movie-review

Summer Holidays Review - 'సమ్మర్ హాలిడేస్' రివ్యూ: పిల్లల సినిమా... పెద్దలు చూడొచ్చా?

Satya Pulagam — Fri, 6 Nov 2026 15:37:07 +0530

Summer Holidays Movie Telugu Review: బాల నటుడు రోహన్ రాయ్, అరుణ్ ప్రధాన పాత్రల్లో రూపొందిన సినిమా 'సమ్మర్ హాలిడేస్'. సహజనటి జయసుధ, రాజీవ్ కనకాల, హర్షవర్ధన్, వాసుకి, హర్షిణి కోడూరు కీలక పాత్రలు పోషించారు. ఈ చిత్రానికి శ్రీకర్ దర్శకుడు. ధీరజ్ మొగిలినేని నిర్మాత. నవంబర్ 6న విడుదలైన ఈ సినిమా ఎలా ఉంది?

కథ (Summer Holidays Movie Story): ఆర్వీ... రావూరి వెంకటేష్ (అరుణ్ దేవ్)కు క్రికెట్ అంటే ఇష్టం. టాప్ ర్యాంక్ వస్తే... క్రికెట్ కిట్ కొంటానని తండ్రి (హర్షవర్ధన్) చెబుతాడు. అయితే ఆర్వీకి పదో ర్యాంక్ వస్తుంది. చదువు విషయంలో ఆర్వీని ప్రెజర్ పెడతాడు తండ్రి. అబ్బాయి పడుతున్న ఇబ్బంది చూసి వేసవి సెలవుల్లో అతడిని అమ్మమ్మ (జయసుధ) గారింటికి తీసుకు వెళుతుంది ఆర్వీ తల్లి జానకి (వాసుకి).

అమ్మమ్మ గారి ఊరిలో ఆర్వీకి కేవీ... కాశీ వెంకటేశ్వర్లు (రోహన్ రాయ్) పరిచయం అవుతాడు. ఆర్వీ అమ్మమ్మ ఇంటిలో కేవీ తల్లి పనిమనిషిగా పని చేస్తుంది. పెద్ద చిన్న తేడాలు లేకుండా ఇద్దరూ కలిసిపోతారు. ప్రాణ స్నేహితులుగా మారతారు. కేవీ కథ తెలిసి అతనికి ఆర్వీ ఎటువంటి సాయం చేశాడు? వర్మ (రాజీవ్ కనకాల) మామిడి తోటలో ఏం జరిగింది? ఆర్వీ, కేవీ జీవితాలు ఎటువంటి మలుపులు తీసుకున్నాయి? అనేది సినిమా చూసి తెలుసుకోవాలి.

విశ్లేషణ (Summer Holidays Review Telugu): ఇప్పుడు సమ్మర్ హాలిడేస్ వస్తే... పిల్లల్ని కోచింగ్ సెంటర్లలో జాయిన్ చేస్తున్నారు. సెలవులు ఉండటం లేదు. పిల్లలకు స్కూళ్ళు సెలవులు ఇచ్చినా తల్లిదండ్రులు ఇవ్వడం లేదు. చదువు సంధ్యలు అంటూ ఏదో ఒకటి నేర్పించే ప్రయత్నం చేస్తున్నారు. అందువల్ల, చిన్నారులు ఎంత ఒత్తిడి ఎదుర్కొంటున్నారు? అనేది చెప్పే సినిమా 'సమ్మర్ హాలిడేస్'. పల్లెటూళ్ళల్లో పిల్లలకు ఉన్న కష్టాలు ఏమిటి? అనేది కూడా చాలా విపులంగా చెబుతుంది.

Also Read: Suriya Scene Review - 'సీన్' రివ్యూ: సూర్య హ్యాట్రిక్ కొడతారా? మలయాళ దర్శకుడితో క్రైమ్ కామెడీ... సినిమా ఎలా ఉందంటే?

'సమ్మర్ హాలిడేస్'తో 90s కిడ్స్ చిన్ననాటి జ్ఞాపకాలను వెండితెరపై మరోసారి ఆవిష్కరించారు. అప్పట్లో పిల్లలు ఎలా ఉండేవాళ్ళు? పిల్లలకు తల్లిదండ్రులు ఏం నేర్పించాలి? అనే సందేశం ఇచ్చింది. మామిడి తోటల్లో ఆటలు, కాలువల్లో ఈతలు, స్నేహితులతో సరదా కబుర్లు... నోస్టాల్జియా మూమెంట్స్ చాలా ఉన్నాయి. ముఖ్యంగా 90s కిడ్స్ అందరికీ తమ బాల్యాన్ని గుర్తు చేసే చిత్రమిది. అయితే... కథనం నెమ్మదిగా సాగుతుంది. పైగా పల్లెటూళ్ళకు వెళ్ళని వాళ్ళకు కనెక్ట్ అయ్యే అంశాలు తక్కువ.

కథగా చూస్తే 'సమ్మర్ హాలిడేస్'లో పెద్దగా కొత్తదనం కనిపించదు. రెగ్యులర్ అండ్ ప్రిడిక్టబుల్ ఫార్మాట్‌లో సాగుతుంది. అయితే... పిల్లలు ఇద్దరి మధ్య సన్నివేశాలు ఆకట్టుకుంటాయి. ముఖ్యంగా తల్లి ఎమోషన్ కనెక్ట్ అయ్యేలా ఉంది. సినిమాటిక్ లిబర్టీ చాలా తీసుకున్నారు దర్శకుడు. అందువల్ల ఒక్కోసారి కొన్ని సన్నివేశాలు బావున్నా ఫోర్డ్స్‌గా వచ్చినట్టు అనిపిస్తాయి.

సింజిత్ యర్రమిల్లి పాటల కంటే నేపథ్య సంగీతం సన్నివేశాలను ఎలివేట్ చేసింది. సాయి ప్రకాష్ కెమెరా వర్క్, సంతోష్ నాయుడు ఎడిటింగ్, ధీరజ్ మొగిలినేని నిర్మాణ విలువలు కథకు తగ్గట్టు ఉన్నాయి. దర్శకుడు శ్రీకర్ చక్కటి కథ ఎంచుకున్నప్పటికీ... నోస్టాల్జియా అంశాలను బాగా చూపించారు. అయితే, స్టార్టింగ్ టు ఎండింగ్ ఎంగేజ్ చేయడంలో కొంత తడబడ్డారు.

Also Read: Ramayana Review Telugu - 'రామాయణ' రివ్యూ: వెండితెరపై అద్భుతం జరిగిందా? లేదా? ఇతిహాసాన్ని ఎలా తీశారు?

కేవీ పాత్రలో రోహన్ రాయ్ ఆకట్టుకున్నాడు. తండ్రి లేకున్నా తల్లిని సంతోషంగా చూసుకోవడం కోసం అతను పడిన కష్టం కంటతడి పెట్టించేలా ఉంది. సహజమైన నటన, డైలాగ్ డెలివరీతో ఆకట్టుకున్నాడు. తండ్రికి భయపడే పిల్లాడిగా ఇంట్రోవర్ట్ పాత్రలో పరిచయమైన అరుణ్ దేవ్, ఆ తర్వాత కేవీ పరిచయంతో మారిన తీరును చక్కగా చూపించారు. రోహన్ - అరుణ్‌ కాంబినేషన్ సీన్స్ బావున్నాయి. వాళ్ళిద్దరి నటన కూడా.

సహజ నటి జయసుధ సినిమాకు బలంగా నిలిచారు. ఆ పాత్రకు అవసరమైన హుందాతనాన్ని, గౌరవాన్ని తన నటనతో తీసుకొచ్చారు. రాజీవ్ కనకాల తన పాత్రకు న్యాయం చేశారు. రోహన్ తల్లిగా హర్షిణి కోడూరు నటన చాలా అంటే చాలా సహజంగా ఉంది. ఆ పాత్రలో ఆమె జీవించారు. 'సమ్మర్ హాలిడేస్' తర్వాత హర్షిణికి మరిన్ని మదర్ రోల్స్ వచ్చే అవకాశం ఉంది. సెకండ్ హాఫ్‌లో రోహన్, హర్షిణి మధ్య ఎమోషనల్ సీన్లు ఆకట్టుకుంటాయి. పాత్ర పరిధి తక్కువైనా ఉన్నంతలో వాసుకి ఆకట్టుకున్నారు.

Summer Holidays Verdict: సిటీల్లో చిన్నారులు కాంక్రీట్ జంగిల్స్ మధ్య జీవిస్తున్నారు. సెలవుల్లో పల్లెటూరు వెళ్ళడం, ముఖ్యంగా అమ్మమ్మగారి ఇంటికి వెళ్ళడం వల్ల ఎటువంటి ప్రయోజనం ఉంటుందని చెప్పే చిత్రమిది. సింపుల్‌గా చెప్పాలంటే... 90s కిడ్స్‌కు 'సమ్మర్ హాలిడేస్' చిన్ననాటి జ్ఞాపకాలను గుర్తు చేసే మంచి ఫ్యామిలీ ఎంటర్‌టైనర్. రొటీన్ కథ, కథనం ఉన్నప్పటికీ... పిల్లలతో కలిసి పెద్దలు చూడదగ్గ సినిమా.

Also Read: Akka Web Series Review - కీర్తి సురేష్ 'అక్క' వెబ్ సిరీస్ రివ్యూ: నెట్‌ఫ్లిక్స్‌లో తెలుగులోనూ స్ట్రీమింగ్

Scene Review - 'సీన్' రివ్యూ: సూర్య హ్యాట్రిక్ కొడతారా? మలయాళ దర్శకుడితో క్రైమ్ కామెడీ... సినిమా ఎలా ఉందంటే?

Satya Pulagam — Fri, 6 Nov 2026 13:33:43 +0530

Suriya Scene Movie Telugu Review: 'కరుప్పు' (తెలుగులో 'వీరభద్రుడు')తో 2026లో కోలీవుడ్ స్టార్ సూర్య స్ట్రాంగ్ కమ్ బ్యాక్ ఇచ్చారు. 'విశ్వనాథ్ అండ్ సన్స్'తో మరో విజయం అందుకున్నారు. 'రోమాంచం', 'ఆవేశం' ఫేమ్ జీతూ మాధవన్ దర్శకత్వంలో నటించిన 'సీన్'తో ఇవాళ (నవంబర్ 6న) తమిళ, తెలుగు ప్రేక్షకుల ముందుకు వచ్చారు. ఇందులో నజ్రియా హీరోయిన్. నస్లీన్ కె గఫూర్ విలన్. ఇన్వెస్టిగేషన్ క్రైమ్ థ్రిల్లర్‌గా తెరకెక్కిన ఈ సినిమా ఎలా ఉంది? అనేది చూస్తే...

కథ (Scene Movie Story): ప్రేమ్ రాజ్ (సూర్య) డీఎస్పీ. ఎటువంటి కేసు అయినా సరే సాల్వ్ చేయగల నేర్పు ఆయన సొంతం. అయితే... ఉద్యోగానికి రాజీనామా చేస్తాడు. క్రైమ్ బ్రాంచ్ బాస్ స్టీఫెన్ (లాల్) యాక్సెప్ట్ చేయడు. చివరకు ఉద్యోగానికి రానని ప్రేమ్ రాజ్ వెళతాడు. అప్పుడు రెండు హత్యలు జరుగుతాయి. ప్రేమ్ రాజ్ అరెస్ట్ చేసిన సీరియల్ పెర్ఫ్యూమ్ కిల్లర్ విక్టర్ (టోవినో థామస్) చేసినట్లు ఆ రెండు హత్యలు జరుగుతాయి.

