india

Hyderabad Kangaroos : హైదరాబాద్ జూకు కొత్త మెరుపులు - వంతారా నుంచి కంగారూలు, లెమూర్ల రాక!

Raja Sekhar Allu — Thu, 22 Oct 2026 16:01:20 +0530

Nehru Zoological Park New Animals 2026: హైదరాబాద్ నగరవాసులకు, ముఖ్యంగా వన్యప్రాణి ప్రేమికులకు నెహ్రూ జూలాజికల్ పార్క్ సరికొత్త జీవులను అందుబాటులోకి తీసుకురావడానికి ఏర్పాట్లు చేసింది. గుజరాత్‌లోని జామ్‌నగర్‌కు చెందిన ప్రముఖ గ్లోబల్ వైల్డ్‌లైఫ్ రెస్క్యూ , కన్జర్వేషన్ సెంటర్ వంతారా నుంచి విదేశీ రకాలకు చెందిన అరుదైన జంతువులను నగరానికి తీసుకొచ్చేందుకు జూ అధికారులు ప్రణాళికలను వేగవంతం చేశారు. ఆస్ట్రేలియా దేశానికి చెందిన సంకేతమైన కంగారూలు , వాలబీలు , మడగాస్కర్ మూలాలున్న రింగ్-టెయిల్డ్ లెమూర్లు, కాసోవారీ రకం పక్షలు త్వరలోనే నెహ్రూ జూ పార్క్‌లో సందడి చేయనున్నాయి.

జూ చరిత్రలోనే తొలిసారిగా ఒక ఆడ, మగ కంగారూలను ప్రదర్శనగా ఉంచేందుకు ప్రత్యేక ఎన్‌క్లోజర్లను, నైట్ హౌస్‌లను అధికారులు సిద్ధం చేశారు. గతంలో 2020లో జపాన్‌లోని యోకోహామా జూలాజికల్ గార్డెన్స్ నుంచి నాలుగు కంగారూలను తీసుకురావడానికి ఒప్పందం కుదిరినప్పటికీ, కరోనా మహమ్మారి విజృంభణ వల్ల ఆ ప్రతిపాదన కార్యరూపం దాల్చలేదు. ఇప్పుడు వంతారా బృందం స్వయంగా హైదరాబాద్ జూలోని వసతులను, మౌలిక సదుపాయాలను క్షేత్రస్థాయిలో పరిశీలించి, జంతువుల తరలింపునకు సూత్రప్రాయంగా అంగీకారం తెలిపింది. ప్రస్తుతం అక్కడి పునరావాస పనులు పూర్తయిన వెంటనే వీటిని నగరానికి తరలించనున్నారు.

కంగారూలతో పాటు వాటిని పోలి ఉండే దాదాపు 3 అడుగుల ఎత్తు ఉండే వాలబీలు , మడగాస్కర్ ప్రాంతానికి చెందిన విశిష్టమైన రింగ్-టెయిల్డ్ లెమూర్లు జూ సందర్శకులను ఆకట్టుకోనున్నాయి. నలుపు , తెలుపు చారల పొడవైన తోకలు కలిగిన ఈ లెమూర్లు ఉదయాన్నే శరీర వేడి కోసం చేతులు చాచి నిటారుగా కూర్చునే వినూత్న ప్రవర్తనకు ప్రసిద్ధి చెందాయి. వీటికి తోడుగా, జూలోని జీబ్రాల సంఖ్యను మరింత పెంచేందుకు మరో జత జీబ్రాలను కూడా వంతారా నుంచి తీసుకురానున్నారు. ప్రస్తుతం జూలో ఉన్న ముగ్గురు జీబ్రాలు రెండు మగ, ఒక ఆడ కూడా గతంలో వంతారా నుంచే తీసుకువచ్చారు.

మరోవైపు, దేశంలో ఎల్ నినో ప్రభావం, పెరుగుతున్న పగటి ఉష్ణోగ్రతల నుంచి జూలో ని మూగజీవాలను కాపాడేందుకు జూ యాజమాన్యం ముందస్తు జాగ్రత్తలు చేపట్టింది. ప్రస్తుతం ఉన్న 2,178 జీవుల 498 క్షీరదాలు, 320 సరిసృపాలు, 8 ఉభయచరాలు , పక్షులు సంరక్షణ కోసం ఎన్‌క్లోజర్ల వద్ద వాటర్ స్ప్రింక్లర్లు, ఫాగర్లు, కూలర్లు , ఎయిర్ కండిషనర్లను ఏర్పాటు చేశారు. ఎండ వేడిమి నుంచి జంతువులకు ఉపశమనం కలిగిస్తూనే, కొత్త అతిథుల కోసం ప్రత్యేక వాతావరణాన్ని అధికారులు తీర్చిదిద్దుతున్నారు.

కొత్తగా రానున్న ఈ విదేశీ వన్యప్రాణులతో నెహ్రూ జూలాజికల్ పార్క్ మరింత సందడిగా మారడంతో పాటు నగర పర్యాటకానికి పెద్ద ఎత్తున ఆకర్షణగా నిలవనుంది. జూ అధికారుల సమాచారం ప్రకారం.. వంతారా అధికారులతో మిగిలిన అధికారిక ప్రక్రియలను వేగంగా పూర్తి చేసి, రాబోయే కొన్ని వారాల్లోనే ఈ కొత్త అరుదైన అతిథులను సాధారణ సందర్శకుల ప్రదర్శన కోసం అందుబాటులోకి తేనున్నారు.

Marco Rubio India Visit: అమెరికా విదేశాంగ కార్యదర్శి మార్కో రూబియో భారత పర్యటన.. వ్యాపారం, ఇంధనం, దౌత్యపరమైన 5 కీలక అంశాలు

Satyaprasad Bandaru — Wed, 21 Oct 2026 20:24:42 +0530

Marco Rubio India Visit: అమెరికా విదేశాంగ కార్యదర్శి మార్కో రూబియో అక్టోబర్ 20న భారత్‌లో పర్యటించారు. సాధారణంగా దౌత్య పర్యటనలు న్యూదిల్లీ కేంద్రంగా సాగుతుంటాయి. కానీ ఈసారి రూబియో నేరుగా ముంబైకి చేరుకోవడమే కాకుండా జామ్‌నగర్‌లోని రిలయన్స్ రిఫైనరీని కూడా సందర్శించారు. ఈ పర్యటన ప్రధానంగా 'వ్యాపారం', 'ఇంధనం' 'భద్రత' అంశాల చుట్టూనే సాగింది. వాణిజ్య ఒప్పందాలు, వ్యూహాత్మక భాగస్వామ్యంపై సానుకూల సంకేతాలు కనిపించినప్పటికీ, పాకిస్థాన్ పట్ల అమెరికా వైఖరి, రష్యా చమురు కొనుగోళ్లపై వ్యాఖ్యలు భారత్‌కు మిక్స్‌డ్ విధానాన్ని అందించాయి. మార్కో రూబియో పర్యటనలోని 5 కీలక ముఖ్యాంశాలు తెలుసుకుందాం.

1. వాణిజ్య ఒప్పందం '99% పూర్తి'

భారత్-అమెరికా మధ్య వాణిజ్య ఒప్పందంపై 99 శాతం పనులు పూర్తయ్యాయని, మిగిలిన కొన్ని నిబంధనలను రాబోయే కొన్ని వారాల్లో ఖరారు చేసే అవకాశం ఉందని మార్కో రూబియో వెల్లడించారు. విదేశాంగ మంత్రి ఎస్. జైశంకర్‌తో సమావేశం అనంతరం ఇరుదేశాలు ఈ ఒప్పందాన్ని త్వరగా ముగించేందుకు కట్టుబడి ఉన్నట్లు ప్రకటించాయి.

