Pushpa 2 First Single: ‘పుష్ప 2’ నుంచి క్రేజీ అప్డేట్ - మొదటి పాట వచ్చేస్తుంది

Pushpa 2 First Single: అల్లు అర్జున్, సుకుమార్ కాంబినేషన్‌లో తెరకెక్కుతున్న ‘పుష్ప 2’ నుండి మరో క్రేజీ అప్డేట్ వచ్చేసింది. ఇందులో నుండి మొదటి పాటను విడుదల చేయడానికి మేకర్స్ ముహూర్తం ఫిక్స్ చేశారు.

Pushpa 2 First Single Update: దాదాపుగా రెండేళ్ల క్రితం ప్రేక్షకుల ముందుకు వచ్చింది అల్లు అర్జున్ హీరోగా నటించిన ‘పుష్ప’. ఈ మూవీ మొదట్లో మిక్స్‌డ్ టాక్‌ను అందుకుంది. కానీ మెల్లగా ఇందులోని పాటలు, హీరో మ్యానరిజం ఇతర భాషా ప్రేక్షకులకు విపరీతంగా నచ్చాయి. దీంతో ‘పుష్ప 2’పై అంచనాలు పెరిగిపోయాయి. అప్పటినుంచి ఈ సినిమాలో ఎన్నో మార్పులు చేర్పులు మొదలయ్యాయి. దాని కారణంగా షూటింగ్ కూడా ఆలస్యమవుతూ వచ్చింది. ఫైనల్‌గా ఆగస్ట్ 15న ‘పుష్ప 2’ విడుదల కచ్చితంగా ఉంటుందని మేకర్స్ ప్రకటించారు. దీంతో మూడు నెలల ముందే ప్రమోషన్స్ కార్యక్రమాలను కూడా ప్రారంభిస్తున్నారు.

మొదటి పాట అప్డేట్..

ఆగస్ట్ 15.. అంటే ‘పుష్ప 2’ విడుదలకు ఇంకా చాలా సమయం ఉంది. కానీ ఇప్పటినుండే మూవీపై ఏర్పడిన హైప్‌ను మరింత పెంచే ప్రయత్నం చేస్తున్నారు మేకర్స్. అందులో భాగంగానే తాజాగా ‘పుష్ప 2’ టీజర్‌ను విడుదల చేశారు. టీజర్‌లో ఒక్క డైలాగ్ లేకపోయినా యూట్యూబ్‌లో విడుదలయిన 138 గంటల్లోనే 110 మిలియన్లకు పైగా వ్యూస్ సాధించడంతో పాటు 1.55 లైక్స్‌ను కొట్టేసింది. అంతే కాకుండా కొన్ని రోజుల పాటు ట్రెండింగ్ లిస్ట్‌లో టాప్ స్థానంలో నిలబడింది. ఇది చూసిన మేకర్స్.. ఇక ‘పుష్ప 2’కు సంబంధించిన అప్డేట్స్ విషయంలో ఆలస్యం చేయకూడదని డిసైడ్ అయ్యారనుకుంటా! అందుకే మొదటి పాట గురించి అప్డేట్ ఇస్తూ పోస్ట్ చేశారు.

పుష్ప పుష్ప..

‘ఈ ప్రపంచం పుష్ప రాజ్ గురించి పొగుడుతూ పాట పాడుతుంది’ అంటూ ‘పుష్ప 2’కు సంబంధించిన ఫస్ట్ సింగిల్ అప్డేట్ గురించి సోషల్ మీడియాలో షేర్ చేశారు మేకర్స్. రేపు.. అంటే ఏప్రిల్ 24న సాయంత్రం 4.05 నిమిషాలకు ‘పుష్ప 2’లోని మొదటి పాటకు సంబంధించిన ప్రోమో విడుదల చేయడానికి ముహూర్తం ఫిక్స్ చేశారు. ఫస్ట్ సింగిల్ టైటిల్ ‘పుష్ప పుష్ప’ అని కూడా బయటపెట్టారు. ఆగస్ట్ 15న ‘పుష్ప 2’ థియేటర్లలో సందడి చేస్తుందని మరోసారి క్లారిటీ ఇచ్చారు. దీంతో బ్యాక్ టు బ్యాక్ అప్డేట్స్ చూసి ఫ్యాన్స్ ఫుల్ ఖుషీ అవుతున్నారు. ఇన్నిరోజులు ఎదురుచూసినందుకు ఔట్‌పుట్ బాగుంటే చాలు అని ఫీలవుతున్నారు.

డీఎస్‌పీ మ్యూజిక్..

‘పుష్ప 2’లోని పాట ఎలా ఉంటుందో తెలియక ముందే.. దీని ద్వారా మరోసారి యూట్యూబ్ రికార్డ్స్ అన్నీ అల్లు అర్జున్ తిరగరాస్తాడు అంటూ ఫ్యాన్స్ కామెంట్స్ చేస్తున్నారు. సుకుమార్, అల్లు అర్జున్ కాంబినేషన్‌లో తెరకెక్కిన ‘పుష్ప’కు దేవీ శ్రీ ప్రసాద్ సంగీతాన్ని అందించాడు. ఇప్పుడు ఈ సీక్వెల్ కూడా తనే మ్యూజిక్ డైరెక్టర్‌గా వ్యవహరిస్తున్నాడు. ‘పుష్ప’లో పాటలకు వరల్డ్ వైడ్‌గా క్రేజ్ లభించినా.. బ్యాక్‌గ్రౌండ్ మ్యూజిక్ విషయంలో మాత్రం డీఎస్‌పీ ఫెయిల్ అయ్యాడని అప్పట్లో ప్రేక్షకులు నెగిటివ్ కామెంట్స్ చేశారు. కానీ తాజాగా విడుదలయిన ‘పుష్ప 2’ టీజర్‌లో బ్యాక్‌గ్రౌండ్ స్కోర్‌ను బాగా ఇవ్వడంతో ఫ్యాన్స్ అంతా మళ్లీ తనను ప్రశంసిస్తున్నారు.