movie-review

Garividi Lakshmi Review - 'గరివిడి లక్ష్మి' రివ్యూ: ఉత్తరాంధ్ర బుర్రకథ కళాకారిణి బయోపిక్... సినిమా ఎలా ఉందంటే?

Satya Pulagam — Sat, 17 Oct 2026 18:29:47 +0530

Aanandi's Garividi Lakshmi Movie Review: పీపుల్ మీడియా ఫ్యాక్టరీ పతాకంపై టీజీ విశ్వప్రసాద్, కృతి ప్రసాద్ నిర్మించిన సినిమా 'గరివిడి లక్ష్మి'. ఉత్తరాంధ్ర ప్రాంతానికి చెందిన లెజెండరీ జానపద గాయని గరివిడి లక్ష్మి బయోపిక్ ఇది. ఆనంది టైటిల్ రోల్ చేశారు. రాగ్ మయూర్, నరేష్ వీకే, శరణ్య, రాశి కీలక పాత్రల్లో నటించారు. గౌరి నాయుడు జమ్ము దర్శకత్వం వహించిన ఈ సినిమా ఎలా ఉంది?

కథ (Garividi Lakshmi Story): ఉత్తరాంధ్రలోని గరివిడి ఊరికి చెందిన మహిళ లక్ష్మి (ఆనంది). చిన్నతనంలో 12 ఏళ్ళ వయసులో పెళ్ళి జరుగుతుంది. భర్తకు తన కంటే ముందు మరొక మహిళతో పెళ్ళి జరిగిందని తెలుస్తుంది. దాంతో అతడిని పంపించేస్తుంది లక్ష్మి తల్లి దేవుడమ్మ (రాశి). ఒంటరైన లక్ష్మి... బుర్రకథ, జానపద పాటకు దగ్గర అవుతుంది. ఆ క్రమంలో పరిచయమైన సత్తిబాబు (రాగ్ మయూర్)తో కలిసి ప్రదర్శనలు ఇవ్వడం మొదలు పెడుతుంది. లక్ష్మి బుర్రకథ, పాటలకు ప్రజలు బ్రహ్మరథం పడతారు.

పేరు ప్రఖ్యాతలతో పాటు లక్ష్మికి వంకర బుద్ధి గల ప్రజల నుంచి వేధింపులు సైతం ఎదురవుతాయి. వాటిని దాటుకుని జీవితంలో ఎలా ముందుకు వచ్చింది? ప్రేమ పేరుతో దగ్గరైన సత్తిబాబు చేసిన మోసం ఏమిటి? గరివిడి లక్ష్మి గుర్తింపును, ఆమె పాటలను మరొకరు ఎలా దోచుకున్నారు? చివరకు లక్ష్మి ఏమైంది? ఇప్పుడామె ఎక్కడుంది? ఏం చేస్తుంది? లక్ష్మి గుర్తింపు కోసం రాంబాబు (నరేష్ వీకే) ఏం చేశారు? అనేది సినిమా.

Also Read: Crazy Kalyanam Review In Telugu - 'క్రేజీ కళ్యాణం' రివ్యూ: తెలంగాణ నేపథ్యంలో అనుపమ పరమేశ్వరన్ సినిమా... హిట్టా? ఫట్టా?

విశ్లేషణ (Garividi Lakshmi Review In Telugu): బయోపిక్ దర్శక రచయితలకు 'మహానటి' ఓ బెంచ్ మార్క్ సెట్ చేశారు. లెజెండరీ పర్సన్స్ జీవితాల్లో అన్నీ విజయాలు - సంతోషాలే కాదని... సామాన్య ప్రజల కంటికి కనిపించని దుఃఖాలు, అవమానాలు, బాధలు ఉంటాయని దర్శకుడు నాగ్ అశ్విన్ చూపించారు. ఆయన రచనలో నిజాయతీ ప్రేక్షకుల్ని ఆకట్టుకుంది. ఇప్పుడీ 'గరివిడి లక్ష్మి' కూడా ఆ 'మహానటి' టెంప్లేట్‌లో సాగింది.

గరివిడి లక్ష్మి పాట ఉత్తరాంధ్రలో మాత్రమే కాదు... తెలుగు నేలపై మార్మోగింది. ప్రజలకు ఆవిడ పాట తెలుసు. అయితే... ఆ పాట వెనుక ఉన్న ఫేస్ తెలియదు. అందువల్ల, గరివిరి లక్ష్మి గుర్తింపును హైజాక్ చేశారు. ఆర్థికంగా, మానసికంగా మోసం చేశారు. సావిత్రి జీవితంలో ఉన్నంత క్లాన్‌ఫ్లిక్ట్, ఎమోషన్ 'గరివిడి లక్ష్మి' జీవితంలో కూడా ఉన్నాయి. అయితే... దర్శకుడు ఆ భావోద్వేగాలు అన్నిటినీ తెరపై ఆవిష్కరించడంలో పూర్తిగా సక్సెస్ కాలేదు.

పాటపై గరివిడి లక్ష్మికి అంత మక్కువ ఎందుకు కలిగింది? బుర్రకథపై ఆవిడ ఇష్టం ఎందుకు పెంచుకుంది? వంటి అంశాలను ప్రేక్షకులకు అర్ధమయ్యే రీతిలో ఆవిష్కరించలేదు. లక్ష్మికి ఇష్టమైన తండ్రి నుంచి పెళ్ళి చేసుకున్న భర్త వరకు ప్రతి ఒక్కరూ దూరం అవుతుంటారు. కానీ ఎమోషన్ మాత్రం కనెక్ట్ అయ్యేలా లేదు. పాటలు మాత్రం థియేటర్లలో ప్రేక్షకులను ఉర్రూతలూగించేలా ఉన్నాయి. సత్తిబాబు పాత్రలో మరొక కోణం బయట పడిన తర్వాత... చివరి 40 నిమిషాల సినిమా మాత్రం బావుంది. అప్పటి వరకు సోసోగా ఉన్న సినిమా ఒక్కసారిగా కంటతడి పెట్టించేలా మారింది.

'గరివిడి లక్ష్మి'కి సంగీత దర్శకుడు చరణ్ అర్జున్ న్యాయం చేశారు. ప్రతి పాటను చక్కగా కంపోజ్ చేశారు. జానపదంలో ఆత్మను సంగీతంలో ఆవిష్కరించారు. ఈ సినిమా కెమెరా వర్క్ ఓకే. ప్రొడక్షన్ డిజైన్ మెప్పించేలా లేదు. కానీ మరీ పేరు పెట్టేలా లేదు. పీపుల్ మీడియా ఫ్యాక్టరీ సంస్థ మంచి కథకు మద్దతు ఇచ్చింది. టెక్నికల్ పరంగా ఓకే.

గరివిడి లక్ష్మి పాత్రలో ఆనంది జీవించారు. సినిమా చూశాక ఆవిడను తప్ప మరొక కథానాయికను ఊహించుకోలేం. స్టేజిపై బుర్రకథ చెప్పినా, జానపదం పాడినా సరే ప్రాణం పెట్టేశారు. పాడుతూ చిన్న చిన్న స్టెప్పుల్ని హృద్యంగా వేయడం ఆమెకు మాత్రమే చెల్లింది. రాగ్ మయూర్, నరేష్ వీకే కూడా తక్కువేం కాదు. వాళ్లిద్దరూ చాలా చక్కగా నటించారు. ముఖ్యంగా వయసు మీద పడిన సన్నివేశాల్లో చాలా బాగా చేశారు. ఆనంది తల్లిగా రాశి, స్నేహితురాలిగా శరణ్య కనిపించారు. తమ పాత్రల పరిధి మేరకు చేశారు.

Also Read: Vijay Deverakonda Ranabaali Review - 'రణబాలి' రివ్యూ: విజయ్ దేవరకొండ నట విశ్వరూపం... సినిమా హిట్టా? ఫట్టా?

Garividi Lakshmi Verdict: గుర్తింపుకు నోచుకోని ఓ దిగ్గజ జానపద కళాకారిణి బయోపిక్ 'గరివిడి లక్ష్మి'. టైటిల్ పాత్రలో ఆనంది అద్భుతంగా జీవించారు. లక్ష్మి పాత్రకు ప్రాణం పోశారు. చివరి 40 నిమిషాలు బావుంది. అయితే... మహానటి స్థాయి సినిమాగా మలచడంలో దర్శకుడు గౌరి నాయుడు జమ్ము విఫలమయ్యారు. జానపద గీతాలను ఇష్టపడే ప్రేక్షకులు, గుర్తింపుకు నోచుకోని ఓ దిగ్గజ గాయని జీవితకథను చూడాలని ఆశించే ప్రజలు ఎటువంటి అంచనాలు పెట్టుకోకుండా వెళ్ళడం మంచిది.

రేటింగ్: 2.5/5

Also Read: Jailer 2 Review In Telugu - 'జైలర్ 2' రివ్యూ: 600 కోట్లు సినిమాకు సీక్వెల్... రజనీ మళ్ళీ బ్లాక్ బస్టర్ కొట్టారా?

Crazy Kalyanam Review - 'క్రేజీ కళ్యాణం' రివ్యూ: తెలంగాణ నేపథ్యంలో అనుపమ పరమేశ్వరన్ సినిమా... హిట్టా? ఫట్టా?

Satya Pulagam — Fri, 16 Oct 2026 17:02:06 +0530

Anupama Parameswaran Crazy Kalyanam Review: అనుపమ పరమేశ్వరన్ ప్రధాన పాత్రలో తెరకెక్కిన సినిమా 'క్రేజీ కళ్యాణం'. 'రాజు వెడ్స్ రాంబాయి' ఫేమ్ అఖిల్ రాజ్ హీరో. హీరోయిన్ (అనుపమ) అక్కను పెళ్ళి చేసుకున్న బావగా తరుణ్ భాస్కర్, తండ్రిగా నరేష్ విజయకృష్ణ, కీలక పాత్రలో కిరీటి దామరాజు నటించారు. బద్రప్ప గాజుల దర్శకత్వంలో బూసం జగన్ మెహన్ రెడ్డి నిర్మించారు. సురేష్ బొబ్బిలి సంగీతం అందించారు. ఈ సినిమా ఎలా ఉంది?

కథ (Crazy Kalyanam Story): పర్వతాలు (నరేష్ విజయకృష్ణ) పెద్దల్లుడు బాల్ రాజ్ (తరుణ్ భాస్కర్)కు పనీ పాట లేదు. ఇల్లరికం వచ్చాడు. ప్రతి రోజూ రాత్రి అయ్యేసరికి ఎవరో ఒకరి దగ్గర అప్పు చేసి తాగడం వల్ల ఊళ్ళో మర్యాద లేకుండా పోతోందని పర్వతాలు బాధ పడుతుంటాడు. చిన్న కుమార్తె కీర్తి (అనుపమ పరమేశ్వరన్)కి పెళ్ళి చేసి పోయిన తన మర్యాదను తిరిగి రాబట్టుకోవాలని ప్లాన్ చేస్తాడు. ఓ సాఫ్ట్‌వేర్ (కిరీటి దామరాజు) సంబంధం వస్తుంది.

కీర్తికి ఉద్యోగం చేయాలని, తన కాళ్ళ మీద నిలబడాలని కోరిక. చిన్ననాటి క్లాస్‌మేట్ ఉదయ్ (అఖిల్ రాజ్)తో ప్రేమలో ఉంటుంది. తండ్రి తీసుకొచ్చిన సంబంధం చేసుకుందా? లేదంటే తన ప్రేమ సంగతి తండ్రికి చెప్పిందా? చివరకు ఏమైంది? అనేది సినిమా.

