world

JD Vance Clarifies Visa Remarks: 'నాకు నా భారతీయ అత్తమామలంటే చాలా ఇష్టం'.. H-1B వీసా వ్యాఖ్యలపై జేడీ వాన్స్ క్లారిటీ!

Satyaprasad Bandaru — Tue, 20 Oct 2026 14:36:02 +0530

JD Vance Clarifies Visa Remarks: హెచ్-1బీ వీసా ఉద్యోగులను 'బానిసలు' అంటూ అమెరికా వైస్ ప్రెసిడెంట్ జేడీ వాన్స్ చేసిన వ్యాఖ్యలు తీవ్ర దుమారం రేపాయి. అయితే, తన కామెంట్స్‌పై వివరణ ఇస్తూ అలా మాట్లాడి ఉండకూడదని వాన్స్ అన్నారు. తాను చేసిన వ్యాఖ్యలను విదేశీ కార్మికులపై కాదని, వారిని దోపిడీ చేసే అమెరికన్ కంపెనీలు, లొసుగులున్న వీసా వ్యవస్థపైనేనని స్పష్టం చేశారు. ఈ సందర్భంగా తన భార్య ఉషా వాన్స్ భారతీయ మూలాలను, తన అత్తమామలపై ఉన్న ప్రేమను ఆయన గుర్తుచేసుకున్నారు.

ఆ వ్యాఖ్యలు కంపెనీల దోపిడీ గురించే

మిచిగాన్‌లోని ఫ్లాట్ రాక్‌లో జరిగిన సీబీఎస్ న్యూస్ టౌన్ హాల్‌లో జేడీ వాన్స్ మాట్లాడుతూ.. "నేను వాడిన బానిసలు పదం సరైంది కాకపోవచ్చు, అది పొరపాటున జరిగింది. కానీ నేను 'బానిసలు' అని H-1B వీసాదారులను విమర్శించలేదు. విదేశీ ఉద్యోగులను దోచుకునే కంపెనీల గురించి విమర్శించాను" అని చెప్పారు.

భారతీయ అత్తమామల గురించి

వలస విధానాలపై మాట్లాడుతున్న క్రమంలో జేడీ వాన్స్ తన కుటుంబం గురించి ప్రస్తావిస్తూ భావోద్వేగానికి లోనయ్యారు. తన కుటుంబం ఎక్కడి నుండి వచ్చిందో అందరికీ తెలుసన్నారు. సౌత్ ఇండియా నుంచి అమెరికాకు వచ్చి ఇక్కడ స్థిరపడిన తన అత్త, మామను తాను ఎంతగానో ప్రేమిస్తానని తెలిపారు. అమెరికాలోనే పుట్టి పెరిగిన వారి కుమార్తె (ఉషా వాన్స్) ఇవాళ అమెరికా 'సెకండ్ లేడీ'గా ఉన్నారన్నారు. ఆమెను చూసి తాను ఎంతో గర్వపడుతున్నానని, ఆమెను ఎంతో ప్రేమిస్తున్నానని చెప్పుకొచ్చారు.

Also Read: అమెరికాలోని ప్రతి బిడ్డకు స్పేస్‌ఎక్స్ షేరు.. ఎలాన్ మస్క్ సంచలన ప్రకటన

వీసా వ్యవస్థలో మార్పులు అవసరం

అమెరికన్లకు న్యాయం జరిగేలా, అదే సమయంలో దేశానికి ఉపయోగపడే నిపుణులైన విదేశీయులకు స్వాగతం పలికేలా వీసా విధానంలో మార్పులు అవసరమని వాన్స్ అభిప్రాయపడ్డారు. కొన్ని అమెరికన్ కంపెనీలు స్థానికులను తొలగించి, తక్కువ వేతనాలకే పనిచేసే విదేశీయులను నియమించుకుంటున్నాయని విమర్శించారు.H-1B వీసాపై వచ్చే విదేశీయులు తమ మనుగడ కోసం పూర్తిగా యజమానులపైనే ఆధారపడాల్సి వస్తుందని, కంపెనీలను ప్రశ్నిస్తే ఉద్యోగాలు పోయి తీవ్ర పరిణామాలు ఎదుర్కోవాల్సి వస్తుందనే భయంతో బానిసలాలా మిగిలిపోతున్నారని వాన్స్ ఆవేదన వ్యక్తం చేశారు.

విదేశీ ఉద్యోగుల గ్రీన్ కార్డుల కోసం అప్లై చేసుకునే కొన్ని ప్రోగ్రామ్‌ల నుంచి ఇండియన్ ఐటీ కంపెనీలతో సహా పలు సంస్థలను అమెరికా ఇటీవల సస్పెండ్ చేసింది. ఈ విధానం వల్ల స్థానిక అమెరికన్లకు ఉద్యోగాలు దక్కడం లేదని వాదిస్తూ.. వాన్స్ H-1B ఉద్యోగులను బానిసలు అంటూ మాట్లాడారు. దీనిపై పెద్ద ఎత్తున విమర్శలు రావడంతో తాజాగా ఆయన ఈ విధంగా క్లారిటీ ఇచ్చారు.

Also Read: అమెరికా వదిలి భారత్‌కు ఐటీ నిపుణులు - 2026లో ఆల్‌టైమ్ రికార్డు.. అసలు కారణాలివే!

Tech Professionals Return to India : అమెరికా వదిలి భారత్‌కు ఐటీ నిపుణులు - 2026లో ఆల్‌టైమ్ రికార్డు.. అసలు కారణాలివే!

Raja Sekhar Allu — Tue, 20 Oct 2026 09:29:03 +0530

Global Capability Centres India GCC: ఎన్నో దశాబ్దాలుగా నడిచిన బ్రెయిన్ డ్రెయిన్ ధోరణి తిరగబడి, భారతదేశం వైపు రివర్స్ బ్రెయిన్ డ్రెయిన్ శరవేగం అవుతోంది. అమెరికాలోని ప్రముఖ గ్లోబల్ ఐటీ , టెక్నాలజీ కంపెనీలలో పనిచేస్తున్న వైట్-కాలర్ నిపుణులు భారీ సంఖ్యలో తిరిగి భారతదేశానికి బాటపడుతున్నారు. స్టాఫింగ్ సంస్థల గణాంకాల ప్రకారం 2026 మొదటి తొమ్మిది నెలల్లోనే దాదాపు 12,700 మంది వైట్-కాలర్ టెక్ నిపుణులు అమెరికాను వదిలి భారత్‌కు చేరుకున్నారు. 2023లో 7,200 మంది, 2024లో 9,800 మంది, 2025లో రికార్డు స్థాయిలో 15,100 మంది స్వదేశానికి రాగా, ఈ ఏడాది ఆ సంఖ్య పాత రికార్డులన్నింటినీ తిరగరాసే దిశగా సాగుతోంది. అమెరికాలో దశాబ్దాల తరబడి ఉన్న అమెరికన్ డ్రీమ్ కంటే సొంత గడ్డపై పెరుగుతున్న అవకాశాలే మిన్న అని భావించి వీరంతా హైదరాబాద్, బెంగళూరు, పూణే, గుర్గావ్ వంటి ప్రధాన భారతీయ టెక్ నగరాల్లో రీ-ఎంట్రీ ఇస్తున్నారు.

