world

Who is Smith Matchhar: ఫ్లైదుబాయ్ ఫ్లైట్ కూలిపోకుండా కాపాడిన పైలట్ స్మిత్ మచ్ఛర్ ఎవరో తెలుసా?

Satyaprasad Bandaru — Thu, 1 Oct 2026 11:49:14 +0530

Who is Smith Matchhar: ఫ్లైదుబాయ్ దుబాయ్-టెల్ అవీవ్ విమానంలో ఊహించని భయానక ఘటన చోటుచేసుకుంది. కాక్‌పిట్ లోపల జరిగిన ఈ అనూహ్య పరిణామంలో, ఒమన్‌కు చెందిన కో-పైలట్ విమానాన్ని కూల్చివేయడానికి యత్నించగా, భారత సంతతికి చెందిన పైలట్-ఇన్-కమాండ్ స్మిత్ మచ్ఛర్ సమయస్ఫూర్తితో ఘోర ప్రమాదాన్ని తప్పించాడు.

ఆకాశంలో భయానక క్షణాలు

విమానం గాల్లో ఉన్న సమయంలో పైలట్లలో ఒకరు మరో పైలట్‌పై దాడి చేసి విమానాన్ని కూల్చివేయాలని ప్రయత్నించారు. ఈ సమయంలో కాక్‌పిట్‌లో రక్తం కనిపించినట్లు ప్రత్యక్ష సాక్షులు తెలిపారు. కేవలం 30 సెకన్ల వ్యవధిలో విమానం 33,000 అడుగుల నుంచి 17,000 అడుగులకు, దాదాపు 14,000 అడుగుల మేర ఒక్కసారిగా కిందకు పడిపోయింది. ఈ పరిణామంతో ప్రయాణికుల్లో తీవ్ర భయాందోళనలు నెలకొన్నాయి.

ప్రాణాలను కాపాడిన స్మిత్ మచ్ఛర్

ఈ ప్రమాదకర పరిస్థితిలో భారత సంతతి పైలట్ స్మిత్ మచ్ఛర్ సమయస్ఫూర్తితో కాక్ పిట్ డోర్ ఓపెన్ చేశారు. దీంతో తోటి ప్రయాణికులు, విధుల్లో లేని మరో ఇద్దరు పైలట్ల సహాయంతో, దాడికి పాల్పడిన వ్యక్తిని తీవ్రంగా శ్రమించి అదుపులోకి తీసుకున్నారు. ప్రయాణీకులందరూ సురక్షితంగా బయటపడేలా చేసి, సౌదీ అరేబియాలోని తబూక్‌‌లో విమానాన్ని సురక్షితంగా అత్యవసర ల్యాండింగ్ చేశారు. ఈ ఘటనలో విమానం చివరి భాగం స్వల్పంగా దెబ్బతిన్నట్లు సమాచారం.

ఉగ్రవాద కోణంలో దర్యాప్తు

గగనతలంలో జరిగిన ఈ ఘటనపై మరిన్ని వివరాలు వెలుగులోకి వస్తున్నాయి. ఇజ్రాయెల్ అధికారులు దీన్ని ఒక ఉగ్రవాద చర్యగా పరిగణించి దర్యాప్తు చేస్తున్నారు. ఈ సాహసోపేతమైన చర్యతో వందలాది మంది ప్రాణాలను కాపాడిన స్మిత్ మచ్ఛర్ ప్రస్తుతం అంతర్జాతీయంగా ప్రశంసలు అందుకుంటున్నారు. ప్రధాని మోదీ, ఇజ్రాయెల్ పీఎం నెతన్యాహు, యూఎస్ ప్రెసిడెంట్ ట్రంప్ మచ్ఛర్ ను ప్రసంశించారు.

Also Read: అక్టోబర్ 1 నుంచి కొత్త రూల్స్.. బ్యాంక్ FD, LPG లో మార్పులు, ఎన్‌పీఎస్ కొత్త స్కీమ్

స్మిత్ మచ్ఛర్ ఎవరు?

స్మిత్ మచ్ఛర్ లింక్డ్‌ఇన్ ప్రొఫైల్ ప్రకారం, ఆయన జూన్ 2022 నుంచి ఫ్లైదుబాయ్ బోయింగ్ 737 విమానాల్లో కెప్టెన్‌గా పనిచేస్తున్నారు. 737-800, 737 MAX 8.. 9లో 9,750 గంటల పాటు విమానం నడిపిన అనుభవం ఉంది. ఫ్లైదుబాయ్‌లో చేరడానికి ముందు, ఆయన ముంబైలోని స్పైస్‌జెట్‌లో 11 సంవత్సరాలు పనిచేశారు. ఆయన సీనియర్ కమాండర్‌గా కూడా పనిచేశారు, ఆ తర్వాత నవంబర్ 2020లో లైన్ ట్రైనింగ్ కెప్టెన్ అయ్యారు. ఈ హోదాలో ఆయన ఇతర పైలట్‌లకు శిక్షణ ఇచ్చారు.

మచ్ఛర్ ముంబైలోని ఘట్‌కోపర్ ఈస్ట్‌కు చెందినవాడని, ఉద్యోగ కోసం దుబాయ్‌లో నివసిస్తున్నారని తెలుస్తోంది. అతను ఫ్లైదుబాయ్‌లో డైరెక్ట్-ఎంట్రీ కెప్టెన్‌గా చేరినట్లు కూడా ఆ ప్రొఫైల్ చూపిస్తుంది. దీనివల్ల, ఇప్పటికే మరో విమానయాన సంస్థలో కెప్టెన్ పదవుల్లో ఉన్న పైలట్లను నియమించుకుని, వారిని నేరుగా కెప్టెన్‌లుగా నియమించే అవకాశం విమానయాన సంస్థలకు ఉంటుంది. స్పైస్‌జెట్‌లో పైలట్-ఇన్-కమాండ్‌గా అతనికి 6,400 గంటలకు పైగా అనుభవం ఉందని కూడా అందులో పేర్కొన్నారు. మచ్ఛర్ జూన్ 2007 నుంచి ఏప్రిల్ 2008 మధ్య వెలింకార్ ఇన్‌స్టిట్యూట్ ఆఫ్ మేనేజ్‌మెంట్ నుండి బిజినెస్ అడ్మినిస్ట్రేషన్‌లో బ్యాచిలర్ డిగ్రీని పూర్తి చేశారు. మచ్ఛర్ సోదరుడు కూడా అకాసా ఎయిర్‌లో పైలట్‌గా ఉన్నారని తెలుస్తోంది.

Also Read: ఫ్లైదుబాయ్ విమానంలో కోపైలట్ హైజాక్ యత్నం విఫలం - హీరో కెప్టెన్ స్మిత్ మచ్చార్ - ప్రపంచవ్యాప్తంగా ప్రశంసలు

Flydubai Flight 1073 Attack: ఫ్లైదుబాయ్ విమానంలో కోపైలట్ హైజాక్ యత్నం విఫలం - హీరో కెప్టెన్ స్మిత్ మచ్చార్ - ప్రపంచవ్యాప్తంగా ప్రశంసలు !

Raja Sekhar Allu — Thu, 1 Oct 2026 08:14:10 +0530

Indian Pilot Saves Flydubai Flight: మధ్యప్రాచ్యంలో మరోసారి తీవ్ర కలకలం రేపిన ఒక ప్రధాన వైమానిక భద్రతా ఘటనలో 174 మంది ప్రయాణికుల ప్రాణాలు దక్కాయి. దుబాయ్ నుంచి టెల్ అవీవ్‌కు బయలుదేరిన ఫ్లైదుబాయ్ విమానం 1073 పై జరిగిన దాడి, దానికి ఒక భారతీయ పైలట్ ఎదురొడ్డి నిలిచిన తీరు అంతర్జాతీయ వ్యాప్తంగా సంచలనం సృష్టిస్తోంది. విమానం గాల్లో ఉండగా కోపైలట్ దాడికి పాల్పడగా, తీవ్ర గాయాలైనప్పటికీ పైలట్ చూపిన తెగింపు వల్లే విమానంలోని ప్రయాణికులందరూ సురక్షితంగా బయటపడ్డారు.

Dear people of India,

Regardless of your faith or beliefs, you are my brothers and sisters in humanity, and I have love and respect for each and every one of you.

What a great nation you are.

I had the honor of becoming friends with your former ambassador to the UAE, Sunjay… pic.twitter.com/nFpMdMxh5o
— Loay Alshareef لؤي الشريف (@lalshareef) September 30, 2026

అంతర్జాతీయ మీడియా , ఇజ్రాయెల్ విదేశాంగ మంత్రిత్వ శాఖ తెలిపిన వివరాల ప్రకారం.. విమానంలోని కాక్‌పిట్‌లో ఉన్న భారతీయ కెప్టెన్ స్మిత్ మచ్చార్ పై ఒక దుండగుడు అకస్మాత్తుగా చాకుతో దాడి చేశాడు. కెప్టెన్ స్మిత్‌ను తీవ్రంగా పొడవడంతో ఆయన రక్తసిక్తమయ్యారు. అయితే, ఎంతో సమయస్ఫూర్తి, ప్రాణాల కంటే ప్రయాణికుల భద్రతే ముఖ్యం అనుకున్న ఆయన తీవ్ర గాయాలతోనే కాక్‌పిట్ తలుపులను అన్‌లాక్ చేయడంలో విజయం సాధించారు.

Our Embassy in Riyadh and Consulate in Jeddah have been following the health condition of Mr Smit Machchhar, the brave Indian pilot of Flydubai flight that was diverted to Tabuk today. He is admitted in a hospital in Tabuk city in northwest Saudi Arabia and receiving necessary…
— India in Saudi Arabia (@IndianEmbRiyadh) September 30, 2026

కాక్‌పిట్ డోర్ తెరుచుకోవడంతో వెంటనే అప్రమత్తమైన ఇజ్రాయెల్ ప్రయాణికులు, యునైటెడ్ అరబ్ ఎమిరేట్స్ కి చెందిన విమాన సిబ్బంది కాక్‌పిట్‌లోకి దూసుకెళ్లారు. తీవ్రమైన ఘర్షణ అనంతరం ఆ దుండగుడిని లొంగదీసుకుని, హ్యాండ్‌కఫ్ చేసి బంధించారు. విమానాన్ని సురక్షితంగా సమీప విమానాశ్రయంలో ల్యాండింగ్ చేయడంతో ప్రయాణికులు, సిబ్బంది అందరూ హాయిగా ఊపిరి పీల్చుకున్నారు.