విశ్లేషణ (Crazy Kalyanam Review Telugu): 'క్రేజీ కళ్యాణం' టైటిల్‌లో స్టోరీ మెయిన్ పాయింట్ గురించి హింట్ ఇచ్చారు. అయితే... ఆ క్రేజీ కళ్యాణం కాన్సెప్ట్ తెరపైకి రావడానికి టైమ్ తీసుకున్నాడు దర్శకుడు. ఇంటర్వెల్ ముందు వరకు కథ, ఆ కథలోని క్యారెక్టర్లను పరిచయం చేశారు. విశేషం ఏమిటంటే... ఆ స్టోరీ సెటప్ & సీన్స్ బావున్నాయి. కథను కేవలం కళ్యాణం చుట్టూ తిప్పలేదు. కథానాయిక పాత్ర, ఆమె ఆలోచనలను చూపించిన తీరు బావుంది.

సాధారణంగా చాలా మంది ఇళ్లల్లో అమ్మాయికి ఓ వయసు వచ్చిన తర్వాత పెళ్ళి చేసి అత్తారింటికి పంపించాలని అనుకుంటారు. అందులోనూ ఓ అల్లుడు అప్రయోజకుడు కావడం వల్ల నిందలు పడుతున్న సమయంలో మరో అమ్మాయికి మంచి సంబంధం చేయాలని అనుకోవడం సహజం. అయితే... ఇక్కడ ఎలాగైనా మంచి సంబంధం చేయాలని తాపత్రయ పడే తండ్రి, ఉద్యోగం సంపాదించి తన కాళ్ళ మీద నిలబడాలని ప్రయత్నించే కుమార్తె మధ్య ఎమోషనల్ కాన్‌ఫ్లిక్ట్ బావుంది. అప్పటి వరకు చూపించిన కథలోని సన్నివేశాల్లో వినోదమూ కాస్త నవ్వించింది. ముఖ్యంగా తరుణ్ భాస్కర్ పాత్రను తెలంగాణలో పలు పల్లెల్లో ఇల్లరికం వచ్చిన ఎటువంటి పని పాట చేయని అల్లుళ్లకు ప్రతిబింబంగా ఉంది. ఆ సీన్స్ వర్కవుట్ అయ్యాయి కూడా! అయితే... కథలో అసలు సమస్య పెళ్ళి మొదలైన తర్వాతే వచ్చింది.

'క్రేజీ కళ్యాణం' మొదలైన తర్వాత వినోదం తగ్గింది. ఎమోషనల్ ట్రాక్‌లోకి వెళ్ళింది. అయితే... ఎలాగైనా సరే అమ్మాయి పెళ్ళి చేయాలని తండ్రి చేసే ఓ పని మాత్రం అందరూ హర్షించేలా లేదు. కుమార్తెకు ఉద్యోగం వచ్చిందని తెలిశాక తండ్రితో వచ్చే మార్పు కూడా యాక్సెప్ట్ చేసేలా లేదు. పెద్దల్లుడిని పొగిడే సన్నివేశం కూడా! ఉన్నట్టుండి వచ్చిన మార్పు కాస్త షాక్ ఇస్తుంది. అయితే... దర్శకుడు బద్రప్ప గాజుల రచనలో కొన్ని సన్నివేశాలు మాత్రం మనసును తాకుతాయి. ముఖ్యంగా ఆస్తి పత్రాల మీద సంతకం చేయించే సన్నివేశం కంటతడి పెట్టిస్తుంది. కథలో కొన్ని ఎమోషనల్ మూమెంట్స్ బావున్నాయి. కామెడీ కూడా! అయితే... కాస్త నిడివి ఎక్కువైంది. కథలో అసలైన క్రేజీ కళ్యాణం ఆకట్టుకునేలా లేదు. అయితే అక్కడ నటీనటుల ప్రతిభ ఆకట్టుకుంటుంది.

తెలంగాణ నేటివిటీని దర్శకుడు బద్రప్ప గాజుల చక్కగా చూపించారు. కెమెరా & మ్యూజిక్ డిపార్ట్‌మెంట్స్‌ నుంచి మంచి అవుట్‌పుట్ రాబట్టుకున్నాడు. ముఖ్యంగా సురేష్ బొబ్బిలి పాటలు, నేపథ్య సంగీతం కథకు ప్రాణం పోశాయి. సాహిత్యం కూడా బావుంది. నిర్మాత బూసం జగన్ మోహన్ రెడ్డి ఖర్చుకు వెనుకాడలేదు.

కథంతా అనుపమ పరమేశ్వరన్ చుట్టూ తిరిగినా... 'క్రేజీ కళ్యాణం' చూశాక నరేష్ వీకే నటన ఎక్కువ గుర్తుంటుంది. కళ్యాణం సన్నివేశాల్లో ఆయన అదరగొట్టారు. నవరసాలు పలికించారు. అనుపమ సైతం అద్భుతంగా నటించారు. తరుణ్ భాస్కర్ నటన చూస్తే నేచురల్ యాక్టర్ అనిపిస్తుంది. అఖిల్ రాజ్ స్క్రీన్ స్పేస్ తక్కువ. ఉన్నంతలో తన పాత్రకు తగ్గట్టు చేశారు. కిరిటీ దామరాజును చూస్తే టైప్ కాస్ట్ చేస్తున్నారని అనిపిస్తుంది. మిగతా నటీనటులు తమ తమ పాత్రలకు తగ్గట్టు చేశారు.

Crazy Kalyanam Verdict: కొన్ని నవ్వులు, మంచి పాటలు - నేపథ్య సంగీతంతో తెరకెక్కిన సినిమా 'క్రేజీ కళ్యాణం'. ఇంటర్వెల్ వరకు ఎంటర్‌టైన్ చేస్తుంది. ఆ తర్వాత కాస్త రొటీన్ ట్రాక్‌లోకి వెళ్ళినా... నటీనటుల ప్రతిభతో క్లైమాక్స్ వచ్చేసరికి గట్టెక్కుతుంది. ఫ్యామిలీ డ్రామాలు, ముఖ్యంగా మహిళలను వంటింటి కుందేళ్ళుగా కట్టేయకుండా వాళ్ళనూ తమ కాళ్ళ మీద నిలబడనివ్వాలని కోరుకునే ప్రేక్షకులకు నచ్చుతుంది.

Also Read: Least Eligible Bachelor Review - 'లీస్ట్ ఎలిజిబుల్ బ్యాచిలర్' రివ్యూ: రెండు ఓటీటీల్లో 'జబర్దస్త్' బాబు కామెడీ సిరీస్ - హీరోగా హర్ష చెముడు ఏం చేశారంటే?

Ranabaali Review - 'రణబాలి' రివ్యూ: విజయ్ దేవరకొండ నట విశ్వరూపం... సినిమా హిట్టా? ఫట్టా?

Satya Pulagam — Fri, 16 Oct 2026 12:37:12 +0530

Vijay Deverakonda Ranabaali Movie Review: విజయ్ దేవరకొండ హీరోగా నటించిన సినిమా 'రణబాలి'. రాహుల్ సాంకృత్యాన్ దర్శకత్వం వహించారు. మైత్రీ మూవీ మేకర్స్ పతాకంపై నవీన్ యెర్నేని, రవిశంకర్ వై నిర్మించారు. బ్రిటీషర్ల మీద రాయలసీమకు చెందిన ఓ యోధుడు ఎటువంటి పోరాటం చేశాడనే కథతో రూపొందిన ఈ సినిమాలో విజయ్ దేవరకొండ సరసన రష్మిక నటించారు. ఈ సినిమా ఎలా ఉంది?

కథ (Ranabaali Story): రాయలసీమతో పాటు మద్రాస్ ప్రెసిడెన్సీలో వర్షాలు చాలా తక్కువ పడతాయి. బ్రిటీషర్లకు పన్ను కట్టడానికి ప్రజల దగ్గర సరిపడా ధాన్యం లేని పరిస్థితి ఒకవైపు... కరువు మరోవైపు. భారతీయులు ఏమైనా సరే ఐదు లక్షల టన్నుల ధాన్యాన్ని తమ దేశానికి తీసుకు వెళ్ళాలని ధృడ సంకల్పంతో ఉంటాడు సర్ హెక్టార్ (ఆర్నాల్డ్ ఓస్లో).

బ్రిటీషర్ల అరాచకాలు తెలిసి సింగనమల బొబ్బిలి రణబాలి (విజయ్ దేవరకొండ) రగిలిపోతారు. కరువు కారణంగా కడుపు నింపుకోవడానికి కష్టపడుతున్న ప్రజలను చూసి చలించిపోతాడు. బ్రిటీషర్ల గోదాములపై దాడి చేసి ధాన్యాన్ని తీసుకువచ్చి సామాన్య ప్రజల ఆకలి తీరుస్తాడు. అది తెలిసి రణబాలి తల తీసుకు రమ్మని తమ సైనికులను పంపిస్తాడు. హెక్టార్, బ్రిటీషర్లతో రణబాలి ఎటువంటి యుద్ధం చేశాడు? అతని ప్రయాణంలో భార్య జయమ్మ (రష్మిక) పాత్ర ఏమిటి? సింగనమల కొండ మీద బ్రహ్మ మల్లన్న స్వామి (లాల్) ఏం చేశారు? రణబాలిని ముందుకు ఎలా నడిపించారు? చివరకు ఏమైంది? అనేది సినిమా.

విశ్లేషణ (Ranabaali Review Telugu): భారతీయులను హింసించి దేశంలోని సిరి సంపదలను దోచుకోవాలని చూసిన బ్రిటీషర్లపై యుద్ధం చేసిన వీరులు ఎంతో మంది ఉన్నారు. బ్రిటీషర్ల నుంచి సామాన్యులను విముక్తి చేయడానికి కొందరు, దేశానికి స్వాతంత్య్రం తీసుకు రావాలని మరికొందరు యుద్ధాలు చేశారు. అది మన దేశ చరిత్ర. చరిత్రలో పోరాటాలు చేసిన యోధులు ఎంతో మంది ఉన్నారు. వాళ్ళ గురించి ఈతరానికి ఎంత తెలుసు? అనేది ప్రశ్నార్థకమే. దేశ చరిత్రను ప్రజల ముందుకు తీసుకు రావాలని అనుకోవడం మంచి ప్రయత్నం. అందులో తప్పు లేదు. ఆ చరిత్రను ఎలా ఆవిష్కరించాం? అనేది అసలు ప్రశ్న.

ఎంతో మంది ఆకలి తీర్చినది భారతదేశం. అన్నపూర్ణ లాంటి దేశంలో కరువుకు కారణమైన బ్రిటీషర్ల మీద రణబాలి ఎటువంటి యుద్ధం చేశాడు? అనేది క్లుప్తంగా చిత్రకథ. అయితే... ఆ యుద్ధం, బ్రిటీషర్లపై రణబాలి చేసిన పోరాటం, సినిమా ముందుకు వెళ్ళిన విధానం కొత్తగా అనిపించవు. అందుకు కారణం బ్రిటీషర్లపై పోరాటం చేసిన భారతీయ యోధుల కథను గతంలో తెరపై చూడటమే. ముఖ్యంగా రాయలసీమ నేపథ్యంలో 'సైరా నరసింహారెడ్డి' రావడం కూడా 'రణబాలి'కి కొంత మైనస్ అని చెప్పాలి. కథ పరంగా 'సైరా', 'రణబాలి' మధ్య వ్యత్యాసం ఉంది. ఈ సినిమాలో కరువుపై ఎక్కువ ఫోకస్ చేశారు దర్శకుడు రాహుల్ సాంకృత్యాన్. కానీ పోరాటం చేసినది మాత్రం బ్రిటీషర్లపైనే. అందువల్ల, కొన్ని పోలికలు రావడం సహజం. అయితే... హీరో హీరోయిన్ల క్యారెక్టర్లను బాగా రాశారు.

