india

UP Elections 2027 : సామాజిక్ పరివర్తన్ మోర్చా - యూపీలో దళిత్, ముస్లిం ఫ్రంట్ - కొత్త కూటమి ప్రారంభించిన ఓవైసీ !

Raja Sekhar Allu — Thu, 12 Nov 2026 13:57:35 +0530

Asaduddin Owaisi Chandrashekhar Azad Alliance 2026: ఉత్తరప్రదేశ్ అసెంబ్లీ ఎన్నికలకు సమయం దగ్గరపడుతున్న వేళ, ఆ రాష్ట్ర రాజకీయ ముఖచిత్రాన్ని సమూలంగా మార్చేసే కీలక పరిణామం చోటుచేసుకుంది. ఆల్ ఇండియా మజ్లిస్-ఇ-ఇత్తెహాదుల్ ముస్లిమీన్ అధినేత అసదుద్దీన్ ఒవైసీ, ఆజాద్ సమాజ్ పార్టీ కాన్షీరాం అధ్యక్షుడు, నగీనా ఎంపీ చంద్రశేఖర్ ఆజాద్ అధికారికంగా రాజకీయ పొత్తును ప్రకటించారు. లక్నో వేదికగా నవంబర్ 12న వీరిద్దరూ సంయుక్త మీడియా సమావేశం నిర్వహించి యూపీలో కొత్తగా సామాజిక పరివర్తన మోర్చా పేరిట మూడో కూటమికి తెరలేపారు. ఇండియా కూటమిలో తమకు స్థానం కల్పించాలంటూ సమాజ్‌వాదీ పార్టీ, కాంగ్రెస్‌లకు ఒవైసీ ఇచ్చిన గడువు ముగియడం, అఖిలేష్ యాదవ్ మొండిచేయి చూపడంతో.. ఒవైసీ నేరుగా చంద్రశేఖర్ ఆజాద్‌తో జట్టుకట్టి యూపీలో 'దళిత-ముస్లిం' కాంబినేషన్‌ను సెట్ చేశారు.

యూపీ రాజకీయాల్లో దశాబ్దాల పాటు దళిత ఓటుబ్యాంకుకు ఏకైక అధినేత్రిగా వెలుగొందిన బీఎస్పీ అధినేత్రి మాయావతి ప్రభావం ప్రస్తుతం క్షేత్రస్థాయిలో బలహీనపడటంతో, ఆ రాజకీయ శూన్యతను నగీనా ఎంపీ చంద్రశేఖర్ ఆజాద్ వేగంగా భర్తీ చేస్తున్నారు. ముఖ్యంగా యువ దళిత ఓటర్లలో ఆజాద్‌కు పెరుగుతున్న ఆదరణను గుర్తించిన ఒవైసీ.. రాష్ట్రంలోని దాదాపు 40 శాతం వరకు ఉన్న ముస్లిం మైనారిటీ ఓట్లను, దళిత ఓట్లను ఒకే గొడుగు కిందకు తెచ్చేందుకు ఈ వ్యూహాత్మక పొత్తు కుదుర్చుకున్నారు. బలహీనవర్గాలు, యువత, రైతుల హక్కుల కోసం తమ కూటమి పోరాడుతుందని ఇరువురు నేతలు స్పష్టం చేస్తూనే, ఇప్పటివరకు దళితులు, ముస్లింలను కేవలం ఓటుబ్యాంకుగా వాడుకున్న ప్రధాన పార్టీలకు గట్టి బుద్ధి చెబుతామని హెచ్చరించారు.

ఈ కొత్త కూటమి ఆవిర్భావం ఉత్తరప్రదేశ్ ఎన్నికల్లో ఏ స్థాయి ప్రభావం చూపిస్తుందన్నది ఇప్పుడు జాతీయ రాజకీయాల్లో అత్యంత కీలకంగా మారింది. రాష్ట్రంలోని 403 అసెంబ్లీ స్థానాల్లో పశ్చిమ యూపీ, రోహిల్‌ఖండ్, పూర్వాంచల్ ప్రాంతాల్లోని సంభల్, రాంపూర్, మీరట్, నగీనా, ఆజంగఢ్, బహ్రయిచ్, శ్రావస్తి, కుందర్కి వంటి సుమారు 150 స్థానాల్లో ఈ కూటమి పోటీ చేసేందుకు సిద్ధమవుతోంది. గత స్థానిక సంస్థల ఎన్నికల్లో ఎంఐఎం 5 మున్సిపల్ ఛైర్మన్ పీఠాలు, 83 కౌన్సిలర్ స్థానాలను గెలుచుకోవడం, పార్లమెంట్ ఎన్నికల్లో చంద్రశేఖర్ ఆజాద్ సత్తా చాటడం వీరి ఆత్మవిశ్వాసాన్ని పెంచింది. గత 2022 అసెంబ్లీ ఎన్నికల్లో ఇరు పార్టీలూ ఖాతా తెరవకపోయినప్పటికీ, ఈసారి కలిసి బరిలోకి దిగడం ద్వారా సమీకరణాలను మార్చాలని చూస్తున్నాయి.

#WATCH | Uttar Pradesh | Azad Samaj Party-Kanshiram President and MP, Chandrashekhar Azad and AIMIM chief Asaduddin Owaisi form 'Samajik Parivartan Morcha' for UP polls AIMIM chief Asaduddin Owaisi says, "We have decided to form 'Samajik Parivartan Morcha'. I can say with confidence this will be a strong Morcha to stop the BJP from coming to power in UP for the third time."
— ANI (@ANI) November 12, 2026

ఒకవేళ సామాజిక పరివర్తన మోర్చా గణనీయమైన స్థాయిలో దళిత, ముస్లిం ఓట్లను చీల్చగలిగితే.. అది నేరుగా అఖిలేష్ యాదవ్ నేతృత్వంలోని సమాజ్‌వాదీ పార్టీ, కాంగ్రెస్ కూటమి PDA ఫార్ములా విజయవకాశాలకు భారీ గండికొట్టడం ఖాయమని రాజకీయ విశ్లేషకులు అంచనా వేస్తున్నారు. ముఖ్యంగా ముస్లిం ఓటర్లు అధికంగా ఉన్న 40-45 నియోజకవర్గాల్లో ఒవైసీ పార్టీ అభ్యర్థులు చీల్చే ఓట్లు అఖిలేష్ యాదవ్‌కు పెద్ద తలనొప్పిగా మారనున్నాయి. అదే సమయంలో బీఎస్పీ ఒంటరి పోరుకు సిద్ధమవుతుండటంతో దళిత ఓటుబ్యాంకు మాయావతి, చంద్రశేఖర్ ఆజాద్ మరియు ఎస్పీల మధ్య చీలిపోయే అవకాశం స్పష్టంగా కనిపిస్తోంది.