విక్టర్ జైల్లో ఉంటే ఆ రెండు హత్యలు చేసింది ఎవరు? ఆ హంతకుడిని సూర్య ఎలా పట్టుకున్నారు? అతనికి మాయ (నజ్రియా నజీమ్) ఎలా సాయం చేసింది? ఆమెతో పాటు పోలీసు శాఖలో కొంత మందికి ప్రేమ్ రాజ్ గురించి తెలిసిన సీక్రెట్ ఏమిటి? ఈశ్వరన్ (నస్లీన్ కె గఫూర్) ఎవరు? పట్టుమని పాతికేళ్ళు కూడా నిండని అతను ఏం చేశాడు? అనేది సినిమా చూసి తెలుసుకోవాలి.

విశ్లేషణ (Scene Movie Review Telugu): 'రోమాంచం' హారర్ కామెడీ అయితే... ఫహాద్ ఫాజిల్ 'ఆవేశం' యాక్షన్ కామెడీ. ఆ రెండింటిలోనూ దర్శక - రచయిత జీతూ మాధవన్ కామెడీ నవ్వించింది. ఇప్పుడు ఇన్వెస్టిగేషన్ క్రైమ్ కామెడీ 'సీన్' తీశారు. ఇందులో సూర్య హీరో కావడం, అందులోనూ ఈ ఏడాది రెండు విజయాలు అందుకోవడం వల్ల హ్యాట్రిక్ హిట్ వస్తుందా? లేదా? అని ఆయన అభిమానులు ఎదురు చూశారు.

దర్శక రచయితగా జీతూ మాధవన్ (Jithu Madhavan)కు ఓ స్టైల్ ఉంది. మరీ ముఖ్యంగా కామెడీ సీన్స్ చేయడంలో! 'సీన్'లోనూ ఆయన స్టైల్ ఆఫ్ కామెడీ బావుంది. సినిమా ప్రారంభం బావుంది. ఈశ్వరన్, ప్రేమ్ రాజ్ పాత్రలతో పాటు ఇంటర్వెల్ వరకు ఓ వైపు కథను, మరో వైపు కొత్త పాత్రలను పరిచయం చేస్తూ వెళ్ళారు. పార్టులు పార్టులుగా కొన్ని కొన్ని సన్నివేశాలు నవ్విస్తాయి. అయితే కథ కొంత నెమ్మదిగా ముందుకు వెళుతున్న ఫీలింగ్ కలుగుతుంది. ఇంటర్వెల్ ట్విస్ట్ అని చెప్పలేం కానీ... సెకండాఫ్‌లో హీరో వర్సెస్ విలన్ మధ్య ఇంటిలిజెంట్ ప్లే ఉంటుందని నమ్మకం కలిగించారు దర్శకుడు జీతూ మాధవన్. సెకండాఫ్‌లోనూ ఆయన మార్క్ కామెడీ, స్క్రీన్ ప్లే ఎంగేజ్ చేస్తుంది. అయితే... సాధారణంగా మలయాళ సినిమాల్లో కనిపించే డిటెయిలింగ్, సన్నివేశాల వల్ల నిదానంగా సాగుతుంది. ట్విస్టులు ఊహించడం పెద్ద కష్టం ఏమీ కాదు. కానీ, ప్రేక్షకులను ఎంగేజ్ చేశాయి. ఇంప్రెస్ చేస్తాయి. కమర్షియల్ ప్యాటర్న్ కంటే స్టైల్‌కు ఎక్కువ ఇంపార్టెన్స్ ఇచ్చారు.

టెక్నికల్ పరంగా 'సీన్' హై స్టాండర్డ్స్‌లో ఉన్నాయి. సినిమాటోగ్రఫీ బావుంది. ఓ స్టైలిష్ మూడ్ సెట్ చేసింది. మ్యూజిక్ పరంగా సన్నివేశాలకు అవసరమైన ఫీల్ తీసుకు వచ్చారు. సుషీన్ శ్యామ్ ఆర్ఆర్ పెప్పీగా సాగింది. సూర్య, జ్యోతిక నిర్మాణ విలువలు బావున్నాయి.

సూర్య స్టార్ మాత్రమే కాదు... ఫెంటాస్టిక్ యాక్టర్. ఎటువంటి క్యారెక్టర్‌లో అయినా సరే జీవించడం ఆయన స్టైల్. ప్రేమ్ రాజ్ పాత్రలోనూ తమ బెస్ట్ ఇచ్చారు. మరీ ముఖ్యంగా ఈ సినిమాలో ఓ ట్విస్ట్ ఉంది. తెరపై పాత్రలతో పాటు ప్రేక్షకులూ అది రివీల్ అయ్యే వరకు సన్నివేశాలను ఆసక్తిగా చూశారంటే... అందుకు సూర్య నటనే కారణం. స్టైలిష్, హ్యాండ్సమ్‌గా కనిపించారు. సినిమా అంతటా ఓ స్టార్ హీరో షార్ట్స్ ధరించి కనిపించడం బహుశా... ఇటీవల కాలంలో ఈ సినిమాలో జరిగిందని చెప్పవచ్చు.

హీరోయిన్ నజ్రియా స్క్రీన్ స్పేస్ తక్కువ. లేటుగా ఎంట్రీ ఇచ్చినా... ప్రేక్షకుల చూపు తిప్పుకోనివ్వకుండా చేశారు. సూర్య, నజ్రియా కెమిస్ట్రీ కంటే వాళ్ళిద్దరి మధ్య సన్నివేశాల్లో కామెడీ బాగా వర్కవుట్ అయ్యింది. 'ప్రేమలు', 'మాలీవుడ్‌ టైమ్స్'లో హీరోగా కనిపించిన నస్లీన్... ఈ సినిమాతో కొత్త రూట్ తీసుకున్నారు. నటుడిగా తనలో కొత్త యాంగిల్ చూపించారు. హీరో తండ్రిగా ఆనంద్ రాజ్... ఇంకా లాల్, ఎస్సైలుగా నటించిన ఇద్దరూ నవ్వించారు.

Scene Movie Verdict: 'వీరభద్రుడు', 'విశ్వనాథ్ అండ్ సన్స్' తర్వాత సూర్యను డిఫరెంట్‌గా చూపించిన సినిమా 'సీన్'. ఆయన స్టైల్ మాత్రమే కాదు... యాక్టింగ్ కూడా బావుంది. ఆయన్ను కొత్తగా చూపించింది. సూర్యకు నజ్రియా, నస్లీన్ వంటి ట్యాలెంటెడ్ ఆర్టిస్టులు యాడ్ కావడంతో నార్మల్ సీన్స్ కూడా ఎంగేజ్ చేశాయి. కామెడీ పరంగా లాఫింగ్ మూమెంట్స్ చాలా ఉన్నాయి. క్రైమ్ కామెడీ జానర్ మూవీస్ ఎంజాయ్ చేసే ప్రేక్షకులను అమితంగా ఆకట్టుకుంటుంది.

రేటింగ్: 3/5

Also Read: Vishwak Sen Cult Review In Telugu - కల్ట్ రివ్యూ: స్క్విడ్ గేమ్ టైపులో... దర్శకుడిగా, హీరోగా విశ్వక్ సేన్ కొత్త సినిమా ఎలా ఉందంటే?

Ramayana Review Telugu - 'రామాయణ' రివ్యూ: వెండితెరపై అద్భుతం జరిగిందా? లేదా? ఇతిహాసాన్ని ఎలా తీశారు?

Satya Pulagam — Thu, 5 Nov 2026 13:27:55 +0530

Yash Ramayana Review In Telugu: శ్రీరామచంద్రునిగా హిందీ కథానాయకుడు రణబీర్ కపూర్ నటించిన సినిమా 'రామాయణ పార్ట్ 1'. తెలుగులో 'రామాయణం: పార్ట్ 1'గా విడుదల చేశారు. సీతాదేవిగా సాయి పల్లవి నటించగా... రావణాసురునిగా యష్ కనిపించారు. 'దంగల్' ఫేమ్ నితేష్ తివారి దర్శకత్వం వహించారు. నమిత్ మల్హోత్రాకు చెందిన ప్రైమ్ ఫోకస్ స్టూడియోస్, ఎనిమిది ఆస్కార్ అవార్డులను అందుకున్న డీఎన్ఈజీ, యష్ 'మాన్‌స్టర్ మైండ్ క్రియేషన్స్' సంయుక్తంగా నిర్మించాయి. ఈ సినిమా ఎలా ఉంది? అనేది చూస్తే...

కథ (Ramayana Part 1 Movie Story): దేవేంద్రుని చేతిలో అసురులకు ఓటమి ఎదురైన తర్వాత కైకసి (శోభన) అవమాన భారంతో పెద్ద కొడుకు దశానన (యష్) దగ్గరకు వెళుతుంది. తన ఆవేదనను చెబుతుంది. ఘోర తపస్సు చేసిన దశానన ఘోర తపస్సు చేసి బ్రహ్మ నుంచి వరాలు పొందుతాడు. రావణుడిగా తిరిగి వచ్చి కుబేరుడు పాలిస్తున్న లంకా నగరాన్ని హస్తగతం చేసుకుంటాడు. ముల్లోకాలకు అధిపతిగా అవతరిస్తాడు. రావణుడి పాలనలో యజ్ఞాలు, యాగాదులు వంటివి జరగవు. సృష్టి వినాశనం అవుతుందని బ్రహ్మ దగ్గరకు వెళతాడు దేవేంద్రుడు (కునాల్ కపూర్). అప్పుడు మానవుడిగా అవతారం దాలుస్తారు బ్రహ్మ.

అయోధ్యలో దశరథుని ఇంట రాముడు (రణబీర్ కపూర్) జన్మిస్తారు. బాల్యం నుంచి సీతాదేవి (సాయి పల్లవి)తో స్వయంవరం, వివాహం... కైకేయి (లారా దత్తా)కు తండ్రి దశరథ మహారాజు (అరుణ్ గోవిల్) ఇచ్చిన వాగ్దానాన్ని నెరవేర్చడం కోసం వనవాసానికి వెళ్ళడం, అక్కడ సూర్పణఖ (రకుల్ ప్రీత్ సింగ్) ముక్కును లక్ష్మణుడు (రవి దూబే) కోయడం, సీతను రావణుడు అపహరించడం వరకు... 'రామాయణ పార్ట్ 1'లో చూపించారు.

విశ్లేషణ (Ramayana Part 1 Review Telugu): ప్రేక్షకులకు తెలిసిన కథతో సినిమా తీయడం కత్తిమీద సాము లాంటి వ్యవహారం. అందులోనూ భారతీయులు దైవంగా కొలిచే శ్రీరామునిపై, 'రామాయణం' మీద సినిమా తీయడం అంటే సవాలే. కొంచెం తప్పు జరిగినా సరే చీల్చి చెండాడిన సందర్భాలు ఉన్నాయి. అందుకు ప్రభాస్ 'ఆదిపురుష్' ఓ ఉదాహరణ. ఈ తరుణంలో 'రామాయణ' అంటూ వచ్చారు దర్శక నిర్మాతలు నితేష్ తివారి, నమిత్ మల్హోత్రా.