అమెరికాలో భవిష్యత్ పై నమ్మకం కోల్పోతున్న ఎన్నారైలు

ఈ భారీ వలస వెనుక ప్రధాన కారణం అమెరికాలో హెచ్-1బి వీసా విధానాలపై వ్యక్తమవుతున్న నిరంతర అనిశ్చితి. వీసా నిబంధనలు కఠినతరం కావడం, గ్రీన్ కార్డ్ కోసం దశాబ్దాల తరబడి నిరీక్షించాల్సి రావడం, వీసా సకాలంలో రీ-న్యూవల్ కాకపోతే ఎదురయ్యే చట్టపరమైన సమస్యలు భారతీయులలో తీవ్ర అభద్రతాభావాన్ని పెంచాయి. దీనికి తోడు అమెరికా టెక్ దిగ్గజాల్లో వరుస లేఆఫ్స్ సంభవించినప్పుడు హెచ్-1బి హోల్డర్లకు లభించే 60 రోజుల గ్రేస్ పీరియడ్ లోపు కొత్త ఉద్యోగం వెతుక్కోవడం తీవ్ర సవాలుగా మారింది. ఉద్యోగం పోయిన వెంటనే దేశం వీడాల్సిన కఠిన పరిస్థితుల కంటే, సురక్షితమైన సొంత దేశంలో స్థిరపడటమే మంచిదని మెజారిటీ నిపుణులు నిర్ణయించుకుంటున్నారు.

భారతదేశంలో గ్లోబల్ కేపబిలిటీ సెంటర్ల విస్తరణ

రెండో ప్రధాన కారణం.. భారతదేశంలో గ్లోబల్ కేపబిలిటీ సెంటర్లు అత్యంత వేగంగా విస్తరించడం. అమెరికాకు చెందిన ఫార్చ్యూన్ 500 కంపెనీలు, మల్టీ నేషనల్ టెక్ దిగ్గజాలు తమ ప్రధాన పరిశోధన, ఇంజనీరింగ్ కేంద్రాలను హైదరాబాద్, బెంగళూరు వంటి నగరాల్లో ఏర్పాటు చేస్తున్నాయి. కేవలం సపోర్ట్ ప్రాజెక్టులు కాకుండా, ఆర్టిఫిషియల్ ఇంటెలిజెన్స్ , జనరేటివ్ ఏఐ, క్లౌడ్ కంప్యూటింగ్, డేటా సైన్స్ వంటి అత్యాధునిక రౌండ్-ది-క్లాక్ ప్రాజెక్టులను భారత్ నుంచే నిర్వహిస్తున్నాయి. అమెరికాలో సంపాదించే స్థాయికి దగ్గరగా ప్యాకేజీలు, సీనియర్ ఎగ్జిక్యూటివ్ హోదాలు ఇక్కడే లభిస్తుండటంతో గ్లోబల్ ఎక్స్‌పోజర్ ఉన్న నిపుణులకు జిసిసిలు ప్రధాన వేదికగా మారాయి.

ఇండియాలో అయితే కుటుంబానికి దగ్గరగా!

అంతేకాకుండా, మారుతున్న జీవనశైలి , కుటుంబ కారణాలు కూడా ఈ నిర్ణయంలో బలమైన పాత్ర పోషిస్తున్నాయి. సుదీర్ఘకాలం అమెరికాలో గడిపిన భారతీయ నిపుణులు తమ వృద్ధాప్యంలో ఉన్న తల్లిదండ్రుల సంరక్షణ, పిల్లల సాంస్కృతిక ఎదుగుదల , సొంత సామాజిక వాతావరణంలో జీవించాలనే కోరికతో తిరిగొస్తున్నారు. భారత్‌లో డిజిటల్ మౌలిక వసతులు, ప్రపంచస్థాయి గేటెడ్ కమ్యూనిటీలు, అంతర్జాతీయ పాఠశాలలు అందుబాటులోకి రావడంతో యూఎస్ తరహా జీవన ప్రమాణాలను ఇక్కడే పొందగలుగుతున్నారు. దీనికి తోడు భారతదేశంలో స్టార్టప్ ఇకోసిస్టమ్ బలంగా పుంజుకోవడంతో, అమెరికా అనుభవంతో సొంతంగా స్టార్టప్‌లు ప్రారంభించేందుకు విదేశీ నిపుణులు ముందుకు వస్తున్నారు.

అమెరికాతో పోలిస్తే వేతనాలు చాలా తక్కువ

భారత్‌కు తిరిగి రావడం పూర్తిగా సునాయాసంగా ఏమీ లేదు. అమెరికా స్థాయి జీతాలతో పోలిస్తే భారత మార్కెట్‌లో వేతనాల సర్దుబాటు చేసుకోక తప్పడం లేదు. అంతేకాకుండా, ఇక్కడి కార్పొరేట్ వర్క్ కల్చర్, ట్రాఫిక్ సమస్యలు, నైపుణ్యాలకు తగిన సరైన ఉద్యోగ ఎంపికలో ఎదురయ్యే పోటీ వంటి సవాళ్లను వారు ఎదుర్కోవాల్సి వస్తోంది. అయినప్పటికీ, ఉద్యోగ భద్రత , స్వదేశంలో ఉండే మానసిక ప్రశాంతత ముందు ఈ ఆర్థిక వ్యత్యాసాలు చిన్నవిగా కనిపిస్తున్నాయని తిరిగొచ్చిన నిపుణులు చెబుతున్నారు. అమెరికా నుంచి అత్యున్నత సాంకేతిక అనుభవం, ఆవిష్కరణల ఆలోచనలు ఉన్న నిపుణులు భారత్‌కు తరలిరావడం దేశ ఆర్థిక వ్యవస్థకు, వికసిత్ భారత్ లక్ష్యాలకు పెద్ద ఊతాన్నిస్తుంది. గ్లోబల్ ప్రొడక్ట్ డెవలప్‌మెంట్‌లో భారత్ కేవలం సేవల కేంద్రం గానే కాకుండా లీడర్‌షిప్ అండ్ ఇన్నోవేషన్ హబ్ గా రూపాంతరం చెందడానికి ఈ రివర్స్ మైగ్రేషన్ దోహదపడుతోంది. రాబోయే ఏళ్లలో అమెరికాకు వెళ్లే వారి సంఖ్య కంటే విదేశాల నుంచి భారతదేశానికి తిరిగొచ్చే ఐటీ నిపుణుల సంఖ్యే అధిగమించినా ఆశ్చర్యపోనక్కర్లేదని మైగ్రేషన్ డేటా స్పష్టం చేస్తోంది.

Elon Musk: అమెరికాలోని ప్రతి బిడ్డకు స్పేస్‌ఎక్స్ షేరు.. ఎలాన్ మస్క్ సంచలన ప్రకటన

Satyaprasad Bandaru — Mon, 19 Oct 2026 19:51:46 +0530

Elon Musk: ప్రపంచ కుబేరుడు, బిలియనీర్ ఎలాన్ మస్క్ మరో సంచలన ప్రకటనతో వార్తల్లో నిలిచారు. అమెరికాలో పుట్టిన ప్రతి బిడ్డకు తన ఏరోస్పేస్ కంపెనీ 'స్పేస్‌ఎక్స్' నుంచి ఒక షేరును బహుమతిగా ఇస్తానని ఆయన హామీ ఇచ్చారు. ఈ విషయమై సోషల్ మీడియాలో పోస్ట్ చేస్తూ.. "వచ్చే ఏడాది, నేను అమెరికాలోని ప్రతి బిడ్డకు స్పేస్‌ఎక్స్ షేర్లలో ఒకటి గిఫ్ట్‌గా ఇస్తాను. ఇది ఇలాంటి బహుమతులలో మొదటిది మాత్రమే అవుతుంది" అని మస్క్ పేర్కొన్నారు.

10.5 బిలియన్ డాలర్ల భారీ ప్రణాళిక

2025 జనాభా లెక్కల ప్రకారం అమెరికాలో సుమారు 72 మిలియన్ల మంది పిల్లలు ఉన్నారు. స్పేస్‌ఎక్స్ షేర్ల ఇటీవలి ట్రేడింగ్ ధరల ఆధారంగా చూస్తే, ఈ భారీ పంపిణీ అంచనా విలువ దాదాపు 10.5 బిలియన్ డాలర్లు ఉండొవచ్చని నివేదికలు వస్తున్నాయి. ఫోర్బ్స్ ప్రకారం మస్క్ ప్రస్తుత ఆస్తి దాదాపు 908.5 బిలియన్ డాలర్లు. 2002లో స్పేస్‌ఎక్స్‌ను స్థాపించిన మస్క్, కంపెనీ మొత్తం ఈక్విటీలో దాదాపు సగం వాటాను కలిగి ఉన్నారు. కాబట్టి ఈ మొత్తం మస్క్‌కు పెద్ద భారం కాకపోవచ్చు.

