Flaxseeds for Diabetes : మధుమేహాన్ని నియంత్రించడంలో అవిసె గింజలు చేసే బెనిఫిట్స్ ఇవే.. రోజుకు ఎంత తింటే మంచిది?

Quitting Job in Midlife : 35 ఏళ్లు దాటాక జాబ్ మానేయాలనుకుంటున్నారా? అయితే ఈ విషయాలు ఆలోచించకపోతే భారీ నష్టం తప్పదు

Geddam Vijaya Madhuri — Tue, 7 Jul 2026 06:30:02 +0530

Things to Consider Before Leaving Your Job : ఈ రోజుల్లో చాలామంది 35 నుంచి 50 ఏళ్ల మధ్యలో ఉద్యోగాన్ని వదిలేయాలని ఆలోచిస్తున్నారు. దానికి కారణాలు కూడా లేకపోలేదు. అధిక పని ఒత్తిడి, మానసిక అలసట, తక్కువ జీతం, కెరీర్‌లో ఎదుగుదల లేకపోవడం, కుటుంబానికి సమయం కేటాయించాలనే కోరిక లేదా సొంత వ్యాపారం చేయాలనే ఆసక్తి వంటివి ప్రధాన కారణాలుగా ఉంటున్నాయి. అయితే ఎమోషనల్గా జాబ్ మానేయడం ఎప్పుడూ మంచిది కాదు.

ఎందుకంటే ఈ నిర్ణయం మిమ్మల్నే కాదు.. మీ ఫ్యామిలీని కూడా ఎఫెక్ట్ చేస్తుంది. ఆర్థికంగా, వ్యక్తిగతంగా ఇబ్బందులకు గురి అయ్యేలా చేస్తుంది. అందుకే ఉద్యోగం మానేసే ముందు కొన్ని విషయాలను కచ్చితంగా ఆలోచించుకోవాలి అంటున్నారు ఎక్స్పర్ట్స్. మరి జాబ్ మానేయాలనుకున్నప్పుడు ఏ విషయాలు ఆలోచించి.. నిర్ణయం తీసుకోవాలో ఇప్పుడు చూసేద్దాం.

ఎమర్జెన్సీ ఫండ్..

ఉద్యోగం వదిలిన వెంటనే మరో సంపాదన వచ్చేస్తుందని భావించడం తప్పు. కొన్ని సందర్భాల్లో కొత్త ఉద్యోగం దొరకడానికి లేదా బిజినెస్ నిలదొక్కుకోవడానికి సమయం పడుతుంది. అందుకే కనీసం 6 నుంచి 12 నెలల వరకు మీరు, మీ ఫ్యామిలీ ఇబ్బంది పడకుండా.. ఖర్చులకు సరిపడా ఎమర్జెన్సీ ఫండ్ ముందుగానే సిద్ధం చేసుకోవాలి.

Also Read : 'వర్క్ ముఖ్యమే.. కానీ ఆరోగ్యం అంతకంటే ముఖ్యం' ICU నుంచి ఓ CEO ఆవేదన.. జాబ్ చేసే ప్రతి ఒక్కరూ చదవాల్సిన పోస్ట్

కొత్త ఆదాయంపై క్లారిటీ..

ఉద్యోగం వదిలిన తర్వాత మీరు ఏం చేయబోతున్నారనే క్లారిటీ, స్పష్టమైన ప్రణాళిక ఉండాలి. మరో ఉద్యోగం చేస్తారా? ఫ్రీలాన్సింగ్, కన్సల్టింగ్ లేదా వ్యాపారం.. ఇలా ఏదైనా సరే, ఆదాయం ఎలా వస్తుందో ముందుగానే నిర్ణయించుకోవాలి. ముందు జాబ్ వదిలేసి.. తర్వాత ఆలోచించాలి అనే ఆలోచన చాలా ప్రమాదకరం.

అప్పులు ఉన్నాయా?

జాబ్ చేసే చాలామందికి ఉండే ప్రధాన సమస్య లోన్. హోమ్ లోన్, కార్ లోన్, పర్సనల్ లోన్ లేదా క్రెడిట్ కార్డ్ బకాయిలు ఉంటే ఉద్యోగం మానేయడం ముందు ఒకటికి రెండుసార్లు ఆలోచించుకోవాలి. ఎందుకంటే నెలవారీ ఈఎంఐలు చెల్లించగలిగే పరిస్థితి ఉందో లేదో అంచనా వేయాలి. లేకుంటే ఇబ్బంది పడతారు.

కుటుంబ బాధ్యతలు

పిల్లల చదువు, తల్లిదండ్రుల వైద్య ఖర్చులు, ఇంటి నిర్వహణ వంటి బాధ్యతలు మీపై ఉంటే వాటిని దృష్టిలో పెట్టుకుని నిర్ణయం తీసుకోవాలి. కుటుంబ సభ్యులతో మాట్లాడకుండా.. జాబ్ మానేయాలనే నిర్ణయం ఒక్కరే తీసుకోవడం మంచిది కాదు.

హెల్త్ ఇన్సూరెన్స్

చాలా కంపెనీలు ఉద్యోగులకు ఆరోగ్య బీమాను అందిస్తాయి. అయితే ఉద్యోగం మానేస్తే తర్వాత అవి పనిచేయవు. కాబట్టి వ్యక్తిగత హెల్త్ ఇన్సూరెన్స్ తీసుకోవడం మంచిది. కుదరితే టర్మ్ ఇన్సూరెన్స్ కూడా తీసుకోండి. ఈ రెండూ అత్యవసర పరిస్థితుల్లో చాలా హెల్ప్ అవుతాయి.