మెజారిటీ ప్రేక్షకులకు తెలిసిన కథతో సినిమాను ప్రారంభించలేదు నితేష్ తివారి. అయోధ్యలో రాముడి నుంచి కాకుండా... లంకాధిపతి కథను చెప్పడం మొదలు పెట్టారు. అసురులు, దేవేంద్రుని మధ్య యుద్ధంతో ఆరంభించారు. దాంతో ఓ కొత్త కథను తెరపై చూస్తున్న అనుభూతి కలుగుతుంది. అక్కడ రావణ బ్రహ్మగా యష్ నటన, ఆ యాక్షన్ సీక్వెన్స్ కూడా అబ్బురపరుస్తుంది. దేవేంద్రుడు, అసురుల మధ్య యుద్ధాన్ని కూడా చక్కగా చిత్రీకరించారు. రామచంద్రుని జన్మకు కారణం ఏమిటనేది చూపించిన తర్వాత అయోధ్యకు వెళ్ళారు. అక్కడి నుంచి సీతా స్వయంవరం, సీతను రావణుడు అపహరించడం వరకు ప్రేక్షకులకు తెలిసిన కథను చూపించారు. మధ్య మధ్యలో క్రియేటివ్ ఫ్రీడమ్ తీసుకున్నారు. అందువల్ల, రామాయణం గురించి పూర్తి అవగాహన ఉన్న ప్రేక్షకులకు తప్పులు కనిపించే అవకాశం లేకపోలేదు. తెలియని ప్రేక్షకులకు ఓ అద్భుత దృశ్యకావ్యంగా అనిపిస్తుంది.

టెక్నికల్ పరంగా 'రామాయణ' సినిమాను హై స్టాండర్డ్స్‌లో తీశారు. విజువల్ ఎఫెక్ట్స్ బావున్నాయి. ఐరావతం, జటాయువు సన్నివేశాలను అద్భుతంగా తీర్చిదిద్దారు. ఆ సీక్వెన్సులు గూస్ బంప్స్ ఇస్తాయి. అయితే... దశరథుని అస్థికలు నదిలో రాముడు కలిపే సన్నివేశాలతో పాటు కొన్ని చోట్ల ఫారెస్ట్ విజువల్ ఎఫెక్ట్స్ ఆశించిన స్థాయిలో లేవు. కెమెరా వర్క్, ఎడిటింగ్, ప్రొడక్షన్ వేల్యూస్ బావున్నాయి. అయితే... ఆస్కార్ విన్నర్స్ హాన్స్ జిమ్మర్ - ఏఆర్ రెహమాన్ అందించిన నేపథ్య సంగీతం మాత్రం ఆశించిన స్థాయిలో లేదు. తెరపై దృశ్యాలను అద్భుతంగా మలచడంలో వాళ్ళిద్దరి ఆర్ఆర్ ఏమాత్రం సహాయపడలేదు. పాటలు జస్ట్ ఓకే. తెలుగు డబ్బింగ్ ఓకే. కోప గృహం వంటి కొన్ని పదాలను మినహాయిస్తే... ఎక్కువ గ్రాంధికం వాడలేదు. సామాన్య ప్రేక్షకులకు సైతం అర్థమయ్యే తెలుగు వాడారు. బ్రహ్మ ఏఐ వాడకం వల్ల లిప్ సింక్ బాగా కుదిరింది.

సీతారాములుగా సాయి పల్లవి, రణబీర్ కపూర్ ఒదిగిపోయారు. ముఖ్యంగా శ్రీరామ చంద్రునిగా ఆ పాత్రకు అవసరమైన సమ్మోహన రూపం రణబీర్ మోములో చాలా చక్కగా కనిపించింది. సన్నివేశాలకు తగ్గట్టు నటించారు. సీతగా సాయి పల్లవి ఓకే. వాళ్ళిద్దరినీ డామినేట్ చేశారు రావణాసురునిగా నటించిన యష్. అసలు సినిమా ప్రారంభమే... రావణాసురుని కథతో ప్రారంభమైంది. లంకాధిపతిగా అవతరించే తీరు, ఆ యాక్షన్ సన్నివేశంలో యష్ అద్భుతంగా నటించారు. రావణ బ్రహ్మగా ఆయన లుక్ బావుంది. నటనలోనూ రుద్ర తాండవం కనిపించింది. రావణుడి తల్లిగా శోభన కనిపించారు.

సూర్పణకగా రకుల్ ప్రీత్ సింగ్ పాత్ర పరిమితమే. మూడు కీలక సన్నివేశాల్లో ఆమె చక్కగా నటించారు. మండోదరిగా కాజల్ అగర్వాల్ నటించారు. ఆమెది అతిథి పాత్ర అని చెప్పవచ్చు. లక్ష్మణుడిగా రవి దూబే క్యారెక్టరైజేషన్ కాస్త నవ్విస్తుంది. ఆయనతో కొంత కామెడీ చేయించే ప్రయత్నం చేశారు. విభీషణుడిగా హరీష్ ఉత్తమన్, విద్యుత్ జిహ్వగా వివేక్ ఒబెరాయ్ తమ ఉనికి చాటుకున్నారు.

Ramayana Part 1 Verdict: భారతీయులకు, ఈతరం సినిమా ప్రేక్షకులకు సైతం తెలిసిన కథను వెండితెరపై అద్భుత దృశ్య కావ్యంగా మలచడంలో దర్శక నిర్మాతలు నితేష్ తివారి, నమిత్ మల్హోత్రా, యష్ సక్సెస్ అయ్యారు. కథ, కథనంతో కంటే విజువల్స్‌తో మేజిక్ చేశారు. ప్రతి ఫ్రేమ్‌ను విజువల్ వండర్‌గా తీర్చిదిద్దడంలో దర్శక నిర్మాతలతో పాటు నటీనటులు పడిన కృషి స్పష్టంగా తెలుస్తుంది. రణబీర్ కపూర్, సాయి పల్లవి నటన కథకు ప్రాణం పోసింది. రావణ బ్రహ్మగా యష్ నటన సినిమాను మరో స్థాయికి తీసుకు వెళ్ళింది. సంగీత పరంగా కొంచెం డిజప్పాయింట్ చేసిన చిత్రమిది. ఓవరాల్‌గా మంచి థియేట్రికల్ ఎక్స్‌పీరియన్స్ ఇస్తుంది.

Also Read: Haiku Review In Telugu - హైకూ రివ్యూ: లేడీస్ కాలేజీలో కుర్రాడొక్కడే... శ్రీదేవి తమిళ్ సినిమా ఎలా ఉందంటే?

Rudravanam PS Web Series Review - రుద్రవనం పీఎస్ రివ్యూ: అడవిలో తల లేని మొండెం - రుద్రవనంలో హత్యల మిస్టరీ సిరీస్ ఎలా ఉందంటే?

Ganesh Guptha — Tue, 3 Nov 2026 13:53:29 +0530

Zee5 Crime Thriller Web Series Rudravanam PS Review In Telugu : క్రైమ్ థ్రిల్లర్స్ అంటే ఉండే క్రేజ్ గురించి ప్రత్యేకంగా చెప్పాల్సిన పని లేదు. తమిళం, మలయాళం థ్రిల్లర్స్‌ తెలుగులోనూ సూపర్ రెస్పాన్స్ అందుకుంటున్నాయి. అయితే, తెలుగులో డైరెక్ట్ క్రైమ్ థ్రిల్లర్స్ రేర్‌గా వస్తుంటాయి. రీసెంట్‌గా ఈ జానర్‌లో వచ్చిన వెబ్ సిరీస్ 'రుద్రవనం పీఎస్' (Rudravanam PS). అక్టోబర్ 30 (శుక్రవారం) నుంచి ప్రముఖ ఓటీటీ 'జీ5' (ZEE5)లో స్ట్రీమింగ్ అవుతోంది.

శశిధర్ మున్నంగి దర్శకత్వం వహించిన 7 ఎపిసోడ్ల ఈ సిరీస్‌లో నరేశ్ అగస్త్య, శ్రావణి రెడ్డి, ప్రీతి సుందర్, బెనర్జీ, చారు వాకన్, రాజా రవీంద్ర తదితరులు కీలకపాత్రలు పోషించారు. మరి ఈ క్రైమ్ థ్రిల్లర్ సిరీస్ ఎలా ఉంది? ఎంతవరకు మెప్పించింది? అనేది ఓసారి చూస్తే...

కథ ఏంటంటే (Rudravanam PS Series Story In Telugu) : రుద్రవనం అనే ఊరిలో ఎస్సైగా పని చేస్తుంటాడు శివకుమార్ (నరేశ్ అగస్త్య). గర్భవతైన భార్య శ్రావణి (శ్రావణి రెడ్డి)ని చూసుకునేందుకు సెలవు తీసుకుందామనుకునే టైంలోనే ఊరిలో గుర్తు తెలియని శవం దొరుకుతుంది. పోలీసుల పొరపాటు వల్ల ఆ శవం తల కూడా మిస్ అవుతుంది. సరిగ్గా అప్పుడే ఎమ్మెల్యే (రాజా రవీంద్ర) తమ్ముడు కూడా మిస్ అవుతాడు. ఇక, ఊరిలో పేరు మోసిన లాయర్ బంధువు ఇంట్లో రూ.25 లక్షల నగలు చోరీకి గురవుతాయి. ఇలా వరుస కేసుల శివకుమార్‌ను ఉక్కిరి బిక్కిరి చేస్తాయి.

ఈ కేసు ఇన్వెస్టిగేషన్ చేస్తున్న క్రమంలో ఊరి చుట్టుపక్కల ఇతర ప్రాంతాల్లో వరుసగా మిస్ అయిన కేసుల గురించి తెలుస్తుంది. అసలు ఆ శవం ఎవరిది? తలను ఎవరు తీసుకెళ్లారు? లాయర్ ఇంట్లో చోరీ చేసింది ఎవరు? శవాలకు దొంగతనాలకు ఏమైనా సంబంధం ఉందా? ఈ కేసుల చిక్కుముడిని ఎస్సై శివకుమార్ ఎలా విప్పాడు? అనేది తెలియాలంటే సిరీస్ చూడాల్సిందే.

విశ్లేషణ (Rudravanam PS Web Series Review In Telugu) : క్రైమ్, ఇన్వెస్టిగేషన్ థ్రిల్లర్స్ అంటేనే సగటు మూవీ లవర్ ఓ ఎక్స్‌పెక్టేషన్‌తో ఉంటాడు. మధ్య మధ్య సాగే ట్విస్టులు, చిక్కుముడులు విప్పలేని ప్రశ్నలు.. చివరకు దొరికే సమాధానాలు ఇవే అందరి మదిలో మెదులుతాయి. ఇక తెలుగు క్రైమ్ ఇన్వెస్టిగేషన్ థ్రిల్లర్ రుద్రవనం పీఎస్ విషయానికి వస్తే... డైరెక్టర్ శశిధర్ మున్నంగి ఆడియన్స్ ఆ థ్రిల్ పంచడంలో కొంతవరకు సక్సెస్ అయ్యారనే చెప్పాలి.

మొదటి ఎపిసోడ్‌లో శవం దొరకడంతో మొదలైన కథ... తల మిస్ కావడం దగ్గర నుంచి ఒక్కో మిస్సింగ్ కేసు, చోరీలు వాటిని లింక్ చేస్తూ ఛేదించే క్రమంలో ఎదురయ్యే ఇబ్బందులు అన్నీ క్యూరియాసిటీ పెంచుతాయి. అయితే, ఫైనల్‌కు వచ్చేసరికి మాత్రం అంత హైప్ క్రియేట్ చేయలేదు. హంతకుడు పోలీసుల చుట్టూనే తిరుగుతున్నా... సగటు పోలీస్ ఆఫీసర్ అతన్ని పట్టుకోలేకపోయాడా? అనే ఆలోచన కలిగిస్తుంది. స్టోరీ నెమ్మదిగా సాగడం ఆడియన్స్‌కు విసుగు కలిగిస్తుంది.

