌పై ప్రతినిధుల సభలో ఇంపీచ్‌మెంట్ నెగ్గించడం సాంకేతికంగా పెద్ద కష్టమేమీ కాదు. కానీ, ఇదొక్కటే అధ్యక్షుడిని పదవి నుంచి వీడ్కోలు పలికించడానికి ఏమాత్రం సరిపోదు.

సెనెట్‌లో మూడింట రెండు వంతుల మెజార్టీ కావాలి!

అసలైన రాజ్యాంగపరమైన సంక్లిష్టత ఆ తర్వాత మొదలయ్యే సెనేట్ విచారణలో ఎదురవుతుంది. ప్రతినిధుల సభ ఆమోదించిన అభియోగాలు విచారణ కోసం సెనేట్‌కు వెళతాయి. అక్కడే సుప్రీంకోర్టు చీఫ్ జస్టిస్ అధ్యక్షతన విచారణ ప్రక్రియ జరుగుతుంది. సెనేట్‌లో అధ్యక్షుడిని దోషిగా తేల్చి , పదవి నుంచి తొలగించాలంటే రాజ్యాంగం ప్రకారం 100 మంది సెనేటర్లలో మూడింట రెండొంతుల వంతు 67 మంది సెనేటర్లు మద్దతు తప్పనిసరిగా లభించాలి. సెనేట్‌లో డెమొక్రాట్లకు మెజారిటీ లభించినప్పటికీ, 67 ఓట్ల మార్కును చేరుకోవడం సాధ్యం కాని విషయం. రిపబ్లికన్ పార్టీకి చెందిన కొందరు సెనేటర్లు విపక్షాలకు మద్దతుగా ఓటు వేస్తే తప్ప 67 ఓట్లు సమకూరవు. అమెరికా రాజకీయ చరిత్రలో ఇప్పటివరకు ఏ ఒక్క అధ్యక్షుడూ సెనేట్ ద్వారా పదవి కోల్పోలేదు గతంలో ఆండ్రూ జాన్సన్, బిల్ క్లింటన్, ట్రంప్ సెనేట్‌లో గట్టెక్కారు . రిపబ్లికన్ పార్టీ నేతలు తమ అధ్యక్షుడికి వ్యతిరేకంగా ఇంత పెద్ద సంఖ్యలో క్రాస్ ఓటింగ్ చేసే అవకాశాలు అత్యల్పం.

ట్రంప్ పదవికి వచ్చిన గండం లేదు!

అందువల్ల, వైట్ హౌస్ నుంచి ట్రంప్‌ను గద్దె దించడం సులభం కాకపోయినప్పటికీ, ఈ ఇంపీచ్‌మెంట్ అస్త్రాన్ని విపక్షాలు ప్రధాన రాజకీయ ఆయుధంగా మార్చుకునే అవకాశం ఉంది. ప్రతినిధుల సభలోని కమిటీల ద్వారా ట్రంప్ ప్రభుత్వంపై నిరంతర విచారణలు జరపడం, సబ్‌పోనాలు జారీ చేయడం, ఆయన నిర్ణయాలకు అడ్డుకట్ట వేస్తూ ‘పొలిటికల్ డిఫెన్స్’లో పడేయడం డెమొక్రాట్లకు సాధ్యమవుతుంది. ప్రతినిధుల సభలో ఇంపీచ్‌మెంట్ ఆమోదించడం సులభమే అయినా, సెనేట్‌లో 67 ఓట్ల మ్యాజిక్ ఫిగర్ సాధించడం దాదాపు అసాధ్యం. ఫలితంగా, ఇంపీచ్‌మెంట్ అనేది ట్రంప్‌ను పదవి నుంచి తొలగించే మార్గం కంటే, ఆయన రెండవ విడత పరిపాలనా వేగానికి కళ్లెం వేసే అడ్మినిస్ట్రేటివ్ అడ్డంకిగా మాత్రమే మిగిలిపోయే అవకాశం ఎక్కువ.

Israel Politics: ఇజ్రాయెల్‌లో నెతన్యాహూకు షాక్.. ప్రభుత్వం ఏర్పాటు చేయాలని గాడీ ఐసెన్‌కోట్‌కు ఆహ్వానం

Shankar Dukanam — Sun, 8 Nov 2026 12:44:30 +0530

Israel Politics | జెరూసలేం: ఇజ్రాయెల్ రాజకీయాల్లో కీలక పరిణామం చోటుచేసుకుంది. తాజాగా జరిగిన ఎన్నికల్లో ఏ పార్టీకి, కూటమికిగానీ సాధారణ మెజారిటీ రాలేదు. దాంతో ఇజ్రాయెల్ అధ్యక్షుడు ఇసాక్ హెర్జోగ్ కీలక ప్రకటన చేశారు. ప్రతిపక్ష అభ్యర్థి గాడీ ఐసెన్‌కోట్‌ (Gadi Eisenkot)కు సంకీర్ణ ప్రభుత్వం ఏర్పాటు చేయడానికి తొలి అవకాశం ఇచ్చారు. ఆర్మీ మాజీ చీఫ్ అయిన గాడీ ఐసెన్‌కోట్ ప్రధాని బెంజమిన్ నెతన్యాహూ (Benjamin Netanyahu)కు ప్రధాన ప్రత్యర్థిగా ఇజ్రాయెల్ ఎన్నికల్లో పోటీ చేశారు. ఇజ్రాయెల్‌లో అత్యంత ఎక్కువ కాలం ప్రధానమంత్రిగా సేవలు అందించిన నెతన్యాహూను అధికారంలో నుంచి తొలగించే దిశగా అధ్యక్షుడు ఈ నిర్ణయం తీసుకున్నారని దేశంలో ప్రచారం జరుగుతోంది.

ఇజ్రాయెల్ అధ్యక్షుడు ఇసాక్ హెర్జోగ్ ప్రకటన వెంటనే, ఐసెన్‌కోట్ ఎక్స్‌లో ట్వీట్ చేస్తూ.. దేశంలో తాత్కాలికంగా అత్యవసరంగా ప్రభుత్వం ఏర్పాటు చేయాల్సిన సమయం వచ్చిందన్నారు. మనం ఒక పదవికి అర్హులమని నిరూపించడానికి చేయాల్సిన ప్రతిదీ చేస్తాను. కూటమి ప్రభుత్వం ఏర్పాటు చేయడానికి ఆయనకు 6 వారాల వరకు సమయం ఉంది. మొదట ప్రాథమికంగా 4 వారాల గడువు ఇస్తారు. ఆ సమయంలో ప్రభుత్వ ఏర్పాటుకు మద్దతు కూడగట్టకపోతే కనుక మరో 14 రోజులు ఛాన్స్ ఇస్తారు. 7 అక్టోబర్ 2023న హమాస్ దాడులతో పాటు గాజా, దాని పరిసరాల్లో గత 3 సంవత్సరాలుగా కొనసాగుతున్న యుద్ధాలతో పోరాడుతున్న పరిస్థితిలో ప్రభుత్వ ఏర్పాటు అత్యంత సవాలుతో కూడిన పని.

