world

Miss World 2027 : మిస్ వరల్డ్ 2027లో పోటీ చేయాలనుకుంటున్నారా? అర్హత, ఎంపిక ప్రక్రియ, ప్రిపరేషన్ వివరాలు ఇవే

Geddam Vijaya Madhuri — Mon, 7 Sep 2026 12:31:36 +0530

Miss World 2027 Eligibility and Selection Process : అత్యంత ఫేమస్ అయిన మిస్ వరల్డ్‌ పోటీలలో పాల్గొనాలని చాలా మంది యువతులు కలలు కంటారు. కానీ ఈ పోటీల్లో ముందుకు సాగడానికి అందమైన ముఖం మాత్రమే సరిపోదు. మీ వ్యక్తిత్వం, ఆత్మవిశ్వాసం, ప్రతిభ, ఆలోచనా విధానం, సమాజం పట్ల మీ దృక్పథం కూడా చాలా కీలకంగా ఉంటాయి. మీరు మిస్ వరల్డ్ వేదికను చేరుకోవాలని కలలు కంటున్నట్లయితే.. మొదటి నుంచే మీ సన్నాహాలను సరైన దిశలో పెట్టుకోవడం చాలా ముఖ్యం. కాబట్టి మిస్ వరల్డ్ 2027కి అర్హత సాధించడానికి మీరు ఏమి చేయాలో ఇప్పుడు తెలుసుకుందాం.

డిజిటల్ ప్లాట్‌ఫారమ్ ద్వారా ప్రవేశం

మిస్ వరల్డ్ పట్ల ఆసక్తి ఉన్న పోటీదారులు.. తమ ప్రొఫైల్‌ను క్రియేట్ చేసుకుని.. పోటీకి తమను తాము పరిచయం చేసుకోవచ్చు. దీని కోసం మిస్ వరల్డ్ యాప్‌లో నమోదు చేసుకోవాలి. ఆ తర్వాత తమ దేశాన్ని ఎంచుకోవడం ద్వారా ప్రొఫైల్ క్రియేట్ అవుతుంది. ప్రొఫైల్‌లో పేరు, ఫోటో, తమ గురించిన అవసరమైన సమాచారాన్ని అందించడంతో పాటు, తమ గుర్తింపు, లక్ష్యాలను స్పష్టంగా ప్రతిబింబించే ఇంట్రో క్రియేట్ చేసుకోవాలి. దీని తర్వాత పోటీదారులు ఒక వీడియో ద్వారా తమ స్టోరీ, విజయాలు, ప్రతిభ, మిస్ వరల్డ్ కావాలనే తమ ఆకాంక్షను ప్రదర్శించే అవకాశం పొందుతారు. దీని ద్వారా నిర్వాహకులకు, ప్రేక్షకులకు మీ గురించి తెలిసే అవకాశం లభిస్తుంది.

Also Read : మిస్ వరల్డ్ 2026 టైటిల్ గెలుచుకున్న జోహెరీ మోలా.. భారత్ నుంచి పోటీ చేసిన నికితా పోర్వాల్‌కు ఎంతవరకు అవకాశం దక్కిందంటే..

జాతీయ అందాల పోటీలో గెలవాలి..

మిస్ వరల్డ్ అంతర్జాతీయ వేదికకు చేరుకోవాలంటే.. ఏ అభ్యర్థి అయినా ముందుగా తమ దేశపు ఎంపిక ప్రక్రియలో ఉత్తీర్ణత సాధించాలి. అంటే భారతదేశం నుంచి మీరు మిస్ వరల్డ్‌లో పాల్గొనడానికి అత్యంత ముఖ్యమైన దశ జాతీయ స్థాయి పోటీ. జాతీయ పోటీలో పాల్గొని.. గెలిస్తేనే మీరు మిస్ వరల్డ్‌లో మీ దేశానికి ప్రాతినిధ్యం వహించగలరు. భారతదేశపు జాతీయ పోటీలో వివిధ రాష్ట్రాల నుంచి అభ్యర్థులు పాల్గొంటారు. జాతీయ ఎంపిక తర్వాత, విజేత మిస్ వరల్డ్‌లో దేశానికి ప్రాతినిధ్యం వహించే హక్కును పొందుతారు.

ఏ విషయాలపై దృష్టి పెట్టాలంటే..

మిస్ వరల్డ్ కోసం సిద్ధమవుతున్నప్పుడు ఆత్మవిశ్వాసం చాలా కీలకం. మంచి కమ్యూనికేషన్ స్కిల్స్, క్రమశిక్షణ, నేర్చుకోవాలనే తపన కూడా అవసరం. మీ ఆలోచనలను సమర్థవంతంగా తెలియజేయగలిగే వ్యక్తిత్వం ఉండాలి. ప్రతిభ కూడా మీ గుర్తింపును బలపరుస్తుంది. నృత్యం, సంగీతం, ప్రసంగ నైపుణ్యం, గేమ్స్, కళలు మిమ్మల్ని ప్రత్యేకంగా నిలబెట్టడంలో సహాయపడతాయని గుర్తించుకోండి.

Also Read : మిస్ వరల్డ్ పోటీల్లో పాల్గొనాలంటే కావాల్సిన అర్హతలివే.. వయసు, హైట్ ఎంత ఉండాలంటే

UK Student Visa Rules: ఇకపై యూకేలో చదువులు మరింత ప్రియం.. విద్యార్థి వీసా నిబంధనల్లో కీలక మార్పులు!

Satyaprasad Bandaru — Sun, 6 Sep 2026 14:24:36 +0530

UK Student Visa Rules: యూకేలో ఉన్నత చదువులు చదవాలనుకునే భారతీయ విద్యార్థులకు బ్రిటన్ ప్రభుత్వం బిగ్ షాక్ ఇచ్చింది. నవంబర్ 30, 2026 నుండి అమల్లోకి వచ్చేలా యూకే స్టూడెంట్ వీసా నిబంధనలలో కీలక మార్పులను యూకే హోమ్ ఆఫీస్ ప్రకటించింది. ఈ కొత్త విదేశాంగ విధానం ప్రకారం.. అంతర్జాతీయ విద్యార్థులు వీసా పొందేందుకు తమ వద్ద ఉన్నట్లు చూపించాల్సిన మెయింటనెన్స్ ఫండ్స్‌ మొత్తాన్ని పెంచారు. ఈ నిర్ణయం వల్ల విదేశీ విద్యార్థులపై అదనపు ఆర్థిక భారం పడనుంది.

పెరిగిన మెయింటనెన్స్ ఫండ్స్

విద్యార్థులు తమ కాలేజీ ట్యూషన్ ఫీజులు, వీసా ఫీజులు, హెల్త్ సర్‌ఛార్జీలతో సంబంధం లేకుండా ఈ నిర్వహణ నిధులను బ్యాంకు ఖాతాల్లో చూపించాల్సి ఉంటుంది. కోర్సు చదివే కాలన్ని బట్టి గరిష్టంగా 9 నెలల జీవన వ్యయాలను నిరూపించాలి.

Also Read: విదేశాల్లో చదువులకు తెలంగాణ సర్కార్ సాయం.. బీసీ, ఈబీసీ విద్యార్థులకు రూ.20 లక్షల వరకు స్కాలర్ షిప్!.. పూర్తి వివరాలు ఇవే!

లండన్‌లో చదివే విద్యార్థులకు ప్రస్తుతం నెలకు సుమారు రూ.1.95 లక్షలు మెయింటనెన్స్ ఫండ్స్ ఉండగా, నవంబర్ 30 నుంచి ఇది సుమారు రూ.2.01 లక్షలు పెరగనుంది. దీని ప్రకారం 9 నెలల కాలానికి గరిష్టంగా రూ.18.06 లక్షలు నిధులు అకౌంట్‌లో చూపించాలి. లండన్ బయట చదివే విద్యార్థులకు ప్రస్తుతం నెలకు రూ.1.49 లక్షలు ఉండగా, నవంబర్ 30 నుండి రూ.1.53 లక్షలకు పెరిగింది. దీనితో 9 నెలల కాలానికి మొత్తం రూ.14 లక్షలు అకౌంట్‌లో చూపించాలి.