ఈ ఘటనపై ఇజ్రాయెల్ విదేశాంగ మంత్రిత్వ శాఖ సోషల్ మీడియా వేదికగా స్పందిస్తూ కెప్టెన్ స్మిత్ మచ్చార్‌ను రియల్ హీరోగా కొనియాడింది. భారతీయుడు, ఇజ్రాయెలీ, ఎమిరాటీ.. ఇలా వేర్వేరు దేశాలకు చెందిన వ్యక్తులు ఐక్యంగా నిలబడి ప్రదర్శించిన అసమాన ధైర్యసాహసాలు 174 మంది ప్రాణాలను కాపాడాయి. తీవ్రంగా గాయపడిన కెప్టెన్ స్మిత్ మచ్చార్ త్వరగా కోలుకోవాలని కోరుకుంటున్నాం అని ఇజ్రాయెల్ ప్రకటించింది.

Israel Foreign Ministry (@IsraelMFA) posts: "This man is a hero. Captain Smit Machchhar, the Indian captain of flydubai Flight 1073, fought back after being stabbed in the cockpit. Despite being severely injured, he managed to unlock the cockpit door - allowing Israeli… pic.twitter.com/LNC4YC3OoT
— Press Trust of India (@PTI_News) September 30, 2026

ప్రస్తుతం ఆసుపత్రిలో చికిత్స పొందుతున్న కెప్టెన్ స్మిత్ ఆరోగ్య పరిస్థితి స్థిరంగా ఉన్నట్లు తెలుస్తోంది. అంతర్జాతీయ విమానయాన భద్రతా సంస్థలు మరియు వివిధ దేశాల ప్రభుత్వాలు ఆయన చూపిన ధైర్యసాహసాలను, సమయస్ఫూర్తిని ప్రశంసిస్తున్నాయి. వివిధ దేశాల మధ్య ఉన్న సహకారం, విమాన సిబ్బంది సమర్థతకు ఈ ఘటన ఒక నిదర్శనంగా నిలిచింది.

Essar Group US Investment : అమెరికాలో ఎస్సార్ గ్రూప్ భారీ పెట్టుబడి.. అయోవాలో రూ.1.4 లక్షల కోట్ల ఉక్కు కర్మాగారం

Satyaprasad Bandaru — Tue, 29 Sep 2026 13:06:17 +0530

Essar Group US Investment: భారతదేశానికి చెందిన ప్రముఖ కంపెనీ ఎస్సార్ గ్రూప్ అమెరికాలో భారీ పెట్టుబడికి సిద్ధమైంది. అమెరికాలో ఏకంగా 18 బిలియన్ డాలర్లుపెట్టుబడి పెట్టాలని ప్రణాళిక వేసింది. ఇందులో భాగంగా అయోవా రాష్ట్రంలో 15 బిలియన్ డాలర్ల ( సుమారు రూ.1.4 లక్షల కోట్లు) భారీ వ్యయంతో స్టీల్ ప్లాంట్ ఏర్పాటు చేయనుంది. వైట్‌హౌస్‌లోని ఓవల్ ఆఫీస్‌లో రూయా కుటుంబ సభ్యుల సమక్షంలో జరిగిన ప్రత్యేక కార్యక్రమంలో అమెరికా అధ్యక్షుడు డొనాల్డ్ ట్రంప్ ఈ ప్రాజెక్ట్‌ను అధికారికంగా ప్రకటించారు.

Also Read: మొన్న భగవంత్ కేసరి... నేడు 'బాహుబలి' వార్నింగ్ - అమెరికాకు ఇరాన్ స్ట్రాంగ్ కౌంటర్

ప్రాజెక్ట్ విషయాలు

ఈ ప్రాజెక్ట్‌ను అభివృద్ధి చేస్తున్న ఎస్సార్ అమెరికన్ అనుబంధ సంస్థ 'మెసాబి మెటాలిక్స్' అయోవాలో నిర్మించే ఈ ప్లాంట్, అమెరికా చరిత్రలోనే అతిపెద్ద ఉక్కు కర్మాగారంగా నిలవనుందని ట్రంప్ అన్నారు. 2030 నాటికి ఉత్పత్తిని ప్రారంభించాలని లక్ష్యంగా పెట్టుకున్న ఈ ప్లాంట్, పూర్తయిన తర్వాత ప్రతి ఏటా 10 మిలియన్ టన్నుల ఉక్కును ఉత్పత్తి చేయనుంది. ఈ కర్మాగారానికి అవసరమైన ఇనుప ఖనిజాన్ని మిన్నెసోటాలోని కంపెనీ కార్యకలాపాల నుంచి నేరుగా సరఫరా చేస్తారు. దీనివల్ల యునైటెడ్ స్టేట్స్‌లోనే పూర్తిస్థాయి ఉక్కు సరఫరా చైన్ ఏర్పాటవుతుంది.

Also Read: జపాన్లో పెరుగుతోన్న వృద్ధులు, తగ్గుతోన్న యువత.. జాబ్ స్ట్రెస్తో పెళ్లి, పిల్లలకు దూరం!

ఉక్కు దిగుమతులపై గతంలో తాను విధించిన 50 శాతం సుంకాల వల్లే అమెరికా ఉక్కు పరిశ్రమ వేగంగా పుంజుకుంటోందని ట్రంప్ అన్నారు. సుంకాలు చెల్లించకూడదనే ఉద్దేశంతోనే కంపెనీలు తమ ప్లాంట్లను నేరుగా అమెరికాలోనే నిర్మిస్తున్నాయని ట్రంప్ అభిప్రాయపడ్డారు. అమెరికాలో తయారీ రంగానికి పెద్దపీట వేస్తున్నందుకు, ఈ అవకాశాన్ని కల్పించినందుకు మెసాబి మెటాలిక్స్ ఛైర్మన్ రేవంత్ రూయా ట్రంప్‌నకు కృతజ్ఞతలు తెలిపారు. మెసాబి మెటాలిక్స్ సీఈఓ జో బ్రోకింగ్ మాట్లాడుతూ..నేషనల్ సెక్యూరిటీ, ఆటోమొబైల్స్, నౌకా నిర్మాణం, మౌలిక సదుపాయాలకు అవసరమైన కీలకమైన ఉక్కు అవసరాలను ఈ ఫ్యాక్టరీ తీరుస్తుందని పేర్కొన్నారు.

Also Read: ఏడాదిలో హెచ్-1బి వీసా నిబంధనల్లో సమూల మార్పులు.. వీసా మోసాలపై క్రిమినల్ దర్యాప్తులు!

ఎస్సార్ గ్రూప్ నేపథ్యం

1969లో భారతదేశంలో శశి రూయా, రవి రూయా సోదరుల చేత స్థాపించబడిన ఎస్సార్ గ్రూప్.. ఆయిల్, మైనింగ్, టెక్నాలజీ, రిటైల్ రంగాలలో విస్తరించింది. గుజరాత్‌లోని హజీరాలో దేశంలోనే అతిపెద్ద ఉక్కు కర్మాగారాన్ని, వడినార్‌లో రెండో అతిపెద్ద రిఫైనరీని ఈ గ్రూప్ నిర్వహిస్తోంది. అంతేకాకుండా, యూకేలో షెల్ సంస్థకు చెందిన స్టాన్లో రిఫైనరీ కొనుగోలుతో పాటు, సౌదీ అరేబియాలో తక్కువ-కార్బన్ ఉక్కు కర్మాగారాన్ని ఏర్పాటు చేసే ప్రణాళికల్లోనూ ఉంది.

Prabhas Baahubali : మొన్న భగవంత్ కేసరి... నేడు 'బాహుబలి' వార్నింగ్ - అమెరికాకు ఇరాన్ స్ట్రాంగ్ కౌంటర్

Ganesh Guptha — Mon, 28 Sep 2026 15:56:01 +0530

Iran Consulate Uses Prabhas Baahubali To Echo Pezeshkian UN Message : మొన్న బాలయ్య భగవంత్ కేసరి... నేడు పాన్ ఇండియా స్టార్ ప్రభాస్ బాహుబలి సీన్స్‌ను వాడేసింది ఇరాన్. అమెరికాను హెచ్చరించేందుకు తాజాగా బాహుబలిలోని వార్ సీన్ వీడియో క్లిప్‌ను సోషల్ మీడియా వేదికగా షేర్ చేసింది. ప్రస్తుతం ఇది ట్రెండ్ అవుతోంది.

గత కొద్ది నెలలుగా అమెరికా, ఇరాన్ మధ్య యుద్ధ వాతావరణం నెలకొన్న సంగతి తెలిసిందే. అటు, అగ్ర రాజ్యం కానీ ఇటు ఇరాన్ కానీ ఎక్కడా కాంప్రమైజ్ కావడం లేదు. అమెరికా ఇచ్చిన కౌంటర్స్‌కు ఇరాన్ తనదైన రీతిలో కౌంటర్స్ ఇస్తూనే ఉంది. తాజాగా... జింబాబ్వేలోని ఇరాన్ రాయబార కార్యాలయం బాలయ్య 'భగవంత్ కేసరి'లోని (Bhagavanth Kesari) బాలయ్య ఫైట్ వీడియోను షేర్ చేస్తూ అమెరికాకు వార్నింగ్ ఇచ్చింది.

బాహుబలి వార్ సీన్‌తో

ఇప్పుడు మరోసారి హైదరాబాద్‌లోని ఇరాన్ రాయబార కార్యాలయం... ప్రభాస్ బాహుబలి (Baahubali) మూవీలోని వార్ సీన్‌ క్లిప్‌ను షేర్ చేసింది. కాలకేయులతో బాహుబలి యుద్ధ సీన్ క్లిప్ పోస్ట్ చేస్తూ... 'మేము ఎవ్వరికీ తలవంచబోమని మా అధ్యక్షుడు పెజెష్కియాన్ ఐరాస సమావేశంలో స్పష్టంగా చెప్పారు. కాలకేయులకు ఎదురొడ్డి బాహుబలి పోరాడినట్లే, మేము కూడా మా మాతృదేశం కోసం రక్తం చిందించి ప్రాణత్యాగానికైనా సిద్ధపడతాం.' అంటూ ఇరాన్ ఎంబసీ పేర్కొంది.

