Maremma Review - 'మారెమ్మ' రివ్యూ: రవితేజ సోదరుని కుమారుడు ఎలా నటించాడు? డెబ్యూ సినిమా హిట్టా? ఫట్టా?

Maremma Review In Telugu: మాస్ మహారాజా రవితేజ సోదరుని కుమారుడు మాధవ్ భూపతిరాజు హీరోగా పరిచయమైన సినిమా 'మారెమ్మ'. జంతుబలి, ప్రజల్లో నమ్మకం, ఆచారాలపై తీసిన సినిమా ఎలా ఉందో తెలుసుకోండి.

Madhav Bhupathiraju Maremma Movie Review In Telugu: మాస్ మహారాజా రవితేజ సోదరుని కుమారుడు మాధవ్ భూపతిరాజు హీరోగా పరిచయమైన సినిమా 'మారెమ్మ'. తమిళ్ హిట్ వెబ్ సిరీస్ 'హార్ట్ బీట్' ఫేమ్ దీపా బాలు హీరోయిన్. మంచాల నాగరాజు దర్శకుడు. మోక్ష ఆర్ట్స్ పతాకంపై మయూర్ రెడ్డి బండారు నిర్మించారు. జంతుబలి, ప్రజల్లో నమ్మకాలు - ఆచారాలపై తీసిన చిత్రమిది. ఈ విలేజ్ డ్రామా ఎలా ఉంది?

కథ (Maremma Movie Story): తెలంగాణలోని మహిషా పురం గ్రామ దేవత మారెమ్మ. పాడి పంటలతో ఊరు, ఐశ్వర్య ఆరోగ్యాలతో గ్రామస్థులు సుభిక్షంగా ఉండాలంటే పదేళ్ళకు ఓసారి మారెమ్మకు ఘనంగా జాతర చేయాలని, అమ్మ వారికి దున్నను బలి ఇవ్వాలని ఒంటికన్ను సాములోరు చెబుతారు. సాములోరు చెప్పినట్టు పుట్టిన దున్న బాధ్యతను కర్ణి (మాధవ్ భూపతిరాజు)కి అప్పగిస్తారు. తండ్రి మరణించడంతో చదువును పక్కనపెట్టి ఆ దున్న బాధ్యత చూస్తాడు కర్ణి. దానికి మారి అని పేరు పెడతాడు. సొంత తమ్ముడిలా చూసుకుంటాడు.

మారి (దున్న)పై పగ పడతాడు జలేంద్ర (వికాస్ వశిష్ఠ). అతనిది మహిషా పురం కాదు... పొరుగూరు. జాతరకు నాలుగు రోజుల ముందు మారి కనిపించకుండా పోతుంది. అసలు దున్నపై జలేంద్ర పగ ఏమిటి? దున్నపోతును ఎలాగైనా చంపాలని జలేంద్ర, దాన్ని వెతికి జాతరకు తీసుకు రావాలని కర్ణి వెతకడం మొదలు పెడతారు. తర్వాత ఏమైంది? తమ్ముడిలా పెంచిన మారిని చంపాల్సి వస్తుందని తెలిశాక కర్ణి ఏమన్నాడు? చివరకు ఏం జరిగింది? అనేది సినిమా.

విశ్లేషణ (Maremma Review Telugu): 'ఇరుముడి'తో రవితేజ భారీ విజయాన్ని అందుకున్నారు. ఆ సినిమా సక్సెస్ వెనుక ప్రధాన కారణం... దేవునిపై ప్రజల్లో ఉన్న భక్తి, డాటర్ సెంటిమెంట్. కథకు రూరల్ బ్యాక్‌డ్రాప్, రవితేజ నేచురల్ యాక్టింగ్ యాడ్ అవ్వడంతో ప్రేక్షకులకు కనెక్ట్ అయ్యింది. 'మారెమ్మ' కూడా రూరల్ బ్యాక్‌డ్రాప్ కథే. ఇందులోనూ భక్తి ఉంది. హీరోది విలేజ్ & నేటివిటీతో కూడిన క్యారెక్టర్. అయితే ఏ దశలోనూ అటు భక్తి పరంగా, ఇటు క్యారెక్టర్స్ పరంగా ప్రేక్షకులకు కనెక్ట్ అయ్యేలా సినిమాను తెరకెక్కించడంలో దర్శకుడు మంచాల నాగరాజు ఫెయిల్ అయ్యారు.

ప్రతి కథకు ప్రారంభం, ముగింపు అనేవి ముఖ్యం. మధ్యలో సన్నివేశాలు ఆసక్తి కలిగించాలి. 'మారెమ్మ' ప్రారంభం బావుంది. ముగింపు అసలు బాలేదు. మధ్యలో ఆసక్తి సన్నగిల్లింది. గ్రామ దేవత లేని ఊరు ఉండటం అరుదు. దేవతకు జాతర చేయడం ఆనవాయితీ. ఇప్పటి వరకు మేకలు, కోళ్లను బలి ఇవ్వడాన్ని చూశాం. దున్నపోతు బలి అనేది ఆసక్తి కలిగిస్తుంది. అయితే ఆ ఆసక్తి సన్నగిల్లడానికి ఎంతో సమయం పట్టలేదు. గ్రాఫిక్ డిజైన్ / ఏఐ విజువల్స్ ద్వారా ఊరి నేపథ్యం, పదేళ్ళకు ఓసారి దున్న బలి వంటివి చెప్పిన తర్వాత కథ రొటీన్ రూటులోకి వచ్చింది. దర్శకుడికి మొదటి సినిమా కావడంతో ప్రతి సన్నివేశంలో అనుభవలేమి కొట్టొచ్చినట్టు కనబడింది.