దర్శకుడు చెప్పదలుచుకున్న స్టోరీని కేవలం ల్యాగ్ చేయడం కోసమే సిరీస్‌ను 7 ఎపిసోడ్స్ రూపొందించారన్న ఫీలింగ్ కలిగిస్తుంది. ప్రతీ ఎపిసోడ్‌లోనూ స్టోరీ నెరేషన్ చాలా స్లోగా సాగుతుంది. ఇది ప్రేక్షకుడి సహనానికి పరీక్ష పెడుతుందనే చెప్పాలి. మధ్య మధ్యలో వచ్చే కొన్ని అనవసరమైన పాత్రలు ఎందుకు పెట్టారో కూడా తెలియదు. కథకు అవసరం లేని, కొన్ని లింక్స్ చూపిస్తారు. ఇది కొంత కన్ఫ్యూజన్ కలిగిస్తుంది. చివరకు వచ్చే సరికి కొంత క్లారిటీ వస్తుంది.

Also Read : OTT Crime Thriller: రెండు ఓటీటీల్లో తెలుగు క్రైమ్ థ్రిల్లర్... మాఫియాలో మిడిల్ క్లాస్ కుర్రాడి ప్రేమకథ - మైండ్ బ్లాక్ అయ్యే ట్విస్ట్

క్లైమాక్స్ హైలైట్ : స్టోరీ క్లైమాక్స్‌కు వచ్చేసరికి ఆడియన్ కొంత సాటిస్‌ఫై అవుతాడు. ఎస్సై శివ కుమార్ హంతకుడిని గుర్తించడంలో గొప్ప గొప్ప ట్విస్టులు ఏమీ ఉండవు. సింపుల్‌గానే గుర్తించినా తర్వాత అన్నీ హత్యలు అతనే చేసినట్లు తెలుస్తుంది. ఇందులో కొంత సైకలాజికల్ మెథడ్‌ను కూడా చూపించారు. హంతకుడి దారిలోనే వెళ్లి అతని నుంచి నిజం రాబట్టడం కొంచెం కొత్తగా అనిపిస్తుంది. అయితే, నిందితుడు ఎస్సైకు మాత్రమే నిజం చెప్పడం చూస్తే కొందరు ఆడియన్స్‌కు కనెక్ట్ కాదు. మొత్తంగా రుద్రవనం పీఎస్ వెబ్ సిరీస్ టైమ్ పాస్‌ చేయాలంటే చూసే ఓ సింపుల్ క్రైమ్ థ్రిల్లర్ అనే చెప్పొచ్చు.

ఎవరెలా చేశారంటే? : ఎస్సై శివకుమార్‌గా నరేష్ అగస్త్య బెస్ట్ ఇచ్చారనే చెప్పాలి. అయితే, పోలీస్ ఆఫీసర్‌గా ఆ గాంభీర్యం, కొంచెం కఠినత్వాన్ని రాబట్టడంలో డైరెక్టర్ విఫలమయ్యారు. ఇక సీఐగా బెనర్జీ, ఎమ్మెల్యేగా రాజా రవీంద్ర పర్వాలేదనిపించారు.

బలాలు : ఇంట్రెస్టింగ్ ట్విస్టులు, సైకలాజికల్ కోణం, ఎపిసోడ్స్ రన్ టైం.

బలహీనతలు : వెరీ స్లో నెరేషన్, కథకు అవసరం లేని సంఘటనలు పాత్రలు.

రేటింగ్ : 2.5/5

Also Read : This Week OTT Movies : నవంబర్ ఫస్ట్ వీక్ ఓటీటీ మూవీస్ - శుక్రవారం ఒక్క రోజే 8 సినిమాలు స్ట్రీమింగ్... ఇవి అస్సలు మిస్ కావొద్దు

NOTE : మరిన్ని సినిమా వార్తలు, గాసిప్స్, ఓటీటీ అప్డేట్స్, వెబ్ సిరీస్‌లు, టాలీవుడ్, బాలీవుడ్ హీరోయిన్స్ లేటెస్ట్ సోషల్ మీడియా అప్డేట్స్, టీవీ సీరియల్స్ లేటెస్ట్ ఎపిసోడ్స్ కోసం ఇక్కడ క్లిక్ చేయండి.

Akka Web Series Review - కీర్తి సురేష్ 'అక్క' వెబ్ సిరీస్ రివ్యూ: నెట్‌ఫ్లిక్స్‌లో తెలుగులోనూ స్ట్రీమింగ్

Satya Pulagam — Sat, 31 Oct 2026 16:24:59 +0530

Netflix Web Series Akka Telugu Review: కీర్తి సురేష్ ప్రధాన పాత్రలో రూపొందిన వెబ్ సిరీస్ 'అక్క'. ఇందులో రాధికా ఆప్టే మరో ప్రధాన పాత్ర పోషించారు. ధర్మరాజ్ శెట్టి దర్శకత్వం వహించిన ఈ సిరీస్ హిందీలో తెరకెక్కింది. నెట్‌ఫ్లిక్స్‌ ఓటీటీలో స్ట్రీమింగ్ అవుతోంది. తెలుగులోనూ వీక్షకులకు అందుబాటులో ఉంది. ఈ సిరీస్ ఎలా ఉంది?

కథ (Akka Web Series Story In Telugu): మలేమార్, హెర్కడి, పర్పెలాడీ... మూడు చోట్ల అధికారం, ఆధిపత్యం ఆడవాళ్ళ చేతుల్లో ఉంటుంది. ఆ మూడింటినీ కలిపి పెర్నూరు అంటారు. పెర్నూరును పాలించే మలేమార్, హెర్కడి, పర్పెలాడీ వంశ పెద్దలను 'అక్క' అంటారు. వాళ్ళు పెళ్లిళ్ళు చేసుకోరు. కానీ పిల్లల్ని కంటారు. తమ వంశంలో జన్మించిన ఆడవాళ్ళను వారసురాళ్ళుగా ప్రకటిస్తారు.

భారతదేశానికి స్వాతంత్య్రం వచ్చినా... పెర్నూరులో 'అక్క'లు చెప్పినదే వేదం. వాళ్ళు చేసినదే రాజ్యాంగం. సారా పాట నుంచి బంగారం స్మగ్లింగ్ వరకు వాళ్ళకు ఎదురు వచ్చేవాళ్ళు లేరు. ఈ తరుణంలో ముంబై నుంచి వచ్చిన రుద్ర (రాధికా ఆప్టే) పెర్నూరును హస్తగతం చేసుకోవాలని ప్రయత్నిస్తుంది. 'అక్క'లను అంతం చేయాలని కంకణం కట్టుకుంటుంది. అసలు రుద్ర ఎవరు? 'అక్క'ల మీద ఆమెకు ఎందుకు అంట పగ? రుద్రకు మలేమార్ వారసురాలు భవాని (కీర్తి సురేష్) చెక్ పెట్టగలిగిందా? లేదా? చివరకు ఏమైంది? అనేది సిరీస్ చూసి తెలుసుకోవాలి.

విశ్లేషణ (Akka Web Series Review In Telugu): వెండితెరపై, డిజిటల్ తెరపై గ్యాంగ్ వార్, మాఫియా నేపథ్యంలో తెరకెక్కిన కథలను పదుల సంఖ్యలో మన ప్రేక్షకులు చూశారు. ఇప్పటి వరకు వచ్చిన ఆయా వెబ్ సిరీస్, సినిమాల్లో - మెజారిటీ కథల్లో ఆధిపత్యమంతా పురుషులదే. మాఫియా డాన్‌లుగా మగాళ్ళు కనిపించారు. హిందీ సినిమా 'గంగూబాయి కతియావాడి' వంటివి మినహాయింపు అని చెప్పవచ్చు. ఆ తరహా కథలకు స్పిన్ ఆఫ్ సిరీస్ 'అక్క' అని చెప్పవచ్చు.

'అక్క' వెబ్ సిరీస్ ప్రారంభం ఆకట్టుకుంటుంది. 'అక్క' వ్యవస్థతో పాటు క్యారెక్టర్లను పరిచయం చేయడం, ఆయా సన్నివేశాలను చూపించిన తీరు ఆసక్తిగా ఉంటుంది. ఆ తర్వాత నెమ్మదిగా కథలోకి తీసుకు వెళ్ళారు. కథలోకి వెళ్ళిన తర్వాతే అసలు సమస్య మొదలైంది. మగాళ్ళ బదులు ఆడాళ్ళు కనిపిస్తారు. కానీ, కథలో కొత్తదనం అసలు కనిపించలేదు. ఆధిపత్యం కోసం ఎత్తుకు పైఎత్తులు వేయడం - కథతో పాటు స్క్రీన్ ప్లేలో ట్విస్టులను కూడా ఇంతకు ముందు సిరీస్, సినిమాల్లో చూసినట్టు ఉంటుంది. ట్విస్టులే కాదు... సన్నివేశాలు సైతం రొటీన్ అనిపిస్తాయి. దాంతో ఆసక్తి సన్నగిల్లుతుంది.

కథకుడిగా కంటే దర్శకుడిగా ధర్మరాజ్ శెట్టి ఎక్కువ మార్కులు స్కోర్ చేశారు. ప్రతి సన్నివేశాన్ని చక్కగా తెరకెక్కించారు. ఇదొక పీరియాడిక్ స్టోరీ. స్వాతంత్య్రం వచ్చిన తర్వాత సంస్థానాలను విలీనం చేయడం నుంచి మిగతా సన్నివేశాల్లో పీరియాడిక్ వాతావరణాన్ని చక్కగా ఆవిష్కరించారు. ఆర్టిస్టుల లుక్స్ నుంచి క్యారెక్టరైజేషన్స్‌ వరకు బాగా డిజైన్ చేశారు. కథలోనూ కొత్తగా ఆలోచించి ఉంటే సిరీస్ మరొక విధంగా ఉండేది. పవర్ కోసం జరిగిన పోరులో, ఆయా సన్నివేశాల్లో జాన్ స్టీవార్ట్ ఏడూరి నేపథ్య సంగీతం బావుంది. సెల్వ కుమార్ సినిమాటోగ్రఫీతో పాటు ప్రొడక్షన్ డిజైన్ కూడా బావుంది.

Also Read: Aadarsha Kutumbam Review In Telugu - 'ఆదర్శ కుటుంబం' రివ్యూ: వెంకీతో త్రివిక్రమ్ కొత్త సినిమా - హిట్టా? ఫట్టా?

భవానిగా కీర్తి సురేష్ తన బెస్ట్ ఇచ్చారు. అవసరమైనప్పుడు యాక్షన్ చేశారు. ఆ సీన్లకు అవసరమైన ఎగ్రెషన్ చూపించారు. తన ఎక్స్‌ప్రెషన్స్‌తో సన్నివేశాలను ఎంగేజింగ్‌గా మార్చారు. బాలీవుడ్ సినిమాలతో పాటు వెబ్ సిరీస్‌లు చూసిన ఆడియన్స్‌కు రాధికా ఆప్టే నటన కొత్తగా అనిపించదు. అయితే... ఆ పాత్రకు అవసరమైన మేరకు నటించారు. అతిథి పాత్ర శంకర్ చేసిన మహేష్ మంజ్రేకర్ తెలుగు ప్రేక్షకులకు తెలుసు. మిగతా ఆర్టిస్టుల్లో తెలుగు ప్రేక్షకులకు తెలిసిన వాళ్ళు తక్కువ.