ఐసెన్‌కోట్‌కు అరబ్ పార్టీ మద్దతు

ఇజ్రాయెల్ ప్రధాని బెంజమిన్ నెతన్యాహుకు సంకీర్ణంలో తీవ్ర నిరాశ ఎదురైంది. మెజారిటీకి 8 సీట్లు తక్కువగా ఉన్న ఆయనకు డెగెల్ హటోరా పార్టీ మద్దతు నిరాకరించడం పెద్ద దెబ్బ. మరోవైపు, అరబ్ పార్టీ 'రామ్' మద్దతు కూడగట్టుకుని ప్రతిపక్ష నాయకుడు గాడి ఐజెన్‌కోట్ తన పట్టును బలపరుచుకోవడంతో నెతన్యాహు ఇబ్బందులు మరింత తీవ్రమయ్యాయి.

కింగ్‌మేకర్‌గా అరబ్ పార్టీలు..

ఇజ్రాయెల్‌లో అధ్యక్షుడితో జరిగిన చర్చల్లో దేశంలోని ఎక్కువ ప్రధాన పార్టీల ప్రతినిధులు కొత్త ప్రభుత్వం ఏర్పాటు చేసే బాధ్యత మార్మీ మాజీ చీఫ్ ఐసెన్‌కోట్‌కు ఇవ్వాలని సూచించారు. కానీ ఇజ్రాయెల్ పార్లమెంటులో మెజారిటీ సాధించడం ఇప్పటికీ చాలా కష్టమైన పనిగా చెప్పవచ్చు. ఏదైనా ఇతర పక్షాల కూటమి కోసం అభ్యర్థులు తమ ఓటర్లను అసంతృప్తికి గురిచేసే కఠిన ఒప్పందాలు చేసుకోవాల్సి రావచ్చు. గత నెలలో జరిగిన ఎన్నికల్లో బెంజమిన్ నెతన్యాహూ, ఆయన మిత్రపక్షాలు పార్లమెంటులో మెజారిటీని కోల్పోయాయి. అయితే, ఐసెన్‌కోట్ నేతృత్వంలోని కూటమికీ సైతం మెజారిటీ సంఖ్యా బలం రాలేదు.

ఈ పరిస్థితిలో ఈ ఎన్నికల్లో పురోగతి సాధించిన అరబ్ పార్టీలు కింగ్‌మేకర్‌గా మారే అవకాశం ఉంది. అయితే ఇజ్రాయెల్ లో రాజకీయంగా ఈ పరిస్థితి చాలా కష్టతరంతో కూడుకున్నది. ఇజ్రాయెల్ చరిత్రలో ఇప్పటివరకు ఒక్కసారి మాత్రమే ఒక అరబ్ పార్టీ సంకీర్ణ ప్రభుత్వంలో భాగమైంది. గాజాలో 3 సంవత్సరాలకు పైగా కొనసాగిన యుద్ధం తర్వాత, ఇలాంటి కూటమి ఏర్పాటు చేయడం ఐసెన్‌కోట్‌కు ఇబ్బందిగా మారవచ్చు అని రాజకీయ విశ్లేషకులు భావిస్తున్నారు.

నెతన్యాహు జాతకం: ఇజ్రాయెల్ ప్రధాని పీఠంపై గ్రహగండం? తదుపరి ప్రధాని ఎవరు?

RAMA — Fri, 6 Nov 2026 09:00:45 +0530

Netanyahu Astrology 2026: ఇజ్రాయెల్‌లో కొత్త ప్రభుత్వం ఏర్పాటుపై కొనసాగుతున్న రాజకీయ పోరాటం మధ్య, ప్రధానమంత్రి బెంజమిన్ నెతన్యాహు ఇబ్బందులు ఆయన సొంత సంకీర్ణం వల్ల మరింత పెరిగాయి. అవసరమైన మెజారిటీకి ఎనిమిది సీట్లు తక్కువగా ఉన్న ఆయన శిబిరంలో, యునైటెడ్ టోరా జుడాయిజం సంకీర్ణంలోని కీలక భాగమైన డెగెల్ హటోరా, ప్రధానమంత్రి పదవికి ఏ అభ్యర్థినీ సిఫార్సు చేయబోమని ప్రకటించడంతో చీలిక ఏర్పడింది. ఈ నలుగురు సభ్యుల బృందం తీసుకున్న ఈ వైఖరి నెతన్యాహుకు పెద్ద దెబ్బ. మరోవైపు.. ప్రతిపక్ష నాయకుడు గాడి ఐజెన్‌కోట్ అరబ్ పార్టీ రామ్ మద్దతును కూడగట్టుకుని, తన స్థానాన్ని పటిష్టం చేసుకున్నారు. ఈ అస్థిర రాజకీయ పరిణామాల మధ్య, జ్యోతిష్య సంకేతాలు కూడా ఒక పెద్ద సంక్షోభం నాయకత్వ మార్పును సూచిస్తున్నాయి.

నవంబర్ 12 నుంచి రాహుల్ గాంధీని కొత్తగా చూడబోతున్నామా? ఆయన జాతకం ఏం చెబుతోంది!

పాత మిత్రుడు, సీటు గణితం పట్ల అసంతృప్తి

అతి-ఆర్థడాక్స్ యూదు పురుషులకు తప్పనిసరి సైనిక సేవ నుంచి మినహాయింపునిచ్చే చట్టంపై ఒప్పందం కుదరకపోవడమే డెగెల్ హటోరా వర్గంలో అసంతృప్తికి మూలం. ఈ కూటమి సంకీర్ణం నుంచి వైదొలుగుతున్నట్లు అధికారికంగా ప్రకటించనప్పటికీ, మద్దతును ఉపసంహరించుకుంది. దీనివల్ల నెతన్యాహు తన మిత్రపక్షాలను ఐక్యంగా ఉంచుకోవడం మరింత కష్టతరం అవుతోంది.

ఇజ్రాయెల్ 120-సీట్ల పార్లమెంటులో నెతన్యాహు వర్గానికి 53 సీట్లు ఉండగా, ప్రధాన ప్రతిపక్షానికి 48, అరబ్ పార్టీలకు 19 సీట్లు ఉన్నాయి. ఎన్నికల ఫలితాల అనంతరం అధ్యక్షుడు ఐజాక్ హెర్జాగ్ అన్ని పార్టీలతో సంప్రదింపులు జరుపుతున్నారు. పార్లమెంటులో విశ్వసనీయమైన, స్థిరమైన సంఖ్యాబలాన్ని ప్రదర్శించగల నాయకుడికే ప్రభుత్వాన్ని ఏర్పాటు చేసేందుకు మొదటి ఆహ్వానం వెళ్తుంది.

