Parasakthi Review Telugu - పరాశక్తి రివ్యూ: జీ5 ఓటీటీలో శివకార్తికేయన్ సినిమా... తెలుగు ప్రేక్షకులకు ఈ తమిళ సినిమా నచ్చుతుందా?

OTT Review - Parasakthi Streaming On Zee5: శివకార్తికేయన్, శ్రీలీల జంటగా నటించిన తమిళ్ సినిమా 'పరాశక్తి'. జీ5 ఓటీటీలో తెలుగులోనూ స్ట్రీమింగ్ అవుతోంది. ఈ సినిమా ఎలా ఉందంటే?

Sivakarthikeyan Parasakthi Review In Telugu: శివకార్తికేయన్ కథానాయకుడిగా సుధా కొంగర దర్శకత్వం వహించిన సినిమా 'పరాశక్తి'. సంక్రాంతికి తమిళంలో విడుదలైంది. తెలుగు రాష్ట్రాల్లోనూ విడుదల చేయాలనుకున్నా... చిరంజీవి 'మన శంకర వరప్రసాద్ గారు', ప్రభాస్ 'ది రాజా సాబ్', రవితేజ 'భర్త మహాశయులకు విజ్ఞప్తి', శర్వానంద్ 'నారి నారి నడుమ మురారి', నవీన్ పోలిశెట్టి 'అనగనగా ఒక రాజు' ఉండటం కుదరలేదు. తెలుగునాట థియేటర్లలో విడుదల చేయకుండా డైరెక్టుగా ఓటీటీలో విడుదల చేశారు. జీ5లో తెలుగులోనూ స్ట్రీమింగ్ అవుతోందీ సినిమా. హిందీని అధికార భాష చేయాలనుకున్న నిర్ణయానికి దక్షిణాదిలో, మరీ ముఖ్యంగా తమిళనాడులో జరిగిన ఉద్యోగం నేపథ్యంలో తెరకెక్కిన ఈ సినిమా ఎలా ఉంది?

కథ: జవహర్ లాల్ నెహ్రూ ప్రధానిగా ఉన్న రోజులు... రైల్వే ఉద్యోగ ప్రకటనను ప్రాంతీయ భాషా పత్రికల్లో ఇవ్వకుండా హిందీ ప్రతికల్లో ఇవ్వడంతో దక్షిణాదిలో అగహ్రావేశాలు వ్యక్తం అవుతాయి. చెల్లయన్ (శివకార్తికేయన్) నేతృత్వంలోని పురాణాపూర్ గ్యాంగ్ ఓ రైలుకు నిప్పు అంటించి తగలబెడుతుంది. కట్ చేస్తే... కొన్ని రోజులకు రైల్వే ఇంజన్‌లో బొగ్గు వేసే ఉద్యోగంలో చేరతాడు చెల్లయన్.

ఇందిరా గాంధీ ప్రధానిగా ఉన్న రోజులు... మళ్ళీ హిందీ వ్యతిరేక ఉద్యమం మొదలవుతుంది. కాలేజీలో చదువుతున్న చెల్లయన్ తమ్ముడు చిన్న దురై (అథర్వ మురళీ) ఉద్యమంలో చురుగ్గా ఉంటాడు. అది తెలిసి వద్దని అన్నయ్య మందలిస్తాడు.

మాతృభాష కోసం ఉద్యమం చేసిన చెల్లయన్... తమ్ముడిని ఎందుకు కట్టడి చేశాడు? అతని జీవితంలో విషాదం ఏమిటి? మళ్ళీ ఉద్యమంలోకి రావడానికి కారణం ఏమిటి? రత్నమాల (శ్రీ లీల)తో అతని ప్రేమ కథ ఏమిటి? ఉద్యమంలో ఆమె పాత్ర ఏమిటి? తీరు (రవి మోహన్)తో వైరం ఏమిటి? వంటి ప్రశ్నలకు సమాధానాలు సినిమా చూసి తెలుసుకోవాలి.

