యంగ్ రెబల్ స్టార్ ప్రభాస్ నటిస్తున్న పాన్ వరల్డ్ మూవీ ‘ప్రాజెక్ట్ K’. నాగ్ అశ్విన్ దర్శకత్వంలో తెరకెక్కుతున్న ఈ సినిమాలో బాలీవుడ్ బ్యూటీ దీపికా పదుకొనే హీరోయిన్ గా నటిస్తోంది. లెజెండరీ యాక్టర్ బిగ్ బీ అమితాబ్ బచ్చన్, అందాల భామ దిశా పటాని కీలక పాత్రలు పోషిస్తున్నారు. వైజయంతీ మూవీస్ పతాకంపై అశ్వినీ దత్ భారీ బడ్జెట్ తో నిర్మిస్తున్నారు. ఈ సైన్స్ ఫిక్షన్ థ్రిల్లర్ అత్యంత ఆసక్తిగా ఎదురుచూస్తున్న సినిమాలలో ఒకటిగా నిలిచింది. రూ. 500 కోట్లకు పైగా బడ్జెట్‌తో ప్రతిష్టాత్మకంగా రూపొందిస్తున్నారు.
‘ప్రాజెక్ట్ K’ చిత్రంలో విలన్ రోల్ కోసం కమల్ తో సంప్రదింపులు
తాజాగా ‘ప్రాజెక్ట్ K’ సినిమాకు సంబంధించి క్రేజ్ అప్ డేట్ అందుతోంది. లెజెండరీ నటుడు కమల్ హాసన్ తో ఈ చిత్ర నిర్మాతలు మేకర్స్‌తో చర్చలు జరుపుతున్నట్లు తెలిసింది. ఈ చిత్రంలో ఆయనను విలన్ పాత్ర పోషించాలని కోరుతున్నారట. అయితే, ఈ చర్చలు ఇంకా ప్రాథమిక స్థాయిలోనే ఉన్నట్లు సమాచారం. మరికొద్ది రోజుల్లోనే ఈ అంశంపై క్లారిటీ వచ్చే అవకాశం ఉంది. ఈ సినిమా కోసం కేవలం 20 రోజులు కాల్షీట్లు ఇస్తే సరిపోతుందని మేకర్స్ అడుగుతున్నారు. ఇందుకోసం అడిగినంత రెమ్యునరేషన్ ఇస్తామని ఆఫర్ చేసినట్లు తెలుస్తోంది. ఒకవేళ ఈ ఆఫర్ కు కమల్ అంగీకరిస్తే ‘ప్రాజెక్ట్ K’ మూవీ ప్రపంచ వ్యాప్తంగా ఉన్న ట్రేడ్ సర్కిల్‌లలో హాట్ కేక్ అయ్యే అవకాశం ఉంది.
విష్ణువు మోడరన్ అవతార్- అశ్వినీ దత్
‘ప్రాజెక్ట్ K’ సినిమా జానర్ గురించి నిర్మాత అశ్వీని దత్ ఇప్పటికే పలు విషయాలు వెల్లడించారు. “ఈ చిత్రంలో ఫాంటసీ అండ్ సైన్స్ ఫిక్షన్ అంశాలు ఎక్కువగా ఉన్నాయి. ఇది విష్ణువు యొక్క మోడరన్ అవతారం గురించి ఉంటుంది. కానీ అదే సమయంలో, సెంటిమెంట్ కూడా ఎక్కువగా ఉంటుంది. యాక్షన్ సీక్వెన్స్ లను పర్యవేక్షించడానికి నలుగురైదుగురు ఇంటర్నేషనల్ స్టంట్ కొరియోగ్రాఫర్ లను తీసుకొచ్చాం. సినిమాలో మీరు చూసే ప్రతి ఒక్కటీ ఆశ్చర్యపరుస్తుంది” అని చెప్పుకొచ్చారు.
వచ్చే ఏడాది జనవరి 12న ‘ప్రాజెక్ట్ K’ విడుదల
‘ప్రాజెక్ట్ K’ సినిమా 2024 జనవరి 12న సంక్రాంతి కానుకగా ప్రపంచ వ్యాప్తంగా థియేటర్లలోకి రానుంది. తెలుగు తమిళ మలయాళ కన్నడ హిందీ భాషల్లోనే కాకుండా, పలు విదేశీ భాషల్లో ఈ చిత్రాన్ని విడుదల చేయనున్నారు. ఇండియన్ సినిమాలో ఇప్పటివరకు అత్యధిక బడ్జెట్ తో రూపొందించబడిన చిత్రాల్లో ఒకటిగా చెప్పబడుతోంది. ఈ చిత్రానికి డానీ శాంచెజ్ లోపెజ్ సినిమాటోగ్రఫీ చేస్తున్నారు. సంతోష్ నారాయణన్ సంగీతం అందిస్తున్నారు. ‘ప్రాజెక్ట్ K’ కంటే ముందు, ప్రభాస్ ‘ఆది పురుష్’, ‘సలార్’ సినిమాలతో ప్రేక్షకుల ముందుకు రానున్నాడు. ఇప్పటికే ‘ఆది పురుష్’ మూవీ షూటింగ్ కంప్లీట్ అయ్యింది. ప్రస్తుతం పోస్ట్ ప్రొడక్షన్ పనులు జరుగుతున్నాయి. అటు ‘కెజిఎఫ్’ దర్శకుడు ప్రశాంత్ నీల్ తో కలిసి ‘సలార్’ మూవీ చేస్తున్నాడు. మారుతీ డైరెక్షన్ లోనూ ‘రాజా డీలక్స్’ అనే సినిమాలో నటిస్తున్నాడు.