కేతువు మహాదశ ,మద్దతుపై తీవ్రమవుతున్న అనిశ్చితి

బెంజమిన్ నెతన్యాహు జన్మ జాతకం వృశ్చిక లగ్నం. లాభం, విజయం , మద్దతుకు సంబంధించిన పదకొండవ ఇంట్లో కేతువు, చంద్రుడు, బుధులతో పాటు ఉంది, ఆయన ప్రస్తుతం కేతువు ప్రధాన దశలో శుక్రుని ఉపదశను అనుభవిస్తున్నారు. పదకొండవ ఇంట్లో కేతువు స్థానం చివరి నిమిషంలో సంశయాన్ని , మద్దతు విషయంలో అనిశ్చితిని సూచిస్తుంది. అయితే, బుధుడు తన సొంత రాశి అయిన కన్యారాశిలో ఉండటం వల్ల చర్చలు , రాజకీయ ఎత్తుగడలు పూర్తిగా విఫలం కాకుండా ఉంటాయి. మరోవైపు, ఏడవ ఇంటి అధిపతి అయిన శుక్రుడు లగ్నంలో సంచరించడం వల్ల, నెతన్యాహు తన స్థానాన్ని కాపాడుకోవడానికి తన మిత్రుల నుంచి వస్తున్న కఠినమైన షరతులకు, తీవ్రమైన రాజకీయ రాజీలకు తలొగ్గవలసి రావచ్చని సూచిస్తోంది.

శక్తి స్థానంలో గురు, కేతువుల అడ్డంకి

గ్రహ సంచారాల ప్రకారం, పరిపాలన, ప్రతిష్టకు ప్రతీక అయిన నెతన్యాహు జాతకంలోని పదవ రాశి అయిన సింహరాశిలోకి గురుడు ఇటీవల ప్రవేశించాడు. పదవ ఇంట్లోకి గురుడి ప్రవేశం కొత్త రాజకీయ అవకాశాలు, చర్చలు , రాజీలకు ఆస్కారం ఉందని సూచిస్తుంది. అయితే, కేతువు ఇప్పటికే ఇదే రాశిలో ఉండి, లగ్నమైన కుజుడికి సమీపంలో ఉన్నాడు. కుజుడికి సమీపంలో కేతువు ఉండటం నాయకత్వానికి, రాజకీయ నియంత్రణకు తీవ్రమైన సవాళ్లను విసురుతుంది. అంతేకాకుండా, గురుడు తన ఉచ్ఛ రాశి అయిన కర్కాటకం నుంచి నిష్క్రమించడం వల్ల లగ్నంపై దాని శుభ ప్రభావం తొలగిపోయింది, దీంతో అది ఒకప్పుడు అనుభవించిన రాజకీయ అండ ఇకపై అందుబాటులో లేకుండా పోయింది.

లాభాధిపతి అయిన బుధ గ్రహంపై శని దృష్టి , సంభాషణలో ఆటంకాలు

గ్రహాల అమరికలో మరో ప్రధాన అడ్డంకి మీనరాశిలో వక్రించిన శని ప్రభావం. ఈ శని యొక్క ప్రత్యక్ష దృష్టి, కన్యారాశిలో ఉన్న పదకొండవ ఇంటి అధిపతి అయిన బుధుడిపై ఉంది. జ్యోతిష్యపరంగా, ఈ స్థానం సుదీర్ఘ రాజకీయ చర్చలు, షరతులు కఠినతరం కావడం , ఆశించిన మద్దతు పొందడంలో జాప్యాన్ని సూచిస్తుంది.

నెతన్యాహు ముందున్న సవాలు కేవలం కొత్త మిత్రులతో సంబంధాలు ఏర్పరచుకోవడమే కాదు, ఆ సంభాషణలను పటిష్టమైన మద్దతుగా మార్చడం కూడా. కొత్త మిత్రులను చేర్చుకునే పోటీలో పాత మిత్రులను నిర్లక్ష్యం చేయడం అధికార పోరాటాన్ని మరింత క్లిష్టతరం చేస్తోంది.

ఇజ్రాయెల్ జాతకంలో కూడా తీవ్రమైన ఒత్తిడి ఉంది

కన్యా లగ్నం గల ఇజ్రాయెల్ జాతీయ జాతకం కూడా స్థిరత్వాన్ని సూచించడం లేదు. సింహరాశిలో గురు సంచారం 12వ ఇంట్లో ఉండటం, తెరవెనుక చర్చలు, రాజకీయ రాయితీలు , రాజీల ఆవశ్యకతను సూచిస్తుంది.

అదనంగా, ఏడవ ఇంట్లో ఉన్న శని, పరిపాలనకు సంబంధించిన పదవ ఇంటిని దృష్టిస్తోంది, ఇది సంకీర్ణాల కోసం నిరంతర ఒత్తిడిని సృష్టిస్తోంది. జాతీయ జాతకంలో లగ్నం చివరి డిగ్రీలలో ఉండటం కొన్ని పరిమితులను విధించినప్పటికీ, అధికార వ్యవస్థ ప్రస్తుతం గణనీయమైన వైరుధ్యాలతో సతమతమవుతోందని స్పష్టమవుతోంది.

శక్తి పునరాగమనం లేదా మార్పు: సమీకరణాలు ఏం చెబుతున్నాయి?

రాజకీయ పరిస్థితులను, ఇరు జాతకాలలోని గ్రహ సంచారాలను పరిగణనలోకి తీసుకుంటే, నెతన్యాహుకు మళ్లీ ప్రభుత్వాన్ని ఏర్పాటు చేయడం అత్యంత సవాలుగా కనిపిస్తోంది. గురు గ్రహం పునరుద్ధరించిన చర్చలకు అవకాశాలను కల్పిస్తున్నప్పటికీ, కేతువు, శని ప్రతికూల ప్రభావం ఆ అవకాశాలు స్థిరమైన మద్దతుగా మారకుండా అడ్డుకుంటోంది.

ప్రస్తుత పరిస్థితిని బట్టి చూస్తే, ఆయన తిరిగి ఎన్నికయ్యే అవకాశం తక్కువగా కనిపిస్తోంది, నాయకత్వ మార్పు జరిగే అవకాశాలు ఎక్కువగా ఉన్నాయి. ఒకవేళ ఆయన తిరిగి అధికారంలోకి రావడానికి మార్గం కనుగొన్నా కూడా, ఈ ప్రభుత్వం చాలా బలహీనమైన పునాదులపై, అవమానకరమైన రాజీలపై ఆధారపడి ఉంటుంది.