Akka Web Series Verdict In Telugu: కాన్సెప్ట్ పరంగా 'అక్క' కొత్తగా ఉంటుంది. కానీ సిరీస్ అంతటా ఆ కొత్తదనం లేదు. పెళ్ళి చేసుకోకుండా పిల్లల్ని కనడం, తమ వారసత్వాన్ని అమ్మాయిలు ఇవ్వడం, తమ వంశాన్ని ముందుకు తీసుకు వెళ్ళడానికి, ఆధిపత్యానికి మహిళలు చేసే పోరాటం వంటివి ప్రారంభంలో ఆసక్తిగా అనిపించినా... చివరకు వచ్చేసరికి రొటీన్ రివేంజ్ డ్రామాగా మార్చేశారు. కీర్తి సురేష్ తన బెస్ట్ ఇచ్చారు. మహిళల కోణంలో పవర్ గేమ్ చూడాలని కోరుకునే వీక్షకులు నెట్‌ఫ్లిక్స్‌లో ఈ సిరీస్ చూడొచ్చు.

రేటింగ్: 2.5/5

Also Read: 418 Movie Review - 418 రివ్యూ: చైత్ర సినిమా భయపెట్టిందా? ప్రశాంత్ నీల్ సినిమా ఎలా ఉందంటే?

Cult Review - కల్ట్ రివ్యూ: స్క్విడ్ గేమ్ టైపులో... దర్శకుడిగా, హీరోగా విశ్వక్ సేన్ కొత్త సినిమా ఎలా ఉందంటే?

Satya Pulagam — Fri, 30 Oct 2026 18:07:41 +0530

Vishwak Sen Cult Movie Telugu Review: యువ కథానాయకుడు విశ్వక్ సేన్‌లో ఓ దర్శకుడు కూడా ఉన్నారు. ఇంతకు ముందు 'ఫలక్‌నుమా దాస్'కు దర్శకత్వం వహించారు. 'మెకానిక్ రాకీ', 'లైలా', 'ఫంకీ' పరాజయాల తర్వాత విజయం కోసం మళ్ళీ మెగాఫోన్ పట్టారు. హీరోగా నటిస్తూ... 'కల్ట్'కు దర్శకత్వం వహించారు. 'కేజీఎఫ్', 'సలార్' ఫేమ్ రవి బస్రూర్ సంగీత దర్శకుడు కావడం, ప్రచార చిత్రాలు ఆకట్టుకునేలా ఉండటంతో సినిమాపై ప్రేక్షకులలో ఆసక్తి ఏర్పడింది. మరి సినిమా ఎలా ఉంది?

కథ (Cult Movie Story): ఫిబ్రవరి 29న గోవా హోంశాఖ మంత్రి (మురళీ శర్మ) తనయుడు ఎల్విన్ (తారక్ పొన్నప్ప) పుట్టినరోజు. నాలుగేళ్ళకు ఒకసారి వస్తుంది కనుక స్నేహితులతో కలిసి వేడుకలా సెలబ్రేట్ చేసుకోవాలనుకుంటాడు. సీఎం సీటు వచ్చేలా ఉందని, ఎన్నికల వేళ బర్త్ డే పార్టీలో ఏమైనా జరిగితే ఇబ్బంది అవుతుంది కనుక తండ్రి వద్దని వారిస్తాడు. కొడుకు పట్టుబట్టడంతో సరేనని గ్రీన్ సిగ్నల్ ఇస్తాడు. గోవాలోని ఫామ్‌ హౌస్‌లో పార్టీ మొదలవుతుంది. అనూహ్యంగా స్క్రీన్ మీద ఓ బొమ్మ వస్తుంది. అది చెప్పినట్టు చేయకపోతే ఇష్టం వచ్చినట్టు మనుషుల్ని చంపేస్తుంది.

పుట్టినరోజు పార్టీ కోసం ఇంటిలోకి వెళ్ళిన వాళ్ళు బయటకు రాకుండా డోర్ దగ్గర భారీగా ఆర్‌డీఎక్స్ బాంబులు అమరుస్తారు. ఇంటిలో ఉండి చెప్పినది చేయకపోతే చావడం గ్యారెంటీ. ఏదోకటి చేసి ఆ ఇంటి నుంచి తన కొడుకును బయటకు తీసుకు రమ్మని పోలీస్ కమిషనర్ (శ్రీకాంత్ అయ్యంగార్)ను హోంశాఖ మంత్రి చెబుతాడు. సరిగ్గా ఆ సమయంలో డీఎస్పీ సంకల్ప్ నాయక్ (విశ్వక్ సేన్) ఆ ఇంటిలో ఉన్నాడని తెలుస్తుంది. అక్కడ సంకల్ప్ ఏం చేశాడు? మనుషుల ప్రాణాలతో ఆటలు ఆడుతున్న వ్యక్తుల ఆట ఎలా కట్టించాడు? అనేది సినిమా.

విశ్లేషణ (Cult Review In Telugu): 'సార్... నాది నేను లేపుకుంటా! నన్ను ఎవరూ లేపక్కర్లేదు. మీరు స్ట్రెస్ తీసుకోకండి' - ఓ ఈవెంట్‌లో విశ్వక్ సేన్ చెప్పిన ఈ మాట వైరల్ అయ్యింది. ఆయనపై విమర్శలు వచ్చాయి. ఆ మాటను మళ్ళీ 'కల్ట్'లో వాడారు. ట్రైలర్‌లోనూ ఆ మాట ఉంది. హీరో క్యారెక్టర్ తాలూకా యాటిట్యూడ్, డెప్త్ చెప్పడం కోసం ఆ మాట మళ్ళీ వాడినట్టు విశ్వక్ సేన్ చెప్పారు. దాంతో ఆయన హిట్ ట్రాక్ ఎక్కడం ఖాయమని ప్రేక్షకులు భావించారు. ఆ అంచనాలకు తగ్గట్టు సినిమా ఉందా? అనేది చూస్తే...

'కల్ట్' ప్రచార చిత్రాల్లో కొరియన్ సర్వైవల్ థ్రిల్లర్, నెట్‌ఫ్లిక్స్ సిరీస్ 'స్క్విడ్ గేమ్' ఛాయలు కనిపించాయి. సినిమా చూశాక ఆ సిరీస్‌తో కంపేర్ చేయడం కష్టమే. 'ఫలక్‌నుమా దాస్'లో దర్శకుడిగా హైదరాబాదీ స్టైల్ చూపించడంలో విశ్వక్ సేన్ సక్సెస్ అయ్యారు. ఆ కథలో, దర్శకత్వంలో నేటివిటీ కనిపించింది. 'కల్ట్'కు వచ్చే సరికి ఆ నేటివిటీ మిస్ అయ్యింది. ముగ్గురు హైదరాబాదీ కుర్రాళ్లు గోవా వెళ్ళడం, అక్కడ బారులో ఎంట్రీ, అక్కడ నుంచి బర్త్ డే పార్టీ జరిగే ఇంటిలోకి వెళ్ళడం... ఓ సన్నివేశం తర్వాత మరొక సన్నివేశం చకచకా వస్తాయి. అయితే ఒక్క సన్నివేశం కూడా ఆకట్టుకునేలా లేదు. సుమారు సినిమా ప్రారంభమైన గంట తర్వాత విశ్వక్ సేన్ ఎంట్రీ ఇస్తారు. ఆయన ఎంట్రీతో కాస్త ఆసక్తి మొదలైంది. కథలో అసలైన ఫేస్ ఆఫ్ మొదలు అవుతుందని అనిపిస్తుంది. అయితే... సెకండాఫ్ కూడా సేమ్ టు సేమ్ సీన్లు మళ్ళీ రిపీట్ అవుతున్న ఫీలింగ్ కలుగుతుంది. యాక్షన్ బ్లాక్స్ రెండు బాగా రాశారంతే. అసలు ఎందుకు చంపుతున్నారు? చంపుతున్నది ఎవరు? అనే ట్విస్ట్ అసలు ఎగ్జైట్ చేయలేదు. దర్శకుడిగా విశ్వక్ సేన్ తన మార్క్ చూపిన సన్నివేశాలు ఒకట్రెండు తప్ప పెద్దగా కనిపించలేదు.

కథ, క్యారెక్టర్ల కంటే యాక్షన్ మీద ఎక్కువ నమ్మకం పెట్టుకున్నారు విశ్వక్ సేన్. తెరపై రక్తం ఏరులై పారే విధంగా యాక్షన్ సీక్వెన్సులు తీస్తే ప్రేక్షకులు చూస్తారని భావించినట్టు ఉన్నారు. హోంశాఖ మంత్రి, ఆయన కుమారుడు పాత్రల నుంచి మొదలు పెడితే కమిషనర్, ఆఖరికి కథకు కీలకమైన ఎమోషనల్ కాన్‌ఫ్లిక్ట్ వరకు - ఎందులోనూ బలం లేదు. దాంతో రక్తసిక్తమైన సన్నివేశాలను భరించడం కష్టం అవుతుంది. రవి బస్రూర్ నేపథ్య సంగీతం కొన్ని సన్నివేశాల్లో ఓకే. కెమెరా వర్క్, ప్రొడక్షన్ వేల్యూస్, ఎడిటింగ్ - కథకు తగ్గట్టు ఉన్నాయి.

దర్శకుడిగా కంటే కథానాయకుడిగా 'కల్ట్'కు ఎక్కువ న్యాయం చేశారు విశ్వక్ సేన్. ఆయన స్టైలింగ్, యాక్టింగ్ బావున్నాయి. తారక్ పొన్నప్పకు ఎక్కువ స్క్రీన్ స్పేస్ లభించింది. అయితే నటుడిగా ఆయన చేసింది ఏమీ లేదు. మురళీ శర్మ, శ్రీకాంత్ అయ్యంగార్ రొటీన్ రోల్స్ చేశారు. గాయత్రీ భరద్వాజ్ పాత్రకు ఇంపార్టెన్స్ ఏమీ లేదు. ఉన్నంతలో కాస్త గ్లామర్ షో చేసి ఆకట్టుకునే ప్రయత్నం చేశారు.

Cult Movie Verdict: 'స్క్విడ్ గేమ్' తరహాలో ఎమోషనల్ యాక్షన్ థ్రిల్లర్ తీయాలని విశ్వక్ సేన్ చేసిన ప్రయత్నం ఆకట్టుకునేలా లేదు. ఆయన నటన, ఇంటర్వెల్ తర్వాత వచ్చే యాక్షన్ బ్లాక్స్ పర్వాలేదు. అందుకోసం సినిమా చూడటం కష్టమే.

రేటింగ్: 1.75/5

Aadarsha Kutumbam Review - 'ఆదర్శ కుటుంబం' రివ్యూ: వెంకీతో త్రివిక్రమ్ కొత్త సినిమా - హిట్టా? ఫట్టా?