కొత్త స్కిల్స్

ప్రస్తుత జాబ్ మార్కెట్ వేగంగా మారుతోంది. రోజుకో స్కిల్ తెరపైకి వచ్చి సత్తా చాటుతున్నాయి. ఈ క్రమంలో మీ రంగానికి సంబంధించిన కొత్త స్కిల్స్, డిజిటల్ టూల్స్ లేదా సర్టిఫికేషన్లు పూర్తి చేస్తే కొత్త అవకాశాలు పొందడం సులభమవుతుంది.

Also Read : జాబ్ రావాలంటే ఇంటర్వ్యూకు వెళ్లే ముందు ఈ తప్పులు చేయకండి.. సక్సెస్ కావచ్చు

ఎమోషనల్గా ఉన్నప్పుడు జాగ్రత్త

మీ మూడ్ బాలేక లేదా బాస్‌తో గొడవ లేదా పని ఒత్తిడి కారణంగా వెంటనే రాజీనామా చేసే ఆలోచన ఎప్పుడూ మంచిది కాదు. కొన్ని రోజులు ఆలోచించి.. పరిస్థితిని విశ్లేషించి నిర్ణయం తీసుకోవడం మంచిది.

ఆలోచించాల్సిన మరిన్ని విషయాలు..

ఉద్యోగం వదిలేస్తే ఫ్యూచర్ కోసం చేస్తున్న పొదుపులు తగ్గవచ్చు. పీఎఫ్, పెట్టుబడులు, రిటైర్మెంట్ ప్లానింగ్‌పై ఎఫెక్ట్ ఉంటుంది. అలాగే జాబ్ మానేసిన కొన్ని నెలలు లేదా సంవత్సరాల తర్వాత మళ్లీ ఉద్యోగం చేయాలనుకుంటే కెరీర్ గ్యాప్ గురించి ఇంటర్వ్యూల్లో అడిగే అవకాశం ఉంది. ఆ సమయంలో చెప్పే సమాధానంపై కూడా క్లారిటీ ఉండాలి.

మిడిల్ ఏజ్‌లో ఉద్యోగం మానేయడం తప్పు కాదు. కానీ అది క్షణిక ఆవేశంలో తీసుకునే నిర్ణయం కాకూడదు. ఉద్యోగం మానేయడానికి బదులుగా అదే కంపెనీలో మరో విభాగానికి మారడం, వర్క్ ఫ్రం హోమ్, ఫ్లెక్సిబుల్ అవర్స్ లేదా సబ్బాటికల్ లీవ్ వంటి అవకాశాలు ఉన్నాయో తెలుసుకోవడం మంచిది. సరైన ప్రణాళిక ఉంటే జాబ్ మానేసినా.. మానేయకున్నా ఇబ్బంది పడాల్సిన అవసరం రాదు.

Also Read : జాబ్ మానేయాలనుకుంటున్న వారి సంఖ్య పెరుగుతోందా? ఉద్యోగుల రాజీనామాల వెనుక అసలు కారణాలు ఇవే

Cumin Water : జీర్ణ సమస్యలకు చెక్ పెట్టాలంటే జీలకర్ర డ్రింక్ ట్రై చేయండి.. ఉదయాన్నే తాగితే ఎన్నో లాభాలు

Geddam Vijaya Madhuri — Tue, 7 Jul 2026 05:30:00 +0530

Drinking Cumin Water Every Morning : అసిడిటీ, అజీర్తి, కడుపు ఉబ్బరం వంటి జీర్ణ సమస్యలతో ఇబ్బంది పడుతున్నారా? అయితే వీటికి అనారోగ్యకరమైన ఆహారం, భోజన సమయం, ఒత్తిడి వంటి కారణాలు ప్రధానంగా ఉంటాయి. మీరు ఈ సమస్యలతో ఇబ్బంది పడుతుంటే కచ్చితంగా మీ డైట్లో జీలకర్ర (Cumin)ను చేర్చుకోవాలని ఆయుర్వేద నిపుణులు చెప్తున్నారు. ఇది జీర్ణ ఆరోగ్యానికి మేలు చేస్తుందని.. ముఖ్యంగా ఉదయాన్నే జీలకర్రతో చేసిన డ్రింక్‌ను తీసుకుంటే జీర్ణక్రియకు మద్దతు లభిస్తుందని అంటున్నారు.

జీలకర్ర డ్రింక్ కోసం కావాల్సిన పదార్థాలు

జీలకర్ర - 1 టీ స్పూన్

నీరు - 1 గ్లాస్

నిమ్మరసం - 1 టీ స్పూన్

తేనె - 1 టీ స్పూన్

తయారీ విధానం

ముందురోజు రాత్రి ఒక గ్లాస్ నీటిలో జీలకర్రను నానబెట్టాలి. మరుసటి రోజు ఉదయం అదే నీటిని 5 నుంచి 10 నిమిషాలు మరిగించి వడగట్టాలి. గోరువెచ్చగా అయిన తర్వాత కొద్దిగా నిమ్మరసం లేదా తేనె కలిపి తాగవచ్చు. జీలకర్రను నానబెట్టకున్నా.. మరిగించి కూడా తీసుకోవచ్చు. దీనిని ఉదయాన్నే తాగడం వల్ల ఆరోగ్యానికి కలిగే లాభాలు ఏంటో చూసేద్దాం.

Also Read : ఉదయాన్నే నానబెట్టిన బాదం తింటే ఆరోగ్యానికి, అందానికి కలిగే లాభాలు ఏంటి? రోజుకు ఎన్ని తినాలి?

అసిడిటీ దూరం

జీలకర్ర జీర్ణరసాల ఉత్పత్తిని ప్రోత్సహించడంలో సహాయపడుతుంది. కాబట్టి అజీర్తి, అసిడిటీ, కడుపులో మంట వంటి సమస్యలు కొంతవరకు తగ్గే అవకాశం ఉంది.