ప్రస్తుతం ఇది ట్రెండ్ అవుతుండగా... నెటిజన్స్ డిఫరెంట్‌గా రియాక్ట్ అవుతున్నారు. ఇండియన్ సినిమాల్లో వార్ సీన్స్ ఇంటర్నేషనల్ స్థాయికి చేరాయని కామెంట్స్ చేస్తున్నారు. మరికొందరు ఇది బాహుబలి వార్నింగ్ అంటూ పోస్టులు పెడుతున్నారు.

Dr. Pezeshkian, President of I.R #Iran at UNGA: "Will never bow our head or bend the knee"

Like Baahubali standing against the Kalakeyas, we also shed our own blood in sacrifice for the homeland. pic.twitter.com/xc1S9H346Q
— Iran In Hyderabad (@IraninHyderabad) September 27, 2026

Also Read : Spy Thirller OTT : నెల రోజుల్లోపే ఓటీటీలోకి కార్తి కొత్త మూవీ - బ్లాక్ బస్టర్ స్పై థ్రిల్లర్ సీక్వెల్ ఎప్పుడు, ఎందులో స్ట్రీమింగ్ అంటే?

NOTE : మరిన్ని సినిమా వార్తలు, గాసిప్స్, ఓటీటీ అప్డేట్స్, వెబ్ సిరీస్‌లు, టాలీవుడ్, బాలీవుడ్ హీరోయిన్స్ లేటెస్ట్ సోషల్ మీడియా అప్డేట్స్, టీవీ సీరియల్స్ లేటెస్ట్ ఎపిసోడ్స్ కోసం ఇక్కడ క్లిక్ చేయండి.

Japan Population Crisis : జపాన్లో పెరుగుతోన్న వృద్ధులు, తగ్గుతోన్న యువత.. జాబ్ స్ట్రెస్తో పెళ్లి, పిల్లలకు దూరం!

Geddam Vijaya Madhuri — Mon, 28 Sep 2026 12:45:46 +0530

Japans Young Population Declining Causes : బర్త్ రేట్ తగ్గడం, పెరుగుతోన్న వయస్సు కారణంగా జపాన్లో వృద్ధుల సంఖ్య వేగంగా పెరుగుతోంది. దీంతో జపాన్ తీవ్రమైన జనాభా సంక్షోభాన్ని ఎదుర్కొంటోంది. సంతానోత్పత్తి రేటు రికార్డు స్థాయిలో 1.14కు పడిపోవడం, వయోవృద్ధుల జనాభా పెరగడంతో.. జపాన్ అత్యధిక వృద్ధులున్న దేశంగా పయనిస్తోంది. మరి ఈ దేశం పూర్తిగా వృద్ధాశ్రమంగా మారడానికి ఎన్ని సంవత్సరాలు పడుతుందో.. బర్త్ రేట్ తగ్గడానికి కారణాలు ఏంటో తెలుసుకుందాం.

జపాన్ అనగానే మంచి లైఫ్స్టైల్కు, ప్రశాంతతకు చిహ్నంగా చెప్తారు. అయితే వీరు ఎక్కువగా లోన్లీగా కూడా ఉంటారని.. ఒత్తిడి ఎక్కువ తీసుకుంటారని చెప్పే స్టడీలు కూడా ఉన్నాయి. అదే ఇప్పుడు వారి సంతానోత్పత్తి రేటుపై ప్రభావం చూపిస్తుంది. తాజాగా జపాన్ సంతానోత్పత్తి రేటు రికార్డు స్థాయిలో 1.14కు పడిపోయింది. స్థిరమైన జనాభాను కొనసాగించడానికి అవసరమైన 2.1 స్థాయి కంటే ఇది చాలా తక్కువ. ఈ తగ్గుదల వల్ల యువ జనాభాను తగ్గిపోయి.. దీర్ఘకాలిక జనాభాపై ప్రభావం చూపిస్తుంది.

Also Read : రోజుకు 500 పొదుపు చేస్తే 10 ఏళ్లలో 25 లక్షలు.. పోస్ట్ ఆఫీస్ ఆర్డీ పూర్తి లెక్క ఇదే

65 ఏళ్లు వాళ్లే ఎక్కువ

జపాన్ జనాభాలో దాదాపు 30 శాతం మంది ఇప్పటికే 65 ఏళ్లు లేదా అంతకంటే ఎక్కువ వయస్సు కలిగి ఉన్నారు. దీనితో ఇది ప్రపంచంలోనే అత్యంత వృద్ధ జనాభా కలిగిన దేశాలలో ఒకటిగా నిలిచింది. మెరుగైన ఆరోగ్య సంరక్షణ, పెరుగుతున్న సగటు వయస్సు వృద్ధ నివాసితుల సంఖ్య పెరుగుదలకు దోహదం చేశాయి.

100 ఏళ్లు దాటిన వారు కూడా ఎక్కువే..

జపాన్‌లో 100 ఏళ్లు లేదా అంతకంటే ఎక్కువ వయస్సు ఉన్నవారి సంఖ్య కూడా లక్ష దాటింది. ఇది ఆ దేశంలో కొత్త రికార్డు. వృద్ధుల సంఖ్యలో ఈ పెరుగుదల, సగటు వయస్సు అనేది జపనీస్ సమాజం వేగంగా వృద్ధాప్యం వైపు పయనిస్తున్న తీరును ప్రతిబింబిస్తుంది.

Also Read : డబ్బులు పొదుపు చేయాలనుకుంటే జపనీస్ టెక్నిక్స్ ఫాలో అయిపోండి.. సింపుల్ బట్ ఎఫెక్టివ్

ఉద్యోగాల ఒత్తిడి ప్రధాన కారణం

ఎక్కువ పని గంటలు, పనిలో స్ట్రెస్ వంటివి యువతను సంబంధాలకు, కుటుంబ జీవితానికి దూరం చేస్తుంది. అధిక శ్రమతో కూడిన ఉద్యోగాల ఒత్తిడి వల్ల ఉద్యోగులు వివాహం, పిల్లల కోసం తగినంత సమయం కేటాయించలేకపోతన్నారట. వారికి శక్తి మిగలకపోవడంతో ఒంటరిగా ఉండేందుకు ఎక్కువ ఆసక్తి చూపిస్తున్నారని గుర్తించారు.

పిల్లలతో పాటు ఖర్చు భయం

పిల్లలు ఉంటే బర్డెన్ ఎక్కువ అవుతుందనే భయంతో చాలామంది సంతానానికి దూరమవుతున్నారట. పిల్లల సంరక్షణ, ఉన్నత విద్య ఖర్చులు అధికంగా ఉండటం వల్ల, చాలామంది యువ జంటలు పిల్లలను కనడానికి లేదా పెద్ద కుటుంబాలను ప్రారంభించడానికి సంకోచిస్తున్నారు.

Also Read : 3 నిమిషాలు ఫాస్ట్.. 3 నిమిషాలు స్లో.. ఈ జపనీస్ టెక్నిక్ ఇప్పుడు బాగా ఫేమస్, ఎందుకంటే

కెరీర్కి ఓటేస్తున్న మహిళలు

జపాన్ కార్పొరేట్ కల్చర్ మహిళలకు వృత్తి, కుటుంబ బాధ్యతలను సమతుల్యం చేసుకోవడాన్ని కష్టతరం చేస్తుంది. ఫలితంగా పనిలో సౌలభ్యం లేకపోవడంతో కొంతమంది మహిళలు వివాహం లేదా పిల్లలను కనడం కంటే తమ వృత్తి జీవితానికే ప్రాధాన్యత ఇవ్వడం కూడా దీనికి ముఖ్య కారణమే.

2070 నాటికి తగ్గనున్న జనాభా

జపాన్లో వలస విధానం ఎక్కువగా ఉండడం, సుమారు మూడు శాతం మంది విదేశీయులు ఉన్నారట. దీంతో జపాన్లోని యువతకు జాబ్స్ దొరకడం కష్టంగా మార్చిందని కూడా చెప్తున్నారు. ఈ లోటుపాట్లను భర్తీ చేయడంలో జపాన్ పరిమిత సామర్థ్యాన్ని కలిగి ఉంది. ఈ అంశాలే కొనసాగితే 2070 నాటికి జపాన్ జనాభా సుమారు 87 మిలియన్లకు తగ్గవచ్చు. వీరిలో దాదాపు 40% మంది 65 ఏళ్లు లేదా అంతకంటే ఎక్కువ వయస్సు గలవారే ఉంటారు.

Also Read : ప్రపంచ జనాభా దినోత్సవం 2025.. ఫ్యామిలీ ప్లానింగ్ గురించి భారత్ ఆలోచించాల్సిన సమయమిదే, ఎందుకంటే?

H-1B Visa Changes: ఏడాదిలో హెచ్-1బి వీసా నిబంధనల్లో సమూల మార్పులు.. వీసా మోసాలపై క్రిమినల్ దర్యాప్తులు!

Satyaprasad Bandaru — Sun, 27 Sep 2026 10:51:22 +0530

H-1B Visa Changes: వీసా మోసాలను అరికట్టేందుకు రానున్న రోజుల్లో హెచ్-1బి వీసా జారీలో భారీ మార్పులు చేయనున్నట్లు ట్రంప్ ప్రభుత్వం తెలిపింది. విదేశీ కార్మికులు అక్రమంగా దేశంలో ప్రవేశిస్తున్నారన్న ఆరోపణలపై దర్యాప్తులను ముమ్మరం చేసింది. వచ్చే ఏడాదిలో హెచ్-1బి వీసా జారీలో సమూల మార్పులు జరగొచ్చని కార్మిక శాఖ ఇన్‌స్పెక్టర్ జనరల్ ఆంథోనీ డి ఎస్పోసిటో స్పష్టం చేశారు.