'రణబాలి'గా విజయ్ దేవరకొండ, జయమ్మగా రష్మిక పాత్రలను... వాళ్ళిద్దరి మధ్య సన్నివేశాలను దర్శకుడు రాహుల్ సాంకృత్యాన్ చాలా బాగా రాశారు. లుక్ నుంచి యాక్టింగ్ వరకు ఇద్దరి నుంచి కొత్తదనం చూపించారు. క్యారెక్టర్, క్యారెక్టరైజేషన్ అంటే జస్ట్ సీన్లు, డైలాగులు మాత్రమే కాదు... ఎక్స్‌ప్రెషన్స్ నుంచి బిహేవియర్ వరకు ఎలా ఉండాలో డిసైడ్ చేయడం! ఆది బాగా చేశారు దర్శకుడు. యాక్షన్ పరంగానూ కొన్ని హై మూమెంట్స్ బాగా రాసుకున్నారు. క్లైమాక్స్ కావచ్చు... దానికి ముందు బ్రిటీషర్లపైకి వెళ్లడం కావచ్చు... గుహలో గెరిల్లా దాడి కావచ్చు... రాహుల్ సాంకృత్యాన్ తన ట్యాలెంట్ చూపించారు. అయితే... నిడివి విషయంలో కాస్త తప్పటడుగు వేశారు. ఫస్టాఫ్ డీసెంట్ అనిపించినా... సెకండాఫ్ లెంగ్త్ ఎక్కువ అయ్యింది. ముఖ్యంగా నేపథ్య సంగీతం పేలవంగా సాగింది. అజయ్ - అతుల్ సంగీతంలో పాటలు బావున్నాయి. కానీ, ఆర్ఆర్ మాత్రం సినిమాను ఎలివేట్ చేయడంలో ఫెయిల్ అయ్యింది. తెలుగు సంగీత దర్శకులకు లేదంటే తెలుగు ఆడియన్స్ పల్స్ తెలిసిన వాళ్ళకు నేపథ్య సంగీతం చేసే బాధ్యత అప్పగిస్తే మినిమమ్ నాలుగైదు సన్నివేశాల్లో గూస్ బంప్స్ వచ్చేలా ఆర్ఆర్ ఇచ్చేవాళ్లు. ఈ సినిమాకు అజయ్ - అతుల్ ఆర్ఆర్ బిగ్గెస్ట్ మైనస్.

'రణబాలి' ప్రొడక్షన్ డిజైన్ బావుంది. స్వాతంత్ర్యానికి ముందు వాతావరణాన్ని తెరపై బాగా ఆవిష్కరించారు. సినిమాటోగ్రఫీ కూడా బావుంది. మైత్రీ మూవీ మేకర్స్ సైతం బాగా ఖర్చు చేశారు. ఒక్క సముద్రంలో పడవ సీన్ సీజీ వర్క్ తప్ప మిగతా సినిమా అంతా ప్రొడక్షన్ వేల్యూస్ ఉన్నత స్థాయిలో ఉన్నాయి. యాక్షన్ సీన్స్ కొరియోగ్రఫీ కూడా బావుంది.

నటుడిగా విజయ్ దేవరకొండ తనను తాను కొత్తగా ఆవిష్కరించుకున్న తీరుకు హ్యాట్సాఫ్ చెప్పాలి. ఇంతకు ముందు చేసిన సినిమాలు గుర్తు రాకుండా తన నటనలో కొత్తదనం చూపించారు. ముఖ్యంగా పతాక సన్నివేశాల్లో నట విశ్వరూపం చూపించారు. నిజంగా పోతులయ్య పూనినట్టు చేశారు. జయమ్మగా రష్మిక నటన బావుంది. బ్రహ్మ మల్లన్న పాత్రలో మలయాళ నటుడు లాల్ గెటప్, ఆయన నటన 'మగధీర'లో రావు రమేష్ ను గుర్తు చేస్తాయి. హీరో తల్లిగా ఈశ్వరి రావు, ఇతర నటీనటులు తమ పాత్రల పరిధి మేరకు చేశారు.

Ranabaali Verdict: విజయ్ దేవరకొండ నట విశ్వరూపాన్ని 'రణబాలి'లో చూడొచ్చు. మల్లన్న స్వామి పూనినట్టు పతాక సన్నివేశాల్లో తాండవం చేశారు. రూరల్ మాస్ యాక్షన్ డ్రామాలు సైతం తాను చేయగలనని చాటి చెప్పారు. విజయ్ దేవరకొండ, రష్మిక జోడీతో పాటు వాళ్ళిద్దరి సన్నివేశాలూ బావున్నాయి. దర్శకుడు రాహుల్ సాంకృత్యాన్ కథలో కొత్తదనం లేదు. కానీ, కథనంలో కొన్ని 'హై' మూమెంట్స్, గూస్ బంప్స్ వచ్చే మూమెంట్స్ ఉన్నాయి. అయితే, ఆర్ఆర్ ఆ ఛాన్స్ ఇవ్వలేదు. ఈ సినిమాను మరీ తీసిపారేయలేం. అంచనాలు తక్కువ పెట్టుకుని వెళితే విజయ్ దేవరకొండ నటన నచ్చుతుంది.

రేటింగ్: 2.5/5

Also Read: EYES Web Series Review - 'ఐస్' వెబ్ సిరీస్ రివ్యూ: సోనీలివ్ ఓటీటీలో మలయాళ వెబ్ సిరీస్... తెలుగులోనూ స్ట్రీమింగ్

Jailer 2 Review - 'జైలర్ 2' రివ్యూ: 600 కోట్లు సినిమాకు సీక్వెల్... రజనీ మళ్ళీ బ్లాక్ బస్టర్ కొట్టారా?

Satya Pulagam — Thu, 15 Oct 2026 11:54:11 +0530

Rajinikanth Latest Movie Jailer 2 In Review: సూపర్ స్టార్ రజనీకాంత్ స్టైల్, స్వాగ్ చూపించి బాక్సాఫీస్ బరిలో ఆరు వందల కోట్లు కలెక్ట్ చేసిన సినిమా 'జైలర్'. క్రిటిక్స్ నుంచి సూపర్ రివ్యూలు రాలేదు. కానీ అభిమానులకు నచ్చింది. భారీ వసూళ్ళు సాధించింది. ఇప్పుడు ఆ సినిమాకు సీక్వెల్ 'జైలర్ 2' తీశారు దర్శకుడు నెల్సన్ దిలీప్ కుమార్. ఇవాళ (అక్టోబర్ 15న) థియేటర్లలోకి వచ్చింది. తెలుగులో సితార ఎంటర్‌టైన్‌మెంట్స్‌ సూర్యదేవర నాగవంశీ విడుదల చేశారు. ఈ సినిమా ఎలా ఉంది?

కథ (Jailer 2 Movie Story In Telugu): వర్మ మరణం తర్వాత కుటుంబంతో కలిసి తమిళనాడులోని ఓ మారుమూల పల్లెకు వెళతాడు టైగర్ ముత్తువేల్ పాండ్యన్ (రజనీకాంత్). అక్కడ ఓ సూపర్ మార్కెట్‌లో సూపర్ వైజర్‌గా పని చేస్తుంటాడు. మరో వైపు... వర్మను చంపిన వ్యక్తుల కోసం కేరళలోని దిలీప్ (సూరజ్ వెంజరమూడు) మనుషులు వెతుకుతున్నారు. అయితే... టైగర్ చేతికి చిక్కుతాడు దిలీప్.

దిలీప్ వెనుక, విగ్రహాల స్మగ్లింగ్ వెనుక గోవాలోని చక్రి కల్పక్ (మిథున్ చక్రవర్తి) ఫ్యామిలీ ఉందని టైగర్ ముత్తువేల్ పాండ్యన్ తెలుసుకుంటాడు. జైలర్ గురించి కల్పక్ ఫ్యామిలీకి తెలుస్తుంది. విగ్రహాలతో కూడిన తమ మూడు కంటైనర్లు ఇవ్వమని లేదంటే కుటుంబాన్ని అంతం చేస్తామని ముత్తువేల్ పాండ్యన్‌కు చక్రి తనయుడు బోధి కల్పక్ (ఎస్.జె. సూర్య), కుమార్తె కాంత (విద్యా బాలన్) వార్నింగ్ ఇస్తారు. అంతకు ముందు మాండ్యలోని ఆయన స్నేహితుడు (శివరాజ్ కుమార్) మీద ఎటాక్ చేసి అతని భార్య, పిల్లల్ని బంధిస్తారు. అప్పుడు టైగర్ ముత్తువేల్ పాండ్యన్ ఏం చేశారు? స్నేహితుడి కుటుంబంతో పాటు తన కుటుంబాన్ని ఎలా కాపాడాడు? అనేది సినిమా.

విశ్లేషణ (Jailer 2 Review In Telugu): 'జైలర్' చూసిన రజనీకాంత్ ఫ్యాన్స్, కామన్ ఆడియన్స్ ఎవరికి అయినా సరే... దర్శకుడు నెల్సన్ దిలీప్ కుమార్ రైటింగ్ ఎలా ఉంటుందో ఐడియా ఉంటుంది. అంతకు ముందు శివ కార్తికేయన్ హీరోగా తీసిన 'వరుణ్ డాక్టర్', నయనతార 'కొలమావు కోకిల' సినిమాల్లో నెల్సన్ కామెడీకి ఫ్యాన్స్ ఉన్నారు. ఆ వినోదానికి రజనీకాంత్ స్టైల్, స్వాగ్ యాడ్ కావడంతో బాక్సాఫీస్ బరిలో 'జైలర్' రికార్డులు క్రియేట్ చేసింది. అటువంటి సినిమాకు సీక్వెల్ అనేసరికి... 'జైలర్ 2' మీద అటు రజనీకాంత్ అభిమానులు, ఇటు సామాన్య ప్రేక్షకులలో ఎటువంటి అంచనాలు ఉంటాయో దర్శకుడు నెల్సన్ దిలీప్ కుమార్ (Nelson Dilipkumar)కు తెలుసు. అంచనాలను అందుకోవడానికి, అభిమానులను శాటిస్‌ఫై చేయడానికి ఆయన సేఫ్ గేమ్ ఆడారు.

'జైలర్' ఎక్కడ ముగిసిందో... 'జైలర్ 2' అక్కడ మొదలైంది. అయితే... 'జైలర్'ను మైండ్ లోనుంచి తీసేసి కొత్త సినిమాను చూస్తున్నట్టు చూసేలా చేయడంలో నెల్సన్ దిలీప్ కుమార్ రైటింగ్ వర్కవుట్ అయ్యింది. రజనీకాంత్, యోగిబాబు, నమో నారాయణ కలయికలో సన్నివేశాలు నవ్విస్తాయి. నెల్సన్ దిలీప్ కుమార్ ట్రేడ్ మార్క్ డార్క్ హ్యూమర్ మరోసారి వర్కవుట్ అయ్యింది. మధ్య మధ్యలో రజనీకాంత్ నుంచి ఫ్యాన్స్ ఆశించే విజిల్ వర్తీ మూమెంట్స్ అందించింది.