గమనిక: ఇక్కడ అందించిన సమాచారం కేవలం నమ్మకాలు , అభిప్రాయాలపై మాత్రమే ఆధారపడి ఉంటుంది. ABPదేశం ఏ నమ్మకాలను లేదా సమాచారాన్ని ఆమోదించదని గమనించడం ముఖ్యం . ఏదైనా సమాచారం లేదా అభిప్రాయంపై చర్య తీసుకునే ముందు సంబంధిత నిపుణుడిని సంప్రదించండి.

US Midterm Elections: అమెరికా మధ్యంతర ఎన్నికల ఫలితాలు.. రిపబ్లికన్లు వెనుకంజపై ట్రంప్ కీలక వ్యాఖ్యలు.. శపిస్తానంటున్న కేఏపాల్

Satyaprasad Bandaru — Wed, 4 Nov 2026 12:19:46 +0530

US Midterm Elections: అమెరికాలో జరుగుతున్న మిడ్ టర్మ్ ఎన్నికల ఫలితాలు ఆసక్తికరంగా మారాయి. ఇప్పటివరకు వెలువడిన ఫలితాలను పరిశీలిస్తే, రిపబ్లికన్ పార్టీ అభ్యర్థులు కొన్ని స్థానాల్లో వెనుకబడిపోగా, డెమోక్రాట్లు అత్యధిక స్థానాల్లో ఆధిక్యాన్ని ప్రదర్శిస్తున్నారు. ఈ ఫలితాలపై అమెరికా అధ్యక్షుడు డొనాల్డ్ ట్రంప్ తీవ్ర అసహనం వ్యక్తం చేశారు. ఒకవేళ బ్యాలెట్ పేపర్‌పై తన పేరు కూడా ఉండివుంటే రిపబ్లికన్లు ఈ విధంగా ఓడిపోయే పరిస్థితి వచ్చేది కాదని అభిప్రాయపడ్డారు.

ఫలితాలు ఇలా!

సౌత్‌ కరోలినాలో రిపబ్లికన్లకు గట్టి ఎదురుదెబ్బ తగిలింది. దాదాపు 28 ఏళ్ల తర్వాత సెనెట్‌ సీటును రిపబ్లికన్లు కోల్పోయారు. తాజా ఫలితాల్లో ఈ స్థానంలో రిపబ్లికన్‌ అభ్యర్థి, దివంగత నేత లిండ్సే గ్రాహం సోదరి డార్లిన్‌ గ్రాహం ఓడిపోయారు. ఆమెపై డెమోక్రటిక్‌ అభ్యర్థి ఆండ్రూస్‌ విజయం సాధించారు. సౌత్‌ కరోలినాలో చివరిగా 1998లో డెమోక్రటిక్‌ నేత సెనెటర్‌గా గెలిచారు. ఇక, టెక్సాస్‌లో గత 30 ఏళ్లకు పైగా రిపబ్లికన్ల ఆధిపత్యానికి డెమోక్రాట్లు అడ్డుకట్ట వేశారు. తాజా ఫలితాల్లో డెమోక్రటిక్‌ అభ్యర్థి జేమ్స్‌ తలారికో గెలుపొందారు. ఒహాయోలోనూ రిపబ్లికన్లకు ఓటమి పాలయ్యారు. ఈ పార్టీ సెనెటర్‌ అభ్యర్థి జాన్‌ హ్యూస్టెడ్‌ను డెమోక్రటిక్‌ నేత షెరాడ్‌ బ్రౌన్‌ ఓటమి చెందారు. అయోవాలోనూ రిపబ్లికన్ అభ్యర్థిపై డెమోక్రటిక్‌ నేత జోష్‌ టురెక్‌ విజయా సాధించారు. గత మధ్యంతర ఎన్నికల్లో ఈ స్థానం రిపబ్లికన్లు గెలుచుకున్నారు.

యూఎస్ ప్రతినిధుల సభలోని మొత్తం 435 స్థానాలకు మధ్యంతర ఎన్నికలు జరిగాయి. ఎగువసభలో మొత్తం 100 స్థానాలుండగా.. ఇందులో 34 మంది డెమోక్రాట్లు, 31 మంది రిపబ్లికన్లు ఉన్నారు. మిగతా 35 స్థానాలకు మిడ్‌ టర్మ్‌లో ఎన్నికలు జరిగాయి. తాజా ఫలితాల్లో అత్యధిక స్థానాల్లో డెమోక్రాట్లు విజయం సాధించడంతో సెనెట్‌లో విపక్షాల ఆధిపత్యం పెరిగింది.

Also Read: నెతన్యాహు కోట కూలుతుందా? జ్యోతిష్య సూచనలు!

నేను శపిస్తే ఎవరూ తప్పించుకోలేరు- కేఏ పాల్

ఈ నేపథ్యంలో ప్రజాశాంతి పార్టీ అధినేత కేఏ పాల్ స్పందిస్తూ సంచలన వ్యాఖ్యలు చేశారు. అమెరికా మిడ్ టర్మ్ ఎన్నికల్లో ట్రంప్ మద్దతుదారులు లేదా రిపబ్లికన్ల ఓటమితో ప్రపంచానికి ఎంతో మేలు జరుగుతుందని, యుద్ధాలకు కారణమైన నేతలకు ఓటమి తప్పదని పేర్కొన్నారు. ఇజ్రాయెల్ ప్రధాని నెతన్యాహూ పరిస్థితి కూడా ఇలాగే ఉంటుందన్నారు. ఇరాన్‌తో యుద్ధాన్ని ఆపకపోతే మాజీ స్పీకర్‌గా మారుతావంటూ యూఎస్ స్పీకర్ మైక్ జాన్సన్‌ను తాను హెచ్చరించినట్లు కేఏ పాల్ తెలిపారు. కళ్లు నెత్తికెక్కిన రాజకీయ నేతలకు ఎవరికైనా ఇదే గతి పడుతుందని ఆయన స్పష్టం చేశారు. తాను త్వరలో భారత్‌కు తిరిగి వస్తానని, మతం పేరుతో గొడవలు పెట్టే వాళ్లను, బైబిల్ పంచిన మహిళలపై దాడి చేసి అరెస్టైన వారిని వదిలిపెట్టే ప్రసక్తే లేదని, తాను శపిస్తే ఎవరూ తప్పించుకోలేరని ఆయన హెచ్చరించారు.

Also Read: అమెరికా-ఇరాన్ మధ్య మళ్లీ ఉద్రిక్తతలు.. ఒప్పందం కుదరకపోతే ఇవాళే దాడి తప్పదంటూ ట్రంప్ వార్నింగ్

ఇజ్రాయెల్ ఎన్నికలు 2026: నెతన్యాహు కోట కూలుతుందా? జ్యోతిష్య సూచనలు!

