Why Iran is not attacking America directly: ఇరాన్ నేరుగా అమెరికా ప్రధాన భూభాగంపై దాడి చేయకుండా, గల్ఫ్ దేశాల్లోని అమెరికా సైనిక స్థావరాలనే ఎందుకు లక్ష్యంగా చేసుకుంటుందనేది చాలా మందిలో మెదిలే ప్రశ్న. దీని వెనుక బలమైన భౌగోళిక, సైనిక, వ్యూహాత్మక కారణాలు ఉన్నాయి.
దూరం , సాంకేతిక పరిమితులు
ఇరాన్ నేరుగా ఆమెరికాపై దాడి చేయలేకపోవడానికి మొదటి కారణం భౌగోళిక దూరం. ఇరాన్ నుండి అమెరికా సుమారు 10,000 కిలోమీటర్ల దూరంలో ఉంది. అంత దూరం ప్రయాణించి అమెరికా గడ్డపై కచ్చితత్వంతో దాడి చేయగలిగే ఖండాంతర క్షిపణి సాంకేతికత ఇరాన్ వద్ద ఉన్నప్పటికీ, అది పరిమితం. అదే సమయంలో గల్ఫ్ దేశాల్లోని అమెరికా స్థావరాలు ఇరాన్కు కేవలం కొన్ని వందల కిలోమీటర్ల దూరంలోనే ఉన్నాయి. ఇరాన్ వద్ద ఉన్న షాహబ్, ఫతా వంటి క్షిపణులు , డ్రోన్లు ఈ తక్కువ దూరాన్ని సులభంగా చేరుకోగలవు.
వ్యూహాత్మక ఒత్తిడి
అమెరికా తన సైనిక శక్తిని ప్రపంచవ్యాప్తంగా ప్రదర్శించడానికి గల్ఫ్ దేశాల్లోని ఖతార్లోని అల్-ఉదీద్, యూఏఈలోని అల్-ధఫ్రా వాడుకుంటుంది. ఈ స్థావరాలపై దాడి చేయడం ద్వారా మీరు మా మీద దాడి చేస్తే, మీ సైన్యం ఎక్కడున్నా క్షేమం కాదు అనే సంకేతాన్ని ఇరాన్ పంపిస్తోంది. అమెరికా సైనికుల మరణాలు సంభవిస్తే, అది అమెరికాలో రాజకీయంగా పెద్ద చర్చకు దారితీస్తుందని, తద్వారా యుద్ధాన్ని విరమించుకోవాలని ఒత్తిడి పెరుగుతుందని ఇరాన్ భావిస్తుంది.
గల్ఫ్ దేశాలను హెచ్చరించడం
గల్ఫ్ దేశాలు అమెరికాకు ఆశ్రయం ఇవ్వడం వల్లనే తమపై దాడులు జరుగుతున్నాయని ఇరాన్ వాదన. గల్ఫ్ దేశాలలోని అమెరికా బేస్లపై దాడి చేయడం ద్వారా, ఆయా దేశాలకు ఇరాన్ ఒక గట్టి హెచ్చరిక పంపుతోంది. మాపై దాడులకు మీ గడ్డను ఉపయోగించుకోవద్దు, అలా చేస్తే మీ ఆర్థిక వ్యవస్థ చమురు బావులు, నౌకాశ్రయాలు కూడా ముప్పులో పడతాయి అని భయపెట్టడం ఇరాన్ ముఖ్య ఉద్దేశం. దీనివల్ల గల్ఫ్ దేశాలు అమెరికాకు సహకరించకుండా వెనకడుగు వేసే అవకాశం ఉంటుందని ఇరాన్ భావిస్తోంది.
డైరెక్ట్ యుద్ధం వల్ల వచ్చే ముప్పు
ఒకవేళ ఇరాన్ నేరుగా అమెరికా భూభాగంపై దాడి చేస్తే, అది పూర్తి స్థాయి యుద్ధం కు దారితీస్తుంది. అమెరికా తన అణ్వాయుధాలను కూడా ఉపయోగించే ప్రమాదం ఉంది. అలా కాకుండా కేవలం ప్రాంతీయ స్థావరాల మీద దాడి చేయడం వల్ల, దాన్ని ఒక పరిమిత యుద్ధం గా ఉంచవచ్చని ఇరాన్ వ్యూహం. ఇది ఇరాన్ తన అస్తిత్వాన్ని కాపాడుకుంటూనే ప్రతిఘటించే పద్ధతి.
ప్రాంతీయ ఆధిపత్యం
పశ్చిమాసియా నుండి అమెరికా సైన్యాన్ని తరిమివేయడం ఇరాన్ ప్రధాన లక్ష్యం. స్థావరాలపై పదే పదే దాడులు చేయడం వల్ల అమెరికాకు అక్కడ ఉండటం ఖర్చుతో కూడుకున్న పనిగా మారుతుంది. తద్వారా అమెరికా వెనక్కి వెళ్తే, ఆ ప్రాంతంలో ఇరాన్ తన ఆధిపత్యాన్ని సుస్థిరం చేసుకోవచ్చని వారి ఆలోచన. అందుకే అమెరికా మెయిన్ల్యాండ్ కంటే గల్ఫ్ బేస్లే ఇరాన్కు ప్రధాన లక్ష్యాలుగా మారాయి.