Soft and Crispy Dosas With Leftover Rice : మీకు చద్దన్నం తినడం ఇష్టం లేదా? అలాగే ఉదయాన్నే మిగిలిన రైస్ తినే మూడ్ లేదా అయితే మీరు రాత్రి అన్నాన్ని ఉదయం పారేయాల్సిన అవసరం లేదు. దానితోనే చక్కగా.. టేస్టీగా, మెత్తగా ఉండే దోశలు తయారు చేసుకోవచ్చు. రాత్రి మిగిలిన అన్నం ఉదయం బ్రేక్‌ఫాస్ట్‌కి కానీ, ఉదయం వండిన అన్నం సాయంత్రం స్నాక్‌గా కానీ దోశలు చేసుకోవచ్చు. అసలు మిగిలిపోయిన అన్నంతో దోశలు ఎలా తయారు చేసుకోవాలో.. కావాల్సిన పదార్థాలు ఏంటో ఇప్పుడు తెలుసుకుందాం.
కావాల్సిన పదార్థాలు
మిగిలిపోయిన అన్నం - 1 కప్పు
బియ్యం - 1 కప్పు
అటుకులు - అర కప్పు
పెరుగు - అర కప్పు
ఉప్పు - తగినంత
నీరు - అవసరమైనంత
నూనె - దోశలు వేసేందుకు
Also Read : కాజు కట్లీ అంటే ఇష్టమా? అయితే ఇంట్లోనే సింపుల్‌గా ఇలా తయారు చేసుకోండి, రెసిపీ ఇదే
తయారీ విధానం
ముందుగా బియ్యాన్ని, అటుకులను శుభ్రంగా కడిగి 4 నుంచి 5 గంటలు నీటిలో నానబెట్టుకోవాలి. తర్వాత నానబెట్టిన బియ్యం, అటుకులతో పాటు మిగిలిపోయిన అన్నం, పెరుగు వేసి మెత్తగా గ్రైండ్ చేసుకోవాలి. పిండిని ఒక గిన్నెలోకి తీసుకుని అవసరమైనంత నీరు పోసి దోశ పిండిలా కలుపుకోవాలి. ఉప్పు వేసి కనీసం 6 గంటలు లేదా వీలైతే రాత్రంతా ఫెర్మెంట్ చేసుకోవాలి.
ఫెర్మెంట్ అయిన తర్వాత పిండిని ఒకసారి బాగా కలిపి.. దోశ పెనంపై కొద్దిగా నూనె వేసి వేడి చేయాలి. తర్వాత ఒక గరిటె పిండిని తీసుకుని పలుచగా దోశలా పరిచి.. చుట్టూ కొద్దిగా నూనె వేయాలి. దోశ కింద భాగం బంగారు రంగులోకి మారి, అంచులు క్రిస్పీగా కనిపించినప్పుడు తిప్పి మరోవైపు కూడా కాల్చుకోవాలి. అంతే.. వేడి వేడి అన్నం దోశలు రెడీ.
Also Read : ఆనియన్ సమోసా రెసిపీ.. ఇంట్లోనే క్రిస్పీగా, టేస్టీగా ఇలా చేసుకోండి
సమయం తక్కువగా ఉంటే పిండిని ఎక్కువసేపు ఫెర్మెంట్ చేయకుండా కూడా దోశలు వేసుకోవచ్చు. అయితే ఫెర్మెంట్ చేసిన పిండితో వచ్చే రుచి, టెక్స్చర్ కొంత భిన్నంగా ఉంటుంది. ఫెర్మెంట్ చేసినప్పుడు దోశలు మరింత మెత్తగా రావడంతో పాటు కాస్త పుల్లటి రుచితో టేస్టీగా వస్తాయి.
ఈ దోశలను మీరు కొబ్బరి చట్నీ, పల్లీ చట్నీ, అల్లం చట్నీ లేదా టమాటా చట్నీతో ఆస్వాదిస్తే రుచి రెట్టింపు అవుతుంది. స్పైసీగా ఇష్టపడేవారు కారం చట్నీతో కూడా ట్రై చేయొచ్చు. అయితే మిగిలిన అన్నం వాడేప్పుడు అది పాడైనది కాకుండా చూసుకోవాలి. ఫ్రెష్గా ఉండే అన్నాన్నే దోశల కోసం ఉపయోగించాలి.
మిగిలిన అన్నం ఉంటే చిత్రాన్నం, ఫ్రైడ్ రైస్, పులిహోర తాళింపు వేసుకుని కూడా చేసుకోవచ్చు. కానీ ఉదయాన్నే అన్నం తినాలని లేనప్పుడు.. అలాగే అన్నం మిగిలిపోయిన సందర్భాల్లో అన్నం పడేయకుండా ఉపయోగించుకునేందుకు ఈ దోశలు బెస్ట్ ఆప్షన్. కాబట్టి మీరు కూడా ఇంట్లో ఈ దోశలు ట్రై చేసేయండి.
Also Read : బెల్లం పాకంతో కొబ్బరి లడ్డూలు.. ఆంధ్రా స్టైల్‌లో ఇలా చేస్తే రుచి అదిరిపోతుంది