RAMA — Wed, 28 Oct 2026 06:00:18 +0530

Israel Election 2026: అక్టోబర్ 27న జరగనున్న ఇజ్రాయెల్ పార్లమెంటరీ ఎన్నికలలో ప్రధానమంత్రి బెంజమిన్ నెతన్యాహు తన అధికారాన్ని నిలుపుకునే సవాలును ఎదుర్కొంటున్నారు. ఎన్నికలకు ముందు జరిగిన సర్వేలు హోరాహోరీ పోరును సూచిస్తున్నాయి. మాజీ సైన్యాధిపతి గాడి ఐజెన్‌కోట్‌తో సహా ప్రతిపక్ష నాయకులు ఆయనను అధికారం నుంచి తొలగించాలని చూస్తున్నారు.

ఈ ఎన్నికలు, ఇజ్రాయెల్ జాతకంలోనూ, నెతన్యాహు జాతకంలోనూ అధికార పార్టీకి ఒక కష్టకాలం రాబోతోందని సూచిస్తున్నాయి. జాతీయ జాతకంలో రాహువు మహాదశ రాజకీయ అనిశ్చితిని సూచిస్తుండగా, నెతన్యాహు జాతకంలో అధికార గృహం , దాని అధిపతి స్థానం సవాళ్లను సూచిస్తున్నాయి. నేతన్యాహు జాతకంలో శుక్ర గ్రహ సంచారం మిత్రులు , రాజకీయ రాజీల ప్రాముఖ్యతను పెంచుతుంది. అందువల్ల, నెతన్యాహు తిరిగి వచ్చే అవకాశం ఉంది, కానీ సంకీర్ణ మద్దతును కూడగట్టవలసి ఉంటుంది.

ఇజ్రాయెల్‌లో ప్రభుత్వాన్ని ఏర్పాటు చేయడానికి 61 సీట్లు అవసరం

ఇజ్రాయెల్ పార్లమెంట్ అయిన క్నెసెట్‌లో మొత్తం 120 సీట్లు ఉంటాయి. ప్రభుత్వాన్ని ఏర్పాటు చేయడానికి 61 మంది ఎంపీల మద్దతు అవసరం. ఓటర్లు ప్రధానమంత్రిని నేరుగా ఎన్నుకోకుండా, రాజకీయ పార్టీలకు ఓటు వేస్తారు. ఎన్నికల తర్వాత, మెజారిటీ మద్దతు పొందిన నాయకుడు మాత్రమే ప్రభుత్వాన్ని ఏర్పాటు చేయగలరు.

భద్రత, 2023 అక్టోబర్ 7 దాడులకు జవాబుదారీతనం, కొన్ని మత వర్గాలకు సైనిక సేవ నుంచి మినహాయింపులు ఈ ఎన్నికల ప్రచారంలో కీలక అంశాలుగా ఉన్నాయి. నెతన్యాహు విమర్శకులు ఆయన నాయకత్వాన్ని ప్రశ్నిస్తుండగా, మద్దతుదారులు భద్రతా సమస్యలపై ఆయనకున్న అనుభవాన్ని విలువైనదిగా పరిగణిస్తున్నారు.

ఇజ్రాయెల్ జాతకంలో రాహు మహాదశ

ఇజ్రాయెల్ జాతకం మే 14, 1948, సాయంత్రం 4 గంటలకు, టెల్ అవీవ్‌... ప్రకారం.. ఇజ్రాయెల్‌కు కన్యా లగ్నం , కర్కాటక రాశి చంద్రుడు ఉన్నారు. ఎన్నికల సమయంలో, రాహువు మహాదశలో గురు అంతర్దశ , బుధ ప్రత్యంతర్దశ నడుస్తున్నాయి. జాతకంలో బుధ ప్రత్యంతర్దశ నవంబర్ 14, 2026 వరకు కొనసాగుతుంది. కన్యా లగ్నం నుంచి రాహువు ఎనిమిదవ ఇంట్లో ఉన్నాడు. లౌకిక జ్యోతిషశాస్త్రంలో, రాహువు , ఎనిమిదవ ఇల్లు ఊహించని సంఘటనలు, అనిశ్చితి స్థిరపడిన వ్యవస్థలలో మార్పులతో ముడిపడి ఉంటాయి. దీని ఆధారంగా, ఎన్నికల సమయంలో , తరువాత రాజకీయ ఉద్రిక్తతలు ఆశించవచ్చు. రాహువు స్థానం అధికార పార్టీకి శుభసూచకం కాదు.

శక్తి గృహానికి అధిపతి అయిన బుధ గ్రహం స్థితి కూడా ముఖ్యమైనది

ఇజ్రాయెల్ జాతకంలో, బుధుడు లగ్నాన్ని ,దశమ భావాన్ని పరిపాలిస్తాడు. దశమ భావం పరిపాలన , అధికారంతో ముడిపడి ఉంటుందని భావిస్తారు. ఎన్నికల కాలంలో బుధుడు వక్రగతిలో ఉన్నందున, ఈ విశ్లేషణలో అధికారం ,ప్రభుత్వ ఏర్పాటు ప్రక్రియ అనేవి కీలకమవుతాయి. బుధ గ్రహాన్ని సంప్రదింపులు , రాజీకి సంబంధించిన అంశంగా కూడా పరిగణిస్తారు. గురు గ్రహ సంచారంతో కలిసినప్పుడు, ఎన్నికల అనంతర చర్చలు, సహకారం, పార్టీల మధ్య షరతులపై ఒప్పందం అనేవి ప్రభుత్వ ఏర్పాటులో కీలక పాత్ర పోషించగలవు. ఏ ఒక్క వర్గానికి స్పష్టమైన మెజారిటీ రాకపోతే, చిన్న పార్టీల మద్దతు కూడగట్టడం పెద్ద నాయకులకు సవాలుగా మారవచ్చు.

నెతన్యాహు జాతకంలో అధికార పీఠంపై ఒత్తిడి

నెతన్యాహు జాతకం అక్టోబర్ 21, 1949న టెల్ అవీవ్‌లో ఉదయం 10:30 గంటలకు వేయబడింది. ఆయనకు వృశ్చిక లగ్నం, కన్యారాశి చంద్ర రాశి ఉన్నాయి. వృశ్చిక లగ్నం నుంచి పదవ ఇల్లు సింహ రాశికి చెందినది. నేతన్యాహు జాతకంలో, ఈ ఇంట్లో కుజ, శని గ్రహాలు ఉన్నాయి. కుజుడు లగ్నాధిపతి. లగ్నాధిపతి శక్తి గృహంలో ఉండటం నాయకత్వం కోసం ప్రయత్నించడానికి , రాజకీయంగా చురుకుగా ఉండటానికి సంకేతంగా పరిగణిస్తారు.
దశమ స్థానంలో శని ఉండటం అనేది బాధ్యతలు, వ్యతిరేకత , ఒత్తిడి మధ్య ఒకరి స్థానాన్ని నిలబెట్టుకోవడంలో ఉన్న కష్టాన్ని కూడా సూచిస్తుంది. అందువల్ల, ఈ స్థానాన్ని అధికారం కోసం జరిగే తీవ్రమైన పోరాటంగా , స్థానానికి ఒక పరీక్షగా చూడవచ్చు.