మొత్తానికి, మూడోసారి అధికారంలోకి రావాలని చూస్తున్న బీజేపీకి ఒకవైపు, దాన్ని అడ్డుకోవాలని ప్రయత్నిస్తున్న 'ఇండియా' కూటమికి మరోవైపు.. ఒవైసీ-ఆజాద్ జోడీ ఇప్పుడు అతిపెద్ద సవాలుగా నిలిచింది. మాయావతి నిస్తేజంతో విసిగిపోయిన దళితులు, అఖిలేష్ యాదవ్ వైఖరిపై అసంతృప్తితో ఉన్న ముస్లిం వర్గాలు ఈ కొత్త వేదిక వైపు ఆకర్షితులైతే యూపీ ఎన్నికల ఫలితాలు తలకిందులయ్యే అవకాశం ఉంది. అయితే, ఈ కొత్త కూటమి కేవలం ప్రతిపక్ష ఓట్లను చీల్చే శక్తిగానే మిగిలిపోయి బీజేపీకి పరోక్షంగా లాభం చేకూరుస్తుందా, లేక బీహార్ తరహాలో యూపీ రాజకీయాల్లోనూ ఒక బలమైన ప్రత్యామ్నాయ శక్తిగా అవతరిస్తుందా అనేది రాబోయే 2027 ఎన్నికల రణరంగంలో తేలనుంది.

Kishtwar Police: అడవిలో విగతజీవులుగా ఇద్దరు పోలీసు ఆఫీసర్లు.. సర్వీస్ రివాల్వర్లు మాయం.. ఉగ్రకోణంపై దర్యాప్తు!

Satyaprasad Bandaru — Thu, 12 Nov 2026 12:43:03 +0530

Kishtwar Police: జమ్మూకశ్మీర్‌లోని కిశ్త్‌వాడ్ జిల్లాలో విషాదకర ఘటన చోటుచేసుకుంది. విధుల్లో ఉండి, అదృశ్యమైన ఇద్దరు స్పెషల్ పోలీసు ఆఫీసర్లు అనుమానాస్పద స్థితిలో మృతి చెందడం భద్రతా వర్గాల్లో కలకలం రేపింది. గురువారం ఉదయం అటవీ ప్రాంతంలో వీరి మృతదేహాలు లభ్యమయ్యాయి. మృతుల శరీరంపై బుల్లెట్ గాయాలు ఉండటం, వారి సర్వీసు తుపాకులు మాయమవడం పలు అనుమానాలకు తావిస్తోంది.

అసలేం జరిగింది?

స్పెషల్ ఆపరేషన్స్ గ్రూప్ కు చెందిన బాబీ చాంద్ (57), రశ్‌పాల్ కుమార్ (45) బుధవారం మధ్యాహ్నం తమ క్యాంప్ నుంచి ధర్నా-మర్వా ప్రాంతంలోని ఆర్మీ పోస్ట్‌కు బయల్దేరారు. మధ్యాహ్నం 3.30 గంటల సమయంలో మార్గమధ్యంలోని దచన్ అటవీ ప్రాంతం నుంచి అనుమానాస్పద శబ్దాలు వినిపించడంతో, తనిఖీ చేసేందుకు వీరిద్దరూ అడవిలోకి వెళ్లారు. ఆ తర్వాత వారి నుంచి ఎలాంటి సమాచారం రాలేదు. సరిగ్గా అదే సమయంలో ఆ ప్రాంతంలో మొబైల్ నెట్‌వర్క్ సేవలు కూడా నిలిచిపోవడంతో అధికారుల్లో ఆందోళన మొదలైంది.

ముమ్మర గాలింపు.. మృతదేహాల లభ్యం

పోలీసు ఆఫీసర్లు అదృశ్యమైనట్లు నిర్ధారించుకున్న ఆర్మీ, భద్రతా బలగాలు దచన్ అటవీ ప్రాంతంలో రాత్రంతా ముమ్మర గాలింపు చర్యలు చేపట్టాయి. ఈ క్రమంలో గురువారం ఉదయం అడవిలో బాబీ చాంద్, రశ్‌పాల్ కుమార్ విగతజీవులుగా పడి ఉండటాన్ని భద్రతా సిబ్బంది గుర్తించారు.

Also Read: కుల్గాం CRPF క్యాంపుపై ఉగ్రదాడి.. ఇద్దరు జవాన్లకు గాయాలు- ఆ ఏరియాను జల్లెడ పడుతున్న బలగాలు

ఉగ్రవాదుల పనేనా?

ఘటనాస్థలంలో మృతి చెందిన పోలీసుల వద్ద ఉండాల్సిన సర్వీసు తుపాకులు కనిపించకపోవడం గమనార్హం. ఉగ్రవాదులే వీరిని కిడ్నాప్ చేసి, కాల్చి చంపి ఆయుధాలను ఎత్తుకెళ్లి ఉండొచ్చని ఉన్నతాధికారులు ప్రాథమికంగా అనుమానిస్తున్నారు. ప్రస్తుతం ఆ ప్రాంతమంతా భద్రతా బలగాలు దిగ్బంధించి, ఉగ్రవాదుల కోసం నిర్బంధ తనిఖీలు నిర్వహిస్తున్నాయి.

కుల్గామ్ ఉగ్రదాడితో సంబంధం ఉందా?

మరోవైపు, బుధవారం మధ్యాహ్నం 2 గంటల ప్రాంతంలోనే జమ్మూకశ్మీర్‌లోని కుల్గామ్ జిల్లాలో ఉన్న సీఆర్పీఎఫ్ శిబిరంపై ఉగ్రదాడి జరిగింది. బైకులపై వచ్చిన ఇద్దరు ఉగ్రవాదులు చెక్‌పోస్ట్ వద్ద ఉన్న జవాన్లపై కాల్పులు జరిపి పరారయ్యారు. దాదాపు ఒకే సమయంలో కుల్గామ్ దాడి, కిశ్త్‌వాడ్‌లో పోలీసుల మిస్సింగ్ హత్య జరగడంతో ఈ రెండు ఘటనల వెనుక ఒకే ఉగ్రముఠా హస్తం ఉందా అనే కోణంలో పోలీసులు లోతుగా దర్యాప్తు చేస్తున్నారు.

Also Read: పట్టాలు తప్పిన కోల్‌కతా- సైరాంగ్ ఎక్స్‌ప్రెస్ రైలు

Sonia Gandhi Autobiography: సోనియా గాంధీ బిలాంగింగ్ - ఇందిరా మరణం, రాజీవ్ కన్నీళ్లు.. సానుభూతి కోసమే పుస్తకమా?

