Theatrical Releases This Week: లవర్స్ డే స్పెషల్... థియేటర్లలో ఈ వారం సందడి - రెండు రీ రిలీజులు, 10 కొత్త సినిమాలు

Theatrical Releases This Week Telugu: ఫిబ్రవరి 14న ప్రేమికుల దినోత్సవం. ఆ రోజుకు ముందు, ఆ రోజు... వాలెంటైన్స్ డే స్పెషల్‌గా ఈ వారంలో థియేటర్లలోకి వచ్చే తెలుగు సినిమాలు ఏవో చూడండి.

వాలెంటైన్స్ వీక్: లవ్ స్టోరీస్ రీ - రిలీజ్ & కొత్త సినిమాల సందడి... థియేటర్లలో ఏం చూడాలి?

Source : ABPLIVE AI

వాలెంటైన్స్ వీక్ సందడి మొదలైంది. ప్రేమికుల దినోత్సవానికి ముందు మెగా పవర్ స్టార్ రామ్ చరణ్ 'ఆరెంజ్' రీ రిలీజ్ అయ్యింది. ఈ వారం మరో రెండు ప్రేమకథా చిత్రాలు మళ్ళీ థియేటర్లలోకి సందడి చేయడానికి రెడీ అయ్యాయి. ఫిబ్రవరి 9వ తేదీ నుంచి 15 వరకు... థియేటర్లలోకి రాబోయే కొత్త తెలుగు సినిమాలు ఏమిటి? రీ రిలీజ్ కాబోయే ఫిలిమ్స్ ఏమిటి? హిందీ సినిమాలు ఏం ఉన్నాయి? అనేది తెలుసుకోండి. 

నాగ చైతన్య 'లవ్ స్టోరీ'తో పాటు 'మనసంతా నువ్వే'
Naga Chaitanya Love Story Re Release 2026: యువ సామ్రాట్ అక్కినేని నాగ చైతన్య కథానాయకుడిగా శేఖర్ కమ్ముల దర్శకత్వం వహించిన సినిమా 'లవ్ స్టోరీ'. ఇందులో సాయి పల్లవి కథానాయిక. ప్రేమికుల దినోత్సవం సందర్భంగా ఫిబ్రవరి 14న రీ రిలీజ్ చేస్తున్నారు. ఉదయ్ కిరణ్, రీమా సేన్ జంటగా వీఎన్ ఆదిత్య దర్శకత్వంలో ఎంఎస్ రాజు నిర్మించిన 'మనసంతా నువ్వే' కూడా ఫిబ్రవరి 14న రీ రిలీజ్ అవుతోంది.

విశ్వక్ సేన్ హీరోగా అనుదీప్ తీసిన నవ్వుల 'ఫంకీ'
Funky Movie Release Date: సంక్రాంతికి విడుదలైన 'అనగనగా ఒక రాజు'తో సితార ఎంటర్‌టైన్‌మెంట్స్‌ ఎస్ నాగవంశీ మళ్ళీ సక్సెస్ ట్రాక్‌లోకి వచ్చారు. ఆ సినిమా వంద కోట్లకు పైగా కలెక్ట్ చేసింది. నెల తిరక్కుండా మరో సినిమాతో వస్తున్నారు నాగవంశీ. విశ్వక్ సేన్ హీరోగా ఆయన నిర్మించిన సినిమా 'ఫంకీ'. సాయి సౌజన్య మరో నిర్మాత. 'జాతి రత్నాలు' ఫేమ్ కేవీ అనుదీప్ దర్శకత్వం వహించిన చిత్రమిది. కయాదు లోహర్ హీరోయిన్. ఫిబ్రవరి 13న థియేటర్లలోకి రానుందీ సినిమా. ట్రైలర్ నవ్వించింది. ఈ సినిమా కూడా అలాగే నవ్విస్తుందని చిత్ర బృందం చెబుతోంది.

తెలుగు, తమిళ భాషల్లో రొమాంటిక్ 'కపుల్ ఫ్రెండ్లీ'
యువ కథానాయకుడు సంగీత్ శోభన్ నటించిన తాజా సినిమా 'కపుల్ ఫ్రెండ్లీ'. ఈ చిత్రంలో మానసా వారణాసి కథానాయిక. రొమాంటిక్ ఎంటర్‌టైనర్‌గా తెరకెక్కిన ఈ సినిమా తెలుగు, తమిళ భాషల్లో ఫిబ్రవరి 14న విడుదల అవుతోంది. ఆల్రెడీ విడుదలైన ట్రైలర్, పాటలు యువతను ఆకట్టుకున్నాయి.