అత్యల్ప రాశిలో సూర్యుడు ఉండటం దేనిని సూచిస్తుంది?

నెతన్యాహు జాతకంలో, దశమ భావానికి అధిపతి అయిన సూర్యుడు, సూర్యుని అత్యంత నిమ్న రాశిగా పరిగణించే తులారాశిలో పన్నెండవ భావంలో ఉన్నాడు. జ్యోతిష్య శాస్త్రం ప్రకారం, దశమాధిపతి ఈ స్థానం నాయకత్వానికి సంబంధించిన ప్రశ్నలు, వ్యతిరేకత తన పదవికి సవాళ్లను సూచిస్తుంది. ఎన్నికల సమయంలో అధికారాన్ని నిలుపుకోవడం అతనికి కష్టతరమైన సంకేతంగా దీనిని అన్వయించవచ్చు.

కేతువు , శుక్రుడి స్థితిలో సహోద్యోగుల పాత్ర పెరుగుతుంది

నెతన్యాహు జాతకం ప్రకారం ఎన్నికల సమయంలో కేతువు మహాదశలో శుక్రుని ఉపదశ నడుస్తోంది. కేతువు మహాదశ ఏప్రిల్ 22, 2025 నుంచి ఏప్రిల్ 22, 2032 వరకు.. శుక్రుని ఉపదశ నవంబర్ 19, 2026 వరకు కొనసాగుతుంది. జాతకంలో కేతువు, చంద్రుడు , బుధులతో పాటు పదకొండవ ఇంట్లో ఉంది. పదకొండవ ఇల్లు విజయం , మద్దతుతో ముడిపడి ఉంటుంది. కేతువు ప్రభావం మద్దతు గతిశీలతలో మార్పులను లేదా ఆశించిన సహకారంపై అనిశ్చితిని సూచించవచ్చు.

మరోవైపు..ఏడవ ఇంటికి అధిపతి అయిన శుక్రుడు లగ్నంలో ఉన్నాడు. ఏడవ ఇల్లు భాగస్వామ్యాలు, ఒప్పందాలతో కూడా ముడిపడి ఉంటుంది. అందువల్ల, ఎన్నికల తర్వాత మిత్రపక్షాలను కలిపి ఉంచడం నెతన్యాహుకు కీలకం కావచ్చని శుక్రుని ఉపదశ సూచిస్తోంది. ఆయన పార్టీ లేదా కూటమి మెజారిటీకి చేరువైతే, రాజకీయ చర్చలు ఆయన తిరిగి రావడానికి మార్గం సుగమం చేయగలవు. కానీ మద్దతు కూడగట్టే ప్రక్రియ అంత సులభం కాదు.

ఇజ్రాయెల్‌లో పాలన మార్పు జరుగుతుందా?

రెండు జాతకాలను కలిపి పరిశీలిస్తే, నెతన్యాహు ఎదుర్కొంటున్న సవాలు తీవ్రమైనదిగా కనిపిస్తుంది. ఇజ్రాయెల్ జాతకంలో రాహువు ప్రభావం రాజకీయ అనిశ్చితిని సూచిస్తుంది. నెతన్యాహు జాతకంలో అధికార స్థానంపై ఒత్తిడి , దశమాధిపతి అయిన సూర్యుని స్థానం కూడా ఆయన పోరాటాలను పెంచుతాయి.

మరోవైపు, శుక్ర గ్రహ సంచారం సహకారం..రాజీకి ఉన్న అవకాశాలను కొనసాగిస్తుంది. అందువల్ల, జ్యోతిష్య నిర్ధారణ ఏమిటంటే, నెతన్యాహు అధికారాన్ని నిలుపుకోవడం కష్టమైనప్పటికీ, ఆయన తిరిగి వచ్చే అవకాశం పూర్తిగా కోల్పోలేదు. ఎన్నికలలో ప్రతిపక్షం బాగా రాణించి, ప్రభుత్వాన్ని ఏర్పాటు చేయడానికి అవసరమైన మద్దతును కూడగట్టుకుంటే, అధికార మార్పిడి జరగవచ్చు. మరోవైపు, నెతన్యాహు తన మిత్రపక్షాలను నిలుపుకోగలిగితే, హోరాహోరీ పోరు తర్వాత కూడా ఆయన తిరిగి అధికారంలోకి రావచ్చు. ఓటింగ్ అనంతరం, ప్రాథమిక ఫలితాలు సీట్ల పంపకం చిత్రాన్ని వెల్లడిస్తాయి. అవసరమైతే, సంకీర్ణ చర్చలు పూర్తయిన తర్వాతే ప్రభుత్వ ఏర్పాటు స్పష్టమవుతుంది.

US Iran Tensions: అమెరికా-ఇరాన్ మధ్య మళ్లీ ఉద్రిక్తతలు.. ఒప్పందం కుదరకపోతే ఇవాళే దాడి తప్పదంటూ ట్రంప్ వార్నింగ్

Satyaprasad Bandaru — Sun, 25 Oct 2026 11:17:18 +0530

US Iran Tensions: అమెరికా, ఇరాన్‌ల మధ్య మరోసారి ఉద్రిక్తతలు తారా స్థాయికి చేరుకున్నాయి. ఇరాన్‌తో ఒప్పందం కుదిరే అవకాశం ఉన్నప్పటికీ, ఆ దేశంపై సైనిక దాడి చేసేందుకు అమెరికా ఆలోచిస్తుందని అధ్యక్షుడు డొనాల్డ్ ట్రంప్ సంచలన వ్యాఖ్యలు చేశారు. ఇరాన్ తో ఒప్పందం కుదిరేలా ఉన్నప్పటికీ.. ఆ నిబంధనలకు కట్టుబడి ఉంటుందా లేదా అనేదే పెద్ద ప్రశ్న అని ఆయన అన్నారు.

