Women Health : జుట్టు రాలడం నుంచి నిద్రలేమి వరకు.. మహిళల్లో పెరుగుతోన్న హార్మోన్ల సమస్య, ప్రతి పదిమందిలో ఒకరికి PCOS
PCOS Signs : మహిళల్లో జుట్టు రాలడం ఆత్మవిశ్వాసాన్ని తగ్గిస్తుంది. నిద్రలేమి, చర్మ సమస్యలే కాకుండా మానసిక ఆరోగ్యం, కెరీర్పై కూడా ప్రభావం చూపుతుంది. ప్రధాన కారణం, సమస్యల పరిష్కారం ఏంటో చూసేద్దాం.
Polycystic Ovary Syndrome in Women : ప్రస్తుతం చాలామంది మహిళలు జుట్టు రాలే, నిద్రకు సంబంధించిన సమస్యలతో ఇబ్బంది పడుతున్నారు. అయితే చాలా మంది మహిళలు వీటిని సాధారణమైన విషయాలుగా భావిస్తారు కానీ.. ఈ లక్షణాలు శరీరంలో తీవ్రమైన హార్మోన్ల అసమతుల్యతను సూచిస్తాయని మీకు తెలుసా? మహిళలకు జుట్టు పలుచబడటం లేదా రాలడం వల్ల వారి ఆత్మవిశ్వాసం దెబ్బతింటుంది. జుట్టు రాలినప్పుడు లేదా నిద్ర పట్టనప్పుడు.. దాని ప్రభావం చర్మంపైనే కాకుండా మానసిక ఆరోగ్యంపై, కెరీర్పై కూడా పడుతుంది. కాబట్టి జుట్టు రాలడం నుంచి నిద్రలేమి వరకు 10 మంది మహిళల్లో ఒకరికి వచ్చే హార్మోన్ల సమస్య ఏమిటో ఇప్పుడు తెలుసుకుందాం.
10 మంది మహిళల్లో ఒకరికి సమస్య
PCOS అంటే పాలీసిస్టిక్ ఓవరీ సిండ్రోమ్. ఇది నేడు ప్రతి 10 మంది మహిళల్లో ఒకరిని ప్రభావితం చేస్తోంది. చాలా మంది మహిళలు దీనిని గుర్తించలేకపోతున్నారు. దీని కారణంగా జుట్టు రాలడం నుంచి నిద్రలేమి వరకు అనేక సమస్యలను ఎదుర్కోవలసి వస్తుంది. PCOS అనేది మహిళల అండాశయాల పనితీరును ప్రభావితం చేసే హార్మోన్ల సమస్య. ఇందులో మహిళల శరీరంలో ఆండ్రోజెన్ స్థాయి పెరుగుతుంది. దీనివల్ల అనేక రకాల శారీరక, మానసిక సమస్యలు వస్తాయి. PCOSకి సరైన కారణం నేటికీ శాస్త్రవేత్తలకు పూర్తిగా తెలియదు. అయితే హార్మోన్ల అసమతుల్యత, శరీరంలో ఇన్సులిన్ పరిమాణం పెరగడం ప్రధాన కారణాలుగా భావిస్తారు.
మహిళలు విస్మరించే PCOS ప్రధాన లక్షణాలు
పీరియడ్స్ మార్పు : ఏ మహిళకైనా నెలసరి సక్రమంగా రాకపోవచ్చు లేదా చాలా నెలలపాటు ఆగిపోవచ్చు. అండాశయాలు సరిగ్గా ఎగ్స్ రిలీజ్ చేయకుంటే.. ఇలా జరుగుతుంది. ఇది PCOSకి సంకేతం.
ముఖం, శరీరంపై అవాంఛిత రోమాలు : మహిళల్లో పురుషుల్లాగా గడ్డం, ఛాతీ, వీపు లేదా పొత్తికడుపుపై వెంట్రుకలు రావడం జరుగుతుంది. దీనిని హిర్సుటిజం అంటారు. ఇది శరీరంలో ఆండ్రోజెన్ హార్మోన్ల అసమతుల్యతకు సంకేతం.
జుట్టు రాలడం లేదా బట్టతల : తల రెండు వైపులా లేదా జుట్టు మధ్య భాగంలో జుట్టు పలుచబడుతుంది. లేదా రాలిపోతుంది. కొన్ని సందర్భాల్లో జుట్టు రాలడం లేదా బట్టతల వంటి పరిస్థితి కూడా ఏర్పడవచ్చు.