అర్జున్ దర్శకత్వంలో అమ్మాయి 'సీతా పయనం'
యాక్షన్ కింగ్ అర్జున్ సర్జాలో కథానాయకుడితో పాటు దర్శకుడు ఉన్నారు. ఆయన దర్శకత్వం వహించిన తాజా సినిమా 'సీతా పయనం'. ఇందులో ఆయన కుమార్తె ఐశ్వర్య కథానాయిక. నిరంజన్ కథానాయకుడు. ఫిబ్రవరి 14న ఈ సినిమా విడుదల కానుంది. ఇందులో అర్జున్, ఆయన మేనల్లుడు ధృవ్ సర్జా కీలక పాత్రలు చేశారు.

తెలుగులోకి మలయాళ హిట్ 'చథా పచ్చ'!
సౌబిన్ షాహిర్ 'రోమాంచం', మమ్ముట్టి 'భ్రమ యుగం'తో మన తెలుగు ప్రేక్షకులు కొందరికి తెలిసిన నటుడు అర్జున్ అశోకన్. ఆయన ఓ ప్రధాన పాత్రలో నటించిన మలయాళ సినిమా 'చథా పచ్చ'. రోషన్ మాథ్యూ, లక్ష్మీ మీనన్, విషాక్ నాయర్, సాయి కుమార్, సిద్ధిఖీ ఇతర ప్రధాన తారాగణం. జనవరి 22న మలయాళంలో విడుదలైంది. తెలుగులో ఫిబ్రవరి 13న విడుదల చేస్తున్నారు.

హిందీలో షాహిద్ కపూర్ 'ఓ రోమియో' రిలీజ్!
Shahid Kapoor O Romeo Release Date: హిందీ సినిమాల కోసం చూసే తెలుగు ప్రేక్షకులకు ఈ వారం షాహిద్ కపూర్ 'ఓ రోమియో' ఉంది. విశాల్ భరద్వాజ్ దర్శకత్వం వహించిన ఈ యాక్షన్ థ్రిల్లర్ సినిమాలో 'యానిమల్', 'స్పిరిట్' ఫేమ్ తృప్తి డిమ్రి హీరోయిన్. నానా పటేకర్, తమన్నా భాటియా, దిశా పటానీ సైతం నటించారు. ఫిబ్రవరి 13న ఈ సినిమా విడుదల. 

ఆనంద్ ఎల్ రాయ్ నిర్మాణంలో ఆదర్శ్ గౌరవ్, షనాయా కపూర్ జంటగా నటించిన సినిమా 'తూ యా మై'. బిజాయ్ నంబియార్ దర్శకత్వం వహించారు. ఈ సినిమా కూడా ఫిబ్రవరి 13న థియేటర్లలోకి వస్తోంది.

• శివ కంఠమనేని, ఎస్తేర్, ధన్యా బాలకృష్ణ, బండారు సుప్రీతా నాయుడు ప్రధాన పాత్రల్లో రూపొందిన హారర్ థ్రిల్లర్ 'అమరావతికి ఆహ్వానం' చిత్రాన్ని ఫిబ్రవరి 13న విడుదల చేస్తున్నారు.
• త్రిగుణ్ అలియాస్ అరుణ్ అదిత్ హీరోగా నటించిన తమిళ్ సినిమా 'స్వీటీ నాటీ క్రేజీ'. ఇదొక అడల్ట్ కామెడీ. తెలుగులోనూ డబ్బింగ్ చేస్తున్నారు. ఫిబ్రవరి 13న రిలీజ్.
• మేనల్లుడు అజయ్ దిషాన్ హీరోగా విజయ్ ఆంటోనీ నిర్మించిన తమిళ సినిమా 'పూకీ'. ఫిబ్రవరి 13న విడుదల. తెలుగులో టైటిల్ మీద విమర్శలు రావడంతో 'బూకీ' అని మార్చారు. మరి, 13నే తెలుగులోనూ విడుదల చేస్తారా? లేదంటే వారం ఆగుతారా? అనేది చూడాలి. ప్రస్తుతానికి పబ్లిసిటీ అయితే నిల్.
• మ్యూజికల్ లవ్ స్టోరీగా తెరకెక్కిన 'నిలవే' చిత్రాన్ని సైతం ఫిబ్రవరి 13న విడుదల చేస్తున్నారు. పాటలతో పాటు 'అర్జున్ రెడ్డి' తరహాలో సన్నివేశాలు ఉన్నాయని పేరు వచ్చింది. ట్రైలర్ విడుదల తర్వాత సోషల్ మీడియాలో క్లిప్స్ వైరల్ అవుతున్నాయి. అలాగే... 'వన్ ప్లస్ వన్ ఆఫర్', 'స్కై' సైతం ఫిబ్రవరి 13న థియేటర్లలోకి రానున్నాయి.