india

DMK BJP alliance rumors: కాంగ్రెస్‌పై యుద్ధం - పాత మిత్రుడిని విలన్‌గా మార్చి.. బీజేపీ వైపు డీఎంకే చూపు?

Raja Sekhar Allu — Mon, 25 May 2026 08:54:46 +0530

Stalin vs Congress: తమిళనాడు రాజకీయాల్లో మార్పులు వేగంగా చోటు చేసుకుంటున్నాయి. డీఎంకే ఇప్పటికే కాంగ్రెస్ కూటమి నుంచి బయటకు వచ్చినప్పటికీ, తాజాగా ఉదయనిధి స్టాలిన్ ఆ పార్టీపై చేసిన వ్యాఖ్యలు రాజకీయ వర్గాల్లో ప్రకంపనలు సృష్టిస్తున్నాయి. కాంగ్రెస్‌ను ఎన్నటికీ నమ్మకూడదు.. వారికి కృతజ్ఞత లేదు అని అనడం ద్వారా, కాంగ్రెస్‌తో భవిష్యత్తులో కూడా ఎటువంటి పొత్తు ఉండబోదనే బలమైన సంకేతాన్ని ఇచ్చారు.

ఇండియా కూటమి ముగిసిన అధ్యాయం

ముఖ్యమంత్రి స్టాలిన్ ఇప్పటికే ఇండియా కూటమి ప్రస్తావనను పక్కన పెట్టారు. జాతీయ స్థాయిలో కాంగ్రెస్ బలహీనత వల్ల దేశంలో బీజేపీ బలపడుతోందని, ఆ పాపం కాంగ్రెస్‌దేనని ఉదయనిధి ఇప్పుడు బహిరంగంగానే ఆరోపిస్తున్నారు. తమ స్వయం ప్రతిపత్తిని చాటుకుంటూనే, జాతీయ స్థాయిలో కాంగ్రెస్‌ను ఒక విలన్ గా చిత్రించడం ద్వారా డీఎంకే తన పంథాను మార్చుకుంది.

BIG BREAKING NEWS 🚨 UDHAYANIDHI STALIN SAYS --

"DMK should never trust the Congress again"

"Congress leaders lack basic gratitude and decency"

"They won seats due to DMK. Today, for some positions, they ran away without informing us" 😳

"We should never allow them near us.… pic.twitter.com/oMliexA6fR
— News Algebra (@NewsAlgebraIND) May 24, 2026

బీజేపీకి దగ్గరయ్యే వ్యూహాత్మక ప్రణాళిక?

కాంగ్రెస్‌ను ఇంత తీవ్రంగా నిందించడం వెనుక బీజేపీతో సయోధ్య కుదుర్చుకునే ప్రయత్నాలు ఉన్నట్లు కనిపిస్తోందన్న అభిప్రాయం వినిపిస్తోంది. ఒకప్పుడు తీవ్రంగా వ్యతిరేకించిన బీజేపీకి దగ్గరవ్వడం ద్వారా, కేంద్రం నుంచి రావలసిన నిధులను రాబట్టడం, దర్యాప్తు సంస్థల ఒత్తిడిని తగ్గించుకోవడం డీఎంకే అసలు లక్ష్యంగా తెలుస్తోంది. కాంగ్రెస్‌ను దూరం పెట్టడం అంటే ఢిల్లీ పీఠంపై ఉన్న వారికి స్నేహ హస్తం అందించడమేనని విశ్లేషకులు భావిస్తున్నారు. బీజేపీతో స్నేహం కుదిరితే, గతంలో తాను సనాతన ధర్మంపై చేసిన వ్యాఖ్యలను ఉదయనిధి మెల్లగా సరిదిద్దుకునే అవకాశం ఉంది. తమ పోరాటం కుల వివక్షపైనే తప్ప, హిందూ ధర్మంపై కాదు అనే కొత్త వాదనను తెరపైకి తెచ్చి, హిందూ ఓటర్లను ఆకట్టుకునే ప్రయత్నం చేయవచ్చు. రాబోయే రెండేళ్లలో ఉదయనిధి ప్రసంగాల్లో ఈ మార్పు స్పష్టంగా కనిపిస్తుందని అంచనా.

టీవీకే , ఇతర మిత్రపక్షాల సమీకరణం

విజయ్ స్థాపించిన టీవీకే వైపు తమ ఇతర మిత్రపక్షాలు పార్టీలు వెళ్లినా, డీఎంకే మాత్రం కాంగ్రెస్‌నే టార్గెట్ చేస్తోంది. దీనివల్ల కాంగ్రెస్ మిగిలిన మిత్రపక్షాలతో కలిసి విజయ్ వైపు వెళ్లకుండా నిరోధించవచ్చని, లేదా కాంగ్రెస్‌ను పూర్తిగా ఏకాకిని చేయవచ్చని డీఎంకే భావిస్తోంది. 2026 అసెంబ్లీ ఎన్నికల నాటికి తమిళనాడులో కాంగ్రెస్ ముక్త ద్రవిడ రాజకీయం నడవాలని ఉదయనిధి స్కెచ్ వేస్తున్నారు. మొత్తానికి తమిళనాడు రాజకీయాల్లో సంచలనాత్మక మార్పులు చోటుచేసుకోబోతున్నాయి. కాంగ్రెస్‌ను విలన్‌గా మార్చడం, బీజేపీకి దగ్గరవ్వడం, సనాతన ధర్మంపై వైఖరిని మార్చుకోవడం.. ఇవన్నీ ఉదయనిధి స్టాలిన్‌ను భావి ముఖ్యమంత్రిగా సుస్థిరపరిచే వ్యూహంలో భాగాలు. రాబోయే రెండేళ్లలో డీఎంకే వేసే ప్రతి అడుగు దేశవ్యాప్తంగా చర్చనీయాంశం కానుంది.

Union Cabinet Expansion 2026: కేంద్రమంత్రివర్గంలో సంచలన మార్పులు - కొంత మంది సీఎంలను కేంద్రమంత్రుల్ని చేయబోతున్నారా?

Raja Sekhar Allu — Mon, 25 May 2026 08:29:52 +0530

Former Chief Ministers in Central Cabinet: ఢిల్లీ రాజకీయాల్లో ఇప్పుడు ఎక్కడ చూసినా కేంద్ర మంత్రివర్గ విస్తరణ గురించిన చర్చలే నడుస్తున్నాయి. మోదీ 3.0 ప్రభుత్వం కొలువుదీరి దాదాపు రెండేళ్లు కావస్తున్న తరుణంలో, పాలనలో సరికొత్త జోష్ నింపేందుకు ప్రధాని భారీ మార్పులకు శ్రీకారం చుట్టబోతున్నారనే ప్రచారం జరుగుతోంది. ఈ సారి జరగబోయే విస్తరణలో కేవలం ఎంపీలు మాత్రమే కాదు, ఏకంగా ఇద్దరు ముగ్గురు మాజీ ముఖ్యమంత్రులకు కూడా చోటు దక్కబోతోందనేది ప్రధానంగా వినిపిస్తున్న గాసిప్.

ఢిల్లీ పదవులలోకి పైకి మాజీ సీఎంలు?