Raja Sekhar Allu — Thu, 12 Nov 2026 10:38:03 +0530

Congress vs BJP Debate On Sonia Gandhi Memoir: కాంగ్రెస్ అగ్రనేత, యూపీఏ మాజీ చైర్‌పర్సన్ సోనియా గాంధీ రాసిన ఆత్మకథ ‘బిలాంగింగ్: ఎ జర్నీ ఆఫ్ లవ్’ పుస్తక ఆవిష్కరణ భారత రాజకీయాల్లో సుదీర్ఘ చర్చకు తెరలేపింది. ఇటలీలోని ఒక చిన్న గ్రామం నుంచి బయలుదేరి, గాంధీ-నెహ్రూ కుటుంబంలో కోడలిగా అడుగుపెట్టినప్పటి నుంచి— 1969లో తన తొలి సంతానాన్ని కోల్పోయిన నాటి తీవ్ర మానసిక క్షోభ, రాజీవ్ గాంధీ పడిన కన్నీళ్లు, అత్త ఇందిరా గాంధీ దారుణ హత్య, 1991లో రాజీవ్ గాంధీ విచారకర అంతం వరకు.. ఒక మహిళగా తను పడిన ఆవేదనను ఆమె ఈ పుస్తకంలో సున్నితంగా ఆవిష్కరించారు.

రాజకీయాల ప్రస్తావన కూడా !

అయితే, ఈ పుస్తకం కేవలం వ్యక్తిగత ప్రేమ లేదా కుటుంబ నష్టాల కన్నీటి కథనాలకే పరిమితం కాలేదు. దశాబ్దాల పాటు భారత రాజకీయాల చక్రం తిప్పిన 10 జన్ పథ్ తెరవెనుక అధికార ప్రస్థానాన్ని, 1998లో కాంగ్రెస్ అధ్యక్ష బాధ్యతలు స్వీకరించిన తీరును, యూపీఏ-1, యూపీఏ-2 సంకీర్ణ ప్రభుత్వాల నిర్వహణలోని అంతర్గత ఒత్తిళ్లను సోనియా ఈ పుస్తకంలో స్పృశించారు. నాటి ప్రధాని డాక్టర్ మన్మోహన్ సింగ్‌తో తన అనుబంధం, 2004లో ప్రధాని పదవిని త్యాగం చేయడం వెనుక ఉన్న అంతరంగిక నిర్ణయాలు, కాంగ్రెస్‌లోని సీనియర్ నేతల అంతర్గత కుమ్ములాటల గుట్టును బయటపెట్టడం జాతీయ స్థాయిలో తీవ్ర రాజకీయ దుమారానికి కారణమైంది.

సింపతీ కార్డ్ కోసమే పుస్తకం

ప్రతిపక్ష అధికార ఎన్‌డీయే కూటమి నాయకులు ఈ ఆత్మకథపై తీవ్రస్థాయిలో విమర్శలు గుప్పిస్తున్నారు. యూపీఏ హయాంలో జరిగిన పలు ఆర్థిక కుంభకోణాలు, సూపర్ ప్రైమ్ మినిస్టర్ గా నేషనల్ అడ్వైజరీ కౌన్సిల్ ద్వారా సమాంతర అధికారాన్ని చెలాయించారన్న ఆరోపణలను కప్పిపుచ్చుకోవడానికే సోనియా ఈ పుస్తకం ద్వారా సింపథీ కార్డ్ ని ప్రయోగిస్తున్నారని అధికార వర్గాలు విమర్శిస్తున్నాయి. 2004-2014 మధ్యకాలంలో జరిగిన తెరవెనుక రాజకీయాలను తనకు అనుకూలమైన రీతిలో మలచుకున్నారనే అభిప్రాయాన్ని వారు వ్యక్తం చేస్తున్నారు.
మరోవైపు, కాంగ్రెస్ శ్రేణులు , ఇండియా కూటమి భాగస్వామ్య పక్షాలు మాత్రం సోనియా రాసిన పుస్తకాన్ని సమర్థిస్తున్నాయి. దేశం కోసం భర్తను, అత్తను కోల్పోయినా.. భారతదేశ ప్రజాస్వామ్య వ్యవస్థల పరిరక్షణకు, పార్టీ ఉనికికి ఆమె చేసిన త్యాగాలను బిలాంగింగ్ పుస్తకం ప్రపంచానికి చాటిచెబుతోందని అభివర్ణిస్తున్నారు. ఒక విదేశీ మూలాలున్న మహిళగా ఎదుర్కొన్న ఆక్షేపణలను అధిగమించి, భారతీయతను తన సొంతం చేసుకున్న తీరును ఈ పుస్తకం ప్రతిబింబిస్తుందని వారు వ్యాఖ్యానిస్తున్నారు.

కాంగ్రెస్‌కు ఓ ఆయుధంగా పుస్తకం

ఈ పుస్తక ప్రభావం కేవలం గత చరిత్రకే పరిమితం కాకుండా, రాబోయే రోజుల్లో కాంగ్రెస్ పార్టీ సాగించే నెరేటివ్ యుద్ధానికి ప్రధాన ఇంధనంగా మారనుంది. రాహుల్ గాంధీ, ప్రియాంక గాంధీల రాజకీయ ప్రస్థానానికి గాంధీ కుటుంబ త్యాగాల నేపథ్యాన్ని మరోసారి ప్రజల్లోకి బలంగా తీసుకెళ్లడానికి ఇది ఒక మాధ్యమంగా ఉపయోగపడనుంది. అదే సమయంలో, బీజేపీ దీనిని ఎదుర్కొనేందుకు యూపీఏ కాలం నాటి పాలనా వైఫల్యాలను, ప్యాలెస్ రాజకీయాలను తిరిగి ఎండగట్టే అవకాశం ఉంది. ‘బిలాంగింగ్: ఎ జర్నీ ఆఫ్ లవ్’ అనేది కేవలం సోనియా గాంధీ జ్ఞాపకాల సమాహారం మాత్రమే కాదు. అది ఆధునిక భారత రాజకీయ చరిత్రలోని అత్యంత కీలకమైన ఘట్టాలకు అద్దం పట్టే ఒక వివాదాస్పద పత్రం. ప్రేమ, కోల్పోవడం, సాధికారత, అధికార పోరాటాల మధ్య సాగిన ఒక మహిళ జీవిత ప్రయాణం ఇప్పుడు మళ్లీ కాంగ్రెస్-బీజేపీల మధ్య సరికొత్త పొలిటికల్ డిబేట్‌ను రాజేసింది.