ఆంత్రోపిక్ నిర్ణయంపై

ఏఐ సంస్థ 'ఆంథ్రోపిక్' తమ షేర్లలో 5 శాతాన్ని పబ్లిక్ బెనిఫిట్ ఫండ్‌కు విరాళంగా ఇవ్వాలని నిర్ణయించింది. ఈ నిర్ణయంపై స్పందిస్తూ, స్పేస్ ఎక్స్ షేర్లను నేరుగా ప్రజలకే ఇవ్వడం మంచిదని సిఫార్సు చేస్తూ మస్క్ ఈ ప్రకటన చేసినట్లు తెలుస్తోంది.

Also Read: భారత ప్రధాని అంబానీ..! స్టార్‌లింక్ జాప్యంపై బీజేపీ, రిలయన్స్‌‌ టార్గెట్‌గా ఎలాన్ మస్క్ సంచలన ఆరోపణలు

నెటిజన్ల ప్రశంసలు

మస్క్ చేసిన ఈ ప్రకటన సోషల్ మీడియాలో ప్రశంసలు వస్తున్నాయి. "నేను మనసులో ఇంకా చిన్నపిల్లాడినే, నాకూ ఒక షేరు కావాలి!" అని కొందరు సరదాగా కామెంట్ చేశారు. అంతరిక్ష నౌక స్టార్‌షిప్‌ను నిర్మిస్తున్న కంపెనీలో వాటా లభించడం వల్ల రాబోయే తరం మొత్తం అంతరిక్ష పరిశోధనలపై ఆసక్తి చూపుతుందని మరికొందరు అభిప్రాయపడ్డారు. ఈ షేర్ల ద్వారా వచ్చే డబ్బును పేదరికాన్ని నిర్మూలించడానికి, మంచి సమాజ నిర్మాణానికి ఉపయోగించాలని కొందరు సూచించారు.

అయితే ఈ ప్రకటనపై స్పేస్‌ఎక్స్ సంస్థ ఇప్పటివరకు ఎటువంటి అధికారిక ప్రకటనను విడుదల చేయలేదు. పిల్లలకు వ్యక్తిగత షేర్లను బదిలీ చేయడానికి అవసరమైన అర్హతా ప్రమాణాలు, వయోపరిమితులు లేదా చట్టపరమైన నిబంధనల గురించి మస్క్ ఇంకా పూర్తి వివరాలను వెల్లడించాల్సి ఉంది.

Also Read: భారత సంతతి మహిళ నవనీతమ్ పిళ్లైకి నోబెల్ శాంతి పురస్కారం.. ఆమె బ్యాక్‌గ్రౌండ్ ఇదే

Aurora Venkateswara Swamy Temple Mass Shooting Plot: అమెరికాలో వెంకటేశ్వరస్వామి ఆలయంలో మారణకాండకు కుట్ర - 19 ఏళ్ల శ్వేతజాతి ఉన్మాది అరెస్ట్!

Raja Sekhar Allu — Thu, 15 Oct 2026 09:43:12 +0530

Indian Diaspora Security US : అమెరికాలోని ఇల్లినాయిస్ రాష్ట్రం, ఆరోరా నగరంలో ఉన్న ప్రసిద్ధ శ్రీ వెంకటేశ్వరస్వామి దేవాలయాన్ని టార్గెట్ చేస్తూ ప్లాన్ చేసిన భారీ కాల్పుల కుట్రను పోలీసులు సమర్థవంతంగా తిప్పికొట్టారు. నవరాత్రి ఉత్సవాల తొలిరోజే భారతీయ సంతతికి చెందిన వందలాది మంది భక్తులను లక్ష్యంగా చేసుకుని ఈ ఘాతుకానికి పాల్పడాలని భావించిన 19 ఏళ్ల అలెగ్జాండ్రోస్ పాపోరాకిస్ అనే యువకుడిని పోలీసులు అదుపులోకి తీసుకున్నారు. అమెరికాలోని అత్యంత పురాతనమైన, ప్రసిద్ధి చెందిన హిందూ ఆలయాలలో ఒకటైన ఈ గుడి వద్ద జరగాల్సిన పెద్ద ముప్పు తృటిలో తప్పింది.

రైఫిల్‌తో ఆలయానికి వచ్చిన ఉన్మాది

నిందితుడు పాపోరాకిస్ పాలాటైన్ పట్టణం నుంచి మోడిఫై చేసిన ఏఆర్-స్టైల్ రైఫిల్‌తో ఆరోరా ఆలయ పరిసరాలకు చేరుకున్నాడు. పూజల్లో పాల్గొంటున్న భారతీయుల్ని టార్గెట్ చేశాడు. ఎంత మందిని దొరికితే అంత మందిని చంపాలనుకున్నాడు. అయితే సాంకేతిక లోపం వల్ల అతడు ఉపయోగించాలనుకున్న గన్ జామ్ కావడంతో నేరుగా దాడి జరపలేక అక్కడి నుంచి పరారయ్యాడు. అనంతరం తన ఇంట్లో ఆయుధాన్ని బాగుచేసుకునేందుకు ఆన్‌లైన్ ద్వారా శోధించడమే కాకుండా, తుపాకీకి సంబంధించిన వీడియోను తన సహద్యోగికి పంపాడు. ఈ విచిత్ర ప్రవర్తనతో అనుమానం వచ్చిన సహోద్యోగి వెంటనే పోలీసులకు సమాచారం అందించడంతో నిందితుడి కుట్ర బయటపడింది.

గన్ పని చేయకపోవడంతో తప్పిన ముప్పు

పోలీసులు, ఎఫ్‌బీఐ బృందాలు సంయుక్తంగా జరిపిన తనిఖీల్లో నిందితుడి ఇల్లు, డిజిటల్ పరికరాల నుంచి కీలక ఆధారాలు లభ్యమయ్యాయి. నిందితుడు తీవ్రమైన శ్వేతజాతి ఆధిక్యతా భావజాలం కలిగినవాడని, ప్రత్యేకంగా భారతీయ సంతతికి చెందిన ప్రజలు, హిందూ ధార్మిక స్థలాలపై ద్వేషంతో ఉన్నాడని గుర్తించారు. ఆ యువకుడు “Why I Fought: A.K.A. (Aurora Shooter's Manifesto)” పేరిట ఎనిమిది పేజీల మ్యానిఫెస్టోను కూడా సిద్ధం చేసినట్లు విచారణలో తేలింది. అతని వద్ద నుంచి సీరియల్ నంబర్ లేని నిషేధిత ఆయుధం, బాడీ ఆర్మార్, వందలాది రౌండ్ల బుల్లెట్లను రికవర్ చేశారు.

"Mass shooting of Indian people" First day of Navratri. Mass shooting foiled at Aurora Venkateswara Swamy Temple in Aurora, Illinois. One of the oldest Hindu temples in the USA. 19-year-old Alexandros Paporakis arrested. He plotted a mass shooting targeting Indian worshippers. Drove from Palatine with a modified AR-style rifle. The weapon jammed. He fled the scene. He searched online for a fix and sent a video to a colleague. The colleague called the police. Paporakis held white supremacist views and prepared a manifesto. This follows an attack on a Hindu temple in Ohio two weeks earlier.
— Subodh Kumar (@kumarsubodh_) October 15, 2026

భారతీయులపై ద్వేషమే కారణం

ఈ ఘటన కేవలం ఒక ప్రాంతానికి పరిమితమైనది కాదని, రెండు వారాల క్రితం ఒహియోలోని మరొక హిందూ దేవాలయంపై కూడా దాడి యత్నం జరిగిందని ఎఫ్‌బీఐ అధికారులు గుర్తుచేశారు. ఇటీవల కాలంలో అమెరికాలో పెరుగుతున్న మతపరమైన ద్వేషపూరిత నేరాలు, శ్వేతజాతి తీవ్రవాద పోకడలు ఆందోళన కలిగిస్తున్నాయి. నిందితుడిపై ఉగ్రవాద బెదిరింపులు, అక్రమ ఆయుధ సేకరణ వంటి తీవ్రమైన నేరారోపణల కింద కేసులు నమోదు చేసి, బెయిల్ లేకుండా నిర్బంధంలో ఉంచినట్లు రోలింగ్ మేడోస్ కోర్టు స్పష్టం చేసింది.

