Navjot Kaur Sidhu hits out at Rahul Gandhi: కాంగ్రెస్ పార్టీలో అంతర్గత కుమ్ములాటలు మరోసారి రచ్చకెక్కాయి. సీనియర్ నేత మణిశంకర్ అయ్యర్ వివాదాస్పద వ్యాఖ్యల దుమారం రేపిన కొద్దిరోజులకే, మాజీ క్రికెటర్ నవజ్యోత్ సింగ్ సిద్ధూ భార్య, మాజీ ఎమ్మెల్యే నవజ్యోత్ కౌర్ సిద్ధూ రాహుల్ గాంధీని లక్ష్యంగా చేసుకుని చేసిన విమర్శలు రాజకీయ వర్గాల్లో ప్రకంపనలు సృష్టిస్తున్నాయి. నువ్వు ఆ కుర్చీకి ఏమాత్రం అర్హుడివి కావు అంటూ ఆమె సోషల్ మీడియా వేదికగా చేసిన ఘాటు వ్యాఖ్యలు పార్టీ అధిష్ఠానానికి మింగుడుపడటం లేదు. నవజ్యోత్ కౌర్ ఇంతలా విరుచుకుపడటానికి ప్రధాన కారణం తన భర్త నవజ్యోత్ సింగ్ సిద్ధూకు పార్టీలో సరైన ప్రాధాన్యత దక్కకపోవడమేనని విశ్లేషకులు భావిస్తున్నారు. పంజాబ్ అసెంబ్లీ ఎన్నికల సమయం నుండి సిద్ధూను పక్కన పెట్టడం, జైలు శిక్ష అనుభవించి వచ్చిన తర్వాత కూడా ఆయనకు కీలక బాధ్యతలు అప్పగించకపోవడంపై కౌర్ తీవ్ర అసంతృప్తితో ఉన్నారు. రాహుల్ గాంధీ చుట్టూ ఉండే కోటరీ పార్టీని తప్పుదోవ పట్టిస్తోందని, నిజాయితీ గల నేతలను తొక్కేస్తున్నారని ఆమె ఆరోపించారు.
ఇటీవల మణిశంకర్ అయ్యర్ తన పుస్తక ఆవిష్కరణ సందర్భంగా నెహ్రూ-గాంధీ కుటుంబంపై చేసిన పరోక్ష వ్యాఖ్యలు పార్టీని ఇరకాటంలో పడేశాయి. ఇప్పుడు కౌర్ ఏకంగా రాహుల్ సామర్థ్యాన్ని ప్రశ్నించడం కాంగ్రెస్లో పెను తుఫానుకు దారితీసింది. నాయకత్వ లక్షణాలు లేని వ్యక్తి చేతిలో పార్టీ పగ్గాలు ఉంటే కార్యకర్తల పరిస్థితి ఏంటి? అన్నట్టుగా ఆమె వేసిన ప్రశ్నలు విపక్షాలకు ఆయుధంగా మారాయి. సీనియర్ల గొంతు నొక్కడం వల్లే పార్టీ ఈ స్థితికి వచ్చిందని ఆమె ఆవేదన వ్యక్తం చేశారు.
ఈ పరిణామాలపై ఏఐసీసీ తీవ్ర ఆగ్రహంతో ఉంది. క్రమశిక్షణారాహిత్యాన్ని సహించేది లేదని పార్టీ వర్గాలు హెచ్చరిస్తున్నాయి. అయితే, సిద్ధూ వర్గం మాత్రం కౌర్ వ్యాఖ్యలు వ్యక్తిగతమని సమర్థించుకునే ప్రయత్నం చేస్తోంది. సొంత పార్టీ నేతలే ఇలా బహిరంగంగా విమర్శలు చేయడం రాహుల్ గాంధీ నాయకత్వ ఇమేజ్పై ప్రతికూల ప్రభావం చూపే అవకాశం ఉంది. ఇది సిద్ధూ దంపతులు కాంగ్రెస్ను వీడటానికి సంకేతమా? లేక ఒత్తిడి పెంచే వ్యూహమా ? అనేది వేచి చూడాల్సి ఉంది.