Satya Pulagam — Fri, 30 Oct 2026 16:48:07 +0530

Venkatesh Aadarsha Kutumbam Movie Telugu Review: విక్టరీ వెంకటేష్ హీరోగా గురూజీ త్రివిక్రమ్ దర్శకత్వం వహించిన సినిమా 'ఆదర్శ కుటుంబం హౌస్ నంబర్ 47'. హారిక అండ్ హాసిని క్రియేషన్స్ పతాకంపై సూర్యదేవర నాగవంశీ నిర్మించారు. రచయితగా వెంకీకి 'నువ్వు నాకు నచ్చావ్', 'మల్లీశ్వరి' వంటి విజయాలు ఇచ్చిన త్రివిక్రమ్, ఇప్పుడు దర్శకుడిగా త్రివిక్రమ్ ఏం తీశారు? హీరోయిన్ శ్రీనిధి శెట్టి ఎలా చేశారు? సినిమా ఎలా ఉంది?

కథ (Aadarsha Kutumbam Story): చిట్టిబాబు (వెంకటేష్), స్వర్ణ (శ్రీనిధి శెట్టి) దంపతులకు ఇద్దరు పిల్లలు. అమ్మాయి పెద్దది, పేరు సంపూర్ణ (యువీనా). అబ్బాయి పేరు స్వర (ప్రజ్వల్). భార్య చేసిన పనుల వల్ల సాధారణ బ్యాంకు ఉద్యోగి అయినటువంటి భర్త అప్పులు చేయాల్సి వస్తుంది. ఓ వైపు ఆ భాధ... మరో వైపు పిల్లలు చేసే పనుల వల్ల వచ్చే తలనొప్పులు... సమస్యల్లో ఉన్న చిట్టిబాబుకు వంద కోట్ల లాటరీ వరిస్తుంది. దాంతో గేటెడ్ కమ్యూనిటీకి షిఫ్ట్ అవుతుంది చిట్టిబాబు ఫ్యామిలీ.

అనూహ్యంగా కోటీశ్వరుడైన చిట్టిబాబు కుటుంబాన్ని ఉత్తరాదికి చెందిన ఓ దోపిడీ ముఠా టార్గెట్ చేస్తుంది. వాళ్ళను చంపేసి డబ్బులు దోచుకోవడానికి వస్తుంది. ఆ సమయంలో చిత్తుబాబు కుటుంబం ఏం చేసింది? వాళ్ళకు ఏమీ కాకపోవడానికి కారణం ఏమిటి? పోలీసాఫీసర్ దామోదర నాయుడు (నారా రోహిత్) ఏం చేశాడు? గేటెడ్ కమ్యూనిటీలో చిట్టిబాబుకు పరిచయమైన చిత్తరంజన్ (సత్య), మాలతి (నివేదా పేతురాజ్) ఏం చేశారు? చివరకు ఏమైంది? అనేది సినిమా.

విశ్లేషణ (Aadarsha Kutumbam Review Telugu): మాటలతో ప్రేక్షకులను మాయ చేయగల రచయిత త్రివిక్రమ్. పలు సినిమాల్లో కథ, కథనం, దర్శకత్వాన్ని ఆయన మాటలు డామినేట్ చేసిన సందర్భాలు ఎక్కువ. వెంకటేష్ హీరోగా నటించిన 'నువ్వు నాకు నచ్చావ్', 'మల్లీశ్వరి' సినిమాల్లో అదే జరిగింది. దర్శకుడిగా మారిన తర్వాత సన్నివేశాలు, యాక్షన్ తీయడంలో త్రివిక్రమ్ తన మార్క్ చూపిస్తూ వస్తున్నారు. ఆయన సినిమాల్లో లావిష్ ఫిల్మ్ మేకింగ్ కనిపిస్తుంది. మరి ఈసారి దర్శకుడిగా వెంకీతో ఎటువంటి సినిమా తీశారు? అనే విషయానికి వస్తే...

'ఆదర్శ కుటుంబం' ప్రారంభం చూస్తే... వింటేజ్ వెంకీని చూపించడానికి ఎక్కువ ఇంపార్టెన్స్ ఇచ్చారు త్రివిక్రమ్. ఆయన పాత్రను పరిచయం చేసిన తీరు, తన కుటుంబంతో కలిసి డైనింగ్ టేబుల్ దగ్గర సీన్స్ ఇన్‌స్టంట్‌గా నవ్వించాయి. ఆ తర్వాత ప్రేక్షకులకు ఆలోచించే సమయం ఇవ్వలేదు త్రివిక్రమ్. బ్యాక్ టు బ్యాక్... రఘుబాబు, సత్య, నివేదా పేతురాజ్ పాత్రలను పరిచయం చేస్తూ, నవ్విస్తూ ప్రీ ఇంటర్వెల్ వరకు చేరుకున్నారు. కుటుంబాలను హత్య చేస్తూ దోపిడీలు చేసే గ్యాంగ్ పరిచయం ఆసక్తి కలిగించినా... ఎక్కువగా వినోదం డామినేట్ చేసింది. అయితే ఇంటర్వెల్ దగ్గర యాక్షన్ సీక్వెన్సులో వెంకటేష్‌ను బాగా చూపించారు. ఫస్టాఫ్ అంతా త్రివిక్రమ్ మార్క్ మేజిక్ కనిపించింది. సెకండాఫ్ స్టార్టింగ్‌లో యాక్షన్ రూట్ తీసుకోకుండా క్రైమ్, కామెడీని మిళితం చేసి ఓ అరగంట హిలేరియస్‌గా నవ్వించారు త్రివిక్రమ్.

పతాక సన్నివేశాలు త్రివిక్రమ్ నుంచి ప్రేక్షకులు ఆశించే స్థాయిలో లేవు. కథలో అసలు విషయం మొదలైన తర్వాత వినోదం బ్యాక్ సీటు తీసుకోవడంతో ఫన్ మూమెంట్స్ తగ్గాయి. బ్యాక్ టు బ్యాక్ ట్విస్టులు వెంట వెంటనే వచ్చిన ఫీలింగ్ కలుగుతుంది. తమన్ పాటలు సైతం ఛార్ట్ బస్టర్లు కాదు. ప్రేక్షకులు మళ్ళీ మళ్ళీ పాడుకునే పాటలు ఈ సినిమాలో లేవు. అదొక మైనస్. 'మాలా వచ్చా చూడు...' పాటను సినిమా నుంచి తీసేశారు. అయితే నేపథ్య సంగీతం బాగా చేశారు తమన్. కొన్ని చోట్ల 'డీసీ' స్ఫూర్తి కనిపించింది. సినిమాటోగ్రఫీ, యాక్షన్ కొరియోగ్రఫీ, నిర్మాణ విలువలు బావున్నాయి.

త్రివిక్రమ్ కథ, క్యారెక్టర్, రచనకు వెంకటేష్ పూర్తి న్యాయం చేశారు. ఆయన మార్క్ నటన కనిపించింది. 'ఫేస్‌లో ప్రతి ఎక్స్‌ప్రెషన్ కనిపించడానికి నేను ఏమైనా మోహన్ లాలా? కమల్ హాసనా' అంటూ సెల్ఫ్ సెటైర్ వేసుకున్నారు వెంకీ. స్వర్ణ పాత్రలో శ్రీనిధి శెట్టి ఒదిగిపోయారు. వెంకీతో పాటు సత్య నవ్వించారు. వాళ్ళిద్దరి కాంబినేషన్ సీన్స్ బావున్నాయి. రఘుబాబు సైతం కొంత నవ్వించారు. నారా రోహిత్, రావు రమేష్, సచిన్ ఖేడేకర్ పోలీసులుగా కనిపించారు. ఆ ముగ్గురూ మంచి పెర్ఫార్మన్స్ ఇచ్చారు. నివేదా పేతురాజ్ పాత్రకు అంత ప్రాముఖ్యం లేదు. ఆమె రోల్, యాక్టింగ్ జస్ట్ ఓకే. 'ధురంధర్' ఫేమ్ ఉదయ్ బీర్ సందు, దేవియాని శర్మ ఆ పాత్రలకు అవసరమైన క్రూరత్వాన్ని చూపించారు. మిగతా నటీనటులు ఓకే.

Aadarsha Kutumbam Verdict: వెంకటేష్, త్రివిక్రమ్ కాంబినేషన్ నుంచి ప్రేక్షకులు ఆశించే వినోదాన్ని ఇవ్వడంలో 'ఆదర్శ కుటుంబం హౌస్ నంబర్ 47' సక్సెస్ అయ్యింది. క్లైమాక్స్ కొంత నిరాశ పరుస్తుంది. కానీ, ఓవరాల్ సినిమా ఎంటర్‌టైన్ చేసింది. దీపావళి పండక్కి ఫ్యామిలీతో కలిసి హ్యాపీగా చూడవచ్చు.

రేటింగ్: 3/5

Also Read: Garividi Lakshmi Review - 'గరివిడి లక్ష్మి' రివ్యూ: ఉత్తరాంధ్ర బుర్రకథ కళాకారిణి బయోపిక్... సినిమా ఎలా ఉందంటే?

418 Movie Review - 418 రివ్యూ: చైత్ర సినిమా భయపెట్టిందా? ప్రశాంత్ నీల్ సినిమా ఎలా ఉందంటే?

Satya Pulagam — Fri, 23 Oct 2026 12:33:26 +0530

Chaitra J Achar's 418 Movie Telugu Review: మైత్రీ మూవీ మేకర్స్ నిర్మించిన హారర్ థ్రిల్లర్ '418'. 'కేజీఎఫ్', 'సలార్' ఫేమ్ ప్రశాంత్ నీల్ సమర్పణలో కీర్తన్ నాదగౌడ దర్శకుడిగా పరిచయమయ్యారు. నవీన్ యెర్నేని, యలమంచిలి రవిశంకర్ నిర్మాతలు. చైత్ర జే ఆచార్, సూర్య రాజ్, చరణ్ లక్కరాజు, ప్రీతి పగడాల, శశాంక్ పాటిల్ ప్రధాన తారాగణం. ఈ సినిమా ఎలా ఉందంటే?

కథ (418 Movie Story): కర్ణాటకలోని వేదగిరి మెడికల్ కాలేజీలో చేరతారు రోహిత్ (చరణ్ లక్కరాజు), వివేక్ శంకర్ (సూర్య రాజ్). వాళ్ళకు బాయ్స్ హాస్టల్‌లోని రూమ్ నంబర్ 417 కేటాయిస్తారు. ఎట్టి పరిస్థితుల్లోనూ పక్కన ఉన్న 418 జోలికి వెళ్ళొద్దని హెచ్చరిస్తారు. ఆ హాస్టల్‌లో మహిళలను అడుగు పెట్టనివ్వరు. వాళ్ళకు ప్రవేశం నిషిద్ధం.

ఎవరైనా వద్దని చెప్పిన పని చేయడం సయేషా (ప్రీతి పగడాల)కు అలవాటు. కరోనా లక్షణాలు ఉన్నాయని వేదగిరి మెడికల్ కాలేజీ ఆస్పత్రికి వచ్చిన ఆమెతో రోహిత్ స్నేహం చేస్తాడు. ఆమెకు 418 గది గురించి తెలిసి వెళ్ళడానికి ప్రయత్నిస్తుంది. అప్పుడు ఏమైంది? అంతకు ముందు ఆ గదిలోకి వెళ్ళడానికి ప్రయత్నించిన రోహిత్, శంకర్ & గ్యాంగుకు ఎటువంటి పరిస్థితులు ఎదురయ్యాయి? దేవకీ (చైత్ర జే ఆచార్) ఎవరు? ఒకప్పుడు ఆ హాస్టల్ మానసిక వికలాంగుల కేంద్రంగా ఎందుకు ఉన్నది? ఆ తర్వాత ఏమైంది? చివరకు ఆ గది రహస్యాన్ని చివరకు ఎలా చేధించారు? అనేది సినిమా.