365 రోజుల్లో సమూల మార్పులు

ఓ ఇంటర్వ్యూలో డి ఎస్పోసిటో మాట్లాడుతూ, "విదేశీ కార్మిక వీసా ప్రక్రియ 365 రోజుల తర్వాత చాలా భిన్నంగా కనిపించబోతోంది" అని పేర్కొన్నారు. విదేశీ కార్మికులపై వస్తున్న ఆరోపణలు, కార్మికుల శ్ర దోపిడీ, మానవ అక్రమ రవాణాపై కార్మిక శాఖ ఇన్‌స్పెక్టర్ జనరల్ కార్యాలయం దేశవ్యాప్తంగా దర్యాప్తును ముమ్మరం చేసిన సమయంలో ఆయన వ్యాఖ్యలు ప్రాధాన్యత సంతరించుకున్నాయి. అమెరికా విదేశీ కార్మిక వ్యవస్థలో వాస్తవంగా ఏం జరుగుతుందో ప్రజలకు చూపించడానికి ప్రభుత్వం కృషి చేస్తోందని, ఇది కేవలం కాగితాల లెక్కల సమస్య కాదని ఆయన తేల్చిచెప్పారు. ఈ దర్యాప్తు కోసం నిధులు కూడా కేటాయించినట్లు తెలిపారు.

Also Read:ఇరాన్ కాల్పుల విరమణకు ట్రంప్ నో.. నవంబర్ తర్వాత మళ్లీ దాడులు!

రంగంలోకి దిగిన లేబర్ డిపార్ట్మెంట్

లేబర్ OIG ఇప్పటికే కఠిన చర్యలు ప్రారంభించింది. సెప్టెంబర్ 18న విడుదల చేసిన ప్రకటన మేరకు.. దర్యాప్తులో భాగంగా పలువురికి సెర్చ్ వారెంట్లను జారీ చేసింది. క్రిమినల్ దర్యాప్తు పూర్తయ్యే వరకు కాగ్నిజెంట్, క్లౌడెరా సంస్థలకు సంబంధించిన వీసా దరఖాస్తులను కూడా నిలిపివేసినట్లు ఆ శాఖ వెల్లడించింది.

Also Read: PoK, లాడెన్, తీవ్రవాదం.. కాశ్మీర్ పేరు ఎత్తగానే పాక్‌ ప్రధానికి గట్టిగా బుద్ధిచెప్పిన భారత్

వైట్ హౌస్ కఠిన నిర్ణయాలు

హెచ్-1బి వీసాలపై పర్యవేక్షణ మరింత కఠినతరం చేయాలని వైట్ హౌస్ భావిస్తుంది. సెప్టెంబర్ 18న జారీ చేసిన అధికారిక ఉత్తర్వుల మేరకు.. H-1B దరఖాస్తులను సమీక్షించేటప్పుడు, యజమానులు స్థానిక అమెరికా కార్మికులను తొలగించే చర్యలు చేపట్టారా? లేదా? అని పరిశీలించాలని కార్మిక, హోంల్యాండ్ సెక్యూరిటీ, విదేశాంగ శాఖలను ఆదేశించింది. అంతేకాకుండా, H-1B కార్మికుల ఎంట్రీపై పరిమితిని సెప్టెంబర్ 21, 2027 వరకు పొడిగించింది. కొన్ని మినహాయింపులకు లోబడి, అమెరికా బయట ఉన్న కార్మికుల కోసం దాఖలు చేసే పిటిషన్లకు సాధారణంగా 100,000 డాలర్లు చెల్లించాల్సి ఉంటుంది. ఈ నిబంధనల మేరకు అతిపెద్ద ఐటీ అవుట్‌సోర్సింగ్ సంస్థల నుంచి H-1B రిజిస్ట్రేషన్లలో 92 శాతం తగ్గుదల కనిపించిందని వైట్ హౌస్ నివేదికలు తెలిపాయి.

హెచ్-1బి కార్యక్రమాన్ని పూర్తిగా రద్దు చేస్తున్నట్లు డి ఎస్పోసిటో ప్రకటించనప్పటికీ, రాబోయే కాలంలో కంపెనీలపై జరిగే దర్యాప్తులు, కఠినమైన విధానాలు వీసా దారులపై తీవ్ర ప్రభావం చూపే అవకాశం ఉందని ఈ పరిణామాలు స్పష్టం చేస్తున్నాయి.

Also Read: ద్రవ్యోల్బణం, మార్కెట్ లేదా సరిహద్దు..అక్టోబర్ 9 తర్వాత భారతదేశంలో ఏం మారబోతోంది?

Trump Rejects Iran Ceasefire: ఇరాన్ కాల్పుల విరమణకు ట్రంప్ నో.. నవంబర్ తర్వాత మళ్లీ దాడులు!

Satyaprasad Bandaru — Sat, 26 Sep 2026 14:17:42 +0530

Trump Rejects Iran Ceasefire: ఇరాన్ కాల్పుల విరమణ ప్రతిపాదనను అమెరికా తిరస్కరించినట్లు తెలుస్తోంది. నవంబర్‌లో అమెరికాలో జరగనున్న మధ్యంతర ఎన్నికల తర్వాత ఇరాన్‌పై మళ్లీ దాడులు చేసేందుకు ట్రంప్ సిద్ధమవుతున్నట్లు ఆ దేశ మీడియో తెలిపింది. ఇరాన్ ఓడరేవులపై అమెరికా తమ దిగ్బంధనాన్ని ఎత్తివేస్తే.. హర్మూజ్ జలసంధిని తిరిగి తెరవడంతో పాటు అణుచర్చలను పునరుద్ధరిస్తామని ఇరాన్ శాంతి చర్చల్లో ప్రతిపాదించింది.

శాంతి చర్చలకు నో

ఖతార్ మధ్యవర్తుల ద్వారా టెహ్రాన్ తన ప్రతిపాదనలను అమెరికాకు తెలియజేసింది. తమ ప్రతిపాదనలకు ఒప్పుకుంటే హర్మూజ్‌ను ఏడు రోజుల్లో తిరిగి తెరుస్తామని ఇరాన్ విదేశాంగ మంత్రి అబ్బాస్ అరాగ్చి ఇటీవల ప్రకటన చేశారు. అయితే టెహ్రాన్ ప్రతిపాదనలపై ట్రంప్‌ విముఖత వ్యక్తం చేసినట్లు తెలుస్తోంది. శాంతి చర్చలకు ఇరాన్‌ కట్టుబడి ఉంటుందా? అనే దానిపై అమెరికా అధ్యక్షుడు ట్రంప్ పలు సందేహాలు వ్యక్తం చేసినట్లు స్థానిక మీడియా కథనాలు పేర్కొన్నాయి.

Also Read: PoK, లాడెన్, తీవ్రవాదం.. కాశ్మీర్ పేరు ఎత్తగానే పాక్‌ ప్రధానికి గట్టిగా బుద్ధిచెప్పిన భారత్

ట్రంప్ జలసంధిగా మ్యాప్ విడుదల

హర్మూజ్‌ జలసంధిపై పూర్తి నియంత్రణ అమెరికాకే ఉందని అధ్యక్షుడు ట్రంప్‌ వాదిస్తున్న సంగతి తెలిసిందే. తాజాగా ఆయన మరో ముందడుగు వేసి తన సొంత సోషల్ మీడియా ‘ట్రూత్‌ సోషల్‌’లో ఓ పోస్ట్‌ పెట్టారు. హర్మూజ్‌ పేరును ‘ట్రంప్‌ జలసంధి’ మార్చి ఓ మ్యాప్‌ ను ఆయన షేర్‌ చేశారు. ప్రస్తుతం హర్మూజ్‌లో అమెరికా బలగాల దిగ్బంధనంతో పాటు ఇరాన్‌ ఆంక్షలు అమల్లో ఉన్నాయి. దీంతో చమురు నౌకల రాకపోకలకు తీవ్ర ఇబ్బందులు తలెత్తుతున్నాయి. తమ దేశ చమురుపై ఆంక్షలు తొలగించి, తమ ఆస్తులను విడుదల చేయాలని, దాడులకు ముగింపు పలకాలని ఇరాన్‌ డిమాండ్ చేస్తోంది. తమ ప్రతిపాదనలకు ఒప్పకుంటేనే హర్మూజ్‌లో స్వేచ్ఛా వాణిజ్యానికి అవకాశం ఉంటుందని టెహ్రాన్ పదే పదే చెబుతోంది. శాంతి చర్చలకు ట్రంప్ నిరాకరించడంతో.. పరిస్థితులు మరింత ఉద్రిక్తంగా మారే అవకాశం ఉందని నిపుణులు అంటున్నారు.

Also Read: ద్రవ్యోల్బణం, మార్కెట్ లేదా సరిహద్దు..అక్టోబర్ 9 తర్వాత భారతదేశంలో ఏం మారబోతోంది?

PoK, లాడెన్, తీవ్రవాదం.. కాశ్మీర్ పేరు ఎత్తగానే పాక్‌ ప్రధానికి గట్టిగా బుద్ధిచెప్పిన భారత్

Shankar Dukanam — Sat, 26 Sep 2026 12:29:54 +0530

ఐక్యరాజ్యసమితి సర్వసభ్య సమావేశం (UNGA) 81వ సమావేశంలో జమ్మూ కాశ్మీర్‌పై పాకిస్తాన్ ప్రధాని షెహబాజ్ షరీఫ్ చేసిన ప్రకటనపై భారత్ గట్టిగా బుద్ధి చెప్పింది. అలాగే జమ్మూ కాశ్మీర్ భారత్‌లో అంతర్భాగమని స్పష్టం చేసింది. అంతేకాకుండా ఈ అంశంపై ఎలాంటి రాజీ లేదని స్పష్టం చేసింది. పాకిస్తాన్ అవలంబిస్తున్న తీవ్రవాదం, మోసాలు, ద్వంద్వ వైఖరి వల్ల ఆ దేశానికి గానీ, లేదా ప్రపంచానికి గానీ ఎలాంటి ప్రయోజనం ఉండదని భారత దౌత్యవేత్త పెటల్ గెహ్లాట్ స్పష్టం చేశారు.

ఐక్యరాజ్యసమితిలోని భారత శాశ్వత మిషన్ ఫస్ట్ సెక్రటరీ పెటల్ గెహ్లాట్ మాట్లాడుతూ.. "ఐరాస జనరల్ అసెంబ్లీలో పాకిస్తాన్ ప్రతినిధి కొన్ని విచిత్రమైన మాటలు మాట్లాడారు. న్యూయార్క్ సిటీ ప్రపంచంలోనే అత్యంత దారుణమైన ఉగ్రదాడిని ఎదుర్కొని 25 ఏళ్లు పూర్తి చేసుకున్న 2 వారాల తర్వాత ఈ సంఘటన జరిగిందని" అన్నారు.