ఈ సారి మంత్రివర్గంలోకి మాజీ ముఖ్యమంత్రులను తీసుకు రావడం ద్వారా అనుభవం అనే కార్డును మోదీ ప్లే చేయబోతున్నారు. ఇప్పటికే శివరాజ్ సింగ్ చౌహాన్, మనోహర్ లాల్ ఖట్టర్ వంటి వారు కేబినెట్‌లో ఉండగా, మరో ఇద్దరు లేదా ముగ్గురు మాజీ సీఎంల పేర్లు ఇప్పుడు ప్రముఖంగా వినిపిస్తున్నాయి. వీరిని కేబినెట్ స్థాయి హోదాతో కీలక మంత్రిత్వ శాఖలకు అప్పగిస్తారని ప్రచారం జరుగుతోంది. వీరిలో ఇప్పటికే రాజీనామా చేసిన నితీష్ కుమార్ తో పాటు మరో ఇద్దరు ముగ్గురు ముఖ్యమంత్రుల్ని మార్చి మరీ కేంద్రానికి తీసుకువస్తారని అంటున్నారు.

మిడ్-టర్మ్ రీసెట్ వ్యూహం

2026 మే నెలలో జరగబోయే ఈ మార్పులను రాజకీయ వర్గాలు 'మిడ్-టర్మ్ రీసెట్'గా అభివర్ణిస్తున్నాయి. పనితీరు సరిగా లేని మంత్రులను సాగనంపి, వచ్చే సాధారణ ఎన్నికల నాటికి పార్టీని, ప్రభుత్వాన్ని బలోపేతం చేసే దిశగా కొత్త ముఖాలను ప్రవేశపెట్టబోతున్నారట. కేవలం సీనియర్లే కాకుండా, బీజేపీ పాలిత రాష్ట్రాల్లో బాగా పనిచేసిన యువ నేతలకు, అలాగే రాబోయే అసెంబ్లీ ఎన్నికలు జరిగే రాష్ట్రాలకు చెందిన నేతలకు ఈసారి పెద్దపీట వేయనున్నట్లు తెలుస్తోంది. ముఖ్యంగా దక్షిణాది రాష్ట్రాల నుంచి ప్రాతినిధ్యాన్ని పెంచడం ద్వారా 2029 ఎన్నికల లక్ష్యంగా అడుగులు వేయాలని బీజేపీ హైకమాండ్ భావిస్తోంది.

కొన్ని పోర్ట్‌ఫోలియోల్లో భారీ మార్పులు

ప్రస్తుతం కొందరు మంత్రులు రెండు మూడు శాఖలను నిర్వహిస్తున్నారు. ఈ అదనపు బాధ్యతలను తగ్గించి, ప్రత్యేకంగా ఒక్కో శాఖకు ఒక్కో మంత్రిని కేటాయించేలా ప్లాన్ చేస్తున్నారు. రక్షణ, హోమ్, ఆర్థిక వంటి కీలక శాఖల్లో మార్పులు ఉండకపోవచ్చని చెబుతున్నప్పటికీ, రైల్వే, ఐటీ, పౌర విమానయాన వంటి శాఖల్లో కొత్త వారు వచ్చే అవకాశం ఉందని గాసిప్స్ వినిపిస్తున్నాయి. మోదీ ప్రభుత్వం మూడోసారి అధికారంలోకి వచ్చి ఏడాది పూర్తి చేసుకుంటున్న సందర్భంగా జూన్ 10 లోపునే విస్తరణ ప్రక్రియ ముగించాలని చూస్తున్నారట. ఎవరెవరికి బెర్తులు దక్కుతాయి? ఎవరికి ఉద్వాసన పలుకుతారు? అనే ఉత్కంఠ ఇప్పుడు ఎంపీల్లో నెలకొంది. ఈసారి విస్తరణలో సర్‌ప్రైజ్ ఎలిమెంట్స్ ఖచ్చితంగా ఉంటాయని, ఊహించని పేర్లు తెరపైకి వస్తాయని ఎక్కువ మంది నమ్ముతున్నారు.

Petrol Diesel Price Hike: మళ్లీ పెరిగిన పెట్రోల్, డీజిల్ ధరలు.. 10 రోజుల్లో నాలుగో షాక్! హైదరాబాద్‌లో నేటి ధరలివే

Shankar Dukanam — Mon, 25 May 2026 06:50:07 +0530

Diesel Price Hike: న్యూఢిల్లీ: పశ్చిమాసియాలో ఉద్రిక్తతలు భారత్ సహా పలు దేశాలపై తీవ్ర ప్రభావం చూపుతున్నాయి. ఈ నెలలో ఇదివరకే మూడుసార్లు పెట్రోల్, డీజిల్ ధరలను పెంచగా.. తాజాగా మరోసారి ఇంధన ధరలు పెరిగాయి. సోమవారం (25 మే 2026) ఉదయం 6 గంటల నుంచి పెరిగిన ధరలు అమలులోకి రానున్నాయి. పెట్రోల్ లీటరుకు రూ.2.61, డీజిల్‌పై రూ.2.71 చొప్పున పెంచుతూ ఆయిల్ కంపెనీలు నిర్ణయం తీసుకున్నాయి.

హైదరాబాద్, ఢిల్లీలో పెట్రోల్, డీజిల్ ధరలు..

దేశ రాజధాని న్యూఢిల్లీలో పెట్రోల్ ధర లీటరుకు 102 రూపాయల 12 పైసలకు చేరుకుంది, డీజిల్ ధర లీటరుకు 95 రూపాయల 20 పైసలకు చేరుకుంది. హైదరాబాద్‌లో రూ.288 చొప్పున పెరగడంతో పెట్రోల్ లీటర్ ధర రూ.115.73 కాగా, డీజిల్ ధర సైతం రూ. 103.82కు ఎగబాకింది. కేవలం సాధారణ పెట్రోల్, డీజిల్ మాత్రమే కాకుండా, ప్రీమియం ఇంధనాల ధరలు కూడా పెరిగాయి. లీటరుకు 106.63 రూపాయలుగా ఉన్న ఎక్స్‌పి95 (XP95) ధర మే 25న రూ. 109.24 కు చేరింది. ఎక్స్‌జి (XG) ధర లీటరుకు 97.81 నుండి పెరిగి రూ. 100.52 కు చేరుకుంది.

Diesel prices increased by Rs. 2.71 per litre and petrol by Rs. 2.61 per litre. Diesel in Delhi hiked to Rs 95.20 per litre, and Petrol hiked to Rs 102.12.
— ANI (@ANI) May 25, 2026

5 ప్రధాన నగరాల్లో మే 25న పెట్రోల్, డీజిల్ ధరల వివరాలు
పెట్రోల్ ధరలు:
ఢిల్లీ: రూ. 102.12 (రూ. 2.61 పెరిగింది)

హైదరాబాద్: రూ. 115.73 (రూ.2.88 పెరిగింది)

కోల్‌కతా: రూ. 113.51 (రూ. 2.87 పెరిగింది)

ముంబై: రూ. 111.21 (రూ. 2.72 పెరిగింది)

చెన్నై: రూ. 107.77 (రూ. 2.46 పెరిగింది)

డీజిల్ ధరలు:
ఢిల్లీ: రూ. 95.20 (రూ. 2.71 పెరిగింది)

హైదరాబాద్: రూ.103.82 (రూ.2.88 పెరిగింది)

కోల్‌కతా: రూ. 99.82 (రూ. 2.80 పెరిగింది)

ముంబై: రూ. 97.83 (రూ. 2.81 పెరిగింది)

చెన్నై: రూ. 99.55 (రూ. 2.57 పెరిగింది)

Also Read: Petrol Diesel Price Hike: చమురుపై అగ్ర దేశాలు 50 శాతం వడ్డిస్తే భారత్‌ ప్రభుత్వం రూ.3లతో సరిపెట్టింది! విమర్శించే ముందు తేడా తెలుసుకోండి!