PM Modi Cabinet Meeting: కేంద్ర కేబినెట్ 5 కీలక నిర్ణయాలు.. రూ.3 వేల కోట్లతో మ్యూజియం.. ముద్రా, ఎరువుల సబ్సిడీలకు ఆమోదం

Satyaprasad Bandaru — Wed, 11 Nov 2026 19:28:49 +0530

PM Modi Cabinet Meeting: దేశంలో సాంస్కృతిక వారసత్వం, పట్టణ రవాణా, రైతుల సంక్షేమం, ఔత్సాహిక పారిశ్రామికవేత్తలను ప్రోత్సహించే లక్ష్యంతో ప్రధాని నరేంద్ర మోదీ అధ్యక్షతన జరిగిన కేంద్ర కేబినెట్ మీటింగ్ లో 5 ప్రధాన నిర్ణయాలకు ఆమోదం తెలిపింది. న్యూదిల్లీలో భారీ మ్యూజియం ఏర్పాటు, నోయిడా మెట్రో విస్తరణ, రబీ సీజన్‌కు ఎరువుల సబ్సిడీలతో పాటు చిన్న వ్యాపారాలు, మహిళలకు రుణ హామీ పథకాల పొడిగింపు ఈ సమావేశంలో తీసుకున్న కీలక నిర్ణయాలలో ఉన్నాయి.

1. యుగే యుగీన్ భారత్ మ్యూజియానికి రూ. 3,230 కోట్లు

న్యూదిల్లీలోని చారిత్రాత్మక నార్త్ , సౌత్ బ్లాక్ భవనాలను ఉపయోగిస్తూ అత్యంత ప్రతిష్టాత్మకంగా 'యుగే యుగీన్ భారత్ మ్యూజియం'ను అభివృద్ధి చేయడానికి కేబినెట్ రూ. 3,230 కోట్లు మంజూరు చేసింది. భారతదేశపు గొప్ప సాంస్కృతిక వారసత్వాన్ని, వేల సంవత్సరాల చరిత్రను ఒకే ప్రాంగణంలో ప్రపంచానికి చాటిచెప్పడమే ఈ మ్యూజియం ప్రాజెక్ట్ ముఖ్య ఉద్దేశం.

2. నోయిడా మెట్రో కారిడార్ విస్తరణ

దిల్లీ ఎన్‌సీఆర్ ప్రాంతంలో రవాణా అనుసంధానాన్ని పెంచేందుకు రూ. 2,390 కోట్ల అంచనా వ్యయంతో మెట్రో రైలు విస్తరణకు కేబినెట్ పచ్చజెండా ఊపింది. ఈ నూతన కారిడార్ నోయిడాలోని సెక్టార్ 51 నుండి గ్రేటర్ నోయిడాలోని సెక్టార్ 4 వరకు సుమారు 8.5 కిలోమీటర్ల మేర విస్తరించి ఉంటుంది.

3. రైతులకు రూ. 62,370 కోట్ల ఎరువుల సబ్సిడీ

రాబోయే రబీ సీజన్‌లో రైతులకు సకాలంలో, రాయితీ ధరలకే ఎరువులు అందుబాటులో ఉంచేందుకు కేబినెట్ రూ. 62,370 కోట్లను ఆమోదించిందని కేంద్ర సమాచార, ప్రసార శాఖ మంత్రి అశ్విని వైష్ణవ్ వెల్లడించారు. ఈ నిర్ణయం ద్వారా దేశంలోని కోట్లాది మంది రైతులకు ఆర్థికంగా పెద్ద ఊరట లభించనుంది.

Also Read: కుల్గాం CRPF క్యాంపుపై ఉగ్రదాడి.. ఇద్దరు జవాన్లకు గాయాలు- ఆ ఏరియాను జల్లెడ పడుతున్న బలగాలు

4. ముద్రా యోజనకు రూ. 5,000 కోట్ల బూస్ట్

చిన్న వ్యాపారాలను బలోపేతం చేసేందుకు 'ప్రధాన మంత్రి ముద్రా యోజన' కింద సూక్ష్మ యూనిట్ల కోసం ఉద్దేశించిన క్రెడిట్ గ్యారెంటీ ఫండ్‌ను మరో ఐదేళ్లపాటు కొనసాగించేందుకు మంత్రివర్గం ఆమోదం తెలిపింది. సూక్ష్మ సంస్థలకు రుణ మద్దతు సులభతరం చేసేందుకు ఈ ఫండ్‌కు రూ. 5,000 కోట్లు కేటాయించారు.

5. స్టాండ్-అప్ ఇండియాకు రూ. 4,111 కోట్లు

షెడ్యూల్డ్ కులాలు, షెడ్యూల్డ్ తెగలు, మహిళా పారిశ్రామికవేత్తలు కొత్త వ్యాపారాలు ప్రారంభించేందుకు మద్దతుగా నిలిచే 'స్టాండ్-అప్ ఇండియా' పథకం క్రెడిట్ గ్యారెంటీ ఫండ్‌ను కూడా మరో ఐదేళ్లపాటు పొడిగించారు. ఈ కేటాయింపు కోసం ప్రభుత్వం రూ. 4,111 కోట్లను ఆమోదించింది.

Also Read: పట్టాలు తప్పిన కోల్‌కతా- సైరాంగ్ ఎక్స్‌ప్రెస్ రైలు.. తప్పిన పెను ప్రమాదం- అసలేం జరిగింది

Kulgam Terrorist Attack: కుల్గాం CRPF క్యాంపుపై ఉగ్రదాడి.. ఇద్దరు జవాన్లకు గాయాలు- ఆ ఏరియాను జల్లెడ పడుతున్న బలగాలు

Shankar Dukanam — Wed, 11 Nov 2026 14:56:40 +0530

Kulgam Terrorist Attack | కుల్గాం: జమ్మూకాశ్మీర్‌లో మరోసారి ఉగ్రదాడి జరిగింది. ఏకంగా కుల్గాం జిల్లాలోని సీఆర్పీఎఫ్ క్యాంపు మీద ఉగ్రవాదులు కాల్పులు జరపడం కలకలం రేపుతోంది. బుధవారం మధ్యాహ్నం 2.15 గంటలకు బైకు మీద వచ్చిన గుర్తుతెలియని దుండగులు సీఆర్పీఎఫ్ క్యాంపుపై ఒక్కసారిగా కాల్పులు జరిపారు. ఈ ఉగ్రదాడిలో ఇద్దరు సీఆర్పీఎఫ్ జవాన్లు గాయపడినట్లు సమాచారం. గాయపడిన వారిని అనంత్ నాగ్ జిల్లా ఆసుపత్రికి తరలించి చికిత్స అందిస్తున్నామని సీఆర్పీఎఫ్ అధికారులు తెలిపారు.