'ఈ సందర్భాన్ని అందరూ గుర్తుంచుకోవడం చాలా ముఖ్యం. ఎందుకంటే సెప్టెంబర్ 9/11 మాస్టర్‌మైండ్ ఒసామా బిన్ లాడెన్, పాకిస్తాన్ మిలిటరీ అకాడమీకి పక్కనే నివసిస్తుండేవాడు. నేడు పాకిస్తాన్ ప్రతినిధి ఏ సంస్థ పట్లనైతే ఇంతటి గౌరవాన్ని ప్రదర్శించారో అదే ఆ సంస్థ ఇది. అయితే పాకిస్తాన్ ప్రజలు స్వయంగా 'ఫార్మ్ 47 ప్రభుత్వం' అని పిలుచుకునే ప్రభుత్వం నుంచి ఇలాంటి చెత్త మాటలు మాత్రమే ఆశించవచ్చు' అని వ్యాఖ్యానించారు.

ఫార్మ్ 47 ప్రభుత్వం అనేది ఒక పొలిటికల్ టర్మ్. రాజకీయంగా ప్రతిపక్ష పార్టీలు పాక్ ప్రధాని షెహబాజ్ షరీఫ్ కూటమి కోసం ఈ పదాన్ని ఉపయోగిస్తుంటాయి. అక్కడి ప్రతిపక్ష పార్టీలు, ప్రధానంగా ఇమ్రాన్ ఖాన్‌కు చెందిన PTI పార్టీ, ఎన్నికల ఫలితాల్లో అక్రమాలు జరిగాయని షెహబాజ్ షరీఫ్ ప్రభుత్వంపై తీవ్ర ఆరోపణలు చేశాయి.

భారత అధికారిణి పెటల్ గెహ్లాట్ మాట్లాడుతూ.. 'ప్రస్తుతం తమ సొంత రాజధాని ఇస్లామాబాద్‌లోనే ప్రజలకు వ్యతిరేకంగా బలాన్ని ప్రదర్శిస్తున్న పాలకుల వద్ద నుంచి ప్రజాస్వామ్య హక్కులు, మానవతా విలువలపై మనం గొప్ప స్పీచ్ విన్నాం. ఇది ఆర్మీ ద్వారా, ఆర్మీ కోసమే జరుగుతున్న పాలన. ఆ దేశం నుంచి కీలుబొమ్మలు వస్తుంటాయి, పోతుంటాయి. కానీ నిర్ణయాలు ఎవరు తీసుకుంటారనే విషయంలో మనం ఎలాంటి భ్రమల్లో ఉండొద్దని’ అన్నారు.

జమ్మూ కాశ్మీర్ మొత్తం భారత్‌లో అంతర్భాగం : పెటల్ గెహ్లాట్

పాకిస్తాన్ అసలు స్వరూపం దాని 27వ సవరణలో ఉంది. మనం విన్న ఆలోచనలు మతమౌఢ్యం, ద్వేషం వారికి ఉన్న రికార్డు. పాక్ పగటిపూట భద్రత గురించి మాట్లాడి, రాత్రి వేళల్లో ఉగ్రవాదానికి పాల్పడుతుందని ఆమె ఎద్దేవా చేశారు. మతపరమైన అసహనం గురించి పాక్ మాట్లాడితే ప్రపంచ దేశాలు నవ్వుతున్నాయి. పాకిస్తాన్‌లో మైనారిటీల పట్ల ఎలాంటి వైఖరి ఉంటుందో ప్రపంచానికి తెలుసని, ఈ విషయంలో మిగతా దేశాలను పాక్ దారి పట్టించడం కష్టమన్నారు.

ఇక్కడ, భారత్ తరఫున జమ్మూ కాశ్మీర్ ప్రస్తావనపై స్పందిస్తూ— 'జమ్మూ కాశ్మీర్ భారత్‌లో అంతర్భాగం అని, మా నుంచి విడదీయరాని భాగం. అది ఎల్లప్పుడూ అలాగే ఉంటుంది. కానీ కాశ్మీర్‌పై చర్చించాల్సి వస్తే, పాకిస్తాన్ ఆక్రమిత జమ్మూ కాశ్మీర్ (PoK)పై ఫోకస్ చేయాలి. సుదీర్ఘకాలంగా ఎదుర్కొంటున్న నిర్బంధ హత్యలు, క్రూరమైన హింస, ప్రాథమిక హక్కులను కాలరాయడం గురించి అక్కడి రావల్‌కోట్ ప్రజలను అడిగి తెలుసుకోండి' అన్నారు.

షెహబాజ్ షరీఫ్ ఏమన్నారంటే..

ఏడాది కిందట భారత్ మా పాకిస్తాన్ పై దాడి చేసిందని పాకిస్తాన్ ప్రధాని షెహబాజ్ షరీఫ్ ఆరోపించారు. ఐక్యరాజ్యసమితి చార్టర్ ఆర్టికల్ 51 కింద పాకిస్తాన్ తన ఆత్మరక్షణ హక్కును ఉపయోగించుకుందని పేర్కొన్నారు. ఫీల్డ్ మార్షల్ ఆసిం మునీర్, ఆర్మీ అత్యంత ఖచ్చితత్వంతో బదులిచ్చాయన్నారు.

'మాపై దాడికి వచ్చిన శత్రువు నోరు పాకిస్తాన్ మూయించింది. పొరుగుదేశం ఎప్పటికీ మరచిపోలేని పాఠాన్ని పాక్ నేర్పింది. అమెరికా అధ్యక్షుడు ట్రంప్ దూరదృష్టి కలిగిన నాయకత్వానికి ఈ సందర్భంగా ధన్యవాదాలు చెబుతున్నాను. దక్షిణాసియాలో కోట్ల మంది ప్రజల ప్రాణాలు కాపాడారు. అణ్వాయుధాలు కలిగిన రెండు పొరుగు దేశాలు యుద్ధ అంచున నిలిచిన క్లిష్ట సమయంలో అమెరికా సరైన సమయంలో జోక్యం చేసుకుంది. ట్రంప్ ఆ కీలక సమయంలో చర్యలు తీసుకోకపోతే ఎంతటి వినాశనం జరిగేదో. అదే విధంగా కాశ్మీర్ వివాదానికి న్యాయమైన, నిష్పాక్షికంగా పరిష్కారం కావాలని’ షరీఫ్ అన్నారు.

Mars Transit 2026: ద్రవ్యోల్బణం, మార్కెట్ లేదా సరిహద్దు..అక్టోబర్ 9 తర్వాత భారతదేశంలో ఏం మారబోతోంది?

RAMA — Wed, 23 Sep 2026 07:00:23 +0530

Mars Transit 2026: మీ EMI పెరుగుతుందా లేక మార్కెట్ ఉపశమనం కల్పిస్తుందా? సరిహద్దుల్లో శాంతి నెలకొంటుందా లేదా ఉద్రిక్తతలు పెరుగుతాయా? అక్టోబర్‌లో ప్రభుత్వం కీలక నిర్ణయం తీసుకుంటుందా?..అది సామాన్యుల జేబు నుంచి దేశ భద్రత వరకు అన్నింటినీ ప్రభావితం చేయగలదా? ఈ ప్రశ్నలు కేవలం ప్రస్తుత ఆర్థిక, రాజకీయ పరిస్థితుల వల్ల మాత్రమే తలెత్తడం లేదు; భారతదేశ జాతకంలో ఏర్పడుతున్న ఒక అరుదైన గ్రహస్థితి కూడా దీనినే సూచిస్తోంది.

సెప్టెంబర్ 18న కుజుడు కర్కాటక రాశిలోకి ప్రవేశించాడు. భారతదేశ జాతకంలో చంద్రుడు, బుధుడు, శని, శుక్రుడు , సూర్యుడు వేర్వేరు డిగ్రీలలో ఉండే రాశి ఇదే. రాబోయే నెలన్నర కాలంలో కుజుడు ఈ ఐదు గ్రహాలను ఒక్కొక్కటిగా దాటుతాడు. దీని ప్రభావం ఒక్క రోజులోనో లేదా ఒక్క రంగంలోనో కనిపించదు; ఇది మొదట ప్రజలను, ఆ తర్వాత బ్యాంకింగ్ - మార్కెట్‌ను, తర్వాత పరిశ్రమలు, రవాణా, ఆర్థిక వ్యవస్థను, చివరగా ప్రభుత్వం ఉన్నత పరిపాలనను ప్రభావితం చేస్తుంది.

అక్టోబర్ 9 కీలకం

ఈ మొత్తం పరిణామంలో అక్టోబర్ 9వ తేదీ ఒక కీలకమైన తేదీగా రూపుదిద్దుకుంటోంది. దీనికి కొద్దిగా ముందు, అక్టోబర్ 5 నుంచి 7 వరకు ఆర్‌బిఐ ద్రవ్య విధాన కమిటీ సమావేశం కానుంది, అక్టోబర్ 9న భారతదేశ వార్షిక జాతకంలో గురు ముద్రా దశ ప్రారంభమవుతుంది. ఈ సమయంలో, జన్మ జాతకంలో కుజుడు బుధుడిని సమీపిస్తాడు, దీనిని వాణిజ్యం, బ్యాంకింగ్, ప్రభుత్వ గణాంకాలు , కమ్యూనికేషన్లలో ఒక కారకంగా పరిగణిస్తారు.

దేశం ఇప్పటికే అధిక ముడిచమురు ధరలు, బలహీనమైన రూపాయి, వడ్డీ రేట్ల పెంపు అవకాశం వంటి సమస్యలతో సతమతమవుతున్న తరుణంలో ఈ యాదృచ్ఛికం మరింత ఆశ్చర్యకరంగా ఉంది. మరోవైపు, చైనాతో చర్చలు జరుగుతున్నప్పటికీ, సరిహద్దు, వాణిజ్య సమస్యలు పరిష్కారం కాలేదు.. భారతదేశ జాతకం కేవలం ఒత్తిడిని మాత్రమే ప్రతిబింబిస్తోందా, లేక ఈ ఒత్తిడి మధ్య ప్రభుత్వం వ్యూహాత్మక ప్రయోజనాన్ని పొందగలదా?

