Donald Trump Social Post: నేను వెనిజులా తాత్కాలిక అధ్యక్షుడ్ని.. సంచలనంగా మారిన డొనాల్డ్ ట్రంప్ వ్యవహారం
అమెరికా అధ్యక్షుడు డొనాల్డ్ ట్రంప్ అధికారిక పోర్ట్రెయిట్ ట్రూత్ సోషల్ పోస్టులో తాను "వెనిజులా తాత్కాలిక అధ్యక్షుడు, జనవరి 2026" అని పేర్కొన్నారు. దాంతో వెనిజులాపై ఆధిపత్యం చెలాయించే అవకాశముంది.
Acting President Of Venezuela | న్యూయార్క్: అమెరికా అధ్యక్షుడు డొనాల్డ్ ట్రంప్ తన సోషల్ మీడియా సైట్ ట్రూత్ సోషల్ లో చేసిన పోస్ట్ కలకలం రేపుతోంది. అందులో తన హోదాను "వెనిజులా తాత్కాలిక అధ్యక్షుడు"గా ట్రంప్ పేర్కొన్నారు. ఆదివారం నాడు ట్రూత్ సోషల్ లో పోస్ట్ చేసిన ఈ పోస్ట్ లో ట్రంప్ అధికారిక ఫొటో ఉంది, ఆ తర్వాత వెనిజులా తాత్కాలిక అధ్యక్షుడు, ఇన్కంబెంట్ జనవరి 2026 అని రాసి ఉంది. జనవరి 20న పదవిని చేపట్టిన అమెరికా 45వ, 47వ అధ్యక్షుడిగా డొనాల్డ్ ట్రంప్ ఉన్నారు.
డొనాల్డ్ జె. ట్రంప్ నుండి కొత్త మీడియా పోస్ట్
— వ్యాఖ్య: ట్రంప్ ట్రూత్ సోషల్ పోస్ట్లు Xలో (@TrumpTruthOnX) జనవరి 12, 2026
(TS: 11 జనవరి 20:23 ET) pic.twitter.com/aVehtmdCrl
ఈ నెల ప్రారంభంలో అమెరికా సైన్యం వెనిజులాపై పెద్ద ఎత్తున దాడి చేసి, రాజధాని కారకాస్ నగరంలోని నివాసంపై దాడి చేసి అధ్యక్షుడు నికోలస్ మదురోను బంధించింది. అతనితో పాటు అతని భార్య సిలియా ఫ్లోరెస్ను సైతం అమెరికా సైన్యం న్యూయార్క్కు తరలించింది. అక్కడ వారిపై నార్కో-టెర్రరిజం కుట్ర ఆరోపణలు మోపగా కోర్టులో విచారణకు హాజరుపరిచారు.
వెనిజులాను పాలిస్తామన్న ట్రంప్..
"సురక్షితమైన, సరైన పాలన వచ్చేంత వరకు" వెనిజులాను అమెరికా నడుపుతుందని అగ్రరాజ్యాధినేత ట్రంప్ చెప్పారు. వెనిజులా ప్రజల ప్రయోజనాలను దృష్టిలో ఉంచుకోని మరెవరైనా వెనిజులాను స్వాధీనం చేసుకునే అవకాశం ఇవ్వలేమని వెనిజులా ఉపాధ్యక్షురాలు, తాత్కాలిక అధ్యక్షురాలు, చమురు శాఖల మంత్రి డెల్సీ రోడ్రిగ్జ్ అన్నారు. వెనిజులా సుప్రీంకోర్టు ఆదేశాల ప్రకారం గత వారం దేశ తాత్కాలిక అధ్యక్షురాలిగా ఆమె అధికారికంగా ప్రమాణ స్వీకారం చేశారు.
తాత్కాలిక అధికారులు వెనిజులాలో 30 నుండి 50 మిలియన్ బ్యారెల్స్ "అధిక నాణ్యత గల, ఆంక్షలు విధించిన చమురు"ను అమెరికాకు అందజేయాలని ట్రంప్ అన్నారు. ఈ చమురును మార్కెట్ ధరలో విక్రయించాలని అమెరికా భావిస్తోంది.
అమెరికాకు సైతం వెనిజులా ముడి చమురు నగదు
"ఆ డబ్బును నేను అమెరికా అధ్యక్షుడిగా వెనిజులాతో పాటు అమెరికా ప్రజలకు ప్రయోజనం చేకూర్చేలా చూస్తాను. ఈ పథకాన్ని వెంటనే అమలు చేయమని ఇంధన కార్యదర్శి క్రిస్ రైట్ను కోరాను. ఇది నిల్వ నౌకల ద్వారా తీసుకుంటాం. దాంతో నేరుగా యునైటెడ్ స్టేట్స్లోని అన్లోడింగ్ డాక్లకు తరలిస్తారని" డొనాల్డ్ ట్రంప్ అన్నారు.
చైనా, రష్యా సహా పలు దేశాలు అమెరికా నిర్ణయాన్ని తీవ్రంగా వ్యతిరేకించాయి. ఐక్యరాజ్యసమితి సైతం అమెరికా అధ్యక్షుడు తీసుకున్న నిర్ణయంపై ఆశ్చర్యం వ్యక్తం చేసింది. ఇది పలు దేశాల మధ్య యుద్ధ వాతావరణాన్ని సృష్టిస్తుందని ఆందోళన వ్యక్తం చేసింది. మరోవైపు ఇజ్రాయెల్, అమెరికా సైన్యం ఇరాన్ పై దాడులకు యత్నిస్తున్నాయి. మరోవైపు ఇరాన్లో ప్రభుత్వానికి వ్యతిరేకంగా ఆందోళన, నిరసన ఉద్రిక్తతలకు దారితీస్తున్నాయి. అక్కడ జరిగిన నిరసనలో పాల్గొన్న వారిలో 500 మందికి పైగా ప్రాణాలు కోల్పోగా, వేల మందిని పోలీసులు అరెస్ట్ చేశారు. తమ ప్రజలపై దాడులు చేస్తే కనుక తాము ఇజ్రాయెల్, అమెరికా సైన్యాన్ని లక్ష్యంగా చేసుకుని దాడులు చేస్తామని ఇరాన్ అధినేత హెచ్చరించారు.
టాప్ హెడ్ లైన్స్
ట్రెండింగ్ వార్తలు
