Tollywood Flashback: చేతికొచ్చిన ఛాన్స్ మధ్యలో మిస్... ఛీత్కారాలు తట్టుకుని నిలబడ్డ దర్శకుడు ఎవరో తెలుసా?

Telugu Movies Interesting Facts: దర్శకుడిగా తొలి సినిమా ఎవరికైనా స్పెషల్. ఆ ఛాన్స్ చేతి వరకు వచ్చి మిస్సయితే? బాధను మాటల్లో వర్ణించలేం. కానీ, ఓ టాప్ డైరెక్టర్ సగం సినిమా తీశాక ఛాన్స్ పోగొట్టుకున్నారు.

ఒక్క ఛాన్స్ కోసం తపన పడి... వర్మతో సినిమా చేసి, సహాయకుడిగా మారిన కథ

Source : ABPLIVE AI

ఒక్క ఛాన్స్... ఒకే ఒక్క ఛాన్స్... అంటూ సినిమా అవకాశాల కోసం ప్రయత్నించే క్రియేటివ్ పర్సన్స్ ఎంతో మంది. నటుడిగా కావచ్చు లేదా దర్శకుడిగా కావచ్చు లేదా మరొక క్రాఫ్ట్ ఏదైనా కావచ్చు... మొదటి సినిమా ఎప్పటికీ మధురమే. ఒక్క ఛాన్స్ అంటూ ఎన్నో ఆఫీసులు చుట్టూ తిరిగిన తర్వాత వచ్చిన తొలి అవకాశం గురించి తర్వాత జీవితం అంతా గుర్తుంటుంది. అందుకే తొలి సినిమాకు ప్రాణం పెట్టేస్తారు. ఓ దర్శకుడు అలాగే ప్రాణం పెట్టి చేశారు. కానీ, బడ్జెట్ ప్రాబ్లమ్స్ వచ్చాయి. దాంతో సగం సినిమా తీశాక ఆయన్ను పీకి పక్కన పెట్టారు. దాంతో అదే సినిమాకు సహాయ దర్శకుడిగా పని చేశారు. ఆ కహానీలోకి వెళితే...

శిష్యుడికి రామ్ గోపాల్ వర్మ ఛాన్స్...
చివరకు వర్మ దర్శకత్వంలో విడుదల!
రామ్ గోపాల్ వర్మ దగ్గర దర్శకత్వ శాఖలో పని చేసిన పలువురు తర్వాత కాలంలో అగ్ర దర్శకులుగా ఎదిగారు. తన శిష్యులను దర్శకులుగా పరిచయం చేసిన ఘనత కూడా వర్మకు ఉంది. అయితే... ఓ శిష్యుడికి దర్శకత్వ అవకాశం ఇచ్చిన వర్మ, ఆ సినిమాను చివరకు తానే పూర్తి చేయాల్సి వచ్చింది. ఆ శిష్యుడి పేరు క్రియేటివ్ జీనియస్ కృష్ణవంశీ. ఆ సినిమా పేరు అనగనగా ఒక రోజు.

కృష్ణవంశీ దర్శకత్వంలో మొదలైన సినిమా...
మధ్యలో కెప్టెన్ బాధ్యతలు చేపట్టిన గురువు!
జేడీ చక్రవర్తి, ఊర్మిళ జంటగా నటించిన సినిమా 'అనగనగా ఒక రోజు'. ఈతరం యువతకు ఈ సినిమా తెలుసో లేదో? మీమ్స్ & ట్రోల్స్, సోషల్ మీడియాలో హల్ చల్ చేసే కామెడీ కింగ్ బ్రహ్మానందం కూడా సినిమాలో ఉన్నారు. వీడియో 'నెల్లూరు పెద్దా రెడ్డి ఎవరో తెలీదా మీకు? ఐ వాంట్ టు టాక్ నెల్లూరు పెద్దా రెడ్డి రైట్ నౌ' వీడియో ఈ సినిమాలోనిదే.