10 రోజుల్లో 4వ సారి పెరిగిన పెట్రోల్, డీజిల్ ధరలు
భారత్‌లో గతంలో ఎన్నడూ లేనట్లుగా పెట్రోల్, డీజిల్ ధరలు గత 10 రోజుల్లో నాల్గవ సారి పెంచారు. ఈ నెలలో మొదట మే 15న దాదాపు 3 రూపాయలు పెంచారు. ఆ తర్వాత మే 19న సుమారు 90 పైసలు, మే 23న మళ్లీ 90 పైసలు, తాజాగా మే 25న మరోసారి ఇంధన ధరలు భారీగా పెంచి వాహనదారులకు మరోసారి షాకిచ్చారు.

ప్రపంచ వ్యాప్తంగా మంట పెడుతున్న పశ్చిమాసియా ఉద్రిక్తతలు..

పశ్చిమాసియాలో ఇరాన్, అమెరికా మధ్య కొనసాగులున్న సంక్షోభం కారణంగా అంతర్జాతీయంగా ముడిచమురు (క్రూడ్ ఆయిల్) ధరలు విపరీతంగా పెరిగాయి. అయితే, భారత ప్రభుత్వ రంగ చమురు కంపెనీలు గత 4 ఏళ్లుగా రిటైల్ ధరలను పెంచకపోవడంతో, అవి ప్రతిరోజూ దాదాపు రూ. 1000 కోట్ల మేర నష్టాన్ని చవిచూస్తున్నాయి. మరోవైపు దిగుమతికి ఇంధన ధరలు భారీగా పెరుగుతున్నాయి. ఈ తీవ్ర నష్టాల నుండి గట్టెక్కేందుకు కంపెనీలు ప్రస్తుతం ఇంధన ధరలను క్రమంగా పెంచుతున్నాయి. అయినప్పటికీ, అంతర్జాతీయ సంక్షోభాన్ని భారత్ సమర్థవంతంగానే తట్టుకుందని నిపుణులు చెబుతున్నారు. గత రెండు నెలల్లో పలు విదేశాల్లో ఇంధన ధరలు 50 నుండి 100 శాతం మేర పెరగడం గమనార్హం.

Also Read: RBI Loan Recovery Guidelines 2026: అప్పు ఇచ్చారని అడ్డగోలుగా వసూలుకు ప్రయత్నిస్తే నేరమే - ఆర్బీఐ కొత్త మార్గదర్శకాలు ఇవిగో

Tamil Nadu Politics: కాంగ్రెస్ వెన్నుపోటు పార్టీ! డీఎంకే అడ్డంగా దొరికింది.. ఇక మీ నాటకాలు ఆపండి!

Shankar Dukanam — Sun, 24 May 2026 13:55:28 +0530

Tamil Nadu Politics Today | చెన్నై: తమిళనాడు ఎన్నికల్లో డీఎంకే ఓటమి తరువాత కాంగ్రెస్ పార్టీ తమను వీడటంపై ఆ పార్టీ నేత ఉదయనిధి స్టాలిన్‌ తీవ్ర వ్యాఖ్యలు చేశారు. కాంగ్రెస్‌పై పార్టీ రాజకీయ లబ్ధి, అధికారం కోసం తమకు వెన్నుపోటు పొడిచిందని దుయ్యబట్టారు. గత 20 ఏళ్లుగా డీఎంకేపై ఆధారపడి, తమ కార్యకర్తల కృషి వల్లే సీట్లు గెలుచుకున్న కాంగ్రెస్.. నేడు అధికారం కోసం టీవీకే (TVK) తో చేతులు కలిపిందని ఉదయనిధి స్టాలిన్ ఆరోపించారు. కాంగ్రెస్‌ పార్టీని భవిష్యత్తులో తమ దరిదాపుల్లోకి కూడా రానివ్వకూడదని కార్యకర్తలకు సూచించారు.

దేశంలో బీజేపీ వరుస విజయాలకు ప్రధాని నరేంద్ర మోదీ, కేంద్ర మంత్రి అమిత్ షాలు కారణం కాదని.. కాంగ్రెస్ నేతల అసమర్థత వల్లే ప్రజలు వారికి పట్టం కడుతున్నారని ఉదయనిధి స్టాలిన్ తీవ్ర వ్యాఖ్యలు చేశారు. పొత్తు ధర్మం మరచి, గెలిచిన వెంటనే అధికారం కోసం పరుగులు తీసిన కాంగ్రెస్ నేతలకు తమిళనాడు ప్రజలు త్వరలోనే తగిన బుద్ధి చెబుతారని వ్యాఖ్యానించారు. ఎన్నికల్లో డీఎంకే ఓటమిపై పార్టీ దిద్దుబాటు చర్యలు చేపట్టింది. ఓటమికి కారణాలు విశ్లేషించుకుని పని చేయాలని డీఎంకే నేతలు, కార్యకర్తలకు ఉదయనిధి పిలుపునిచ్చారు. చర్యలు చేపట్టాలని ఆయన పిలుపునిచ్చారు.

తమిళనాడులో డీఎంకే వర్సెస్ కాంగ్రెస్ పాలిటిక్స్
ఎన్నికల తర్వాత డీఎంకే కూటమి నుంచి బయటకు వచ్చిన కాంగ్రెస్, టీవీకే తో కలిసి తమిళనాడు ప్రభుత్వంలో భాగస్వామి అయింది. కాంగ్రెస్ నిర్ణయం ఇరు పార్టీల మధ్య చిచ్చు రగిల్చింది. నిన్న డీఎంకే అధ్యక్షుడు ఎంకే స్టాలిన్, ఉదయనిధి నేతృత్వంలో జరిగిన పార్టీ యువజన విభాగం సమావేశంలో పాల్గొన్న నిర్వాహకులు కాంగ్రెస్ నశించాలి అంటూ నినాదాలు చేశారు. అంతేకాకుండా కాంగ్రెస్ పార్టీని ఇకపై కూటమిలో చేర్చుకోకూడదని, అది వెన్నుపోటు పొడిచే పార్టీ అని, ఇన్నాళ్లు బీజేపీ విజయాలకు కారణం కాంగ్రెస్ అసమర్థతే అంటూ కఠినమైన పదజాలంతో పలు తీర్మానాలు ఆమోదించారు. దీనిపై కాంగ్రెస్ నుంచి తీవ్రమైన అభ్యంతరాలు వ్యక్తమవుతున్నాయి. ఈ క్రమంలో, లౌకిక పార్టీ అనే ముసుగు వేసుకుని డీఎంకే నాటకాలు ఆడుతోందని కాంగ్రెస్ ఎంపీ మాణిక్కం ఠాగూర్ (Manickam Tagore) ఆరోపించారు.