నవరాత్రి , దీపావళి పండుగల వేళ అమెరికా వ్యాప్తంగా ఉన్న హిందూ దేవాలయాల వద్ద భద్రతను మరింత కట్టుదిట్టం చేయాలని ఎఫ్‌బీఐ , స్థానిక పోలీసు యంత్రాంగానికి హిందూ సంఘాలు విజ్ఞప్తి చేశాయి.

Solar Storm: నేడు భూమిని తాకనున్న పవర్‌ఫుల్ సౌర తుఫాను.. G2 హెచ్చరిక జారీ చేసిన నోవా

Shankar Dukanam — Sun, 11 Oct 2026 09:44:25 +0530

Solar Storm Latest News | వాషింగ్టన్: సూర్యుడి ఉపరితలంపై సంభవించిన రెండు భారీ విస్ఫోటనాల కారణంగా నేడు (అక్టోబర్ 11న) భూమి వైపు పవర్‌ఫుల్ సౌర తుఫాను దూసుకొస్తోందని ఖగోళ శాస్త్రవేత్తలు వెల్లడించారు. సూర్యుడి నుంచి విడుదలైన విద్యుదావేశిత కణాలు, అయస్కాంత పదార్థాలతో కూడిన భారీ మేఘాలు భూమిని తాకనున్నాయి. అమెరికాకు చెందిన నేషనల్ ఓషియానిక్ అండ్ అట్మాస్ఫియరిక్ అడ్మినిస్ట్రేషన్ (NOAA) ఒక మోస్తరు స్థాయి G2 జియోమాగ్నెటిక్ తుఫాను హెచ్చరికను జారీ చేసింది. అక్టోబర్ 7, 8 తేదీల్లో వెలువడిన 2 సౌర జ్వాలలు అంతరిక్షంలో విలీనమై భూమి అయస్కాంత క్షేత్రాన్ని ఢీకొట్టనున్నట్లు స్పేస్ వెదర్ ప్రిడిక్షన్ సెంటర్ స్పష్టం చేసింది.

ఈ సౌర తుఫాను ప్రభావం వల్ల అంతరిక్షంలో పనిచేస్తున్న కొన్ని ఉపగ్రహాల పనితీరు, రేడియో కమ్యూనికేషన్లు, జీపీఎస్ నావిగేషన్ వ్యవస్థలకు తాత్కాలికంగా ఆటంకం కలిగే అవకాశం ఉందని అంచనా వేశారు. ముఖ్యంగా ధ్రువ ప్రాంతాల సమీపంలో ఉన్న దేశాల్లో విద్యుత్ గ్రిడ్లలో వోల్టేజ్ హెచ్చుతగ్గులు నమోదయ్యే ప్రమాదం ఉంది. అలాగే, సాధారణంగా ధ్రువ ప్రాంతాల్లో మాత్రమే కనిపించే అద్భుత రంగుల వెలుగులు (ధ్రువకాంతులు) ఈసారి ఇతర ప్రాంతాల్లో కూడా కనిపించే అవకాశం ఉందని అంచనా వేశారు.

అయితే ఈ సౌర తుఫాను వల్ల భారత్ లో రోజువారీ సాధారణ జీవితానికి లేదా కమ్యూనికేషన్ వ్యవస్థలకు ఎలాంటి ముప్పు ఉండదని వాతావరణ నిపుణులు స్పష్టం చేశారు. భారత్‌లో విద్యుత్ సరఫరా నిలిచిపోవడం లేదా ఉపగ్రహ సేవలు పూర్తిగా నిలిచిపోవడం వంటి పరిస్థితులు తలెత్తవని, ప్రజలు ఆందోళన చెందాల్సిన అవసరం లేదన్నారు.

సౌర తుఫాను అంటే ఏమిటి?

సూర్యునిపై జరిగే కార్యకలాపాలు శక్తిని, పదార్థాన్ని అంతరిక్షంలోకి పంపినప్పుడు అది సౌర తుఫానుగా మారుతుంది. అందుకు ప్రధాన కారణం కరోనల్ మాస్ ఎజెక్షన్ (CME). ఇది సూర్యుని నుంచి విడుదలయ్యే విద్యుదావేశిత కణాలు, అయస్కాంత పదార్థాలతో కూడి ఉంటుంది. ఇలాంటి మేఘం లేదా సౌర జ్వాల భూమిని చేరుకున్నప్పుడు, అది గ్రహం అయస్కాంత క్షేత్రాన్ని ప్రభావితం చేసి సౌర తుఫానును ప్రేరేపిస్తుంది.

NOAA జియోమాగ్నెటిక్ తుఫానులను G1 నుంచి G5 (తీవ్రమైనది) వరకు 5 స్థాయిలుగా వర్గీకరిస్తుంది. ప్రత్యేక స్కేళ్లు సోలార్ రేడియేషన్ తుఫానులను (S1 నుంచి S5 వరకు), రేడియో బ్లాక్‌అవుట్‌లను (R1 నుండి R5 వరకు) కొలుస్తాయి. ఇవి తుఫాను తీవ్రత ఒకే కొలత కంటే విభిన్న రకాల స్పేస్-వెదర్ సంఘటనలను మనకు వివరిస్తాయి.

అక్టోబర్ 11న ఏం జరుగుతుంది?

అక్టోబర్ 7, 8 తేదీల్లో సూర్యుని నుండి వెలువడిన రెండు సౌర విస్ఫోటనాలు భూమికి చేరుకునే అవకాశం ఉన్నందున G2 హెచ్చరిక వర్తిస్తుందని NOAA కి చెందిన స్పేస్ వెదర్ ప్రిడిక్షన్ సెంటర్ పేర్కొంది. ఇందులో రెండవది వేగంగా కదులుతోంది. భూమిని చేరుకోవడానికి ముందే మొదటి సౌర జ్వాలతో విలీనం అవుతుందని భావిస్తున్నారు. G2 స్థాయిలలో, ప్రభావాలు సాధారణంగా అక్షాంశాల వద్ద అధికంగా ఉంటాయి.

ఆ ప్రాంతాల్లోని విద్యుత్ వ్యవస్థలు వోల్టేజ్ హెచ్చుతగ్గులను ఎదుర్కొంటాయి. కొన్ని ప్రాంతాల్లో రేడియో సంకేతాలు వీక్ అవుతాయి. జియోమాగ్నెటిక్ తుఫానుల సమయంలో శాటిలైట్ నావిగేషన్ కచ్చితత్వంలో మార్పులు సంభవిస్తాయి. సౌర ఆవేశిత కణాలు భూమి పైన వాతావరణంలోని వాయువులతో ప్రతిచర్య జరిపినప్పుడు ఏర్పడే రంగురంగుల దృశ్యాలైన అరోరాలు (ధ్రువకాంతులు), ధ్రువ ప్రాంతాల కంటే దూరంగా ఉన్న ప్రాంతాలలోనూ కనిపించవచ్చు.