'అనగనగా ఒక రోజు' పోస్టర్లు, సినిమా చూస్తే... దర్శకుడిగా రామ్ గోపాల్ వర్మ పేరు ఉంటుంది. కానీ, సినిమా మొదలైంది మాత్రం కృష్ణవంశీ దర్శకత్వంలో. అప్పట్లో బడ్జెట్ మీద అవగాహన లేక... సగం సినిమా తీసేసరికి ఫుల్ బడ్జెట్ ఫినిష్ చేశారు. అంతే కాదు... ఒక్క ఛేజ్ సీక్వెన్స్ 12 రోజులు షూట్ చేశారు. బాలీవుడ్ సినిమాలతో బిజీగా ఉన్న వర్మ... మధ్యలో ముంబై నుంచి హైదరాబాద్ వచ్చి అసలు విషయం తెలుసుకున్నారు. ''నీకు బడ్జెట్ మీద అవగాహన లేదు. సగం సినిమాకు మొత్తం అయిపోతే ఎలా? తర్వాత ఏం చేస్తావు? నీకు నేనెంత చెప్పినా అర్థం కావడం లేదు. రేపట్నుంచి నువ్వు రాకు. మిగతా సినిమా నేనే పూర్తి చేసుకుంటా'' అని కృష్ణవంశీకి చెప్పేశారు.

వర్మ మాటలకు మొదట షాక్ తిన్న కృష్ణవంశీ... తర్వాత 'మీరు రావద్దని అంటే నేను ఎక్కడికి వెళ్ళాలి? మీరు డైరెక్షన్ చేస్తారు కాబట్టి నేను మళ్ళీ అసిస్టెంట్ అవుతా. నాకు ఎటువంటి ఫీలింగ్స్ లేవు' అని అడిగారు. వర్మ ఓకే అనడంతో అప్పటి వరకు 'యాక్షన్ కట్' చెప్పిన కృషవంశీ... తర్వాత రోజు నుంచి సహాయ దర్శకుడి పనులతో పాటు ప్రొడక్షన్ పనులు చూసుకున్నారు. హీరో హీరోయిన్లకు కార్లు, భోజనాల నుంచి హోటల్స్ వరకు అన్ని ఏర్పాట్లు చూసుకున్నారు. 'వీడి తిక్క కుదిరింది' అని కొందరు హేళన చేసినా ఆయన తట్టుకుని నిలబడ్డారు.

ఆ కృషవంశీయే దర్శకుడు అయ్యాక 'ఒక్క ఛాన్స్' అంటూ హీరోయిన్లు, హీరోల కష్టాలను 'ఖడ్గం'లో చూపించారు. కానీ, సహాయ దర్శకుల కష్టాలను మాత్రం ఏ సినిమాలోనూ చూపించలేదు.

'మనీ మనీ' అసలు డైరెక్టర్ కృష్ణవంశీయే
'అనగనగా ఒక రోజు' కంటే ముందు కృష్ణవంశీ మరో సినిమా డైరెక్ట్ చేశారు. అదే 'మనీ మనీ'. అయితే... ఆయనకు ఇష్టం లేక ఆ సినిమాకు పేరు వేసుకోలేదు. ఆ సినిమా చూశాక 'నిన్ను చూస్తే గర్వంగా ఉంది' అని వర్మ కాంప్లిమెంట్ ఇచ్చినా పేరును పక్కన పెట్టారు. దాంతో 'మనీ' డైరెక్ట్ చేసిన శివనాగేశ్వరరావు పేరును 'మనీ మనీ'కి కూడా దర్శకుడిగా వేశారు వర్మ. తర్వాత 'గులాబీ'తో దర్శకుడిగా మారారు కృష్ణవంశీ. ఆ సినిమా వర్మ తీసినట్టు ఉందని ఫీడ్ బ్యాక్ రావడంతో 'నిన్నే పెళ్ళాడతా' నుంచి తన స్టైల్ మార్చారు. కుటుంబ కథలకు కేరాఫ్ అడ్రస్ అయ్యారు. దేశభక్తి సినిమాలు చేశారు. పాటలు తెరకెక్కించడంలో తన స్టైల్ చూపించారు.