విశ్లేషణ (418 Movie Telugu Review): తెలుగులో మాత్రమే కాదు... ఇతర భాషల్లోనూ ఇప్పుడు హారర్ సినిమాలు అరుదుగా వస్తున్నాయి. కామెడీతో హారర్ మిక్స్ చేసి, ప్రేక్షకులను నవ్విస్తూ భయపడుతున్న దర్శక రచయితలు ఎక్కువయ్యారు. ఈ తరుణంలో పక్కా హారర్ సినిమాగా '418' వచ్చింది. అయితే మైత్రీ మూవీ మేకర్స్ ఈ మూవీని ప్రమోట్ చేయలేదు. కానీ, ప్రశాంత్ నీల్ సమర్పకుడిగా వ్యవహరించడం వల్ల ప్రేక్షకులలో క్రేజ్ నెలకొంది. మరోవైపు ఇంతలా భయపెట్టే సినిమా ఇటీవల కాలంలో రాలేదని హైప్ ఇచ్చారు. అందులో నిజమెంత? సినిమా ఎలా ఉంది? అనేది చూస్తే...

హారర్ థ్రిల్లర్ సినిమాల్లో రెగ్యులర్‌గా కనిపించే జంప్ స్కెర్స్, భయపెట్టడంలో కనిపించే రొటీన్ ట్రిక్స్ '418'లో లేవు. సిట్యువేషనల్ హారర్ కోసం దర్శకుడు కీర్తన నాడగౌడ ప్రయత్నించారు. అయితే... అది వర్కవుట్ కాలేదు. ఇంటర్వెల్ వరకు హారర్ కథకు అవసరమైన స్టేజి సెటప్ చేయడానికి ప్రయత్నించారు. పాడుబడ్డ భవంతిని బాగుచేసి మెడికల్ కాలేజీ బాయ్స్ హాస్టల్‌గా మార్చడం, ఆ గదిలో ఏదో ఉందని సీక్రెట్ రివీల్ చేయకపోవడం వల్ల... ఇంటర్వెల్ తర్వాత అసలైన హారర్ ఉంటుందని ఆశించిన ప్రేక్షకులను కొంత భయపెట్టారు. అయితే పూర్తిస్థాయిలో హారర్ ఎక్స్‌పీరియన్స్ ఇవ్వడంలో రెండడుగులు వెనక్కి ఉన్నారు.

ఓ బిడ్డను కనాలని, కడుపులో బిడ్డను కాపాడుకోవడం కోసం ఎంతకైనా తెగించే మహిళగా చైత్ర జె ఆచార్ పాత్ర బావుంది. ఆ పాత్ర లక్ష్యాన్ని బలంగా రాసిన దర్శకుడు... ఆమె వెళ్లే దారిని బలంగా రాలేదు. బిడ్డను కాపాడుకోవడం కోసం చైత్ర జె ఆచార్ చేసే పనులు రొటీన్ అనిపిస్తాయి. కానీ, ఆమె నటన మెప్పించింది. ఇక చివరకు వచ్చేసరికి 418 రూమ్ సీక్రెట్ కూడా సోసోగా అనిపిస్తుంది. అందువల్ల కథ పరంగా బలం లోపించింది. టెక్నికల్ పరంగా '418'కు టీమంతా తమ తమ బెస్ట్ ఇచ్చారు. సౌండ్ డిజైనింగ్, ఆర్ఆర్, సినిమాటోగ్రఫీ... టాప్ క్లాస్ అని చెప్పాలి. ఆ కథకు తగ్గట్టు నిర్మాతలు ఖర్చు చేశారు. ఆర్టిస్టులు కొత్తవాళ్ళు కావడం వల్ల కొన్ని సీన్స్ కనెక్ట్ అయ్యేలా లేవు.

దేవకి పాత్రలో చైత్ర జె ఆచార్ నటన సినిమాకు మేజర్ ప్లస్ పాయింట్. స్టేజిపై యక్షగాన కళ ప్రదర్శించే సమయంలో ఆమె హావభావాలు బావున్నాయి. ముఖ్యంగా ఓ సన్నివేశంలో చూపించిన రౌద్రం బావుంది. చరణ్ లక్కరాజు, సూర్యరాజ్ తమ పాత్రలకు న్యాయం చేశారు. 'లెనిన్', 'ఇరుముడి'లో కనిపించిన రమేష్ ఇందిరా మరోసారి కీలక పాత్రలో నటించారు. ప్రీతి పగడాల లుక్ కొత్తగా ఉంది. మోడ్రన్ అమ్మాయిగా ఆమె నటన ఓకే. మ్యాగీ రోల్ చేసిన నటుడు తప్ప మిగతా ఆర్టిస్టులు రిజిస్టర్ కావడం కష్టం.

418 Movie Verdict: హారర్ కామెడీల మధ్య కేవలం ప్రేక్షకులను భయపెట్టే ఉద్దేశంతో వచ్చిన ప్యూర్ హారర్ సినిమా '418'. ఇందులో హారర్ ఎలిమెంట్స్, థ్రిల్స్ తక్కువ. కథ పరంగా ఎమోషనల్ మూమెంట్స్ ఎక్కువ. కొంత మేరకు మాత్రమే భయపెట్టింది. చైత్ర జె ఆచార్ కనిపించినది తక్కువ సేపే అయినా ఆమె నటన తప్పకుండా ఆకట్టుకుంది.

రేటింగ్: 2.5/5

Also Read: Vijay Deverakonda Ranabaali Review - 'రణబాలి' రివ్యూ: విజయ్ దేవరకొండ నట విశ్వరూపం... సినిమా హిట్టా? ఫట్టా?

Haiku Review - హైకూ రివ్యూ: లేడీస్ కాలేజీలో కుర్రాడొక్కడే... శ్రీదేవి తమిళ్ సినిమా ఎలా ఉందంటే?

Satya Pulagam — Fri, 23 Oct 2026 10:06:27 +0530

Sridevi Tamil Movie Haiku Movie Telugu Review: 'కోర్ట్: స్టేట్ వర్సెస్ నోబడీ'తో కథానాయికగా విజయం అందుకున్న తెలుగమ్మాయి శ్రీదేవి. 'హైకూ'తో తమిళ తెరకు పరిచయం అయ్యారు. ఇందులో ఏగన్ హీరో. ఫెమినా జార్జ్ మరొక హీరోయిన్. యువరాజ్ చిన్నసామి దర్శకత్వంలో డి. అరుళానందు, మాథ్యూ అరుళానందు నిర్మించారు. తెలుగు, తమిళ భాషల్లో అక్టోబర్ 23న విడుదలైన ఈ సినిమా ఎలా ఉంది?

కథ (Haiku Movie Story): స్నేహితులు చేసిన ఓ చిలిపి పని వల్ల కాలేజీ నుంచి సస్పెండ్ అవుతాడు మనో... మనోహర్ (ఏగన్). సిటీలోని ఇతర కాలేజీల్లో అతనికి అడ్మిషన్ దొరకదు. స్నేహితులు తిరిగి తిరిగి చివరకు ఏడాది క్రితం లేడీస్ నుంచి కో ఎడ్యుకేషన్‌గా మారిన కాలేజీలో మనోకు సీటు సంపాదిస్తారు. అక్కడ వకుళకుడి (శ్రీదేవి)తో ప్రేమలో పడతాడు. కాలేజీ పూర్తయ్యాక కోయంబత్తూరు నుంచి చెన్నైకి ఉద్యోగం కోసం వెళతాడు.

లాంగ్ డిస్టెన్స్ రిలేషన్షిప్ వల్ల మనో - కుడి జీవితాల్లో ఏం జరిగింది? వాళ్ళిద్దరూ విడిపోవడానికి కారణం ఏమిటి? కుడి మరో పెళ్ళి ఎందుకు చేసుకుంది? చెన్నైలో ఇంటర్న్ నివి... నివేదా (ఫెమినా జార్జ్)తో మనో ప్రేమ, సహ జీవనంలో మనో ఏం చేశాడు? మనోకి దూరం అవ్వాలని నివి ఎందుకు నిర్ణయించుకుంది? కుడిని కలిశాక ఏం తెలుసుకుంది? చివరకు ఏమైంది? అనేది సినిమా.

విశ్లేషణ (Haiku Review Telugu): 'కోర్ట్' ఫేమ్ శ్రీదేవి కథానాయిక కావడంతో 'హైకూ' మీద తెలుగు ప్రేక్షకుల చూపు పడింది. లేడీస్ కాలేజీలో అబ్బాయి ఒక్కడే కాన్సెప్ట్ మరింత ఎట్రాక్ట్ చేసింది. ప్రేక్షకులలో సినిమాపై ఇంట్రెస్ట్ క్రియేట్ చేయడంలో టీజర్, ట్రైలర్ సక్సెస్ అయ్యాయి. మరి సినిమా ఎలా ఉంది? అంటే...

లేడీస్ కాలేజీ మొత్తం మీద ఒక్కడే కుర్రాడు - దర్శకుడు యువరాజ్ చిన్నసామి ఈ పాయింట్ మీద సినిమా స్టార్ట్ చేశాడు. అమ్మాయిలను అబ్బాయిలు ర్యాగింగ్ చేయడం పలు సినిమాల్లో చూశాం. బట్, ఫర్ ఏ ఛేంజ్... అబ్బాయిని అమ్మాయిలు ర్యాగ్ చేసే సన్నివేశాలు వినోదాత్మకంగా సాగాయి. అమ్మాయిల మధ్యలో హీరో పడే తిప్పలు నవ్విస్తాయి. హీరోకి హీరోయిన్ రాఖి కట్టడం, వాళ్ళిద్దరి పరిచయం, ఆ సీన్లు సైతం బావున్నాయి. అయితే... ప్రేమలో పడిన తర్వాత వచ్చే కులం పట్టింపులు వంటివి రొటీన్ అనిపిస్తాయి. అయినా సరే ఫస్టాఫ్ ఎంటర్‌టైన్ చేసింది. కానీ, కథలో అసలు విషయం సెకండాఫ్‌లో ఉంది. ఫస్టాఫ్ నుంచి హీరో ఆఫీసులో మరో అమ్మాయి నివి (ఫెమినా జార్జ్)ని చూపించారు. ఆమెతో హీరో ప్రేమలో పడతాడని మనకు ముందు నుంచి అర్థం అవుతూ ఉంటుంది. అయితే... వాళ్ళిద్దరూ ప్రేమలో పడిన తర్వాత వచ్చే కాన్‌ఫ్లిక్ట్ కొత్తగా ఉంది.

మనసులో మరొకని ఉంచుకుని తన మీద చూపించే ప్రేమ వద్దనుకునే అమ్మాయి నివి కథగా 'హైకూ' మారుతుంది. బ్రేకప్ తర్వాత మళ్ళీ ప్రేమలో పడిన కథతో కొన్ని సినిమాలు వచ్చాయి. ప్రేమలో మళ్ళీ పుడుతుందని కొన్ని సినిమాలు చెప్పాయి. 'హైకూ' స్పెషాలిటీ ఏమిటంటే... బ్రేకప్ తర్వాత గతంలో ప్రేమించిన అమ్మాయిని గుర్తు పెట్టుకుని, ఆమె విషయంలో చేసిన తప్పులు తన దగ్గర రిపీట్ చేయకుండా ఉండటాన్ని నివి సహించలేకపోతుంది. వేరొకరి ప్రేమ తనకు వద్దంటుంది. ఆ పాయింట్ బావున్నా ఎగ్జిక్యూట్ చేయడంలో దర్శకుడు యువరాజ్ ఫెయిలయ్యాడు. ఎమోషన్స్ చూపించడంలో కొంత తప్పటడుగులు వేశాడు. స్క్రీన్ ప్లే కూడా సెట్ కాలేదు. చూసిన సన్నివేశాలను మళ్ళీ వెంటనే చూసిన ఫీలింగ్ కలుగుతుంది.

