Fermented Rice for Breakfast : చద్దన్నం గురించి పెద్దలకు బాగా తెలుసు. ఈ రోజుల్లో కొందరికి తెలియకపోవచ్చు. మరికొందరు తెలిసినా తినడానికి ఆలోచిస్తారు. కానీ ఒకసారి దీనిని తినడం వల్ల వచ్చే ఆరోగ్య ప్రయోజనాలు తెలిస్తే.. తప్పకుండా దానిని డైట్లో చేర్చుకుంటారు. ఉదయాన్నే చద్దన్నం తినడం వల్ల కలిగే ప్రయోజనాలు ఏంటో.. దానిని ఎలా చేసుకుని తింటే మంచిదో ఇప్పుడు చూసేద్దాం.
చద్దన్నాన్ని ఫెర్మెంటెడ్ రైస్ అంటారు. అంటే అన్నాన్ని పులియబెట్టడం అనమాట. ఇది పేగు ఆరోగ్యాన్ని మెరుగుపరచడం నుంచి.. శక్తి స్థాయిలను రెట్టింపు చేయడం వరకు ఎన్నో ప్రయోజనాలు ఇస్తుంది. ట్రెండీ డైట్స్ కంటే ఇది ఎంతో సహజమైన ప్రోబయోటిక్ ఆహారంగా చెప్పవచ్చు. తక్కువ ఖర్చుతో తేలికగా ఇంట్లో తయారు చేసుకునే ఈ వంటకం ప్రయోజనాలు తెలుసుకుందాం.
గట్ హెల్త్..
చద్దన్నం పేగు ఆరోగ్యం, జీర్ణక్రియకు సహజ బూస్టర్గా పనిచేస్తుంది. రాత్రంతా నీటిలో నానబెట్టిన అన్నంలో లాక్టిక్ యాసిడ్ బ్యాక్టీరియా పెరుగుతుంది. ఇవి సహజమైన ప్రోబయోటిక్స్గా పనిచేస్తాయి. ఇది గట్ ఫ్లోరాను సమతుల్యం చేసి.. కడుపు ఉబ్బరం, ఎసిడిటీ, మలబద్ధకం తగ్గిస్తాయి. పోషకాలు శరీరంలో బాగా గ్రహించేందుకు సహాయపడతాయి.
వేడి నుంచి ఉపశమనం..
ఆయుర్వేదం ప్రకారం ఇది శరీరంలోని అంతర్గత వేడిని తగ్గిస్తుంది. వేసవికాలంలో అలసట, సన్స్ట్రోక్, చర్మ సమస్యలు నివారించడంలో హెల్ప్ చేస్తుంది. చల్లని పెరుగును ఉల్లిపాయలు, మజ్జిగతో తింటే ఇంకా మంచి ఫలితం ఉంటుంది.
రోగనిరోధక శక్తికై..
మన గట్ ఆరోగ్యం బాగుంటే రోగనిరోధక శక్తి కూడా బలంగా ఉంటుంది. ఫెర్మెంటెడ్ రైస్లోని ప్రోబయోటిక్స్ మంచిబ్యాక్టీరియా వృద్ధికి దోహదపడతాయి. దీనివల్ల వైరల్ ఇన్ఫెక్షన్లు తగ్గుతాయి. ఇన్ఫ్లమేషన్ దూరమై.. వాపులు దరిచేరవు. సీజనల్ మార్పులు జరిగినా ఇబ్బంది ఉండదు.
పోషకాల కోసం..
ఫెర్మెంటేషన్ ప్రక్రియ వల్ల అన్నంలో ఉన్న ఫిటిక్ యాసిడ్ తగ్గుతుంది. దీంతో ఐరన్, కాల్షియం, మ్యాగ్నీషియం వంటి ఖనిజాలు శరీరానికి సులభంగా అందుతాయి. రక్తహీనత ఉన్నవారికి మేలు జరుగుతుంది. తక్కువ ఎనర్జీ సమస్య ఉన్నవారికి ఇది బెస్ట్ ఆప్షన్.
స్కిన్ హెల్త్
చద్దన్నం శరీరంలో ఉన్న టాక్సిన్స్ను బయటకు పంపడంలో సహాయపడుతుంది. గట్ బ్యాలెన్స్ మెరుగుపడటంతో చర్మం కాంతివంతంగా మారుతుంది. కొన్ని ప్రాంతాల్లో రాత్రి నానబెట్టిన గంజి నీటితో ముఖం కడుక్కోవడానికి కూడా ఉపయోగిస్తారు. ఇది స్కిన్ హెల్త్ని బాగా ప్రమోట్ చేస్తుంది.
చద్దన్నం తయారీ
ముందుగా అన్నాన్ని ఒక గిన్నెలో వేసుకోవాలి. దానిలో తగినంత నీరు పోయాలి. రాత్రంతా నానబెట్టాలి (మట్టి లేదా గాజు పాత్రలో ఉంచితే మంచిది). ఉదయం ఉప్పు, ఆవాలు, ఉల్లిపాయలు, కరివేపాకు తాలింపు వేసుకోవచ్చు. పెరుగు కలిపి తింటే రుచిగా ఉంటుంది. అన్నం నానబెట్టిన నీరు కూడా తాగవచ్చు. అయితే కొందరు పెరుగును పలుచగా చేసి.. నీటికి బదులు ఉపయోగిస్తారు. అది కూడా మంచిదే.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.