#WATCH | J&K | Two CRPF personnel injured after unidentified motorcycle-borne assailants opened fire on security personnel deployed at a naka in Kulgam district this afternoon. The injured personnel were shifted to a hospital in Anantnag district for treatment. (Visuals from the area, deferred by unspecified time; no live operational details disclosed)
— ANI (@ANI) November 11, 2026

ఉగ్రదాడి జరిగిన వెంటనే అప్రమత్తమైన సీఆర్పీఎఫ్ సిబ్బంది ఎదురుకాల్పులు జరిపారు. బలగాలు ఎదురుకాల్పులు ప్రారంభించగానే ఉగ్రవాదులు తోకముడిచారు. సీఆర్పీఎఫ్ జవాన్లు కాల్పుల నుంచి తప్పించుకునేందుకు వెంటనే బైకు మీద పరారయ్యారని సమాచారం.

Two Central Reserve Police Force (CRPF) personnel were injured after unidentified motorcycle-borne assailants opened fire on security personnel deployed at a naka in Kulgam district of Jammu and Kashmir this afternoon. The incident took place at around 2.15 pm when the assailants fired at the CRPF personnel before fleeing the spot. The injured personnel were shifted to a hospital in Anantnag district for treatment: CRPF
— ANI (@ANI) November 11, 2026

దాడి జరిగిన వెంటనే జవాన్లు సీఆర్పీఎఫ్ క్యాంప్ సహా చుట్టుపక్కల ప్రాంతాన్ని తమ ఆధీనంలోకి తీసుకున్నాయి. కాల్పులు జరిపి తప్పించుకున్న ఉగ్రవాదుల కోసం సీఆర్పీఎఫ్ జవాన్లు, భద్రతా బలగాలు ముమ్మరంగా గాలింపు చర్యలు చేపట్టాయి. ఆ చట్టుపక్కల ప్రాంతాలను జల్లెడ పడుతున్నాయి.

Kolkata Sairang Express Derail: పట్టాలు తప్పిన కోల్‌కతా- సైరాంగ్ ఎక్స్‌ప్రెస్ రైలు.. తప్పిన పెను ప్రమాదం- అసలేం జరిగింది

Shankar Dukanam — Wed, 11 Nov 2026 08:42:53 +0530

కోల్‌కతా-సైరాంగ్ ఎక్స్‌ప్రెస్‌ రైలుకు చెందిన ఏడు బోగీలు, లోకోమోటివ్ పట్టాలు తప్పడంతో ప్రమాదం జరిగింది. మంగళవారం ఉదయం గువాహటి శివార్లలోని డిగారు సమీపంలో ఈ ఘటన చోటుచేసుకుంది. ప్రాథమిక సమాచారం ప్రకారం ఈ రైలు ప్రమాదంలో అదృష్టవశాత్తూ ఎవరికీ గాయాలు కాలేదని రైల్వే అధికారులు తెలిపారు.

Guwahati, Assam: Six coaches of a passenger train derailed at Digaru railway station in Assam's Kamrup (Metro) district Kapinjal Kishore Sharma, CPRO of Northeast Frontier Railway, told ANI over the phone that there is no report of any casualties so far. "Six coaches of the Kolkata-Sairang express have derailed at Digaru railway station at around 6:54 a.m. today. So far, no casualties have been reported. Our senior officials have rushed to the spot," Kapinjal Kishore Sharma said. More details are awaited
— ANI (@ANI) November 11, 2026

నవంబర్ 11న ఉదయం 6:54 గంటలకు రైలు విజోరం (Mizoram) నుంచి కోల్‌కతా (Kolkata) వైపు వెళ్తుండగా విషాదం చోటుచేసుకుంది. డిగారు రైల్వే స్టేషన్ వద్దకు రాగానే కోల్‌కతా సైరాంగ్ ఎక్స్‌ప్రెస్ రైలు 7 బోగీలు పట్టాలు తప్పాయి. ప్రయాణికుల వివరాలు, ప్రమాద తీవ్రత వివరాలు తెలియాల్సి ఉంది. సమాచారం అందుకున్న రెస్క్యూ టీమ్స్ ప్రమాదం జరిగిన ప్రాంతానికి బయలుదేరాయి. లోకో పైలట్ వేగాన్ని కంట్రోల్ చేయలేకపోవడం వల్లే ప్రమాదం జరిగి ఉంటుందని రైల్వే అధికారులు ప్రాథమికంగా భావిస్తున్నారు.

ఎవరికీ గాయాలు కాలేదు, అంతా సురక్షితం..

నార్త్ ఈస్ట్ ఫ్రంటియర్ రైల్వే సీపీఆర్‌ఓ ఈ ప్రమాదంపై స్పందించారు. నవంబర్ 11న ఉదయం దాదాపు 6:54 గంటలకు, అస్సాంలోని దిగారు రైల్వే స్టేషన్‌లో వేరొక రైలుకు దారి ఇచ్చేందుకు రైలు నంబరు 13125 కోల్‌కతా - సైరాంగ్ ఎక్స్‌ప్రెస్‌ను ఆపుతున్న క్రమంలో, లోకో పైలట్ వేగాన్ని నియంత్రించలేకపోయారు. దీనివల్ల లోకోమోటివ్‌తో పాటు 5 కోచ్‌లు పట్టాలు తప్పాయి. రైలులోని ప్రయాణికులందరూ సురక్షితంగా ఉన్నారు. ఎవరికీ ఎలాంటి గాయాలు కాలేదు. ప్రయాణికులను మరో రైలు ద్వారా వారి గమ్యస్థానాలకు తీసుకెళ్తున్నాం. సహాయక చర్యలు తక్షణమే ప్రారంభించామని’ తెలిపారు.

Sonia Gandhi Book: మోదీతో సిద్ధాంత పరంగానే పోరాటం.. ఇందిరా గాంధీ కోపం చూసి భయపడ్డా - ఆత్మకథలో సోనియా గాంధీ

Satyaprasad Bandaru — Tue, 10 Nov 2026 19:41:06 +0530

Sonia Gandhi Book: కాంగ్రెస్ అధినేత్రి సోనియా గాంధీ ఆత్మకథ ‘బిలాంగింగ్‌: ఎ జర్నీ ఆఫ్‌ లవ్‌’ పుస్తకంలో తన వ్యక్తిగత, రాజకీయ జీవితానికి సంబంధించిన అనేక ఆసక్తికర అంశాలను పంచుకున్నారు. అందులో ప్రధాని నరేంద్ర మోదీతో ఉన్న సంబంధాలు, దివంగత ప్రణబ్ ముఖర్జీ ఆలోచనలు, అత్తమ్మ ఇందిరా గాంధీతో తనకున్న అనుబంధం గురించి కీలక విషయాలు పేర్కొన్నారు.

