నందమూరి బాలకృష్ణ హోస్ట్‌గా ‘ఆహా’ ఓటీటీ యాప్‌లో టెలికాస్ట్ అవుతున్న ‘అన్‌స్టాపబుల్ విత్ ఎన్‌బీకే’ టాక్ షోకు ప్రభాస్, గోపీచంద్ వచ్చిన సంగతి తెలిసిందే. ఇందులో ప్రభాస్‌కు సంబంధించిన ప్రోమోను ఇప్పటికే విడుదల చేయగా, ఇప్పుడు గోపీచంద్ ప్రోమో కూడా వచ్చేసింది. ఇప్పటివరకు అన్‌స్టాపబుల్‌లో వచ్చిన క్రేజీ ఎపిసోడ్లలో ఇది కూడా ఒకటి.
ఈ ప్రోమోలో గోపీచంద్ ఎంట్రీ ఇవ్వగానే ప్రభాస్ ఆప్యాయంగా హగ్ చేసుకుంటాడు. గోపీచంద్ కూర్చోగానే బాలయ్య అడిగిన ఏదో ప్రశ్నకు ‘అది 2008లో కాదు అనుకుంట...’ అని రిప్లై ఇవ్వగానే ప్రభాస్ పక్కనుంచి ‘ఒరేయ్’ అని గట్టిగా అరుస్తాడు. ఆ తర్వాత ఏదో ప్రశ్నకు పక్కకి తిరిగి సిగరెట్లు కాలుస్తున్నట్లు సైగల రూపంలో చూపిస్తాడు. చివర్లో బాలయ్య ‘అదీ ఒంగోలియన్స్ అంటే’ అనడంతో ప్రోమో కట్ అవుతుంది. డిసెంబర్ 30వ తేదీన ఈ ఎపిసోడ్ టెలికాస్ట్ కానుందని వార్తలు వస్తున్నాయి. దీనికి సంబంధించిన వివరాలను ఆహా ఇంకా ప్రకటించలేదు.
గతంలో అన్‌స్టాపబుల్ షోలో ప్రభాస్ ఉన్న కొన్ని ఫొటోలు, ఒక వీడియో ఆన్‌లైన్‌లో లీకైంది. ఈ వీడియోలో ప్రభాస్ డ్రెస్సింగ్‌పై బాలయ్య కామెంట్ చేశారు. ‘నీ షర్టులు అన్నీ 3XL, 4XL యేనా అని’ అని బాలకృష్ణ అడిగినప్పుడు ‘నాకు షూలు దొరకడం కష్టం. షూ సైజ్ 13’ అని ప్రభాస్ సమాధానం ఇస్తారు. దానికి బాలకృష్ణ ఫన్నీగా ‘వెంకటేశ్వర స్వామి పాదం అంటారు దాన్ని.’ అని కామెంట్ చేశాడు.
త్వరలో పవర్ స్టార్ పవన్ కళ్యాణ్, త్రివిక్రమ్ కూడా ఒక ఎపిసోడ్‌కు రానున్నట్లు వార్తలు వస్తున్నాయి. దీనికి సంబంధించిన వివరాలు తెలియాల్సి ఉంది. ఈ సీజన్ మొదటి ఎపిసోడ్‌కు ఏపీ ప్రతిపక్ష నాయకుడు నారా చంద్రబాబు, ఆయన కుమారుడు నారా లోకేష్ రాగా, ఆ తర్వాత అడివి శేష్, శర్వానంద్ ఒక ఎపిసోడ్‌కు, విష్వక్సేన్, సిద్ధు జొన్నలగడ్డ ఒక ఎపిసోడ్‌కు, నల్లారి కిరణ్ కుమార్ రెడ్డి, రాధిక వచ్చారు.
బాలకృష్ణ హీరోగా నటిస్తున్న ‘వీర సింహా రెడ్డి’ సంక్రాంతి సందర్బంగా జనవరి 13వ తేదీన థియేటర్లలో విడుదల కానుంది. అనిల్ రావిపూడి దర్శకత్వంలో బాలకృష్ణ తర్వాతి సినిమాకు సంబంధించిన పూజా కార్యక్రమాలు కూడా పూర్తి అయ్యాయి. ఈ సినిమాకు ‘బ్రో ఐ డోంట్ కేర్’ అనే టైటిల్ నిర్ణయించినట్లు తెలుస్తోంది.
ఇక ప్రభాస్ చేతిలో ప్రస్తుతం చాలా సినిమాలు ఉన్నాయి. నాగ్ అశ్విన్ దర్శకత్వంలో ‘ప్రాజెక్ట్ కే’, ప్రశాంత్ నీల్ దర్శకత్వంలో ‘సలార్’, మారుతి దర్శకత్వంలో ఒక సినిమా తెరకెక్కుతున్నాయి. ‘ఆదిపురుష్’ కూడా వచ్చే సంవత్సరం విడుదల కానుంది. గోపీచంద్ ప్రస్తుతం శ్రీవాస్ దర్శకత్వంలో ఒక సినిమాలో నటిస్తున్నారు.