మెరుగైన జీర్ణక్రియ

జీలకర్రలో ఉండే సహజ సమ్మేళనాలు ఆహారం సులభంగా జీర్ణం కావడానికి తోడ్పడతాయి. కడుపు ఉబ్బరం, గ్యాస్ వంటి సమస్యల నుంచి ఉపశమనం కలిగించడంలో ఉపయోగపడవచ్చు.

మెటబాలిజం కోసం..

కొన్ని అధ్యయనాల ప్రకారం.. జీలకర్ర జీవక్రియను మెరుగుపరచడంలో కొంత పాత్ర పోషించవచ్చు. సమతుల్య ఆహారం, వ్యాయామంతో కలిపి తీసుకుంటే బరువు నియంత్రణకు కూడా సహాయపడవచ్చు.

Also Read : ఉదయాన్నే ఖాళీ కడుపుతో ధనియాల నీరు తాగితే కలిగే లాభాలు.. బాడీ డీటాక్స్ నుంచి బరువు తగ్గడం వరకు

యాంటీఆక్సిడెంట్లు

జీలకర్రలో యాంటీఆక్సిడెంట్లు ఉంటాయి. ఇవి శరీరంలోని కణాలను ఆక్సిడేటివ్ స్ట్రెస్ నుంచి రక్షించడంలో సహాయపడతాయి.

రోగనిరోధక శక్తికి మద్దతు

జీలకర్రలో ఐరన్‌తో పాటు కొన్ని విటమిన్లు, ఖనిజాలు ఉంటాయి. ఇవి రోగనిరోధక వ్యవస్థ పనితీరుకు మేలు చేసి.. సీజనల్ వ్యాధులు రాకుండా అదుపులో ఉంచుతాయి.

షుగర్ కంట్రోల్..

కొన్ని పరిశోధనల్లో జీలకర్ర రక్తంలో చక్కెర స్థాయిల నియంత్రణకు కొంత సహాయపడవచ్చని సూచించినప్పటికీ.. దీనిపై మరిన్ని పరిశోధనలు అవసరం. కానీ డయాబెటిస్ ఉన్నవారు కూడా తాగవచ్చు. అలా అని మందులకు బదులుగా దీనిని తాగకూడదు.

హైడ్రేషన్

ఉదయాన్నే గోరువెచ్చని జీలకర్ర నీరు తాగడం వల్ల శరీరానికి హైడ్రేషన్ అందడంతో పాటు రోజును తాజాగా ప్రారంభించేందుకు సహాయపడుతుంది.

తీసుకోవాల్సిన జాగ్రత్తలు

జీలకర్ర డ్రింక్ ఆరోగ్యానికి మంచిదే అయినా కొన్ని జాగ్రత్తలు కచ్చితంగా తీసుకోవాలి. లో బీపీ ఉన్నవారు జీలకర్ర డ్రింక్ తీసుకునే ముందు వైద్యుడిని సంప్రదించాలి. గర్భిణులు లేదా పాలిచ్చే తల్లులు, మధుమేహం ఉన్నవారు వైద్యుల సలహా తీసుకుని దీనిని రొటీన్లో చేర్చుకోవాలి.

మార్నింగ్ రొటీన్ సెట్ చేసుకోవడానికి, ఉదయాన్నే హెల్తీగా ప్రారంభించడానికి ఈ టిప్స్ ఫాలో అవ్వండి.

గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.

Bedtime Foods : మంచి నిద్రకు బెస్ట్ ఫుడ్స్ ఇవే.. పడుకునే ముందు ఏం తినాలో, ఎంత తింటే మంచిదో తెలుసా?

Geddam Vijaya Madhuri — Mon, 6 Jul 2026 20:18:35 +0530

Sleep Friendly Foods : నిద్రలేమి ప్రస్తుతం చాలా మందిని వేధిస్తున్న సమస్యల్లో ఒకటి. ఒత్తిడి, అనారోగ్యకరమైన ఆహారం, మొబైల్ వినియోగం, అసమయ జీవనశైలి వంటి కారణాలతో చాలామందికి రాత్రిళ్లు సరిగా నిద్ర పట్టడం లేదు. అయితే కొన్ని పోషకాలు అధికంగా ఉండే ఆహారాలను రోజువారీ డైట్‌లో చేర్చుకోవడం వల్ల మంచి నిద్ర మీ సొంతం కావచ్చని పోషకాహార నిపుణులు చెప్తున్నారు.

మెగ్నీషియం, ట్రిప్టోఫాన్, మెలటోనిన్, కాల్షియం వంటి పోషకాలు ఉండే ఆహారాలు నిద్ర నాణ్యతను మెరుగుపరచడంలో సహాయపడతాయి. వీటిని కలిగి ఉన్న ఆహారాలు ఏంటో.. వాటిని తింటే ఎలాంటి ఫలితాలు చూడవచ్చో ఇప్పుడు తెలుసుకుందాం.

పాలు

పడుకునే ముందు గోరువెచ్చని పాలు తాగితే నిద్ర బాగా పడుతుందని చాలామంది నమ్ముతారు. దీనిని పోషకాహార నిపుణులు కూడా సిఫార్సు చేస్తారు. ఎందుకంటే ఇందులో ట్రిప్టోఫాన్ అనే అమైనో ఆమ్లం, కాల్షియం ఉంటాయి. ఇవి మెలటోనిన్, సెరోటోనిన్ హార్మోన్ల ఉత్పత్తికి తోడ్పడి శరీరాన్ని రిలాక్స్ చేయడంలో సహాయపడవచ్చు. పడుకునే 30 నుంచి 60 నిమిషాల ముందు ఒక గ్లాస్ గోరువెచ్చని పాలు తాగడం మంచిది.

