Sampradayini Suppini Suddapoosani Review - 'సాంప్రదాయిని సుప్పిని సుద్దపూసని' రివ్యూ: శివాజీ, లయ లేటెస్ట్ సినిమా - క్రైమ్ కామెడీ ఎలా ఉందంటే?

Sampradayini Suppini Suddapoosani Review Telugu: శివాజీ, లయ జంటగా నటించిన క్రైమ్ కామెడీ 'సాంప్రదాయిని సుప్పిని సుద్దపూసని'. ఈ సినిమా ఎలా ఉంది? అనేది రివ్యూలో తెలుసుకోండి. 

Sivaji Laya latest movie Sampradayini Suppini Suddapoosani review: శివాజీ, లయది హిట్ పెయిర్. 'మిస్సమ్మ, అదిరందయ్యా చంద్రం, టాటా బిర్లా మధ్యలో లైలా' సినిమాల్లో ప్రేక్షకులను ఆకట్టుకున్నారు. 'కోర్ట్', 'దండోరా'తో రీ ఎంట్రీలో నటుడిగా ప్రశంసలతో పాటు విజయాలను అందుకున్నారు శివాజీ. ఇప్పుడు ఆయనకు జంటగా లయ నటించిన సినిమా 'సాంప్రదాయిని సుప్పిని సుద్దపూసని'. మొదట ఓటీటీలో విడుదల చేయాలనుకున్నారు. కానీ, తర్వాత థియేటర్లకు తీసుకు వచ్చారు. మార్చి 6న ప్రేక్షకుల ముందుకు వచ్చిన ఈ సినిమా ఎలా ఉంది?

కథ (Sampradayini Suppini Suddapoosani Story): శ్రీరామ్ (శివాజీ) పంచాయతీ రాజ్ సెక్రటరీ. చాలా నిజాయితీపరుడు. చిత్తూరు జిల్లాలోని సొంతూరులో పోస్టింగ్ కావడంతో ఎవరికీ భయపడడు. ఓసారి ఎస్సై విక్రమ్ (ప్రిన్స్)తో రోడ్డు మీద గొడవ అవుతుంది. 

శ్రీరామ్‌తో గొడవ తర్వాత ఆయన ఇంటికి విక్రమ్ ఎందుకు వెళ్ళాడు? ఆ తర్వాత నుంచి కనిపించకుండా పోవడానికి కారణం ఏమిటి? శ్రీరామ్, ఎమ్మెల్యే (శరత్ లోహితస్య) మధ్య గొడవ ఏమిటి? శ్రీరామ్ కోసం ఎమ్మెల్యే మనుషులు ఎందుకు వెతుకుతున్నారు? ఒక వైపు ఎమ్మెల్యే మనుషులు, మరోవైపు పోలీసులు... ఇద్దరి నుంచి శ్రీరామ్ ఎలా తప్పించుకున్నాడు? శ్రీరామ్ భార్య ఉత్తర (లయ), కుమారుడు మిట్టు (మాస్టర్ రోహన్) ఏం చేశారు? చివరకు ఏమైంది? అనేది సినిమా.

విశ్లేషణ (Sampradayini Suppini Suddapoosani Review Telugu): క్రైమ్ కామెడీలు తెలుగు ప్రేక్షకులకు కొత్త కాదు. అయితే... హిట్ పెయిర్ శివాజీ - లయ, సినిమాను శివాజీ స్వయంగా నిర్మించడం వల్ల ప్రేక్షకుల్లో 'సాంప్రదాయిని సుప్పిని సుద్దపూసని'పై అంచనాలు ఏర్పడ్డాయి. రీ ఎంట్రీలో కంటెంట్ బేస్డ్ సినిమాలు చేస్తూ విజయాలు అందుకుంటున్న శివాజీకి ఈ సినిమాలో డిఫరెంట్ రోల్ లభించింది. కానీ, కథలో కొత్తదనం లేదు.