భారతదేశ జాతకంలో అక్టోబర్‌ను ప్రత్యేకంగా నిలిపే అంశం ఏంటి?

1947 ఆగస్టు 15న, న్యూఢిల్లీ కాలమానం ప్రకారం అర్ధరాత్రి 12:00 గంటలకు రూపొందించిన భారతీయ జాతకం ప్రకారం, లగ్నం వృషభం. రాశిచక్రం లోని మూడవ ఇంట్లో కర్కాటకం ఉంది. జ్యోతిషశాస్త్రంలో, ఈ ఇల్లు పొరుగు దేశాలు, సమాచార ప్రసారాలు, మీడియా, రోడ్లు, రైల్వేలు, సైనిక సమాచార ప్రసారాలు , తక్షణ ప్రభుత్వ ప్రతిస్పందనను సూచిస్తుంది. అయితే, భావ ప్రధాన జాతకంలో పరిస్థితి కొద్దిగా మారుతుంది. కర్కాటక రాశి ప్రారంభ భాగం మూడవ ఇంట్లో ఉండగా, మిగిలిన భాగం నాల్గవ ఇంటికి మారుతుంది. ఈ గణన ప్రకారం చంద్రుడు మూడవ ఇంట్లో ఉంటాడు, కానీ బుధుడు, శని, శుక్రుడు,సూర్యుడు నాల్గవ ఇంట్లో ఆధిపత్యం వహిస్తారు.

అందువల్ల, ఈ గ్రహ సంచారాన్ని కేవలం సరిహద్దులు లేదా పొరుగు దేశాలతో మాత్రమే ముడిపెట్టడం సరికాదు. కుజుడు ముందుకు సాగే కొద్దీ, అది భూమి, వ్యవసాయం, వాతావరణం, అంతర్గత భద్రత, ప్రభుత్వ ఆస్తులు, శక్తి, ప్రతిపక్షం , సాధారణ ప్రజల గృహ సంబంధిత సమస్యలను కూడా ప్రభావితం చేస్తుంది.

వృషభ లగ్నంలో, కుజుడు ఏడవ , పన్నెండవ భావాలకు అధిపతి. ఏడవ భావం విదేశాంగ విధానం, ఒప్పందాలు , బహిరంగ సంఘర్షణకు ప్రాతినిధ్యం వహిస్తుంది. పన్నెండవ భావం విదేశీ వ్యయం, నష్టాలు, ఆసుపత్రులు , తెరవెనుక కార్యకలాపాలతో ముడిపడి ఉంటుంది. అందువల్ల, కుజుడు భారతదేశపు , మరియు నాల్గవ భావాలను ఉత్తేజపరచడం ద్వారా విదేశాంగ విధానానికి , దేశ అంతర్గత పరిస్థితికి మధ్య ఒక సంబంధం ఏర్పడుతుంది.

కర్కాటక రాశిలో కుజుడు బలహీనంగా ఉంటే ఎందుకు ఆందోళన చెందాలి?

కర్కాటక రాశి కుజుడికి బలహీనమైన రాశి కానీ బలహీనంగా ఉండటం అంటే నిష్క్రియంగా ఉండటం కాదు. అటువంటి కుజుడు తరచుగా తొందరపాటు నిర్ణయాలకు, భావోద్వేగ ప్రతిచర్యలకు , తదనంతర దిద్దుబాటు అవసరానికి దారితీయవచ్చు.

భారతదేశ జాతకంలో కుజుడికి షడ్బలం 7.20 ఉండగా, దీనికి అవసరమైన కనీస బలం 5గా పరిగణిస్తారు. ఇది భారతదేశ జాతకంలో కుజుడికి ఫలితాలను ఇచ్చే సామర్థ్యం ఉందని స్పష్టంగా సూచిస్తుంది. అయితే, దీనిని ప్రస్తుత గోచారంలో కుజుడి బలంగా పొరపాటుగా భావించకూడదు.

కర్కాటక రాశిలో గురుడు కూడా ఉచ్చ స్థితిలో ఉంటాడు. సెప్టెంబర్ నెలాఖరులో కుజుడు, గురుడు ఒకే రాశిలో ఉన్నప్పటికీ, వాటి డిగ్రీలు వేరుగా ఉంటాయి. అందువల్ల, కేవలం రాశిచక్ర గుర్తుల ఆధారంగా అత్యంత శక్తివంతమైన గురు-కుజ సంయోగాన్ని లేదా సంపూర్ణ నీచభంగ రాజయోగాన్ని ప్రకటించడం తొందరపాటు అవుతుంది.

అక్టోబర్ చివరి వారంలో ఆ రెండు గ్రహాల మధ్య దూరం తగ్గుతుంది. ఆ తర్వాత, అక్టోబర్ 31న బృహస్పతి సింహరాశిలోకి ప్రవేశిస్తుంది. ఈ సమయం సంఘటనల తీవ్రతను పెంచి, ఉద్రిక్తతల మధ్య రాజీకి లేదా పరిష్కారానికి మార్గం సుగమం చేస్తుంది.

2026 జాతకం ఒత్తిడిని సూచిస్తుందా లేక విజయాన్ని సూచిస్తుందా?

ఆగష్టు 15, 2026 నాటి భారతీయ వార్షిక జాతకం సింహ లగ్నానికి సంబంధించినది. రాహువు ఏడవ ఇంట్లో, శని ఎనిమిదవ ఇంట్లో ఉన్నారు. వార్షిక జాతకంలో కుజుడు మిథున రాశిలోని పదకొండవ ఇంట్లో ఉన్నాడు. సింహ లగ్నానికి కుజుడు ఒక శుభ గ్రహం. పదకొండవ ఇంట్లో దాని స్థానం రక్షణ, సాంకేతికత, మౌలిక సదుపాయాలు లేదా విదేశీ భాగస్వామ్యాల నుంచి ప్రయోజనాలు పొందే అవకాశాన్ని సృష్టిస్తుంది. అందువల్ల, వార్షిక జాతకం ఎటువంటి పెద్ద వైఫల్యాన్ని సూచించడం లేదు. దేశంపై ఒత్తిడి పెరుగుతుందని, అయితే ప్రభుత్వం స్పందించి, ఆ పరిస్థితి నుంచి కొంత వ్యూహాత్మక ప్రయోజనాన్ని రాబట్టగల సామర్థ్యాన్ని కలిగి ఉంటుందని సూచన ఉంది.

సెప్టెంబర్ 24 నుంచి 26 వరకు

భారతదేశ జాతకంలో చంద్రుడు కర్కాటక రాశిలో 3 డిగ్రీల 59 నిమిషాల వద్ద ఉన్నాడు. కుజుడు సెప్టెంబర్ 24, 25 తేదీల ప్రాంతంలో ఈ డిగ్రీకి అత్యంత సమీపంగా వస్తాడు. జ్యోతిష్యశాస్త్రంలో చంద్రుడు.. ప్రజలు, నీరు, ఆహారం, వాతావరణం మ, రోజువారీ అవసరాలకు సూచిక . అందువల్ల, ఏ ప్రధాన ప్రభుత్వ నిర్ణయం కన్నా ఈ సమయం దేశ వాతావరణాన్ని మార్చే అవకాశం ఎక్కువగా ఉంది. సరిహద్దులు, ద్రవ్యోల్బణం, నిత్యావసర వస్తువుల ధరలు, వర్షం, మహిళలు, నీరు లేదా రవాణాకు సంబంధించిన వార్తలపై ప్రజల స్పందన తీవ్రంగా ఉండవచ్చు. మీడియాలో , సోషల్ మీడియాలో జరిగే భావోద్వేగ చర్చ అసలు సంఘటన కంటే పెద్దదిగా కనిపించవచ్చు.

అక్టోబర్ 9 నుంచి 13 వరకు

ఆర్‌బిఐ నిర్ణయం తర్వాత మార్కెట్లకు పరీక్ష ఎదురుకానుంది. భారతదేశ జాతకంలో బుధుడు కర్కాటక రాశిలో 13 డిగ్రీల 41 నిమిషాల వద్ద ఉన్నాడు. అక్టోబర్ 11వ తేదీన కుజుడు దీనికి అత్యంత సమీపంగా వస్తాడు. దీనికి కొద్దిగా ముందు, ఆర్‌బిఐ ద్రవ్య విధాన కమిటీ అక్టోబర్ 5 నుంచి 7 వరకు సమావేశం కానుంది. ఆగస్టులో రిటైల్ ద్రవ్యోల్బణం 4.82 శాతానికి చేరుకుంది. అధిక ముడిచమురు ధరలు, రూపాయిపై ఒత్తిడి వడ్డీ రేట్ల పెంపు భయాలను పెంచుతున్నాయి. ఆర్‌బిఐ నిర్ణయం ప్రభావం బ్యాంకులకు మాత్రమే పరిమితం కాదు. రెపో రేటులో మార్పు గృహ రుణాలు, వాహన రుణాలు, ఈఎంఐలు, స్టాక్ మార్కెట్‌పై ప్రభావం చూపుతుంది. ఒకవేళ రేట్లు యథాతథంగా ఉన్నప్పటికీ, ద్రవ్యోల్బణం , రూపాయిపై ఆర్‌బిఐ చేసే అంచనా మార్కెట్ దిశను నిర్ధారించగలదు.

భారతదేశ వార్షిక జాతకంలో అక్టోబర్ 9వ తేదీన గురు గ్రహపు ముద్దా దశ ప్రారంభమవుతుంది. వాణిజ్యం, బ్యాంకింగ్, ప్రభుత్వ గణాంకాలు, మీడియా సమాచార ప్రసారానికి బుధుడు సూచిక. కుజ-బుధ సంయోగం వల్ల ప్రకటనలపై మార్కెట్ నుంచి తీవ్ర ప్రతిచర్యలు, డేటాపై వివాదాలు లేదా ప్రభుత్వ నిర్ణయాలపై భిన్నమైన వ్యాఖ్యానాలు ఏర్పడవచ్చు. ఈ కాలంలో డిజిటల్ చెల్లింపులు, టెలికాం, సైబర్ సెక్యూరిటీ, రైల్వేలు లేదా రవాణాకు సంబంధించిన ప్రధాన వార్తలు కూడా వెలువడవచ్చు. దీని అర్థం కేవలం మార్కెట్ పతనం మాత్రమే కాదు. అంగారకుడు , బుధ గ్రహ ప్రభావం వల్ల ఆకస్మిక పెరుగుదలలు, ఆ తర్వాత తీవ్రమైన హెచ్చుతగ్గులు కూడా సంభవిస్తాయి.