Also Read : రాత్రిళ్లు ఆలస్యంగా నిద్రపోతున్నారా? గుండె, మెదడు, ఇమ్యూనిటీపై పడే ప్రభావాలు ఇవే

అరటిపండు

అరటిపండులో మెగ్నీషియం, పొటాషియం సమృద్ధిగా ఉంటాయి. ఇవి కండరాలను రిలాక్స్ చేయడంలో సహాయపడతాయి. అలాగే ట్రిప్టోఫాన్ కూడా ఉండటం వల్ల మంచి నిద్రకు మద్దతు లభిస్తుంది. రాత్రి భోజనం తర్వాత లేదా పడుకునే ముందు ఒక చిన్న అరటిపండు తినవచ్చు.

బాదం

బాదంలో మెగ్నీషియం, ఆరోగ్యకరమైన కొవ్వులు, ప్రోటీన్ పుష్కలంగా ఉంటాయి. మెగ్నీషియం నరాలు, కండరాలను ప్రశాంతంగా ఉంచి నిద్ర నాణ్యతను మెరుగుపరచడంలో సహాయపడవచ్చు. రోజుకు 5 నుంచి 8 బాదంపప్పులు తింటే సరిపోతుంది.

కివీ

కివీ పండులో విటమిన్ సి, ఫోలేట్, యాంటీఆక్సిడెంట్లు అధికంగా ఉంటాయి. కొన్ని పరిశోధనల ప్రకారం కివీని క్రమం తప్పకుండా తీసుకోవడం వల్ల నిద్ర పట్టే సమయం తగ్గి, నిద్ర నాణ్యత మెరుగుపడే అవకాశం ఉంది. పడుకునే గంట ముందు ఒకటి లేదా రెండు కివీ పండ్లు తినవచ్చు.

Also Read : మంచి నిద్రతో పాటు మానసిక ఆరోగ్యం కూడా కావాలా? అయితే రాత్రుళ్లు చేయాల్సిన పనులు ఇవే

ఓట్స్

ఓట్స్‌లో కాంప్లెక్స్ కార్బోహైడ్రేట్లు, మెగ్నీషియం, మెలటోనిన్ ఉత్పత్తికి సహాయపడే పోషకాలు ఉంటాయి. ఇవి శరీరాన్ని ప్రశాంతంగా ఉంచి నిద్రకు అనుకూలమైన పరిస్థితులను కల్పించడంలో సహాయపడతాయి. తేలికపాటి డిన్నర్‌లో భాగంగా ఓట్స్‌ను చేర్చుకోవచ్చు.

ఈ ఫుడ్స్ డైట్లో చేర్చుకోవడమే కాకుండా.. ప్రతిరోజూ ఒకే సమయానికి నిద్రపోవడం, లేవడం అలవాటు చేసుకోవాలని నిపుణులు చెప్తున్నారు. అలాగే పడుకునే గంట ముందు మొబైల్, ల్యాప్‌టాప్ వంటి స్క్రీన్‌లకు దూరంగా ఉండాలని సూచిస్తున్నారు. పడుకునే ముందు టీ, కాఫీలు, ఎనర్జీ డ్రింక్స్ తీసుకోవడం తగ్గించాలంటున్నారు. అలాగే రాత్రి భోజనం త్వరగా ముగించుకోవాలని.. బెడ్ రూమ్ చీకటిగా, ప్రశాంతంగా ఉండేలా చూసుకోవాలంటున్నారు.

నిద్ర సమస్యలు, నిద్ర త్వరగా రావడానికి ఫాలో అవ్వాల్సిన చిట్కాల కోసం దీనిని క్లిక్ చేయండి.

Jaggery and Roasted Chana : ఉదయాన్నే బెల్లం, వేయించిన శనగలు తింటే కలిగే లాభాలు ఇవే.. మధుమేహం ఉన్నవాళ్లు కూడా తినొచ్చు

Geddam Vijaya Madhuri — Mon, 6 Jul 2026 18:40:28 +0530

Jaggery and Roasted Chana : ఉదయాన్నే బెల్లం, వేయించిన శనగలు తింటే కలిగే లాభాలు ఇవే.. మధుమేహం ఉన్నవాళ్లు కూడా తినొచ్చు

Dahi Vankaya Recipe : వంకాయ, పెరుగుతో టేస్టీ రెసిపీ.. ఒకసారి తింటే మళ్లీ మళ్లీ చేసుకోవాలనిపించే టేస్టీ, ఈజీ కూడా

Geddam Vijaya Madhuri — Mon, 6 Jul 2026 13:26:15 +0530

Creamy Curd Brinjal Recipe : వంకాయను చాలామంది ఇష్టంగా తింటారు. చాలా రకాలుగా దాని రుచిని ఆస్వాదిస్తారు. అయితే ఈ మధ్యకాలంలో సోషల్ మీడియోలో దహీ వంకాయ రెసిపీ బాగా వైరల్ అవుతుంది. రొటీన్ వంకాయ కూరలు తిని బోర్ కొట్టిన వారు.. కచ్చితంగా ట్రై చేయాల్సిన రెసిపీ ఇది. పెరుగులో రుచి, క్రీమీ లుక్, మసాలాల సువాసన, బంగారు రంగులో వేయించిన వంకాయల కలయిక ఈ వంటకానికి ప్రత్యేకమైన రుచిని ఇస్తుంది. చపాతీ, పుల్కా, జీరా రైస్ లేదా అన్నంతో కూడా ఇది అద్భుతంగా ఉంటుంది. మరి దీన్ని ఎలా తయారు చేసుకోవాలో.. కావాల్సిన పదార్థాలు ఏంటో చూసేద్దాం.