మోదీతో వైరుద్ధ్యాలు సిద్ధాంతపరమైనవే

ప్రధాని నరేంద్ర మోదీతో తనకు ఎలాంటి వ్యక్తిగత విభేదాలు లేవని, కేవలం సైద్ధాంతిక వైరుద్ధ్యాలే ఉన్నాయని సోనియా గాంధీ స్పష్టం చేశారు. "మోదీ 12 ఏళ్లుగా ప్రధానిగా ఉన్నారు. అధికారిక సమావేశాల్లోనే మేము అప్పుడప్పుడు ఎదురుపడ్డాం. మోదీ ఈ దేశం కోసం ఆయన కోణంలో పోరాడుతుంటే, నేను నా కుటుంబ సంప్రదాయాలు, స్వేచ్ఛ, సమానత్వం వంటి సిద్ధాంతాల పరంగా పోరాడుతున్నా. ఇందులో ఎలాంటి వ్యక్తిగత ద్వేషం లేదు" అని ఆమె వివరించారు.

ప్రణబ్ ముఖర్జీ ప్రధాని కావాలనుకున్నా

యూపీఏ హయాంలో ప్రభుత్వాన్ని తాను వెనకుండి నడిపించాననే విమర్శలను సోనియా తోసిపుచ్చారు. 2010లో అప్పటి ఆర్థిక మంత్రి చిదంబరంతో విభేదాలు వచ్చిన సమయంలో దివంగత ప్రణబ్ ముఖర్జీ 'ప్రభుత్వ నాయకత్వాన్ని మార్చే సమయం వచ్చిందేమో' అని తనతో అన్నారని, బహుశా ప్రధాని కావాలన్న తన ఆశను ఆయన అలా బయటపెట్టి ఉంటారని సోనియా పేర్కొన్నారు.

Also Read: బిడ్డను నదిలో పారేయాలని చెబితే గుండె బద్దలైంది.. సోనియా గాంధీ ఆత్మకథలో విషాదం

ఇందిరా గాంధీ కోపం చూసి భయపడ్డా

మాజీ ప్రధాని, అత్తమ్మ ఇందిరా గాంధీతో ఉన్న అనుబంధాన్ని గుర్తుచేసుకుంటూ.. మొదట్లో ఇందిర కోపాన్ని చూసి తాను ఎంతగానో భయపడేదాన్ని అని చెప్పారు. ఓసారి డైనింగ్ టేబుల్‌పై ప్లేట్ విసిరేసినప్పుడు తాను కూర్చున్న చోటే వణికిపోగా, రాజీవ్ గాంధీ ధైర్యం చెప్పారని తెలిపారు. తర్వాత ఆమె గురించి పూర్తిగా తెలుసుకున్నాక భయం పోయిందని, ఇందిరా గాంధీకి చీరలంటే చాలా ఇష్టమని రాసుకొచ్చారు.

Also Read: ప్రధాని పదవి వదులుకోవడానికి అదే కారణం.. సోనియా గాంధీ ఆత్మకథలో కీలక అంశాలు!

Sonia Gandhi Tragedy Story: బిడ్డను నదిలో పారేయాలని చెబితే గుండె బద్దలైంది.. సోనియా గాంధీ ఆత్మకథలో విషాదం

Shankar Dukanam — Tue, 10 Nov 2026 18:51:47 +0530

న్యూఢిల్లీ: కాంగ్రెస్ అగ్రనేత సోనియా గాంధీ కుటుంబంలో జరిగిన ఓ విషాదాన్ని, ప్రపంచానికి అంతగా తెలియని ఓ విషయం తాజాగా బయటకు వచ్చింది. సోనియా గాంధీ ఆత్మకథ బిలాంగింగ్: ఎ జర్నీ ఆఫ్ లవ్ పుస్తకంలో పలు ఆసక్తికర అంశాలతో పాటు విషాదాలను సైతం ఆమె ప్రస్తావించారు. రాజీవ్ గాంధీ, సోనియా దంపతులకు పిల్లలు అంటే రాహుల్ గాంధీ, ప్రియాంక గాంధీ మాత్రమే అంతా భావిస్తారు. కానీ రాహుల్ గాంధీ పుట్టడానికి ఏడాదిన్నర కిందట.. అంటే 1969 జనవరిలోనే వీరికి తొలి సంతానంగా ఒక బాబు జన్మించాడు. అయితే ఆ పసివాడు కొన్ని గంటల్లోనే చనిపోవడంతో ఇందిరా గాంధీ కుటుంబంలో విషాదం చోటుచేసుకుంది. ఈ విషాదకర విషయాన్ని తన ఆత్మకథ ద్వారా ప్రపంచానికి తెలిపారు సోనియా గాంధీ.

భారత రాజకీయాల్లో దశాబ్దాల తరబడి అత్యంత కీలక కుటుంబంగా ఉన్న గాంధీ కుటుంబంలో జరిగిన ఈ విషాదం ఇప్పటితరానికి తెలిసే అవకాశమే లేదు. తన ఆత్మకథలో రాజీవ్ గాంధీతో ప్రేమ, అత్త ఇందిరా గాంధీతో తొలినాళ్లలో అనుభవం, తోటి కోడలు మేనకా గాంధీతో తనకు తలెత్తిన పరిస్థితులతో పాటు తన జీవితంలో చోటుచేసుకున్న వ్యక్తిగత నష్టం గురించి వెల్లడించారు.

1969 జనవరి 18న సోనియా గాంధీ నెలలు నిండకుండానే ఒక మగబిడ్డకు జన్మనిచ్చారు. ఇంక్యుబేటర్‌లో ఉన్న బాబును చూసి రాజీవ్ గాంధీ ఎంతో సంబరపడ్డారు. దట్టమైన జుట్టు, పొడవైన వేళ్లతో చూడముచ్చటగా ఉన్న ఆ పసికందును చూసి కుటుంబమంతా ప్రేమలో పడిపోయిందని సోనియా గుర్తు చేసుకున్నారు. కానీ ఆ సంతోషం తమకు నిలవలేదని, మరుసటి రోజు ఉదయమే బాబు ప్రాణాలు కోల్పోయాడని తన ఆత్మకథలో సోనియా గాంధీ తెలిపారు. సాధారణంగా భావోద్వేగాలను నియంత్రించుకునే రాజీవ్ గాంధీ, ఈ వార్త వినగానే తట్టుకోలేక తనను పట్టుకుని వెక్కి వెక్కి ఏడ్చారని గుర్తుచేసుకున్నారు. అప్పటి ప్రధాని, అత్త ఇందిరా గాంధీ కూడా పర్యటన రద్దు చేసుకుని వచ్చి కన్నీళ్లు పెట్టుకున్నారని తెలిపారు.