అసలు కథ ఇంటర్వెల్ తర్వాత మొదలైంది. కథను కొత్త మలుపు తిప్పారు. గోవా తీసుకువెళ్లి విగ్రహాల స్మగ్లింగ్ కనెక్షన్ ఇచ్చారు. దాంతో కామెడీ కొంత తగ్గింది. ఆ తర్వాత ఎమోషనల్ డోస్ కాస్త పెరిగింది. దాంతో అప్పటి వరకు సాఫీగా వెళ్లిన సినిమా నెమ్మదించిన ఫీలింగ్ కలుగుతుంది. అయితే ఫ్యాన్స్ ఆశించే సూపర్ స్టార్ హీరోయిజం ఇవ్వడంలో మాత్రం నెల్సన్ లోటు చేయలేదు. ముఖ్యంగా హృతిక్ రోషన్ అతిథి పాత్ర అదిరింది. ఒక్కసారిగా 'హై' మూమెంట్ ఇచ్చింది. టైగర్ ముత్తువేల్ పాండ్యన్ తనయుడి మరణానికి కారణం ఎవరో కుటుంబానికి తెలిసేలా చెప్పే సన్నివేశం మరింత భావోద్వేగ భరితంగా తీసుంటే... కల్పక్ ఫ్యామిలీ విలన్ ట్రాక్ ఇంకా బాగా రాసుంటే హీరోయిజం మరింత ఎలివేట్ అయ్యేది.

'జైలర్ 2'కు అనిరుధ్ రవిచందర్ సంగీతం మేజర్ ప్లస్ పాయింట్ అని చెప్పాలి. మరోసారి సూపర్ స్టార్ ఫ్యాన్ బాయ్ డ్యూటీ చేశారు అనిరుధ్. నేపథ్య సంగీతంలో 'హుకూమ్... టైగర్ కా హుకూమ్', 'గుండెల్ని పరిపాలించే నాయకుడేలే' సాంగ్స్ వచ్చినప్పుడు గూస్ బంప్స్ వస్తాయి. పాటలు కూడా బావున్నాయి. విజయ్ కార్తీక్ కణ్ణన్ సినిమాటోగ్రఫీ బావుంది. కథకు, సన్నివేశాలకు అవసరమైన టోన్ సెట్ చేసింది. ఎడిటింగ్ నీట్‌గా ఉంది. నిర్మాణ విలువలు ఉన్నత స్థాయిలో ఉన్నాయి. యాక్షన్ కొరియోగ్రఫీ హీరోయిజాన్ని ఎలివేట్ చేయడంలో హెల్ప్ అయ్యింది. హెవీ యాక్షన్ బ్లాక్స్ లేదా సీన్స్ లేవు. కానీ, సూపర్ స్టార్ ఇమేజ్ వల్ల ఆడియన్స్‌కు 'హై' ఇస్తాయి.

రజనీకాంత్ అంటే స్వాగ్, సూపర్ స్టార్ అంటే స్టైల్. తెరపై ఆయన స్లో మోషన్‌లో నడిస్తే చాలు అన్నట్టు రజనీ హీరోయిజాన్ని, ఆయన్ను నెల్సన్ దిలీప్ కుమార్ చూపించారు. రజనీ మేనరిజమ్స్ మరోసారి విజిల్స్ వేసేలా చేస్తాయి. రమ్యకృష్ణ, మిర్నా మీనన్, రిత్విక్ పాత్రల పరిధి తక్కువే. ఉన్నంతలో తమ పరిధి మేరకు చేశారు. ఎస్.జె. సూర్య సెటిల్డ్ పెర్ఫార్మన్స్ చేశారు. ఇటీవల కొన్ని సినిమాల్లో ఆయన చేత లౌడ్ యాక్టింగ్ చేయిస్తున్నారు. కానీ ఈ సినిమాలో అలా చేయలేదు. స్టైల్‌గా సిగరెట్ కలుస్తూ విలనిజం చూపించారు విద్యా బాలన్. యోగిబాబుతో పాటు నమో నారాయణ నవ్వించారు. సూరజ్ వెంజరమూడు తన ట్యాలెంట్ చూపించారు.

శివరాజ్ కుమార్, మోహన్ లాల్, జాకీ ష్రాఫ్ మరోసారి అతిథి పాత్రల్లో సందడి చేశారు. ఆ ముగ్గురి కంటే హృతిక్ రోషన్ అతిథి పాత్ర హైలెట్ అని చెప్పాలి. ఇక సినిమా చివరిలో విజయ్ సేతుపతి తళుక్కున మెరిశారు.

Jailer 2 Verdict: సూపర్ స్టార్ రజనీకాంత్ అభిమానులతో పాటు 'జైలర్' నచ్చిన ప్రేక్షకులను 'జైలర్ 2' మెప్పిస్తుంది. కథ, కథనం, ట్విస్టుల కంటే రజనీ స్టైల్ & స్వాగ్ తెరపై సన్నివేశాలను అలా చూసేలా చేశాయి. యోగిబాబు, నమో నారాయణతో రజనీ చేసిన సెటిల్డ్ కామెడీ నవ్విస్తుంది. అభిమానులతో మరోసారి 'వర్క్ వర్మ... వర్త్' అనిపించే సినిమా.

రేటింగ్: 3/5

Also Read: Comrade Kalyan Review - 'కామ్రేడ్ కళ్యాణ్' రివ్యూ: శ్రీవిష్ణు నవ్వించారా? కథలో ఏముంది? సినిమా ఎలా ఉందంటే?

Least Eligible Bachelor Review - 'లీస్ట్ ఎలిజిబుల్ బ్యాచిలర్' రివ్యూ: రెండు ఓటీటీల్లో 'జబర్దస్త్' బాబు కామెడీ సిరీస్ - హీరోగా హర్ష చెముడు ఏం చేశారంటే?

Satya Pulagam — Sat, 10 Oct 2026 14:35:19 +0530

ETV Win Original Web Series Least Eligible Bachelor Review In Telugu: హర్ష చెముడు హీరోగా నటించిన వెబ్ సిరీస్ 'లీస్ట్ ఎలిజిబుల్ బ్యాచిలర్'. ఐశ్వర్య హోలక్కల్ హీరోయిన్. 'హైపర్' ఆది, శ్రీదేవి, జీవన్, రూప శ్రావ్య, ప్రేమ్ సాగర్ ప్రధాన పాత్రల్లో నటించారు. 'జబర్దస్త్'తో నటుడిగా ప్రేక్షకులకు తెలిసిన 'బాబు' (బాబు డేగల) దర్శకుడిగా పరిచయం అయ్యారు. ఈటీవీ విన్, నెట్‌ఫ్లిక్స్ ఓటీటీల్లో స్ట్రీమింగ్ అవుతోంది. ఈ సిరీస్ ఎలా ఉందంటే?

కథ (Least Eligible Bachelor Web Series Review): తేజ (హర్ష చెముడు)ది రెంట చింతల అనే పల్లెటూరు. తండ్రి (ప్రేమ్ సాగర్)కు రెండు రైసు మిల్లులు, ఐదెకరాల పొలం ఉంది. సంపాదనకు లోటు లేదు. కానీ, తనయుడికి పెళ్ళి కావడం లేదనే టెన్షన్ ఉంది. ఉద్యోగం ఉంటే పెళ్ళి సంబంధాలు వస్తాయని స్నేహితుడు చెప్పడంతో హైదరాబాద్ షిఫ్ట్ అవుతాడు తేజ. ఓ సాఫ్ట్‌వేర్ కంపెనీలో ఉద్యోగం వస్తుంది.

తేజకు ఉద్యోగం వచ్చిన కంపెనీలో ముందు నుంచి మధు (ఐశ్వర్య హోలక్కల్) పని చేస్తుంది. ఆమె ట్యాలెంటెడ్. తేజ పైస్థాయి ఉద్యోగి. తండ్రి తీసుకు వెళ్లిన పెళ్ళి చూపుల్లో మధును చూసి షాక్ అవుతాడు తేజ. తనకు 'నో' చెబుతుందని ఫిక్స్ అవుతాడు. అయితే... తనకు ఈ పెళ్ళి ఇష్టమే అని మధు చెబుతుంది. కాకపోతే ఆరు నెలల తర్వాత పెళ్ళి చేసుకుందామని, పెద్దలతో అలాగే చెప్పమని తేజను అడుగుతుంది.

పెళ్ళికి ఆరు నెలలు వెయిట్ చేద్దామని మధు ఎందుకు ఆగింది? ఆ ఆరు నెలలూ తేజతో కలిసి ఫ్లాట్ షేర్ చేసుకోవడానికి ఎందుకు ఒప్పుకొంది? అసలు మధు ప్లాన్ ఏంటి? ఓవైపు పెళ్ళికి ఒప్పుకొని మరోవైపు అమెరికా వీసాకు ఎందుకు అప్లై చేసింది? అసలు తేజ మనసులో ఏముంది? చివరకు ఏమైంది? అనేది వెబ్ సిరీస్ చూసి తెలుసుకోవాలి.

విశ్లేషణ (Least Eligible Bachelor Review Telugu): 'లీస్ట్ ఎలిజిబుల్ బ్యాచిలర్' ట్రైలర్ చూస్తే... సిరీస్ కథ ఎలా ఉంటుందో ఐడియా వస్తుంది. పెళ్ళి కాని ప్రసాద్ కష్టాలను 'మల్లీశ్వరి'లో త్రివిక్రమ్ చూపించారు. ఇక్కడ పెళ్ళి కాని ప్రసాద్ తండ్రి కష్టాలను చూపిస్తూ కామెడీ చేశారు దర్శక రచయిత 'జబర్దస్త్' బాబు.

సింపుల్‌గా చెప్పాలంటే... ప్రతి అమ్మాయి వద్దనుకునే కుర్రాడు తేజ. ఎలాగైనా సరే కొడుక్కి పెళ్ళి చేయాలని ప్రయత్నించే తండ్రి. ఏకంగా హైదరాబాద్‌లో ఫ్లాట్ కొని అమ్మాయితో లివ్-ఇన్ (సహ జీవనం) చేయమని కొడుకుని ఎంకరేజ్ చేస్తాడు. ఈ కథలో బలం కంటే క్యారెక్టర్లలో, సన్నివేశాల్లో వినోదం ఎక్కువ ఉండేలా చూసుకున్నారు బాబు. 'జబర్దస్త్', 'శ్రీదేవి డ్రామా కంపెనీ'ల్లో స్కిట్స్ రాసిన అనుభవం ఉండటంతో కామెడీ ట్రాక్స్ బాగా రాసుకున్నారు. రొటీన్ కథను కామెడీతో రన్ చేశారు. క్లైమాక్స్ చూసేటప్పుడు 'తొలిప్రేమ' ఛాయలు కనిపిస్తాయి. అజయ్ అరసాడ పాటలు, నేపథ్య సంగీతం ఓకే. కెమెరా వర్క్ కూడా బావుంది. ప్రొడక్షన్ డిజైన్ కూడా నీట్‌గా చేశారు.

తేజ పాత్రలో హర్ష చెముడు జీవించారు. క్యారెక్టర్ స్పేస్ తెలుసుకుని సెటిల్డ్ & డీసెంట్ పెర్ఫార్మన్స్ ఇచ్చారు. ముఖ్యంగా లాస్ట్ ఎపిసోడ్‌లో ఎమోషనల్ సీన్ హర్షలో అసలైన నటుడిని బయటకు తీసుకు వచ్చింది. ఐశ్వర్య హోలక్కల్ అందంగా కనిపించారు. చక్కగా నటించారు. హైపర్ ఆది - శ్రీదేవి ట్రాక్ వర్కవుట్ అయ్యింది. జీవన్ సీన్స్ కూడా నవ్వించాయి. సాఫ్ట్‌వేర్ కంపెనీ అని కాదు... ఏ ఆఫీస్ స్పేస్ అయినా సరే సెట్టయ్యేలా 'జబర్దస్త్' జోక్స్ రాశారు. అంతే కానీ సాఫ్ట్‌వేర్ ఆఫీసులో సిట్చువేషన్స్ కనిపించలేదు. దర్శక రచయితగా బాబు ప్రత్యేకత కనిపించలేదు. కానీ, కామెడీతో నవ్వించారు.