కావాల్సిన పదార్థాలు

వంకాయల కోసం

వంకాయలు - 2 పెద్దవి (గుండ్రంగా ముక్కలుగా కట్ చేసుకోవాలి)

పసుపు - అర టీస్పూన్

కారం - 1 టీస్పూన్

ఉప్పు - తగినంత

నూనె - 1 టేబుల్ స్పూన్ (వంకాయ ఫ్రై చేయడానికి)

పెరుగు మిశ్రమం కోసం

చిక్కటి పెరుగు - ఒకటిన్నర నుంచి 2 కప్పులు

ఉప్పు - తగినంత

జీలకర్ర పొడి - పావు టీస్పూన్

కారం - కొద్దిగా

గరం మసాలా - చిటికెడు

తాలింపు కోసం

నూనె - 1 టీస్పూన్

జీలకర్ర - అర టీస్పూన్

పచ్చిమిర్చి - 2 (చీల్చినవి)

కరివేపాకు - కొద్దిగా

కొత్తిమీర - కొద్దిగా

తయారీ విధానం

ముందుగా ఒక గిన్నెలో పసుపు, కారం, ఉప్పు, నూనె వేసి బాగా కలపాలి. తర్వాత వంకాయలను బాగా కడిగి.. పుచ్చులు ఉన్నాయేమో చెక్ చేసుకోవాలి. వంకాయలను గుండ్రంగా కట్ చేసి పెట్టుకోవాలి. ఇప్పుడు మిశ్రమాన్ని వంకాయ ముక్కలకు రెండు వైపులా బాగా పట్టించి 10 నుంచి 15 నిమిషాలు అలా ఉంచండి.

తర్వాత పాన్‌లో కొద్దిగా నూనె వేసి వేడి చేయాలి. అందులో వంకాయ ముక్కలను పేర్చి.. రెండు వైపులా బంగారు రంగు వచ్చే వరకు.. మెత్తగా అయ్యే వరకు ఫ్రై చేసి తీసి పక్కన పెట్టాలి. ఇలా మొత్తం వంకాయ ముక్కలను ఫ్రై చేసి పెట్టుకోవాలి. ఇప్పుడు మరో గిన్నెలో చిక్కటి పెరుగు తీసుకుని అందులో ఉప్పు, వేయించిన జీలకర్ర పొడి, కారం, గరం మసాలా వేసి బాగా గిలక్కొట్టాలి. సర్వింగ్ ప్లేట్‌లో ముందుగా వేయించిన వంకాయ ముక్కలను అమర్చి.. వాటిపై పెరుగు మిశ్రమాన్ని సమంగా పోయాలి.

చివరగా చిన్న పాన్‌లో నూనె వేడి చేసి జీలకర్ర, పచ్చిమిర్చి, కరివేపాకు వేసి తాలింపు తయారు చేయాలి. ఈ వేడి తాలింపును పెరుగు వేసిన వంకాయలపై పోయాలి. చివరిగా కొత్తమీర వేసి గార్నిష్ చేసుకోవాలి. క్రీమీగా, పుల్లటి రుచితో, మసాలాల సువాసనతో నోరూరించే దహీ వంకాయ రెడీ. వేడి వేడి రొట్టెలు, చపాతీలు లేదా అన్నంతో సర్వ్ చేస్తే మరింత రుచిగా ఉంటుంది.

మరిన్ని టేస్టీ, హెల్తీ రెసిపీల కోసం దీనిని క్లిక్ చేయండి.

Beetroot Juice : వారం రోజులు బీట్‌రూట్ జ్యూస్ తాగితే శరీరంలో జరిగే మార్పులు ఇవే.. ఎవరు తాగకూడదో తెలుసా?

Geddam Vijaya Madhuri — Mon, 6 Jul 2026 12:10:47 +0530

Beetroot Juice : వారం రోజులు బీట్‌రూట్ జ్యూస్ తాగితే శరీరంలో జరిగే మార్పులు ఇవే.. ఎవరు తాగకూడదో తెలుసా?

Conjunctivitis : కండ్లకలక ఎందుకు వస్తుంది? లక్షణాలు, తీసుకోవాల్సిన జాగ్రత్తలు, ఇంటి చిట్కాలు, చికిత్స ఇవే

Geddam Vijaya Madhuri — Mon, 6 Jul 2026 09:21:49 +0530

Conjunctivitis Causes and Symptoms : వర్షాకాలంలో కండ్లకలక కేసులు ఎక్కువగా కనిపిస్తుంటాయి. కంటి తెల్లటి భాగాన్ని కప్పి ఉండే పలుచని పొర వాపునకు గురికావడం వల్ల వచ్చే సమస్య ఇది. వైరస్, బ్యాక్టీరియా, అలెర్జీ లేదా కొన్ని రకాల రసాయనాల వల్ల ఇది రావచ్చు. చాలామందిలో ఇది చిన్న సమస్యగానే ఉన్నప్పటికీ.. సరైన జాగ్రత్తలు తీసుకోకపోతే ఇతరులకు కూడా వ్యాపించే అవకాశం ఉంటుంది. మరి దీనికి కారణాలు, తీసుకోవాల్సిన జాగ్రత్తలు ఏంటో చూసేద్దాం.

కండ్లకలకకు ప్రధాన కారణాలు

కండ్లకలకకు అత్యంత సాధారణ కారకం వైరస్. జలుబు, దగ్గు వంటి వైరల్ ఇన్ఫెక్షన్లతో పాటు ఇది కూడా వచ్చే అవకాశం ఉంటుంది. వైరల్ కండ్లకలక చాలా అంటువ్యాధి. అలాగే బ్యాక్టీరియా వల్ల కూడా కండ్లకలక వస్తుంది. ఈ సమయంలో కళ్ల నుంచి పసుపు లేదా ఆకుపచ్చ రంగులో చిక్కటి స్రావం రావచ్చు. దుమ్ము, పుప్పొడి, పెంపుడు జంతువుల వెంట్రుకలు లేదా కొన్ని కాస్మెటిక్ ఉత్పత్తుల వల్ల అలెర్జీతో కండ్లకలక రావచ్చు. ఇది ఒకరి నుంచి మరొకరికి వ్యాపించదు.