అక్టోబర్ 22 నుంచి 25 వరకు: పరిశ్రమ, రైల్వేలు , ప్రధాన ప్రాజెక్టులపై దృష్టి

భారతదేశ జన్మ చార్టులో, శని కర్కాటక రాశిలో 20 డిగ్రీల 26 నిమిషాల వద్ద ఉంది. అంగారకుడు అక్టోబర్ 24వ తేదీన దీనిని సమీపిస్తాడు. శని దళితులు, గిరిజనులు, అణగారిన వర్గాలు, కార్మికులు, పరిశ్రమలు, గనులు, భారీ యంత్రాలు, రైల్వేలు , భారీ నిర్మాణ రంగాలకు సూచిక. కుజుడు పనులను వేగవంతం చేయడానికి ప్రయత్నిస్తుండగా, శని నియమాలు, జాప్యాలు, వ్యవస్థీకరణ లోపాన్ని తీసుకువస్తుంది. ఈ రెండింటి కలయిక ఒక ప్రాజెక్టును దాని సామర్థ్యానికి మించి ముందుకు నెట్టే సమస్యలను సృష్టించగలదు. రైలు, రోడ్లు, వంతెనలు, విద్యుత్, పెట్రోలియం, మైనింగ్, రక్షణ ఉత్పత్తి లేదా ఒక ప్రధాన నిర్మాణ ప్రాజెక్టుకు సంబంధించిన సమస్యలు తలెత్తవచ్చు. కార్మిక వివాదాలు, పాతబడిన యంత్రాలు లేదా భద్రతా ప్రమాణాలను నిర్లక్ష్యం చేయడం వంటి విషయాలు కూడా చర్చకు రావచ్చు.

అక్టోబర్ 26 నుంచి 29 వరకు: ఒత్తిడి మధ్య పెద్ద ఒప్పందం కుదిరే అవకాశం

భారతదేశ జాతకంలో, శుక్రుడు కర్కాటక రాశిలో 22 డిగ్రీల 34 నిమిషాల వద్ద ఉన్నాడు. అక్టోబర్ 27, 28 తేదీల ప్రాంతంలో కుజుడు శుక్రుడికి అత్యంత సమీపంగా వస్తాడు. భారతదేశంలో వృషభ లగ్నానికి శుక్రుడు అధిపతి. అందువల్ల, ఈ సంబంధం ఇతర ఏ గ్రహ సంబంధం కన్నా చాలా ముఖ్యమైనది. శుక్రుడు ఆర్థిక వ్యవస్థ, కరెన్సీ, మార్కెట్లు, వాహనాలు, విమానయానం, స్త్రీలు, వినోదం, దౌత్య వ్యవహారాలకు ప్రాతినిధ్యం వహిస్తాడు. ఈ సమయంలో, అంగారకుడు మరియు బృహస్పతి మధ్య దూరం కూడా తగ్గుతుంది. అందువల్ల, అక్టోబర్ చివరి వారంలో ఆర్థిక ఒత్తిడి మాత్రమే కాకుండా, భారీ పెట్టుబడులు, రక్షణ భాగస్వామ్యాలు, వ్యాపార ఒప్పందాలు లేదా దౌత్యపరమైన ఒప్పందాలు కుదిరే అవకాశాలు కూడా ఉన్నాయి.

ఆగస్టులో భారతదేశ వస్తు వాణిజ్య లోటు 26.86 బిలియన్ డాలర్లకు తగ్గింది, సేవలతో సహా మొత్తం ఎగుమతులు బలంగా ఉన్నట్లు కనిపించాయి. మరోవైపు, ముడి చమురు ధరలు దిగుమతుల బిల్లును, రూపాయి సవాళ్లను మరింత తీవ్రతరం చేశాయి. జాతకం కూడా ఇలాంటి ద్వంద్వ చిత్రాన్నే ప్రతిబింబిస్తోంది: సంఖ్యలు మెరుగుపడుతున్నాయి, కానీ ఆ మెరుగుదలకు అయ్యే ఖర్చు పెరుగుతోంది. ఈ సమయంలో ఆటోమొబైల్స్, విమానయానం, బ్యాంకింగ్, బంగారం, సినిమా పరిశ్రమ లేదా ఒక ప్రధాన వ్యాపార సమూహానికి సంబంధించిన నిర్ణయాలు చర్చకు రావచ్చు. ఒక ప్రముఖ మహిళా వ్యక్తికి సంబంధించిన వార్తలు కూడా వెలువడవచ్చు, కానీ ఏ ఒక్క నిర్దిష్ట వ్యక్తి గురించి అయినా కచ్చితమైన వాదనలు చేయడం అనుచితం.

సరిహద్దులో ఉద్రిక్తత మళ్లీ పెరగుతుందా?

ప్రధానమంత్రి నరేంద్ర మోదీ , చైనా అధ్యక్షుడు షీ జిన్‌పింగ్‌ల మధ్య ఇటీవల జరిగిన చర్చలు, ఇరు దేశాల మధ్య సంబంధాలకు సరిహద్దులో శాంతి అత్యవసరమని చెప్పాయి. అయినప్పటికీ, సరిహద్దు నిర్వహణ, వాణిజ్య అసమతుల్యతలు,మార్కెట్ ప్రవేశానికి సంబంధించిన ప్రశ్నలు పూర్తిగా పరిష్కారం కాలేదు. చైనా-పాకిస్తాన్ సరిహద్దు కమిషన్‌పై భారతదేశం అభ్యంతరం తెలపడం, చర్చలు జరుగుతున్నప్పటికీ వ్యూహాత్మక విభేదాలు కొనసాగుతున్నాయని కూడా చూపిస్తుంది. భారతదేశ జాతకం ప్రత్యక్ష యుద్ధాన్ని సూచించడం లేదు. సరిహద్దు వెంబడి సైనిక కార్యకలాపాలు పెరగడం లేదా తీవ్రమైన వాగ్వాదం జరగడం మరింత వాస్తవికమైన అవకాశం, కానీ చర్చలు కొనసాగుతున్నాయి. ఏ ఒప్పందంతోనైనా పాటు తన రక్షణ , నిఘా సామర్థ్యాలను పెంచుకోవాలని భారతదేశం పట్టుబట్టవచ్చు. సెప్టెంబరులో రక్షణ సేకరణ ప్రతిపాదనలకు లభించిన ప్రాథమిక ఆమోదం, సైనిక , సాంకేతిక సన్నాహాలు ఇప్పటికే వేగవంతమయ్యాయని సూచిస్తుంది. అంగారక గ్రహ సంచారం ఈ ప్రక్రియను మరింత ముందుకు తీసుకెళ్లగలదు.

సరిహద్దు కారణంగా దేశంలో పెద్ద ఎత్తున అశాంతి చెలరేగే అవకాశం?

ఈ గోచారంలో అతి తక్కువగా చర్చించే అంశం భారతదేశపు నాల్గవ ఇల్లు. భావ-చలిత చార్టులో కర్కాటక రాశిలోని చాలా గ్రహాలు ఈ ఇంట్లోనే ఉంటాయి. ఇది భూమి, వ్యవసాయం, నీరు, సహజ వనరులు, రాష్ట్ర ప్రభుత్వాలు, ప్రతిపక్షం, ప్రభుత్వ ఆస్తి , శాంతిభద్రతలకు సంబంధించిన సమస్యలను కూడా క్రియాశీలం చేస్తుంది.

అక్టోబర్ నెల రెండవ భాగంలో, పంటలు, ఆహార ధరలు, భూసేకరణ, విద్యుత్, ఆనకట్టలు, విద్యుత్ ప్రాజెక్టులు లేదా పారిశ్రామిక భద్రతకు సంబంధించిన సమస్యలు తలెత్తవచ్చు. కేంద్ర, రాష్ట్ర ప్రభుత్వాల మధ్య ఉద్రిక్తతలు, నిరసనలు లేదా ఒక ప్రధాన ప్రజా ప్రాజెక్టుపై వివాదాలు కూడా ఈ పరిధిలోకి రావచ్చు.

నవంబర్ 6 నుంచి 9 వరకు: ప్రభుత్వం కఠిన నిర్ణయాలు తీసుకోవాల్సిన సమయం
భారతదేశ జాతకంలో సూర్యుడు కర్కాటక రాశిలో 27 డిగ్రీల 59 నిమిషాల వద్ద ఉన్నాడు. నవంబర్ 7 మరియు 8 తేదీల మధ్య కుజుడు దీనికి అత్యంత సమీపంలో ఉంటాడు.

సూర్యుడు.. ప్రభుత్వం, ప్రధానమంత్రి, ఉన్నత పరిపాలన , జాతీయ ప్రతిష్టకు సూచిక. కుజుడు , సూర్యుని కలయిక అధికార స్థాయిలో కఠినత్వాన్ని పెంచుతుంది. ఈ కాలంలో ఒక ప్రధాన ప్రభుత్వ నిర్ణయం, భద్రతా విధానంపై ఒక బలమైన ప్రకటన, కేంద్ర పరిపాలనలో మార్పు, లేదా జాతీయ ప్రతిష్టకు సంబంధించిన ఒక సంఘటన వెలుగులోకి రావచ్చు. ముఖ్యమైన కోర్టు, ప్రభుత్వ విషయాలు, లేదా ఒక మంత్రి లేదా ఉన్నతాధికారిపై ఒత్తిడి కూడా చర్చకు రావచ్చు.

భారతదేశానికి లాభమా లేక నష్టమా?

