Viral News:
చిత్రకూట్ వాటర్‌ఫాల్స్ వద్ద ఘటన..
ఛత్తీస్‌గఢ్‌లోని చిత్రకూట్ వాటర్‌ఫాల్స్‌లోకి దూకి ఓ యువతి ఆత్మహత్యాయత్నానికి పాల్పడింది. 90 అడుగుల ఎత్తులో నుంచి ఆమె దూకుతుండగా అక్కడే ఉన్న కొందరు వీడియో తీశారు. ఇది సోషల్ మీడియాలో వైరల్ అవుతోంది. బస్తర్‌లోని చిత్రకూట్ చౌకీ ప్రాంతంలో ఇది జరిగింది. ఆత్మహత్యాయత్నం చేసిన యువతిని సరస్వతి మౌర్యగా గుర్తించారు. మొబైల్ ఎక్కువగా వాడుతోందని తల్లిదండ్రులు వారించినందుకు ఇలా సూసైడ్ చేసుకోడానికి ప్రయత్నించినట్టు పోలీసులు వెల్లడించారు. ఆమె దూకిన వెంటనే బోట్‌లో కొందరు వెళ్లి ఆమెని కాపాడారు. కొండపై నిలబడి నీళ్లలోకి దూకేందుకు ప్రయత్నిస్తున్నప్పుడే అక్కడి వాళ్లు ఆమెని వారించారు. దూకొద్దు అని గట్టిగా కేకలు వేశారు. వాళ్లందరినీ చూసిన ఆమె వెంటనే నీళ్లలోకి దూకేసింది. భారీ వర్షాల కారణంగా బస్తర్‌లో నదులు ఉప్పొంగుతున్నాయి. దాదాపు 30 గంటల పాటు వర్షాలు కురుస్తూనే ఉన్నాయి. బస్తర్‌కి లైఫ్‌లైన్‌గా ఉండే ఇంద్రావతి నదిలో నీటిమట్టం పెరిగిపోయింది. ఈ కారణంగా చిత్రకూట్ వాటర్‌ఫాల్స్ మరింత ఉద్దృతంగా మారింది. మినీ నయాగరా వాటర్‌ఫాల్స్‌గా దీన్ని పిలుచుకుంటారు.