Also Read: MK Stalin BJP Alliance: స్టాలిన్ ఎన్డీయేలోకి? బీజేపీ 2/3 మెజారిటీ వ్యూహం.. కాంగ్రెస్‌కు డీఎంకే రివర్స్ షాక్ ఇస్తుందా?

డ్రామాలు మొదలుపెట్టింది డీఎంకేనే..
మాణిక్కం ఠాగూర్ తన ఎక్స్ పోస్ట్‌లో తీవ్ర ఆరోపణలు చేశారు. ‘తమిళనాడు అసెంబ్లీ ఎన్నికల ఫలితాలు వస్తున్న సమయంలోనే డీఎంకే- బీజేపీ మధ్య రహస్య చర్చలు మొదలయ్యాయి. దానికి సంబంధించిన ముందస్తు ఏర్పాట్లను బీజేపీకి చెందిన సీనియర్ నేత ముందుండి నడిపించారు. ఇప్పుడు అది మెల్లగా బయట పడుతోంది. కాంగ్రెస్ ఎప్పుడూ బీజేపీతో రాజీ పడే ప్రసక్తే లేదు. బీజేపీతో తెరవెనుక ఒప్పందాన్ని పెట్టుకుని, బయట తాము లౌకికవాదులం అనే ముసుగు వేసుకునే (డీఎంకే) వారిని నమ్మలేము. అందుకే మేం 5వ తేదీనే క్లారిటీ ఇచ్చాం. బీజేపీతో దొడ్డిదారిన రాజకీయం చేసేవారితో మాట్లాడటం దండగ అని చెప్పేశాం. మేం తీసుకున్న నిర్ణయం చాలా మంచిది. తమిళనాడులో లౌకిక ప్రభుత్వానికి మాత్రమే కాంగ్రెస్ మద్దతు తెలుపుతుంది.

ரிசல்ட் வந்துகொண்டிருந்த நேரத்திலேயே DMK - ADMK secret talks ஆரம்பிச்சுட்டாங்க. அதையும் ஒரு senior BJP leader facilitate பண்ணினார். இப்போ அது slowly வெளியே வருது.

Congress எப்பவும் BJP உடன் compromise ஆகாது. BJP உடன் underground dealing வைத்துக்கிட்டு வெளியே secular mask… https://t.co/gc1ELfaaJY
— Manickam Tagore .B🇮🇳மாணிக்கம் தாகூர்.ப (@manickamtagore) May 23, 2026

బాగా ఏడవండి.. డీఎంకేకు తగిన శాస్తి జరిగింది
ఇప్పుడు డీఎంకే యువజన విభాగం కాంగ్రెస్‌ పార్టీతో పాటు రాహుల్ గాంధీని లక్ష్యంగా చేసుకుని తీర్మానాలు చేస్తోంది. ఎందుకంటే డీఎంకే ప్లాన్ ఫ్లాప్ అయింది. వారి ప్లాన్ ఏంటంటే.. బీజేపీ భావించినట్లుగా విజయ్ ముఖ్యమంత్రి కావడాన్ని అడ్డుకోవాలి. కానీ అది డీఎంకే, బీజేపీల వల్ల కాలేదు. అందుకే ఇప్పుడు ఇన్ని నినాదాలు, తీర్మానాలతో నాటకాలు చేస్తున్నారు. డీఎంకే నేతలు ఏడవండి, బాగా ఏడవండి. తమిళనాడు ప్రజలు మీ అసలు రంగును ఎన్నికల ఫలితాల్లో బయటపెట్టేశారు’ అని మాణిక్కం ఠాగూర్ సంచలన పోస్ట్ చేశారు.

‘ఐయూఎంఎల్ (IUML) నేత కూడా మీ సీక్రెట్ ప్లాన్‌ను బయటపెట్టారు. వీసీకే నేత కూడా డీఎంకే ప్లాన్‌ను బట్టబయలు చేశారు. సీపీఎం (CPM) వాళ్లు సైతం డీఎంకే ప్లాన్ గురించి బహిరంగంగానే చెప్పారు. మీరు కాంగ్రెస్‌ పార్టీపై ఎంత దాడి చేసినా నిజం మాత్రం మారదు. తమిళ ప్రజలు అన్నీ గమనిస్తూనే ఉన్నారని’ డీఎంకే పార్టీపై మాణిక్కం ఠాగూర్ తీవ్ర విమర్శలు గుప్పించారు.

Vinesh Phogat: రెజ్లర్ వినేష్ ఫొగాట్‌కు భారీ ఊరట.. WFI తీరును తప్పుపట్టిన హైకోర్టు

Shankar Dukanam — Sat, 23 May 2026 19:11:59 +0530

న్యూఢిల్లీ: గత కొంతకాలం నుంచి వివాదాల్లో చిక్కుకున్న భారత స్టార్ రెజ్లర్ వినేష్ ఫోగాట్‌కు ఢిల్లీ హైకోర్టులో భారీ ఊరట లభించింది. మే 30 నుంచి జరగనున్న ఏషియన్ గేమ్స్ 2026 సెలక్షన్ ట్రయల్స్‌లో పాల్గొనేందుకు మహిళా రెజ్లర్ వినేష్ ఫోగాట్‌కు ఢిల్లీ హైకోర్టు అనుమతి ఇచ్చింది. వినేష్ ఫోగాట్ వంటి మహిళా రెజ్లర్లను దూరం పెట్టడానికి మాతృత్వం (తల్లి కావడం) ఒక ప్రాతిపదిక కాకుండా చట్టం చూసుకుంటుందని న్యాయస్థానం పేర్కొంది. ఆసియా క్రీడలకు భారత రెజ్లింగ్ సమాఖ్య నిర్దేశించిన ప్రమాణాలు వివక్షపూరితంగా ఉన్నాయని ఢిల్లీ హైకోర్టు సీజే జస్టిస్ డీకే ఉపాధ్యాయ, జస్టిస్ తేజస్ కారియాలతో కూడిన ధర్మాసనం వ్యాఖ్యానించింది.

ఒక మహిళా రెజ్లర్ గర్భధారణ, ప్రసవానంతర కాలం నాటి ప్రయాణం అసాధారణమైన శారీరక సవాళ్లతో కూడి ఉంటుందనే విషయాన్ని తిరస్కరించలేమని హైకోర్టు పేర్కొంది. అయితే దీని తీవ్రతను క్రీడా రంగంలో తరచుగా గుర్తించరని ఢిల్లీ హైకోర్టు వ్యాఖ్యానించింది. వినేష్ ఫోగాట్ వంటి మహిళా అథ్లెట్లను దూరం పెట్టడానికి మాతృత్వం కారణం కాకూడదని న్యాయమూర్తి పేర్కొన్నారు.

Necessary that Vinesh Phogat permitted to participate in Asian Games trials in interest of sport and justice: Delhi High Court.

WFI's selection policy exclusionary for lack of discretion to consider iconic players like Phogat who is returning from maternity break: HC.