ప్రయోజనం: ఈ ఒప్పందం పూర్తయితే భారత ఎగుమతిదారులకు అమెరికా మార్కెట్‌లో భారీ ఊరట లభిస్తుంది. చైనాకు ప్రత్యామ్నాయంగా భారత్ విశ్వసనీయ భాగస్వామిగా ఎదుగుతుంది. ప్రతికూలత: నిలిచిపోయిన ఆ 1% సాంకేతిక, చట్టపరమైన నిబంధనలు తేలకపోతే మొత్తం ఒప్పందం వృథా అయ్యే ప్రమాదం ఉంది.

2. పాకిస్తాన్ పై 'ప్రశంసలు' - అమెరికా ద్వంద్వ వైఖరి

ఈ పర్యటనలో అత్యంత వివాదాస్పదమైన అంశం పాకిస్థాన్‌తో అమెరికా సంబంధాలు. పాకిస్థాన్ వద్ద ఉన్న అణ్వాయుధాలు, భౌగోళిక వ్యూహాత్మక ప్రాంతం కారణంగా వారితో చర్చలు జరపడం తమకు అవసరమని రూబియో సమర్థించుకున్నారు. పాకిస్థాన్‌తో అమెరికా జరిపే చర్చలు భారత్‌కు నష్టం కలిగించమని, పైగా భారత్ ఆందోళనలను పరిష్కరించడానికి సిద్ధంగా ఉన్నామన్నారు.

ప్రయోజనం: భారత భద్రతా ఆందోళనలను పరిగణనలోకి తీసుకుంటామని వాషింగ్టన్ హామీ ఇచ్చింది.
ప్రతికూలత: ఉగ్రవాద మూలాలున్న పాకిస్థాన్‌పై కఠిన వైఖరి తీసుకోకుండా, అమెరికా మెతక వైఖరిని చూపడం భారత్‌కు ఆందోళన కలిగించే అంశం.

3. రష్యా చమురు

రష్యాపై భారత్.. సైనిక, ఇంధన వనరుల కోసం ఆధారపడటాన్ని తగ్గించుకోవాలని రూబియో సూచించారు. భారత్‌ను ఒక "రిఫైనింగ్ సూపర్ పవర్"గా ప్రశంసించిన ఆయన, అమెరికా, వెనిజులా నుండి చమురు కొనుగోళ్లను పెంచాలని ప్రతిపాదించారు. రష్యా చమురు కొనుగోళ్లపై అమెరికా సుంకాలు భారత్‌ను శిక్షించడానికి కాదని స్పష్టం చేశారు.

ప్రయోజనం: తక్షణమే జరిమానాలు లేదా కఠిన నిబంధనలు ఉండవనే భరోసా దక్కింది.
ప్రతికూలత: చౌకగా లభించే రష్యా చమురును వదులుకుని ఖరీదైన అమెరికా లేదా వెనిజులా చమురుకు మారడం భారత్‌కు ఆర్థికంగా భారమవుతుంది.

4. 26/11 బాధితులకు నివాళి - కానీ పాకిస్తాన్ పేరు ప్రస్తావన లేదు

ముంబై చేరుకున్న వెంటనే రూబియో 2008 దాడులు జరిగిన తాజ్ మహల్ ప్యాలెస్ హోటల్ వద్ద నివాళులర్పించారు. ఉగ్రవాద నెట్‌వర్క్‌లను నిర్మూలించాలని పిలుపునిచ్చినప్పటికీ, తన ప్రకటనలో ఎక్కడా పాకిస్తాన్ పేరును ప్రస్తావించకపోవడం గమనార్హం.

ప్రయోజనం: ఉగ్రవాద వ్యతిరేక పోరాటంలో భారత్‌కు అమెరికా మద్దతు ఇస్తుందనే సందేశం వచ్చింది.
ప్రతికూలత: 26/11 దాడుల్లో పాకిస్తాన్ పాత్రను బహిరంగంగా పేర్కొనకపోవడం దౌత్యపరమైన రాజీగా కనిపిస్తోంది.

Also Read: దీపావళి స్వీట్లు అడిగితే.. రూ.70 కోట్ల ట్యాంకర్ ఆర్డర్.. వైరల్ ప్రాంక్‌కు స్విగ్గీ స్వీట్ ఎండింగ్

5. 'వ్యూహాత్మక భాగస్వామ్యం' -సుంకాల ముప్పు

భారత్-అమెరికా బంధాన్ని రూబియో "అత్యంత ముఖ్యమైన వ్యూహాత్మక భాగస్వామ్యాలలో ఒకటి"గా చెప్పారు. రక్షణ, సాంకేతికత, ఇంధన రంగాలలో సహకారం పెంచుకోవాలని ఇరుదేశాలు భావిస్తున్నాయి.

ప్రయోజనం: రక్షణ, సాంకేతిక రంగాలలో అమెరికా సహకారం పెరగడం వల్ల చైనా, పాకిస్తాన్‌ల సవాళ్లను ఎదుర్కోవడంలో భారత్ బలోపేతమవుతుంది.
ప్రతికూలత: అమెరికా నుండి ఆయుధాలు, ఇంధన కొనుగోళ్లు పెంచాలని ఒత్తిడి తీసుకువస్తే అది భారత్ వాణిజ్య ప్రయోజనాలకు నష్టం కలిగించవచ్చు.

Also Read: అమెరికా వదిలి భారత్‌కు ఐటీ నిపుణులు - 2026లో ఆల్‌టైమ్ రికార్డు.. అసలు కారణాలివే!

SBI Data Breach: ఎస్‌బీఐకి సైబర్ షాక్.. 3.75 లక్షల మంది కస్టమర్ల డేటా లీక్?.. స్టేట్ బ్యాంక్ ఏం చెబుతుందంటే?

Satyaprasad Bandaru — Wed, 21 Oct 2026 14:01:47 +0530

SBI Data Breach: ఈ రోజుల్లో ప్రతి ఒక్కరికీ బ్యాంకు అకౌంట్ ఉంటుంది. అకౌంట్ ఓపెన్ చేయడానికైనా, లోన్ తీసుకోవడానికైనా, కస్టమర్లు తమ వ్యక్తిగత వివరాలను బ్యాంకుకు ఇస్తున్నారు. మీ వ్యక్తిగత వివరాలు తప్పుడు చేతుల్లోకి వెళితే, అది తీవ్రమైన సమస్యలకు దారితీయవచ్చు. దేశంలోని అతిపెద్ద బ్యాంకు స్టేట్ బ్యాంక్ ఆఫ్ ఇండియా నుంచి ఇలాంటి బ్యాడ్ న్యూస్ బయటకు వచ్చింది. 3.75 లక్షల ఎస్‌బీఐ కస్టమర్లకు డేటా లీక్ అయిందనే ఆరోపణలు వెలుగులోకి వచ్చాయి. సైబర్‌పల్స్56 అనే సైబర్‌ సెక్యూరిటీ అకౌంట్ ప్రకారం, 3.75 లక్షల బ్యాంకు అకౌంట్ల సమాచారం తమ వద్ద ఉందని పేర్కొంటూ 'సిరియస్సిమ్' అనే హ్యాకర్ గ్రూప్ ప్రకటించింది. ఈ విషయంపై ఎస్‌బీఐ ఎలాంటి అధికారిక ప్రకటన జారీ చేయలేదు, కానీ బుధవారం ఈ సైబర్‌దాడి గురించి బ్యాంకు ఓ ప్రకటన జారీ చేసింది.

బ్యాంకు ఏం చెబుతోంది?

3,897 మంది కస్టమర్ల డేటా డార్క్ వెబ్‌లో లీక్ అయిందని ఎస్బీఐ తెలిపింది. ఎస్‌బీఐ ప్రకారం, లీక్ అయిన డేటాలో కస్టమర్ల వ్యక్తిగత వివరాలు ఉన్నాయని ప్రాథమిక విచారణలో తెలిందని పేర్కొంది.

ఏ డేటా లీక్ అయింది?