Also Read: నీట్ పీజీ ఎగ్జామ్, మారథాన్ నిర్వహణ.. నేడు హైదరాబాద్‌లో ట్రాఫిక్ ఆంక్షలు

నవంబర్ 30 నుంచి

నవంబర్ 29, 2026 లోపు దరఖాస్తు చేసుకునే విద్యార్థులకు పాత నిబంధనలే వర్తిస్తాయి. నవంబర్ 30 లేదా ఆ తర్వాత దరఖాస్తు చేసుకునే వీసాలకు మాత్రమే ఈ కొత్త ఫండ్ నిబంధనలు అమలవుతాయి. యూకేలోని స్థానిక విద్యార్థుల రుణాలు, పెరుగుతున్న ద్రవ్యోల్బణానికి అనుగుణంగా ప్రతీ ఏటా ఈ సమీక్ష చేస్తారని, విదేశీ విద్యార్థుల విసా నిబంధనలు దుర్వినియోగం కాకుండా అరికట్టేందుకే ఈ నిర్ణయం తీసుకున్నామని యూకే హోమ్ ఆఫీస్ స్పష్టం చేసింది.

Also Read: మద్యం మత్తులో నీట్ ఎగ్జామ్ రాసేందుకు వెళ్లిన విద్యార్థి.. వెనక్కి పంపిన సిబ్బంది

Iran Attacked America War Ships: హర్మూజ్ జలసంధిలో మరోసారి రణరంగం.. అమెరికా యుద్ధనౌకలపై ఇరాన్ క్షిపణి దాడులు!

Satyaprasad Bandaru — Sun, 6 Sep 2026 12:19:46 +0530

Iran Attacked America War Ships: అమెరికా, ఇరాన్‌ల మధ్య యుద్ధ వాతావరణం మరింత తీవ్రరూపం దాల్చింది. పర్షియన్ గల్ఫ్‌లోని కీలకమైన హోర్ముజ్ జలసంధి కేంద్రంగా ఇరు దేశాలు మరోసారి పరస్పర దాడులకు తెగబడ్డాయి. అమెరికాకు చెందిన రెండు యుద్ధం నౌకలపై ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) బాలిస్టిక్ క్షిపణులతో విరుచుకుపడింది. హోర్ముజ్ జలసంధిలో ఇరాన్ చమురు ట్యాంకర్లను అడ్డుకుంటున్నందుకే ఈ ప్రతిదాడి చేసినట్లు ఐఆర్జీసీ ప్రకటించింది. ఈ దాడుల్లో అమెరికా నౌకలు తీవ్రంగా దెబ్బతిని, ప్రాంతాన్ని విడిచి వెళ్లాయని ఇరాన్ ప్రకటించింది.

మరింత విరుచుకుపడిన అమెరికా

ఇరాన్ క్షిపణి దాడులకు ప్రతిదాడిగా అమెరికా సెంట్రల్ కమాండ్ తీవ్రస్థాయిలో దాడులు చేసింది. ఇరాన్ ప్రధాన చమురు ఎగుమతి కేంద్రమైన 'ఖార్గ్ ద్వీపం' సమీపంలోని నౌకతో సహా మొత్తం మూడు ఇరాన్ చమురు రవాణా నౌకలను అమెరికా దళాలు ధ్వంసం చేశాయి. అమెరికా సెంట్రల్ కమాండ్ అధిపతి అడ్మిరల్ బ్రాడ్ కూపర్ ఇరాన్‌కు స్పష్టమైన హెచ్చరికలు జారీ చేశారు. "మీరు మా రెండు నౌకలపై కాల్పులు జరిపితే, మేము మీ మూడు నౌకలను ధ్వంసం చేసి, ఊహించని ఆర్థిక నష్టాన్ని చేశామని" అని ఆయన అన్నారు. ఈ ఘటనల్లో అమెరికన్ సిబ్బందికి ఎలాంటి హాని జరగలేదని స్పష్టం చేశారు.

చమురు నౌకలకు ఇరాన్ హెచ్చరికలు

అమెరికా దాడుల అనంతరం ఇరాన్ ప్రభుత్వ టెలివిజన్ వేదికగా ఐఆర్‌జీసీ కీలక హెచ్చరికలు చేసింది. ఉగ్రవాద అమెరికా సైన్యం మాటలు నమ్మి అనధికారికంగా హర్మూజ్ మార్గంలో అనుమానాస్పదంగా ప్రయాణించే నౌకలను లక్ష్యంగా చేసుకుంటామని హెచ్చరించింది. ఖార్గ్ ఓడరేవు వద్ద తమ ట్యాంకర్‌పై అమెరికా నాలుగు క్షిపణులను ప్రయోగించినప్పటికీ, సిబ్బంది సురక్షితంగా ఉన్నారని ఇరాన్ వార్తా సంస్థ తస్నిమ్ తెలిపింది.

Also Read: నేపాల్ వరదల్లో 275 మంది భారత పౌరులు గల్లంతు.. విదేశాంగ మంత్రిత్వ శాఖ కీలక ప్రకటన

ఉద్రిక్తతలకు కేంద్రంగా 'ఖార్గ్ ద్వీపం'

ఫిబ్రవరిలో ప్రారంభమైన అమెరికా సైనిక ఘర్షణల్లో ఇరాన్ చమురు ఎగుమతులకు కేంద్రమైన 'ఖార్గ్ ద్వీపం' ఇప్పుడు వివాదాస్పద ప్రాంతంగా మారింది. యుద్ధానికి ముందు ఇరాన్ తన 90% ముడి చమురును ఈ ద్వీపం ద్వారానే ఎగుమతి చేసేది. ఇరాన్‌పై ఆర్థిక ఒత్తిడి పెంచేందుకు ట్రంప్ ప్రభుత్వం విధిస్తున్న ఆంక్షలు, సైనిక చర్యల వ్యూహాలు ప్రపంచ దృష్టిని ఆకర్షిస్తున్నాయి.

Also Read: సెప్టెంబర్ 9వ తేదీ లోపు ఇరాన్‌పై దాడి? 6, 8 తేదీలు ఎందుకు అత్యంత సున్నితమైనవి?

చమురు ధరలు పైపైకి

ప్రపంచ చమురు సరఫరాలో ఐదో వంతు జరిగే హర్మూజ్ జలసంధిలో యుద్ధ వాతావరణం నెలకొనడంతో అంతర్జాతీయ ఇంధన మార్కెట్లు తీవ్ర ఒత్తిడికి లోనవుతున్నాయి. దాడుల కారణంగా బ్రెంట్ క్రూడ్ ఫ్యూచర్స్ ధర బ్యారెల్‌కు 96.28 డాలర్లకు చేరి, ఆందోళన కలిగిస్తోంది.

Also Read: యూఎస్ బర్త్ రైట్ సిటిజన్‌షిప్.. డొనాల్డ్ ట్రంప్‌నకు షాకిచ్చిన కోర్టు

Miss World 2026 Winner : మిస్ వరల్డ్ 2026 టైటిల్ గెలుచుకున్న జోహెరీ మోలా.. భారత్ నుంచి పోటీ చేసిన నికితా పోర్వాల్‌కు ఎంతవరకు అవకాశం దక్కిందంటే..

Geddam Vijaya Madhuri — Sun, 6 Sep 2026 10:03:22 +0530

Dominican Republic Beauty Joheirry Mola Crowned Miss World : వియత్నాంలోని న్హా ట్రాంగ్‌లో జరిగిన గ్రాండ్ ఫైనల్‌లో డొమినికన్ రిపబ్లిక్‌కు చెందిన జోహెరీ మోలా మిస్ వరల్డ్ 2026 కిరీటాన్ని కైవసం చేసుకుంది. శనివారం జరిగిన గ్రాండ్ ఫైనల్‌లో పోటీపడిన ఆరుగురు ఫైనల్స్‌లో.. డొమినికన్ రిపబ్లిక్‌కు చెందిన జోహెరీ మోలా మిస్ వరల్డ్ 2026 ప్రతిష్టాత్మక టైటిల్‌ను కైవసం చేసుకుంది. మలేషియా, దక్షిణాఫ్రికా, స్పెయిన్, వియత్నాం, ఎరిట్రియా దేశాలకు ప్రాతినిధ్యం వహించిన పోటీదారులతో పాటు తుది దశకు చేరుకున్న మోలా ఈ ప్రతిష్టాత్మక కిరీటాన్ని దక్కించుకుంది.

View this post on Instagram

ఈ ఈవెంట్లో థాయ్‌లాండ్‌కు చెందిన మాజీ మిస్ వరల్డ్ ఓపల్ సుచాటా చువాంగ్‌శ్రీ కూడా తిరిగి అందరి దృష్టిని ఆకర్షించారు. ఆమె ఫైనల్‌కు హాజరై.. మిస్ వరల్డ్గా నిలిచిన జోహెరీ మోలాకు కిరీటం పెట్టి.. టైటిల్‌ను అధికారికంగా అప్పగించారు. పోటీల తుది రౌండ్ల తర్వాత స్పెయిన్‌కు చెందిన ఎలిసబెత్ రేనెస్ అలబెర్న్ మొదటి రన్నరప్‌గా నిలవగా.. మలేషియాకు చెందిన తానుసియా చెట్టి రెండవ రన్నరప్‌గా ఎంపికయ్యారు.

