Regular Menstrual Cycles Can Also Have Risks : చాలా మంది మహిళలు తమకు ప్రతి నెలా పీరియడ్స్ సక్రమంగా వస్తున్నాయంటే.. వారి హార్మోన్లు సరిగ్గా ఉన్నాయని భావిస్తారు. 28 నుంచి 30 రోజుల వ్యవధిలో రెగ్యులర్గా పీరియడ్ రావడం సేఫ్ అని భావిస్తారు. ఎలాగో కరెక్ట్ టైమ్కి వస్తున్నాయి కదా.. శరీరంలో అంతా సవ్యంగా ఉందని భావిస్తారు. కానీ నిజం ఏమిటంటే.. క్రమబద్ధమైన పీరియడ్స్ కూడా కేవలం ఒక బాహ్య సూచన మాత్రమే అని.. అది పూర్తిగా మీరు ఆరోగ్యంగా ఉన్నారని సూచించదని చెప్తున్నారు నిపుణులు. ఎందుకో ఇప్పుడు తెలుసుకుందాం.
హార్మోన్ల వ్యవస్థ చాలా క్లిష్టమైనది. మెదడు, అండాశయాలు, థైరాయిడ్, అడ్రినల్ గ్రంథులు, జీవక్రియ అన్నీ ఒకదానితో ఒకటి ముడిపడి ఉంటాయి. కొన్నిసార్లు ఈ వ్యవస్థ అంతర్గత ఒత్తిడి, అసమతుల్యత ఉన్నప్పటికీ.. పీరియడ్స్ను క్రమబద్ధంగా ఉంచుతుంది. అందుకే కొంతమంది మహిళలకు పీరియడ్స్ సకాలంలో వస్తాయి. కానీ సంతానోత్పత్తి సమస్యలు, తీవ్రమైన నొప్పి, మూడ్ స్వింగ్స్ లేదా ప్రీమెన్స్ట్రువల్ సమస్యలను ఎదుర్కొంటారు.
నిపుణులు ఏమంటున్నారంటే..
లూమా ఫెర్టిలిటీ వైద్య డైరెక్టర్ డాక్టర్ రాధికా శెత్ TOIతో మాట్లాడుతూ.. రెగ్యులర్గా పీరియడ్స్ వస్తోన్న మహిళల్లో కూడా చాలా కాలంగా హార్మోన్ల అసమతుల్యత ఉందని వైద్యపరంగా సాధారణమని చెప్పారు. పీరియడ్స్ రావడం కేవలం ఒక ఫలితం మాత్రమేనని.. అయితే దాని వెనుక ఉన్న హార్మోన్ల ప్రక్రియ చాలా లోతైనది, సున్నితమైనదని తెలిపారు. ఈ సమయంలో వచ్చే సమస్య ఏంటంటే.. ప్రొజెస్టెరాన్ లోపం. దీనిని లూటియల్ ఫేజ్ ఇన్సఫిషియన్సీ అంటారు. అటువంటి పరిస్థితిలో స్త్రీ సకాలంలో అండోత్సర్గము చేస్తుంది. పీరియడ్స్ కూడా క్రమంగా వస్తాయి. కానీ తగినంత ప్రొజెస్టెరాన్ లేకపోవడం వల్ల గర్భం నిలబడదు. సరైన సమయంలో టెస్ట్ చేయకపోతే.. ఈ సమస్య సంవత్సరాలు దాటిన గుర్తించలేము.
రెగ్యులర్ పీరియడ్స్తో సమస్యలు
అదేవిధంగా PCOS తరచుగా క్రమరహిత పీరియడ్స్తో ముడిపడి ఉంటుంది. కానీ దాని తేలికపాటి లేదా జీవక్రియ రూపంలో.. చాలా మంది మహిళలకు పీరియడ్స్ రెగ్యులర్గా వస్తాయి. అయినప్పటికీ వారు ఇన్సులిన్ నిరోధకత లేదా తేలికపాటి హార్మోన్ల అసమతుల్యతను కలిగి ఉండవచ్చు. ఇది గుడ్ల నాణ్యత, సంతానోత్పత్తిని ప్రభావితం చేస్తుంది. థైరాయిడ్ లేదా ప్రొలాక్టిన్లో స్వల్ప లోపం కూడా పీరియడ్స్ను ప్రభావితం చేయకుండా అండోత్సర్గము, హార్మోన్ల మద్దతును బలహీనపరుస్తుంది. దీనితో పాటు నిరంతర ఒత్తిడి, నిద్ర లేకపోవడం, క్రమరహిత ఆహారం తీసుకోవడం వల్ల శరీరంలో కార్టిసాల్ పెరుగుతుంది. ఇది హార్మోన్ల సమతుల్యతను నెమ్మదిగా దెబ్బతీస్తుంది.
ఏ విషయాలను నిర్లక్ష్యం చేయకూడదు?
తీవ్రమైన మూడ్ స్వింగ్స్, పీరియడ్స్ నొప్పి, నిరంతర అలసట, వాపు, లిబిడో తగ్గిపోవడం లేదా భావోద్వేగ అస్థిరత వంటి లక్షణాలను సాధారణంగా భావించి నిర్లక్ష్యం చేయకూడదని వైద్యులు అంటున్నారు. పీరియడ్స్ క్రమంగా ఉన్నప్పటికీ.. శరీరం లోపలి నుంచి సమతుల్యతను సాధించడానికి ప్రయత్నిస్తుందని ఈ సంకేతాలు సూచిస్తున్నాయి.
గమనిక: ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.