Also Read : వేసవి నుంచి వర్షాకాలం మారే సమయంలో ఎక్కువగా వచ్చే సీజనల్ వ్యాధులు.. తీసుకోవాల్సిన జాగ్రత్తలు ఇవే

చేతులను శుభ్రం చేయకుండా తరచూ కళ్లను రుద్దడం వల్ల క్రిములు కంట్లోకి చేరి ఇన్ఫెక్షన్ వచ్చే అవకాశం పెరుగుతుంది. శుభ్రం కాని నీరు, తువ్వాళ్లు, దిండు కవర్లు, మేకప్ వస్తువులు లేదా కాంటాక్ట్ లెన్స్‌లను సరిగా శుభ్రం చేయకపోవడం కూడా కారణమవుతుంది.

కండ్లకలక లక్షణాలు

కండ్లకలక వస్తే కళ్లు ఎర్రగా మారతాయి. కళ్లలో దురద లేదా మంటగా ఉండటం, కళ్ల నుంచి నీరు కారడం, కంటి నుంచి చిక్కటి స్రావం రావడం, ఉదయం లేచినప్పుడు కనురెప్పలు అతుక్కుపోవడం, వెలుతురు చూస్తే ఇబ్బందిగా అనిపించడం, కంట్లో ఇసుక పడినట్లుగా అసౌకర్యంగా అనిపించడం వంటి లక్షణాలు కనిపిస్తాయి.

ఇంట్లో తీసుకోవాల్సిన జాగ్రత్తలు

కండ్లకలక వస్తే చేతులను తరచూ సబ్బుతో కడుక్కోవాలి. అలాగే కళ్లను చేతులతో నులుముకూడదు. ఉపయోగించిన తువ్వాలు, రుమాలు, దిండు ఇతరులతో పంచుకోకూడదు. కంటి నుంచే వచ్చే స్రావాన్ని శుభ్రమైన టిష్యూ లేదా కాటన్‌తో తుడిచి వెంటనే పారేయాలి. బయట నుంచి ఇంటికి వచ్చిన తర్వాత చేతులు శుభ్రంగా కడుక్కోవాలి.

Also Read : వర్షాకాలంలో దోమల బెడదను తగ్గించేందుకు ఇంట్లో ఇలా చేయండి.. బెస్ట్ హోమ్ టిప్స్ ఇవే

కాంటాక్ట్ లెన్స్‌లు వాడేవారు పూర్తిగా కోలుకునే వరకు వాటిని ఉపయోగించకూడదు. అలాగే కంటి మేకప్‌ను తాత్కాలికంగా నిలిపివేయాలి. ఇప్పటికే ఉపయోగించిన మేకప్ ఉత్పత్తులను తిరిగి వాడకపోవడం మంచిది. కళ్లకు విశ్రాంతి ఇవ్వాలి. మొబైల్, కంప్యూటర్ వినియోగాన్ని తగ్గించాలి.

ఇంట్లో ఫాలో అవ్వాల్సిన చిట్కాలు

శుభ్రమైన గుడ్డను చల్లటి నీటిలో ముంచి కళ్లపై కొన్ని నిమిషాలు ఉంచితే మంట, వాపు కొంత తగ్గవచ్చు. తగినంత నీరు తాగి శరీరాన్ని హైడ్రేట్‌గా ఉంచుకోవాలి. పోషకాహారం, విటమిన్ ఎ, సి ఉన్న ఆహారాలను తీసుకోవాలి. కళ్లను ఎప్పుడూ శుభ్రంగా ఉంచుకోవాలి.

కండ్లకలకకు చికిత్స

వైరల్ కండ్లకలక అయితే కొన్ని రోజులు నుంచి రెండు వారాల్లో తగ్గిపోతుంది. ఈ సమయంలో పరిశుభ్రత, కంటి సంరక్షణ చాలా ముఖ్యం. బ్యాక్టీరియా వల్ల కండ్లకలక వస్తే వైద్యుడు సూచించిన యాంటీబయాటిక్ ఐ డ్రాప్స్ లేదా ఆయింట్‌మెంట్ అవసరం కావచ్చు. అలెర్జీకి కారణమైన వాటికి దూరంగా ఉండాలి. అవసరమైతే వైద్యుడు సూచించిన యాంటీ-అలెర్జిక్ ఐ డ్రాప్స్ ఉపయోగించాలి. డాక్టర్ సలహా లేకుండా యాంటీబయాటిక్ లేదా స్టెరాయిడ్ ఐ డ్రాప్స్‌ను వాడకూడదు.

వైద్యుడిని ఎప్పుడు సంప్రదించాలంటే..

కండ్లకలక వచ్చినప్పుడు కొన్ని లక్షణాలు గుర్తిస్తే వెంటనే వైద్య సహాయం తీసుకోవాలి. తీవ్రమైన కంటి నొప్పి, చూపు మసకబారడం లేదా తగ్గిపోవడం, వెలుతురు చూడలేకపోవడం, ఎక్కువగా చీము లేదా రక్తస్రావం రావడం, రెండు వారాలకిపైగా లక్షణాలు కొనసాగడం, కాంటాక్ట్ లెన్స్‌లు వాడేవారిలో ఇన్ఫెక్షన్ రావడం గుర్తిస్తే వెంటనే వైద్య సహాయం తీసుకోవాలి.