Ambani vs Elon Musk: భారత ప్రధాని అంబానీ..! స్టార్‌లింక్ జాప్యంపై బీజేపీ, రిలయన్స్‌‌ టార్గెట్‌గా ఎలాన్ మస్క్ సంచలన ఆరోపణలు

Shankar Dukanam — Sat, 10 Oct 2026 11:13:15 +0530

Starlink in India | వాషింగ్టన్/ న్యూఢిల్లీ: టెక్ దిగ్గజం, టెస్లా సీఈఓ ఎలాన్ మస్క్ కేంద్రంలోని బీజేపీ ప్రభుత్వాన్ని, రిలయన్స్ అధినేత ముఖేష్ అంబానీని టార్గెట్ చేస్తూ కీలక వ్యాఖ్యలు చేశారు. "భారత ప్రధాన మంత్రి అంబానీ గారూ.." అంటూ సోషల్ మీడియాలో చేసిన పోస్టులు దుమారం రేపుతున్నాయి. భారత్‌లో తన స్టార్‌లింక్ (Starlink) శాటిలైట్ ఇంటర్నెట్ సేవలకు అనుమతులు లభించడంలో తీవ్ర జాప్యం జరుగుతుండటంపై అసహనం వ్యక్తం చేశారు.

దేశీయ టెలికాం రంగాన్ని శాసిస్తున్న ముకేశ్ అంబానీ ప్రయోజనాల కోసమే తమకు అడ్డంకులు సృష్టిస్తున్నారని, ఇది ముమ్మాటికీ గుత్తాధిపత్యమేనని ఆరోపించారు. భారత్‌లో తన స్టార్ లింక్ ఇంటర్నెట్ సేవలకు అడ్డంకులు తొలగకపోవడంతో రిలయన్స్ అధినేతను, కేంద్రంలో అధికారంలో ఉన్న NDA బీజేపీ ప్రభుత్వాన్ని లక్ష్యంగా చేసుకుని ఎలాన్ మస్క్ సంచలన ఆరోపణలు చేశారు. శాటిలైట్ స్పెక్ట్రమ్ కేటాయింపులు, భారత్‌లోకి స్టార్‌లింక్ ప్రవేశంపై రిలయన్స్ జియోతో వివాదం నడుస్తున్న సమయంలో ఎలాన్ మస్క్ పాత పోస్టులు షేర్ చేసి అటు కేంద్రంలోని బీజేపీని, ఇటు అంబానీని ఇరుకున పెట్టే ప్రయత్నాలు చేస్తున్నారు.

Also, Starlink has proven to be essential for saving lives during natural disasters throughout the world, when all other communications systems have failed, so you would also be helping save men, women and children throughout India. 🇮🇳
— Elon Musk (@elonmusk) October 9, 2026

పొలిటికల్ లింకులు, ఆరోపణలు

తన ఆరోపణలకు బలం చేకూర్చేందుకు ఎలాన్ మస్క్ ఎక్స్ వేదికగా 'ఇండియన్ ఎక్స్‌ప్రెస్', 'అల్ జజీరా' గతంలో రాసిన కథనాలను షేర్ చేశారు. ఎలక్టోరల్ బాండ్ల) ద్వారా రిలయన్స్ అనుబంధ సంస్థగా ప్రచారంలో ఉన్న 'క్విక్ సప్లై' కంపెనీ, అధికార బీజేపీకి రూ. 385 కోట్లు, శివసేన పార్టీకి రూ. 25 కోట్లు విరాళంగా ఇచ్చిందని ఆ కథనాల్లో కనిపిస్తుంది. బీజేపీకి అందిస్తున్న విరాళాల ద్వారానే రిలయన్స్ అధినేత అంబానీ మద్దతు పొందుతున్నారని మస్క్ ఆరోపించారు. అయితే, క్విక్ సప్లై కంపెనీ ఇండిపెండెంట్ సంస్థ అని, దాంతో తమకు ఎలాంటి సంబంధం లేదని రిలయన్స్ ఇదివరకే క్లారిటీ ఇచ్చింది. మస్క్ చేసిన తాజా వ్యాఖ్యలపై రిలయన్స్ నేరుగా స్పందించలేదు. వెనిజులాలో స్టార్ లింక్ సేవలు ప్రారంభమవుతున్నాయని, అందుకు కావాల్సిన అన్ని పర్మిషన్లు వచ్చాయని మస్క్ మరో పోస్ట్ చేశారు.

https://t.co/DJYynAyO0W
— Elon Musk (@elonmusk) October 10, 2026

స్పందించిన కేంద్ర ప్రభుత్వం

ఎలాన్ మస్క్ ఆరోపణలను భారత ప్రభుత్వం తీవ్రంగా ఖండించింది. భారత్ ఏ రంగంలోనూ గుత్తాధిపత్యాన్ని అనుమతించదని, అన్ని సంస్థలకు ఒకే విధమైన రూల్స్ ఉంటాయని తెలిపింది. ఎలాన్ మస్క్‌కు చెందిన స్టార్‌లింక్‌తో పాటు జియో శాటిలైట్, భారతీ ఎయిర్‌టెల్ మద్దతున్న వన్ వెబ్ కంపెనీలకు కూడా ప్రాథమిక లైసెన్సులు ఇచ్చామని కేంద్రం పేర్కొంది. అయితే వాణిజ్య సేవలు, స్పెక్ట్రమ్ కేటాయింపులకు ముందు భద్రతాపరమైన తనిఖీలు తప్పనిసరి అని, ఏ సంస్థలకు కేంద్రం వత్తాసు పలకాల్సిన అవసరం లేదని అధికారిక వర్గాలు స్పష్టం చేశాయి. అన్ని కంపెనీలకు ఒకే విధమైన భద్రతా నియమాలు వర్తిస్తాయని కేంద్రం స్పష్టం చేసింది. భారత్‌లో స్టార్ లింక్ శాటిలైట్ ఇంటర్నెట్ సర్వీస్ తేవాలని మస్క్ ప్రయత్నిస్తున్న క్రమంలో దేశంలోని వ్యాపార నిబంధనలు, స్పెక్ట్రమ్ కేటాయింపు పద్ధతులపై రిలయన్స్ జియో, భారతీ ఎయిర్‌టెల్‌తో ఆ విదేశీ కంపెనీ మధ్య విభేదాలు తలెత్తాయి.

Nobel Peace Prize 2026: భారత సంతతి మహిళ నవనీతమ్ పిళ్లైకి నోబెల్ శాంతి పురస్కారం.. ఆమె బ్యాక్‌గ్రౌండ్ ఇదే

Shankar Dukanam — Fri, 9 Oct 2026 14:47:04 +0530

Nobel Peace Prize | భారత సంతతికి చెందిన నవనీతం నవి పిళ్లై (Navanethem Navi Pillay)ని నోబెల్ శాంతి పురస్కారం వరించింది. ఆమె అంతర్జాతీయ న్యాయ రంగం, మానవ హక్కుల పరిరక్షణలో ప్రపంచ ప్రసిద్ధి గాంచిన దక్షిణాఫ్రికాకు చెందిన న్యాయమూర్తి. ఐక్యరాజ్యసమితి మానవ హక్కుల హైకమిషనర్‌గా, అంతర్జాతీయ నేర న్యాయస్థానాలకు సైతం న్యాయమూర్తిగా సేవలందించారు. ప్రపంచ వ్యాప్తంగా మానవ హక్కుల పురోగతికి, మహిళా హక్కుల రక్షణకు చేసిన కృషిని గుర్తించి 2026 ఏడాదికిగానూ నోబెల్ శాంతి పురస్కారం ప్రకటించారు.

నవనీతం నవి పిళ్లై 1941 సెప్టెంబర్ 23న దక్షిణాఫ్రికాలోని డర్బన్ నగరంలో ఒక తమిళనాడుకు చెందిన భారత సంతతి కుటుంబంలో జన్మించారు. నాటల్ యూనివర్సిటీ నుంచి బీఏ, ఎల్‌ఎల్‌బి పట్టాలు పొందారు. ఆ తువాత అమెరికాలోని హార్వర్డ్ లా స్కూల్ నుంచి ఎల్‌ఎల్‌ఎమ్, డాక్టర్ ఆఫ్ జ్యూరిడికల్ సైన్స్ డిగ్రీలు పూర్తి చేశారు. హార్వర్డ్ లా స్కూల్ నుంచి డాక్టోరేట్ పొందిన తొలి దక్షిణాఫ్రికా మహిళగా నవి పిళ్లై రికార్డు సృష్టించారు.

