Cheekatilo Review Telugu - 'చీకటిలో' రివ్యూ: Prime Videoలో క్రైమ్ థ్రిల్లర్ - శోభితా ధూళిపాళ నటించిన మర్డర్ మిస్టరీ ఎలా ఉందంటే?

OTT Review - Cheekatilo Movie Streaming On Prime Video: శోభితా ధూళిపాళ ప్రధాన పాత్రలో నటించిన క్రైమ్ థ్రిల్లర్ 'చీకటిలో'. ప్రైమ్ వీడియో ఓటీటీలో స్ట్రీమింగ్ అవుతోంది. ఈ సినిమా ఎలా ఉందంటే?

Prime Original Movie Cheekatilo Review In Telugu: శోభితా ధూళిపాళ ప్రధాన పాత్రలో నటించిన క్రైమ్ థ్రిల్లర్ 'చీకటిలో'. విశ్వదేవ్ రాచకొండ, శ్రీనివాస్ వడ్లమాని, అదితి మ్యాకల్, ఆమని, చైతన్య కృష్ణ, ఈషా చావ్లా ఇతర ముఖ్య తారాగణం. శరణ్ కొప్పిశెట్టి దర్శకత్వం వహించారు. శ్రీచరణ్ పాకాల సంగీతం అందించారు. అమెజాన్ ప్రైమ్ వీడియో ఓటీటీలో జనవరి 23 నుంచి తెలుగు, తమిళ, హిందీ భాషల్లో స్ట్రీమింగ్ అవుతోంది. ఈ మర్డర్ మిస్టరీ ఎలా ఉందంటే?

కథ (Cheekatilo Movie Story): సంధ్య నెల్లూరి (శోభితా ధూళిపాళ) ఓ న్యూస్ ఛానల్‌లో ప్రజెంటర్. నేరాలు - ఘోరాలు తరహా కాన్సెప్ట్ ప్రోగ్రాం ద్వారా ఫేమస్ అవుతుంది. అయితే టీఆర్పీ ఛానల్ చేసే పనులు నచ్చక ఉద్యోగం మానేస్తుంది. రెండేళ్ళ నుంచి ఆ ఛానల్‌లో ఇంటర్న్‌గా పని చేసే బాబీ (అదితి మ్యాకల్) ఇచ్చిన ఐడియాతో పాడ్ కాస్ట్ స్టార్ట్ చేయాలని అనుకుంటుంది.

అనూహ్యంగా బాబీ హత్యకు గురి అవుతుంది. హంతకుడు ఎవరో తెలుసుకోవాలని సంధ్య చేసిన ప్రయత్నాల్లో సీరియల్ కిల్లర్ చేసిన పని అని అర్థం అవుతుంది. ఈ వివరాలు చెబుతూ సంధ్య చేసే పాడ్ కాస్ట్ ప్రజల్లో, పోలీసుల్లో చర్చకు దారి తీస్తుంది. ఆ సీరియల్ కిల్లర్ ఎవరు? అతడిని ఎవరు, ఎలా పట్టుకున్నారు? ఈ ప్రయాణంలో సంధ్యకు కాబోయే భర్త అమర్ (విశ్వదేవ్ రాచకొండ), పోలీస్ అధికారులు రాజీవ్ (చైతన్య కృష్ణ), ఆనందిత (ఈషా చావ్లా) ఏం చేశారు?

విశ్లేషణ (Cheekatilo Review Telugu): సీరియల్ కిల్లర్ బ్యాక్‌డ్రాప్‌లో మర్డర్ మిస్టరీ, క్రైమ్ థ్రిల్లర్ వచ్చిన సినిమాలు కోకొల్లలు. అయితే చాలా సినిమాల్లో హంతకుడు వరుస హత్యలు చేయడానికి గల కారణాలు అప్పటికే పలు సినిమాల్లో చూసినట్టు లేదా రొటీన్‌గా ఉన్నట్టు అనిపిస్తాయి. బట్, ఫర్ ఏ ఛేంజ్... 'చీకటిలో' సీరియల్ కిల్లర్ మోటివ్ డిఫరెంట్‌గా ఉంది. ఇన్నాళ్ళూ లైంగిక వేధింపులను ఒక కోణంలో చూపించారు. ఇందులో మరో కోణం తీసుకున్నారు. సినిమాకు అది డిఫరెంట్ టచ్.

'చీకటిలో' పాయింట్ కొత్తగా ఉంది. ఎండింగ్ ఎక్స్‌పెక్ట్‌ చేయని విధంగా, ప్రతి ఒక్కరి ఊహలకు అతీతంగా వెళ్ళింది. చివరి వరకు హంతకుడు ఎవరు? అనేది ఊహించడం కష్టం. మంచి ఎండింగ్ రాసుకున్న దర్శక రచయితలు రొటీన్‌గా ఈ సినిమాను స్టార్ట్ చేయడం మైనస్ పాయింట్. శోభితా ధూళిపాళ పాత్రను, వరుస హత్యలను పరిచయం చేసిన తీరు ఎటువంటి ఉత్కంఠకు గురి చేయదు. ఏ విధమైన ఆసక్తి కలిగించదు. సింపుల్ & స్ట్రైయిట్‌గా వెళుతుంది. ఇన్వెస్టిగేషన్ ప్రాసెస్ అసలు ఏమాత్రం ఆసక్తి కలిగించలేదు. మొదటి గంట తర్వాత సినిమాలో అసలైన ఆసక్తి మొదలైంది. చివరి అరగంట ఎంగేజ్ చేసింది.