ఎస్‌బీఐ ప్రకారం, కస్టమర్ ఐడెంటిటీ, లోన్ రికార్డులకు సంబంధించిన వివరాలు లీక్ అయినట్లు తెలుస్తోంది. కస్టమర్ మొబైల్ నెంబర్లు, ఈమెయిల్ ఐడీ, కస్టమర్ పేర్లు, ఇంటి అడ్రస్ వంటి సమాచారం డేటా లీక్ లో ఉన్నాయి.

ఏం చర్యలు తీసుకుంది?

డేటా లీక్ తీవ్రతను నిర్ధారించడానికి, ఎస్బీఐ ఈ విషయంపై దర్యాప్తునకు ఆదేశించింది. ఇందుకోసం ఒక సైబర్‌ సెక్యూరిటీ ఏజెన్సీని నియమించింది. ఎంత మేర డేటా లీక్ అయిందో నిర్ధారించాలని కోరింది.

కస్టమర్లపై ప్రభావం?

సైబర్‌పల్స్ ప్రకారం, లీక్ అయిన కస్టమర్ డేటాను దుర్వినియోగం చేసే అవకాశం ఉంది. కస్టమర్ డేటాను ఉపయోగించి తప్పుడు మార్గాల్లో లోన్ అప్లై చేయవచ్చు. మరికొందరు నకిలీ మెసేజులు పంపి ప్రజలను మోసం చేయడానికి కూడా ప్రయత్నించవచ్చు. అందువల్ల, కస్టమర్లు జాగ్రత్తగా ఉండాల్సి ఉంటుంది. కస్టమర్లు ఎవరికీ ఓటీపీని చెప్పకూడదని బ్యాంకు అధికారులు చెబుతున్నారు. అలాగే, మీ ఏటీఎం పిన్‌ను కూడా ఎవరితోనూ పంచుకోవద్దని సూచించారు. బ్యాంకు ద్వారా జరిగే ప్రతి లావాదేవీపై నిఘా ఉంచాలని పేర్కొన్నారు.

Also Read: రూ.30,213 కోట్ల జియో ఐపీఓ లైవ్.. సబ్‌స్క్రిప్షన్‌లో జియో ప్లాట్‌ఫామ్స్ రికార్డ్

బ్యాంకుపై ఎలాంటి ప్రభావం?

డేటా లీక్ వల్ల బ్యాంకుపై పెద్దగా ప్రభావం పడకపోవచ్చని ఎస్‌బీఐ చెబుతోంది.

మీ అకౌంట్ నుంచి డబ్బు పోతే?

మీ బ్యాంక్ అకౌంట్ లో మీకు తెలియని విధంగా లావాదేవీ జరిగితే, వెంటనే బ్యాంక్ కస్టమర్ కేర్‌కు ఫిర్యాదు చేయాలి.
అనుమానాస్పద లావాదేవీలపై సైబర్ క్రైమ్ హెల్ప్‌లైన్ నెంబర్ 1930కు ఫిర్యాదు చేయండి.
ట్రాన్‌జాక్షన్ ఐడీ, బ్యాంక్ SMS, ఖాతాకు సంబంధించిన వివరాలు మీ వద్ద ఉంచుకోవాలి.
నెట్ బ్యాంకింగ్ పాస్‌వర్డ్‌ను మార్చుకోండి. అవసరమైతే దానిని బ్లాక్ చేయండి.

Also Read: IIT తిరుపతి , వన్‌ ఇండియాతో కెనడా జియో ఏఐ సంస్థ ఒప్పందాలు.. విద్యార్థులకు ఏం లాభం?

Jio Platforms Ipo: కేవలం 2 గంటల్లోనే పూర్తి సబ్‌స్క్రైబ్, మెగా ఐపీఓల్లో సరికొత్త రికార్డు

Shankar Dukanam — Wed, 21 Oct 2026 11:58:03 +0530

Jio Platforms IPO | జియో ప్లాట్‌ఫార్మ్స్ సంస్థ ప్రారంభ పబ్లిక్ ఆఫర్ (IPO) బుధవారం (అక్టోబర్ 21న) బిడ్డింగ్ ప్రారంభమైన తొలి 2 గంటల్లోనే పూర్తిగా సబ్‌స్క్రైబ్ అయింది. భారతదేశంలో ఇప్పటివరకు వచ్చిన అతిపెద్ద ఐపీఓలలో ఇంత వేగంగా పూర్తిగా సబ్‌స్క్రిప్షన్ సాధించిన ఐపీఓగా నిలిచింది. బిడ్డింగ్ ప్రారంభమైన సుమారు 100 నిమిషాల్లోనే, ఉదయం 10:45 గంటల నాటికే ఆఫర్‌లో ఉన్న షేర్లలో 101 శాతం షేర్లకు బిడ్లు వచ్చాయి. సంస్థాగత కొనుగోలుదారులు (QIBs) ఈ డిమాండ్‌లో కీలకంగా వ్యవహరించారు. వీరికి కేటాయించిన వాటాకు ఏకంగా 3.25 రెట్ల బిడ్లు నమోదయ్యాయి.

భారత క్యాపిటల్ మార్కెట్ చరిత్రలోనే అత్యంత భారీ ఐపీఓ జియా ప్లాట్‌ఫారమ్స్‌కు చెందినది. ఇది పూర్తిగా కొత్త షేర్ల జారీ రూపంలోనే మార్కెట్లోకి వచ్చింది. ఇందులో ఆఫర్ ఫర్ సేల్ (OFS) కాంపోనెంట్ అనేది ఏదీ లేదు. సేకరించిన నిధులలో అధిక భాగాన్ని ప్రస్తుతం ఉన్న లోన్స్ తగ్గించుకోవడానికి వినియోగించాలని కంపెనీ భావిస్తోంది.

ప్రారంభంలో సంస్థాగత ఇన్వెస్టర్ల జోరు

ఐపీఓ ప్రారంభమైన మొదటి 30 నిమిషాల్లోనే QIB విభాగానికి సంబంధించిన కేటాయింపు పూర్తిగా సబ్‌స్క్రైబ్ అయింది. ఉదయం 10:45 గంటల నాటికి, సంస్థాగత ఇన్వెస్టర్లకు కేటాయించిన షేర్లకు 3.25 రెట్ల డిమాండ్ వచ్చింది. అదే సమయానికి ఇతర కేటగిరీల ఇన్వెస్టర్ల భాగస్వామ్యం కొంత తక్కువగా ఉంది. నాన్-ఇన్స్టిట్యూషనల్ ఇన్వెస్టర్ల వాటా 27 శాతం సబ్‌స్క్రైబ్ కాగా, రిటైల్ ఇన్వెస్టర్లు తమకు కేటాయించిన షేర్లలో ఆ సమయానికి 24 శాతం వరకు సబ్‌స్క్రైబ్ చేసుకున్నారు.

ఉద్యోగుల కోటాకి 59 శాతం బిడ్లు రాగా, రిలయన్స్ ఇండస్ట్రీస్ ఉన్నత వాటాదారుల కోసం కేటాయించిన విభాగంలో 45 శాతం సబ్‌స్క్రిప్షన్ నమోదైంది. ఉదయం 10:45 గంటల సమయానికి ఉన్న డిమాండ్‌ను ఈ లెక్కలు ప్రతిబింబిస్తాయి. బిడ్డింగ్ కొనసాగుతున్న కొద్దీ ఇవి మారుతుంటాయి.

