రీసెంట్ గా 'ఖుషి' వంటి ఫ్యామిలీ అండ్ రొమాంటిక్ లవ్ డ్రామా తో ప్రేక్షకులు ముందుకు వచ్చిన విజయ్ దేవరకొండ ఇప్పుడు మరోసారి అదే జోనర్ లో సినిమా చేసేందుకు సిద్ధమయ్యాడు. ఫ్యామిలీ ఎంటర్టైన్మెంట్స్ కి కేరాఫ్ అడ్రస్ గా పేరు తెచ్చుకున్న పరశురామ్ తో తన నెక్స్ట్ ప్రాజెక్ట్ చేస్తున్నాడు. 'గీత గోవిందం' వంటి బ్లాక్ బస్టర్ తర్వాత విజయ్ దేవరకొండ - పరుశురాం కాంబినేషన్లో మరో సినిమా రాబోతున్న విషయం తెలిసిందే. శ్రీ వెంకటేశ్వర క్రియేషన్స్ బ్యానర్ పై శిరీష్ తో కలిసి దిల్ రాజు ఈ సినిమాని నిర్మిస్తున్నారు. 'VD13' అనే వర్కింగ్ టైటిల్ తో షూటింగ్ శరవేగంగా జరుపుకుంటున్న ఈ చిత్రంలో విజయ్ సరసన మృణాల్ ఠాగూర్ కకథానాయికగా నటిస్తోంది.
SVC సంస్థలో వస్తున్న 54వ చిత్రం ఇది. పరశురాం మార్క్ ఫ్యామిలీ ఎమోషన్స్, రొమాన్స్, ఎంటర్టైన్మెంట్ కలబోతగా ఈ సినిమా తెరకెక్కుతున్నట్లు తెలుస్తోంది. ఇదిలా ఉంటే తాజాగా సినిమా రిలీజ్ డేట్ తో పాటు షూటింగ్ పై లేటెస్ట్ అప్డేట్ ను అందించారు మేకర్స్. పరశురాం - విజయ్ దేవరకొండ కాంబోలో తెరకెక్కుతున్న 'VD13' మూవీ షూటింగ్ 50% వరకు పూర్తయినట్లు ఈ సందర్భంగా మేకర్స్ వెల్లడించారు. అంతేకాకుండా త్వరలోనే టైటిల్ తో పాటు ఫస్ట్ లుక్ ను రివిల్ చేస్తామని తెలియజేస్తూ 2024 సంక్రాంతి కానుకగా సినిమాని ప్రేక్షకుల ముందుకు తీసుకురాబోతున్నట్లు అధికారికంగా ప్రకటించారు.
సంక్రాంతికి ఇంకా నాలుగు నెలల సమయం ఉంది. ఇప్పటికే 50 శాతం షూటింగ్ పూర్తి చేసుకుంది. మిగతా భాగాన్ని వీలైనంత త్వరగా పూర్తిచేసి కచ్చితంగా సంక్రాంతికి సినిమాను విడుదల చేసేందుకు మేకర్స్ ప్లాన్ చేసినట్లు తెలుస్తోంది. 'గీత గోవిందం' తర్వాత విజయ్ - పరశురామ్ కాంబోలో రాబోతున్న సినిమా కావడంతో ఈ ప్రాజెక్టుపై భారీ అంచనాలు నెలకొన్నాయి. నిజానికి ఈ సినిమా కోసం ముందుగా విజయ్ సరసన రష్మిక మందనను హీరోయిన్ గా అనుకున్నారు. కానీ ఏమైందో తెలియదు ఆమె స్థానంలో మృణాల్ ఠాకూర్ ని తీసుకున్నారు.
గోపి సుందర్ సంగీతం అందిస్తున్న ఈ చిత్రానికి కేయూ మోహనన్ సినిమాటోగ్రాఫర్ గా వ్యవహరిస్తున్నారు. వాసు వర్మ క్రియేటివ్ ప్రొడ్యూసర్ కాగా, మార్తాండ్ కే వెంకటేష్ ఎడిటింగ్ బాధ్యతలు చేపడుతున్నారు. దర్శకుడు పరశురాం చివరగా మహేష్ బాబుతో 'సర్కారు వారి పాట' అనే సినిమా చేసిన విషయం తెలిసిందే. తన మార్క్ ఫ్యామిలీ ఎమోషన్స్ ని కాస్త పక్కన పెట్టి సోషల్ మెసేజ్ తో ఈ సినిమాను తెరకెక్కించగా అనుకున్నంత స్థాయిలో ప్రేక్షకులను ఆకట్టుకోలేకపోయింది.
దీంతో ఈసారి ప్రయోగాల జోలికి పోకుండా తన మార్క్ ఆఫ్ ఎంటర్టైన్మెంట్ ఫ్యామిలీ ఎమోషన్స్ నేపథ్యంలోనే 'VD13' ప్రాజెక్టును తెరకెక్కిస్తున్నారు. మరోవైపు వచ్చే ఏడాది సంక్రాంతి రేసులో ఇప్పటికే మహేష్ బాబు 'గుంటూరు కారం', నాగర్జున 'నా సామిరంగా', రవితేజ 'ఈగల్', 'ప్రభాస్ కల్కి 2898' లాంటి సినిమాలు ఉన్నాయి. తాజాగా ఈ లిస్ట్ లో లో విజయ్ దేవరకొండ - పరశురాం మూవీ కూడా చేరడంతో బాక్సాఫీస్ వద్ద ఈసారి సంక్రాంతి పోరు మరింత ఆసక్తికరంగా మారనుంది.
Also Read : తలపతి ఫ్యాన్స్ కి బిగ్ షాక్ - 'లియో' ఆడియో లాంచ్ రద్దు, కారణం అదేనా?