Also Read : రొటీన్కు భిన్నంగా వైద్యులు సూచిస్తోన్న 5 రక్త పరీక్షలు.. వీటితో వ్యాధులు ముందుగానే గుర్తించవచ్చా?

Vegetables In Monsoon : వర్షాకాలంలో తాజా కూరగాయలు ఎలా కొనాలి? ఉల్లిపాయ, వంకాయ వంటివి కొనేటప్పుడు ఈ టిప్స్ ఫాలో అవ్వండి

Geddam Vijaya Madhuri — Mon, 6 Jul 2026 08:13:58 +0530

Spot Fresh Vegetables During the Monsoon : వర్షాకాలంలో తేమ ఎక్కువగా ఉంటుంది. దీనివల్ల కూరగాయలు బూజు, బ్యాక్టీరియా, కీటకాల బారిన పడే అవకాశం ఎక్కువగా ఉంటుంది. దీంతో అవి త్వరగా పాడైపోతాయి. అలాగే కొన్ని కూరగాయలు బయట చూడటానికి చాలా బాగున్నట్లు కనిపించినా.. లోపల మాత్రం కుళ్లిపోయి ఉంటాయి. అందుకే వర్షాకాలంలో కూరగాయలు కొనేప్పుడు కొన్ని చిట్కాలు ఫాలో అవ్వాలి.

కూరగాయలు కొనేటప్పుడు ఏవి తాజాగా ఉన్నాయో.. ఏవి పాడవుతున్నాయో తెలుసుకునేందుకు కొన్ని టిప్స్ ఫాలో అవ్వాలి. వర్షాకాలంలో ముందుగా కుళ్లిపోయే కూరగాయలు ఏంటో.. వాటిని కొనేటప్పుడు తీసుకోవాల్సిన జాగ్రత్తలు ఏంటో చూసేద్దాం.

వంకాయలు..

వర్షాకాలంలో వంకాయలకు పురుగులు పట్టే అవకాశం ఎక్కువగా ఉంటుంది. అందువల్ల, కొనుగోలు చేసేటప్పుడు.. వాటికి రంధ్రాలు లేదా పగుళ్లు ఉన్నాయేమో జాగ్రత్తగా చెక్ చేసుకోవాలి. ఒకవేళ అలా ఉంటే.. వాటిని కొనవద్దు. వాటిలో పురుగులు అధికంగా ఉండవచ్చు.

సొరకాయ

సొరకాయలు కొనేటప్పుడు.. వాటి బరువును గమనించండి. అధిక బరువున్న సొరకాయలలో గింజలు ముదిరిపోయి ఉంటాయి. దీనివల్ల వాటి రుచి తగ్గిపోతుంది. తక్కువ బరువున్న సొరకాయలు తాజాగా ఉంటాయి. వాటి గింజలు మృదువుగా ఉండి.. రుచిగా ఉంటాయి.

ఉల్లిపాయలు

ఉల్లిపాయ కాడను నొక్కితే.. సులభంగా లోపలికి వెళితే లేదా మెత్తగా అనిపిస్తే.. ఆ ఉల్లిపాయ పాడైపోయి కుళ్లిపోతోందని అర్థం. ఉల్లిపాయలను ఒకేసారి ఎక్కువగా తీసుకుంటారు కాబట్టి.. కొనే ముందు వాటిని తప్పకుండా పరిశీలించి తీసుకోవాలి.

బెండకాయ

బెండకాయ కొనే ముందు.. దాని కొనను మెల్లగా విరిచి చూడండి. అది సులభంగా విరిగితే తాజాగా ఉన్నట్లు. తాజా బెండకాయ పచ్చగా, కరకరలాడుతూ ఉంటుంది. ఒకవేళ దాని కొన సులభంగా విరగకుండా కేవలం వంగితే, అది పాడైపోయినట్లు, అలాంటిది కొనకూడదు.

ఆకుకూరలు

పాలకూర, మెంతి వంటి ఆకు కూరలు వర్షాకాలంలో తేమను నిలుపుకుంటాయి. దీనివల్ల అవి బ్యాక్టీరియా, క్రిములు వృద్ధి చెందడానికి అనువుగా మారతాయి. వాటిని శుభ్రపరచడం కూడా కష్టమే అవుతుంది. మీరు వాటిని తినాలనుకుంటే.. ఉపయోగించే ముందు వాటిని శుభ్రంగా కడిగి.. కొన్ని నిమిషాల పాటు వేడి నీటిలో ఉడకబెట్టి తీసుకోవాల్సి ఉంటుంది.

మష్రూమ్స్..

పుట్టగొడుగులు తేమతో కూడిన వాతావరణంలో బాగా పెరుగుతాయి. అయితే వర్షాకాలంలో శిలీంధ్రాల సంక్రమణ ప్రమాదం పెరుగుతుంది. కొన్ని రకాల పుట్టగొడుగులు విషపూరితమైనవి కావచ్చు. కాబట్టి ఈ సీజన్లో పుట్టగొడుగులను కొనుగోలు చేసేటప్పుడు, తినేటప్పుడు ప్రత్యేక శ్రద్ధ తీసుకోవాలి.

వర్షాకాలంలో కూరగాయలకు సులభంగా బూజు, బ్యాక్టీరియా, కీటకాలు పట్టవచ్చు. పాడైన లేదా పురుగులు పట్టిన కూరగాయలను తినడం వల్ల జీర్ణ సమస్యలు, ఇన్ఫెక్షన్ల ప్రమాదం పెరగవచ్చు. అందుకే వర్షాకాలంలో ఎల్లప్పుడూ తాజా కూరగాయలను ఎంచుకోవాల్సి ఉంటుంది. అలాగే వాటిని ఉపయోగించే ముందు పూర్తిగా శుభ్రం చేసి ఉడికించి తీసుకుంటే ఆరోగ్యానికి మంచిది.