లోన్స్ తగ్గింపుకే ఐపీఓ నిధులలో అధిక భాగం

జియో ప్లాట్‌ఫార్మ్స్ కొత్త ఈక్విటీ షేర్ల జారీ ద్వారా రూ.30,213 కోట్లను సేకరిస్తోంది. OFS కాంపోనెంట్ లేని కారణంగా, ఈ నిధులన్నీ ప్రస్తుతం ఉన్న వాటాదారులకు కాకుండా నేరుగా కంపెనీకే చెందుతాయి. ఆ నిధులలో మెజారిటీ భాగాన్ని లోన్స్ తీర్చడానికి ఉపయోగించాలని కంపెనీ యోచిస్తోంది. ఈ నిధుల కేటాయింపు వల్ల కంపెనీ లోన్స్ తగ్గడం, ఇన్వెస్టర్లకు ఒక కీలకమైన అంశంగా మారింది. ప్రారంభంలోనే సంస్థాగత ఇన్వెస్టర్ల ప్రాధాన్యత కంపెనీ పబ్లిక్ మార్కెట్ అరంగేట్రంపై అందరి దృష్టిని ఆకర్షించాయి.

24 శాతం దగ్గరగా గ్రే మార్కెట్ ప్రీమియం (GMP)

ఈ నివేదిక సమయానికి జియో ప్లాట్‌ఫార్మ్స్ గ్రే మార్కెట్ ప్రీమియం (GMP) రూ. 268 వద్ద ఉంది. ఐపీఓ ధర Price Band ఒక్కో షేరుకు రూ.1,065 నుంచి రూ.1,119 వరకు నిర్ణయించగా, గరిష్ట ధరపై ఇది దాదాపు 24 శాతం ప్రీమియంను సూచిస్తుంది. GMP అనేది అనధికారిక మార్కెట్ సూచిక. ఇది ఖచ్చితమైన లిస్టింగ్ ధరకు ఏ గ్యారెంటీ ఇవ్వదు. మార్కెట్ పరిస్థితులు, ఇన్వెస్టర్ల డిమాండ్‌ను బట్టి లిస్టింగ్ ధర మారవచ్చు.

ఇతర ఐపీఓలను వెనక్కి నెట్టిన జియో ప్లాట్‌ఫార్మ్స్

నివేదికల ప్రకారం.. ఇతర ప్రధాన పబ్లిక్ ఇష్యూల కంటే జియో ప్లాట్‌ఫార్మ్స్ ఐపీఓ అత్యంత వేగంగా పూర్తి సబ్‌స్క్రిప్షన్ సాధించింది. గతంలో బజాజ్ హౌసింగ్ ఫైనాన్స్ రూ.6,560 కోట్ల ఐపీఓ తొలిరోజు మధ్యాహ్నం 2 గంటలకి పూర్తిగా సబ్‌స్క్రైబ్ అయింది. దేశంలో అత్యధిక బిడ్లు పొందిన ఐపీఓగా నిలిచిన ఎల్‌జీ ఎలక్ట్రానిక్స్ ఇండియా ఐపీఓ తొలిరోజు ముగిసే సమయానికి పూర్తిగా సబ్‌స్క్రిప్షన్ సాధించింది. కానీ కానీ జియో ప్లాట్‌ఫార్మ్స్ సుమారు 2 గంటల్లోనే ఈ మార్కు చేరి కొత్త రికార్డులు నమోదు చేసింది.చివరి సబ్‌స్క్రిప్షన్ వివరాలు, తదనంతర లిస్టింగ్ పనితీరు ఇన్వెస్టర్ల ఆసక్తిని మరింత స్పష్టంగా వెల్లడిస్తాయి.

Cockroach Janata Party: దీపావళి వరకు నిరసనలు వాయిదా.. కాక్రోచ్ జనతా పార్టీ కీలక నిర్ణయం.. రామ్‌లీలా కమిటీ దీప్కే కౌంటర్

Satyaprasad Bandaru — Tue, 20 Oct 2026 18:37:50 +0530

Cockroach Janata Party: దీపావళి పండుగ ముగిసే వరకు దేశంలో ఎటువంటి నిరసనలు, ఆందోళన కార్యక్రమాలు చేపట్టబోమని 'కాక్రోచ్‌ జనతా పార్టీ' వ్యవస్థాపకుడు అభిజీత్‌ దీప్కే ప్రకటించారు. తమ పార్టీకి మద్దతుగా నిలుస్తున్న యువత అంతా ఈ పండగ సమయంలో కుటుంబ సభ్యులతో కలిసి ఆనందంగా గడపాలని ఆయన సూచించారు.

కేంద్ర ఎన్నికల కమిషనర్ (CEC) రాజీనామా చేయాలని డిమాండ్ చేస్తూ గత కొన్ని రోజులుగా దేశ వ్యాప్తంగా యువత పెద్ద ఎత్తున ఉద్యమం చేపడుతున్నారని దీప్కే తెలిపారు. అయితే ఈ నిరసనల కారణంగా వారి కుటుంబ సభ్యులు ఆందోళన చెందుతున్నారన్నారు. నిరసనల్లో పాల్గొంటున్న వారి కుటుంబాలతో పాటు, జ్యుడిషియల్ కస్టడీలో ఉన్న పార్టీ కీలక నేతలు సౌరవ్‌ దాస్, అశుతోష్‌ల కుటుంబ సభ్యులు కూడా కలత చెందుతున్నారని పేర్కొన్నారు. అందుకే పండుగ సమయంలో కుటుంబాలకు ఇబ్బంది కలగకూడదనే ఉద్దేశంతో నిరసనలు వాయిదా వేసినట్లు దీప్కే చెప్పారు.

Also Read:దీపావళి స్వీట్లు అడిగితే.. రూ.70 కోట్ల ట్యాంకర్ ఆర్డర్.. వైరల్ ప్రాంక్‌కు స్విగ్గీ స్వీట్ ఎండింగ్

30 అడుగుల కాక్రోచ్ దిష్టిబొమ్మ దహనం

మరోవైపు దిల్లీలోని రామ్‌లీలా మైదానంలో దసరా వేడుకల సందర్భంగా వినూత్న కార్యక్రమం చేపట్టారు. ప్రతిఏటా దహనం చేసే రావణుడు, కుంభకర్ణుడు, ఇంద్రజీత్‌ దిష్టిబొమ్మలతో పాటు ఈసారి ప్రత్యేకంగా 30 అడుగుల 'కాక్రోచ్‌ దిష్టిబొమ్మ' ను కూడా దహనం చేయనున్నట్లు రామ్‌లీలా కమిటీ ప్రకటించింది. 'స్వచ్ఛ భారత్, స్వచ్ఛ దిల్లీ' కార్యక్రమాల్లో భాగంగా అపరిశుభ్రతకు, మురికికి చిహ్నంగా ఈ బొమ్మను తగలేస్తున్నట్లు నిర్వాహకులు తెలిపారు.

దీనిపై అభిజీత్‌ దీప్కే కౌంటర్ ఇచ్చారు. రామ్‌లీలా మైదానంలో కాక్రోచ్ దిష్టిబొమ్మను తగలబెట్టడం ద్వారా 'కాక్రోచ్ జనతా పార్టీ'కి ఫ్రీ పబ్లిసిటీ ఇస్తున్నారని, అందుకు రామ్‌లీలా కమిటీకి ఆయన ధన్యవాదాలు తెలిపారు.

ఎన్నికల వ్యవస్థలో పారదర్శకత, సీఈసీ రాజీనామా వంటి డిమాండ్లతో యువత చేపట్టిన డిజిటల్, క్షేత్రస్థాయి ఉద్యమాలు రాజధాని స్థాయిలో చర్చనీయాంశంగా మారాయి. ఈ నిరసనల సమయంలో శాంతిభద్రతల సమస్యలు తలెత్తాయనే కారణంతో సీజేపీ ప్రతినిధులు సౌరవ్‌ దాస్, అశుతోష్‌లను పోలీసులు అరెస్ట్ చేసి కోర్టు ఆదేశాల మేరకు రిమాండ్‌కు తరలించారు.

Also Read: విప్రోలో రూ.లక్షల జీతం వదిలేసి వ్యవసాయం వైపు అడుగులు.. ఇప్పుడు నెలకు రూ.60 కోట్ల ఆదాయం.. 'అక్షయకల్ప' శశికుమార్ సక్సెస్ స్టోరీ!