Also Read : మిస్ వరల్డ్ టైటిల్ గెలుచుకున్న ఇండియన్ భామలు వీరే.. ఇప్పుడు చూపంతా నందిని గుప్తా పైనే

ఇండియా నుంచి ఎవరు పోటీ చేశారంటే..

ఇండియా నుంచి 73వ మిస్ వరల్డ్ కాంపిటేషన్ కోసం నికితా పోర్వాల్ ట్రై చేశారు. టాప్ 40 కంటెస్టెంట్లలో నిలిచిన నికితా పోర్వాల్.. అప్పుడే పోటీ నుంచి నిష్క్రమించారు. దీంతో 73వ మిస్ వరల్డ్‌లో భారతదేశ ప్రయాణం ముగిసింది. ఫైనల్ ఈవెంట్లో అటెండ్ అయినా నికితా పోర్వాల్ ఒక శిల్పంలా అందమైన కార్సెట్‌ను ధరించి మిస్ వరల్డ్ వేదికపై కనిపించారు.

Also Read : మిస్ వరల్డ్ పోటీల్లో ఇండియాను రిప్రెజెంట్ చేస్తోన్న నందిని గుప్తా.. ఆమె గురించి ఈ విషయాలు తెలుసా?

నికితా పోర్వాల్ ప్రయాణాన్ని సమీక్షిస్తూ.. అధికారిక మిస్ ఇండియా సోషల్ మీడియా హ్యాండిల్ ఇలా పేర్కొంది. @nikitaporwal_ concludes her 73rd Miss World journey among the Top 40, continuing India’s remarkable streak of placing at eight consecutive editions of Miss World. 👑✨” అంటూ రాసుకొచ్చారు.

అంతర్జాతీయ వేదికపై భారతదేశానికి ప్రాతినిధ్యం వహించినందుకు ఆ సంస్థ పోర్వాల్‌ను ప్రశంసిస్తూ.. “Nikita, you carried India with grace, conviction and heart on one of the world’s biggest stages. From every moment you gave us to every cheer you brought home — thank you for representing us so beautifully” అని పేర్కొంది.

Indians Missing In Nepal Floods: నేపాల్ వరదల్లో 275 మంది భారత పౌరులు గల్లంతు.. విదేశాంగ మంత్రిత్వ శాఖ కీలక ప్రకటన

Shankar Dukanam — Sat, 5 Sep 2026 11:30:55 +0530

న్యూఢిల్లీ: కొన్ని రోజుల కిందట నేపాల్‌లో సంభవించిన వరదలు భారీగా ప్రాణ, ఆస్తి నష్టాన్ని మిగిల్చాయి. వరదల తరువాత గత పదిరోజులుగా అక్కడ సహాయ, రక్షణ చర్యలు నిరంతరం కొనసాగుతున్నాయి. నేపాల్ వరదల్లో ఇప్పటివరకు దాదాపు 1300 వందల మంది మరణించారు. 275 మంది భారత పౌరులు ఈ వరదల్లో గల్లంతయ్యారని భారత విదేశాంగ మంత్రిత్వ శాఖ తెలిపింది. వరదల తరువాత దాదాపు 166 మందిని రక్షించారు. అయితే గల్లంతైన వారి ఆచూకీ ఇంకా తెలియరావడం లేదన్నారు. మరో 1,907 మంది భారత పౌరులు చైనా నుంచి సురక్షితంగా బయటపడి నేపాల్‌కు చేరుకున్నారు.

విదేశాంగ మంత్రిత్వ శాఖ ప్రతినిధి తెలిపిన వివరాలివే..

న్యూస్ ఏజెన్సీ PTI నివేదిక ప్రకారం, విదేశాంగ మంత్రిత్వ శాఖ ప్రతినిధి రణధీర్ జైస్వాల్ శుక్రవారం నాడు మీడియాతో మాట్లాడుతూ.. ‘నేపాల్ అధికారుల ప్రకారం, వరదల్లో మరణించిన వారి సంఖ్య శుక్రవారం నాటికి 1,295కి చేరుకుంది. రక్షణ సిబ్బంది ప్రభావిత ప్రాంతాల నుంచి మరికొన్ని మృతదేహాలను వెలికితీశారు. ఎమర్జెన్సీ బృందాలు 12 వేల మందిని సకాలంలో రక్షించాయి. నేపాల్ సహా విదేశీ పౌరులు మొత్తం కలిపి వరదల తరువాత దాదాపు 5,000 మంది ఆచూకీ లభించలేదు. అక్కడ ఇంకా సహాయక చర్యలు కొనసాగుతున్నాయి’ అని తెలిపారు.

టిబెట్‌లో ఏ భారత పౌరుడు చిక్కుకుపోలేదు- జైస్వాల్

Delhi: MEA Spokesperson Randhir Jaiswal says, "The figures we currently have show that 275 Indian citizens are missing. Since this is a dynamic situation, the numbers may fluctuate slightly as new information comes in. Of these 275 individuals, 49 are listed as missing in China,… pic.twitter.com/MHVeZ5tQ0Y
— IANS (@ians_india) September 4, 2026

రణధీర్ జైస్వాల్ ఇంకా మాట్లాడుతూ, ‘మాతో ఉన్న సమాచారం ప్రకారం, 275 మంది భారత పౌరులు గల్లంతయ్యారు. మేం నేపాల్ ప్రభుత్వంతో నిరంతరం సంప్రదింపులు కొనసాగిస్తున్నాం. నేపాల్ అధికారుల ప్రయత్నాలను మేం అభినందిస్తున్నాం. ఇప్పటివరకు 166 మంది భారత పౌరులను రక్షించాం. చైనా అధికారిక వర్గాల ప్రకారం చైనాలోని టిబెట్ ప్రాంతంలో ఇప్పుడు ఏ భారత పౌరుడూ చిక్కుకుపోలేదని’ తెలిపారు.

నేపాల్‌కు వరద సహాయ సామగ్రితో విమానాలు పంపిన భారత్

భారత ప్రభుత్వం ఆపద సమయంలో నేపాల్‌ను ఆదుకుందని విదేశాంగ మంత్రిత్వ శాఖ ప్రతినిధి రణధీర్ జైస్వాల్ తెలిపారు. ‘గత నెల ఆగస్టు 26న నేపాల్‌లో బోటేకోశి నదికి వచ్చిన వరదల తర్వాత ఇప్పటివరకు భారత్ 7 విమానాల ద్వారా దాదాపు 95 టన్నుల సహాయ సామగ్రిని నేపాల్‌కు పంపింది. అదనంగా, సహాయ, రక్షణ చర్యల్లో సహాయం కోసం 54 మంది సిబ్బందిని సైతం నేపాల్‌కు పంపాం. వీరిలో 30 మంది టన్నెల్ రక్షణ నిపుణులు, 19 మంది ఫోరెన్సిక్ నిపుణులు, ఐదుగురు సభ్యుల మెడికల్ టీం ఉందని’ వెల్లడించారు.

‘నేపాల్ ప్రభుత్వం అవసరాల ప్రకారం భారత్ సహాయం అందిస్తూనే ఉంటుంది. ప్రస్తుతం భారత్ ఫోరెన్సిక్ కిట్లు, బేలీ బ్రిడ్జ్, అలాగే నేపాల్ ప్రభుత్వం కోరిన ఇతర సామగ్రిని పంపేందుకు ఏర్పాట్లు చేస్తుంది. భారత రక్షణ, ఫోరెన్సిక్ బృందాలు అక్కడే మోహరించి, నేపాల్ అధికారులతో కలిసి సహాయక చర్యలు చేపట్టాయని’ వివరించారు.

Iran War: సెప్టెంబర్ 9వ తేదీ లోపు ఇరాన్‌పై దాడి? 6, 8 తేదీలు ఎందుకు అత్యంత సున్నితమైనవి?

