Oscars 2026 : ఆస్కార్ అవార్డ్స్‌లో ఆ మూవీకి సిక్సర్ - బెస్ట్ విన్నింగ్ మూవీస్ ఏ ఓటీటీలో చూడొచ్చంటే?

Oscar Awards 2026 OTT : ఆస్కార్ అవార్డుల్లో ఒకే మూవీకి ఆరు అవార్డులు వరించాయి. 13 కేటగిరీల్లో నామినేషన్ సాధించగా 6 అవార్డులు దక్కించుకుంది. విన్నింగ్ మూవీస్ ఏ ఓటీటీలో చూడొచ్చంటే...

ఆస్కార్ అవార్డ్స్ విన్నింగ్ మూవీస్ ఓటీటీ లిస్ట్

Source : https://x.com/TheAcademy/status/2033371825233895555/photo/1

Oscar Awards 2026 Winning Movies OTT Streaming : ఆస్కార్ 2026 వేడుకల్లో ఒకే మూవీ సిక్సర్ కొట్టింది. ఒకటి కాదు రెండు కాదు ఏకంగా ఆరు ఆస్కార్ అవార్డులు సొంతం చేసుకుంది 'వన్ బ్యాటిల్ ఆఫ్టర్ అనదర్'. ఉత్తమ చిత్రం, ఉత్తమ దర్శకుడు, సహాయ నటుడు, ఉత్తమ కాస్టింగ్, అడాప్టెడ్ స్క్రీన్‌ప్లే, ఎడిటింగ్ విభాగాల్లో పురస్కారం వరించింది. ఆ తర్వాత నాలుగు పురస్కారాలతో 'సిన్నర్స్' మూవీ సెకండ్ ప్లేస్‌లో నిలిచింది. ఉత్తమ నటుడు, బెస్ట్ స్క్రీన్ ప్లే, బెస్ట్ సినిమాటోగ్రఫీ, బెస్ట్ ఒరిజినల్ స్కోర్ కేటగిరీల్లో ఆస్కార్ అవార్డు అందుకుంది సిన్నర్స్.

ఆస్కార్ సిక్సర్... వన్ బ్యాటిల్ ఆఫ్టర్ అనదర్

ఓ బిడ్డ కోసం తండ్రి చేసిన పోరాటం, తల్లి మీద కోపం, తండ్రి మీద అనుమానంతో ఎటూ తేల్చుకోలేని స్థితిలో ఉన్న కొడుకు ఏం చేశాడు? తన కొడుకు నమ్మకాని గెలుచుకునేందుకు తండ్రి ఏం చేశాడు? విప్లవం, పగ, స్వార్థం, అవమానం, అనుమానం, ప్రేమ, నమ్మకం, మానవ సంబంధాలు, నైతిక విలువలు ఇలా అన్ని కలగలిసిన ఓ బ్లాక్ కామెడీ యాక్షన్ థ్రిల్లర్‌గా 'వన్ బ్యాటిల్ ఆఫ్టర్ అనదర్' మూవీని రూపొందించారు.

బిడ్డ నమ్మకాన్ని గెలుచుకునేందుకు ఓ తండ్రి పడే తనను హార్ట్ టచింగ్‌గా చూపించారు డైరెక్టర్ పాల్ థామస్ అండర్సన్. ఈ మూవీలో లియోనార్డో డికాప్రియో, టియానా టేలర్ ప్రధాన పాత్రలు పోషించారు. 2000 నాటి వైన్ లాండ్ నోవల్ ఆధారంగా ఈ మూవీని తెరకెక్కించారు. మొత్తం 13 విభాగాల్లో నామినేషన్లలో నిలిచింది. ప్రస్తుతం ఈ సినిమా జియో హాట్ స్టార్ సహా అమెజాన్ ప్రైమ్ వీడియోలో అందుబాటులో ఉంది.

4 అవార్డుల 'సిన్నర్స్'

ర్యాన్ కూగ్లర్ దర్శకత్వం వహించిన పీరియాడికల్ యాక్షన్ హారర్ మూవీ 'సిన్నర్స్'. ఈ మూవీలో మైఖేల్ బి జోర్డాన్ ప్రధాన పాత్ర పోషించారు. మొత్తం 16 విభాగాల్లో ఈ మూవీ నామినేషన్స్ దక్కించుకోగా... 4 అవార్డులు సొంతం చేసుకుంది. 1932 నేపథ్యంలో సాగే స్టోరీ ఇది. ఇద్దరు స్నేహితులు మాఫియా కోసం పని చేసి డబ్బులు సంపాదించి తమ వారి కోసం ఓ బార్ పెడతారు. ఓ రోజు అనుకోకుండా వీరి బార్‌పై జాంబీల అటాక్ జరుగుతుంది. వారి నుంచి వీరి గ్యాంగ్‌ను ఎలా తప్పించారనేదే మూవీ. ఈ సినిమా  ప్రస్తుతం 'జియో హాట్ స్టార్'లో స్ట్రీమింగ్ అవుతోంది.

వెపన్స్ - హాలీవుడ్ హారర్ థ్రిల్లర్ మూవీ వెపన్స్. ఉత్తమ సహాయ నటి విభాగంలో (ఎమీ మాడిగన్) అవార్డు దక్కించుకుంది. దాదాపు రూ.2,400 కోట్లు కలెక్ట్ చేసిన ఈ మూవీ అమెజాన్ ప్రైమ్ వీడియో, జియో హాట్ స్టార్ ఓటీటీల్లో అందుబాటులో ఉంది. జాక్ క్రెగ్గర్ ఈ సినిమాకు దర్శకత్వం వహించారు. గ్రామంలో ఓ రోజు రాత్రి పూట 17 మంది చిన్నారుల అదృశ్యం వెనుక ఉన్న మిస్టరీ నేపథ్యంగా ఈ మూవీ సాగుతుంది.

• వీటితో పాటే ఫ్రాంకెన్ స్టీన్ - నెట్ ఫ్లిక్స్
• F1 - యాపిల్ టీవీ ప్లస్
• కెపాప్ డిమాన్ హంటర్స్ - నెట్ ఫ్లిక్స్
• సెంటిమెంటల్ వాల్యూ - అమెజాన్ ప్రైమ్ వీడియో (రెంటల్ బేస్), యాపిల్ టీవీ ప్లస్.

 

మరిన్ని చదవండి

మధుబాల బయోపిక్‌లో సాయి పల్లవి? - మరో బాలీవుడ్ మూవీకి గ్రీన్ సిగ్నల్!