Veeramani Diwali Prank: దీపావళి స్వీట్లు అడిగితే.. రూ.70 కోట్ల ట్యాంకర్ ఆర్డర్.. వైరల్ ప్రాంక్‌కు స్విగ్గీ స్వీట్ ఎండింగ్

Satyaprasad Bandaru — Tue, 20 Oct 2026 17:46:49 +0530

Veeramani Diwali Prank: దీపావళి సందర్భంగా స్వీట్లు తినాలని ఉందని ఎవరైనా బాక్స్ పంపాలని మదురై ఇన్‌ఫ్లూయెన్సర్‌ వీరమణికి నెటిజన్లు అనూహ్యమైన షాక్ ఇచ్చారు. స్వీట్ బాక్స్ కోసం తన అడ్రస్‌ను సోషల్ మీడియాలో షేర్ చేస్తే.. ఆయనకు టీవీలు, ఫ్రిడ్జ్ లు, వాషింగ్ మెషీన్ చివరికి రూ.70 కోట్ల మిలిటరీ ట్యాంకర్‌ను సైతం క్యాష్ ఆన్ డెలివరీ ఆర్డర్లు పెట్టి నెటిజన్లు వేధించారు. అయితే, నెటిజన్ల ప్రాంక్‌తో విసిగిపోయిన వీరమణికి క్విక్-కామర్స్ ప్లాట్‌ఫామ్ 'స్విగ్గీ ఇన్‌స్టా మార్ట్'తీపి కబురు అందించి, దీనికి హ్యాపీ ఎండింగ్ ఇచ్చింది.

దీపావళి స్వీట్ల కోసం అడిగితే.. ట్యాంకర్ ఆర్డర్లు!

తమిళనాడులోని మదురైకి చెందిన కంటెంట్ క్రియేటర్ వీరమణి, దీపావళి సందర్భంగా ఎవరైనా తనకు స్వీట్లు పంపుతారనే ఆశతో తన ఇంటి చిరునామాను ఇన్‌స్టాగ్రామ్‌లో పెట్టారు. కానీ, నెటిజన్లు ఆయనకు స్వీట్లు పంపడానికి బదులుగా ప్రాంక్ చేయడం మొదలుపెట్టారు. ఆయనకు తెలియకుండానే రూ. 1.6 లక్షల విలువైన టీవీ, ఫ్రిడ్జ్, మొబైల్ ఫోన్లు, ప్రొజెక్టర్లు, చివరికి ఏకంగా రూ.70 కోట్ల విలువైన ఆర్మీ ట్యాంకర్, జేసీబీ వంటి ఖరీదైన వస్తువులను క్యాష్ ఆన్ డెలివరీ ద్వారా ఆయన అడ్రస్‌కు ఆర్డర్ చేశారు. వరుసగా వస్తున్న డెలివరీలను చూసి, బిల్లులు కట్టలేక తలపట్టుకున్న వీరమణి ఆవేదనను సోషల్ మీడియాలో వీడియోల రూపంలో పోస్ట్ చేయడంతో ఈ వీడియోలు వైరల్ అయ్యాయి.

Also Read: విప్రోలో రూ.లక్షల జీతం వదిలేసి వ్యవసాయం వైపు అడుగులు.. ఇప్పుడు నెలకు రూ.60 కోట్ల ఆదాయం.. 'అక్షయకల్ప' శశికుమార్ సక్సెస్ స్టోరీ!

<blockquote class="twitter-tweet"><p lang="en" dir="ltr">*not* cash on delivery https://t.co/vs9nFRjaM8</p>— Instamart (@instamart_it) <a href="https://x.com/instamart_it/status/2112161711956574428?ref_src=twsrc%5Etfw">October 19, 2026</a></blockquote> <script async src="https://platform.x.com/widgets.js" charset="utf-8"></script>

ఎంట్రీ ఇచ్చిన స్విగ్గీ ఇన్‌స్టామార్ట్

ఈ వైరల్ ట్రెండ్‌ను గమనించిన స్విగ్గీ వెంటనే స్పందించింది. తమ 'క్విక్ ఇండియా మూవ్‌మెంట్ సేల్'లో భాగంగా వీరమణికి ఊహించని సర్‌ప్రైజ్ ఇచ్చింది. ఎలాంటి క్యాష్ ఆన్ డెలివరీ ఛార్జీలు లేకుండా ఉచితంగా స్మార్ట్‌ఫోన్, పీసీ, ప్రొజెక్టర్, ఇండక్షన్ కుక్కర్, ఇతర గృహోపకరణాలతో పాటు ఆయన మొదట ఆశపడిన దీపావళి స్వీట్ బాక్స్‌ను డెలివరీ చేసింది. దీనికి సంబంధించిన వీడియోను సోషల్ మీడియాలో పెట్టింది. ఇప్పటికే ఈ వీడియోకు 8.2 మిలియన్లకు పైగా వ్యూస్ వచ్చాయి. ఒక చిన్న ఆలోచన వీరమణికి మంచి స్పాన్సర్‌షిప్‌తో పాటు స్వీట్ ఎండింగ్‌ను ఇచ్చిందని నెటిజన్లు కామెంట్లు పెడుతున్నారు.

Also Read: దక్షిణాదిలో తేలిపోయిన కాక్రోచ్ ఉద్యమాలు - ఉత్తరాది ట్రెండ్స్‌ను దక్షిణ భారత యువత తిరస్కరిస్తోందా?

Akshayakalpa Shashi Kumar: విప్రోలో రూ.లక్షల జీతం వదిలేసి వ్యవసాయం వైపు అడుగులు.. ఇప్పుడు నెలకు రూ.60 కోట్ల ఆదాయం.. 'అక్షయకల్ప' శశికుమార్ సక్సెస్ స్టోరీ!

Satyaprasad Bandaru — Tue, 20 Oct 2026 11:49:24 +0530

Akshayakalpa Shashi Kumar: కార్పొరేట్ ఉద్యోగంలో నెలకు లక్షల జీతం.. బెంగళూరులో మంచి కెరీర్.. ఎంతోమంది కలలుగనే హోదా. కానీ, ఇవేవీ ఆయన ఆలోచనను కట్టిపడేయలేకపోయాయి. చిన్నతనంలో తన కళ్లముందే తండ్రి పడిన వ్యవసాయ కష్టాలు, రైతులు ఎదుర్కొంటున్న నష్టాలు ఆయనను ఆలోచింపజేశాయి. అందుకే 13 ఏళ్ల ఐటీ కెరీర్‌కు, విప్రోలోని లక్షల జీతమొచ్చే ఉద్యోగానికి స్వస్తి చెప్పి, వ్యవసాయ రంగాన్ని ఎంచుకున్నారు బెంగళూరుకు చెందిన శశి కుమార్. ఆ పట్టుదలే నేడు ఆయనను రూ.1,500 కోట్ల విలువైన 'అక్షయకల్ప ఆర్గానిక్స్' సంస్థకు అధినేతగా నిలబెట్టింది.

కుటుంబంలో వ్యతిరేకత.. తండ్రితో 8 ఏళ్లు మాటల్లేవు!

వ్యవసాయం లాభదాయకం కాదని, తన పిల్లలు కష్టపడకూడదని భావించిన శశికుమార్ తండ్రి, ఆయన ఉద్యోగం వదిలేసి వ్యవసాయ రంగంలోకి వెళ్లడాన్ని జీర్ణించుకోలేకపోయారు. ఎంతగా అంటే.. ఈ విషయంలో తండ్రీకొడుకుల మధ్య ఎనిమిదేళ్ల పాటు మాటల్లేవు. అయినప్పటికీ, శశికుమార్ తన నిర్ణయంపై వెనక్కి తగ్గకుండా లక్ష్యం వైపు ముందుకు సాగారు.