RAMA — Sat, 5 Sep 2026 06:00:19 +0530

Iran War: ఇరాన్‌పై పునఃప్రారంభించిన సైనిక చర్య ఎక్కువ కాలం కొనసాగదని అమెరికా అధ్యక్షుడు డొనాల్డ్ ట్రంప్ అంటున్నారు. అయితే, అవసరమైతే అమెరికా మళ్లీ దాడి చేయవచ్చని ఆయన హెచ్చరిక కూడా జారీ చేశారు. ఈ రెండు అంశాలు ఒక అతిపెద్ద ప్రశ్నను లేవనెత్తుతున్నాయి: యుద్ధం చివరికి సద్దుమణుగుతుందా, లేక సెప్టెంబర్ 9వ తేదీ లోపు ఇరాన్‌పై మరో దాడి జరగవచ్చా?

ఇరాన్ జాతకం, వార్షిక అంచనాలు, రాబోయే ఆరు రోజుల పంచాంగాన్ని పరిశీలిస్తే, ప్రమాదం ఇంకా తొలగిపోలేదు. సెప్టెంబర్ 6, 8 తేదీలు ముఖ్యంగా ప్రమాదకరంగా కనిపిస్తున్నాయి. అయితే, దీనిని దాడి కచ్చితంగా జరుగుతుందని చెప్పే అంచనాగా పరిగణించలేము. ఈ తేదీలలో జరిగే ఏ సైనిక చర్య అయినా, ప్రతీకార దాడి అయినా, నౌకకు సంబంధించిన సంఘటన అయినా, లేదా సాంకేతిక వైఫల్యం అయినా ఉద్రిక్తతలను పెంచవచ్చు.

ట్రంప్ ఏం చెప్పారు?

ఇరాన్‌పై అమెరికా చేపట్టిన కొత్త సైనిక చర్య ఎక్కువ కాలం కొనసాగదని సెప్టెంబర్ 2న ట్రంప్ అన్నారు. హోర్ముజ్ సమీపంలో అమెరికా సైన్యం ఇరాన్ రాడార్, క్షిపణి వ్యవస్థలు, సముద్ర మైన్లు అమర్చే పరికరాలను ధ్వంసం చేసిందని ఆయన పేర్కొన్నారు.

అమెరికా ఎప్పుడైనా మరో దాడిని ప్రారంభించవచ్చని ట్రంప్ కూడా పేర్కొన్నారు. దీని అర్థం, సైనిక చర్యను నిలిపివేస్తున్నట్లు అధికారిక ప్రకటన ఏదీ వెలువడలేదు. మరో దాడి జరుగుతుందా లేదా అనేది ఇరాన్ ప్రతిస్పందన ,హోర్ముజ్‌లోని పరిస్థితిపై ఆధారపడి ఉంటుంది.

మరో దాడి జరుగుతుందనే భయం ఎందుకు పెరిగింది?

అమెరికా జరిపిన తాజా దాడులతో ఇరాన్ జోర్డాన్, బహ్రెయిన్, కువైట్, ఇరాక్‌లలోని అమెరికా స్థావరాలు, ప్రయోజనాల వైపు క్షిపణులు, డ్రోన్‌లను ప్రయోగించింది. ఈ దాడులలో పలువురిని గగనతలంలోనే అడ్డుకున్నట్లు ఆ దేశం ప్రకటించింది. అమెరికా దాడుల్లో 18 మంది మరణించారని, 108 మంది గాయపడ్డారని ఇరాన్ పేర్కొంది. హోర్ముజ్ సమీపంలో జరిగిన వివాహ వేడుకపై కూడా దాడి జరిగిందని ఇరాన్ మీడియా నివేదించింది. పౌర మృతిపై వచ్చిన నివేదికలపై దర్యాప్తు చేస్తున్నట్లు అమెరికా తెలిపింది. ఈ సంఘటన పరిస్థితిని మరింత తీవ్రతరం చేసింది. ఇరాన్ తన ప్రతీకార చర్యలను తీవ్రతరం చేస్తే, అమెరికా దీనిని ఒక కొత్త దాడికి ఆధారంగా ఉపయోగించుకోవచ్చు. మరోవైపు, ఇరాన్ మౌనం దాని సొంత దేశంలోనే బలహీనతగా భావించబడవచ్చు.

జాతకంలో దాడికి సంబంధించిన సంకేతం ఎక్కడ నుంచి వస్తోంది?

ఈ విశ్లేషణ ఏప్రిల్ 1, 1979న మధ్యాహ్నం 3:00 గంటలకు వెలువడిన టెహ్రాన్ జాతకంపై ఆధారపడి ఉంది. ఇరాన్ జాతకంలో సింహ రాశి లగ్నంగా ఉంది. ప్రస్తుతం, గురు మహాదశలో రాహువు అంతర్దశ కొనసాగుతోంది. ఈ రాహు దశ జూన్ 10, 2027 వరకు కొనసాగుతుంది. బృహస్పతి చర్చలను, పరిష్కార ప్రయత్నాలను ప్రోత్సహిస్తుంది. రాహువు పరిస్థితిని ఆకస్మికంగా మార్చేస్తాడు. అందుకే యుద్ధాలలో, చర్చలు తరచుగా ఒక రాజీ దిశగా సాగినప్పటికీ, వెంటనే మరో దాడి జరుగుతుంది.

శుక్రుడు ప్రస్తుతం వక్రగతిలో ఉన్నాడు. ఇరాన్ జాతకంలో శుక్రుడు మూడవ , పదవ భావాలకు అధిపతి. మూడవ భావం సైనిక పరాక్రమం, సమాచార ప్రసారం , స్వల్ప-శ్రేణి కార్యకలాపాలతో ముడిపడి ఉంటుంది. పదవ భావం ప్రభుత్వాన్ని సూచిస్తుంది. ఏడవ భావంలో శుక్రుడు కేతువుతో కలిసి ఉన్నాడు. ఏడవ భావం బహిరంగ సంఘర్షణను మరియు ఇతర దేశాలతో ఒప్పందాలను రెండింటినీ సూచిస్తుంది. ఈ పరిస్థితి చర్చలకు మార్గం మూసుకుపోలేదని సూచిస్తోంది. అయితే, ఇరుపక్షాల మధ్య నమ్మకం ఎంత బలహీనంగా ఉందంటే, ఏ చిన్న సంఘటన అయినా ఒప్పందాన్ని మళ్లీ పట్టాలు తప్పించగలదు.

వార్షిక జాతకంలో యుద్ధ భావాలు చురుకుగా ఉన్నాయి

2026 సంవత్సరానికి ఇరాన్ జాతకంలో కూడా సింహరాశి లగ్నంగా ఉంది. జన్మ పట్టిక , వార్షిక జాతకం రెండింటిలోనూ ఒకే లగ్నం ఉండటం వలన ఈ సంవత్సరం అధికారం , జాతీయ గుర్తింపు పరంగా ముఖ్యమైనదిగా నిలుస్తుంది.

జాతకంలో ఏడవ ఇంట్లో కుజుడు, బుధుడు,రాహువు ఉన్నారు. కుజుడు దాడి , ప్రతీకారాన్ని సూచిస్తాడు. రాహువు ఒక సంఘటనను అకస్మాత్తుగా ఒక పెద్ద సంఘటనగా మార్చగలదు. బుధుడు రాడార్, సమాచార ప్రసారం, సమాచారం , సంప్రదింపులతో సంబంధం కలిగి ఉంటాడు. ఈ మూడింటి కలయిక యుద్ధం , సంప్రదింపులు ఏకకాలంలో కొనసాగుతాయని సూచిస్తుంది.

సూర్యుడు, శని ఎనిమిదవ ఇంట్లో ఉన్నారు. ఎనిమిదవ ఇల్లు ఆకస్మిక దాడులు, రహస్య చర్యలు, భారీ నష్టాలు , అధికార సంక్షోభాలను సూచిస్తుంది. ఈ సంవత్సరపు చంద్రుడు పన్నెండవ ఇంట్లో ఉండటం వలన, పెరిగిన యుద్ధ వ్యయం, దిగ్బంధనాలు, విదేశాల నుంచి ఒత్తిడి , జాతీయ వనరుల నష్టాన్ని సూచిస్తుంది.

సెప్టెంబర్ 9వ తేదీ ఎందుకు ముఖ్యమైనది?