పసివాడి మృతదేహాన్ని సాంప్రదాయం ప్రకారం నదిలో కలపాలని అంతా చెప్పగా, అందుకు సోనియా గాంధీ నిరాకరించారు. గతంలో ఒక మృతదేహం నీటిలో కనిపించిన దృశ్యం గుర్తుకొచ్చి, నా బిడ్డను నదిలో పడేయనివ్వను అని సోనియా గాంధీ తెగేసి చెప్పారు. చివరికి ఢిల్లీలోని మెహ్రౌలీలో ఉన్న ఫిరోజ్ గాంధీ ఫామ్‌హౌస్‌లోని ఒక గులాబీ బొగన్‌విల్లా చెట్టు కింద సోదరుడు సంజయ్ గాంధీతో కలిసి రాజీవ్ గాంధీ తన తొలి సంతానం అయిన ఆ పసికందు మృతదేహాన్ని పూడ్చిపెట్టారు. ఆ తర్వాత చాలాకాలం పాటు అక్కడికి వెళ్లి ఒక పుష్పాంజలి ఘటించేవాళ్లమని ఘటించేవారమని సోనియా గుర్తుచేసుకున్నారు.

ఆ సమయంలో మేం బాధలో ఉంటే బిడ్డ మరణంపై ఓ ప్రతిక అసత్యాలు ప్రచురిస్తూ, విమర్శలు చేయడం తనను ఎంతగానో బాధించిందని సోనియా గాంధీ తెలిపారు. తొలి బిడ్డ మరణం నుంచి బయటపడటానికి చాలా కాలం పట్టిందని, అదే ఏడాది చివరిలో మళ్లీ గర్భం దాల్చిన తాను, మరుసటి ఏడాది రాహుల్ గాంధీకి జన్మనిచ్చినట్లు తన ఆత్మకథలో రాసుకొచ్చారు.

Sonia Gandhi Book: ప్రధాని పదవి వదులుకోవడానికి అదే కారణం.. సోనియా గాంధీ ఆత్మకథలో కీలక అంశాలు!

Satyaprasad Bandaru — Tue, 10 Nov 2026 13:10:08 +0530

Sonia Gandhi Book: కాంగ్రెస్ అధినేత్రి సోనియా గాంధీ ఆత్మకథ ‘బిలాంగింగ్‌: ఎ జర్నీ ఆఫ్‌ లవ్‌ (Belonging: A Journey of Love)’ మంగళవారం విడుదలైంది. కుటుంబంలో చోటుచేసుకున్న సంఘటనల నుంచి రాజకీయాల్లో ఆమె పోషించిన పాత్రల వరకు అనేక ఆసక్తికర అంశాలను ఈ పుస్తకంలో సోనియా ప్రస్తావించారు. ముఖ్యంగా 2004 సార్వత్రిక ఎన్నికల తర్వాత ప్రధాని పదవిని తృణప్రాయంగా వదులుకోవడానికి గల అసలు కారణాలను ఆమె తన మాటల్లోనే స్పష్టం చేశారు.

2004 ఎన్నికలకు చాలా నెలల ముందే ప్రధాని పదవి చేపట్టకూడదని నిర్ణయించుకున్నట్లు సోనియా గాంధీ వెల్లడించారు. నానమ్మ, నాన్నల హత్యలను చూసిన రాహుల్, ప్రియాంకలు.. ఆ పదవి తమ కుటుంబానికి ప్రమాదకరమని భావించి తాను ప్రధాని కావడాన్ని కోరలేదని తెలిపారు. అయితే ఎన్నికల సమయంలో పార్టీలో నాయకత్వ సమస్యలు రాకూడదనే ఉద్దేశంతో ఈ విషయాన్ని ముందుగా బయటపెట్టలేదన్నారు.

ప్రియాంక గాంధీ కంటతడి

యూపీఏ కూటమి గెలిచి ప్రభుత్వ ఏర్పాటుకు సిద్ధమవుతున్న సమయంలో తనలో అంతర్మథనం జరిగిందని ఆమె గుర్తుచేసుకున్నారు. కూటమి నేతలు తనను ప్రధానిగా బలవంతం చేసినప్పుడు.. గది బయట ఉన్న ప్రియాంక తన నిర్ణయం విని కంటతడి పెట్టుకున్నట్లు, ఆ రాత్రి రాజీవ్‌ గాంధీ తన పక్కన ఉంటే బాగుండేదని తలచుకున్నట్లు భావోద్వేగంతో పంచుకున్నారు. విదేశీ మూలాలపై ప్రత్యర్థులు వివాదం సృష్టిస్తారనే భయంతో పాటు, ప్రజల నమ్మకాన్ని వమ్ము చేయలేనన్న భావన మధ్య తీవ్రంగా నలిగిపోయినట్లు తెలిపారు. చివరకు మనసు చెప్పిందే వినాలని దృఢ నిశ్చయానికి వచ్చానని పేర్కొన్నారు.

Also Read: ఓట్ చోరీ సమరానికి తెరపడినట్లేనా? ఢిల్లీకే పరిమితమైన కాంగ్రెస్ నిరసన.. కొత్త అజెండా వెతుక్కోవాల్సిందేనా?

మన్మోహన్ సింగ్ ఎంపిక వెనుక కారణం

కాంగ్రెస్ పార్లమెంటరీ పార్టీ సమావేశంలో ఎంపీలు తన నిర్ణయాన్ని తీవ్రంగా వ్యతిరేకించినప్పటికీ, ధైర్యం కూడగట్టుకుని ప్రధాని అభ్యర్థిగా మన్మోహన్ సింగ్ పేరును ప్రతిపాదించినట్లు సోనియా తెలిపారు. ప్రభుత్వ పదవుల్లో సుదీర్ఘ అనుభవం ఉండటం, పార్టీలో ఏ వర్గానికి చెందకుండా తటస్థంగా ఉండటం, కమ్యూనిస్టుల మద్దతు లభించడం వంటి కారణాల వల్లే మన్మోహన్ చేతుల్లో దేశం భద్రంగా ఉంటుందని నమ్మి ఆయనను ఎంపిక చేసినట్లు సోనియా గాంధీ తన ఆత్మకథలో వివరించారు.

Also Read: వీఐపీ దర్శనాలపై భక్తులు ఆగ్రహం.. సీఎం డీకే శివకుమార్‌పై చెప్పుల వర్షం !

Congress Vote Chori Campaign: ఓట్ చోరీ సమరానికి తెరపడినట్లేనా? ఢిల్లీకే పరిమితమైన కాంగ్రెస్ నిరసన.. కొత్త అజెండా వెతుక్కోవాల్సిందేనా?