Least Eligible Bachelor Verdict: సింపుల్ & రొటీన్ కథతో రూపొందిన వెబ్ సిరీస్ 'లీస్ట్ ఎలిజిబుల్ బ్యాచిలర్'. కథ పక్కన పెడితే కామెడీ ఉంది. నవ్విస్తుంది. అది మాస్ కామెడీ. 'జబర్దస్త్' ఎంజాయ్ చేసే వీక్షకులను ఎక్కువ నవ్విస్తుంది. హర్ష చెముడు - ఐశ్వర్య హోలక్కల్, హైపర్ ఆది - శ్రీదేవి నటనకు తోడు బాబు రచనలో వినోదం కాసేపు నవ్విస్తుంది. సిరీస్ చూస్తూ వీకెండ్‌లో టైమ్ పాస్ చేయవచ్చంతే.

Also Read: Anumana Pakshi Review - 'అనుమాన పక్షి' రివ్యూ: ప్రతిదీ అనుమానించే కుర్రాడు... DJ Tillu దర్శకుడి కొత్త సినిమా ఎలా ఉందంటే?

EYES Web Series Review - 'ఐస్' వెబ్ సిరీస్ రివ్యూ: సోనీలివ్ ఓటీటీలో మలయాళ వెబ్ సిరీస్... తెలుగులోనూ స్ట్రీమింగ్

Satya Pulagam — Fri, 9 Oct 2026 16:25:09 +0530

SonyLiv Web Series Eyes Review In Telugu: సమంత 'శాకుంతలం', లావణ్య త్రిపాఠి కొణిదెల 'సతీ లీలావతి' సినిమాల్లో హీరోగా నటించిన మలయాళ నటుడు దేవ్ మోహన్ గుర్తు ఉన్నారా? ఆయన నటించిన వెబ్ సిరీస్ 'ఐస్'. 'డియర్ కామ్రేడ్' ఫేమ్ శృతి రామచంద్రన్, 'మేడ మీద అబ్బాయి' ఫేమ్ నిఖిలా విమల్ సహా కని కుస్రుతి, రియా జీతు, సానియా అయ్యప్పన్‌, అనఘా తదితరులు ఇతర ప్రధాన తారాగణం. మనూ అశోకన్ దర్శకత్వం వహించారు. మలయాళంలో తెరకెక్కిన ఈ సిరీస్, సోనీ లివ్ ఓటీటీలో తెలుగు, తమిళ, హిందీ భాషల్లోనూ స్ట్రీమింగ్ అవుతోంది. ఈ సిరీస్ ఎలా ఉందంటే?

కథ (Eyes Web Series Story): కొచ్చిలోని కేఫ్‌లో తన ప్రేమను తిరస్కరించిందని ఓ అమ్మాయి గొంతును కత్తితో కోసి, ఆ తర్వాత అలాగే ఆత్మహత్య చేసుకుంటాడు ఓ యువకుడు. అటువంటి వేధింపులకు అడ్డుకట్ట వేసి, మహిళలకు రక్షణ కల్పించడానికి ఏదో ఒకటి చేయాలని పోలీసులు ప్రయత్నిస్తారు.

విద్య (శృతి రామచంద్రన్) రూపొందించిన సాఫ్ట్‌వేర్ సాయంతో స్టాకర్స్ (మహిళలను వెంబడిస్తూ వేధింపులకు గురి చేసే మగాళ్ళు) కదలికలు, చర్యలను గమనించే ట్రయల్ ప్రోగ్రామ్ చేపడుతుంది పోలీసు శాఖ. అందులో సైకాలజిస్టులు ఆయేషా (నిఖిలా విమల్), తన్వి (రియా జీతు)తో పాటు ఇద్దరు పోలీసులు ఉంటారు.

ఫోటోగ్రాఫర్ మిలన్ శేఖర్ (వాసు బోస్) నుంచి ప్రముఖ నటి రితికా (అనఘా), ఓ ఐఏఎస్ అధికారి సజిన్ (దేవ్ మోహన్) నుంచి భార్య శోభిత (సానియా అయ్యప్పన్) వేధింపులు ఎదుర్కొంటారు. ఈ రెండిటితో పాటు మరో రెండు కేసులు ఉంటాయి. 'ఐస్' ద్వారా ఎలా సాల్వ్ అయ్యాయి? తన్వి పెళ్లి కథలో మలుపులు, ఆయేషా తండ్రి నేపథ్యం, విద్య ఫైనాన్షియల్ స్ట్రగుల్స్ ఏమిటి? అనేది సిరీస్ చూసి తెలుసుకోవాలి.

విశ్లేషణ (Eyes Web Series Review Telugu): మలయాళంలో వచ్చే క్రైమ్ థ్రిల్లర్స్, ముఖ్యంగా పోలీస్ ఇన్వెస్టిగేషన్ నేపథ్యంలోని క్రైమ్ థ్రిల్లర్లకు సపరేట్ ఫ్యాన్ బేస్ ఉంది. చిన్న కేస్ పట్టుకుని తీసిన గ్రిప్పింగ్ థ్రిల్లర్స్ తెలుగు ప్రేక్షకులను సైతం ఆకట్టుకున్న సందర్భాలు ఉన్నాయి. అయితే... ఇప్పటి వరకు వచ్చిన క్రైమ్ థ్రిల్లర్లకు కాస్త డిఫరెంట్ థ్రిల్లర్ 'ఐస్'.

ఇప్పటి వరకు వచ్చిన థ్రిల్లర్ సిరీస్ లేదా సినిమాలు గమనిస్తే? క్రైమ్ జరిగిన తర్వాత హంతకులను పట్టుకోవడానికి ఇన్వెస్టిగేషన్ చేయడం లేదంటే సీరియల్ కిల్లర్స్ మరో క్రైమ్ చేయకుండా ఉండటానికి ప్రయత్నించడం వంటి పాయింట్స్ కథా వస్తువులు అయ్యాయి. 'ఐస్' ప్రత్యేకత ఏమిటంటే... మహిళలను వెంబడిస్తూ వేధించే ఆకతాయిలను నేరం చేయకుండా ఆపడానికి ప్రయత్నించడం.

చదువు సంధ్యలకు దూరమై, మత్తు పదార్థాలకు అలవాటు పడి సైకోలుగా మారిన యువకుల నుంచి మహిళలకు వేధింపులు ఎదురవడాన్ని తెరపై ఎక్కువగా చూశాం. ఉన్నత చదువులు చదివి, మంచి ఉద్యోగాల్లో ఉన్న వ్యక్తుల నుంచి భార్యకు ఎలాంటి వేధింపులు ఎదురవుతాయి? అనేది 'ఐస్'లో చూపించారు. అదొక్కటే కాదు... నాలుగు కేసులూ వేటికవే డిఫరెంట్. సమాజంలో మహిళలకు ఎటువంటి వేధింపులు ఎదురవుతున్నాయి? అనేది చూపించడం బావుంది. అయితే... కథను తెరకెక్కించిన విధానం చాలా నిదానంగా ఉంది. ఎంత సేపటికీ ముందుకు కదలదు.

సాధారణంగా మలయాళ సినిమాలు నిదానంగా సాగుతాయని విమర్శ ఉంది. ఓటీటీలో వెబ్ సిరీస్ కనుక దర్శకుడు మనూ అశోకన్‌, రచయితలు బాబీ - సంజయ్ మరింత స్వేచ్ఛ తీసుకుని డిటైల్డ్‌గా చూపించారు. అయితే... రిపీట్ సీన్స్ ఎక్కువ అయ్యాయి. సన్నివేశాలను వేర్వేరు కోణాల్లో చూపించడం వల్ల బోర్ కొట్టిన మూమెంట్స్ ఎక్కువ. కేసులు వేర్వేరు కానీ... ఆ కేసుల్లో చూపించిన సన్నివేశాలు మాత్రం కొత్త కాదు. రొటీన్ టెంప్లేట్ సీన్స్, స్క్రీన్ ప్లేతో సాగదీశారు. ఒక్కో ఎపిసోడ్ నిడివి సుమారు 50 నిమిషాలు. ఏడు ఎపిసోడ్స్ ఉన్నాయి. స్టార్ట్ టు ఎండ్ ఫినిష్ చేసేలా అయితే సిరీస్ లేదు. ట్విస్టులు ఎంగేజ్ చేయలేదు. స్క్రీన్ ప్లే థ్రిల్ ఇవ్వలేదు.

ఐఏఎస్ అధికారి పాత్రలో దేవ్ మోహన్ లుక్స్ ఓకే. నటుడిగానూ ఆ పాత్రకు తగ్గట్టు చేశారు. నిఖిలా విమల్, శృతి రామచంద్రన్, కని కుస్రుతి, రియా జీతు, సానియా అయ్యప్పన్ తదితరులు తమ తమ పాత్రల పరిధి మేరకు నటించారు. టెక్నికల్ పరంగా సోసోగా ఉందీ సిరీస్. ఆర్ఆర్ గానీ, కెమెరా వర్క్ గానీ ఇంప్రెస్ చేయలేదు.

Eyes Web Series Verdict: మహిళలపై వేధింపులకు అడ్డుకట్ట వేయడం కోసం 'ఐస్' వంటి ప్రోగ్రామ్ తీసుకు రావాలనే ఆలోచన మంచిదే. అయితే... లిబర్టీ ఎక్కువ తీసుకున్నారు. సొసైటీలో అటువంటి ప్రయత్నానికి ఎంత మంది ఓకే చెబుతారు? అనేది ప్రశ్న. అది పక్కన పెడితే... అటువంటి ప్రోగ్రామ్ తీసుకు వస్తే బావుంటుందనేంతలా సిరీస్ తెరకెక్కించలేదు. కంప్లీట్ చేయడానికి ఓపిక కావాలి.

Also Read: Don't Trouble The Trouble Review - 'డోంట్ ట్రబుల్ ద ట్రబుల్' రివ్యూ: నిర్మాతగా రాజమౌళి తనయుడు తీసిన సినిమా - హిట్టా? ఫట్టా?

Comrade Kalyan Review - 'కామ్రేడ్ కళ్యాణ్' రివ్యూ: శ్రీవిష్ణు నవ్వించారా? కథలో ఏముంది? సినిమా ఎలా ఉందంటే?

Satya Pulagam — Fri, 9 Oct 2026 09:10:45 +0530

Sree Vishnu Comrade Kalyan Movie Review: శ్రీ విష్ణు కథానాయకుడిగా నటించిన తాజా సినిమా 'కామ్రేడ్ కళ్యాణ్'. ప్రచార చిత్రాలు సినిమాపై ఆసక్తి పెంచాయి. ఆంధ్ర ఒరిస్సా సరిహద్దు ప్రాంతాల్లో విప్లవం కోసం పోరాటం చేసే ఓ యువకుడు ప్రేమలో పడితే? అనే కాన్సెప్ట్‌తో రూపొందిన చిత్రమిది. కోన వెంకట్ సమర్పణలో జానకిరామ్ దర్శకత్వం వహించారు. ఇందులో మహిమా నంబియార్ కథానాయిక. ఈ సినిమా ఎలా ఉందో రివ్యూలో తెలుసుకోండి.