ఆగష్టు 26 నుంచి సెప్టెంబర్ 9 వరకు ఇరాన్ జాతకంలో శని ముద్రా దశ కొనసాగుతోంది. శని జాతకంలోని ఎనిమిదవ ఇంట్లో ఉంది. ప్రస్తుత గోచారంలో, వక్రించిన శని కూడా ఇరాన్ జన్మ లగ్నం నుంచి ఎనిమిదవ ఇంట్లో ఉంది. అందువల్ల, ఎనిమిదవ ఇల్లు వార్షిక జాతకం, సమస్యల కాలం గోచారంలో ఏకకాలంలో చురుకుగా ఉంటుంది. ఆగస్టు 30 తర్వాత ప్రారంభమైన అమెరికా, ఇరాన్‌ల మధ్య పునరుద్ధరించిన సైనిక ఘర్షణ కూడా ఈ కాలంలోనే సంభవించింది. కానీ 2026 సెప్టెంబర్ 9 వరకు ప్రతి రోజూ సమానంగా ప్రమాదకరం కాదు. ఇరాన్ జన్మ నక్షత్రమైన రోహిణి నుంచి రాబోయే ఆరు రోజుల నోవా క్రమాన్ని పరిశీలిస్తే, రెండు తేదీలు ప్రత్యేకంగా కనిపిస్తాయి.

సెప్టెంబర్ 6న పరిస్థితులు అకస్మాత్తుగా మారవచ్చు

సెప్టెంబర్ 6వ తేదీన చంద్రుడు ఆర్ద్ర నక్షత్రరాశిలో ఉంటాడు. రోహిణి నుంచి ఆర్ద్ర వరకు కలిసి ఇరాన్‌కు విపత్ నక్షత్రాన్ని ఏర్పరుస్తాయి. విపత్ నక్షత్రం ఆకస్మిక ఇబ్బందులు, తప్పుడు అంచనాలు, ప్రమాదాలు, నష్టాలతో ముడిపడి ఉంటుంది.

ఆర్ద్ర నక్షత్రానికి అధిపతి రాహువు. ఇరాన్ ఇప్పటికే రాహువు అంతర్దశలో ఉంది. వార్షిక జాతకంలోని యుద్ధ స్థానంలో రాహువు కుజుడితో కలిసి ఉన్నాడు. ఫలితంగా, సెప్టెంబర్ 6వ తేదీన రాహువు దశ, వార్షిక జాతకం, నక్షత్రం అనే మూడు స్థాయిలలోనూ చురుకుగా ఉంటాడు. ఈ సమయం క్షిపణి లేదా డ్రోన్ దాడులు, రాడార్ లోపాలు, ఓడపై చర్య లేదా తప్పుడు సమాచారం వల్ల తలెత్తే ఉద్రిక్తతలకు సంబంధించినది కావచ్చు.

సెప్టెంబర్ 8న శత్రు కార్యకలాపాలు

సెప్టెంబర్ 8వ తేదీన చంద్రుడు పుష్య నక్షత్రంలోకి ప్రవేశిస్తాడు. ఇరాన్ జన్మ నక్షత్రమైన రోహిణి, పుష్య ప్రత్యరీ నక్షత్రాన్ని ఏర్పరుస్తుంది. ప్రత్యరీ నక్షత్రం వ్యతిరేకత, అడ్డంకులు , పోటీతో ముడిపడి ఉంటుంది.

శని పుష్య రాశికి అధిపతి. అదే సమయంలో శని ముద్రా దశ ప్రభావంలో ఉంటుంది. గోచార శని అష్టమ భావంలో కూడా ఉన్నాడు. అందువల్ల, సెప్టెంబర్ 8వ తేదీన శని ప్రభావం మూడు స్థాయిలలో చురుకుగా ఉంటుంది.

ఈ రోజున, కొత్త వైమానిక దాడులతో పాటు, దిగ్బంధనం, ఓడను నిలిపివేయడం, సైనిక స్థావరంపై ఒత్తిడి లేదా సుదీర్ఘ ప్రతీకార చర్య వంటి ముప్పు పొంచి ఉండవచ్చు.

సెప్టెంబర్ 9 తర్వాత ఏం మారుతుంది?

శని స్థానంలోకి బుధ ముద్రా దశ సెప్టెంబర్ 9న ప్రారంభమవుతుంది. జాతకంలో బుధుడు ఏడవ ఇంట్లో ఉన్నాడు. దీనివల్ల సంభాషణలు, సందేశాల మార్పిడి, మధ్యవర్తి దేశాల పాత్ర పెరగవచ్చు. అయితే బుధ గ్రహంతో పాటు కుజ, రాహు గ్రహాలు కూడా ఉన్నాయి. అందువల్ల, ఇవి సాధారణ శాంతి చర్చలు కావు. ఇరు పక్షాలు సైనిక ఒత్తిడిని ఉపయోగించి సంప్రదింపులు జరుపుతాయి. ఒక రాజీ ప్రతిపాదన రావచ్చు, కానీ దాని షరతులపై వెంటనే వివాదాలు తలెత్తవచ్చు.

నిజంగా మరో దాడి జరుగుతుందా?

జాతకాలు ఏ సంఘటనకూ 100% హామీ ఇవ్వవు. అయితే, ఇరాన్ వార్షిక జాతకంలో ఏడవ, ఎనిమిదవ మరియు పన్నెండవ భావాలు ఏకకాలంలో చురుకుగా ఉన్నాయి. శని ముద్రా దశ, ఎనిమిదవ భావంలో శని సంచారం మరియు నవతార గణనలు ప్రమాదాన్ని సాధారణం కంటే ఎక్కువగా చేస్తున్నాయి.

సెప్టెంబర్ 6వ తేదీ ఆకస్మిక సైనిక లేదా సాంకేతిక సంఘటనకు అత్యంత అవకాశం ఉన్న రోజు. సెప్టెంబర్ 8వ తేదీ ప్రత్యర్థి పక్షం ద్వారా మరో ప్రధాన చర్య లేదా ఎదురుదాడికి వేదిక కావచ్చు.

సైనిక చర్య ఎక్కువ కాలం కొనసాగదని ట్రంప్ చెబుతున్నప్పటికీ, సెప్టెంబర్ 9వ తేదీకి ముందే యుద్ధం మరో మలుపు తిరగవచ్చు. ఆ తర్వాత కాల్పులు పూర్తిగా ఆగిపోయే అవకాశం లేదు. కానీ, చర్చల కోసం యుద్ధం తిరిగి ప్రారంభమయ్యే అవకాశం మాత్రం ఖచ్చితంగా పెరుగుతుంది.

గమనిక: ఇక్కడ అందించిన సమాచారం కేవలం నమ్మకాలు, అభిప్రాయాలపై మాత్రమే ఆధారపడి ఉంటుంది. ABP దేశం ఏ నమ్మకాలను లేదా సమాచారాన్ని ఆమోదించదని గమనించడం ముఖ్యం . ఏదైనా సమాచారం లేదా అభిప్రాయంపై చర్య తీసుకునే ముందు సంబంధిత నిపుణుడిని సంప్రదించండి.

US Birthright Citizenship: యూఎస్ బర్త్ రైట్ సిటిజన్‌షిప్.. డొనాల్డ్ ట్రంప్‌నకు షాకిచ్చిన కోర్టు

Satyaprasad Bandaru — Thu, 3 Sep 2026 10:06:16 +0530

US Birthright Citizenship: అమెరికా అధ్యక్షుడు డొనాల్డ్ ట్రంప్‌నకు మరోసారి కోర్టులో ఎదురుదెబ్బ తగిలింది. పుట్టుకతో వచ్చే పౌరసత్వంపై పరిమితులు విధిస్తూ ట్రంప్ జారీ చేసిన కార్యనిర్వాహక ఉత్తర్వులను యూఎస్‌ డిస్ట్రిక్ట్ కోర్టు నిలిపివేసింది. విదేశీయుల పిల్లలకు వర్తించే బర్త్ రైట్ సిటిజన్‌షిప్, బర్త్ టూరిజాన్ని నిషేధించాలనే లక్ష్యంతో ఇటీవల ట్రంప్ ఉత్తర్వులపై సంతకాలు చేశారు. అక్రమ వలసదారులు, తాత్కాలిక వీసాలపై వచ్చిన వారి పిల్లలు అమెరికాలో పుడితే.. వారిని దేశ పౌరులుగానే భావించాలని సుప్రీంకోర్టు తీర్పునిచ్చిన సంగతి తెలిసిందే. విదేశీయుల పిల్లలకు పౌరసత్వం నిరాకరించాలనే ట్రంప్ ప్రయత్నాలకు మరోసారి కోర్టు అడ్డుకుంది.

