Software engineering will be completely obsolete in 12 months: ఆర్టిఫిషియల్ ఇంటెలిజెన్స్ రంగంలో అగ్రగామి సంస్థ అయిన ఆంత్రోపిక్ సీఈఓ డారియో అమోడీ చేసిన తాజా వ్యాఖ్యలు టెక్ ప్రపంచంలో పెను సంచలనం సృష్టిస్తున్నాయి. రాబోయే 6 నుంచి 12 నెలల్లో సాఫ్ట్వేర్ ఇంజనీరింగ్ రంగం తన ఉనికిని కోల్పోతుందని, ప్రస్తుతం మనం చూస్తున్న కోడింగ్ పద్ధతులు పూర్తిగా కనుమరుగవుతాయని ఆయన ప్రకటించారు. ఏఐ మోడల్స్ అభివృద్ధి చెందుతున్న వేగాన్ని బట్టి చూస్తే, మనుషులు చేసే సంక్లిష్టమైన కోడింగ్ను ఏఐ వ్యవస్థలే స్వయంగా పూర్తి చేస్తాయని ఆయన జోస్యం చెప్పారు.
ఓపెన్ ఏఐ నుంచి వచ్చిన వారు పెట్టిన కంపెని ఆంత్రోపిక్
ఓపెన్ ఏఐ నుంచి బయటకు వచ్చిన కీలక సభ్యులు స్థాపించిన ఆంత్రోపిక్ సంస్థ, ప్రస్తుతం క్లాడ్ వంటి శక్తివంతమైన ఏఐ మోడళ్లను రూపొందిస్తోంది. తమ సంస్థలోని ఇంజనీర్లు ఇప్పుడు సొంతంగా కోడ్ రాయడం మానేశారని, కేవలం ఏఐ రూపొందించిన కోడ్ను సరిచూడటానికే పరిమితమయ్యారని అమోడీ వెల్లడించారు. గూగుల్, అమెజాన్ వంటి దిగ్గజ సంస్థల నుంచి బిలియన్ల కొద్దీ పెట్టుబడులను ఆకర్షిస్తున్న ఈ సంస్థ వ్యాఖ్యలను టెక్ విశ్లేషకులు చాలా సీరియస్గా పరిగణిస్తున్నారు.
సాఫ్ట్ వేర్ ఉద్యోగుల భవిష్యత్పై ఆందోళన
సాఫ్ట్వేర్ ఉద్యోగాల భవిష్యత్తుపై తీవ్ర ఆందోళన నెలకొంది. ప్రత్యేకించి ప్రాథమిక స్థాయి కోడర్లు , టెస్టింగ్, డాక్యుమెంటేషన్ విభాగాల్లో పనిచేసే వారికి ముప్పు పొంచి ఉందని నిపుణులు అభిప్రాయపడుతున్నారు. గతంలో పదుల సంఖ్యలో ఇంజనీర్లు కలిసి చేసే ప్రాజెక్టును, భవిష్యత్తులో ఒక్క ఇంజనీర్ ఏఐ సహాయంతో పూర్తి చేసే అవకాశం ఉంది. దీనివల్ల ఐటీ కంపెనీల్లో మానవ వనరుల అవసరం గణనీయంగా తగ్గే ప్రమాదం కనిపిస్తోంది.
మార్పుగా చూస్తేనే ఉద్యోగాలు నిలబడతాయి!
టెక్ నిపుణులు ఈ మార్పును అంతం గా కాకుండా పరిణామ క్రమం గా అభివర్ణిస్తున్నారు. సాఫ్ట్వేర్ ఇంజనీరింగ్ పూర్తిగా పోదని, దాని రూపం మారుతుందని వారు విశ్లేషిస్తున్నారు. భవిష్యత్తులో ఇంజనీర్లు కోడ్ రాసే లేబర్ లా కాకుండా, ఏఐని నడిపించే ఆర్కెస్ట్రేటర్ లా ఏఐ ప్రాంప్ట్ ఇంజినీర్లా వ్యవహరించాల్సి ఉంటుందని చెబుతున్నారు. అంటే, కేవలం ప్రోగ్రామింగ్ లాంగ్వేజ్ నేర్చుకున్న వారి కంటే, సమస్యలను లోతుగా విశ్లేషించే వారికి మాత్రమే డిమాండ్ ఉంటుంది.
సాఫ్ట్ వేర్ ఉద్యోగులు మారాల్సిన సమయం
ఈ విప్లవాత్మక మార్పుకు అనుగుణంగా సాఫ్ట్వేర్ నిపుణులు తమను తాము మలచుకోవాల్సిన సమయం ఆసన్నమైందని విశ్లేషణలు వినిపిస్తున్నాయి. కేవలం రొటీన్ కోడింగ్పై ఆధారపడకుండా, ఏఐ టూల్స్ను సమర్థవంతంగా వినియోగించుకోవడం , కొత్త నైపుణ్యాలను నిరంతరం నేర్చుకోవడం ద్వారానే ఈ రంగంలో నిలదొక్కుకోగలరని నిపుణులు సూచిస్తున్నారు. టెక్నాలజీ మారుతున్న వేగంతో పోటీ పడలేని పక్షంలో, వృత్తిపరమైన సవాళ్లు ఎదురవ్వడం తప్పదని హెచ్చరిస్తున్నారు.