కథ (Comrade Kalyan Movie Story): అది 1994... ఒరిస్సా సరిహద్దుకు సమీపంలో ఏపీలోని అన్నలు ఏరివేయడానికి ఐపీఎస్ అధికారి జార్జ్ కుట్టి (షైన్ టామ్ చాకో)ను నియమిస్తుంది ప్రభుత్వం. ఆ ప్రాంతంలోని ఓ పల్లెటూరిలో పాడుబడ్డ థియేటర్ రన్ చేస్తుంటాడు కళ్యాణ్ (శ్రీవిష్ణు). అతని తల్లి సరస్వతమ్మ (రాధికా శరత్ కుమార్) బాలకృష్ణకు వీరాభిమాని. ఏదో ఒక పని చేసి పోలీస్ స్టేషన్‌కు వెళితే ఎంతో కొంత డబ్బులు ఇచ్చి విడిపించుకుని రావడం కళ్యాణ్‌కు అలవాటు అవుతుంది. ఓసారి తల్లిని ప్రమాదం నుంచి కాపాడిన ఒరియా అమ్మాయి సితార దేవి (మహిమా నంబియార్)తో ప్రేమలో పడతాడు.

సితార కోసం ఏమైనా చేయడానికి కళ్యాణ్ సిద్ధపడతాడు. సితార అన్నయ్య చదువు కోసం చేసిన అప్పుల వల్ల వాళ్ళ కుటుంబం ఇబ్బందులు పడుతుందని కళ్యాణ్ తెలుసుకుంటాడు. కుదిరితే అప్పు కట్టమని లేదంటే సితారను ఇచ్చి పెళ్ళి చేయమని బిశ్వాస్ (ఉపేంద్ర లిమాయే) వెంటపడతాడు. ఆ అప్పు కట్టడం కోసం కళ్యాణ్ రిస్క్ చేస్తాడు. తప్పనిసరి పరిస్థితుల్లో కామ్రేడ్ కళ్యాణ్ అవుతాడు. ఆ తర్వాత ఏమైంది? కళ్యాణ్ చేసిన రిస్క్ ఏమిటి? జార్జ్ కుట్టి ఏం చేశాడు? చివరకు సితార ప్రేమను దక్కించుకున్నాడా? లేదా? అనేది సినిమా.

విశ్లేషణ (Comrade Kalyan Telugu Review): మావోయిస్టు / నక్సల్స్ కాన్సెప్ట్ తెలుగు తెరపై వర్కవుట్ అవ్వదని 'ఆచార్య'తో ఇటు ఇండస్ట్రీ, అటు ఆడియన్స్ బలంగా ఫిక్స్ అయ్యారు. ఆ సినిమా రిజల్ట్ చాలా మంది దర్శక రచయితలను ఆ కాన్సెప్ట్ వైపు ఆలోచించడం మానేసేలా చేసింది. ఈ తరుణంలో 'కామ్రేడ్ కళ్యాణ్' అంటూ శ్రీవిష్ణు సినిమా అనౌన్స్ చేశారు. శ్రీవిష్ణు అంటే కామెడీ సినిమా అని అందరూ ఫిక్స్ అయ్యారు. అందుకు తగ్గట్టు సన్నివేశాలు సైతం ఉన్నాయి. అయితే... అవి పూర్తి స్థాయిలో మెప్పించలేదు.

ప్రతి కథకు ఓ కోర్ పాయింట్ ఉంటుంది. అది పాతదైనా ప్రేక్షకులకు తెలిసిన పాయింట్ అయితే దాని చుట్టూ ఎంత వినోదమైనా పండించవచ్చు. కామ్రేడ్ / మావోయిస్టు / నక్సల్ కాన్సెప్ట్ ఈతరం ప్రేక్షకులలో చాలా తక్కువ మందికి, మరీ ముఖ్యంగా థియేటర్లకు వస్తున్న యువతకు ఓల్డ్ కాన్సెప్టే. ఆర్ నారాయణమూర్తి తెలుసు గానీ... ఆయన ఎర్ర సైన్యం సినిమా చూసిన, గుర్తున్న ప్రేక్షకులు తక్కువ మంది. అందువల్ల, సినిమా ప్రారంభంలో హీరో పరిచయం, ఆ పాట అంతగా కనెక్ట్ అవ్వవు. తర్వాత బాలయ్య అభిమానిగా రాధిక, పోలీసుగా బ్రహ్మాజీ, హీరో స్నేహితుడిగా దుబాయ్ బాబు పాత్రలో సత్య కామెడీ కొంత నవ్వించాయి. అయితే ఇంటర్వెల్ తర్వాత అడివిలోని అన్నల దగ్గరకు కథ వెళ్లిన తర్వాత ఆ స్థాయి కామెడీ పండలేదు. 'జల్సా'లో పవన్ కళ్యాణ్, ప్రకాష్ రాజ్ మధ్య త్రివిక్రమ్ మంచి కామెడీ ట్రాక్ రాశారు. కానీ, ఇక్కడ దర్శకుడు జానకిరామ్ & స్క్రీన్ ప్లే రైటర్ కోన వెంకట్ ఆ మేజిక్ చేయలేదు. ఎమోషన్ కూడా పండలేదు. దాంతో సెకండాఫ్ కాస్త బోర్ కొడుతోంది.

'కామ్రేడ్ కళ్యాణ్'లో విజయ్ బుల్గానిన్ పాటలు ఓకే. అయితే నేపథ్య సంగీతం ఆశించిన స్థాయిలో లేదు. కథలో కొత్తదనం లేదు. కథనం ఊహించదగ్గ విధంగా ఉంది. జానకిరామ్ పాత సినిమాల తరహాలో తీయడానికి ప్రయత్నించారు. 1990 వాతావరణాన్ని తెరపై చూపించడంలో సినిమాటోగ్రాఫర్, ప్రొడక్షన్ డిజైనర్ సక్సెస్ అయ్యారు. నిర్మాణ విలువలు బావున్నాయి.

శ్రీవిష్ణుకు సవాల్ విసిరే క్యారెక్టర్ ఏమీ కాదు. తన మార్క్ డైలాగ్ డెలివరీ, నటనతో ఈజీగా చేసేశారు. మహిమా నంబియార్, రాధికా శరత్ కుమార్ స్క్రీన్ స్పేస్ తక్కువ. ఉన్నంతలో బాగా చేశారు. సత్య మరోసారి తన ట్యాలెంట్ చూపించారు. దుబాయ్ నుంచి తిరిగి వచ్చిన యువకుడిగా నవ్వించారు. సుదర్శన్ కామెడీ కూడా పర్వాలేదు. షైన్ టామ్ చాకో, శత్రు, రఘుబాబు, మురళీధర్ గౌడ్ తదితరులు రెగ్యులర్ రోల్స్ చేశారు.

Comrade Kalyan Verdict: 'కామ్రేడ్ కళ్యాణ్'లో కామెడీ ఉంది. పలు సన్నివేశాల్లో నవ్వించింది. అయితే... శ్రీవిష్ణు సినిమా అనేసరికి సహజంగా కొన్ని అంచనాలు ఏర్పడతాయి. వినోదం ఫుల్లుగా ఉంటుందని ప్రేక్షకులు ఆశిస్తారు. ఆ స్థాయిలో సినిమా లేదు. కామ్రేడ్ కాన్సెప్ట్ కొంత కామెడీకి హెల్ప్ అయ్యింది కానీ ఎమోషన్స్‌ వర్కవుట్ అవ్వడంలో హెల్ప్ చేయలేదు. శ్రీవిష్ణుతో పాటు సత్య నవ్వించారు. వాళ్ళ వినోదం కోసం ఎటువంటి అంచనాలు పెట్టుకోకుండా వెళ్ళడం మంచిది.

Also Read: Nani The Paradise Review - 'ది ప్యారడైజ్' రివ్యూ: నాని మాస్ మసాలా బిర్యానీ టేస్ట్ ఎలా ఉంది? సినిమా హిట్టా? ఫట్టా?

Don't Trouble The Trouble Review - 'డోంట్ ట్రబుల్ ద ట్రబుల్' రివ్యూ: నిర్మాతగా రాజమౌళి తనయుడు తీసిన సినిమా - హిట్టా? ఫట్టా?

Satya Pulagam — Fri, 2 Oct 2026 18:30:56 +0530

Fahadh Faasil's Don't Trouble The Trouble Movie Review In Telugu: మలయాళ కథానాయకుడు ఫహాద్ ఫాజిల్‌కు తెలుగులోనూ అభిమానులు ఉన్నారు. ఆయన మలయాళ సినిమాలు చూసిన తెలుగు ప్రేక్షకులు ఉన్నారు. 'పుష్ప'లో యాంటీ హీరోగా భన్వర్ సింగ్ షెకావత్ పాత్రలో మెప్పించారు. ఇప్పుడు 'డోంట్ ట్రబుల్ ద ట్రబుల్'తో తెలుగు చిత్రసీమకు హీరోగా పరిచయం అయ్యారు. 'బాహుబలి'తో పాటు పలు సినిమాలు నిర్మించిన ఆర్కా మీడియా వర్క్స్ అధినేతలు శోభు యార్లగడ్డ, ప్రసాద్ దేవినేనితో కలిసి రాజమౌళి తనయుడు ఎస్ఎస్ కార్తికేయ నిర్మించిన చిత్రమిది. శశాంక్ యేలేటి దర్శకుడు. ఈ సినిమా ఎలా ఉందో రివ్యూలో తెలుసుకోండి.

కథ (Don't Trouble The Trouble Story): సూరి (ఫహాద్ ఫాజిల్) అంబులెన్స్ డ్రైవర్. అతనో అనాథ. డబ్బు సంపాదన తప్ప మరొక ధ్యాస, ఆశ ఉండదు. లోకల్ డాన్ అస్లాం భాయ్ (మహేష్ మంజ్రేకర్)ను బోల్తా కొట్టిస్తాడు. దాంతో సూరికి రెండు రోజుల్లో పాతిక లక్షలు కట్టకపోతే చంపేస్తానని అల్టిమేటమ్ జారీ చేస్తాడు అస్లాం భాయ్.

డబ్బుల కోసం శ్రీమంతుల పిల్లల్ని కిడ్నాప్ చేయాలని సూరి ప్లాన్ చేస్తాడు. దివ్య (సారా పాలేకర్)తో పాటు ఆమె వెంట తిరిగే కుక్కను కూడా తనతో పాటు ఇంటికి తీసుకు వస్తాడు. దివ్య మావయ్య (సౌరభ్ సచ్‌దేవ్)కు ఫోన్ చేసి డబ్బులు డిమాండ్ చేస్తాడు. ఆ తర్వాత ఏమైంది? పోలీసుల ఎంట్రీతో సూరికి ఎటువంటి పరిస్థితులు ఎదురయ్యాయి? సూరికి తప్ప ఇతరులకు దివ్య ఎందుకు కనిపించలేదు? దివ్య తల్లిదండ్రులు ఏమయ్యారు? చివరకు ఏమైంది? అనేది సినిమా.

విశ్లేషణ (Don't Trouble The Trouble Review Telugu): 'డోంట్ ట్రబుల్ ద ట్రబుల్' అంటూ బాలకృష్ణ వైరల్ డైలాగును టైటిల్‌గా అనౌన్స్ చేయడంతో సినిమాపై క్రేజ్ నెలకొంది. ప్రచార చిత్రాల నుంచి ప్రీ రిలీజ్ ఈవెంట్‌కు మ్యాన్ ఆఫ్ మాసెస్ ఎన్టీఆర్ రావడం, ఆ తర్వాత ఆయనతో పాటు మహేష్ బాబు ట్వీట్లు చేయడం ఈ సినిమాకు మేజర్ ప్లస్ పాయింట్స్. ఓపెనింగ్స్ రావడంలో హెల్ప్ చేశాయి. మరి సినిమా ఎలా ఉంది? అనేది చూస్తే...