Raja Sekhar Allu — Tue, 10 Nov 2026 09:48:30 +0530

Rahul Gandhi EVM Electoral Rolls Campaign Fail: ఎన్నికల సంఘం చేపట్టిన ఓటర్ల జాబితాల ప్రత్యేక సమగ్ర సవరణ , ఈవీఎం అక్రమాలు , ఓట్ చోరీ ఆరోపణలపై కాంగ్రెస్ నేతృత్వంలోని ఇండియా కూటమి ఢిల్లీలోని రామ్‌లీలా మైదాన్ వేదికగా నిర్వహించిన చలో ఢిల్లీ మెగా ర్యాలీ జాతీయ స్థాయిలో రాజకీయ వేడిని రాజేసినప్పటికీ, ఆ ఉద్యమం ఆశించిన స్థాయి ప్రజాదరణను పొందడంలో విఫలమైంది. ఎన్నికల ప్రక్రియను, ప్రజాస్వామ్య వ్యవస్థలను తీవ్రంగా ప్రశ్నిస్తూ కాంగ్రెస్ అగ్రనేతలు రాహుల్ గాంధీ, ప్రియాంక గాంధీలు ఎంతగా గళమెత్తినప్పటికీ.. ఈ అంశం ఒక్కసారిగా చల్లారిపోవడం, క్షేత్రస్థాయికి విస్తరించకపోవడం ఇప్పుడు విపక్షాల వ్యూహాత్మక లోపాలను ఎత్తిచూపుతోంది.

ప్రజా ఉద్యమంలా మార్చలేకపోయిన కాంగ్రెస్

హైకమాండ్ స్థాయిలో ఢిల్లీ కేంద్రంగా సభలు, ప్రెస్ మీట్లు నిర్వహించి ఒక అంశాన్ని డిబేట్‌లోకి తీసుకురావడం సులభమే కానీ, దానిని రాష్ట్రాలు, జిల్లాలు, గ్రామీణ ప్రాంతాలకు చేర్చి ప్రజాపోరాటంగా మలచడంలో కాంగ్రెస్ పార్టీ శ్రేణులు విఫలమయ్యాయి. ఢిల్లీలో అధిష్టానం పిలుపునిచ్చినప్పుడు మాత్రమే ధర్నాలు చేయడం, అది పూర్తవగానే నిశ్శబ్దం వహించడం వల్ల ఇది కాంగ్రెస్ పార్టీ కార్యక్రమం గా మిగిలిపోయిందే తప్ప.. సామాన్య ఓటరు తన హక్కు కోసం స్వచ్ఛందంగా పోరాడే ప్రజా ఉద్యమం గా రూపాంతరం చెందలేకపోయింది.

ప్రజలను కదిలించలేకపోయారా?

ఈ ఉద్యమం నిలవకపోవడానికి ప్రధాన కారణం— ఈవీఎంల అక్రమాలు లేదా ఫారమ్-6/7 గందరగోళం వంటి అంశాలు సాంకేతికంగా విపక్షాలకు అనుకూలమైన ఆరోపణలుగా అనిపించినా, సామాన్యుడి దైనందిన బతుకుదెరువు సమస్యలతో నేరుగా ముడిపడకపోవడమే. నిరుద్యోగం, ద్రవ్యోల్బణం, ధరల పెరుగుదల, స్థానిక సమస్యలతో సతమతమయ్యే పౌరుడు.. రాజ్యాంగబద్ధ సంస్థల నిర్వహణ లోపాలపై కాంగ్రెస్ ఇచ్చే ఉపన్యాసాలతో పూర్తిగా కనెక్ట్ కాలేకపోయాడు. ప్రజలను తమ వైపు తిప్పుకోవడంలో, వారిని భాగస్వాములను చేయడంలో నాయకత్వం కనబరిచిన వైఫల్యం ఈ టాపిక్ ఆయుష్షును తగ్గించేసింది.

రామ్ లీలా సభ తర్వాతనెక్ట్స్ ప్లాన్ ఏమిటి?

అంతేకాకుండా, కాంగ్రెస్ పార్టీ నడిపించే ప్రచార సరళిలో నిలకడలేకపోవడం మరొక పెద్ద ప్రతిబంధకం. ఒక వివాదాన్ని పట్టుకుని దానిని తార్కిక ముగింపు వరకు నెట్టే ధోరణి కంటే, ఢిల్లీ వేదికగా ఒక పెద్ద ప్రదర్శన చేయడం, ఆపై ఆ అంశాన్ని వదిలేసి మరో కొత్త అంశం వైపు వెళ్లిపోవడం కాంగ్రెస్‌కు పరిపాటిగా మారింది. రామ్‌లీలా మైదాన్ సభ ముగిసిన కొద్ది రోజులకే క్షేత్రస్థాయిలో నిరసనల ఉనికి లేకపోవడంతో, అధికార ఎన్‌డీయే కూటమి ఈ ఆరోపణలను సులువుగా తిరస్కరించి ఓటమి భయంతో ఆడుతున్న నాటకం అని కొట్టిపారేయడానికి అవకాశం లభించింది.

ఓటు చోరీ అంశానికి స్కోప్ ఉందా?

ఇప్పుడున్న రాజకీయ పరిస్థితుల్లో ఓట్ చోరీ అనే అంశం దాదాపుగా కాలగర్భంలో కలసిపోయే స్థితికి చేరుకుంది. దీనిని మళ్లీ లేవనెత్తినా ప్రజల నుంచి ఆశించిన స్పందన రావడం కష్టమే. ఎన్నికలు సమీపిస్తున్న తరుణంలో కాంగ్రెస్ పార్టీ ఇప్పటికైనా ఈ పాత టాపిక్‌ను పక్కనబెట్టి, ప్రజల నిజమైన ఆకాంక్షలను ప్రతిబింబించే 'కొత్త అజెండా'ను వెతుక్కోవాల్సిన అనివార్యత ఏర్పడింది. ప్రజల ఆర్థిక మూలాలు, ఉపాధి అవకాశాలు, ప్రాంతీయ అసమానతల చుట్టూ తిరిగే పక్కా ప్రజా సమరానికే ప్లాన్ చేయాల్సి ఉంటుంది. ఢిల్లీ ఏసీ గదులు, ప్రెస్ మీట్ల నుంచి బయటకు వచ్చి, రాష్ట్రాల సరిహద్దులు దాటి ప్రజామోదం పొందే రీతిలో ఉద్యమాలను నిర్మించకపోతే కాంగ్రెస్ ఎంతటి తీవ్రమైన ఆరోపణలు చేసినా అవి గాలిలో కలిసిపోక తప్పవు. ఓట్ చోరీ ప్రచారం ఇచ్చిన అనుభవంతోనైనా, రాబోయే రోజుల్లో ప్రజా సమస్యలపై కేడర్‌ను క్షేత్రస్థాయిలో నిలబెట్టే సరికొత్త రాజకీయ నెరేటివ్‌ను అందుకుంటేనే కాంగ్రెస్‌కు ప్రజల్లో విశ్వసనీయత లభిస్తుందన్న అభిప్రాయం వినిపిస్తోంది.