హీరో బాల్యంలో దున్నతో సన్నివేశాలు బాగా రాసుకున్నారు. అయితే... హీరో పెరిగి పెద్దోడు అయ్యాక వచ్చే కబడ్డీ సీన్ గానీ, దున్నతో అనుబంధాన్ని గానీ ఎస్టాబ్లిష్ చేయడంలో ఫెయిల్ అయ్యారు మంచాల నాగరాజు. అది పక్కన పెడితే... దున్నపై జలేంద్ర పగ పెంచుకోవడానికి, చంపాలని అనుకోవడానికి చెప్పిన కారణం సహేతుకంగా లేదు. ఆమాత్రం దానికి చంపేయాలని అనుకుంటాడా? అనేంతలా సినిమా తీశారు. అవమాన భారంగా కుంగిపోయేంతలా ఆ సన్నివేశాన్ని తీయలేదు. 

హీరో హీరోయిన్ల మధ్య ప్రేమనూ సరిగా చూపించలేదు. సెకండాఫ్ అంతా దున్నను వెతకడంతో సరిపెట్టారు. తర్వాత ఏం జరుగుతుందో? అని ఎగ్జైట్‌మెంట్ ప్రేక్షకుల్లో కలిగించేలా సినిమా లేదు. చిన్నప్పటి నుంచి తమ్ముడిలా చూసుకున్న మారి (దున్న)ను చంపలేనని హీరో చెప్పడంతో పతాక సన్నివేశాల్లో దర్శకుడు ఏం చెబుతాడోనని కాస్త ఆసక్తి కలిగింది. కానీ, ఆ ఆశలపై నీళ్ళు చల్లుతూ నీరుగార్చేలా క్లైమాక్స్ తీశారు. దర్శకుడు ఏం చెప్పాలని అనుకున్నారో అర్థం కాదు. పొలిమేర దాటితే కర్ణిని మారి గుర్తు పట్టకపోవడం, క్షుద్రపూజలు వంటి అంశాలను స్పష్టంగా చెప్పలేదు. ఆల్రెడీ ఈ తరహా కథతో ఇంత కంటే బాగా అనన్యా నాగళ్ళ 'పొట్టెల్' తీశారు.

పాటల్లో ప్రశాంత్ ఆర్ విహారి బాణీలు, మిట్టపల్లి సురేందర్ సాహిత్యం బావున్నాయి. బిప్రదీప్ దత్తా నేపథ్య సంగీతం అసలు బాలేదు. సన్నివేశానికి, ఆర్ఆర్‌కి సింక్ కుదరలేదు. గ్రామీణ నేపథ్యాన్ని ప్రశాంత్ అంకిరెడ్డి సినిమాటోగ్రఫీ సహజంగా చూపించింది. నేచురల్ లొకేషన్లలో సినిమా తీశారు. ప్రొడక్షన్ వేల్యూస్ జస్ట్ ఓకే.

హీరోగా మాధవ్ భూపతిరాజుకు మొదటి చిత్రమిది. ఒడ్డూ పొడుగు బావున్నాడు. హీరోకి కావాల్సిన కటౌట్ ఉంది. అయితే... నటుడిగా ఇంకా పరిణితి చూపించాలి. తొలి సినిమా, అందులోనూ పల్లెటూరి నేపథ్యంలో కథ కావడంతో రా అండ్ రస్టిక్ లుక్ సెట్ అయ్యింది కనుక సగం పాస్ మార్కులు కొట్టేశాడు. కానీ, నటుడిగా ప్రేక్షకుల్ని మెప్పించాలంటే ఇంకా చాలా ఇంప్రూవ్ అవ్వాలి. మాధవ్ భూపతిరాజు నటన పరంగా చూస్తే... క్లైమాక్స్ సీన్‌లో కాస్త ఇంప్రెస్ చేశారు.

హీరో మరదలుగా తన పాత్ర పరిధి మేరకు దీపా బాలు చక్కగా నటించారు. ఊరి పెద్ద ధర్మన్న పాత్రలో వినోద్ కుమార్ కనిపించారు. ఆయనది రొటీన్ రోల్. తెరపై విగ్రహపుష్టి తప్ప క్యారెక్టర్ పండలేదు. వికాస్ వశిష్ఠ ట్యాలెంట్ ఉన్న ఆర్టిస్ట్. ఆయన నటనలో వంక పెట్టడానికి ఏమీ లేదు. కానీ, సరైన క్యారెక్టర్ ఆర్క్ కుదరలేదు. 'బలగం' రూపాలక్ష్మి క్యారెక్టర్, ఆమె లుక్ చాలా మంది ప్రేక్షకులకు సర్‌ప్రైజ్.

గ్రామ దేవత, జంతుబలి వంటి పల్లెటూరి ఆచారాలను ప్రేక్షకులకు చెప్పాలని అనుకోవడంలో తప్పు లేదు. అయితే... ఆ ప్రయత్నంలో తప్పటడుగులు ఎక్కువ పడ్డాయి. కథ, క్యారెక్టర్లు, సన్నివేశాల్లో స్పష్టత లోపించింది. డిజప్పాయింట్ చేసింది. సారీ మాధవ్ భూపతిరాజు... విజయం కోసం మరో సినిమాతో ప్రేక్షకుల ముందుకు రావాల్సిందే.