విశ్లేషణ: వాస్తవ ఘటనల నేపథ్యంలో తెరకెక్కిన చిత్రమిది. హిందీని అధికార భాష చేయడం పట్ల ఉద్యమాలు జరిగాయి. కొందరు ప్రాణాలు కోల్పోయారు. ఆ వీరుల త్యాగాన్ని తక్కువ చేయలేం. అయితే... త్యాగవీరుల స్ఫూర్తిని తెరపై ఆవిష్కరించే క్రమంలో జరిగిన తప్పులను క్షమించలేం. తమిళనాడులో జరిగిన ఉద్యమాన్ని కథగా తీసుకున్నారు సుధా కొంగర. తెలుగు, కన్నడ, మలయాళ ప్రజలతో పాటు ఉత్తరాది నుంచి మద్దతు లభించినట్టు చూపించారు. ఉద్యమం మొదలైంది తమిళనాడులోనా? తెలుగులోనా? అనేది ఇక్కడ సమస్య కాదు. సినిమా చూసే ప్రేక్షకుల్లో ఆ ఉద్యమ కాంక్షను రగిలించేలా సన్నివేశాలు తీయకపోవడం సమస్య. 

'పరాశక్తి' సినిమాకు ప్రధాన సమస్య... హిందీని ఎందుకు వ్యతిరేకించారు? అనేది బలంగా చెప్పలేకపోవడం. కథ ప్రారంభించిన తీరు... ఉద్యమానికి పునాది... ప్రతి ఒక్కరిలో రిజిస్టర్ అయ్యేలా చెప్పలేదు. తమిళ నేటివిటీ తెరపై అడుగడుగునా కనిపిస్తుంది. దాంతో శివకార్తికేయన్ చేసే పోరాటం మనకు సంబంధం లేని అంశంగా ప్రేక్షకులకు కనిపిస్తుంది. అందువల్ల, ఏ దశలోనూ అసలు కథ కొంచెం కూడా ఆకట్టుకోదు. కొసరులా మధ్య మధ్యలో వచ్చే శివకార్తికేయన్ - శ్రీ లీల ప్రేమ సన్నివేశాలు బెటర్. 'గురు', 'ఆకాశమే నీ హద్దురా' సినిమాల్లో భావోద్వేగాలను బలంగా ఆవిష్కరించిన సుధా కొంగర... 'పరాశక్తి'కి వచ్చేసరికి ఆ మేజిక్ రిపీట్ చేయలేకపోయారు.

ఉద్యమ స్ఫూర్తిని తెరపైకి తీసుకు రావడంలో సుధా కొంగర తడబడ్డారు కానీ... ఆ కాలాన్ని తెరపై ఆవిష్కరించడంలో సినిమాటోగ్రాఫర్ రవి కె చంద్రన్, ప్రొడక్షన్ ఎంఆర్ కార్తీక్ రాజ్ కుమార్ మాత్రం సక్సెస్ అయ్యారు. జీవీ ప్రకాష్ కుమార్ మ్యూజిక్ కూడా బావుంది. టెక్నికల్ పరంగా సినిమా హై స్టాండర్డ్స్ మైంటైన్ చేసింది. నిర్మాణ విలువలు ఉన్నత స్థాయిలో ఉన్నాయి. 

చెల్లయన్ పాత్రకు శివకార్తికేయన్ న్యాయం చేశారు. అయితే... 'పరాశక్తి'లో సర్‌ప్రైజ్ రవి మోహన్ విలనిజం. స్టైలిష్ విలనీ పాత్రలకు ఆయన సూటవుతారని చెప్పేలా ఉందీ సినిమా. శ్రీ లీల పాత్రకు ఎక్కువ స్కోప్ లేదు. కానీ, ఉన్నంతలో తన ప్రతిభ చూపించే ప్రయత్నం చేశారు. ముఖ్యంగా పతాక సన్నివేశాల్లో నత్తితో ఎమోషనల్ సీన్ అద్భుతంగా చేశారు. హీరో తమ్ముడిగా అథర్వ మురళీ కనిపించారు. అతిథి పాత్రలో రానా దగ్గుబాటి తళుక్కున మెరిశారు. మలయాళం నుంచి బసిల్ జోసెఫ్, కన్నడ నుంచి ధనుంజయ కనిపించారు.

ఉద్యమ నేపథ్యంలో సినిమాలు ఉత్తేజం కలిగించాలి. కానీ, ప్రేక్షకులకు 'పరాశక్తి' నీరసం తెప్పిస్తుంది. ఏఆర్ మురుగదాస్ దర్శకత్వంలో శివకార్తికేయన్ హీరోగా నటించిన సినిమా 'మదరాసి'. ఈ 'పరాశక్తి'కి ఆ టైటిల్ అయితే పర్ఫెక్ట్ యాప్ట్. ఈ సినిమాను ఓటీటీలో అయినా కష్టంగా చూడాలి.