Asian… pic.twitter.com/M5lN0nzwJz
— Press Trust of India (@PTI_News) May 23, 2026

భారత రెజ్లింగ్ సమాఖ్య చర్య ద్వేషపూరితం
‘వినేష్ ఫోగాట్ ప్రసూతి సెలవులో ఉన్నందున భారత రెజ్లింగ్ సమాఖ్య (WFI) మినహాయింపు సెలక్షన్ పాలసీని పూర్తి చేయలేకపోయారు. వినేష్ ఫోగాట్ వంటి మహిళా అథ్లెట్లను బహిష్కరించడానికి లేదా పక్కన పెట్టడానికి మాతృత్వం కారణం కాకూడదని’ ఢిల్లీ హైకోర్టు స్పష్టం చేసింది. రెజ్లర్ వినేష్ ఫోగాట్‌కు WFI జారీ చేసిన షోకాజ్ నోటీసుపై కూడా ఢిల్లీ హైకోర్టు తీవ్రంగా స్పందించింది.

Also Read: Virat Kohli vs Travis Head : కోహ్లీ... నీకు అంత అహంకారమా? హెడ్‌కు షేక్‌హ్యాండ్ ఇవ్వకపోవడంపై నెటిజన్లు ఫైర్!

WFI చేపట్టిన ఈ చర్యను ద్వేషపూరితమైనదిగా కోర్టు అభివర్ణించింది. ఆమె విషయంలో పదాల ఎంపికపై సైతం కోర్టు తీవ్ర అభ్యంతరం వ్యక్తం చేసింది. WFI వైపు నుంచి దురుద్దేశం ఉందని స్పష్టంగా అర్థమవుతోందని కోర్టు వ్యాఖ్యానించడం హాట్ టాపిక అవుతోంది. 2025లో మెడల్స్ గెలిచిన వారికే అర్హతను పరిమితం చేసేలా నిబంధనలు ఉన్నాయని ధర్మాసనం తప్పుపట్టింది.

Elephant damages cars Thrissur: త్రిస్సూర్‌లో గజరాజు భీభత్సం - కారును ఫుట్‌బాల్‌లా ఆడేసుకున్న ఏనుగు.. మహిళ ప్రాణాలతో ఎలా బయటపడిందంటే?

Raja Sekhar Allu — Sat, 23 May 2026 18:41:43 +0530

Woman escape from elephant attack: కేరళలోని త్రిస్సూర్ నగరంలో శనివారం ఉదయం ఒక్కసారిగా ఏనుగు కోపంతో రంకెలు వేసింది. బందీగా ఉన్న ఒక ఏనుగు అకస్మాత్తుగా గజరాజులా మారి, వీధుల్లో పరుగు తీయడంతో నగరం గజగజ వణికిపోయింది. జనావాసాలు, రద్దీగా ఉండే రోడ్లపై ఏనుగు సృష్టించిన బీభత్సం తాలూకు దృశ్యాలు ఒళ్లు గగుర్పొడిచేలా ఉన్నాయి. పెంపుడు ఏనుగుకు ఒక్కసారిగా మదపుటేనుగు లక్షణాలు రావడంతో మావటివాళ్ల నియంత్రణ తప్పింది. బంధనాలను తెంచుకున్న ఆ గజరాజు.. రోడ్లపైకి వచ్చి కంటపడిన వాహనాలను, అడ్డువచ్చిన వస్తువులను ధ్వంసం చేస్తూ బీభత్సం సృష్టించింది.

రోడ్లపై పరుగులు.. ప్రాణభయంతో జనం

ఏనుగు రోడ్డుపైకి వస్తుండటం చూసిన పాదచారులు, వాహనదారులు ప్రాణభయంతో పరుగులు తీశారు. వాహనాలను అక్కడికక్కడే వదిలేసి జనం భవనాలపైకి ఎక్కారు. ఏనుగు తన దారిలో ఉన్న బైకులు, కార్లను చిన్నాభిన్నం చేస్తూ ముందుకు సాగింది. నగరంలోని ప్రధాన వీధులన్నీ క్షణాల్లో నిర్మానుష్యంగా మారిపోయాయి.

కారులో చిక్కుకున్న మహిళ..

ఈ బీభత్సంలో అత్యంత భయంకరమైన ఘట్టం ఒక కారుపై దాడి. ఏనుగు రోడ్డు పక్కన ఉన్న ఒక కారును తన తొండంతో ఎత్తి పడేసింది. అయితే, ఆ సమయంలో కారు లోపల ఒక మహిళ చిక్కుకుని ఉంది. ఏనుగు ఆ కారును తలకిందులుగా పడేసినా, ఆ మహిళకు ఎటువంటి గాయాలు కాకపోవడం ఒక అద్భుతమనే చెప్పాలి. ఏనుగు అక్కడి నుంచి వెళ్లిన వెంటనే స్థానికులు సాహసించి, కారు అద్దాలు పగులగొట్టి ఆమెను సురక్షితంగా బయటకు తీశారు.

Panic gripped #Thrissur city this morning, after a captive #Elephant , turned violent and ran amok through several busy and residential areas, causing widespread damage.

According to eyewitnesses, the agitated elephant broke control, sending pedestrians and motorists fleeing.… pic.twitter.com/KbcQb625Wx
— Surya Reddy (@jsuryareddy) May 23, 2026

రంగంలోకి ఎలిఫెంట్ స్క్వాడ్

సమాచారం అందుకున్న వెంటనే అటవీ శాఖకు చెందిన ఎలిఫెంట్ స్క్వాడ్ రంగంలోకి దిగింది. ఏనుగును శాంతింపజేయడానికి వారు తీవ్రంగా శ్రమించారు. గంటల తరబడి సాగిన ఈ ఆపరేషన్ తర్వాత ఏనుగును బంధించి, సురక్షిత ప్రాంతానికి తరలించారు. ఈ ఘటనలో ఎటువంటి ప్రాణనష్టం జరగకపోవడంతో అధికారులు, ప్రజలు ఊపిరి పీల్చుకున్నారు.

ఆస్తి నష్టం..

ప్రాణనష్టం జరగకపోయినా, లక్షలాది రూపాయల ఆస్తి నష్టం సంభవించింది. అనేక ద్విచక్ర వాహనాలు, కార్లు తుక్కుతుక్కు అయ్యాయి. ముఖ్యంగా జనావాసాలు ఎక్కువగా ఉండే నగర ప్రాంతాల్లో ఏనుగులను తీసుకురావడంపై ఇప్పుడు పెద్ద ఎత్తున విమర్శలు వస్తున్నాయి.

Miyazaki Mango price in India: ఆ మామిడి తోటకు జడ్ ప్లస్ సెక్యూరిటీ - వెండి కంటే ఎక్కువ రేటు - ఈ మ్యాంగోల గురించి తెలిస్తే షాక్ అవుతారు!

Raja Sekhar Allu — Sat, 23 May 2026 16:10:40 +0530

Miyazaki mango cultivation in India: సాధారణంగా మామిడి పండ్ల ధర కిలో రూ. 100 నుంచి రూ. 500 వరకు ఉంటుంది. కానీ, కిలో మామిడి పండ్ల ధర ఏకంగా రూ. 2.5 లక్షల నుంచి రూ. 3 లక్షల వరకు ఉందంటే నమ్ముతారా? అవును, వెండి ధర కంటే ఎక్కువ విలువైన ఈ అరుదైన మామిడి పండ్లు ఇప్పుడు భారత్‌లో సాగు అవుతున్నాయి. వీటిని దొంగల నుంచి కాపాడుకోవడానికి రైతులు ఏకంగా Z-ప్లస్ రేంజ్ సెక్యూరిటీని ఏర్పాటు చేసుకుంటున్నారు.