ఇటువంటి క్రైమ్ థ్రిల్లర్స్, మర్డర్ మిస్టరీల్లో వీక్షకులను ఎంగేజ్ చేయడం కోసం కొన్ని క్యారెక్టర్స్ మీద అనుమానాలు క్రియేట్ అయ్యేలా చేయడం సహజం. వెరీ రొటీన్. 'చీకటిలో' దర్శక రచయితలు సైతం మధ్యలో అటువంటి జిమ్మిక్కులు చేశారు. అయితే ఎండింగ్ ట్విస్ట్ డిఫరెన్స్ తీసుకొచ్చింది. మహిళలపై లైంగిక దాడి, హత్యాచారాలు ఉన్నప్పటికీ దర్శకుడు శరణ్ కొప్పిశెట్టి వల్గారిటీగా చూపించలేదు. ఈ సినిమాకు సంగీత దర్శకుడు శ్రీచరణ్ పాకాల పూర్తిగా న్యాయం చేశారు. పాట, నేపథ్య సంగీతం... ఏదైనా కథతో పాటు ప్రయాణించింది. కథలో వీక్షకులను లీనం చేసేలా సాగింది. సినిమాటోగ్రఫీ సైతం బావుంది. కథకు తగ్గట్టు డార్క్ టోన్ మైంటైన్ చేశారు.

మీడియాలో పని చేసే మహిళలు, మోడ్రన్ & ఇండిపెండెంట్ అమ్మాయిలు అంటే జీన్స్ లేదా వెస్ట్రన్ వేర్‌లో చూపించడం కామన్. ఈ నేపథ్యంలో చుడిదార్ ధరించే అమ్మాయిలు, చీరలు కట్టుకునే మహిళలు సైతం స్ట్రాంగ్ & ఇండిపెండెంట్‌గా ఉంటారని చూపించాలనే ఆలోచన ఎవరిదో గానీ మెచ్చుకోవాలి. జీన్స్ టీ షర్టులు ధరించడం తప్పని కాదు... ఆ అవకాశం ఉన్నప్పటికీ, సినిమా అంతటా శోభితా ధూళిపాళ చుడిదార్ లేదా చీరల్లో కనిపించారు. ఈ సినిమాకు అది తెలుగు నేటివ్ లుక్ తీసుకొచ్చింది.

'చీకటిలో'కు శోభితా ధూళిపాళ నటన, ముఖ్యంగా డబ్బింగ్ బలంగా నిలిచాయి. ఈ సినిమాకు ముందు 'గూఢచారి', 'మేజర్'లో ఆమె కనిపించారు. అయితే... తెలుగులో కథానాయికగా నటించిన మొదటి సినిమా ఇదేనని చెప్పాలి. నటిగా శోభిత ఎప్పుడో ప్రూవ్ చేసుకున్నారు. 'చీకటిలో' పాత్రకు తగ్గట్టు సెటిల్డ్ పెర్ఫార్మన్స్ చేశారు. ఆయా సన్నివేశాల్లో గాఢత తెలిపేలా ఆమె ఓన్ డబ్బింగ్ సాగింది. శోభిత వాయిస్ బావుంది. అచ్చ తెలుగమ్మాయి లుక్‌ కూడా! విశ్వదేవ్ రాచకొండ, ఈషా చావ్లా, ఆమని, సురేష్ పాత్రలు పరిమితమే. రవీంద్ర విజయ్ నటనను పూర్తిగా వాడుకోలేదు. శ్రీనివాస్ వడ్లమాని అదరగొట్టారు. అంతకు మించి చెప్పలేం.

క్రైమ్ థ్రిల్లర్స్, మర్డర్ మిస్టరీలు చూసే వీక్షకులకు 'చీకటిలో' సినిమా డిఫరెంట్ ఎక్స్‌పీరియన్స్‌ ఇస్తుంది. రెగ్యులర్‌గా మొదలైనప్పటికీ... సినిమాలోకి వెళ్లే కొలదీ ఆసక్తి కలిగిస్తుంది. చివరి అరగంట ఎంగేజ్ చేస్తుంది. శోభిత - అక్కినేని ఫ్యాన్స్ అంచనాలు తక్కువ పెట్టుకోవడం మంచిది. హిందీలో వెబ్ సిరీస్‌లతో హిట్స్ అందుకున్న శోభితా ధూళిపాళకు తెలుగు ఓటీటీలో 'చీకటిలో' మంచి స్టార్ట్.