TVK Election Manifesto 2026: జాబ్ క్యాలెండర్, 20 లక్షల పూచీకత్తు లేని రుణాలు.. టీవీకే పార్టీ ఎలక్షన్ మేనిఫెస్టోపై విజయ్
TVK Manifesto for Tamil Nadu Election 2026 | తమిళనాడు అసెంబ్లీ ఎన్నికల్లో ఒంటరిగా పోటీచేస్తున్న టీవీకే అధినేత విజయ్ జాబ్ క్యాలెండర్ సహా వడ్డీ లేని రుణాలు లాంటి కీలక హామీలిచ్చారు.
తమిళనాడు అసెంబ్లీ ఎన్నికల బరిలోకి దిగుతున్న తమిళ వెట్రి కజగం (TVK) అధ్యక్షుడు విజయ్ జాబ్ క్యాలెండర్, పూచీకత్తు లేని ఎడ్యుకేషన్ లోన్ సహా పలు కీలక హామీలను ప్రకటించారు. డ్రగ్స్ లేని తమిళనాడు తమ ముఖ్య లక్ష్యాలలో ఒకటిగా పేర్కొన్నారు. క్షేత్రస్థాయిలో ప్రజలతో మమేకమై ఉండేవారినే తాను అభ్యర్థులుగా ఎంపిక చేశానని విజయ్ చెప్పారు. తాను అన్ని వేళలా, అన్ని చోట్లా ఉండలేను కనుక ప్రతి అభ్యర్థిని స్వయంగా చూసి ఎంచుకుని తన ప్రతినిధులుగా నిలబెట్టినట్లు తెలిపారు. ‘మన అక్కలు, చెల్లెళ్లు, అన్నలు, తమ్ముళ్లనే అభ్యర్థులుగా ఎంచుకున్నాను. ఎన్నికల్లో ఓటు వేసి వారిని ఎమ్మెల్యేలుగా గెలిపించాల్సిన బాధ్యత మీదే’ అని విజయ్ కోరారు.
టీవీకే ఎన్నికల మేనిఫెస్టోను విడుదల చేసిన విజయ్
డ్రగ్స్ రహిత తమిళనాడు: మాదకద్రవ్యాల రహిత రాష్ట్రాన్ని నిర్మించేందుకు ప్రత్యేక విధానాలను అమలు చేస్తానని విజయ్ పార్టీ హామీ.
రూ. 20 లక్షల వరకు ఎడ్యుకేషన్ లోన్: ఆర్థిక ఇబ్బందుల వల్ల ఏ విద్యార్థి చదువు ఆగిపోకూడదనే లక్ష్యంతో 12వ తరగతి నుండి పీహెచ్డీ వరకు చదువుకునే వారికి ఎటువంటి పూచీకత్తు లేకుండా రూ. 20 లక్షల వరకు విద్యా రుణాలు ఇస్తామన్న విజయ్
జాబ్ క్యాలెండర్: ఏపీ బాటలోనే విజయ్ పయనిస్తున్నారు. ఏపీ తరహాలోనే ప్రభుత్వ ఉద్యోగాల భర్తీ కోసం పరీక్షల నిర్వహణ, నియామకాలకు సంబంధించి ఒక వార్షిక క్యాలెండర్ను విడుదల చేసి అమలు చేస్తామని హామీ ఇచ్చారు విజయ్.
నిరుద్యోగ భృతి: ఏపీ, తెలంగాణలో ఇలాంటి హామీలు ఇచ్చినా అమలు చేయలేదు. తమిళనాడులోనూ టీవీకే పార్టీ నిరుద్యోగ భృతితో యువ ఓటర్లను ఆకర్షిస్తోంది. 29 ఏళ్లు దాటినా జాబ్ లభించని గ్రాడ్యుయేట్లకు నెలకు రూ. 4,000, డిప్లొమా పూర్తి చేసిన వారికి నెలకు రూ. 2 వేలు చొప్పున నిరుద్యోగ భృతి.
స్థానికులకు ఉపాధి - ప్రైవేట్ సంస్థలకు రాయితీలు: తమ సంస్థలోని మొత్తం సిబ్బందిలో 75 శాతం మంది తమిళులను నియమించుకునే ప్రైవేట్ కంపెనీలకు రాష్ట్ర జీఎస్టీ (SGST)లో 2.5 శాతం సబ్సిడీ, విద్యుత్ ఛార్జీలలో 5 శాతం రాయితీ, ప్రభుత్వ కొనుగోళ్లలో ప్రాధాన్యత కల్పిస్తామని విజయ్ ప్రకటించారు.