అణ్వాయుధాల కట్టడే లక్ష్యం

ఇరాన్ భవిష్యత్తులో అణ్వాయుధాలను అభివృద్ధి చేయకుండా అడ్డుకోవడమే తమ ప్రధాన లక్ష్యమని ట్రంప్ చెబుతున్నారు. నార్త్‌రాప్ బి-2 స్పిరిట్ విమానాలతో చేపట్టిన గత ఎఫిక్ ఫ్యూరీ శాశ్వత పరిష్కారాన్ని ఇవ్వలేదని, ఈసారి కంప్లీట్ యాక్షన్ కోసం ఆలోచిస్తున్నామని చెప్పారు. "మేము ఈ దాడి గురించి ఆలోచిస్తున్నాం, బహుశా ఆదివారం జరగవచ్చు" అని ఆయన పేర్కొన్నారు. అయితే, సైనిక చర్య లేదా దౌత్యపరమైన ఒప్పందం ఏదైనా జరగొచ్చని, ఏది జరిగినా అమెరికాదే విజయమని ట్రంప్ ధీమా వ్యక్తం చేశారు.

Also Read: ఇరాన్‌పై మరో ఎపిక్ ఫ్యూరీకి కాలుదువ్వుతున్న ట్రంప్.. ఇంటర్నెట్ కేబుళ్లను కత్తిరిస్తామని ఇరాన్ హెచ్చరిక

అమెరికా నిఘా వర్గాల హెచ్చరికలు

మరోవైపు, ఇరు దేశాల మధ్య చర్చలు విఫలమవడానికి అమెరికాయే కారణమని ఇరాన్ అధ్యక్షుడు మసూద్ పెజెష్కియన్ ఆరోపించారు. ఇదే సమయంలో, పశ్చిమ ఆసియాతో పాటు ఇతర ప్రాంతాల్లోని అమెరికా సిబ్బంది, సిటిజిన్స్‌పై దాడులు చేసేందుకు ఇరాన్ ప్రయత్నాలను ముమ్మరం చేసిందని అమెరికా నిఘా వర్గాలు హెచ్చరించాయి. ఈ పరిణామాల నేపథ్యంలో పశ్చిమాసియా ప్రాంతంలో తీవ్ర యుద్ధ వాతావరణం నెలకొంది.

Also Read: అమెరికాలోని ప్రతి బిడ్డకు స్పేస్‌ఎక్స్ షేరు.. ఎలాన్ మస్క్ సంచలన ప్రకటన

మరో ఎఫిక్ ఫ్యూరీ

ఇరాన్ పై మరో ఎఫిక్ ఫ్యూరీ ఉంటుందని ఇటీవలె అమెరికా అధ్యక్షుడు ట్రంప్ వార్న్ చేశారు. ఇరాన్ ఒప్పందానికి అంగీకరించకపోతే ఈసారి బలమైన దాడులు ఎదుర్కొక తప్పదని హెచ్చరించారు. అమెరికా దాడులకు పాల్పడితే తిప్పికొట్టేందుకు తాము సిద్ధంగా ఉన్నామని ఇరాన్ సైనిక వర్గాలు ప్రకటించాయి. పశ్చిమాసియా దేశాలపై దాడులు, ఇంటర్నెట్ కేబుళ్ల ధ్వంసంపై ఇరాన్ దృష్టి పెట్టినట్లు నిఘా వర్గాలు చెబుతున్నాయి. అమెరికాలో మధ్యంతర ఎన్నికలు జరుగుతున్నాయి. ఈ ఎన్నికలకు ముందు లేదా అనంతరం దాడులు జరిగే అవకాశం ఉందని ఎక్స్‌పర్ట్స్ అంటున్నారు.

Also Read: అమెరికా వదిలి భారత్‌కు ఐటీ నిపుణులు - 2026లో ఆల్‌టైమ్ రికార్డు.. అసలు కారణాలివే!

US Iran Tensions: ఇరాన్‌పై మరో ఎపిక్ ఫ్యూరీకి కాలుదువ్వుతున్న ట్రంప్.. ఇంటర్నెట్ కేబుళ్లను కత్తిరిస్తామని ఇరాన్ హెచ్చరిక

Satyaprasad Bandaru — Sat, 24 Oct 2026 14:53:54 +0530

US Iran Tensions: అమెరికా, ఇరాన్‌ల మధ్య ఉద్రిక్తతలు మరోసారి తీవ్ర రూపం దాల్చుతున్నాయి. ఇరాన్‌పై మరో విడత సైనిక చర్య ఉందంటూ అమెరికా అధ్యక్షుడు డొనాల్డ్ ట్రంప్ సంచలన ప్రకటన చేశారు. ఫ్లోరిడాలో జరిగిన ఒక ర్యాలీలో ఆయన మాట్లాడుతూ, "మరో చిన్న 'ఎపిక్ ఫ్యూరీ'కి ప్లాన్ వేయవచ్చు" అని అన్నారు. కాగా, ఇరాన్‌పై ఫిబ్రవరి 28న అమెరికా చేపట్టిన సైనిక చర్యకు 'ఎపిక్ ఫ్యూరీ' అని పేరు పెట్టిన సంగతి తెలిసిందే.

ఇంటర్నెట్ కేబుళ్ల కట్ చేస్తాం - ఇరాన్

మరోవైపు అమెరికా, ఇజ్రాయెల్‌లు తమపై మళ్లీ దాడికి పాల్పడితే సముద్రగర్భంలో ఉన్న కీలక ఇంటర్నెట్ కేబుళ్లను ధ్వంసం చేస్తామని ఇరాన్ వార్నింగ్ ఇచ్చినట్లు తెలుస్తోంది. ఇందుకోసం తమ సైన్యం పూర్తి సన్నాహాలతో ఉందనే సంకేతాలను ఇరాన్ పంపింది.

యుద్ధం త్వరలోనే ముగుస్తుంది- ట్రంప్

వైట్ హౌస్‌లో మాట్లాడిన డొనాల్డ్ ట్రంప్.. ఈ యుద్ధాన్ని అమెరికా చాలా త్వరగా ముగిస్తుందని ధీమా వ్యక్తం చేశారు. "దీన్ని ఇప్పుడే ముగించాలా లేదా పరిస్థితులు దానంతట అవే తీవ్రం అవ్వనివ్వాలా అనేది మా నిర్ణయంపై ఆధారపడి ఉంది" అని ఆయన అన్నారు. అంతర్జాతీయ ఇంధన రవాణాకు అత్యంత కీలకమైన 'హార్మూజ్ జలసంధి' చమురు రవాణా సాధారణంగానే సాగుతోందని, తమకు కావలసిన వనరులు లభిస్తున్నాయని ఆయన స్పష్టం చేశారు. అయితే వచ్చే నెలలో జరగనున్న అమెరికా మధ్యంతర ఎన్నికల కంటే ముందు సైనిక చర్య ఉండకపోవచ్చని తెలుస్తోంది.

Also Read:అమెరికా వదిలి భారత్‌కు ఐటీ నిపుణులు - 2026లో ఆల్‌టైమ్ రికార్డు.. అసలు కారణాలివే!

మధ్యంతర ఎన్నికల తర్వాత ?