ఎందుకీ పండు అంత ప్రత్యేకం?

జపాన్‌కు చెందిన ఈ అరుదైన మియాజాకి మామిడి పండ్లను జపనీస్ భాషలో తైయో నో తమగో అని పిలుస్తారు. దీని అర్థం సూర్యుని అండం . ఇవి సాధారణ మామిడి పండ్లలా పసుపు రంగులో కాకుండా, ముదురు ఎరుపు లేదా పర్పుల్ రంగులో మెరుస్తూ కెంపుల వలె కనిపిస్తాయి. వీటిలో చక్కెర శాతం సాధారణ పండ్ల కంటే 15% ఎక్కువగా ఉండటమే కాకుండా, అద్భుతమైన రుచిని కలిగి ఉంటాయి.

VIDEO | Deba Padhiami in Odisha's Malkangiri has been sleepless over a mango.

It's not just another mango, but the Japanese-origin Miyazaki variety, reportedly one of the most expensive globally. And, Deba, has grown that Miyazaki in Malkangiri, four years after receiving a… pic.twitter.com/F60dvElm51
— Press Trust of India (@PTI_News) May 20, 2026

భారత్‌లో మియాజాకి సాగు - తుపాకులతో కాపలా!

ఇటీవలి కాలంలో మన దేశంలోని రైతులు కూడా ఈ అరుదైన పంటపై మొగ్గు చూపుతున్నారు. మధ్యప్రదేశ్‌లోని జబల్పూర్‌కు చెందిన ఒక రైతు దంపతులు తమ తోటలోని రెండు మియాజాకి చెట్లను కాపాడేందుకు 9 మంది సెక్యూరిటీ గార్డులను, 6 జర్మన్ షెపర్డ్ కుక్కలను కాపలా పెట్టారు. గతంలో దొంగలు ఈ పండ్లను ఎత్తుకెళ్లడంతో వారు ఈ భారీ భద్రతను ఏర్పాటు చేశారు. అలాగే ఒడిశా, బీహార్ రాష్ట్రాల్లోని రైతులు కూడా వీటిని సాగు చేస్తూ వార్తల్లో నిలుస్తున్నారు.

Odisha’s Malkangiri is making headlines as tribal farmer Deba Madkami successfully cultivates the rare Japanese Miyazaki mango — one of the world’s most expensive mango varieties, valued between ₹1 lakh to ₹3 lakh per kg. 🥭🔥

Deba planted the sapling nearly 4 years ago after… pic.twitter.com/c59VBTlWfx
— Vivek Raj Sethy (@imvivekrajsethy) May 21, 2026

ధర ఎందుకు అంత ఎక్కువగా ఉంటుంది?

ఈ పండ్లు పండించడానికి జపాన్‌లో ప్రత్యేకమైన గ్రీన్‌హౌస్ పద్ధతులు ఉపయోగిస్తారు. ప్రతి పండుకు సమానంగా ఎండ తగిలేలా జాగ్రత్తలు తీసుకుంటారు. వీటిలో యాంటీ ఆక్సిడెంట్స్, బీటా కెరోటిన్ . ఫోలిక్ యాసిడ్ పుష్కలంగా ఉంటాయి. ఇవి కంటి ఆరోగ్యానికి, చర్మ సౌందర్యానికి మేలు చేస్తాయి. అంతర్జాతీయ వేలంలో ఒక్కో పండు ధర సుమారు రూ. 50,000 వరకు పలుకుతుంది.

ప్రస్తుతానికి ఈ పండ్లు సామాన్య రైతులకు ఒక నిధి లాంటివి. ఆకట్టుకునే రంగు, అద్భుతమైన రుచి, మరియు ఆకాశాన్నంటే ధరతో మియాజాకి మామిడి ఇప్పుడు ప్రపంచంలోనే అత్యంత ఖరీదైన పండుగా రికార్డు సృష్టిస్తోంది.

wisha Sharma Murder Mystery: మోడల్ ట్విషా శర్మ మృతి కేసులో భర్త సమర్థ్ సింగ్ అరెస్ట్ - వేధింపుల నుంచి మరణం వరకు అసలేం జరిగింది?

Raja Sekhar Allu — Sat, 23 May 2026 15:19:33 +0530

Bhopal Model Death Case: భోపాల్‌లో సంచలనం సృష్టించిన ట్విషా శర్మ మృతి కేసులో ఎట్టకేలకు ప్రధాన నిందితుడు, ఆమె భర్త సమర్థ్ సింగ్ పోలీసులకు దొరికిపోయారు. కోర్టులో లొంగిపోయిన అతడిని భోపాల్ పోలీసులు అదుపులోకి తీసుకున్నారు.

కలల నగరం నుంచి కలత వైపు..

ట్విషా శర్మ మధ్యప్రదేశ్ రాజధాని భోపాల్‌లో గుర్తింపు పొందిన మోడల్. గ్లామర్ రంగంలో తనకంటూ ఒక ముద్ర వేసుకోవాలని కలలు కన్న ఆమెకు, సమర్థ్ సింగ్ అనే యువకుడితో పరిచయం ఏర్పడింది. అది కాస్తా ప్రేమగా మారి, పెద్దల అంగీకారంతో 2023లో వీరిద్దరూ అంగరంగ వైభవంగా వివాహం చేసుకున్నారు. కానీ, ఆ వైభవం కొన్ని నెలలకే ఆవిరైపోయింది.

పెళ్లంటే వేధింపుల కాపురం?

పెళ్లయిన కొద్దిరోజులకే సమర్థ్ అసలు రంగు బయటపడింది. ట్విషా మోడలింగ్ వృత్తిని అతడు ద్వేషించేవాడు. ఆమె ఫోన్ చెక్ చేయడం, బయటకు వెళ్లనివ్వకుండా కట్టడి చేయడం, చిన్న విషయానికే కొట్టడం వంటివి నిత్యకృత్యమయ్యాయి. సమర్థ్ కుటుంబ సభ్యులు సైతం అదనపు కట్నం కోసం ఆమెను వేధించడం మొదలుపెట్టారు. ప్రేమించి పెళ్లి చేసుకున్న వాడే నరకం చూపిస్తున్నాడని ట్విషా తన స్నేహితుల వద్ద కన్నీరు మున్నీరైనట్లు పోలీసు విచారణలో తేలింది.

మరణం మిగిల్చిన ప్రశ్నలు

గత ఏప్రిల్ నెలలో ట్విషా శర్మ భోపాల్‌లోని తన అపార్ట్‌మెంట్‌లో ఫ్యాన్‌కు వేలాడుతూ విగతజీవిగా కనిపించింది. ప్రాథమికంగా ఇది ఆత్మహత్యగా భావించినప్పటికీ, ఆమె ఒంటిపై ఉన్న గాయాలు, అపార్ట్‌మెంట్‌లో చిందరవందరగా ఉన్న వస్తువులు అనేక అనుమానాలకు తావిచ్చాయి. ట్విషా ఆత్మహత్య చేసుకోలేదని, ఆమెను చంపి ఫ్యాన్‌కు వేలాడదీశారని ఆమె తల్లిదండ్రులు ఫిర్యాదు చేశారు.