#WATCH | Chennai, Tamil Nadu: Actor and TVK chief Vijay announces the list of candidates for the 2026 Assembly elections today.
— ANI (@ANI) March 29, 2026
Vijay is contesting in 2 constituencies- Trichy East and Perambur (Chennai)
(Source: TVK) pic.twitter.com/20Ga9CvY5Z
టీవీకే అభ్యర్థుల జాబితా ప్రకటించిన విజయ్
తమిళనాడు అసెంబ్లీ ఎన్నికల వేళ తమిళ వెట్రి కజగం (TVK) అధినేత విజయ్ అభ్యర్థుల జాబితా ప్రకటించారు. రాష్ట్రంలోని మొత్తం 234 నియోజకవర్గాల్లో ఒంటరిగా పోటీ చేస్తోంది టీవీకే పార్టీ. చెన్నై జిల్లాలోని పెరంబూర్, తిరుచ్చి ఈస్ట్ స్థానాల నుండి టీవీకే అధినేత విజయ్ బరిలోకి దిగుతున్నారు. డీఎంకే, ఏఐఏడీఎంకే వంటి ప్రధాన కూటములకు దీటుగా తన అభ్యర్థులను ఆచితూచి ఎంపిక చేసినట్లు విజయ్ స్పష్టం చేశారు. చెన్నైలోని నుంగంబాక్కంలో ఉన్న ఒక ప్రైవేట్ హోటల్లో జరిగిన అభ్యర్థుల పరిచయ కార్యక్రమంలో అందరి వివరాలను వెల్లడించారు. నామినేషన్ల ప్రక్రియ మార్చి 30న ప్రారంభం కానున్న తరుణంలో విజయ్ అభ్యర్థుల జాబితా విడుదల చేయడంతో పాటు టీవీకే పార్టీ ఎన్నికల హామీలను ప్రకటించారు.
ఒక ఎమ్మెల్యే ఎలా ఉండాలి?
అనంతరం ఆయన ప్రసంగిస్తూ, ఒక ఎమ్మెల్యే ఎలా ఉండాలో వివరించిన తీరు అక్కడ ఉన్న పార్టీ శ్రేణుల్లో ఉత్సాహాన్ని నింపింది. ఇది కేవలం అభ్యర్థుల పరిచయ కార్యక్రమం మాత్రమే కాదని, ప్రజల రక్షకులను పరిచయం చేసే కార్యక్రమమని తన ప్రసంగాన్ని ప్రారంభించారు. పార్టీ అభ్యర్థులంతా సాధారణ కుటుంబాల నుండి వచ్చిన వారేనని, వారికి పెద్దగా బ్యాక్గ్రౌండ్ ఏమీ లేదని అందరూ అంటున్నారు. అయితే, ఒక ఎమ్మెల్యే అంటే ఎలా ఉండాలో చెబుతూ:
ఒక ఎమ్మెల్యే తన అనుభవాన్ని ప్రజలకు సేవ చేసేందుకు ఉపయోగించాలి. కానీ దోచుకునేవాడిగా ఉండకూడదు.
ఎమ్మెల్యే పదవి అనేది సాధారణమైనది కాదు. ఆ నియోజకవర్గ ప్రజలకు రక్షకులుగా ఉండాలి
అనుభవం ఉందని క్వారీ పనుల్లో (మైనింగ్) నిమగ్నం కాకూడదు.
కేవలం అనుభవం ఉంది కదా అని ప్రశ్నలు అడిగే జర్నలిస్టులపై దాడులు చేసేవారిలా ఉండకూడదు అన్నారు.
ఇంకా స్పష్టంగా చెప్పాలంటే.. డీఎంకే (DMK) నుండి వచ్చిన ఒక ఎమ్మెల్యేపై దోపిడీ కేసులు, డ్రగ్స్ స్మగ్లింగ్ కేసులు ఉన్నాయని, దొంగతనం కేసులో జైలుకు వెళ్లి వచ్చిన వారు కూడా ఉన్నారని విజయ్ విమర్శించారు. నేడు డీఎంకే కూటమిలో ఉంటూ నిరంతరం మద్దతు ఇస్తున్న ఒక పెద్ద నాయకుడికి వ్యతిరేకంగానే 1996 ఎన్నికల్లో ఆయనను నిలబెట్టారని తెలిపారు. ఆ నాయకుడి పేరు తాను చెప్పడం లేదని, ఇలాంటి ఎమ్మెల్యేలు కూడా ఉన్నారని విజయ్ పేర్కొన్నారు. .
టాప్ హెడ్ లైన్స్
ట్రెండింగ్ వార్తలు
