Food: మీరు తిన్న ఆహారం మీ శరీరానికి సరిపోవడం లేదని చెప్పే లక్షణాలే ఇవన్నీ

శరీరానికి సరిపడా ఆహారం తినాలి, లేకుంటే అది కొన్ని లక్షణాల ద్వారా మీకు ఆ విషయాన్ని తెలియజేస్తుంది.

అతిగా తినడం వల్ల దుష్ప్రభావాలు కలుగుతాయని చాలామందికి తెలుసు. అలాగే సరిపడినంత తినకపోయినా కూడా అలాంటి ప్రభావాలే కనిపిస్తాయి. తక్కువ ఆహారం తినడం, ఆహారం తినాలన్న కోరికలను నియంత్రించుకోవడం వంటివి ఆరోగ్య సమస్యలను కలిగిస్తాయి. శరీరానికి సరిపడా పోషకాలు, కేలరీలు ఉండే ఆహారం తినడం చాలా అవసరం. మీ బరువు తగ్గించే ప్రయాణంలో ఆహారానికి కోత పెడితే శరీరం తట్టుకోలేదు. కొన్ని లక్షణాల ద్వారా  మీరు సరిపడా తినడం లేదని చెబుతుంది శరీరం. ఆ లక్షణాలు ఎలా ఉంటాయో ఒకసారి తెలుసుకోండి. 

1. తక్కువ కేలరీలు ఉన్న ఆహారం తినడం, అది కూడా సరిపడా తినకపోవడం వల్ల ప్రాథమిక విధులను కూడా శరీరం నిర్వర్తించలేదు. శరీరానికి తగినంత శక్తి అందదు. దీనివల్ల తీవ్ర అలసట అనిపిస్తుంది. శక్తి హీనంగా అనిపిస్తుంది. మీరు శరీరానికి సరిపడా తినడం లేదని చెప్పే ప్రధాన లక్షణం ఇది. 

2. జుట్టు రాలిపోవడం ప్రారంభమవుతుంది. జుట్టు పెరుగుదలకు కేలరీలు, ప్రొటీన్లు, సూక్ష్మ పోషకాలు అవసరం. అవి తగినంతగా శరీరానికి అందకపోతే జుట్టు రాలిపోతుంది. జుట్టు రాలిపోతున్నప్పడు మీరు సరిగా తింటున్నారో లేదో ఆలోచించుకోండి. అంతే తప్ప షాంపూలు, క్రీములు పెట్టడం వల్ల ఉపయోగం ఉండదు. 

3. నిద్రపోవడానికి ముందు, నిద్రపోయి లేచిన తర్వాత కూడా  ఆకలి వేస్తూ ఉంటుంది. తక్కువ ఆహారం తీసుకోవడం వల్ల హార్మోన్లలో మార్పులు సంభవిస్తాయి. శరీరానికి తగినంత క్యాలరీలు, పోషకాలు అందేలా చేయడం కోసం ఆకలిని పెంచుతాయి. రోజంతా ఎక్కువ సేపు ఆకలి వేస్తుంటే శరీరానికి మీరు తిన్న ఆహారం సరిపోవడం లేదని అర్థం. 

4. ఎక్కువగా నిద్ర పోవాలనిపిస్తుంది. నీరసం వల్ల ఇలా అనిపిస్తుంది. అయితే ఆ నిద్రలో నాణ్యత కూడా తక్కువే ఉంటుంది. తక్కువగా తినడం వల్ల గాఢ నిద్ర పట్టదు. 

5. చీటికిమాటికి చిరాకు పడతారు. ఓపికా, సహనం తగ్గిపోతాయి. ఆహారం ద్వారా తక్కువ క్యాలరీలు శరీరంలో చేరడం వల్ల శరీర ఉష్ణోగ్రత తగ్గుతుంది. T3  థైరాయిడ్ హార్మోన్ స్థాయిలు కూడా తక్కువ అయిపోతాయి.

6. ఆహారం తక్కువగా తీసుకోవడం వల్ల మలబద్ధకం ఏర్పడుతుంది. ఎందుకంటే తక్కువ ఆహారం వల్ల తక్కువ వ్యర్ధపదార్థాలే తయారవుతాయి. దీనివల్ల జీర్ణవ్యవస్థ నెమ్మదిగా మారిపోతుంది. రెండు, మూడు రోజులకు ఒకసారి మాత్రమే మల విసర్జనకు వెళతారు.

7. శరీరంలో బి విటమిన్లు, ఒమేగా త్రీ కొవ్వు ఆమ్లాలు, ఫోలేట్లు వంటి పోషకాలు లోపించడం వల్ల మెదడు పనితీరు తగ్గిపోతుంది. అభిజ్ఞా సామర్థ్యం తగ్గుతుంది. 

గమనిక: పలు అధ్యయనాలు, పరిశోధనలు, హెల్త్ జర్నల్స్ నుంచి సేకరించిన సమాచారాన్ని మీ అవగాహన కోసం ఇక్కడ యథావిధిగా అందించాం. ఈ సమాచారం వైద్యానికి లేదా చికిత్సకు ప్రత్యామ్నాయం కాదు. ఆరోగ్యానికి సంబంధించి.. ఎలాంటి సందేహాలున్నా మీరు తప్పకుండా డాక్టర్‌ను సంప్రదించాలి. ఈ ఆర్టికల్‌లో పేర్కొన్న అంశాలకు ‘ఏబీపీ దేశం’, ‘ఏబీపీ నెట్‌వర్క్’ ఎటువంటి బాధ్యత వహించవని గమనించగలరు.