Govinda: దివాలా తీసిన గోవిందా... డబ్బుల కోసమే ప్రైవేట్ ఈవెంట్స్లో డాన్స్ చేస్తున్నారా? నోరు విప్పిన మేనేజర్
Govinda Bankrupt News: బాలీవుడ్ సీనియర్ హీరో గోవిందా దివాలా తీశారని, డబ్బుల కోసం ప్రైవేట్ ఈవెంట్లలో డాన్స్ చేస్తున్నారని రూమర్స్ వచ్చాయి. వాటిపై మేనేజర్ స్పందించారు.
తుపాకీతో తనను స్వయంగా షూట్ చేసుకుని గాయపరచుకోవడం నుంచి భార్య సునీతతో సమస్యల వరకు... ఏడాదిగా గోవిందా పలు కారణాల వల్ల వార్తల్లో నిలిచారు. ఆయనపై పలు వార్తలు వస్తున్నాయి. వాటిలో కొన్ని పుకార్లు కూడా ఉన్నాయి. గోవిందా ఆర్థిక పరిస్థతి బాలేదని, దివాలా తీశారని, డబ్బుల కోసమే ప్రైవేట్ ఈవెంట్లలో డ్యాన్స్ చేస్తున్నారని కూడా పుకార్లు వచ్చాయి. ఇప్పుడీ పుకార్లపై గోవిందా మేనేజర్ నోరు విప్పారు. అసలు విషయం చెప్పారు.
దివాలా తీసిన గోవిందా... పుకార్లపై మేనేజర్ స్పందన
గోవిందాకు చాలా కాలంగా మేనేజర్ గా ఉన్న శశి సిన్హా సంచలన విషయాలు వెల్లడించారు. బాలీవుడ్ సీనియర్ హీరో ఆర్థిక పరిస్థితి నుంచి వైవాహిక జీవితానికి సంబంధించి ఇటీవల వచ్చిన పుకార్ల వరకూ అన్నిటినీ ఖండించారు. వాటిని పూర్తిగా నిరాధారమైనవిగా పేర్కొన్నారు. చాలా సంవత్సరాలుగా బాక్సాఫీస్ వద్ద హిట్ లేనప్పటికీ... గోవిందాకు పరిశ్రమలోని ప్రముఖుల నుంచి సినిమాల్లో నటించే అవకాశాలు వస్తున్నాయని, త్వరలో ఒక పెద్ద సినిమాను ప్రకటించనున్నారని ఆయన తెలిపారు.
గోవిందా దివాలా తీశారన్న ఊహాగానాలు సోషల్ మీడియాలో కొన్ని నెలలుగా చక్కర్లు కొడుతున్నాయి. ఆగ్రా విమానాశ్రయంలో చిన్న టాక్సీ ఎక్కినప్పటి నుంచి ఊహాగానాలు మరింత పెరిగాయి. వాటి గురించి శశి మాట్లాడుతూ... ''గోవిందాకు ఒక కారు మాత్రమే కాదు... చాలా కార్లు ఉన్నాయి. ఆయన దివాలా తీశారు, బిచ్చమెత్తుకుంటున్నారు అనేవి పూర్తిగా నిరాధారమైన విషయాలు" అన్నారు. ఆ సమయంలో విమానాశ్రయంలోకి ప్రైవేట్ వాహనాలను అనుమతించలేదని తెలిపారు.
డబ్బుల కోసమే ప్రైవేట్ ఈవెంట్లలో డ్యాన్స్ చేస్తున్నారా?
ఆర్థిక ఇబ్బందుల కారణంగా గోవిందా పాఠశాలలు, ప్రైవేట్ ఈవెంట్లలో డ్యాన్స్ చేస్తున్నారన్న పుకార్లపై మేనేజర్ శశి తీవ్రంగా స్పందించారు. "అది ఆయన వృత్తి! అంటే అతను దివాలా తీశారని అర్థం కాదు" అని ANIతో అన్నారు. "ఆయన తన కుటుంబాన్ని పట్టించుకోకపోతే, ఎవరు పట్టించుకుంటారు? ఇప్పటికీ తన భార్య, పిల్లలను ఆయనే చూసుకుంటున్నారు" అని శశి స్పష్టం చేశారు.
త్వరలో గోవిందా పెద్ద సినిమాను ప్రకటిస్తారు
గోవిందాకు ఇప్పటికీ డిమాండ్ ఉందని... ఈవెంట్స్, డాన్స్ పెర్ఫార్మెన్స్ లకే కాకుండా ఆయన సినిమాలకు కూడా డిమాండ్ ఉందని శశి తెలిపారు. "ఆయన కోట్ల రూపాయల ఆఫర్లను తిరస్కరించడం నేను చూశా. ఆయనకు స్క్రిప్ట్ నచ్చకపోవచ్చు లేదా మరేదైనా కావచ్చు... పెద్ద నిర్మాతలు, నటులు వెనుక పడుతున్న మొదటి నటుడు ఆయనే. మీరు త్వరలో పెద్ద ప్రకటన వింటారు" అని శశి అన్నారు. గోవిందా హోమ్ బ్యానర్, గోవిందా ఫిల్మ్స్ ఇంటర్నేషనల్ కింద ప్రకటన ఉంటుందని హింట్ ఇచ్చారు.
గోవిందాకు ఒక్కసారే ఆర్థిక ఇబ్బందులు!
గోవిందా జీవితంలో ఒక్కసారి మాత్రమే ఆర్థిక సమస్యలు ఎదురయ్యాయని, అది గోవిందా దాతృత్వం వల్ల జరిగిందని శశి వివరించారు. "ఒకప్పుడు ఆయన తన FD తీసి, దానికి కొంత డబ్బు కలిపి ఇతరులకు సహాయం చేశారు. అందుకు ఇంటిని తాకట్టు పెట్టవలసి వచ్చింది. ఆ రుణం తీర్చడానికి... ఈవెంట్లలో పాల్గొని డ్యాన్స్ చేశారు. అంతే కానీ ఆయన ఎవరినీ డబ్బులు అడగలేదు" అని అన్నారు.
టాప్ హెడ్ లైన్స్
ట్రెండింగ్ వార్తలు