వ్యాపారం మూతపడే పరిస్థితి నుండి భార్య సాయంతో

2010లో ప్రారంభమైన అక్షయకల్ప ప్రయాణం అంత సులువుగా సాగలేదు. ప్రారంభంలో తీవ్ర ఆర్థిక సంక్షోభాలు ఎదురయ్యాయి. కంపెనీ దివాళా తీసే స్థితికి చేరుకున్న సమయంలో శశికుమార్ భార్య తన పొదుపు మొత్తమైన రూ.30 లక్షలను ఇచ్చి ప్రోత్సహించారు. ఆ డబ్బుతో సవాళ్లను దాటుకుంటూ వ్యాపారాన్ని మళ్లీ అభివృద్ధి చేశారు.

ఆర్గానిక్ డెయిరీ విప్లవం

కేవలం పాలు అమ్మడం మాత్రమే కాకుండా, సంప్రదాయ వ్యవసాయాన్ని లాభదాయకమైన వ్యాపారంగా మార్చడమే అక్షయకల్ప ప్రధాన లక్ష్యం. రైతులకు సాంకేతికత, సేంద్రీయ పద్ధతులపై శిక్షణ ఇచ్చి, వారి వద్ద నుండి నాణ్యమైన ఆర్గానిక్ పాలు, పాల ఉత్పత్తులను సేకరించడం ప్రారంభించారు. రసాయనాలు లేని పాలు, సహజ ఉత్పత్తులకు నగరాల్లో ఆదరణ పెరగడంతో అక్షయకల్ప బ్రాండ్ వేగంగా విస్తరించింది.

Also Read: అమెరికా వదిలి భారత్‌కు ఐటీ నిపుణులు - 2026లో ఆల్‌టైమ్ రికార్డు.. అసలు కారణాలివే!

అంకెల్లో అక్షయకల్ప

ప్రస్తుతం సుమారు 2,800 మందికి పైగా రైతులతో కలిసి అక్షయకల్ప పనిచేస్తుంది. ఏటా రూ.600 కోట్లకు పైగా ఆదాయాన్ని ఆర్జిస్తోంది. నెలకు సగటున రూ.60 కోట్ల వ్యాపారాన్ని జరుగుతుందని శశి కుమార్ తెలిపారు. అక్షయకల్ప ప్రస్తుత మార్కెట్ విలువ రూ. 1,500 కోట్లుగా ఉంది. రైతులను భాగస్వామ్యులను చేస్తూ, నాణ్యమైన ఆర్గానిక్ ఉత్పత్తులను అందిస్తే సంప్రదాయ వ్యవసాయం కూడా కోట్ల రూపాయల కార్పొరేట్ సామ్రాజ్యంగా మారగలదని శశికుమార్ నిరూపించారు.

Also Read: ఒడిశాలో ఏపీ ఎన్నికలా.. ఆంధ్రా గో బ్యాక్ అన్న బీజేపీ ఏం చెస్తుంది? నవీన్ పట్నాయక్ ఆగ్రహం

Tech Professionals Return to India : అమెరికా వదిలి భారత్‌కు ఐటీ నిపుణులు - 2026లో ఆల్‌టైమ్ రికార్డు.. అసలు కారణాలివే!

Raja Sekhar Allu — Tue, 20 Oct 2026 09:29:03 +0530

Global Capability Centres India GCC: ఎన్నో దశాబ్దాలుగా నడిచిన బ్రెయిన్ డ్రెయిన్ ధోరణి తిరగబడి, భారతదేశం వైపు రివర్స్ బ్రెయిన్ డ్రెయిన్ శరవేగం అవుతోంది. అమెరికాలోని ప్రముఖ గ్లోబల్ ఐటీ , టెక్నాలజీ కంపెనీలలో పనిచేస్తున్న వైట్-కాలర్ నిపుణులు భారీ సంఖ్యలో తిరిగి భారతదేశానికి బాటపడుతున్నారు. స్టాఫింగ్ సంస్థల గణాంకాల ప్రకారం 2026 మొదటి తొమ్మిది నెలల్లోనే దాదాపు 12,700 మంది వైట్-కాలర్ టెక్ నిపుణులు అమెరికాను వదిలి భారత్‌కు చేరుకున్నారు. 2023లో 7,200 మంది, 2024లో 9,800 మంది, 2025లో రికార్డు స్థాయిలో 15,100 మంది స్వదేశానికి రాగా, ఈ ఏడాది ఆ సంఖ్య పాత రికార్డులన్నింటినీ తిరగరాసే దిశగా సాగుతోంది. అమెరికాలో దశాబ్దాల తరబడి ఉన్న అమెరికన్ డ్రీమ్ కంటే సొంత గడ్డపై పెరుగుతున్న అవకాశాలే మిన్న అని భావించి వీరంతా హైదరాబాద్, బెంగళూరు, పూణే, గుర్గావ్ వంటి ప్రధాన భారతీయ టెక్ నగరాల్లో రీ-ఎంట్రీ ఇస్తున్నారు.

అమెరికాలో భవిష్యత్ పై నమ్మకం కోల్పోతున్న ఎన్నారైలు

ఈ భారీ వలస వెనుక ప్రధాన కారణం అమెరికాలో హెచ్-1బి వీసా విధానాలపై వ్యక్తమవుతున్న నిరంతర అనిశ్చితి. వీసా నిబంధనలు కఠినతరం కావడం, గ్రీన్ కార్డ్ కోసం దశాబ్దాల తరబడి నిరీక్షించాల్సి రావడం, వీసా సకాలంలో రీ-న్యూవల్ కాకపోతే ఎదురయ్యే చట్టపరమైన సమస్యలు భారతీయులలో తీవ్ర అభద్రతాభావాన్ని పెంచాయి. దీనికి తోడు అమెరికా టెక్ దిగ్గజాల్లో వరుస లేఆఫ్స్ సంభవించినప్పుడు హెచ్-1బి హోల్డర్లకు లభించే 60 రోజుల గ్రేస్ పీరియడ్ లోపు కొత్త ఉద్యోగం వెతుక్కోవడం తీవ్ర సవాలుగా మారింది. ఉద్యోగం పోయిన వెంటనే దేశం వీడాల్సిన కఠిన పరిస్థితుల కంటే, సురక్షితమైన సొంత దేశంలో స్థిరపడటమే మంచిదని మెజారిటీ నిపుణులు నిర్ణయించుకుంటున్నారు.

భారతదేశంలో గ్లోబల్ కేపబిలిటీ సెంటర్ల విస్తరణ

రెండో ప్రధాన కారణం.. భారతదేశంలో గ్లోబల్ కేపబిలిటీ సెంటర్లు అత్యంత వేగంగా విస్తరించడం. అమెరికాకు చెందిన ఫార్చ్యూన్ 500 కంపెనీలు, మల్టీ నేషనల్ టెక్ దిగ్గజాలు తమ ప్రధాన పరిశోధన, ఇంజనీరింగ్ కేంద్రాలను హైదరాబాద్, బెంగళూరు వంటి నగరాల్లో ఏర్పాటు చేస్తున్నాయి. కేవలం సపోర్ట్ ప్రాజెక్టులు కాకుండా, ఆర్టిఫిషియల్ ఇంటెలిజెన్స్ , జనరేటివ్ ఏఐ, క్లౌడ్ కంప్యూటింగ్, డేటా సైన్స్ వంటి అత్యాధునిక రౌండ్-ది-క్లాక్ ప్రాజెక్టులను భారత్ నుంచే నిర్వహిస్తున్నాయి. అమెరికాలో సంపాదించే స్థాయికి దగ్గరగా ప్యాకేజీలు, సీనియర్ ఎగ్జిక్యూటివ్ హోదాలు ఇక్కడే లభిస్తుండటంతో గ్లోబల్ ఎక్స్‌పోజర్ ఉన్న నిపుణులకు జిసిసిలు ప్రధాన వేదికగా మారాయి.

ఇండియాలో అయితే కుటుంబానికి దగ్గరగా!

