Chiranjeevi reacts on Mansoor Ali Khan comments on Trisha: కథానాయిక త్రిష పరువుకు భంగం కలిగించే విధంగా నటుడు మన్సూర్ అలీ ఖాన్ వివాదాస్పద వ్యాఖ్యలు చేశారు. తోటి మహిళా నటిపై ఆయన అనుచిత, హేయమైన వ్యాఖ్యలు చేయడం ద్వారా సమాజంలో మహిళల పట్ల ఆయనకు ఎటువంటి అభిప్రాయం ఉందనేది ఆ వ్యాఖ్యల ద్వారా అర్థం అవుతోంది.
దళపతి విజయ్ హీరోగా లోకేష్ కనగరాజ్ దర్శకత్వం వహించిన 'లియో' సినిమాలో త్రిష కథానాయిక. మన్సూర్ అలీ ఖాన్ ఓ ప్రధాన పాత్రలో నటించారు. అయితే... ఆ సినిమాలో తనకు, త్రిషకు మధ్య రేప్ సన్నివేశం లేకపోవడం పట్ల అసంతృప్తి వ్యక్తం చేశారు మన్సూర్. గతంలో ఎంతో మంది హీరోయిన్లతో రేప్ సీన్లు చేశానని, త్రిషతో కూడా ఉంటుందని అనుకున్నానని ఆయన అనుచిత వ్యాఖ్యలు చేశారు. వాటిని మెగాస్టార్ చిరంజీవి ఖండించారు.
వక్ర బుద్ధితో కొట్టుమిట్టాడుతున్నాడు! - చిరంజీవి
త్రిష గురించి మన్సూర్ అలీ ఖాన్ చేసిన వ్యాఖ్యలు తన దృష్టికి వచ్చాయని మెగాస్టార్ చిరంజీవి ఈ రోజు ఉదయం సోషల్ మీడియా 'ఎక్స్' (X / twitter)లో పేర్కొన్నారు. ''మన్సూర్ అలీ ఖాన్ వ్యాఖ్యలు మహిళలను అగౌరవపరిచే విధంగా ఉన్నాయి. నటీమణులకు మాత్రమే కాదు... మహిళలు ఎవరికైనా అసహ్యాన్ని కలిగిస్తాయి. అతను వక్రబుద్ధితో కొట్టుమిట్టాడుతున్నాడు'' అని మన్సూర్ వ్యాఖ్యలను చిరంజీవి తీవ్రంగా ఖండించారు. త్రిషకు అండగా నిలబడుతున్నట్లు ఆయన తెలియజేశారు. త్రిషకు మాత్రమే కాదని, ఇటువంటి వ్యాఖ్యలు ఎదుర్కొనే మహిళలు అందరికీ తాను అండగా ఉంటానని చిరంజీవి పేర్కొన్నారు.
త్రిషకు అండగా నితిన్ సైతం...
''త్రిషపై మన్సూర్ అలీ ఖాన్ చేసిన నీచమైన, కించపరిచే వ్యాఖ్యలను నేను బలంగా ఖండిస్తున్నాను. పురుషాహంకారానికి ఈ సమాజంలో చోటు లేదు. మన చలన చిత్ర పరిశ్రమలో మహిళలపై జరుగుతున్న ఇటువంటి వ్యాఖ్యలకు వ్యతిరేకంగా నిలబడాలని నేను అందరికీ విజ్ఞప్తి చేస్తున్నాను'' అని నితిన్ సోమవారం ట్వీట్ చేశారు.
Also Read : త్రిషకు ఆ తమిళ స్టార్ హీరో లాంటి భర్త కావాలట - పెళ్లి గురించి ఏమంటున్నారో తెలుసా?
మన్సూర్ అలీ ఖాన్ వ్యాఖ్యలను జాతీయ మహిళా కమిషన్ (National Commission for Women) సుమోటో కేసుగా స్వీకరించింది. మన్సూర్ మీద ఐపీసీ 509బి, ఇతర సెక్షన్స్ కింద కేసు నమోదు చేసి చర్యలు తీసుకోవాలని పోలీసులను ఆదేశించింది. 'లియో' దర్శకుడు లోకేష్ కనగరాజ్, కథానాయికలు మాళవికా మోహనన్, మంజిమ మోహన్, గాయని చిన్మయి సహ పలువురు నటీనటులు మన్సూర్ అలీఖాన్ చేసిన అసభ్యకరమైన వ్యాఖ్యలపై అగ్రహాన్ని వ్యక్తం చేశారు.
Also Read : మంగళవారం సినిమా రివ్యూ: అమ్మాయిలో లైంగిక వాంఛ ఎక్కువ అయితే? కోరికలు పెరిగితే?