యువరాజ్ చిన్నసామి కథకు, సినిమాకు సిద్ధూ కుమార్ సంగీతం ప్లస్ అయ్యింది. సాంగ్స్ లైవ్లీగా ఉన్నాయి. ఆర్ఆర్ కూడా ఓకే. పీయూష్ గురుసామి కెమెరా వర్క్ నీట్‌గా ఉంది. విజువల్స్ అన్నీ బ్రైట్‌గా ఉన్నాయి. నిర్మాణ విలువలు బావున్నాయి. ఖర్చుకు వెనుకాడలేదని అర్థమవుతుంది.

Also Read: Crazy Kalyanam Review In Telugu - 'క్రేజీ కళ్యాణం' రివ్యూ: తెలంగాణ నేపథ్యంలో అనుపమ పరమేశ్వరన్ సినిమా... హిట్టా? ఫట్టా?

హీరోగా ఏగన్ మొదటి చిత్రమిది. ఈతరం యువకుడిలా కాలేజీలో అమ్మాయిల మధ్య ఇబ్బంది పడే సన్నివేశాలలో సులభంగా నటించారు. అయితే ఎమోషనల్ సన్నివేశాల్లో ఇంకా పరిణితి చెందాలి. 'కోర్ట్' ఫేమ్ శ్రీదేవి తన వయసుకు తగ్గ పాత్రలో మెరిశారు. ఫెమినా జార్జ్ లుక్స్ మాత్రమే కాదు... యాక్టింగ్ కూడా బావుంది. ప్రేక్షకులను ఇంప్రెస్ చేయడం గ్యారెంటీ. తెరపై మెజారిటీ సన్నివేశాల్లో ముగ్గురే కనిపిస్తారు. మిగతా ఆర్టిస్టులు ఓకే.

Haiku Verdict: ఈతరం యువత, ముఖ్యంగా 'జెన్ జి'కి ప్రేమలో చేసే తప్పుల గురించి మెసేజ్ ఇచ్చే సినిమా 'హైకూ'. వినోదంతో పాటు సందేశం బావుంది. అయితే ఎమోషన్స్ హార్ట్ టచింగ్‌గా తీసి ఉంటే బావుండేది. రొమాంటిక్ కామెడీ జానర్స్ ఇష్టపడే ప్రేక్షకులు ఎక్కువ అంచనాలు పెట్టుకోకుండా వెళితే ఎంజాయ్ చేయవచ్చు. కాసేపు నవ్వుకుని రావచ్చు.

రేటింగ్: 2.5/5

Garividi Lakshmi Review - 'గరివిడి లక్ష్మి' రివ్యూ: ఉత్తరాంధ్ర బుర్రకథ కళాకారిణి బయోపిక్... సినిమా ఎలా ఉందంటే?

Satya Pulagam — Sat, 17 Oct 2026 18:29:47 +0530

Aanandi's Garividi Lakshmi Movie Review: పీపుల్ మీడియా ఫ్యాక్టరీ పతాకంపై టీజీ విశ్వప్రసాద్, కృతి ప్రసాద్ నిర్మించిన సినిమా 'గరివిడి లక్ష్మి'. ఉత్తరాంధ్ర ప్రాంతానికి చెందిన లెజెండరీ జానపద గాయని గరివిడి లక్ష్మి బయోపిక్ ఇది. ఆనంది టైటిల్ రోల్ చేశారు. రాగ్ మయూర్, నరేష్ వీకే, శరణ్య, రాశి కీలక పాత్రల్లో నటించారు. గౌరి నాయుడు జమ్ము దర్శకత్వం వహించిన ఈ సినిమా ఎలా ఉంది?

కథ (Garividi Lakshmi Story): ఉత్తరాంధ్రలోని గరివిడి ఊరికి చెందిన మహిళ లక్ష్మి (ఆనంది). చిన్నతనంలో 12 ఏళ్ళ వయసులో పెళ్ళి జరుగుతుంది. భర్తకు తన కంటే ముందు మరొక మహిళతో పెళ్ళి జరిగిందని తెలుస్తుంది. దాంతో అతడిని పంపించేస్తుంది లక్ష్మి తల్లి దేవుడమ్మ (రాశి). ఒంటరైన లక్ష్మి... బుర్రకథ, జానపద పాటకు దగ్గర అవుతుంది. ఆ క్రమంలో పరిచయమైన సత్తిబాబు (రాగ్ మయూర్)తో కలిసి ప్రదర్శనలు ఇవ్వడం మొదలు పెడుతుంది. లక్ష్మి బుర్రకథ, పాటలకు ప్రజలు బ్రహ్మరథం పడతారు.

పేరు ప్రఖ్యాతలతో పాటు లక్ష్మికి వంకర బుద్ధి గల ప్రజల నుంచి వేధింపులు సైతం ఎదురవుతాయి. వాటిని దాటుకుని జీవితంలో ఎలా ముందుకు వచ్చింది? ప్రేమ పేరుతో దగ్గరైన సత్తిబాబు చేసిన మోసం ఏమిటి? గరివిడి లక్ష్మి గుర్తింపును, ఆమె పాటలను మరొకరు ఎలా దోచుకున్నారు? చివరకు లక్ష్మి ఏమైంది? ఇప్పుడామె ఎక్కడుంది? ఏం చేస్తుంది? లక్ష్మి గుర్తింపు కోసం రాంబాబు (నరేష్ వీకే) ఏం చేశారు? అనేది సినిమా.

విశ్లేషణ (Garividi Lakshmi Review In Telugu): బయోపిక్ దర్శక రచయితలకు 'మహానటి' ఓ బెంచ్ మార్క్ సెట్ చేశారు. లెజెండరీ పర్సన్స్ జీవితాల్లో అన్నీ విజయాలు - సంతోషాలే కాదని... సామాన్య ప్రజల కంటికి కనిపించని దుఃఖాలు, అవమానాలు, బాధలు ఉంటాయని దర్శకుడు నాగ్ అశ్విన్ చూపించారు. ఆయన రచనలో నిజాయతీ ప్రేక్షకుల్ని ఆకట్టుకుంది. ఇప్పుడీ 'గరివిడి లక్ష్మి' కూడా ఆ 'మహానటి' టెంప్లేట్‌లో సాగింది.

గరివిడి లక్ష్మి పాట ఉత్తరాంధ్రలో మాత్రమే కాదు... తెలుగు నేలపై మార్మోగింది. ప్రజలకు ఆవిడ పాట తెలుసు. అయితే... ఆ పాట వెనుక ఉన్న ఫేస్ తెలియదు. అందువల్ల, గరివిరి లక్ష్మి గుర్తింపును హైజాక్ చేశారు. ఆర్థికంగా, మానసికంగా మోసం చేశారు. సావిత్రి జీవితంలో ఉన్నంత క్లాన్‌ఫ్లిక్ట్, ఎమోషన్ 'గరివిడి లక్ష్మి' జీవితంలో కూడా ఉన్నాయి. అయితే... దర్శకుడు ఆ భావోద్వేగాలు అన్నిటినీ తెరపై ఆవిష్కరించడంలో పూర్తిగా సక్సెస్ కాలేదు.

పాటపై గరివిడి లక్ష్మికి అంత మక్కువ ఎందుకు కలిగింది? బుర్రకథపై ఆవిడ ఇష్టం ఎందుకు పెంచుకుంది? వంటి అంశాలను ప్రేక్షకులకు అర్ధమయ్యే రీతిలో ఆవిష్కరించలేదు. లక్ష్మికి ఇష్టమైన తండ్రి నుంచి పెళ్ళి చేసుకున్న భర్త వరకు ప్రతి ఒక్కరూ దూరం అవుతుంటారు. కానీ ఎమోషన్ మాత్రం కనెక్ట్ అయ్యేలా లేదు. పాటలు మాత్రం థియేటర్లలో ప్రేక్షకులను ఉర్రూతలూగించేలా ఉన్నాయి. సత్తిబాబు పాత్రలో మరొక కోణం బయట పడిన తర్వాత... చివరి 40 నిమిషాల సినిమా మాత్రం బావుంది. అప్పటి వరకు సోసోగా ఉన్న సినిమా ఒక్కసారిగా కంటతడి పెట్టించేలా మారింది.

'గరివిడి లక్ష్మి'కి సంగీత దర్శకుడు చరణ్ అర్జున్ న్యాయం చేశారు. ప్రతి పాటను చక్కగా కంపోజ్ చేశారు. జానపదంలో ఆత్మను సంగీతంలో ఆవిష్కరించారు. ఈ సినిమా కెమెరా వర్క్ ఓకే. ప్రొడక్షన్ డిజైన్ మెప్పించేలా లేదు. కానీ మరీ పేరు పెట్టేలా లేదు. పీపుల్ మీడియా ఫ్యాక్టరీ సంస్థ మంచి కథకు మద్దతు ఇచ్చింది. టెక్నికల్ పరంగా ఓకే.

గరివిడి లక్ష్మి పాత్రలో ఆనంది జీవించారు. సినిమా చూశాక ఆవిడను తప్ప మరొక కథానాయికను ఊహించుకోలేం. స్టేజిపై బుర్రకథ చెప్పినా, జానపదం పాడినా సరే ప్రాణం పెట్టేశారు. పాడుతూ చిన్న చిన్న స్టెప్పుల్ని హృద్యంగా వేయడం ఆమెకు మాత్రమే చెల్లింది. రాగ్ మయూర్, నరేష్ వీకే కూడా తక్కువేం కాదు. వాళ్లిద్దరూ చాలా చక్కగా నటించారు. ముఖ్యంగా వయసు మీద పడిన సన్నివేశాల్లో చాలా బాగా చేశారు. ఆనంది తల్లిగా రాశి, స్నేహితురాలిగా శరణ్య కనిపించారు. తమ పాత్రల పరిధి మేరకు చేశారు.

Garividi Lakshmi Verdict: గుర్తింపుకు నోచుకోని ఓ దిగ్గజ జానపద కళాకారిణి బయోపిక్ 'గరివిడి లక్ష్మి'. టైటిల్ పాత్రలో ఆనంది అద్భుతంగా జీవించారు. లక్ష్మి పాత్రకు ప్రాణం పోశారు. చివరి 40 నిమిషాలు బావుంది. అయితే... మహానటి స్థాయి సినిమాగా మలచడంలో దర్శకుడు గౌరి నాయుడు జమ్ము విఫలమయ్యారు. జానపద గీతాలను ఇష్టపడే ప్రేక్షకులు, గుర్తింపుకు నోచుకోని ఓ దిగ్గజ గాయని జీవితకథను చూడాలని ఆశించే ప్రజలు ఎటువంటి అంచనాలు పెట్టుకోకుండా వెళ్ళడం మంచిది.

రేటింగ్: 2.5/5

Also Read: Jailer 2 Review In Telugu - 'జైలర్ 2' రివ్యూ: 600 కోట్లు సినిమాకు సీక్వెల్... రజనీ మళ్ళీ బ్లాక్ బస్టర్ కొట్టారా?