Pratichaya Review Telugu - ప్రతిఛాయ రివ్యూ - Jiohotstar ఓటీటీలో నివిన్ పాలి సినిమా - రాజకీయ చిత్రమ్ ఎలా ఉందంటే?

OTT Review - Pratichaya On Jiohotstar: మలయాళ హీరో నివిన్ పాలి నటించిన 'ప్రతి ఛాయ' జియో హాట్‌స్టార్ ఓటీటీలో స్ట్రీమింగ్ అవుతోంది. తెలుగులోనూ ఈ సినిమా అందుబాటులో ఉంది.

Pratichaya Movie Review Rating In Telugu: మలయాళ కథానాయకుడు నివిన్ పాలి నటించిన సినిమా 'ప్రతిఛాయ'. రాజకీయ నేపథ్యంలో తెరకెక్కిన చిత్రమిది. మార్చి 26న మలయాళంలో థియేటర్లలో విడుదలైంది. ఏప్రిల్ 24వ తేదీ నుంచి మలయాళంతో పాటు తెలుగు, తమిళ, కన్నడ, హిందీ భాషల్లోనూ జియో హాట్‌స్టార్ ఓటీటీలో వీక్షకులకు అందుబాటులో ఉంది. ఈ సినిమా ఎలా ఉందంటే?

కథ (Pratichaya Story): జాన్ వర్గీస్ (నివిన్ పాలీ)... కేరళ ముఖ్యమంత్రి రెండో కుమారుడు. అతనికి ఓ అన్నయ్య. అతను ఎంపీ. అయితే... జాన్ వర్గీస్ మాత్రం రాజకీయాల్లోకి రాకుండా స్టార్టప్ ప్రారంభించి విదేశాలు వెళ్లాలని రెడీ అవుతాడు. సరిగ్గా ఆ సమయంలో కేరళ ముఖ్యమంత్రిపై లైంగిక వేధింపుల ఆరోపణలు వస్తాయి. ఆ అవమానం తట్టుకోలేక గుండెపోటుతో మరణిస్తారు. అనూహ్య పరిణామాల మధ్య జాన్ వర్గీస్ ముఖ్యమంత్రి అవుతారు.

ముఖ్యమంత్రి అయ్యాక జాన్ వర్గీస్ ఏం చేశారు? అతని తండ్రిపై వచ్చిన లైంగిక వేధింపుల ఆరోపణలు నిజామా? అబద్ధమా? రాజకీయాల్లో వర్గీస్ కుటుంబానికి శత్రువులు ఎవరు? తెరవెనుక ఎవరెవరు ఎటువంటి కుట్రలు చేశారు? చివరకు ఏమైంది? అనేది 'ప్రతిఛాయ' సినిమా.

విశ్లేషణ (Pratichaya Review Telugu): నివిన్ పాలీకి తెలుగులోనూ ఫ్యాన్స్ ఉన్నారు. ఆయన 'ప్రేమమ్'ను తెలుగులో అదే పేరుతో నాగ చైతన్య రీమేక్ చేశారు. అయితే మలయాళ వెర్షన్ చూసిన జనాలు ఉన్నారు. మలయాళ సినిమా 'సర్వం మాయ' థియేటర్లలో విడుదలైనప్పుడు, ఓటీటీలో తెలుగు వెర్షన్ అందుబాటులోకి వచ్చిన తర్వాత బ్లాక్ బస్టర్ రెస్పాన్స్ వచ్చింది. నివిన్ పౌలీ నటించడంతో ఓటీటీలో 'ప్రతి ఛాయ' మీద వీక్షకుల చూపు పడింది. ఈ సినిమా ఎలా ఉంది? అనేది చూస్తే...

'ప్రతిఛాయ' అంటే ప్రతిబింబం అని అర్థం. ప్రతిఛాయ అని కాకుండా ప్రతిచర్య అని టైటిల్ పెడితే బావుండేది ఏమో!? ప్రతి చర్యకు ప్రతిచర్య ఉంటుందని ఈ సినిమా చివరకు అర్థం అవుతుంది. కథ గురించి క్లుప్తంగా చెప్పాలంటే... ఇదొక రివేంజ్ డ్రామా. రాజకీయం, వైట్ కాలర్ కార్పొరేట్ కరప్షన్ నేపథ్యంలో తీసిన సినిమా. ఫస్టాఫ్ అంతా రానా దగ్గుబాటి 'లీడర్'ను గుర్తు చేస్తుంది. కథ, పాత్రలు, సన్నివేశాలు వేరు కానీ... పాయింట్ అయితే 'లీడర్'కు దగ్గరగా ఉంటుంది. తండ్రి ముఖ్యమంత్రి అయినప్పటికీ... రాజకీయాలపై ఆసక్తి లేని కొడుకు విదేశాలు వెళ్లేందుకు రెడీ అవుతాడు. తండ్రి అనూహ్య మరణంతో సీఎం కుర్చీలో కూర్చుని తండ్రికి జరిగిన అన్యాయానికి ప్రతీకారం తీర్చుకుంటాడు.

ఓటీటీలో 'ప్రతి ఛాయ' చూసే తెలుగు వీక్షకులు ఎదుర్కొనే మొదటి సమస్య... డబ్ క్వాలిటీ. డబ్బింగ్ బాలేదు. రెండో సమస్య... 'లీడర్' ఛాయలు కనిపించడం. మూడో సమస్య... చాలా నిదానంగా సినిమా సాగడం! సినిమా మొదలైన అరగంట వరకు కథ అసలు ముందుకు వెళ్ళదు. ఆ తర్వాత కూడా చాలా నిదానంగా ముందుకు సాగుతుంది. కథకు కీలకమైన న్యూస్ ఛానల్‌లో సీఎం లైవ్ ఇంటర్వ్యూ కూడా 'ఒకే ఒక్కడు' ఇంటర్వ్యూను గుర్తు చేస్తుంది. మీడియాపై కొన్ని సీన్లు మోహన్ లాల్ 'లూసిఫర్'ను గుర్తు చేస్తాయి. సినిమాలో రెండు మూడు సీన్లు మాత్రమే బావున్నాయి. పాటలు తెలుగు ప్రేక్షకులకు అర్థం కావడం కష్టం. డబ్బింగ్ లిరిక్స్, క్వాలిటీ ఆ స్థాయిలో ఉన్నాయి. నివిన్ పౌలీ మినహా తెలుగు ప్రేక్షకులకు తెలిసిన ముఖాలు తక్కువ. అందువల్ల, సినిమాను చివరి వరకు చూడాలంటే ఓపిక చాలా అవసరం.

'ప్రతిఛాయ'... ప్రేక్షకులు అందరికీ నచ్చే సినిమా కాదు. ఓటీటీలో అయినా సరే మొదటి నుంచి చివరి వరకు చూడాలంటే ఓపిక చాలా అవసరం. కేరళలో ఈ సినిమా థియేటర్లలో విడుదలైనప్పుడు గొప్ప స్పందన ఏమీ రాలేదు. ఓటీటీలోనూ వీక్షకులను ఆకట్టుకోవడం కష్టం. సారీ నివిన్ పౌలీ!