'సాంప్రదాయిని సుప్పిని సుద్దపూసని' దర్శకుడు సుధీర్ శ్రీరామ్ కొత్త కథతో కాకుండా హిట్ ఫార్ములాను నమ్ముకున్నారు. హీరో క్యారెక్టర్, క్రైమ్ విషయంలో 'దృశ్యం' ఛాయలు కనిపిస్తాయి. ఆ సినిమా సీరియస్‌గా సాగితే, ఈ సినిమాకు కామెడీ యాడ్ చేశారు. కుటుంబం కోసం మనసాక్షికి వ్యతిరేకంగా ముందడుగు వేసే హీరో రెండిటిలో కనిపిస్తాడు. సినిమా కాన్సెప్ట్ విషయానికి వస్తే ప్రియమణి 'భామా కలాపం', 'మత్తు వదలరా' సినిమాలను సైతం గుర్తు చేస్తుంది. అయితే... ఈ సినిమాలో కామెడీతో పాటు థ్రిల్, ట్విస్ట్‌లు ఏదీ చూసినా ఆసక్తిగా ముందుకు సాగలేదు.

భార్యాభర్తలుగా శివాజీ, లయ మధ్య కెమిస్ట్రీ బావుంది. కానీ, కామెడీయే లేదు. ఆ జంటకు సరిపడా సన్నివేశాలు రాయడంలో సుధీర్ శ్రీరామ్ ఫెయిలయ్యాడు. అలీ, కాదంబరి కిరణ్, 'జబర్దస్త్' / 'బిగ్ బాస్' ఇమ్మాన్యుయేల్ ఉన్నప్పటికీ... ఆ పాత్రలకూ సరైన డైలాగులు, పంచ్ లైన్స్ పడలేదు. అందువల్ల కొన్ని నవ్వులతో సరిపెట్టుకోవాలి. శివాజీ, లయతో పాటు రోహన్ సైతం నవ్వించడానికి... థ్రిల్ ఇవ్వడానికి తమ వంతు ప్రయత్నం చేశారు. కానీ... సన్నివేశాల్లో బలం లేదు. సంభాషణల్లో వినోదం పండలేదు. ధనరాజ్ క్యారెక్టర్ సర్‌ప్రైజింగ్ ప్యాకేజ్ అనుకున్నట్టు ఉన్నారు. చివరిలో ఆయన ట్విస్ట్ కూడా పేలలేదు.

క్రైమ్ విషయంలోనూ సీరియస్‌నెస్ కనిపించలేదు. ఎండింగ్ ట్విస్ట్ మరీ సిల్లీగా ఉంది. అందువల్ల, ఏ దశలోనూ సినిమా ఆసక్తిగా కలిగించదు క్లుప్తంగా చెప్పాల్సిన కథను సాగదీయడం వల్ల బోర్ కొడుతుంది. ప్రిడిక్టబుల్ స్క్రీన్ ప్లే, ప్రిన్స్ ట్రాక్ సినిమాకు మైనస్. ప్రిన్స్ సీన్స్ బాగా రాసుకుని ఉంటే క్రైమ్ తర్వాత టెన్షన్ బిల్డ్ అయ్యేది. కథకు కీలకమైన శివాజీ ఇంట్లో సీన్ సిల్లీగా ఉండటంతో కామెడీ & క్రైమ్ ఎఫెక్ట్ చూపించలేదు. మధ్యలో పాటలు ఇరికించకుండా మంచి పని చేశారు. బండ్ల గణేష్ 'పాయ...' క్లైమాక్స్ తర్వాత వస్తుంది. ఎండ్ క్రెడిట్స్ అన్నమాట. సినిమాటోగ్రఫీ ఓకే.

సాంప్రదాయిని సుప్పిని సుద్దపూసని... రొటీన్ క్రైమ్ కామెడీ సినిమా. కథ ఎంగేజ్ చేయదు. కామెడీ పూర్తిగా నవ్వించదు. శివాజీ, లయ కెమిస్ట్రీతో పాటు కొన్ని జోక్స్ బావున్నాయి. అయితే... సినిమాను గట్టెక్కించడానికి ఆ బలం సరిపోలేదు. స్టార్ట్ టు ఎండ్ ఎంజాయ్ చేయడం కష్టమే.