Alos Read : పొట్ట (Belly Fat), బరువును తగ్గించడంలో హెల్ప్ చేసే 7 రకాల జ్యూస్లు ఇవే.. ఆరోగ్యానికి కూడా చాలా మంచివి

No Hair Oil for 30 Days : 30 రోజుల పాటు తలకు నూనె పెట్టకపోతే ఏమవుతుంది? జుట్టుకు మంచిదేనా? కాదా?

Geddam Vijaya Madhuri — Sun, 5 Jul 2026 23:21:50 +0530

No Hair Oil for 30 Days : 30 రోజుల పాటు తలకు నూనె పెట్టకపోతే ఏమవుతుంది? జుట్టుకు మంచిదేనా? కాదా?

Flaxseeds for Diabetes : మధుమేహాన్ని నియంత్రించడంలో అవిసె గింజలు చేసే బెనిఫిట్స్ ఇవే.. రోజుకు ఎంత తింటే మంచిది?

Geddam Vijaya Madhuri — Sun, 5 Jul 2026 22:56:17 +0530

Flaxseeds for Diabetes : మధుమేహాన్ని నియంత్రించడంలో అవిసె గింజలు చేసే బెనిఫిట్స్ ఇవే.. రోజుకు ఎంత తింటే మంచిది?

Flaxseeds for Diabetes : మధుమేహాన్ని నియంత్రించడంలో అవిసె గింజలు చేసే బెనిఫిట్స్ ఇవే.. రోజుకు ఎంత తింటే మంచిది?

Quitting Job in Midlife : 35 ఏళ్లు దాటాక జాబ్ మానేయాలనుకుంటున్నారా? అయితే ఈ విషయాలు ఆలోచించకపోతే భారీ నష్టం తప్పదు

ఎమర్జెన్సీ ఫండ్..

కొత్త ఆదాయంపై క్లారిటీ..

అప్పులు ఉన్నాయా?

కుటుంబ బాధ్యతలు

హెల్త్ ఇన్సూరెన్స్

కొత్త స్కిల్స్

ఎమోషనల్​గా ఉన్నప్పుడు జాగ్రత్త

ఆలోచించాల్సిన మరిన్ని విషయాలు..

Cumin Water : జీర్ణ సమస్యలకు చెక్ పెట్టాలంటే జీలకర్ర డ్రింక్ ట్రై చేయండి.. ఉదయాన్నే తాగితే ఎన్నో లాభాలు

జీలకర్ర డ్రింక్ కోసం కావాల్సిన పదార్థాలు

తయారీ విధానం

అసిడిటీ దూరం

మెరుగైన జీర్ణక్రియ

మెటబాలిజం కోసం..

యాంటీఆక్సిడెంట్లు

రోగనిరోధక శక్తికి మద్దతు

షుగర్ కంట్రోల్..

హైడ్రేషన్

తీసుకోవాల్సిన జాగ్రత్తలు

Bedtime Foods : మంచి నిద్రకు బెస్ట్ ఫుడ్స్ ఇవే.. పడుకునే ముందు ఏం తినాలో, ఎంత తింటే మంచిదో తెలుసా?

పాలు

అరటిపండు

బాదం

కివీ

ఓట్స్

Jaggery and Roasted Chana : ఉదయాన్నే బెల్లం, వేయించిన శనగలు తింటే కలిగే లాభాలు ఇవే.. మధుమేహం ఉన్నవాళ్లు కూడా తినొచ్చు

Dahi Vankaya Recipe : వంకాయ, పెరుగుతో టేస్టీ రెసిపీ.. ఒకసారి తింటే మళ్లీ మళ్లీ చేసుకోవాలనిపించే టేస్టీ, ఈజీ కూడా

కావాల్సిన పదార్థాలు

పెరుగు మిశ్రమం కోసం

తాలింపు కోసం

తయారీ విధానం

Beetroot Juice : వారం రోజులు బీట్‌రూట్ జ్యూస్ తాగితే శరీరంలో జరిగే మార్పులు ఇవే.. ఎవరు తాగకూడదో తెలుసా?

Conjunctivitis : కండ్లకలక ఎందుకు వస్తుంది? లక్షణాలు, తీసుకోవాల్సిన జాగ్రత్తలు, ఇంటి చిట్కాలు, చికిత్స ఇవే

కండ్లకలకకు ప్రధాన కారణాలు

కండ్లకలక లక్షణాలు

ఇంట్లో తీసుకోవాల్సిన జాగ్రత్తలు

ఇంట్లో ఫాలో అవ్వాల్సిన చిట్కాలు

కండ్లకలకకు చికిత్స

వైద్యుడిని ఎప్పుడు సంప్రదించాలంటే..

Vegetables In Monsoon : వర్షాకాలంలో తాజా కూరగాయలు ఎలా కొనాలి? ఉల్లిపాయ, వంకాయ వంటివి కొనేటప్పుడు ఈ టిప్స్ ఫాలో అవ్వండి

వంకాయలు..

సొరకాయ

ఉల్లిపాయలు

బెండకాయ

ఆకుకూరలు

మష్రూమ్స్..

No Hair Oil for 30 Days : 30 రోజుల పాటు తలకు నూనె పెట్టకపోతే ఏమవుతుంది? జుట్టుకు మంచిదేనా? కాదా?

Flaxseeds for Diabetes : మధుమేహాన్ని నియంత్రించడంలో అవిసె గింజలు చేసే బెనిఫిట్స్ ఇవే.. రోజుకు ఎంత తింటే మంచిది?

ఎమోషనల్గా ఉన్నప్పుడు జాగ్రత్త