'డోంట్ ట్రబుల్ ద ట్రబుల్' ట్రైలర్ చూసి థియేటర్లకు వెళ్లిన ప్రేక్షకులకు 'వావ్' ఫ్యాక్టర్, 'సర్‌ప్రైజింగ్' మూమెంట్ రావడం కోసం రెండు గంటలు వెయిట్ చేయాలి. అప్పటి వరకు సినిమాలో చూపించే సన్నివేశాలు ఏవీ అంతగా ఆకట్టుకోవు. దానికి ప్రధాన కారణం... ట్రైలర్ కట్. సినిమాలో 'హై' పాయింట్స్ కొన్నిటిని తీసుకొచ్చి ట్రైలర్‌లో చూపించారు. వాటిని పక్కన పెట్టినా... డబ్బు కోసం సూరి చేసే పనులు గానీ, పాప ఎంట్రీ నుంచి ప్రీ క్లైమాక్స్ వరకు సీన్స్ గానీ ఎంగేజ్ చేయలేదు. అలాగే ఎంటర్‌టైన్ కూడా చేయలేదు. ముఖ్యంగా ఆ సన్నివేశాలు చూస్తుంటే... రామ్, తమన్నా జంటగా నటించిన 'ఎందుకంటే ప్రేమంట' గుర్తుకు వస్తుంది. కాస్త రోల్ చేంజెస్ చేశారంతే. అక్కడ హీరోయిన్ కనిపిస్తే, ఇక్కడ చిన్నారి కనిపిస్తుంది. ఆ మార్పు తప్పిస్తే మిగతా సన్నివేశాల్లో చాలా సిమిలారిటీస్ కనిపిస్తాయి. అటు సూరి, ఇటు దివ్య... రెండు క్యారెక్టర్లతో ట్రావెల్ చేసేలా సన్నివేశాలు లేవు.

చివరి అర గంటలో శశాంక్ యేలేటి ప్రతిభ కనిపిస్తుంది. వికారాబాద్ సీన్స్ అన్నీ బాగా డీల్ చేశారు. చివరిలో ఓ కౌగిలింత అయితే కళ్ళు చెమర్చేలా చేస్తుంది. ఆ సన్నివేశాల్లో కాలభైరవ నేపథ్య సంగీతం అద్భుతంగా ఉంది. 'డోంట్ ట్రబుల్ ద ట్రబుల్' ప్రారంభం నుంచి కాలభైరవ పాటలు, నేపథ్య సంగీతం బావున్నాయి. అలాగే, కెమెరా వర్క్ కూడా! హైదరాబాద్ రోడ్స్, లొకేషన్లను బాగా క్యాప్చర్ చేశారు. చిత్ర నిర్మాతలు ఎస్ఎస్ కార్తికేయ, శోభు యార్లగడ్డ, ప్రసాద్ దేవినేని ఖర్చుకు వెనుకాడలేదు.

హీరోగా ఫహాద్ ఫాజిల్ తొలి తెలుగు చిత్రమిది. సూరి పాత్రకు ఆయన న్యాయం చేశారు. అయితే తెలుగు డబ్బింగ్ విషయంలో ఇంకాస్త కేర్ తీసుకోవాల్సిన అవసరం ఉంది. బేబీ సారా పాలేకర్ నటన సినిమాకు ప్లస్ అయ్యింది. ఆమె కొత్తదనం తీసుకొచ్చింది. సౌరభ్ సచ్‌దేవ్, మహేష్ మంజ్రేకర్ తమ తమ పాత్రల్లో ఒదిగిపోయారు. పోలీస్ అధికారిగా సుబ్బరాజ్ పాత్ర పరిమితమే. ఉన్నంతలో ఆయన బాగా చేశారు. హీరో స్నేహితుడిగా వెంకటేష్ కాకుమాను కాస్త నవ్వించారు. కొన్ని చోట్ల ఎమోషనల్ సీన్స్ కూడా బాగా చేశారు. వెంకటేష్ కాకుమాను తల్లిగా సురభి ప్రభావతి కనిపించారు.

Don't Trouble The Trouble Verdict: ఫాంటసీ కామెడీ సినిమాగా తెరకెక్కిన 'డోంట్ ట్రబుల్ ద ట్రబుల్' స్టార్టింగ్ టు ఎండింగ్ ప్రేక్షకులను ఎంగేజ్ చేస్తూ ఎంటర్‌టైన్ చేయడంలో ఫెయిలైంది. ప్రీ క్లైమాక్స్ టు క్లైమాక్స్ మాత్రం బావుంది. ప్రేక్షకులు చూపు తిప్పుకోవ్వని విధంగా చేశారు. కాలభైరవ సంగీతం బావుంది. అందువల్ల... అంచనాలు పెట్టుకోకుండా థియేటర్లకు వెళ్ళడం మంచిది. ఫహాద్ ఫాజిల్ కొంత వరకు ఎంటర్‌టైన్ చేస్తారు. చివరిలో కాస్త కంటతడి పెట్టిస్తారు.

Also Read: Karthi Sardar 2 Review In Telugu - సర్దార్ 2 రివ్యూ: కార్తీ కెరీర్‌లో భారతీయుడు 2 అవుతుందా? పీఎస్ మిత్రన్ సినిమా హిట్టా? ఫట్టా?

Sigma Review - సిగ్మా రివ్యూ: సీఎం కొడుకు డైరెక్ట్ చేసిన సినిమా... సందీప్ కిషన్‌కు హిట్ వచ్చిందా?

Satya Pulagam — Fri, 2 Oct 2026 17:47:21 +0530

Sundeep Kishan And Jason Sanjay Movie Sigma Review In Telugu: సందీప్ కిషన్ కథానాయకుడిగా నటించిన తాజా సినిమా 'సిగ్మా'. ప్రస్తుత తమిళనాడు ముఖ్యమంత్రి జోసెఫ్ విజయ్ తనయుడు జేసన్ సంజయ్ దర్శకుడిగా పరిచయమయ్యారు. తెలుగు, తమిళ భాషల్లో సినిమా విడుదలైంది. ఫరియా అబ్దుల్లా కథానాయికగా, సంపత్ రాజ్ ప్రతినాయకుడిగా నటించిన ఈ సినిమా ఎలా ఉంది? జేసన్ సంజయ్ దర్శకత్వం ఎలా ఉంది? అంటే...

కథ (Sigma Movie Story): విశాఖలో సొంత ఇంటిలో గురు (సందీప్ కిషన్) లైబ్రరీ రన్ చేస్తుంటాడు. ఆ ఇంటిలో అమ్మను చూసుకుంటాడు. అయితే, ఆ ఇంటిపై కోటి రూపాయల అప్పు ఉంది. అది తీర్చమని ఒత్తిడి వస్తుంది. పరిస్థితి పీకల మీదకు రావడంతో పాత థియేటర్‌లో విన్సెంట్ (శివ్ పండిట్) రన్ చేసే క్యాసినోకి వెళతాడు గురు. తనతో పాటు తన ఆడియో లైబ్రరీ పార్టనర్ ఆర్జే సామ్ (ఫరియా అబ్దుల్లా) డబ్బులు పోగొట్టి వస్తాడు. గొడవ అవుతుంది.

విన్సెంట్ చీకటి దందా (డ్రగ్స్, గ్యాంబ్లింగ్)కు సంబంధించిన వీడియో గురుకు దొరుకుతుంది. దాన్ని అడ్డం పెట్టుకుని అప్పు తీర్చడానికి సరిపడా డబ్బులు వసూలు చేయాలని గురు ప్లాన్ చేస్తాడు. కానీ, ఫెయిల్ అవుతాడు. గురు దగ్గరున్న వీడియో కోసం విన్సెంట్, ఓ తాళం చెవి కోసం కోట్లపాడి వెంకట రెడ్డి (సంపత్ రాజ్) ఎందుకు టెన్షన్ పడుతున్నారు? ఆ తాళం చెవిలో ఏముంది? వాళ్ళ నుంచి గురు ఎలా బయట పడ్డాడు? తనకు ఎదురైన ఆపదలను ఎలా తప్పించుకున్నాడు? అనేది సినిమా.

విశ్లేషణ (Sigma Review In Telugu): లోకేష్ కనగరాజ్, నెల్సన్ దిలీప్ కుమార్, కార్తీక్ సుబ్బరాజ్ వంటి తమిళ దర్శకులు యాక్షన్ ఫిలిమ్స్ తీయడంలో కొత్త ట్రెండ్ క్రియేట్ చేస్తున్నారు. స్క్రీన్ ప్లే, హీరోయిజం, సబ్జెక్టుల ఎంపికలో అటు తమిళ, ఇటు తెలుగు ప్రేక్షకులను సర్‌ప్రైజ్ చేస్తున్నారు. దాంతో ప్రస్తుత ముఖ్యమంత్రి, సీఎం అయ్యే ముందు వరకు తమిళ చిత్రసీమలో స్టార్ హీరోగా కోట్లాది మంది అభిమానం సొంతం చేసుకున్న విజయ్ తనయుడు జేసన్ సంజయ్ హీరోగా కాకుండా దర్శకుడిగా సినిమా చేయడంతో ఎటువంటి సినిమా చేశారోనని అందరిలో ఆసక్తి నెలకొంది.

'సిగ్మా' మొదలైన పది పదిహేను నిమిషాలకు ప్రేక్షకులలో ఆసక్తి సన్నగిల్లుతుంది. కొత్త కథతో కాకుండా అవుట్ డేటెడ్ కమర్షియల్ స్టైల్‌లో జేసన్ సంజయ్ సినిమా తీశారని అర్థం అవుతోంది. హీరో ఇంట్రడక్షన్ నుంచి ఆ తర్వాత వచ్చే కామెడీ సీన్ వరకు ఏదీ ఆకట్టుకునేలా లేదు. లైబ్రరీ ఓల్డ్ అంటే, ఆడియో లైబ్రరీ అంటూ ఈ జనరేషన్ కథలను ఆడియో రూపంలో వింటున్న తీరును కూడా చూపించారు. కానీ ఎక్కడా కనెక్టివిటీ ఉండదు. సినిమా మొదలైన గంట వరకు హీరో సమస్యలను మాత్రమే చూపించారు. ఆ తర్వాత విలన్ పాత్రను పూర్తిగా పరిచయం చేశారు. అప్పుడైనా కథలో వేగం పెరుగుతుందని ఆశిస్తే అదీ జరగలేదు. హీరో అండ్ విలన్ మధ్య ఫైట్ అయితే క్యాట్ అండ్ మౌస్ గేమ్ (పిల్లి ఎలుక మధ్య ఆట)ను తలపించింది. చివరకు క్లైమాక్స్ ఎప్పుడు వస్తుంది? అని ఎదురు చూసేలా చేశారు. కథ, కథనాల్లో హాలీవుడ్ సినిమాల ప్రభావం కనిపించింది. కానీ, ఆ స్థాయిలో చేయలేదు.

కథకుడిగా, దర్శకుడిగా జేసన్ సంజయ్ కొంచెం కూడా కొత్తదనం చూపించలేదు. అవుట్ అండ్ అవుట్ కమర్షియల్ ఫార్మట్‌లో పది పదిహేనేళ్ల క్రితం తీయాల్సిన కథతో సినిమా చేశారు. తమన్ సైతం ఆ స్థాయిలో ఆర్ఆర్ ఇచ్చారు. పాటల్లో ఒక్కటి కూడా గుర్తు పెట్టుకునేలా లేదు. నేపథ్య సంగీతంలో కొన్ని చోట్ల 'అతడు' బీజీఎమ్, మరికొన్ని చోట్ల హాలీవుడ్ స్టైల్ ఆర్ఆర్ వినిపించింది. కెమెరా వర్క్ నుంచి మిగతా టెక్నికల్ టీమ్ పనితీరులో ప్రశంసించేవి ఏవీ లేవు. పాపం... లైకా ప్రొడక్షన్స్ - బ్యాక్ టు బ్యాక్ డిజాస్టర్లు అందుకుంటోంది.