Also Read: నేపాల్ ఆకస్మిక వరదలు.. 1,127 చేరిన మృతుల సంఖ్య.. 4,858 మంది గల్లంతు

బర్త్ టూరిజం లక్ష్యంగా

మేరీల్యాండ్‌లోని గ్రీన్‌బెల్ట్‌లో ఉన్న యూఎస్ డిస్ట్రిక్ట్ జడ్జి డెబోరా బోర్డ్‌మన్ ఈ తాత్కాలిక ఉత్తర్వులు జారీ చేశారు. 2025లో ట్రంప్ తీసుకొచ్చిన ఉత్తర్వులు నిలిపివేస్తున్నట్లు కోర్టు పేర్కొంది. తల్లిదండ్రులు అమెరికన్ పౌరులు లేదా గ్రీన్ కార్డ్ హోల్డర్లు అయిన చట్టబద్ధమైన శాశ్వత నివాసితులు కాని వారి పిల్లలకు పుట్టుకతో వచ్చే పౌరసత్వాన్ని రద్దు చేయడం.. యూఎస్ రాజ్యాంగంలోని 14వ సవరణలోని పౌరసత్వ నిబంధనను ఉల్లంఘిస్తోందని ఈ ఏడాది జూన్ 30న యూఎస్ సుప్రీం కోర్టు తీర్పు ఇచ్చిన సంగతి తెలిసిందే. ఈ నిబంధన ఆసరా చేసుకుని తమ పిల్లలకు అమెరికా పౌరసత్వం వచ్చేలా చేయడానికి, ప్రసవం కోసం మహిళలు యూఎస్ వస్తున్నారని, "బర్త్ టూరిజం"ను లక్ష్యంగా చేసుకుని ట్రంప్ ఆగస్టు 6న మరో ఉత్తర్వుపై సంతకం చేశారు.

యూఎస్‌లో పుట్టిన పిల్లల తల్లిదండ్రులలో ఒకరు విదేశీ ప్రభుత్వాల కోసం పనిచేసినా, పౌరసత్వం పొందడానికి మోసానికి లేదా వాణిజ్య లావాదేవీకి పాల్పడినా వారిని "విదేశీ శత్రువు"గా పరిగణించి పిల్లలకు పౌరసత్వం తిరస్కరించవచ్చని ట్రంప్ ఉత్వర్వుల్లో పేర్కొన్నారు. ట్రంప్ తాజా ఉత్తర్వులను సైతం కోర్టు నిలిపివేస్తూ ఆదేశాలు ఇచ్చింది.

A federal judge just made sure birth tourism stays legal. Fly in on a tourist visa, give birth on US soil, the baby's a citizen.

Trump's Aug 6 order would've ended that. Same order cut off citizenship for kids of foreign government workers and anyone the government tags an… pic.twitter.com/MvgKzF1qIP
— IredcapI (@IredcapI) September 3, 2026

Also Read: యుద్ధం వేళ ఇరాన్ అధ్యక్షుడితో మోదీ కీలక భేటీ- అందరి కళ్లూ వీరిపైనే! ఎందుకింత ప్రాధాన్యం

చట్టాలు ఏం చెబుతున్నాయి?

1868లో ఆమోదించిన 14వ రాజ్యాంగ సవరణ ప్రకారం అమెరికాలో పుట్టేవారందరికీ (అక్రమవలసదారులు లేదా తాత్కాలికంగా ఉంటున్నా వారు) ఆ దేశ పౌరసత్వం లభిస్తుంది. అయితే బర్త్ టూరిజం పేరిట దీనిని దుర్వినియోగం చేస్తున్నారని ట్రంప్ వాదిస్తున్నారు. పుట్టబోయే బిడ్డకు విదేశీ పౌరసత్వం పొందాలనే లక్ష్యంతో ప్రసవం కోసం గర్భిణీలు అమెరికా వస్తున్నారని ఆరోపిస్తున్నారు.

Also Read: జనరల్ జావో జోంగ్కీపై చైనా ప్రభుత్వం వేటు.. గల్వాన్ లోయలో భారత్‌పై దాడికి ఆదేశించడమే కారణమా ?

Nepal Floods: నేపాల్ ఆకస్మిక వరదలు.. 1,127 చేరిన మృతుల సంఖ్య.. 4,858 మంది గల్లంతు

Satyaprasad Bandaru — Wed, 2 Sep 2026 12:07:57 +0530

Nepal Floods: ఆగస్టు 26న నేపాల్‌లో సంభవించిన పెను విపత్తు భారీ విధ్వంసాన్ని సృష్టించింది. ఫ్లాష్ ఫ్లడ్స్ వేలాది మందిని నిరాశ్రయులను చేయగా, వందల ప్రాణాలు బలితీసుకున్నాయి. ఈ హిమాలయ విపత్తు జరిగి దాదాపు వారం రోజులు గడిచినా, ఇంకా వేలాది మంది ఆచూకీ ఇప్పటికీ తెలియలేదు. భద్రతా దళాలు గాలింపు చర్యలు, సహాయక కార్యక్రమాలు కొనసాగిస్తున్నాయి. నేపాల్ పోలీసుల ప్రకారం, బుధవారం నాటికి వరదల వల్ల మరణించిన వారి సంఖ్య 1,127కు చేరింది. మరో 4,858 మంది కోసం ఇంకా గాలింపు చర్యలు కొనసాగుతున్నాయి. భద్రతా దళాలు ఇప్పటివరకు వరద ప్రభావిత ప్రాంతాల నుంచి 6,541 మందిని రక్షించాయి. ఈలోగా, మళ్లీ ఆకస్మిక వరదలు, నదులలో నీటిమట్టాలు పెరిగే అవకాశం ఉందనే హెచ్చరికలు జారీ అవుతున్నాయి.

చిత్వాన్‌లో అత్యధికంగా

ఇప్పటి వరకు చిత్వాన్ నుంచి 348, ఈస్ట్ నవల్పరాసి నుంచి 217, వెస్ట్ నవల్పరాసి నుంచి 190, నువాకోట్ నుంచి 155 మృతదేహాలను వెలికితీశారు. గోర్ఖా 66, ధాడింగ్ 59, రసువా 45, తనాహున్ ప్రాంతంలో 38 మృతదేహాలను వెలికితీశారు. ఇప్పటి వరకూ 1,113 మృతదేహాలకు పోస్ట్‌మార్టం, గుర్తింపు ప్రక్రియలు పూర్తయ్యాయని, 95 మృతదేహాలను వారి కుటుంబాలకు అప్పగించినట్లు పోలీసులు తెలిపారు. ఇంకా గుర్తించని 911 మృతదేహాల వివరాలను పోలీసులు వెబ్‌సైట్‌లో అప్‌లోడ్ చేశారు.

6,541 మంది సురక్షితంగా

భద్రతా బలగాలు ఇప్పటివరకు వరద ప్రభావిత ప్రాంతాల నుండి 6,541 మందిని రక్షించాయి. అయితే, ఇంకా 4,858 మంది వివరాలు తెలియాల్సి ఉంది. వారి కోసం గాలింపు చర్యలు కొనసాగుతున్నాయి. వరద ప్రభావిత ప్రాంతాల్లో 7,912 మంది సహాయక సిబ్బందిని మోహరించారు. ఈ సిబ్బంది గాలింపు, సహాయక చర్యలు, సహాయ సామాగ్రి పంపిణీ, మృతదేహాల వెలికితీతలో నిమగ్నమై ఉన్నారు. అధిక నష్టం జరిగిన ప్రాంతాలలో చిక్కుకున్న కుటుంబాలను సురక్షిత ప్రాంతాలకు తరలించడం, శిథిలాలతో మూసుకుపోయిన రహదారులను క్లియర్ చేయడం, గాలింపు, సహాయక చర్యలను పోలీసులు, భద్రతా బృందాలు కొనసాగిస్తున్నాయి.

మహా ఉపద్రవం

ఆగస్టు 26న నేపాల్-టిబెట్ సరిహద్దులో భారీ గ్లేషియర్ విరిగి పడిన కారణంగా ఆకస్మిక వరద సంభవించింది. ఈ విపత్తు ఉత్తర, మధ్య నేపాల్‌లోని అనేక పట్టణాలు, గ్రామాలలో తీవ్ర విధ్వంసం సృష్టించింది. ఈ వరదల్లో పెద్ద సంఖ్యలో ప్రజలు గల్లంతు అయ్యారు. అనేక ప్రాంతాలలో రోడ్లు, వంతెనలతో సహా కీలకమైన మౌలిక సదుపాయాలు తీవ్రంగా దెబ్బతిన్నాయి.