South African jurist Navanethem 'Navi' Pillay awarded the Nobel Peace Prize 2026 https://t.co/i6XNXMQr1J
— ANI (@ANI) October 9, 2026

జాతి వివక్షకు వ్యతిరేకంగా పోరాటం

1967లో నాటల్ ప్రావిన్స్‌లో సొంతంగా లా ఫార్మ్ ప్రారంభించిన మొదటి శ్వేతజాతీయేతర మహిళగా నిలిచారు. దక్షిణాఫ్రికాలోని జాతి వివక్ష పాలన కాలంలో ఆమె వర్ణవివక్షకు వ్యతిరేకంగా పోరాడిన నేతలకు, హక్కుల కార్యకర్తలకు లాయర్‌గా ఉచితంగా సేవలందించారు. రాబెన్ ఐలాండ్‌లో జైలు శిక్ష అనుభవిస్తున్న నెల్సన్ మండేలా వంటి ప్రముఖ నేతల ప్రాథమిక హక్కుల కోసం, జైలులో వారి పరిస్థితి మెరుగ్గా ఉండాలంటూ పోరాడారు.

రువాండా అంతర్జాతీయ నేర ట్రైబ్యునల్ సేవలు

1995లో దక్షిణాఫ్రికా అధ్యక్షుడిగా నెల్సన్ మండేలా బాధ్యతలు స్వీకరించిన తర్వాత, నవీ పిళ్లైని దక్షిణాఫ్రికా హైకోర్టు మొదటి నల్లజాతీయ మహిళా న్యాయమూర్తిగా నియమించారు. అదే ఏడాది ఐక్యరాజ్యసమితి జనరల్ అసెంబ్లీ ఆమెను రువాండా అంతర్జాతీయ నేర ట్రైబ్యునల్ న్యాయమూర్తిగా నియమించి గౌరవించింది. ఆమె నాలుగేళ్ల పాటు అధ్యక్షురాలిగా బాధ్యతలు నిర్వహించారు. ఈ సమయంలో జాన్ పాల్ అకయేసు కేసులో మానభంగాన్ని కేవలం వ్యక్తిగత నేరంగా కాకుండా, "జెనోసైడ్", యుద్ధ నేరంగా గుర్తించే తీర్పును వెలువరించడంలో కీలక పాత్ర పోషించారు.

అంతర్జాతీయ నేర న్యాయస్థానం, యుఎన్ హైకమిషనర్

2003లో ది హేగ్‌లోని అంతర్జాతీయ నేర న్యాయస్థానం ఏర్పాటు కాగా, తొలి ఆరుగురు న్యాయమూర్తుల బృందంలో నవి పిళ్లై ఒకరు కావడం విశేషం. 2008 నుండి 2014 వరకు ఐక్యరాజ్యసమితి మానవ హక్కుల హైకమిషనర్ గా బాధ్యతలు నిర్వహించారు. ఆ సమయంలో ఆమె ప్రపంచవ్యాప్తంగా జరిగే యుద్ధ నేరాలు, జాతి నిర్మూలన, భావవ్యక్తీకరణ స్వేచ్ఛ, LGBTQ+ హక్కులు, మహిళా సాధికారతపై తన గళాన్ని వినిపించడంలో సక్సెస్ అయ్యారు.

మయన్మార్ రోహింగ్యా సంక్షోభం, ఆక్రమిత పాలస్తీనా ప్రాంతాలలో మానవ హక్కుల ఉల్లంఘనలపై ఏర్పాటు చేసిన UN స్వతంత్ర కమిషన్‌కు అధ్యక్షురాలిగా వ్యవహరించారు. న్యాయ రంగంలో, మానవ హక్కుల కోసం చేసిన సేవలకుగానూ ప్రపంచవ్యాప్తంగా అంతర్జాతీయ గౌరవ పురస్కారాలు, యూనివర్సిటీల నుంచి గౌరవ డాక్టోరేట్లను అందుకున్నారు.

US PERM Labor Certification Suspension: అమెరికాలో ఐటీ దిగ్గజాలకు భారీ షాక్ - పెర్మ్ సస్పెన్షన్.. భారత టెక్కీల గ్రీన్ కార్డ్ ఆశలు గల్లంతు!

Raja Sekhar Allu — Thu, 8 Oct 2026 21:31:42 +0530

US Department of Labor PERM Ban: అమెరికాలో ఐటీ రంగంలో పనిచేస్తూ శాశ్వత నివాస హోదా పొందాలని ఆశపడుతున్న వేలాది మంది భారతీయ నిపుణులకు అమెరికా ప్రభుత్వం తీరని గుండెకోత మిగిల్చింది. అమెరికన్ల ఉద్యోగ అవకాశాలు, వేతన భద్రతను పరిరక్షించడమే ధ్యేయంగా వైట్‌హౌస్ వేదికగా జరిగిన అత్యున్నత సమావేశంలో డిపార్ట్‌మెంట్ ఆఫ్ లేబర్ సంచలన నిర్ణయం ప్రకటించింది. వైస్ ప్రెసిడెంట్ జేడీ వాన్స్ నేతృత్వంలోని యాంటీ ఫ్రాడ్ టాస్క్‌ఫోర్స్ పర్యవేక్షణలో ఐటీ ఔట్‌సోర్సింగ్ దిగ్గజాలైన టాటా కన్సల్టెన్సీ సర్వీసెస్ , ఇన్ఫోసిస్, విಪ್ರో, హెచ్‌సీఎల్, కాగ్నిజెంట్, కాప్‌జెమినిలతో పాటు అంతర్జాతీయ టెక్ దిగ్గజాలు మైక్రోసాఫ్ట్, అడోబ్ వంటి సంస్థలపై పెర్మనెంట్ లేబర్ సర్టిఫికేషన్ కార్యక్రమం నుంచి తాత్కాలిక సస్పెన్షన్ వేటు వేసింది. ఇకపై ఈ సంస్థల నుంచి కొత్త పెర్మ్ దరఖాస్తులు స్వీకరించబోమని, ప్రస్తుతం ప్రాసెసింగ్‌లో ఉన్న ఫైళ్లను కూడా తక్షణమే నిలిపివేస్తున్నామని తేల్చిచెప్పింది.

BREAKING: VP JD Vance takes aim at Microsoft, accusing the tech giant of laying off thousands of American workers while bringing in foreign workers to replace them through the H-1B visa system. "There has been no company in the United States, unfortunately, that has abused the system more than Microsoft." Vance points to 6,000 layoffs alongside what he says were 6,300 H-1B visas and nearly 3,000 green cards, arguing that the numbers raise serious questions about how American workers are being treated. Download the FOX News app for the latest details: https://t.co/ISpW9Fc0R3
— Fox News (@FoxNews) October 8, 2026

అసలు అమెరికాలో విదేశీ ఉద్యోగికి EB-2, EB-3 కేటగిరీల కింద గ్రీన్ కార్డ్ స్పాన్సర్‌షిప్ ప్రారంభించాలంటే ఈ పెర్మ్ ప్రక్రియే అత్యంత కీలకమైన, చట్టబద్ధమైన మొదటి మెట్టు. సదరు ఉద్యోగానికి అవసరమైన అర్హతలున్న అమెరికన్ పౌరులు ఎవరూ స్థానికంగా అందుబాటులో లేరని, విదేశీయుడిని నియమించడం వల్ల స్థానిక వర్కర్ల వేతనాలపై ఎలాంటి ప్రతికూల ప్రభావం పడటం లేదని కంపెనీలు సాక్ష్యాధారాలతో కార్మిక శాఖకు నిరూపించి సర్టిఫికేషన్ పొందాల్సి ఉంటుంది. ఈ అనుమతి వచ్చిన తర్వాతే కంపెనీలు యూఎస్‌సీఐఎస్ వద్ద ఐ-140 పిటిషన్ దాఖలు చేసే అర్హత సాధిస్తాయి. ఇప్పుడు ఈ ప్రధాన రహదారినే అమెరికా మూసివేయడంతో సదరు దిగ్గజ సంస్థలు తమ ఉద్యోగుల తరఫున గ్రీన్ కార్డ్ ప్రక్రియను ప్రారంభించే అర్హతను కోల్పోయాయి.

