Cooking Without Gas Useful Alternatives : దేశంలోని చాలా ప్రాంతాల్లో ఎల్పీజీ సరఫరాపై ఆందోళన పెరుగుతోంది. గ్యాస్ లభ్యత ప్రభావితమైతే, సామాన్యుల నుంచి రెస్టారెంట్లు, హోటళ్ల వరకు చాలా మంది ఇబ్బందులు పడాల్సి వస్తుంది. ముఖ్యంగా పెద్ద నగరాల్లో.. ఎక్కడైతే రోజువారీ పనుల్లో ఎల్పీజీపై ఎక్కువ ఆధారపడతారో.. అక్కడ ఈ పరిస్థితి ఆందోళనకరంగా మారుతుంది. ఇలాంటి పరిస్థితుల్లో.. గ్యాస్ అయిపోతే.. వంట చేయడానికి ఇండక్షన్ మాత్రమే ఏకైక మార్గమని చాలా మంది భావిస్తారు. కానీ ఇది అవసరం లేకుండానే వివిధ మార్గాల్లో వంట చేసుకునే ఏర్పాట్లు చేసుకోవచ్చు. అందుకే ఈ సమయంలో గ్యాస్ కొరత గురించిన చర్చతో పాటు.. ప్రత్యామ్నాయ మార్గాల గురించి కూడా తెలుసుకోవాల్సి ఉంది. కాబట్టి గ్యాస్ లేనప్పుడు.. ఇండక్షన్ మాత్రమే కాకుండా.. మరెలా వంట చేసుకోవచ్చో చూసేద్దాం.
ఎలక్ట్రిక్ కెటిల్
ఎలక్ట్రిక్ కెటిల్ కేవలం నీరు మరిగించడానికి మాత్రమే కాదు.. అనేక చిన్న చిన్న పనులకు కూడా ఉపయోగపడుతుంది. ఇందులో నూడుల్స్, గుడ్లు, సూప్, ఓట్స్ వంటి తేలికపాటి ఆహారాలను త్వరగా తయారు చేసుకోవచ్చు. గ్యాస్ లేని పరిస్థితిలో ఇది వేగవంతమైన, సులభమైన ఎంపికగా మారుతుంది.మైక్రోవేవ్ ఓవెన్
మైక్రోవేవ్ కూడా వంట చేయడానికి, వంటను వేడి చేయడానికి మంచి మార్గం. ఇందులో కూరగాయలు, అన్నం, పాస్తా లేదా రెడీ టు ఈట్ ఫుడ్ సులభంగా తయారు చేసుకోవచ్చు. చాలా మంది మైక్రోవేవ్లో ఆవిరి వంట లేదా బేకింగ్ ద్వారా కూడా వంట చేస్తారు.
ఎలక్ట్రిక్ రైస్ కుక్కర్
రైస్ కుక్కర్ కేవలం అన్నం వండటానికి మాత్రమే కాదు. ఇందులో పప్పు, కిచిడి, సూప్, కొన్ని కూరగాయలు కూడా ఉడికించవచ్చు. గ్యాస్ అయిపోయినప్పుడు.. ఈ పరికరం చాలా ఉపయోగపడుతుంది. ఎందుకంటే ఇందులో వంట చేయడం సులభం. వేగంగా చేసుకోవచ్చు.
బొగ్గు లేదా చెక్క పొయ్యి
చాలా చోట్ల గ్యాస్ లేని పరిస్థితిలో బొగ్గు లేదా చెక్క పొయ్యిని కూడా ఉపయోగిస్తారు. ముఖ్యంగా హోటళ్లు, ధాబాలలో ఈ పద్ధతిని ముందే ఉపయోగిస్తున్నారు. అయితే దీనికి బహిరంగ ప్రదేశం అవసరం.
సోలార్ స్టవ్
సోలార్ స్టవ్ కూడా వంట చేయడానికి ఒక మంచి ఎంపిక కావచ్చు. ఈ స్టవ్ లో సూర్యరశ్మిని ఉపయోగించి వంట చేయవచ్చు. సోలార్ స్టవ్ సోలార్ ప్లేట్ నుంచి వచ్చే శక్తి ద్వారా పనిచేస్తుంది. పొయ్యిని వంటగదిలో ఉంచవచ్చు. కేబుల్ ద్వారా ఇది పైకప్పుపై ఉన్న సోలార్ ప్యానెల్కు అనుసంధానమై ఉంటుంది. ఒకసారి దీన్ని ఏర్పాటు చేసిన తర్వాత.. గ్యాస్ లేకుండా కూడా వంట చేయవచ్చు.