భారత రెస్క్యూ బృందం ఆపరేషన్

భారతదేశానికి చెందిన ప్రత్యేక సొరంగ సహాయక బృందం రెండు జలవిద్యుత్ ప్రాజెక్టుల వద్ద రెస్క్యూ ఆపరేషన్ విజయవంతంగా నిర్వహించిందని నేపాల్‌లోని భారత రాయబారి నవీన్ శ్రీవాస్తవ.. 'ఎక్స్'లో పోస్టు చేశారు. చిలిమేలోని ఒక టన్నెల్‌లో ఆపరేషన్ విజయవంతం అయిందని తెలిపారు. అలాగే లాంగ్‌టాంగ్‌లో 185 మీటర్ల లోతు వరకు గాలింపు కొనసాగుతోందని ఆయన తెలిపారు. ప్రభావిత ప్రాంతాల్లో భారత బృందాలు సొరంగ సహాయక చర్యలలో నిమగ్నమై ఉన్నాయని, చిక్కుకుపోయిన వారిని రక్షిస్తున్నారని తెలిపారు.

మళ్లీ ఆకస్మిక వరదలు

నేపాల్‌ అధికారులు మంగళవారం.. తూర్పు, మధ్య, పశ్చిమ ప్రాంతాల్లోని పలు జిల్లాలకు వరద హెచ్చరికలు జారీ చేశారు. నదులు, వాగుల సమీపంలో ప్రజలు అప్రమత్తంగా ఉండాలని, అవసరమైన ముందుజాగ్రత్తలు తీసుకోవాలని కోరారు. నువాకోట్, రసువా జిల్లాల్లో ఆకస్మిక వరదలు సంభవించే అవకాశం ఎక్కువగా ఉందని వాతావరణ శాఖ ప్రకటించింది. ఈ ప్రాంతాల్లోని చిన్న నదులు, వాగులలో నీటి ప్రవాహం పెరిగే అవకాశం ఉందని వెల్లడించింది.

Also Read: నేపాల్ వరద భాదితులకు సద్గురు రూ.1 కోటి విరాళం, 5 దేశాలతో హిమాలయ బోర్డు ఏర్పాటుకు పిలుపు

21 వేల భద్రతా సిబ్బంది

నేపాల్ ప్రభుత్వం.. బాధితుల గాలింపు, సహాయక చర్యల కోసం 21,000 మందికి పైగా భద్రతా సిబ్బందిని మోహరించింది. ప్రభావిత ప్రాంతాలలో చిక్కుకున్న ప్రజలను తరలించడానికి, సహాయ సామాగ్రిని అందించడానికి హెలికాప్టర్లను రంగంలోకి దించింది. మారుమూల, పర్వత ప్రాంతాలకు చేరుకోవడం, వరద నీరు, శిథిలాలలో చిక్కుకున్న వారిని వెతకడం కోసం భద్రతా దళాలు, సహాయక బృందాలకు పెద్ద సవాలుగా మారింది.

Also Read: నేపాల్ వరద: 626 మంది మృతి.. ఇంకా 2400 మంది గల్లంతు.. కొనసాగుతున్న రెస్క్యూ ఆపరేషన్

19 వంతెనలు, రహదారులు ధ్వంసం

ఇటీవల వరదలకు నేపాల్ లో రోడ్డు, వంతెనల వ్యవస్థకు తీవ్రంగా నష్టపోయింది. అనేక జాతీయ రహదారులు, ప్రధాన మార్గాలతో పాటు 19 వంతెనలు కొట్టుకుపోయాయి. ఈ వంతెనలలో ఒకటి నేపాల్, చైనాల మధ్య ఉన్న ప్రధాన వాణిజ్య మార్గం కూడా ఉంది. ఇరు దేశాలను కలిపే రసువాగఢి సరిహద్దు కూడా ప్రభావితమైంది. వరదల అనంతరం నేపాల్‌లో సహాయక, రెస్క్యూ చర్యలు కొనసాగుతున్నాయి. గల్లంతైన వారి కోసం గాలింపు కొనసాగుతుండగా, కొత్త ప్రాంతాలకు వరద ముప్పు పొంచి ఉండటంతో ప్రభుత్వం, భద్రతా దళాలను అప్రమత్తం చేశారు.

Also Read: నేపాల్-చైనా సరిహద్దుల్లో భూకంపం! పొంచి ఉన్న వరద ముప్పు!

Sadhguru Donation to Nepal: నేపాల్ వరద భాదితులకు సద్గురు రూ.1 కోటి విరాళం, 5 దేశాలతో హిమాలయ బోర్డు ఏర్పాటుకు పిలుపు

Shankar Dukanam — Tue, 1 Sep 2026 11:42:16 +0530

Sadhguru Proposes 5 Nation Himalayan Board | నేపాల్-టిబెట్ సరిహద్దులో ఇటీవల సంభవించిన ఆకస్మిక వరదల నేపథ్యంలో ఈశా ఫౌండేషన్ వ్యవస్థాపకులు సద్గురు ఖాట్మండులో నిర్వహించిన "ఇన్ సాలిడారిటీ విత్ నేపాల్" కార్యక్రమంలో కీలక వ్యాఖ్యలు చేశారు. ఈ సున్నితమైన ప్రాంతంలో సంభవించే ప్రమాదకర విపత్తులను నియంత్రించేందుకు, ముందస్తు చర్యలు చేపట్టేందుకు హిమాలయ పర్వత వ్యవస్థ విస్తరించి ఉన్న దేశాల మధ్య అత్యున్నత స్థాయి సహకారం అవసరమన్నారు.

నేపాల్‌లో ఏర్పడిన అత్యవసర పరిస్థితిలో ఆ ప్రజలను ఆదుకోవడానికి నేపాల్ ప్రధానమంత్రి విపత్తు సహాయ నిధికి ఆయన ₹1 కోటి రూపాయల విరాళాన్ని ప్రకటించారు. ఈ విపత్తులో వేల మంది గల్లంతు కాగా, సరిహద్దులోని చైనా వైపు ఉన్న గైరాంగ్ ఇమ్మిగ్రేషన్ కేంద్రం వద్ద ఉన్న ఈశా సేక్రెడ్ వాక్స్ కైలాష్ యాత్రకు చెందిన 77 మంది యాత్రికులతో పాటు, నేపాల్ వైపు ఉన్న ముగ్గురు ఈశా వాలంటీర్ల ఆచూకీ దొరకకపోవడంతో సద్గురు ఆవేదన వ్యక్తం చేశారు.

ఈ రకమైన ప్రాంతీయ విపత్తులను సమర్థవంతంగా నివారించడానికి భారత్, చైనా, పాకిస్తాన్, నేపాల్, భూటాన్ దేశ భాగస్వామ్యంతో కూడిన 5 దేశాల హిమాలయ బోర్డును అత్యవసరంగా ఏర్పాటు చేయాలని సద్గురు ప్రతిపాదించారు. పర్వతాలకు మరియు ప్రకృతి శక్తులకు మానవులు సృష్టించుకున్న రాజకీయ సరిహద్దులు, భాషలు లేదా పాలనా పద్ధతులతో సంబంధం ఉండదని ఆయన పేర్కొన్నారు. హిమాలయాలు భూమిపై అత్యంత అద్భుతమైనవే కాకుండా, అంతే సున్నితమైన ప్రకృతి సంపద కాబట్టి, అన్ని దేశాలు రాజకీయాలకు అతీతంగా అంతా ఒకే వేదికపైకి రావాలని పిలుపునిచ్చారు. భవిష్యత్ తరాల శ్రేయస్సు కోసం ఈ పర్వత శ్రేణులను కాపాడుకోవాల్సిన బాధ్యత అందరిపైనా ఉందన్నారు. ఇది కేవలం నేపాల్ సమస్య, వారి సమస్యలను వాళ్లే చూసుకుంటారని ఉపేక్షిస్తే ఈ విపత్తులకు సరైన పరిష్కారం ఎప్పటికీ లభించదని స్పష్టం చేశారు.