అంతేకాకుండా, మారుతున్న జీవనశైలి , కుటుంబ కారణాలు కూడా ఈ నిర్ణయంలో బలమైన పాత్ర పోషిస్తున్నాయి. సుదీర్ఘకాలం అమెరికాలో గడిపిన భారతీయ నిపుణులు తమ వృద్ధాప్యంలో ఉన్న తల్లిదండ్రుల సంరక్షణ, పిల్లల సాంస్కృతిక ఎదుగుదల , సొంత సామాజిక వాతావరణంలో జీవించాలనే కోరికతో తిరిగొస్తున్నారు. భారత్‌లో డిజిటల్ మౌలిక వసతులు, ప్రపంచస్థాయి గేటెడ్ కమ్యూనిటీలు, అంతర్జాతీయ పాఠశాలలు అందుబాటులోకి రావడంతో యూఎస్ తరహా జీవన ప్రమాణాలను ఇక్కడే పొందగలుగుతున్నారు. దీనికి తోడు భారతదేశంలో స్టార్టప్ ఇకోసిస్టమ్ బలంగా పుంజుకోవడంతో, అమెరికా అనుభవంతో సొంతంగా స్టార్టప్‌లు ప్రారంభించేందుకు విదేశీ నిపుణులు ముందుకు వస్తున్నారు.

అమెరికాతో పోలిస్తే వేతనాలు చాలా తక్కువ

భారత్‌కు తిరిగి రావడం పూర్తిగా సునాయాసంగా ఏమీ లేదు. అమెరికా స్థాయి జీతాలతో పోలిస్తే భారత మార్కెట్‌లో వేతనాల సర్దుబాటు చేసుకోక తప్పడం లేదు. అంతేకాకుండా, ఇక్కడి కార్పొరేట్ వర్క్ కల్చర్, ట్రాఫిక్ సమస్యలు, నైపుణ్యాలకు తగిన సరైన ఉద్యోగ ఎంపికలో ఎదురయ్యే పోటీ వంటి సవాళ్లను వారు ఎదుర్కోవాల్సి వస్తోంది. అయినప్పటికీ, ఉద్యోగ భద్రత , స్వదేశంలో ఉండే మానసిక ప్రశాంతత ముందు ఈ ఆర్థిక వ్యత్యాసాలు చిన్నవిగా కనిపిస్తున్నాయని తిరిగొచ్చిన నిపుణులు చెబుతున్నారు. అమెరికా నుంచి అత్యున్నత సాంకేతిక అనుభవం, ఆవిష్కరణల ఆలోచనలు ఉన్న నిపుణులు భారత్‌కు తరలిరావడం దేశ ఆర్థిక వ్యవస్థకు, వికసిత్ భారత్ లక్ష్యాలకు పెద్ద ఊతాన్నిస్తుంది. గ్లోబల్ ప్రొడక్ట్ డెవలప్‌మెంట్‌లో భారత్ కేవలం సేవల కేంద్రం గానే కాకుండా లీడర్‌షిప్ అండ్ ఇన్నోవేషన్ హబ్ గా రూపాంతరం చెందడానికి ఈ రివర్స్ మైగ్రేషన్ దోహదపడుతోంది. రాబోయే ఏళ్లలో అమెరికాకు వెళ్లే వారి సంఖ్య కంటే విదేశాల నుంచి భారతదేశానికి తిరిగొచ్చే ఐటీ నిపుణుల సంఖ్యే అధిగమించినా ఆశ్చర్యపోనక్కర్లేదని మైగ్రేషన్ డేటా స్పష్టం చేస్తోంది.

AP Local Body Elections: ఒడిశాలో ఏపీ ఎన్నికలా.. ఆంధ్రా గో బ్యాక్ అన్న బీజేపీ ఏం చెస్తుంది? నవీన్ పట్నాయక్ ఆగ్రహం

Shankar Dukanam — Tue, 20 Oct 2026 09:22:56 +0530

Kotia Panchayat Elections | పాట్నా: ఆంధ్రప్రదేశ్‌లోని కోటియా ప్రాంతంలో ఎన్నికల ప్రకటనపై నవీన్ పట్నాయక్ అభ్యంతరం వ్యక్తం చేస్తూ.. ఒడిశా భౌగోళిక సమగ్రతను కాపాడాలని రాష్ట్ర ప్రభుత్వాన్ని డిమాండ్ చేశారు. ఈ మేరకు ఒడిశా సీఎం మోహన్ చరణ్ మాఝీని చర్యలు తీసుకోవాలని కోరారు. గతంలో “ఆంధ్రా గో బ్యాక్” అని నినదించిన బీజేపీ ఇప్పుడు ఏం చేస్తోందంటూ కోటియా వివాదంపై ఎన్డీఏను ఇరుకున పెట్టే ప్రయత్నం చేశారు. ఈ మేరకు ఒడిశా సీఎంకు బహిరంగ లేఖ సైతం రాశారు.

అసలేంటీ కోటియా వివాదం..

బ్రిటిష్‌ పాలనా కాలం నుంచి కోటియా వివాదం కొనసాగుతోంది. బ్రిటిష్‌ మ్యాప్‌ల ప్రకారం 21 గ్రామాలు 2 రాష్ట్రాల్లో ఉన్నాయి. ఒడిశాలోని కొరాపుట్ జిల్లా పరిధిలోకి వచ్చే కోటియా పంచాయతీలోని 28 గ్రామాల్లోని 21 గ్రామాలపై ఏపీ, ఒడిశాల మధ్య సరిహద్దు వివాదం నేటికీ కొనసాగుతోంది. రెండు రాష్ట్రాలూ ఈ ప్రాంతంపై తమకు హక్కు ఉందని చెబుతుంటాయి. ప్రస్తుతం ఈ వివాదం కోర్టుల పరిధిలో ఉండగా.. రెండు రాష్ట్రాల ఎన్నికల్లోనూ ఈ కోటియా గ్రామాలు పాల్గొంటాయి. 2 రాష్ట్రాల నుంచి ప్రయోజనాలు అందుకుంటాయని ఎప్పటినుంచో ప్రచారం జరుగుతోంది.

బీజేపీ ప్రభుత్వానికి పట్నాయక్ సూటి ప్రశ్నలు

ఈ క్రమంలో ఏపీ స్థానిక ఎన్నికల సందర్భంగా కోటియా ప్రాంతంలో ఎన్నికల ప్రకటన రావడంపై ఒడిశా మాజీ సీఎం నవీన్ పట్నాయక్ తీవ్ర అభ్యంతరం వ్యక్తం చేశారు. గతంలో ‘ఆంధ్రా గో బ్యాక్’ అని నినాదాలు చేసిన బీజేపీ.. ఇప్పుడు ఎందుకు మౌనం వహిస్తుందో సమాధానం చెప్పాలని రాష్ట్ర ప్రభుత్వాన్ని నిలదీశారు. ఒడిశా భౌగోళిక సమగ్రతను కాపాడటానికి ఏం చర్యలు తీసుకున్నారని ప్రశ్నిస్తూ.. ప్రస్తుత సీఎం మోహన్ చరణ్ మాఝీ వెంటనే స్పందించి యాక్షన్ ప్లాన్ వెల్లడించాలని నవీన్ పట్నాయక్ డిమాండ్ చేశారు.

బీజేపీ- టీడీపీ స్నేహంపై విమర్శలు

2024 అసెంబ్లీ ఎన్నికల సమయంలో కోటియా సరిహద్దు సమస్యకు శాశ్వత పరిష్కారం చూపుతామని బీజేపీ హామీ ఇచ్చిందని బీజేడీ నేత నవీన్ పట్నాయక్ గుర్తుచేశారు. కేంద్రంలోని ఎన్డీయే ప్రభుత్వంలో టీడీపీ కీలక భాగస్వామిగా ఉన్నందుకే, ఏపీ ప్రభుత్వంతో ఉన్న రాజకీయ సంబంధాల కోసం ఒడిశా ప్రభుత్వం కోటియా అంశంపై మౌనం వహిస్తోందని ఆయన అనుమానం వ్యక్తం చేశారు. 2025లో కోటియా సరిహద్దు వివాదంపై నియమించిన ఉన్నతస్థాయి కమిటీ ఇచ్చిన సిఫార్సులపై ఇప్పటివరకు ఏం చర్యలు తీసుకున్నారో రాష్ట్ర ప్రజలకు స్పష్టం చేయాలని మోహన్ చరణ్ మాఝీ ప్రభుత్వాన్ని పట్నాయక్ ప్రశ్నించారు.