అకస్మాత్తుగా బరువు పెరగడం : ముఖ్యంగా పొత్తికడుపు చుట్టూ కొవ్వు పెరగడం దీనికి కారణం. అదే సమయంలో ఇన్సులిన్ నిరోధకత అంటే శరీరంలో ఇన్సులిన్ సరిగ్గా పనిచేయదు.
మొటిమలు, జిడ్డుగల చర్మం : హార్మోన్ల అసమతుల్యత కారణంగా.. ముఖంపై, ముఖ్యంగా నోరు, గడ్డం చుట్టూ తరచుగా మొటిమలు వస్తాయి.
నల్ల మచ్చలు : మెడ, చంకలు లేదా శరీరంలోని ఇతర భాగాలపై నల్లటి, మందపాటి చర్మం ఉంటుంది. దీనిని అకాంతోసిస్ నైగ్రికన్స్ అంటారు. ఇది శరీరంలో ఇన్సులిన్ స్థాయి దెబ్బతిన్నదని సూచిస్తుంది.
స్కిన్ ట్యాగ్స్ : మెడ, చంకలు లేదా బ్రా లైన్ దగ్గర చిన్న చిన్న చర్మపు ముద్దలు ఏర్పడటం కూడా హార్మోన్ల మార్పుల వల్ల వస్తాయి.
నిద్రలేమి లేదా నిద్రకు అంతరాయం : PCOS ఉన్న మహిళలు నిద్రకు సంబంధించిన సమస్యలతో పోరాడుతున్నారు. తరచుగా నిద్ర లేవడం లేదా గాఢ నిద్ర లేకపోవడం వంటివి. కొన్ని సందర్భాల్లో స్లీప్ అప్నియా అనే వ్యాధి ఉండవచ్చు. దీనిలో రాత్రి సమయంలో శ్వాస పదేపదే ఆగిపోతుంది.
మూడ్ స్వింగ్స్, డిప్రెషన్ : PCOS శరీరాన్ని మాత్రమే కాకుండా మనస్సును కూడా ప్రభావితం చేస్తుంది. 80 శాతం మంది మహిళలు డిప్రెషన్, 70 శాతం మంది మహిళలు ఆందోళనను అనుభవిస్తారు. శరీరంలో మార్పులు, బరువు పెరగడం, జుట్టు రాలడం దీనికి కారణం.
మానసిక ఆరోగ్యంపై PCOS ప్రభావం
PCOS అనేది కేవలం హార్మోన్ల లోపం మాత్రమే కాదు. ఇది మహిళల ఆత్మవిశ్వాసం, భావోద్వేగ సమతుల్యతను కూడా తీవ్రంగా ప్రభావితం చేస్తుంది. జుట్టు రాలడం, బరువు పెరగడం, ముఖంపై వెంట్రుకలు రావడం వంటివి మహిళలను సామాజికంగా అసౌకర్యానికి గురి చేస్తాయి. దీనివల్ల వారు లోన్లీగా భావిస్తారు. దీనివల్ల డిప్రెషన్, ఒంటరితనం అనుభవించడం సాధారణం. దీనితో పాటు PCOSలో అండోత్సర్గము సరిగ్గా జరగదు. కాబట్టి గర్భధారణలో ఇబ్బంది ఉండవచ్చు.
PCOS చికిత్స ఏమిటి?
PCOSకి శాశ్వత పరిష్కారం లేదు. కానీ దాని లక్షణాలను నియంత్రించవచ్చు. ఆరోగ్యకరమైన ఆహారం, తక్కువ చక్కెర, ప్రాసెస్ చేసిన ఆహారాలకు దూరంగా ఉండాల్సి ఉంటుంది. రోజుకు 30 నిమిషాల శారీరక శ్రమ, వైద్యుల సలహా మేరకు హార్మోన్లను సమతుల్యం చేసే మందులు, అవసరమైతే ఇన్సులిన్ను నియంత్రించే మందులు తీసుకోవడం, ధ్యానం, కౌన్సెలింగ్ ద్వారా మానసిక స్థితిని మెరుగుపరచవచ్చు.
గమనిక: ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
టాప్ హెడ్ లైన్స్
ట్రెండింగ్ వార్తలు