A major twist has unfolded in the ongoing investigation into the tragic death of 33-year-old Twisha Sharma.

Newly surfaced CCTV footage from May 12 captures Twisha at the 'Expression Beauty Parlour' in Bhopal, just hours before she was found dead at her marital home.

In the… https://t.co/qDu8IoIlfH pic.twitter.com/67DJlbyF38
— Hate Detector 🔍 (@HateDetectors) May 22, 2026

సమర్థ్ అదృశ్యం - పోలీసుల గాలింపు

ట్విషా మరణించినప్పటి నుండి భర్త సమర్థ్ సింగ్ కనిపించకుండా పోయాడు. పోలీసులు నిందితుడి కోసం లుకౌట్ నోటీసులు జారీ చేశారు. అతడు విదేశాలకు పారిపోకుండా ఎయిర్‌పోర్టులను అప్రమత్తం చేశారు. రెండు నెలల పాటు వేర్వేరు నగరాల్లో మారువేషంలో తిరుగుతూ పోలీసులకు చుక్కలు చూపించాడు సమర్థ్. అతడి ఆచూకీ తెలిపిన వారికి రివార్డు కూడా ప్రకటించారు. పోలీసులు చుట్టుముడుతున్నారని గ్రహించిన సమర్థ్ సింగ్, శనివారం అనూహ్యంగా కోర్టులో లొంగిపోయాడు. కోర్టు అతడిని భోపాల్ పోలీసులకు అప్పగించాలని ఆదేశించింది. ప్రస్తుతం అతడిని పోలీసులు కస్టడీలోకి తీసుకుని విచారిస్తున్నారు. ట్విషా రాసినట్లుగా భావిస్తున్న ఒక డైరీ ఇప్పుడు ఈ కేసులో కీలక ఆధారంగా మారింది. అందులో సమర్థ్ తనపై చేసిన చిత్రహింసలను ఆమె పూసగుచ్చినట్లు రాసినట్లు తెలుస్తోంది.

సమర్థ్ సింగ్ అరెస్టుతో ఈ కేసులో కీలక మలుపు తిరిగింది. అతడిని కస్టడీలోకి తీసుకున్న పోలీసులు, ట్విషా మరణించిన రోజు రాత్రి అసలు ఏం జరిగింది? వారి మధ్య గొడవకు కారణమేంటి? ఆమెను ఎవరైనా హత్య చేశారా? అనే కోణంలో విచారణ జరుపుతున్నారు. గ్లామర్ ఇండస్ట్రీలో ఎంతో భవిష్యత్తు ఉన్న ట్విషా శర్మ జీవితం ఇలా విషాదాంతం కావడం భోపాల్ వాసులను కలచివేసింది.

CM Vijay: తమిళనాడులో మళ్ళీ అమ్మ మెనూ.. రూ.1కే ఇడ్లీ , రూ.5కే భోజనం - పూర్తిగా మార్చేస్తున్న విజయ్

Raja Sekhar Allu — Sat, 23 May 2026 14:49:04 +0530

CM Vijay Amma Canteen: తమిళనాడు రాజకీయాల్లో కొత్త ముఖ్యమంత్రి విజయ్ తీసుకున్న ఒక సంచలన నిర్ణయం సామాన్యుల ఆకలి తీర్చనుంది. దివంగత జె. జయలలిత ప్రవేశపెట్టిన అత్యంత ప్రజాదరణ పొందిన అమ్మ క్యాంటీన్ల పూర్వ వైభవం కోసం ఆయన నడుం బిగించారు. రాజకీయాలకు అతీతంగా, ఆకలి విలువ తెలిసిన నేతగా విజయ్ ఈ పథకాన్ని పునరుద్ధరించాలని ఆదేశించడం ఇప్పుడు రాష్ట్రవ్యాప్తంగా చర్చనీయాంశమైంది.

మళ్ళీ కనిపిస్తున్న రూపాయి ఇడ్లీ ముచ్చట!

ఒకప్పుడు నిర్మాణ కార్మికులు, వలస కూలీలు, పేద వృద్ధులకు ఆకలి తీర్చే దేవాలయాలుగా వెలిగిన అమ్మ క్యాంటీన్లు.. గత కొన్నాళ్లుగా నిర్వహణ లోపంతో వెలవెలబోయాయి. శిథిలమైన కిచెన్ మౌలిక సదుపాయాలు, నాణ్యత లేని భోజనంపై వస్తున్న ఫిర్యాదులపై సీఎం విజయ్ సీరియస్ అయ్యారు. రాష్ట్రవ్యాప్తంగా ఉన్న 620 క్యాంటీన్లను వెంటనే మరమ్మతులు చేయాలని, ఆధునిక వంట సామగ్రిని సమకూర్చాలని అధికారులకు స్పష్టమైన ఆదేశాలు జారీ చేశారు. రూపాయికే ఇడ్లీ, మూడు రూపాయలకే పెరుగన్నం, ఐదు రూపాయలకే సాంబార్ అన్నం.. మళ్ళీ అదే రుచితో ప్రజలకు అందేలా చూడాలని ఆయన పట్టుబడుతున్నారు.

ఆకలి తీర్చిన 'అమ్మ' అస్త్రం..

2013లో జయలలిత ఈ పథకాన్ని ప్రారంభించినప్పుడు ఇది దేశవ్యాప్తంగా ఒక సంచలనం. కేవలం తక్కువ ధరకు భోజనం పెట్టడమే కాకుండా, పోషకాహార లోపాన్ని తగ్గించడం దీని ప్రధాన ఉద్దేశం. కోవిడ్ మహమ్మారి సమయంలో వేలాది మంది వలస కూలీల ప్రాణాలను కాపాడింది ఈ అమ్మ క్యాంటీన్లే. ఆటో డ్రైవర్ల నుంచి ఆఫీసులకు వెళ్లే సామాన్యుల వరకు అందరికీ ఇవి ఇష్టమైన అడ్డాలుగా మారాయి. అయితే రాజకీయ కారణాల వల్ల మధ్యలో నిధుల కొరత ఏర్పడి, ఈ వ్యవస్థ నిర్వీర్యం అవుతుందన్న ఆందోళన నెలకొంది.

The name board of the Amma Unavagam was covered up.

Near the central bus stand in Udhagamandalam, TVK cadres allegedly covered and concealed the word “Amma” written on the name board of the Amma Unavagam.

pic.twitter.com/uca9v32Gwh
— முத்து (@muthuhere3) May 22, 2026

రాజకీయాలకు అతీతంగా విజయ్ అడుగు..