ఆంధ్రా, ఒడిశా వివాదాస్పద ప్రాంతం కొఠియాపై ఒడిశా ప్రభుత్వం సందిగ్దంలో పడింది. కొరాపుట్‌ జిల్లా పొట్టంగి సమితి కోటియా గ్రామ పంచాయతీలో మొత్తం 28 గ్రామాలుండగా 21 గ్రామాలకు ఆంధ్ర ప్రదేశ్‌ ప్రభుత్వం పంచాయతీ ఎన్నికలు నిర్వహిస్తోంది. ఏపీలోని పార్వతీపురం మన్యం జిల్లా సాలూరు మండలం గంజాయి బద్ర, పగులు చెన్నురు ఎంపీటీసీ గ్రామాలకు నవంబర్‌ 3వ తేదీ ఎన్నికలు జరగనున్నాయి. ఆపై గంజాయి బద్ర, పట్టు చెన్నురు, పగులు చెన్నురు, కురకుట్ల, సారిక గ్రామ పంచాయతీలకు నవంబర్‌ 26, 29 తేదీల్లో ఎన్నికలు నిర్వహించనున్నారు. ఆ 21 గ్రామాల్లో ఏపీ ప్రభుత్వం సంక్షేమ పథకాలను అమలు చేస్తోంది. మరోవైపు ఆ కోటియా గ్రామాల ప్రజలు ఒడిశా ప్రభుత్వం నుంచి సైతం లబ్ధి పొందుతున్నారు. వారు రెండు రాష్ట్రాల్లోనూ ఎన్నికల్లో పాల్గొంటారని స్థానికులు చెబుతున్నారు.

RC, ఆధార్ కార్డులో పేరు వేర్వేరుగా ఉంటే, పోలీసులు చలాన్ వేస్తారా ?

Shankar Dukanam — Mon, 19 Oct 2026 09:59:23 +0530

RC Aadhaar Name Mismatch | కొందరికి వాహనం RCలో పేరు ఒకలా, ఆధార్ కార్డులో మరోలా ఉంటుంది. కొన్నిచోట్ల స్పెల్లింగ్ వేరేలా ఉంటే, మరోచోట పూర్తి పేరు కూడా వేరుగా ఉంటడం లాంటి సమస్యలున్నాయి. ఇలాంటి పరిస్థితిలో వెహికల్ చెకింగ్ సమయంలో చలాన్ పడుతుందేమో అన్న టెన్షన్ ఉంటుంది. కేవలం పేరులో తేడా ఉన్నందుకే సాధారణంగా చలాన్ వేయడం లాంటి చర్యలు తీసుకోరు. కానీ కొన్ని ఇతర పనుల్లో ఇబ్బంది రావచ్చు. అందుకే సరైన సమాచారం తెలుసుకుంటే ఏ ఇబ్బంది ఉండదు. అందుకు సంబంధించిన పూర్తి విషయాలు ఇక్కడ అందిస్తున్నాం.

కేవలం పేరు వేరుగా ఉంటే చలాన్ వేస్తారా..

ట్రాఫిక్ చెకింగ్‌లో పోలీసులు సాధారణంగా వాహనానికి సంబంధించిన ముఖ్యమైన డాక్యుమెంట్లు అన్ని అడుగుతారు. వీటిలో RC, డ్రైవింగ్ లైసెన్స్, బీమా అంటే ఇన్సూరెన్స్, కాలుష్య తనిఖీ ధ్రువీకరణ పత్రం అంటే PUC ఉంటాయి. ఆధార్ కార్డు ఈ జాబితాలో ఉండదని తెలిసిందే. మీ వద్ద ఈ డాక్యుమెంట్స్ అన్నీ సరిగ్గా, చెల్లుబాటులో ఉంటే, కేవలం ఆధార్, RCలో పేరు వేరుగా ఉండటం వల్ల మీకు ఎలాంటి చలాన్ వేయరు. ఏదైనా సర్టిఫికెట్ గడువు ముగిసిపోయి ఉంటే లేదా లేకపోతే మాత్రం చలాన్ తప్పకుండా వేస్తారు.

అయితే ఇబ్బంది ఎక్కడ వస్తుంది

ఆధార్‌తో సంబంధం ఉన్న ఏదైనా పని చేయాల్సి వచ్చినప్పుడు ఇబ్బంది వస్తుంది. కొన్ని రాష్ట్రాల్లో PUC తీసుకోవడానికి లేదా రవాణా ఆన్‌లైన్ సేవల్లో ఆధార్ OTPను ఉపయోగిస్తారు. అక్కడ RC, ఆధార్ డేటా ఒకేలా ఉండకపోతే పని ఆగిపోతుంది. వాహనం అమ్మడం, పేరు బదిలీ చేయించడం లేదా నో ఇష్యూ సర్టిఫికెట్ తీసుకోవడంలో కూడా ఆధార్ ద్వారా గుర్తింపు అవసరం అయింది. ఇలాంటి సందర్భాల్లో RC మరియు ఆధార్‌లో పేరులో తేడా ఉంటే సిస్టమ్ హెచ్చరిక ఇవ్వవచ్చు. లోన్‌కు సంబంధించిన పనుల్లో కూడా పత్రాల్లో పేర్లు సరిపోవడం అవసరం.

తనిఖీ సమయంలో ఏం చేయాలి

వాహనం డ్రైవింగ్ చేస్తున్నప్పుడు RC, లైసెన్స్, బీమా, PUC మీతో ఉంచుకోవాలి. అసలు పత్రాలు లేకపోతే, వాటి డిజిటల్ కాపీని కూడా ఫోన్‌లో తప్పకుండా ఉండాలి. వాహనం యజమాని, నడిపేవారు వేర్వేరుగా ఉండవచ్చు. అందుకే RC, లైసెన్స్‌లో పేరు వేరుగా కనిపించడం చలాన్ వేసేంత తప్పు కాదు. పోలీసులు అడిగితే కంగారు పడకుండా ప్రశాంతంగా పత్రాలు చూపించి వారికి సహకరించాలి. చలాన్ తప్పుగా అనిపిస్తే, దాని వివరాలను రవాణా పోర్టల్‌లో చూసి, నిబంధనల ప్రకారం ట్రాఫిక్ అధికారులు చర్యలు తీసుకుంటారు.

పేరులో వ్యత్యాసం ఉంటే ఎలా సరిచేయించాలి

ముందుగా తప్పు ఎక్కడ ఉంది RCలోనా లేదా ఆధార్‌లోనా తెలుసుకోవాలి. RCలో పేరు తప్పుగా ఉంటే సమీపంలోని RTOకి వెళ్లి లేదా రవాణా సేవా పోర్టల్‌లో పేరు సవరణ కోసం దరఖాస్తు చేయాలి. ఆధార్‌లో పేరు తప్పుగా ఉంటే దాన్ని ఆధార్ కేంద్రంలో అప్‌డేట్ చేయించుకోవాలి. ఇందుకోసం పేరుకు సంబంధించిన సరైన ఆధారాన్ని ఇవ్వాలి. పోర్టల్ లేదా RTO ప్రక్రియ, అవసరమైన పత్రాలు రాష్ట్రానికొక తీరుగా ఉంటాయి. కనుక దరఖాస్తు చేసే ముందు మీ RTO వెబ్‌సైట్ లేదా ఆఫీసు నుంచి తప్పకుండా సమాచారం తీసుకోండి.