అమెరికా మధ్యంతర ఎన్నికలు పూర్తయిన తర్వాత ఇరాన్‌పై అమెరికా, ఇజ్రాయెల్ దళాలు సంయుక్త దాడికి ప్రణాళికలు సిద్ధం చేశాయని నిఘా సంస్థలు అంటున్నాయి. ఈ దాడిలో ఇరాన్ ఇంధన వనరులు, అణు కేంద్రాలు, క్షిపణి, డ్రోన్ నిల్వలను ప్రధాన లక్ష్యంగా చేసుకునే అవకాశం ఉందని నివేదిక పేర్కొంది.

ఇదిలా ఉండగా, ఇరాన్‌పై మరిన్ని సైనిక దాడులు జరిగితే ప్రపంచవ్యాప్తంగా తీవ్ర ఆర్థిక పరిణామాలు ఎదురవుతాయని బ్రిటన్, ఫ్రాన్స్, జర్మనీ, సౌదీ అరేబియా సహా పలు దేశాల విదేశాంగ మంత్రులు హెచ్చరించారు. ఇస్తాంబుల్‌లో జరిగిన అంతర్జాతీయ సమావేశంలో పాల్గొన్న పలు దేశాల ప్రతినిధులు ఈ పరిస్థితిపై ఆందోళన వ్యక్తం చేశారు.

Also Read: 'నాకు నా భారతీయ అత్తమామలంటే చాలా ఇష్టం'.. H-1B వీసా వ్యాఖ్యలపై జేడీ వాన్స్ క్లారిటీ!

JD Vance Clarifies Visa Remarks: 'నాకు నా భారతీయ అత్తమామలంటే చాలా ఇష్టం'.. H-1B వీసా వ్యాఖ్యలపై జేడీ వాన్స్ క్లారిటీ!

Satyaprasad Bandaru — Tue, 20 Oct 2026 14:36:02 +0530

JD Vance Clarifies Visa Remarks: హెచ్-1బీ వీసా ఉద్యోగులను 'బానిసలు' అంటూ అమెరికా వైస్ ప్రెసిడెంట్ జేడీ వాన్స్ చేసిన వ్యాఖ్యలు తీవ్ర దుమారం రేపాయి. అయితే, తన కామెంట్స్‌పై వివరణ ఇస్తూ అలా మాట్లాడి ఉండకూడదని వాన్స్ అన్నారు. తాను చేసిన వ్యాఖ్యలను విదేశీ కార్మికులపై కాదని, వారిని దోపిడీ చేసే అమెరికన్ కంపెనీలు, లొసుగులున్న వీసా వ్యవస్థపైనేనని స్పష్టం చేశారు. ఈ సందర్భంగా తన భార్య ఉషా వాన్స్ భారతీయ మూలాలను, తన అత్తమామలపై ఉన్న ప్రేమను ఆయన గుర్తుచేసుకున్నారు.

ఆ వ్యాఖ్యలు కంపెనీల దోపిడీ గురించే

మిచిగాన్‌లోని ఫ్లాట్ రాక్‌లో జరిగిన సీబీఎస్ న్యూస్ టౌన్ హాల్‌లో జేడీ వాన్స్ మాట్లాడుతూ.. "నేను వాడిన బానిసలు పదం సరైంది కాకపోవచ్చు, అది పొరపాటున జరిగింది. కానీ నేను 'బానిసలు' అని H-1B వీసాదారులను విమర్శించలేదు. విదేశీ ఉద్యోగులను దోచుకునే కంపెనీల గురించి విమర్శించాను" అని చెప్పారు.

భారతీయ అత్తమామల గురించి

వలస విధానాలపై మాట్లాడుతున్న క్రమంలో జేడీ వాన్స్ తన కుటుంబం గురించి ప్రస్తావిస్తూ భావోద్వేగానికి లోనయ్యారు. తన కుటుంబం ఎక్కడి నుండి వచ్చిందో అందరికీ తెలుసన్నారు. సౌత్ ఇండియా నుంచి అమెరికాకు వచ్చి ఇక్కడ స్థిరపడిన తన అత్త, మామను తాను ఎంతగానో ప్రేమిస్తానని తెలిపారు. అమెరికాలోనే పుట్టి పెరిగిన వారి కుమార్తె (ఉషా వాన్స్) ఇవాళ అమెరికా 'సెకండ్ లేడీ'గా ఉన్నారన్నారు. ఆమెను చూసి తాను ఎంతో గర్వపడుతున్నానని, ఆమెను ఎంతో ప్రేమిస్తున్నానని చెప్పుకొచ్చారు.

Also Read: అమెరికాలోని ప్రతి బిడ్డకు స్పేస్‌ఎక్స్ షేరు.. ఎలాన్ మస్క్ సంచలన ప్రకటన

వీసా వ్యవస్థలో మార్పులు అవసరం

అమెరికన్లకు న్యాయం జరిగేలా, అదే సమయంలో దేశానికి ఉపయోగపడే నిపుణులైన విదేశీయులకు స్వాగతం పలికేలా వీసా విధానంలో మార్పులు అవసరమని వాన్స్ అభిప్రాయపడ్డారు. కొన్ని అమెరికన్ కంపెనీలు స్థానికులను తొలగించి, తక్కువ వేతనాలకే పనిచేసే విదేశీయులను నియమించుకుంటున్నాయని విమర్శించారు.H-1B వీసాపై వచ్చే విదేశీయులు తమ మనుగడ కోసం పూర్తిగా యజమానులపైనే ఆధారపడాల్సి వస్తుందని, కంపెనీలను ప్రశ్నిస్తే ఉద్యోగాలు పోయి తీవ్ర పరిణామాలు ఎదుర్కోవాల్సి వస్తుందనే భయంతో బానిసలాలా మిగిలిపోతున్నారని వాన్స్ ఆవేదన వ్యక్తం చేశారు.

విదేశీ ఉద్యోగుల గ్రీన్ కార్డుల కోసం అప్లై చేసుకునే కొన్ని ప్రోగ్రామ్‌ల నుంచి ఇండియన్ ఐటీ కంపెనీలతో సహా పలు సంస్థలను అమెరికా ఇటీవల సస్పెండ్ చేసింది. ఈ విధానం వల్ల స్థానిక అమెరికన్లకు ఉద్యోగాలు దక్కడం లేదని వాదిస్తూ.. వాన్స్ H-1B ఉద్యోగులను బానిసలు అంటూ మాట్లాడారు. దీనిపై పెద్ద ఎత్తున విమర్శలు రావడంతో తాజాగా ఆయన ఈ విధంగా క్లారిటీ ఇచ్చారు.

Also Read: అమెరికా వదిలి భారత్‌కు ఐటీ నిపుణులు - 2026లో ఆల్‌టైమ్ రికార్డు.. అసలు కారణాలివే!