సాధారణంగా కొత్తగా వచ్చే ప్రభుత్వాలు పాత ప్రభుత్వం పేరున్న పథకాలను అటకెక్కిస్తాయి. కానీ, విజయ్ మాత్రం ప్రజల ప్రయోజనాలే ముఖ్యమని భావించారు. గత డీఎంకే ప్రభుత్వం వీటిని కొనసాగించినప్పటికీ, నిర్వహణలో అలసత్వం వహించిందని అన్నాడీఎంకే ఆరోపిస్తూ వచ్చింది. ఇప్పుడు విజయ్ ఈ ప్రాజెక్టును తన భుజస్కంధాలపైకి తీసుకోవడం ద్వారా, తక్కువ ధరకే నాణ్యమైన ఆహారాన్ని అందించే ద్రవిడ సంక్షేమ నమూనా'ను కాపాడాలని నిర్ణయించుకున్నారు. చెన్నై కార్పొరేషన్ పరిధిలోని 383 సెంటర్లతో సహా అన్ని జిల్లాల్లోని క్యాంటీన్లకు నిధుల విడుదల సులభతరం చేశారు.

సామాన్యుడి 'ఫుడ్ కల్చర్'కు పునర్జీవం..

ఇది కేవలం ఒక భోజన పథకం మాత్రమే కాదు, తమిళనాడు జీవనశైలిలో ఒక భాగం. హోటళ్లలో టిఫిన్ ధరలు ఆకాశాన్నంటుతున్న నేటి కాలంలో, రూపాయి ఇడ్లీ అనేది ఒక కలలా అనిపిస్తుంది. కానీ, ఆ కలను నిజం చేస్తూ, పరిశుభ్రమైన వాతావరణంలో రుచికరమైన వేడి వేడి భోజనాన్ని అందించడానికి యంత్రాంగం సిద్ధమైంది. కిచెన్ అప్‌గ్రేడ్, కొత్త నీటి ఫిల్టర్లు, సరిపడా పాత్రలను సమకూర్చడం ద్వారా అమ్మ క్యాంటీన్లు మళ్ళీ పాత కళను సంతరించుకోనున్నాయి. ఆకలి లేని తమిళనాడు లక్ష్యంగా విజయ్ వేస్తున్న ఈ అడుగు సామాన్యుడికి పెద్ద ఊరట.

MK Stalin BJP Alliance: స్టాలిన్ ఎన్డీయేలోకి? బీజేపీ 2/3 మెజారిటీ వ్యూహం.. కాంగ్రెస్‌కు డీఎంకే రివర్స్ షాక్ ఇస్తుందా?

Raja Sekhar Allu — Sat, 23 May 2026 08:56:44 +0530

BJP Two Thirds Majority Strategy: పార్లమెంటులో మూడింట రెండొంతుల మెజారిటీని సాధించే లక్ష్యంతో బీజేపీ పావులు కదుపుతోంది. అందులో భాగంగానే తమిళనాడు ముఖ్యమంత్రి ఎం.కె. స్టాలిన్ నేతృత్వంలోని డీఎంకే ని ఎన్డీయే కూటమిలోకి ఆహ్వానించేందుకు చర్చలు జరుపుతున్నాయని తమిళనాడులో విస్తృత ప్రచారం జరుగుతోంది. ముఖ్యంగా కాంగ్రెస్ - డీఎంకే మధ్య దశాబ్దాల కాలంగా ఉన్న స్నేహం విడిపోవడం ఈ ఊహాగానాలకు బలాన్నిస్తోంది.

ఢిల్లీ టూ చెన్నై - స్టాలిన్ ఎన్డీయేలోకి వస్తారా?

జాతీయ రాజకీయాల్లో ఎప్పుడూ శాశ్వత శత్రువులు, శాశ్వత మిత్రులు ఉండరు అనే మాటకు తగ్గట్లే ప్రస్తుతం తమిళనాడు రాజకీయాలు మారుతున్నాయి. ఎన్నికల ఫలితాల తరవాత కాంగ్రెస్ కనీసం మాట మాత్రం కూడా చెప్పకుండా విజయ్ టీవీకేతో కలిసిపోయింది. ఇది స్టాలిన్ ను బాధించింది. అందుకే కాంగ్రెస్ వెన్నపోటు పొడిచిందని ఆరోపణలు చేస్తూ వస్తున్నారు. తాము ఇండీ కూటమిలోలేమని కూడా ప్రకటించారు. అందుకే ఇప్పుడు ఆయన కోసం ఎన్డీఏ ఎదురు చూస్తోంది.

2/3 మెజారిటీ – బీజేపీ అసలు వ్యూహం

పార్లమెంటులో రాజ్యాంగ సవరణలు చేపట్టాలన్నా లే దా కీలక బిల్లులను ఏకపక్షంగా ఆమోదించాలన్నా బీజేపీకి మూడింట రెండొంతుల (2/3) మెజారిటీ అత్యవసరం. ప్రస్తుతం ఉన్న సంఖ్యాబలం ప్రకారం ఎన్డీయేకు సాధారణ మెజారిటీ ఉన్నప్పటికీ, భారీ సంస్కరణల కోసం మరిన్ని పార్టీల మద్దతు అవసరం. ముఖ్యంగా డీలిమిటేషన్, మహిళా రిజర్వేషన్లు, జమిలీ ఎన్నికల కోసం రాజ్యాంగ సవరణలు చేయాల్సి ఉంది. ఒకవేళ డీఎంకే తన ఎంపీలతో ఎన్డీయేలోకి వస్తే, బీజేపీకి అప్రతిహతమైన బలం చేకూరుతుంది. ఇదే జరిగితే దక్షిణాదిలో బీజేపీకి ఒక బలమైన మిత్రపక్షం దొరికినట్లవుతుంది.

గతంలో వాజ్ పేయి ప్రభుత్వంలో భాగస్వామిగా డీఎంకే

అయితే, ఈ ప్రచారాన్ని కొందరు తోసిపుచ్చుతున్నారు. ద్రావిడ సిద్ధాంతాన్ని నమ్ముకున్న డీఎంకే, హిందుత్వ వాదాన్ని వినిపించే బీజేపీతో కలవడం ఆత్మహత్యాసదృశ్యమే అవుతుందని వారు భావిస్తున్నారు. ముఖ్యంగా సనాతన ధర్మం వంటి అంశాలపై ఉదయనిధి స్టాలిన్ చేసిన వ్యాఖ్యలతో, ఈ రెండు పార్టీల కలయిక అసాధ్యమని కొందరి వాదన. కానీ, రాజకీయాల్లో అధికారం కోసం భావజాలాలను పక్కన పెట్టడం కొత్తేమీ కాదని, గతంలో కరుణానిధి కూడా వాజ్‌పేయి ప్రభుత్వంలో భాగస్వామిగా ఉన్న విషయాన్ని గుర్తు చేస్తున్నారు.

ఇది సాధ్యమేనా?

ప్రస్తుతానికి ఇవన్నీ ఊహాగానాలే అయినప్పటికీ, ఢిల్లీలో జరుగుతున్న అంతర్గత చర్చలు మాత్రం ఏదో పెద్ద మార్పు రాబోతోందని సూచిస్తున్నాయి. ఒకవేళ స్టాలిన్ నిజంగానే ఎన్డీయే గూటికి చేరితే, అది భారత రాజకీయ చరిత్రలోనే ఒక అతిపెద్ద పవర్ షిఫ్ట్' అవుతుంది. ఇది కాంగ్రెస్‌ను ఒంటరిని చేయడమే కాకుండా, బీజేపీకి దేశవ్యాప్తంగా తిరుగులేని అధికారాన్ని కట్టబెడుతుందని అనుకోవచ్చు.