హీరోగా సందీప్ కిషన్ నటనలో కొత్తదనం లేదు. ఆయన ఎప్పటిలా నటించారు. ఆ పాత్రకు తగ్గట్టు చేశారంతే. ఇటువంటి విలన్ రోల్స్ సంపత్ రాజ్ చాలా చేశారు. ఫరియా అబ్దుల్లా పాత్రకు కథలో కాస్త ప్రాముఖ్యత ఉంది. నటిగా ఆ పాత్రకు న్యాయం చేసే ప్రయత్నం చేశారు. రాజు సుందరంతో కాస్త కామెడీ చేయించాలని చూశారు. కానీ కుదరలేదు. శివ్ పండిట్ సహా మిగతా ఆర్టిస్టుల్లో తెలుగు ప్రేక్షకులకు తెలిసిన ముఖాలు తక్కువ.

విజయ్ తనయుడు జేసన్ సంజయ్, సందీప్ కిషన్ కలిసి కొత్త తరహా సినిమా తీసి ఉంటారని ఆశిస్తే... బాగా డిజప్పాయింట్ చేశారు. ఇంతకు ముందు సందీప్ కిషన్ పరిచయం చేసిన దర్శకులు తమ మార్క్ చూపించారు. కానీ జేసన్ సంజయ్ ఓల్డ్ స్టైల్ సినిమా చేశారు. 'సిగ్మా' టైటిల్ జస్టిఫికేషన్ అన్నట్టు సినిమా చివరిలో ఓ మాట చెప్పారు ఫరియా అబ్దుల్లా. ఆ డైలాగ్ ఎందుకు రాయించారో అర్థం కాదు. అప్పటి వరకు చూసిన సినిమా కూడా అర్థం కాదు. కమర్షియల్ ఫార్మాట్‌లో తీసిన అవుట్ డేటెడ్ సినిమా 'సిగ్మా'.

Anumana Pakshi Review - 'అనుమాన పక్షి' రివ్యూ: ప్రతిదీ అనుమానించే కుర్రాడు... DJ Tillu దర్శకుడి కొత్త సినిమా ఎలా ఉందంటే?

Satya Pulagam — Fri, 25 Sep 2026 13:30:06 +0530

Rag Mayur Anumana Pakshi Movie Review In Telugu: 'సినిమా బండి'తో రాగ్ మయూర్ మంచి పేరు తెచ్చుకున్నారు. 'కీడా కోలా', 'శుభం' సినిమాల్లో కీలక పాత్రలు చేశారు. ఇప్పుడు ఆయన హీరోగా నటించిన సినిమా 'అనుమాన పక్షి'. మెరిన్ ఫిలిప్ హీరోయిన్. 'డీజే టిల్లు' ఫేమ్ విమల్ కృష్ణ దర్శకత్వం వహించారు. రాజీవ్ చిలక, రాజేష్ జగ్తియాని, హిరాచంద్ దండ్ నిర్మించారు. సెప్టెంబర్ 25న విడుదలైంది. ఈ సినిమా ఎలా ఉందో రివ్యూలో తెలుసుకోండి.

కథ (Anumana Pakshi Story): సన్నీ (రాగ్ మయూర్)కు అనుమానం ఎక్కువ. సమయం, సందర్భం లేకుండా ప్రతి క్షణం, ప్రతి విషయంలో అనుమానం వ్యక్తం చేస్తుంటాడు. అటువంటి సన్నీకి ఓ రోజు కశ్మీర్ నుంచి మెసేజ్ వస్తుంది. సన్నీ చేసిన ఓ పని వల్ల నష్టపోతాడు అనంత్ (చరిత్). ఒంటరి అవుతాడు. కశ్మీర్ రమ్మని, లేదంటే ఆత్మహత్య చేసుకుని నీ పేరు రాస్తా అని అనంత్ బెదిరించడంతో వర్మ (ప్రిన్స్), మరొక స్నేహితుడితో కలిసి వెళతాడు.

కశ్మీర్ వెళ్లిన సన్నీకి కన్య (మెరిన్ ఫిలిప్) పరిచయం అవుతుంది. ప్రేమలో పడతాడు. అంతా హ్యాపీ అనుకున్న సమయంలో వర్మ మరణిస్తాడు. సరిగ్గా అదే సమయంలో ఆ రిసార్టుకు విశాఖ పోలీస్ వాసు (అజయ్), అతని భార్య సుజాత (రాశి) వస్తారు. సుజాతకు ఆత్మలతో మాట్లాడగల శక్తులు ఉన్నాయి. వర్మ మరణించాడని సుజాత పసిగడుతుంది.

వర్మ మృతికి కారణం ఏమిటి? ఆ సమస్య నుంచి సన్నీ ఎలా బయట పడ్డాడు? కన్యతో అతని ప్రేమ కథ సుఖాంతం అయ్యిందా? లేదా? వాసు ఏం చేశాడు? అనేది సినిమా.

విశ్లేషణ (Anumana Pakshi Review In Telugu): సోషల్ మీడియా యుగంలో లైక్స్, కామెంట్స్, షేర్స్ కోసం పరితపించే జనాలు ఎంతో మంది. వైరల్ అవ్వాలని రకరకాల కంటెంట్స్ చేయడం, పోస్ట్ చేయడం, నలుగురిలో నవ్వుల పాలు కావడం... తరచూ కనిపించే దృశ్యాలే. అయితే... వైరల్ అవ్వాలని ప్లాన్ చేస్తే కాలేరు. నిజాయతీగా ప్రయత్నిస్తే, ఆ కంటెంట్ బావుంటే వైరల్ అవుతుంది. అది దర్శకుడు విమల్ కృష అర్థం చేసుకున్నట్టు లేరు. తమ సినిమా విజయం సాధించాలని, సన్నివేశాలు వైరల్ అవ్వాలనే తాపత్రయం తప్ప... కంటెంట్ బావుందా? లేదా? ఈ జోక్ నవ్విస్తుందా? లేదా? అనేది చూసుకోలేదు.

హీరో వరకు ఓ కాన్సెప్ట్ అనుకున్నారు. ప్రతి క్షణం, ప్రతి విషయాన్ని అనుమానించే కుర్రాడు... తన మనసులో మొలకెత్తిన ప్రతి అనుమానాన్ని సోషల్ మీడియాలో షేర్ చేస్తుంటాడు. ఆ క్యారెక్టరైజేషన్ వరకు ఓకే. కానీ సన్నివేశాల్లో స్టఫ్ ఉండాలి కదా! హీరో వ్యక్తం చేసే అనుమానాలు కానీ, ఆ సన్నివేశాలు కానీ అస్సలు నవ్వించలేదు. పైగా ప్రేక్షకుల సహనానికి పరీక్ష పెట్టేలా ఉన్నాయి. కశ్మీర్ వెళ్లిన తర్వాత కూడా కథలో కథలిక రాలేదు. సోషల్ మీడియాలో వైరల్ అవ్వాలని ఓ పోలీస్ క్యారెక్టర్ చేసే రీల్స్ మరింత విసుగు తెప్పించాయి. కామెడీ సినిమాలు ప్రేక్షకులకు నచ్చాలంటే సింపుల్ రూల్ ఒక్కటే... జోక్స్ పేలాలి. సన్నివేశాలు నవ్వించాలి. ఈ సినిమాలో ఆ రెండూ జరగలేదు. కామెడీ లేనప్పుడు కథలో లూప్ హోల్స్ మీద ఆడియన్స్ అటెన్షన్ పడుతుంది. ఇందులోనూ అటువంటది జరుగుతుంది. రమ్యను వర్మ ఎందుకు అంత ప్రేమించాడు? మరొకర్ని ప్రేమించిన అమ్మాయి హీరోకి ఎందుకు ముద్దు పెట్టింది? వంటివి రాకపోవు.

శ్రీచరణ్ పాకాల సంగీతంలో గుర్తుండే పాటలు లేవు. కొన్ని సన్నివేశాల్లో నేపథ్య సంగీతం అసలు నచ్చలేదు. శ్రీచరణ్ మ్యూజిక్ చేశాడంటే నమ్మలేం. దర్శక రచయిత విమల్ కృష్ణ కథ, కథనాల్లో క్లాప్స్ కొట్టి ఎంజాయ్ చేసేంత కామెడీ మోమెంట్స్ లేవు. కెమెరా వర్క్ సోసోగా ఉంది. కశ్మీర్ ఎంట్రీ సన్నివేశాల్లో ఏఐ విజువల్స్ ఎందుకో అర్థం కాదు. నిర్మాణ విలువలు కథకు తగ్గట్టు ఉన్నాయి.

కామెడీ వర్కవుట్ అయితే ఆర్టిస్టులకు పేరు వస్తుంది. అలా జరగలేదు గనుక వాళ్ల ప్రయత్నం వృథా అయ్యింది. రాగ్ మయూర్ వెరైటీ డ్రెస్సింగ్ కొంత రిజిస్టర్ అవుతుంది. కశ్మీర్ సన్నివేశాల్లో అజయ్ కాస్ట్యూమ్స్ కూడా! హీరోయిన్ మెరిన్ ఫిలిప్ తన పాత్రకు తగ్గట్టు నటించారు. ఆమె వల్ల ఆ పాత్రకు యాడ్ అయిన వాల్యూ ఏమీ లేదు. సీనియర్ హీరోయిన్ రాశి, ప్రిన్స్, బ్రహ్మాజీ తదితరులు ఉన్నా ఎవరికీ సరైన సన్నివేశాలు పడలేదు.

Also Read: Kayadu Lohar Role In Paradise - అప్పుడు 'పెద్ది'లో జాన్వీ... ఇప్పుడు 'ప్యారడైజ్'లో కయాదు... శ్రీకాంత్ ఓదెల సారీ చెబుతాడా?

Anumana Pakshi Verdict: అనుమానం పెను భూతం అన్నాడో కవి. ఒక్కసారి మెదడులోకి అనుమానం అనే పురుగు చేరితే ప్రశాంతంగా ఉండటం కష్టం. ప్రశాంతత లేని కుర్రాడు తన అనుమానంతో ఇతరుల ప్రశాంతత చెడగొడితే అనే కాన్సెప్ట్ నుంచి కామెడీ జనరేట్ చేయవచ్చు. కానీ అనుమాన పక్షిలో అందర్నీ నవ్వించే కామెడీ సీన్ ఒక్కటంటే ఒక్క కూడా లేదు. టాలెంటెడ్ ఆర్టిస్టులు తెరపై చేసిన ప్రయత్నాలు ఏవీ మెప్పించలేదు. ప్రారంభం నుంచి చివరి వరకు పక్క చూపులు చూసేలా చేసిన చిత్రమిది.

ఈ అనుమాన పక్షికి ఎంత దూరంగా ఉంటే అంత మంచిది - ఇది మా మాట కాదు, సినిమా పూర్తి అయ్యాక స్క్రీన్ మీద ఓ పక్షితో మరొక పక్షి చెప్పిన మాట.

Also Read: The Paradise OTT Platform - ఓటీటీలోకి 'ది ప్యారడైజ్'... నాని యాక్షన్ డ్రామా ఎందులో స్ట్రీమింగ్ అవుతుందంటే?