ఈ 3న కాలభైరవ కర్మ నిర్వహణ

విశాఖ లేదా హిమానీనదం అత్యంత ఎత్తైన మంచు శిఖరం నుండి వేల అడుగుల కిందకు పడిపోవడం అనేది ఎవరూ అంచనా వేయలేదన్నారు. సంక్లిష్ట ప్రకృతి ఇలాంటి భారీ విపత్తులను నేపాల్ వంటి చిన్న దేశం ఒక్కటే సొంతంగా ఎదుర్కోలేదని సద్గురు తెలిపారు. అందువల్ల ప్రతి ఒక్కరూ మానవతా దృక్పథంతో బాధితులకు బాసటగా నిలవాలని కోరారు. ఈ ప్రమాదానికి ఎలాంటి "దైవిక కారణాలు" లేదా "మార్మిక కోణాలు" ఆపాదించవద్దని ప్రజలకు ఆయన విజ్ఞప్తి చేశారు. భౌతిక నియమాలకు లోబడి జరిగే ప్రకృతి పరిణామాలను దేవుడి లీలగా అభివర్ణిస్తే, అది బాధితులు అనుభవిస్తున్న మానసిక వేదనను చిన్నచూపు చూడటమే అవుతుందని హెచ్చరించారు. ఈ దురదృష్టకర సంఘటనలో ప్రాణాలు కోల్పోయిన వారి ఆత్మశాంతికి, వారి సద్గతి కోసం సెప్టెంబర్ 3న కోయంబత్తూరులోని ఈశా యోగ కేంద్రంలో 'కాలభైరవ కర్మ' విధానాన్ని నిర్వహిస్తున్నట్లు సద్గురు వెల్లడించారు.

PM Modi Pezeshkian Meeting: యుద్ధం వేళ ఇరాన్ అధ్యక్షుడితో మోదీ కీలక భేటీ- అందరి కళ్లూ వీరిపైనే! ఎందుకింత ప్రాధాన్యం

Shankar Dukanam — Mon, 31 Aug 2026 17:17:37 +0530

ఉజ్బెకిస్తాన్ పర్యటన తర్వాత కిర్గిజిస్తాన్ రాజధాని బిష్కెక్‌కు చేరుకున్న భారత ప్రధాని నరేంద్ర మోదీ సోమవారం షాంఘై సహకార సంస్థ (SCO) శిఖరాగ్ర సదస్సుకు హాజరయ్యారు. గత కొన్ని నెలలుగా యుద్ధం కారణంగా సంక్షోభంలో ఉన్న ఇరాన్ అధ్యక్షుడు మసూద్ పెజేశ్కియాన్‌ను కలిశారు. ఈ ద్వైపాక్షిక భేటీని అత్యంత కీలకమైనదిగా భావిస్తున్నారు. ఫిబ్రవరిలో ఇరాన్, అమెరికాల మధ్య యుద్ధం ప్రారంభమైన తర్వాత ఇరువురు నేతల మధ్య ఇది తొలి భేటీ కావడంతో ప్రాధాన్యత సంతరించుకుంది..

'బిష్కెక్‌లో ఇరాన్ అధ్యక్షుడు మసూద్ పెజేశ్కియాన్‌ను కలిశాను. వివిధ రంగాల్లో ఇరాన్‌తో భారత్‌కు ఉన్న స్నేహాన్ని మరింత బలోపేతం చేయాలనే మా సంకల్పాన్ని స్పష్టం చేశాం. రాబోయే రోజుల్లో మా వాణిజ్య పరిధిని విస్తరించి, దాన్ని మరింత మెరుగుపరచాలని కోరుకుంటున్నాం. ప్రాంతంలోని ప్రస్తుత పరిస్థితిపై చర్చించాం. స్థిరమైన శాంతిని నిర్ధారించేందుకు జరుగుతున్న అన్ని ప్రయత్నాలకు భారత్ మద్దతు కొనసాగిస్తుంది' అని PM మోదీ ఎక్స్‌లో పోస్ట్ చేశారు.

Met President Masoud Pezeshkian in Bishkek. Reiterated our commitment to strengthening India’s long standing friendship with Iran across diverse sectors. We want to expand and diversify our trade basket in the times to come.

We had a discussion on the prevailing situation in… pic.twitter.com/qagQy5o108
— Narendra Modi (@narendramodi) August 31, 2026

భేటీ తర్వాత ఇరాన్ దౌత్య కార్యాలయం ప్రకటన విడుదల

ఇస్లామిక్ రిపబ్లిక్ ఆఫ్ ఇరాన్ అధ్యక్షుడు డా. మసూద్ పెజేశ్కియాన్ షాంఘై సహకార సంస్థ శిఖరాగ్ర సదస్సులో పాల్గొని ప్రసంగించేందుకు కిర్గిజిస్తాన్ పర్యటన తొలి దశలో భారత ప్రధాని నరేంద్ర మోదీను కలుసుకుని మాట్లాడారని భారత్‌లోని ఇరానీ దౌత్య కార్యాలయం అధికారిక ఖాతా పోస్ట్‌లో తెలిపింది.

భారత విదేశాంగ మంత్రిత్వ శాఖ ప్రతినిధి రణధీర్ జైస్వాల్ ఈ భేటీపై స్పందించారు. బిష్కెక్‌లో SCO సమ్మిట్ సందర్భంగా భారత ప్రధాని మోదీ, ఇరాన్ అధ్యక్షుడు మసూద్ పెజేశ్కియాన్‌తో సమావేశమయ్యారని తెలిపారు. ఇరువురు నేతలు ద్వైపాక్షిక సంబంధాల వివిధ అంశాలపై చర్చించారని, అలాగే పశ్చిమ ఆసియా ప్రాంతంలో ఇటీవల జరిగిన పరిణామాలను ఈ భేటీలో సమీక్షించారని పేర్కొన్నారు.

ఇరువురి భేటీ ఎందుకంత కీలకం

ఈ సమావేశానికి పెద్ద జియోపాలిటికల్‌గా ప్రాధాన్యం ఉంది. అమెరికా, ఇరాన్ మధ్య కొనసాగుతున్న యుద్ధం కారణంగా సముద్ర రవాణాలో అత్యంత కీలకమైన హర్మూజ్ జలసంధిలో రాకపోకలు నిలిచిపోయాయి. ఈ క్రమంలో ప్రధాని మోదీ, పెజేశ్కియాన్ మధ్య ఇది తొలి ప్రత్యక్ష భేటీగా నిలిచింది. మిడిల్ ఈస్ట్‌లో ఇంధన సరఫరాలో అంతరాయాలపై భారత్ సున్నితంగా స్పందిస్తుంది.

అదనంగా సిటీ వంటి ఫైనాన్షియల్ ఇన్‌స్టిట్యూషన్ అంచనా ప్రకారం, సంక్షోభం కారణంగా ప్రపంచ చమురు ధరలు బ్యారెల్‌కు 90 నుంచి 100 డాలర్ల మధ్య కొనసాగితే, భారత్‌లో ద్రవ్యోల్బణం 50 బేసిస్ పాయింట్లు వరకు పెరుగుతుంది. దీని వల్ల భారత్ ఆర్థిక వ్యవస్థకు భారీ నష్టం కలగవచ్చు. సరుకు, ఇంధన రవాణా ఎలాంటి అంతరాయం లేకుండా కొనసాగించడంపైనే మోదీ ప్రధాన చర్చలపై దృష్టి సారించారని నిపుణులు చెబుతున్నారు.

ఈ ఘర్షణలో భారత పౌరుల భద్రత సైతం ఆందోళన పెంచుతోంది. దాదాపు 800 మంది భారత నావికులను తీసుకెళ్తున్న 28 నౌకలు ఇంకా హర్ముజ్‌లో చిక్కుకుపోయి ఉండటంతో, తమ వాణిజ్య నౌకల సురక్షిత రాకపోకల కోసం భారత్ చర్చలు జరుపుతోంది. వారి భద్రత, సురక్షిత తిరిగి రాకను నిర్ధారించేందుకు టెహ్రాన్‌తో ప్రత్యక్ష దౌత్య చర్చలు అవసరమని నిపుణులు చెబుతున్నారు.

అమెరికా, ఇరాన్ మధ్య కొనసాగుతున్న యుద్ధం, ఎర్ర సముద్రంలో ఉద్రిక్తతల కారణంగా సంప్రదాయ సముద్ర మార్గాలు క్లోజ్ కావడంతో SCO దేశాలు ప్రత్యామ్నాయ కనెక్టివిటీ వైపు అడుగులు వేస్తున్నాయి. మోదీ-పెజేశ్కియాన్ భేటీ 7,200 కి.మీ. పొడవైన ఇంటర్నేషనల్ నార్త్- సౌత్ ట్రాన్స్‌పోర్ట్ కారిడార్‌ను ముందుకు తీసుకెళ్లడంలో కీలకం కానుంది. ఈ నెట్‌వర్క్ ఇరాన్ మార్గంగా ముంబైని సెయింట్ పీటర్స్‌బర్గ్‌తో కలుపుతుంది. రద్దీగా ఉండే జలమార్గాలను తప్పిస్తుంది. ఘర్షణను దౌత్య మార్గంలో పరిష్కరించాలని భారత్ ప్రోత్సహించవచ్చు.