గత కొన్నేళ్లుగా అమెరికా హెచ్-1బీ మరియు పెర్మ్ నిబంధనలను ఈ ఔట్‌సోర్సింగ్ కంపెనీలు పక్కదారి పట్టిస్తున్నాయని, లొసుగులను ఆసరాగా చేసుకుని విదేశీ నిపుణుల రిక్రూట్‌మెంట్‌లో తీవ్ర దుర్వినియోగానికి పాల్పడ్డాయని ఫెడరల్ దర్యాప్తు బృందాలు నిర్ధారించాయి. దాదాపు 30 లక్షల మంది విదేశీయుల కోసం దరఖాస్తులు చేసి, 2.3 లక్షలకు పైగా హెచ్-1బీ అనుమతులు, లక్షకు పైగా పెర్మ్ సర్టిఫికేషన్లు పొందడం ద్వారా అమెరికన్ పౌరులకు చెందాల్సిన స్థానిక ఉద్యోగ అవకాశాలను దెబ్బతీశారని కార్మిక శాఖ మండిపడింది. తీవ్ర ఫెడరల్ విచారణలు ఎదుర్కొంటున్న నేపథ్యంలో, స్థానిక కార్మికుల హక్కుల పరిరక్షణే ధ్యేయంగా ఈ కఠిన ఆంక్షలను అమలు చేస్తున్నట్లు స్పష్టం చేసింది.

US suspends some of major Indian firms and labelled them as “head of snake” https://t.co/x8i5dggch5
— Dr. Khurram Abbas (@itskhurramabbas) October 8, 2026

ఈ ఊహించని పరిణామం అమెరికాలోని భారతీయ ఐటీ రంగానికి, గ్రీన్ కార్డ్ ఆశావహులకు కోలుకోలేని పెద్ద షాక్‌గా మారింది. సదరు ప్రముఖ కంపెనీల్లో పనిచేస్తూ ఇప్పటికే పెర్మ్ అనుమతుల కోసం నెలల తరబడి వేచి చూస్తున్న వేలాది మంది సీనియర్ టెక్కీల భవిష్యత్తు ఒక్కసారిగా ప్రశ్నార్థకంలో పడింది. కొత్త దరఖాస్తుల నిలిపివేతతో పాటు పెండింగ్ ఫైల్స్ ప్రాసెస్ కాకపోవడం వల్ల గ్రీన్ కార్డ్ బ్యాక్‌లాగ్ మరింత పెరిగిపోయి, ప్రాసెసింగ్ కాలవ్యవధి దశాబ్దాల పాటు నిలిచిపోయే ప్రమాదం ఏర్పడింది. దీనివల్ల ఉద్యోగుల హెచ్-1బీ గడువు పొడిగింపులు, ఆన్-సైట్ ఉద్యోగ భద్రత తీవ్ర ప్రమాదంలో పడ్డాయి.

అమెరికన్ అధికారుల తాజా చర్యలు భారతీయ ఐటీ కంపెనీల వ్యాపార నమూనా , ఆన్-సైట్ డిప్లాయ్‌మెంట్ వ్యూహాలపై కోలుకోలేని ప్రభావం చూపే అవకాశం ఉంది. కార్మిక శాఖ సదరు కంపెనీల అంతర్గత రిక్రూట్‌మెంట్ విధానాలపై సమగ్ర ఆడిట్ నిర్వహించి, తనిఖీలను పూర్తి చేసి సస్పెన్షన్‌ను ఎత్తివేసేంత వరకు ఆయా సంస్థల్లోని విదేశీ ఉద్యోగులకు గ్రీన్ కార్డ్ దిశగా అడుగులు పడటం అసాధ్యంగా మారింది. అమెరికా ప్రభుత్వం తీసుకున్న ఈ నిర్ణయంతో గ్లోబల్ టెక్ వర్క్‌ఫోర్స్ సమీకరణాలు ఊహించని మలుపు తిరిగాయి.

Trump TV Ads: అమెరికాలో కొత్త వివాదం.. ప్రజాధనతో టీవీ యాడ్స్.. డొనాల్డ్ ట్రంప్‌పై డెమోక్రాట్ల దావా

Satyaprasad Bandaru — Thu, 8 Oct 2026 19:31:15 +0530

Trump TV Ads: అమెరికాలో రాజకీయ వాతావరణం మరోసారి వేడెక్కింది. పన్ను కట్టేవాళ్ల కష్టార్జితాన్ని సొంత ప్రచారం కోసం ఉపయోగించుకుంటున్నారని అమెరికా అధ్యక్షుడు డొనాల్డ్ ట్రంప్‌పై డెమొక్రాట్లు ఫైర్ అయ్యారు. ప్రజాధనంతో తనను తాను పొడిగించుకునేందుకు ఇచ్చిన టీవీ ప్రకటనలను తక్షణమే నిలిపివేయాలని కోరుతూ వాషింగ్టన్‌లోని ఫెడరల్ కోర్టులో పిటిషన్ వేశారు.

డెమోక్రాట్ల పిటిషన్

డెమోక్రటిక్ పార్టీకి చెందిన డెమోక్రటిక్ నేషనల్ కమిటీ బుధవారం ఈ దావాను దాఖలు చేసింది. ఎన్నికల ప్రచారం లేదా రాజకీయ ప్రోపగాండా కోసం ప్రభుత్వ నిధులను వినియోగించకూడదనే చట్టపరమైన నిబంధనను ట్రంప్ ఉల్లంఘించారని ఈ పిటిషన్‌లో ఆరోపించారు. మధ్యంతర ఎన్నికలకు 30 రోజుల కంటే తక్కువ సమయం మాత్రమే ఉన్న సమయంలో, పబ్లిక్ మనీతో ఎన్నికల లబ్ది పొందేలా ప్రకటనలు చేయడం స్వేచ్ఛాయుత, నిష్పక్షపాత ఎన్నికలకు విరుద్ధమని డెమోక్రాట్లు వాదిస్తున్నారు.

వైట్ హౌస్ వివరణ

ఈ ప్రకటనల వివాదంపై వ్యతిరేకత వ్యక్తమవ్వడంతో ట్రంప్ స్పందించారు. తన 'ట్రూత్ సోషల్' ఖాతాలో పోస్ట్ చేస్తూ.. ఆ ప్రకటనలు దేశంపై ఒక సానుకూల ప్రచారం కోసమని తాను భావిస్తున్నప్పటికీ, ఇకపై వాటికి పన్ను చెల్లింపుదారుల నిధులు ఉపయోగించబోమని తెలిపారు. ఆ ప్రకటనలకు సంబంధించిన ఖర్చులను తన 'MAGA PAC' (పొలిటికల్ యాక్షన్ కమిటీ) భరిస్తుందని వైట్ హౌస్ ప్రకటించింది.

అయితే, ట్రంప్ ప్రకటన తర్వాత కూడా పబ్లిక్ ఫండ్స్‌తో యాడ్స్ ప్రసారం చేశారని, ఇప్పటివరకు ఖర్చు చేసిన ప్రజాధనాన్ని ట్రంప్ రాజకీయ కమిటీ తిరిగి చెల్లించదని వైట్ హౌస్ స్పష్టం చేయడం గమనార్హం.