ఈ మొత్తం గ్రహ సంచారాన్ని కేవలం శుభప్రదమని లేదా అశుభప్రదమని ముద్ర వేయలేం. భారతదేశ జాతకం ఒత్తిడిని సూచిస్తున్నప్పటికీ, అది దేశాన్ని ఆత్మరక్షణలో పడవేయడం లేదు. సరిహద్దు చర్చలు, సన్నాహాలు ఏకకాలంలో కొనసాగవచ్చు. ద్రవ్యోల్బణం, ముడి చమురు, రూపాయి, వడ్డీ రేట్ల వల్ల మార్కెట్ సవాళ్లను ఎదుర్కొంటుంది. పరిశ్రమ, మౌలిక సదుపాయాలు పుంజుకుంటాయి, కానీ భద్రతా ప్రమాణాలను నిర్లక్ష్యం చేయడం నష్టాలకు దారితీయవచ్చు. ప్రభుత్వంపై ఒత్తిడి పెరుగుతుంది, కానీ రక్షణ, సాంకేతికత లేదా విదేశీ భాగస్వామ్యాలలో గణనీయమైన లాభాలు ఆర్జించవచ్చు. అక్టోబర్ నెల కథ ఏదో ఒకే ఒక్క, రహస్యమైన ప్రధాన సంఘటనలా కనిపించడం లేదు. మొదట, ప్రజల అభిప్రాయం మారుతుంది, ఆ తర్వాత మార్కెట్, విధానపరమైన ఒత్తిళ్లు తలెత్తుతాయి. దీని తర్వాత పరిశ్రమ రవాణా రంగాలకు ఒక పరీక్ష ఎదురవుతుంది, చివరగా, ప్రభుత్వ స్థాయిలో ఒక కఠినమైన నిర్ణయం తీసుకుంటారు. భారతదేశ జాతకంలో అత్యంత స్పష్టమైన సూచన ఏంటంటే, దేశ వేగం ఆగదు, కానీ ముందుకు సాగడానికి చెల్లించే మూల్యం సాధారణం కంటే ఎక్కువగా ఉండవచ్చు.

గమనిక: ఆధ్యాత్మికవేత్తలు సూచించిన వివరాలు, ఆధ్యాత్మిక గ్రంధాల్లో పొందుపరిచిన సమాచారం ఆధారంగా అందించిన కథనం ఇది. వీటిని ఎంతవరకూ పరిగణలోకి తీసుకోవాలన్నది పూర్తిగా మీ వ్యక్తిగతం. దీనిని అనుసరించేముందు మీరు విశ్వశించే పండితుల సలహాలు స్వీకరించగలరు

మేష రాశి నుంచి మీన రాశివరకూ..12 రాశుల డైలీ రాశిఫలాలు, వారఫలాలు, నెలవారీ ఫలితాలు, రాశులు గ్రహాలు మారినప్పుడు మీ రాశిపై ఉండే ప్రభావానికి సంబంధించిన కథనాలన్నీ తెలుసుకునేందుకు ఈ లింక్ క్లిక్ చేయండి

Australia Immigration Policy: ఆస్ట్రేలియా ఇమ్మిగ్రేషన్ నిబంధనల మార్పులు.. భారతీయ విద్యార్థులపై ప్రభావం ఉంటుందా?

Satyaprasad Bandaru — Tue, 22 Sep 2026 16:53:18 +0530

Australia Immigration Policy: ఆస్ట్రేలియాలో వలసలు, అంతర్జాతీయ విద్యార్థులపై దేశవ్యాప్తంగా తీవ్ర చర్చ జరుగుతోంది. దేశ ఆర్థిక వ్యవస్థకు ప్రయోజనం చేకూర్చే వలసలకు తమ ప్రభుత్వం పూర్తి మద్దతు ఇస్తుందని ఆస్ట్రేలియా మంత్రి టోనీ బర్క్ స్పష్టం చేశారు. అయితే, వీసా వ్యవస్థను కేవలం ఆస్ట్రేలియాలో ఎక్కువకాలం నివసించేందుకు మాత్రమేనని, విదేశీయులకు ఇచ్చే వీసాలను దుర్వినియోగం చేయకుండా ఉండేందుకు, ప్రభుత్వం దానిపై మరింత నియంత్రణను తీసుకువస్తుంది. జాతీయ పత్రికా క్లబ్‌లో జరిగిన ఒక కార్యక్రమంలో మంత్రి ఈ కీలక ప్రకటన చేస్తూ.. అంతర్జాతీయ విద్యార్థుల వీసా మార్పులు, నిర్మాణ కార్మికుల అవసరం వంటి అంశాలపై ప్రభుత్వ వైఖరిని స్పష్టం చేశారు.

కార్మికులు, యోగా టీచర్లపై అవాస్తవ ప్రచారాలు

ఆస్ట్రేలియాలో నిర్మాణ కార్మికుల కంటే యోగా టీచర్లను ప్రభుత్వం దేశంలోకి ఎక్కువగా అనుమతిస్తోందనే ప్రచారం జరిగింది. అయితే, టోనీ బర్క్ ఇదంతా అవాస్తవమని కొట్టిపారేశారు. గతేడాది ఆస్ట్రేలియాలోకి వచ్చిన నిర్మాణ కార్మికుల సంఖ్య 15,000 వరకు ఉందని, అంతకుముందు ఈ సంఖ్య సుమారు 4,500గా ఉండేదని ఆయన పేర్కొన్నారు. అంటే ప్రస్తుత ప్రభుత్వ హయాంలో నిర్మాణ కార్మికుల సంఖ్య గణనీయంగా పెరిగిందని చెప్పారు. మరోవైపు, యోగా టీచర్లకు ఇచ్చిన వీసాలు 'సున్నా' అని బర్క్ స్పష్టం చేశారు. గత ప్రభుత్వ హయాంలో భారతదేశంతో కుదిరిన వాణిజ్య ఒప్పందం కింద ఈ యోగా టీచింగ్ నిబంధన ప్రవేశపెట్టినట్లు తెలిపారు.

భారత్-ఆస్ట్రేలియా మధ్య ఏప్రిల్ 2022లో కుదిరిన ఆర్థిక సహకార, వాణిజ్య ఒప్పందం (ECTA) ప్రకారం.. ప్రతి సంవత్సరం 1,800 మంది వరకు అర్హత కలిగిన భారతీయ నిపుణులను (చెఫ్‌లు, యోగా టీచర్లు సహా) తాత్కాలికంగా అనుమతించవచ్చు. అయితే ఇది గరిష్టంగా అనుమతించే వర్గం మాత్రమే గానీ, ప్రతి ఏడాది ఇన్ని వేల మంది యోగా ఉపాధ్యాయులు వస్తారనేది అవాస్తవం అని టోనీ బర్గ్ అన్నారు.

'వీసా హాపింగ్' కట్టడి

అంతర్జాతీయ విద్యార్థులు ఒక వీసా నుండి మరొక వీసాకు మారే అంశంపై మంత్రి మాట్లాడుతూ.. ప్రతి వీసా మార్పును "వీసా హాపింగ్" అని ముద్ర వేయడం సరికాదన్నారు. నైపుణ్యం గల కార్మికులు తక్కువగా ఉన్న రంగంలో ఒక విద్యార్థి తన చదువు పూర్తి చేసి, గ్రాడ్యుయేట్ వీసాపై ఉద్యోగంలో చేరి, ఆపై శాశ్వత నివాసం పొందితే అది పూర్తిగా చట్టబద్ధమైన మార్గమని తెలిపారు. అయితే చదువుకోవడం కోసం కాకుండా, కేవలం ఆస్ట్రేలియాలో ఎక్కువ కాలం ఉండాలనే ఉద్దేశంతో పదేపదే కోర్సులు లేదా వీసాలు మార్చే వారిపైనే ప్రభుత్వం నియంత్రణ పెంచుతోందన్నారు. విద్యార్థులు తమ చదువులో పురోగతి సాధించాలని ప్రభుత్వం కోరుకుంటుంది. విద్యార్థి వీసాలు కేవలం వలస రావడానికి కాకుండా, చదువు కోసమే ఉపయోగపడేలా చూడటమే ప్రభుత్వ లక్ష్యం.
Also Read: భారత్‌పై సుంకాల కత్తి.. రష్యా ఆంక్షల బిల్లుకు అమెరికా ఆమోదం

భారతీయ విద్యార్థులపై ప్రభావం

ఆస్ట్రేలియన్ డేటా ప్రకారం, 2026 మొదటి ఐదు నెలల్లో ఆస్ట్రేలియాకు వచ్చిన అంతర్జాతీయ విద్యార్థులలో భారతీయ విద్యార్థులు సుమారు 16 శాతం ఉంది. చైనా (సుమారు 160,000) తర్వాత ఆస్ట్రేలియాకు అత్యధికంగా విద్యార్థులను పంపే రెండో అతిపెద్ద దేశంగా భారత్.(లక్షకు పైగా విద్యార్థులు). అందువల్ల ఆస్ట్రేలియా వలస విధానంలో వస్తున్న ఈ మార్పులు భారతీయ విద్యార్థులపై ప్రభావాన్ని చూపనున్నాయి.

Also Read: అమెరికాకు ఇరాన్ 'కోడ్ 100' అల్టిమేటం.. యుద్ధం ముగించడానికి 7 షరతులు!

కుటుంబాలను తీసుకురావడంలో మార్పులు

కొత్త వీసా మార్పులలో.. అంతర్జాతీయ విద్యార్థులు, గ్రాడ్యుయేట్ వీసా హోల్డర్లు తమ కుటుంబ సభ్యులను ఆస్ట్రేలియాకు తీసుకురావడాన్ని నిరోధించే నిబంధనలు రానున్నాయి. అయితే పీహెచ్‌డీల వంటి ప్రత్యేక కోర్సులు అభ్యసిస్తున్నవారు, కొన్ని పసిఫిక్, ఆసియాన్ దేశాల విద్యార్థులకు దీని నుండి మినహాయింపులు లభించే అవకాశం ఉంది. మొత్తంగా చూస్తే, ఆస్ట్రేలియా ఈ నిబంధనల ద్వారా కేవలం అసలైన విద్యార్థులకు మాత్రమే అవకాశాలు కల్పిస్తూ, వలసల దుర్వినియోగానికి చెక్ పెట్టాలని భావిస్తోంది.

Also Read: రష్యా ఎన్నికల్లో పుతిన్ పార్టీ భారీ విజయం.. 355 స్థానాలతో రికార్డు!