Also Read: మెడిసిన్ విభాగంలో ముగ్గురికి నోబెల్ బహుమతి.. ఒక్కో విజేతకు ప్రైజ్ మనీ ఎంతంటే

టీవీల్లో ప్రకటనలు

సెప్టెంబర్ చివరి నుంచి టీవీ చానెళ్లలో, ముఖ్యంగా ఫుట్‌బాల్ ఆటల ప్రసార సమయంలో ట్రంప్ ప్రభుత్వ ప్రకటనలు విపరీతంగా టెలికాస్ట్ అయ్యాయి. ఒక ప్రకటనలో ట్రంప్ "అమెరికా ఎప్పటికీ కమ్యూనిస్ట్ దేశం కాదు" అని ప్రకటిస్తుండగా, "నన్ను నమ్మండి" అనే కోరస్ మాటలు రావడం, మరో ప్రకటనలో మౌంట్ రష్‌మోర్ చిత్రాలతో పాటు, ట్రంప్ "అమెరికా స్వర్ణయుగం"ను ప్రశంసిస్తున్న వీడియోలు ఉన్నాయి. .ఇటీవల వచ్చిన మరో ప్రకటనలో వెనిజులా మాజీ అధ్యక్షుడు నికోలస్ మదురో కూడా కనిపించడం చర్చనీయాంశమైంది. ప్రభుత్వ నిధులతో రూపొందుతున్న ఈ ప్రకటనలు ప్రసారం అయ్యాయని మీడియా వర్గాలు చెప్పాయి.

Also Read: నమాజ్ చేసుకుంటానని లేచి, వెనుక నుంచి గొడ్డలితో దాడి! ఏం జరిగిందో చెప్పిన స్మిత్ మచ్చర్‌

Medicine Nobel Prize: మెడిసిన్ విభాగంలో ముగ్గురికి నోబెల్ బహుమతి.. ఒక్కో విజేతకు ప్రైజ్ మనీ ఎంతంటే

Shankar Dukanam — Mon, 5 Oct 2026 17:11:57 +0530

Medicine Nobel Prize 2026 | వైద్యశాస్త్రం (Medicine)లో చేసిన సేవలకుగానూ 2026 సంవత్సరానికి నోబెల్ బహుమతి ముగ్గురు శాస్త్రవేత్తలను వరించింది. సైంటిస్టులు కార్ల్ డిస్సెరోత్, పీటర్ హెగెమాన్, జార్జ్ నాగెల్‌లకు అత్యున్నత పురస్కారం నోబెల్ లభించింది. కాంతి- నియంత్రిత అయాన్ ఛానెల్స్, ఆప్టోజెనెటిక్స్ పై వారి ఆవిష్కరణలకు ఈ అవార్డు అందుకుంటున్నారు. సజీవ మెదడులోని నాడుల కణాలు (న్యూరాన్లు) మన జ్ఞాపకాలను, భావోద్వేగాలను, ప్రవర్తనను ఎలా ప్రభావితం చేస్తాయో చూపించడం వీరు చేసిన ప్రయోగం ద్వారా సాధ్యమైంది.

పీటర్ హెగెమాన్, జార్జ్ నాగెల్ ఒక ఏకకణ నాచు (శైవలం)లో ఛానెల్‌ రోడాప్సిన్ అనే అద్భుతమైన ప్రోటీన్‌ ఉన్నట్లు కనుగొన్నారు. కార్ల్ డిస్సెరోత్ ఈ ప్రోటీన్‌ను నరాల కణాల కోసం కాంతితో నియంత్రించగలిగే ఒక 'స్విచ్' విధానం తీసుకొచ్చారు.

ఎవరీ జార్జ్ నాగెల్?

ప్రముఖ శాస్త్రవేత్త జార్జ్ నాగెల్ 1953లో జన్మించారు. ఆయన 1988లో జర్మనీలోని ఫ్రాంక్‌ఫర్ట్ యూనివర్సిటీ నుంచి పీహెచ్‌డీ పట్టా అందుకున్నారు. జార్జ్ నాగెల్ ప్రస్తుతం యూనివర్సిటీ ఆఫ్ వుర్జ్‌బర్గ్ (జర్మనీ) మాలిక్యులర్ ప్లాంట్ ఫిజియాలజీ విభాగంలో ప్రొఫెసర్‌గా సేవలు అందిస్తున్నారు. ఈ పురస్కారానికి ఎంపికైన పరిశోధనను ఆయన జర్మనీలోని 'మాక్స్ ప్లాంక్ ఇన్స్టిట్యూట్ ఫర్ బయోఫిజిక్స్'లో చేసి చూపించారు.

కార్ల్ డిస్సెరోత్ ఎవరు..

కార్ల్ డిస్సెరోత్ 1971లో జన్మించారు. 27 ఏళ్ల వయసులో 1998లో స్టాన్‌ఫోర్డ్ యూనివర్సిటీ నుంచి పీహెచ్‌డీ, 2000లో ఎమ్‌డీ డిగ్రీ పూర్తి చేశారు. ఆయన ప్రస్తుతం హోవార్డ్ హ్యూస్ మెడికల్ ఇన్స్టిట్యూట్, స్టాన్‌ఫోర్డ్ యూనివర్సిటీలో 'డి.హెచ్ చెన్ ప్రొఫెసర్'గా, అలాగే బయోఇంజనీరింగ్, సైకియాట్రీ మరియు బిహేవియరల్ సైన్సెస్ ప్రొఫెసర్‌గా పనిచేస్తున్నారు.

సీనియర్ ప్రొఫెసర్ పీటర్ హెగెమాన్

వైద్యశాస్త్రంలో నోబెల్ బహుమతికి ఎంపికైన పీటర్ హెగెమాన్ 1984లో జర్మనీకి చెందిన మాక్స్ ప్లాంక్ ఇన్స్టిట్యూట్ ఫర్ బయోకెమిస్ట్రీ విభాగం నుంచి పీహెచ్‌డీ పూర్తి చేశారు. జర్మనీలోని హంబోల్ట్ యూనివర్సిటీ ఆఫ్ బెర్లిన్‌లో 'హర్టీ సీనియర్ ప్రొఫెసర్ ఆఫ్ న్యూరోసైన్స్'గా పీటర్ హెగెమాన్ చేస్తున్నారు. ఈ అత్యున్నత పురస్కారానికి ఎంపికైన పరిశోధనను ఆయన జర్మనీలోని మాక్స్ ప్లాంక్ ఇన్స్టిట్యూట్ ఫర్ బయోకెమిస్ట్రీ లో చేసి నిరూపించారు.

నోబెల్ విజేతలకు ప్రైజ్ మనీ

నోబెల్ బహుమతి విజేతలకు అందించే మొత్తం నగదు బహుమతి 1.2 కోట్ల స్వీడిష్ క్రోనర్ (దాదాపు 11 లక్షల 96 వేల డాలర్లు). ఒకరు విజేతగా నిలిస్తే వారికే మొత్తం నగదు లభిస్తుంది. ముగ్గురు విజేతలు కనుక ఈ మొత్తాన్ని ఆ ఏడాది విజేతలకు సమానంగా పంచుతారు. నోబెల్ అసెంబ్లీ 1977 ఏడాదిలో స్థాపించారు. వైద్య రంగంలో నోబెల్ బహుమతిని అందజేసే కరోలిన్స్కా ఇన్స్టిట్యూట్‌కు ఇది ప్రధాన సంస్థ. స్టాక్‌హోంం‌లోని కరోలిన్స్కా ఇన్స్టిట్యూట్‌లో నోబెల్ బహుమతి ప్రకటన చేస్తారు. ఈ ప్రకటనతో 2026 ఏడాదికిగానూ నోబెల్ వారోత్సవాలు ప్రారంభమయ్యాయి. ఇతర రంగాలలో సైతం నోబెల్ విజేతలను ప్రకటిస్తారు.